مساء الخير ع اجمل متابعين اتمنى لكم قراءه ممتعه
🌹🦋 البارت 15 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
جان يكول بس زينب متصلح لاتكون زوجه ولا تصلح تكون ام
تصلح تكون خدامه ومربيه وبس
واني اعتقد كتلكم قبل بساع مستحيل اعترف بهذا الزواج لو شيصير
شعوري صعب اوصفه بهاي اللحضه
حسيت باهانه جبيره وذل مو طبيعي
اتمنى اصرخ باعلى صوتي واكله انت اكبر نذل شفته بحياتي
بس مااكدر اخاف يعصب ويروح لاهلي ويخبرهم كلشي
كله عمو طلكها وخليها تروح لحال سبيلها
حرام عليك هيج تسوي بيها
يعني بنيه شابه وحلوه الف من يتمناها
ميصير انت متريدها ومخليها ع ذمتك
هاي اسالوها اذا تريد اطلكها هسه اطلكها ماعندي اي مانع
بس نظوري مستحيل اخليها تاخذه وياها
مااخلي الغربه تربي لابني
كله عمو بس هاي انانيه ياحيدر
الطفل ابنها هي مو ابنك انت
لا ابني بالقانون ويبقى هذا ابن اخوي ماكو فرق بينه وبين ابني الحقيقي
ابني لتصير اناني اكثر من اللازم
يابه شتسموها سموها
القرار الاول والاخير بيدها
تشجعت شويه وحجيت
جانو كلهم بالمطبخ محمد وامير وعمو وخاله وفاطمه
كتله موافقه ابقى خدامه مدى العمر اهم شي ماافارك ابني
بس عندي شرط واحد
اذا فكرت تلمسني ولو بالغلط اطلكني باللحضه واخذ ابني ويايه
ماالك حق اطالب بابنك
ابقى هيج اني الي حياتي وانت الك حياتك
حسيت بعيونه حمر اعتقد من الغضب
كلي شوفي اذا اريد شي منج اخذه غصبآ ماعليج وع الخلفج
بس اني مميت عليج ولا اعترف بيج
ولو تبقين بس انت بالدنيه هم مااباوع عليج ولا اعترف بيج زوجه الي
تعرفين ليش لان متشرفيني تكونين زوجه الي
محمد صاح عليه
حيدر احترم نفسك وانجب
احجي عدل وكافي سوي حد لتصرفاتك
هو سكت
التفتت ع عمو
كتله عمو اشهد ع حجي ابو نور
وانت محمد وامير هم اشهدوا
بالنسبه الي اذا طلبت الطلاك معناها اتنازل عن ابني
ومن سابع المستحيل اسويها
بس اذا حاول يعاملني زوجه اله راح اطلب الطلاك واخذ ابني
كله عمو اني راح اطاوعج بهذا الشي
ومحمد كذلك هم كلي اني اوافقج الرايي وامير همين
كلي واذا انت حاولتي تتحارشين بيه
كتله الك مطلق الحريه شتسوي بيه سوي
حسيت بي يريد ينفجر بس سكت
بعدها ساله عمو منو هاي التريد تخطبها
كللهم معلمة نور البنيه عجبتني
واني اريد استقر
واريد ام لنور تربيها زين
ومستحيل الكي احسن منها تكون ام لبنتي وزوجه الي
حيل انقهرت وضجت
مو لان يريد يتزوج لا بالعكس خلي يستقر
بس مويهيني كدام اهله بهاي الطريقه
وخاصه نور حبيتها من كلبي
مستحيل امها الحقيقيه هيج تعاملها مثلي
خليتلهم الاكل وسويتلي لفه واخذت ابني وصعدت
وره شويه اجت فاطمه تهدي بيه عبالها ضايجه لان يريد يتزوج عليه
ماتدري اني ماحيته من بالي اصلا ناسيته هو زوجي
كتلها عادي ولا يهمني والله
اتمنى يتزوج بلكي يفك ياخه عني
اخاف تطلع جنها سعلوه
ويطبكون سويه عليج
يمعوده وين متوصل خل توصل
اني ذابتها وره رب العالمين
بقينه نسولف بعدها خابروني اهلي وبقيت اسولف وياهم
سالت ماما عن رنا اختي السنه سادس
خطيه بدون دورات لان ماعنده بابا
تقره بالموبايل
كالت معطله وكاعد تقره
بدت الامتحانات الابتدائيه
ودرست نور ميهمني ابوها خطيه هي
يوميه اجهز الغده لحيدر بس يادوب اسمعه صوتي
اليوم اخر يوم بالامتحانات
اجتي نور وطالعه الاولى حيل فرحت
اجتي فاطمه تكول لج هاي العوبه من اولها تكول لحيدر
بنتك اولى بغض النضر عن مستواها
خل تولي هي شاطره غصبا ماعليها
كالت طلب منه اليوم نروح نخطبها
اي بيها الخير
اكلج زينب اكولج شي بس متزعلين مني
كولي حبيبتي لويش ازعل
ليش انت بارده من ناحيته
ليش متحاولين تبدلين كدامه تخلين مكياج
يعني حقه من يتزوج
اذا انت لابسه حجاب كدامه 24 ساعه شلون ميشوف غيرج
حبيبتي اني هم راح احاجيج الصراحه
اخوج ميهمني ولا يهمني الزواج
اهم شي عندي ابني
اني مااحب اكون زوجة لواحد مغرور واناني
ويكوم ويكعد يسمعني كلام جارح
والله شنو فقيره وهو ظابط ذابح نفسه عبالك فد قندره
بسرعه سديت حلكي 🤭🤭🤭🤭عيب منها 🙈🙈🙈
كامت تضحك عادي حبي احجي الي ابالج
سدج امين اذا تحبين اني اساعد بالغلط عادي
تردين الصراحه حيل ينرفزني اخوج
والله ابد متهمني مصلحتي ولا تهمني رغباتي
سكتت
والله ميستاهلج اذا نرجع للواقع
خل يولي
لاعاب حلكج حبي
للعصر خاله اعتذرت مني
كتله خاله والله ولا يهمني التزوج والماتزوج عادي عندي
بعدها راحن عمو اخذهن
هو اجه هنا يم الجهال كعد
شويه وراح اشترالهم اني متجاهلته نهائي ولا حاسبته موجود
حيل اضوج منه
الي اباله اني وحده ساقطه
بس اني متاكده يجي يوم ويعرفني اني شنو وراح يتوسل بيه
ولو اشك بي يتوسل باحد مستحي هالمغرور يتنازل
اتاخروا هو والجهال وبقيت حيل قلقه
بعدها رجعوا
وجانو فرحانين حيل
كلتلي نور رحنه للالعاب اخذنه
كتلها شلون ترحون بملابسكم مالت البيت
كالت هاي قريبه علينه مو بعيده
وره شويه رجعوا خاله وعمو
كللها ها يوم بشري
كلتله اذا انت طابخه الطبخه لكدام شلون تريد ميوافقون
ضحك هو اول مره اشوفه يضحك
دائما عصبي
كللها اهم شي عجبتج لا
مو مهم عجبتني اني اهم شي عاجبتك انت
لايوم انت الخير والبركه عاجبتج اتزوجها معاجبتج الف وحده غيرها تتمنى اشاره مني
يوم بلي يعجبك انت
بيتك وحدك انت مو مهم تعجبني اهم شي راحتك انت
اني عند جنه مثل الورد كاعده وياي تسوى الف وحده
لعد هاي هي اني البنيه عاجبتني وحيل
جنتج الج وزوجتي الي
تعاي سولفيلي شكلولكم مكلولكم
كالو نشوف ابوها واخوتها ونخابركم
وهو اصلا طايرات من الفرح
اني ولا يهمني الموضوع ولا ابالي
سوينه العشه اني وفاطمه
بدت تسولفلي ع البنيه
كالت جبيره مو بعمرنه ابد
وشكلها عادي بس مااعرف شعجبه بيها
تكول بس يجن ساره وبنين يتخبلن والله
تحجي علي عايف الكمر ورايح ع وحده هم جبيره وهم مو حلوه
كاعد نجهز ودخل علينه
سال فاطمه كللها عجبتج لا
والله الصراحه فرق بين السما والكاع بينك وبينها
ومو حلوه ابد معجبتني
لج بابا اني اخر همي الجمال
اهم شي عندي الادب والاخلاق مو مهم الشكل
ياما بنات جمال بس بدون اخلاق وساقطات
وهاي زينب اكبر دليل كدامج
حيل ضجت
جاوبته
بس اني الحمد لله اخلاقي عاليه واشرف من الشرف
كام يضحك ههههههههههههاي ضحكتيني
هاي يااخلاق وياشرف الي تحجين عليهن
بزواجج بالسر لو من تخابريني وتتوسلين بيه بس اتزوجني
اذا شريفه هيج لعد لو ساقطه شلون
ماكدرت اجاوبه ولا بحرف
نصمت احيانا لاننا نعلم ان حديثنا لن يغير شيء 😢😢😢😔😔😔
حيل ضوجني بس اني عندي اسبابي الخاصه الي تخليني ماادافع عن نفسي
مااريد اهلي يعرفون حقيقتي ابد
اني مااخاف ع نفسي
خوفي كله ع ماما وبابا
اخاف بابا خطيه ميتحمل الصدمه
لهذا السبب اني ساكته ومااكدر اجاوبه
ادري بي نذل وسافل مستعد كلشي يسوي حتى يشوه سمعتنه
واني عندي اخوات 3 خطيه ادمرهن ويايه
وره فتره دزوا الموافقه وبدوا يجهزون
صار عيد ميلاد حبيبي نظوري
جهزت كلشي بيدي حتى الكيكه سويت مثل 👇
اي شي جاهز مجبنه بس العصائر كلشي جهزته بنفسي وجانت الصدمه واضحه بوجوه الجميع
خليت فاطمه تشتريلي كلشي من ثيم ومن مستلزمات العيد ميلاد وعجينة سكر لتزين الكيكه ومستلزمات الكيك
سويت هالمره ليزي كيك وكيك بسكت وبسبوسه
اجوي البنات
سويناها الحفله رغم ماعائليه بس حلوه
وجانو فرحانين نور ونظوري
حجه ويالبنات حيدر
كللهن مدامجن ملتمات باجر اعقد حتى نسوي حفله
الوجوه انكلبت كلاب
خيرجن شبيجن كلبتن الخلق عبالك شو شحجيت
محد حجت الكل يخاف منه
بالليل دزلي مسج
مو تفكرين ترحين ويانه
رجلج اكسرها اذا رحتي
دزيتله ومنو كلك اني اروح
حتى اذا انت تتوسل بيه اطلع
هم مراح اطلع من الباب
حيل اضوج منه لان مغرور وشايف نفسه شوفه
ههههه اخاف تزعلين اني اتوسل بيج انت شو تخبلت
ع اساس انت صاحي طبعا بيني وبين نفسي 🤣
مجاوبته
فعلا ثاني يوم راحوا
اني بقيت بالبيت
وره فتره رجع بس عمو
كال راح يتعشون بالمطعم
كلي كلشي لتسوين عشه
ابدل واخذ نظوري وياي اجيب عشه الي والج
صدك اخذه ويا
جاب كباب شوي وببسي
اتعشينه اني وعمو ونظوري
اجوي وره العشاء
قرروا العرس بعد اسبوعين
الليل كله البنات يحجن عليه
لج لتصيرين غبيه
بدلي وانزعي الحجاب واتمكيجي
وشوفي شلون راح يطير عقله لحيدر
بس اني مااريده اريد ابقه هيج
لج ثوله اكسبي ع حساب ابنج
اذا اجت هاي المعلمه بعد ميباوع بوجهج
هههه عود هسه هو يباوع بوجهي حتى بعد الزواج ميباوع
لج اذا انت حال الضيم حالج
اشو دشاديشج كلهن اللوان ملات كبار جنهن دشاديش بيبي
وجهج جنه جبار ابو المولده
حبابات خلني هيج احسن
اني بدون شي اخاف من اخوجن مو ادور اعانده والبس
شنو قصدج
سكتت اتذكرت تهديده وماالي خلكه
غيرت الموضوع
كتلهن سولفلي عن العقد شلونه
العروس شلونها
راوني الصور
شفتها البنيه وشفته هو جان فرحان مبين عله
اتمنى يستقر ويفك ياخه عني
البنيه مبين عليها جبيره سالتهن عن عمرها
كالن 33 يعني فرق بيني وبينها 13 سنه
بدت التحضيرات مالت العرس وبدل غرفته
قرروا البنيه تسوي حنه بالقاعه وتلبس البدله البيضه ع مود الصور
بس مراح يسوون زفه مقبل حيدر
يسافرون بيوم الزواج يروحون ال لبنان
اشترى لنور بدله وجانت حيل حلوه
بقه يومين للحنه
حيدر : معلمة نور بقه اتصال بيني وبينها دائما اتصل اسال عن نور
البنيه عجبتني وجانت ثكيله
وجبيره وواعيه يعني مو طفله
صار تعارف بين وبينها
اني اعرف اسمها من نور
اسمها حنان سالتها عن عمرها كالت 33 سنه اصغر مني بسنتين
اني هسه عمري 35
سالتها شعجب لهسه ممتزوجه
كالت دائما يجون خطابه بس متصير
لو جبير بالعمر لو اصغر مني لو يجوني ع راتبي لو لغيرها
هواي اسباب
بعدين فكرت كلت لازم اني استقر بحياتي
خلي اتزوج لان زينب بالنسبه الي من سابع المستحيل احسبها زوجه الي
مااعرف شنو سبب رفضي الها بالضبط
اكول الي تتزوج بالسر وتتوسل برجال غريب حتى يتزوجها
ماتصلح تكون زوجه الي
اما سبب رفضي الطلاك
مااحب ابن اخويه يربونه الغرب
اكيد بعدهي زغيره وحلوه
تنخطب وتتزوج بس مصيره شراح يكون نظوري
حيل اتعلقت بي وحبيته كانو ابني من صدك
اني كلت يعجبها اطلكها عادي تتنازل عن ابنها
صارحت حنان وكتلها اذا اتقدملج توافقين
كالت ماعندي مانع تعال لاهلي وشوف
اتفقنه بالعطله الزواج
مره جنت بغرفتي واجاني محمد وطلب مني
اخلي زينب تجيهم للبيت
احلى شي بزينب عجبني مريحتني ابد متعاند ولا ترادد
اموت ع هيج طبع
اني مااحب اخليها تطلع حتى لبيت اخويه
لان ماعندي ثقه بيها ابد
وهي حلوه اني متاكد تغر اكبر واحد
احرجني كتله اني ماعندي مانع ماالي علاقه بيها
رحت صعدت يمها وحذرتها مااحب تطلع ابد
رحت وياها وحجيت وياها احب اراقبج
حبيت اشوف تصرفاتها بغير مكان شلون راح يكون
راقبتها من بعيد لبعيد وجانت هادئه
مبدر منها اي تصرف مو لائق
اني مااعرف ليش ماعندي ثقه بيها
رادت قبل العشه تروح
دزيتلها رساله وبقت
الخجل واضح عليها
اول مره الاحضه تكعد ويانه وتاكل
كوه تاكل
ابد منطقت بحرف واحد بس الي يسالها تجاوب ع كد السؤال
مااعرف هل طبعها هذا لو لان كدامنه تضاهر هيج
من حجه وياها محمد اتخبلت مااعرف ليش
حيل ضجت
طلبت منها تروح
اخذت ابنها وصعدت
جابولنه الكيكه البارده الي سوتها
اتفاجأنه بشكلها وبطعمها
اكلها طيب بشكل
والحلويات الي تسويهن فد شي
كمت من اشتري للجهال ماتقبل ادزلي رسائل
تكول عندي هواي لاتجيب
مرات الكيها مخليتلي بالبيت مالتي
وتكولي انطيهم منهن
اكيد لان هنتها ذاك اليوم
لاحضت نور ابد مترغب للحلويات بعد مو مثل قبل
تكول ماما تسويلي بالبيت انظف واطيب
اتندمت هواي من اخذت الحلويات منها وشمرتهن
خطيه لو مخليها تاخذهن لاهلها
لان ناس ع كدهم مبينين
مرات اعجز افسر تصرفاتي اتجاها
اتفقت وي حنان بالعطله ادز اهلي
فعلا طلبت من امي تخطبها
بقوا يحجون عليه بس اني ميهمني
اني جنت مقتنع بيها وهواي سالت عنها
ناس حبابين وسمعتهم زينه
زينب ماتعنيلي شي ابد
كلتلهم اسالوها بس تطلب الطلاك باللحضه اطلكها
فعلا سالوها
فاجأتني من طلبت مني ماالمسها ابد
هو اني اصلا مستحيل اتقرب عليها
هم طفله اعتبرها وهم مو شريفه
بس حيل عصبتني من طلبت هذا الشي كدام اخوتي
يعني ماعدها ذرة مستحه
وشهدتهم عليه
اذا مااثبتلها العكس واخليها هي الي تتوسل بيه
بس اقبلني زوجه الك اني مو حيدر بسيطه
راحت امي وخطبتها ورجعوا الموافقه
دائما نتواصل اني وياها ونتخابر
علمتها ع اطباعي وشنو الي احبه وشنو الي اكرها
كتلها عقلي يوكف من العناد
مااحب تعانديني ابد
واني طبعي عصبي
من تشوفيني عصبي حاولي تبتعدين عني متحجين وياي
لمن اهدئ
كالت ماعندي مشكله
كلت لامي ننطي فلوس وهم يجهزون
صار عيد ميلاد حبيبي نظوري
اني كلت اجيبله كيكه من بره
بس فاطمه كلتلي كلشي لتجيب هنا نسوي
اجني اخواتي واتفقت وي حنان ثاني يوم العقد مالت السيد
فعلا سوينه العيد ميلاد
وحيل انصدمنه بالتجهيزات
فعلا موهوبه زينب بالطبخ والحلويات
الصراحه محد يعرف هيج يسوي مثلها
لااخواتي ولا امي ولا رسل زوجة محمد
جبناله هدايا
حيل نحبه كلنه لان من ريحة مروان الله يرحمه
وخاصه نسخته الثانيه
حنان كتلها متزوج ومطلك
وهسه متزوج وعندي ولد
بس زوجتي مريضه ومنعوني الاطباء اتقرب عليها
خبرت اهلها ومجان عدهم مانع ابد
بالليل راسلتها لزينب وطلبت منها متروح
اني خفت لا تصير مشكله واحنه بالبدايه
بس هم فاجأتني من كلتلي هو اني اصلا مااروح ولا اطلع
مرات اصفن واكول زين منها متحمله عايشه هيج عيشه
لا تطلع ولا تمشي بس لاهلها
وهناك هم ممنوع تطلع
مااعرف ليش اني معارض تطلع رغم ماهي مبوشه
واكيد محد يشوف شكلها
رحنه ثاني يوم عقدنه وسوينه حفله بسيطه
راحوا ويايه ابويه وامير ومحمد
كمل العقد همه رجعوا واحنه بقينه
دخلت جوه ولبستها الذهب
قطعنه الكيكه وجنت فرحان
بعدها رحنه للمطعم واخذت حنان وامها ويانه
رجعنه بالليل
اخواتي معارضات ولا عاجبهن الوضع
مااعرف ليش يدافعن لزينب هاكد
يحبنها حيل
كالن ماعجبتنه ابد
كالن مو حلوه وجبيره
اني مهمني قفلت عليها
مااعرف شنو الشي الي جذبني الها
اني جنت قافل مااريد اتزوج ابد
هسه مااعرف شصار بيه
كامن يحجن ويايه
والله زينب احلى وانزك وهادئه
اذا زينب عاجبتجن
اني لا اموت منها
سدن الموضوع نهائي
رجعنه للبيت وجان البيت هدوء
بس ابويه بالبيت
سالنه البنات ع زينب
كللهن فوك تنيم بابنها
سالته تعشيت لو لا
كال اي اخذت نظوري وجبت عشه من بره
كلي خطيه حيل يفرح من نطلعه
المفروض اطلعه هو ونور للالعاب
اخذهم همه وامهم
لا متطلع من الباب امهم
اني اخذهم همه وفاطمه
واذا تزوجت ادور اطلعهم ويانه وين منطلع
بس زينب متطلع من الباب
بس ياابني حرام عليك هيج تسوي
هم خطيه البنيه معيشها بسجن
متتقرب عليها وكلنه ميخالف
راح تتزوج عليها وهم امنه بالله
بس ميصير هيج تسوي بيها
اتمنى محد يدخل بينه يايابه
اني مااثق بيها ابد
لك متشوف تصرفاتها
مايوم قللت ادبها كدامنه
اشو البنيه حبابه حيل
حبابه مو حبابه متطلع من الباب
لك يابه خاف الله تقبلها وحده من اخواتها هيج يعاملها زوجها
وعندك بنيه بعد جم يوم الله يعابيك بيها
يابه لتقارن اخواتي بزينب
هاي وين وذني وين
رحت لبيتي ارتاح
بقيت اخابر بحنان
اتفقت وياها امرلها باجر نختار الغرفه
فعلا رحت ثاني يوم واخذتها
اختارت غرفه
اتفقت عليها وانطيت عربون
بعدها رحنه للمطعم
ورجعتها
وره يومين اجوي اخذوا غرفتي القديمه اتبرعت بيها لواحد
واجوي بعدها شدوا الغرفه
ورتبت ملابسي بنفسي
بقيت اخابر بيها حنان يوميه
احس حياتي صار بيها تغير
رحت للسوك اشتريت لنور بدله خطيه
فرحانه حيل ع العرس
اتفقت وياها حنان منسوي زفه وهوسه
اعترضت بالبدايه
كالت اني هذا زواجي الاول
كتلها بكيفج تردين زفه تردين سفر
كالت لا نسافر احسن
اني باعتباري جبير ومتزوج قبل بساع
مو لائق اسوي زفه
انطيت البدله لنور حيل فرحت
بس بعدها كلتلي ونظوري ماجبتله قاط
اتذكرت صدك شلون انسى خطيه
حتى لو ميروح ويانه
رحت جبتله ملابس نسقتهن اله
انطيتهن لنور كتلها روحي صعديهن بالغرفه لنظوري
سلمت الجوازات واتحدد موعد السفر
بعد يومين للحنه
اجتي زينب
وبدت تنظف البيت كله
بدون مااطلب منها
مااعرف احد كايللها لو بوحدها
نضفت المطبخ والصاله
والاستقبال والغرفه بدت ترتبها
سالتني ع الفرشه الي تخليها ع الجربايه
طلعتها من الكنتور وانطيتهيا
عجيب امرها لهاي زينب
هادئه بشكل وشبه خرسه
ابد متحجي اله من احد يسالها
اول مره اراقبها واراقب كل حركاتها
لبسها مستور وعريض
ولا شعرايه طالع من الحجاب
مااعرف هي هيج لو تضاهر لو لان اني طلبت منها
طبعا حلوه حيل وزغيره وتجذب بشكل مو طبيعي
بس اني مااعرف ليش هيج قاسي وياها
ابد مااشتهيها ولا تغرني ابد
مااعرف شنو السبب
تعجبني نظافتها
ويعجبني ترتيبها ونضامها
نفس الي اريده تسوي بالضبط
مااعرف حنان راح يعجبني طبعها لو لا
كملت بهدوء ورادت تطلع
كتله ممكن احاجيج دقيقه
رجعت كالت اتفضل
اني حجيت كدام حنان وعائلتها
انت مريضه ومانعني الدكتور اتقرب عليج مو زين ع صحتج
حجيت هذا الشي من مصلحتج
محبيت اشوه سمعتج كدامهم
ياريت تلتزمين بالصمت همين
ومااريد مشاكل ابد
شكرا الك اتمنى السر ميطلع خارجنه ابد واكون ممنون منك
واني اصلا ماعندي مشكله لا بزواجك ولا عندي شي وي زوجتك حتى اسوي مشاكل
طلعت بعدها
اجه يوم الحنه
اخذت اجازه 10 ايام ع مود السفر
اجن البنات
الكول طلب مني تروح زينب للحنه
بس اني رفضت
الحنه بالقاعه
رحنه اني واخواتي وامي وزوجة محمد واجني اخواتها وامها
وشكم وحده من المعارف مو هواي
واكو اصدقاء مقربين الي علاقتي بيهم عائليه
جابوا زوجاتهم للقاعه
رحنه للمصور واخذنه صور هواي
جانت الحفله حلوه حيل
خلصت الحفله ورجعنه للبيت
ثاني يوم موعد الطياره ب5 العصر والتجمع ب1
لكينه زينب مجهزه العشه
اتعشيت وخلصت ورحت للغرفه
جهزت جنطتي وحضرت ملابسي
دخلت للحمام وجان جهازي يدك
كملت وطلعت
جانت حنان
دكيت عليها
وبقينه نسولف ونضحك ومندمجين
طلبت منها تفتح كاميرا
جنت مندمج وياها
فجأه شفت باب الغرفه انفتح عليه
وجان اشوف زينب بمنظر
عمري وحياتي ماانسى ابد
جانت لابسه دشداشه حمره قصيره
ومخليه مكياج
وجانت بلا حجاب وشعرها مينوصف
فكيت حلكي عليها مثل 👈😲
جان تكول ........
توقعاتكم حبايب هل ياترى حيدر يحلم لو حقيقه
اذا حقيقه معقوله زينب هيج تتصرف لو اكو سبب خلاها هيج تتصرف
شراح يكون موقف حيدر اتجاه زينب
هل راح يضعف امامها ام يبقى صامد ومتهزه ريح 🤔
اشو ضربتوني عين جنكم 😂😂قبل يومين القصه بالمركز الثاني
اشو اليوم اتفاجئ بالمركز التاسع 🤔🤔 هاي معقوله لان تصويتكم مشجع
لو غير شي لان طمعت بالمركز الاول 🤣🤣🤣
مو مهم بيا مركز اهم شي تنال اعجابكم مااطمح اكثر 😜😜😜
تحياتي للجميع 😘😘😘