حسيت على دك التليفون كمت شفته ماكو هو واني نايمه بنص الجربايه كمت شفت سمر تخابر
جاوبتها جان عبودي يريد يحاجيني ويشكيلي لان مقابلين يجيني
كتله هسه اخابر جابر يجيبك
لابست بجامه مستوره وطلعت للصاله ماكو ايوب دورت عليه بكل البيت ماكو
ظليت كاعده بصاله جان الدنيا مغرب شويه خفت لان وحدي بالبيت
وكلسع احس اكو احد
ظليت كاعده ولازمه تليفون اريد ادكله بس خاف يفشلني
ماخابرته نص ساعه وسمعت الباب نفتحت
رحت للمطبخ فاجئتني من جايب عبودي وسمر طلعت ركض عليهم عبالك صار سنين مشايفتهم
ايوب... شكد جنت عصبي لان قفلت الباب بس من فتحتها وشفتها
لابسه البجامه وشعرها مبعثر واثار النوم على وجهه
بسرعه نسيت الصار البارحه
حاولت اسيطر على نفسي دفعتها ودخلت سبحت طول مااني بالحمام بس هي بالي وبس اريد اكمل حتى اطلع اشوفها
من طلعت شفتها واكفه وتعدل بنفسها ناقصني عذاب اني
صح جنت ماحجي وياها بس مو معناها ماحبها لا بس اريد اعلمها واربيها من جديد
اعرف كالت لسعاده وضعنا تمام واكيد انتشر الخبر
تريكنا سوه صح ماكو كلام بس جان كلبي يسولف ويه كلبها
من دخلت عليه وجايبه الفواكه حسيت حرارتي صعدت مشايفها لابسه هيج حاولت مابين هذا الشي واسوي الموضوع عادي بس مخي هو الي يخليني اتخيل شغلات الله يستر منها
صرت ماباع عليها لان اذا اشوفها حكوم اشيلها واروح للغرفه واطلع ضيم هالسنين بيها
من كعدنا نتغده اعرفها متاكل سمج متعرف تفلس ماهان عليه هاي حبيبتي انه اكل وهي ماتاكل صرت افلسلها حتى لو شايل منها وزعلان هاي قطعه من هذا الكلب الي مرمر عيشتي
تحملت كلشي قربها ريحتها حركتها بس من جنت كاعد
ودخلت علي وهي لابسه ثوب ضيك عليها ودلعه ماكدرت ابعد نظري عليها يازعل ياطركاعه غير طالعه تموت
عرفتها توترت واستحت من نظرتي بس اذا مستحيه ليش تلبس هيج كدامي غير حتى تلعب على اعصابي
كمت رحت للغرفه نزعت بقيت بس بشورت هي مو تلعب على اعصابي انه هم خل العب عليها
دخلت عرفتها تفاجئت بيه ماجتي للجربايه الا لمن تاكدت نمت انه جنت امثل نايم
جتي مددت بصفي وانتظرتها تنام تقربت عليها اخذت خصله من شعرها ظليت اشم بي نزلت على ركبتها بدون ما المسها عطرها يدوخني شوكت اخذج بحضني وانام تعبت من هذا الوضع
حضنتها وشيريد يصير خل يصير هاي مريتي جنت منتظر هذا اليوم الي تنام يمي
كعدت من نوم وهي معكفه نفسها وجهه بصدري ضامته ظليت العب بشعرها
بعدين كمت ماردتها تحس وانه اعرف ماسيطر على نفسي بستها من زندها وكمت
طلعت من الغرفه رحت دخنت بصاله من جاي ادخل للغرفه سمعتها تحجي ويه سمر اظاهر عبودي يريد يجي وكالته اخابر جابر يجيبك
يعني حتى مدكول الي اروح اجيبهم لا تخابر جابر وانه رجلها واقرب واحد الها ماتطلب مني
ركبت سيارتي وطلعت زهكان من هاي تصرفاتها شويه افتريت بعدين رحت لبيتنا شفت امي وحبوبتي وكعدت وياهم شويه
بعدين اخذت عبودي وسمر ورجعت للبيت
صح اتعصب منها بس من اشوف ضحكتها يروح ابو الزعل والعصبيه
ابتسمت عليها شون تبوس بعبودي عبالك ابنها مو اخوها تركتهم ودخلت للغرفه. حتى ياخذون راحتهم ..
—————-
جنه .... جنت كلش فرحانه بجيتهم ذكرت قبل بيتنا بغداد جنا هيج البيت هدوء بس احنا مجمعين
سمر تباع عليه وكاتمه الضحكه بالاخير كتلها شبيج احجيها للكلمه الي بكلبج حتموتين شفتها ضحكت كالت ...
سمر ... بشري شونه الزواج
جنه ... عرفت هذا سؤالج
سمر ... هي لعد العروسه شيسئلوها غير هذا السؤال مصدكت تزوجين حتى اسئلج
جنه ... زين يوم الج ... شفتها غطت وجهه بيدها
سمر ... لا لا عفيه خجلتيني
جنه ... هههههه واضح الخجل
سمر ... اسكتي عبودي جفص كدام نعيمه من ايوب اجه وكال تعالو ويايه حتى شوفون جنه
عبودي افندي نط من يمه كال يعني نعيش يمكم هاهيه
جنه ... هي اول وتالي حتعرف وتقريبا كل البيت يدري بس هي
سمر ... جنه كلش ضوجه هناك لا انتي ولا سعاده والله ملل وماعرف ويامن احجي
جنه ... ياحبيبتي لعد ابقوا هنا وغراضكم باجر روحوا جيبوها وتعالو شعدكم باقين هناك
سمر ... لا ميصير تمتعوا اول شي بعدين نجي بس باجر حروح اني وعبودي من صبح يم سعاده ونبات يمها
جنه ... اي عفيه روحوا تونسوا
سمر ... جان كتلج تعالي بس بيبي صبح اكلها شوكت تجي جنه دكلي هسه مربوطه بالبيت تطلع سبعه ونفك الربطه
جنه ... هههههه عاد سوالف بيبي متعرفيها
كمت للمطبخ اني وسمر عبودي صعد فوك لغرفته
اني وياها سوينه عشه
وكعدنا اربعتنا ناكل جان الوضوع كلش حلو سوالف وضحك
وسمر وايوب صنفوا الي بالعرس واحد واحد
مبقوا احد يعتب عليهم
بعد العشه كعدنا نتعلل كرزات وعصاير وحلويات
بالعشره تليفون سمر دك
سمر ... هاي بيبي عزه والله حتبهذل احوالي
جنه .. ليش
سمر... من طلعنا كالت شوفوها وترجعون لاطولون
الو هلو بيبي
وينكم صار الليل ومابينتوا
بيبي مو مقبلوا نرجع الا نتعشه وياهم
يا انه شحجيت وياج ماكتلج لاتتاخرون معرسين بعدهم خلهم وحدهم
اي بيبي هسه حنرجع
يله انه دزيت جابر ياخذكم
اي بيبي
سمر ... بيبي عصبيه والله حترزل اليوم
ايوب... لا ماترزل قابل باقين بشارع
سمر ... ماتعرف بيبي خبصت الدنيا معرسين ومعرسين
جنه ... هسه اخابرها اكلها تبقون يمنا
سمر ... لا حبيبتي اصلا دازه جابر يله نجي غير يوم
جنه ... شويه واجه جابر عليهم سلموا وراحوا اني جنت الم بالاغراض والهوسه السويناها بالمطبخ
شفت ايوب دخل للمطبخ ماعرف ليش حسيته اجه يشوفني شداسوي
راح للثلاجه ظل فاتحها بعدين اخذ ماي ورجع للصاله
كملت شغلاتي ورحت للغرفه عدلت شويه غراضي لان اكو شغلات بعدها ممرتبتها بالكنتور
كملت طلعت شفته بعده كاعد بصاله رجعت للغرفه ماعرف شسوي ملل
لابست بجامه مال نوم ومددت بالفراش ظليت اكلب بالتليفون
نعست حيل جنت منتظرته يجي وخفت لاهم ينام بصاله
ماعرف شكد مر وقت واني غافيه بس حسيته اجه للغرفه
مثل الي امنت حينام يمي غفيت وبعد ماعرف صار
كعدت صبح لكيت نفسي الا شويه واصعد فوك ايوب حتى رجلي على رجله مع العلم اني ماتحرك بالنوم ابد
بس يمكن لان جربايه جبيره
كمت رحت غسلت وطلعت للمطبخ فتحت الشباك المطبخ جان جوه حلو شعلت فيروز بالموبايل وبديت احضر الريوك
كملت الريوك رجعت للغرفه حتى اكعده يتريك لكيته بالحمام رجعت للمطبخ ظليت كاعده انتظره
هو شويه واجه للمطبخ....
ايوب...هالبنيه عدها قدره تخليني اشب نار وتخليني اهدء ماعرف شنو هالسحر العدها شكد ماكول هاهيه بعد اغير تعاملي بس من اشوفها تروح كل القرارت الاخذها
ظليت كاعد بصاله انتظرها دخلت للغرفه بعد مطلعوا بعدين نعست وهي ماكو دخلت للغرفه شفتها نايمه ضحكت على حالي جنت انتظرها بره
رحت مددت يمها ظليت اباع عليها انتظرتها تثكل نومتها
تقربت عليها ظليت العب بشعرها اشم عطرها
حضنتها ونمت ماعرف حست اولا بس خليتها تنام بااحضاني
تمنيت تكعد وشوفني شون حاضنها
حسيت عليها صبح شلون سحبت نفسها مني وكامت
كعدت بعدها غسلت ورحتلها للمطبخ ابتسمت واني اسمعها مشغله فيروز ودندن وياها
صباح الخير ...
جنه ... صباح النور
كعد بمكانه اني كمت صبيت الجاي كعدنا ناكل جنت اباوع عليه من جوه ليجوه
اثنينا شايفين نفسنا مغلطانين ماعرف هذا الحال شكد حيستمر بس اكيد اله نهايه
من كملنا ريوك هو دخل للغرفه شويه اجه مبدل وكاشخ وعطره واصل للشارع
اني ظليت اباع عليه وين رايح شو الربطه بس الي هو مو عريس وتاركني وحدي وكف يم الباب كال
ايوب...عندي شغله بالشغل اكملها وامر مناك على بيت اهلي
جنه ... خل اروح وياك
ايوب... وين للمعارض رايح
جنه ... لا لا لبيت جدي
ايوب... وهنومه
جنه ... والله ضايجه
ايوب... ماشي اكمل شغل وامر اخذج وروح
جنه ... هزيت راسي مع ابتسامه اوكي
كملت شغلي ونظفت البيت ودخلت سبحت وبدل وكعدت اخلي مكياج كملت كلشي وكعدت انتظره
تقريبا ساعه واجه عليه رحنا لبيت جدي اول مادخلت تلكوني جابج بعدها سبعتج مطالعه
كتلهم اشتاقيتلكم عاد سلمت عليهم ودخلت على بيبي الاول مشافتني كالت... يا مات ابوي جابج
جنه ... رحت عليها بوستها كتلها شنو بيبي متريديني ارجع
هنومه ... مو كتلج ماطلعين الا تعدي سبعتج
جنه .. بيبي يمعوده عادات صارت قديمه
هنومه ... يمه مايصلح ظلين مربوطه بالبيت
جنه ... بيبي قابل طلي اني مربوطه بالبيت
هنومه ... طلي لا هوش انتي ماسمعين الكلمه
جنه ... شويه ودخل ايوب استلمته على ليش طلعتها وليش وليش
ظلينا كاعدين نسولف شويه واجه عمي ظلينا كاعدين ونصبوا الغده تغدينا وياهم سمر وعبودي ماكو بيت سعاده رايحين من صبح
وره الغده بيبي صاحتني لغرفتها
دخلت عليها شافتني كالت تعالي كعدي عندي حجايه وياج
رحت كعدت يمها اني كلت حتوصيني على ايوب
هنومه .... شونه زلمتج وياج
جنه ... الحمدلله بيبي زين باوعت عليه ونطتني نظره تخوف كلتلي
هنومه .... جا ليش احسكم مو على بعضكم جنكم مامزوجين
جنه ... باوعت عليها فاجئتني كتلها لا بيبي قابل شبينا عادي
هنومه ... من اجيتوا وانتي لاحجيتي وياه ولاهو حجه وياج مزاعلين
جنه ... لا بيبي ماكو شي
هنومه ... متاكده ماكو شي
جنه ..اي بيبي متاكده
هنومه .... انتوا عرستوا
جنه ... باوعت عليها شنو عرستوا كتلها اي مو عرسنا قبل يومين
هنومه ...ياثوله اخذج دخل عليج
جنه... بيبي خلتني امتمت كتلها بيبي اي ماكلتلج سعاده
هنومه ... لا كلتلي بس الي شفته اليوم ماعجبني
جنه ... بيبي عدها نظرات تخليج تعترفين على نفسج
كتلها ... بيبي صراحه بس مو ترزليني
هنومه ... صار سولفي
جنه ... بيبي صراحه اني وياه كلشي مصار بينا وموصل يمي
شفت بيبي شهكت ولطمت على صدرها
هنومه ... ليش ماوصل يمج
جنه ... مو هو متغير ويايه مو مثل قبل وصراحه بيوم العرس قفلت الباب عليه وخليته بره وبعدها تغير اكثر من قبل
هنومه ... تعزيتي ان شاءالله على هالعمله يمه ليش سويتي هيج هو منتظر يوم الصيرين يمه وتالي تخلي بره ينام هيج قللتي من رجولته لا يمه مايصير
جنه ... ظليت ساكته ظلت بيبي ترزل شويه وتحجي شويه عليه
بعدين شافتني حبجي عاد سكتت وظلت تنصحني
هنومه ... شوفي بعد العتب مايفيد الراح راح اريدج يايمه اليوم من ترجعون تزيني وتحضري وروحي يمه يايمه انتي الغلطانه لازم انتي الصلحين الصار
جنه ... عزه بيبي شنو اروح يمي والله استحي بعدين هو ميجي يصالحني
هنومه ... ليش هو القفل الباب عليج
جنه ... بس بيبي
هنومه ... لا تحجين بعد هذا ايوب ياجنه نسيتي منوه مو الي انتظرج سنين تحنين عليه وترجعيله ماكان يهدي باله اذا مايسمع اخبارج وصوتج من نخابرج
اسئلج بالله عمرج سئلتي عليه عمرج عرفتي اخباره
العناد مايفيد العناد يخرب العلاقات اذا هو شد انتي رخي المره هي التتحمل الرجال بس انه هسه شايفه هو الي متحملج وين اكو رجال يقبل مرته هيج سوي
جنه ... ظليت ساكته ماعرف شحجي بعدين طلعنا كعدنا يمهم طول كعده اباع على ايوب يمكن حجي بيبي صح اني هالمره خل اتنازل بس مو تنازلت قبل ورحت كلتله خل نزوج وهو عيرني لان اني الحجيت بس اني تنازلت علمود سمر وعبودي
هالمره اتنازل علمود حبنا
العصر رجعنا للبيت دخلنا اني وياه للغرفه هو بدل ومدد اني ظليت واكفه اريد احجي وياه واستحي
بعدين اخذت ملابس بالحمام بدلت ورجعت مددت بصفه بس هالمره تقربت عليه هو جان يلعب بالتليفون وممنتبه اصلا الي
ظليت اتكلب كلسع
دك تليفوني فكمت طلعته من الجنطه شفته خالي فجاوبته وطلعت بره
ديباركلي وداسولف وياه وممنتبه على نفسي فخالي ديكلي اعذريني ماجيت للعرسج تعرفين وضع بيبيتج
فكتله لا حبيبي معذور والله اعرفك متقصر نداريت شفت ايوب واكف ورايه بس من انتبهت عليه سوه نفسه يروح للمطبخ
اني صراحه كلت عزه خاف عباله احجي ويه احد غريب
فمن ديرجع للغرفه تقصدت اكول اي والله خالو شنسوي سلملي على بيبي
حتى اكله اني احجي ويه خالي
سديته ورجعت للغرفه جانت كاعد ويدخن وصلت يمه كلت خل اسولف وياه بالكي يفك شو العصبيه دزيد
كتله ... خالو سلم عليك وكال دزيلي رقمه حتى اخابر اباركله
ايوب... الله يسلمه
جنه ... وسكت اني ماعرف شحجي اريده يسولف ويايه
رحت مددت غفيت شويه
وكعدت على صوته يحجي بالتليفون بس يصرخ وبعصبيه
جانت باب الغرفه مفتوح سمعته يكول ميلج هالحجي وماكو هيج شي وكافي رحمينا بعدنا يالله
اني كمت اريد اعرف شكو هسه داطلع شفته دخل عليه مثل الثور الهائج دفع الباب حتى اني فزيت كتله شكو بخوف
ماشفته غير لزم شعري وجرني للجربايه ودفعني حيل عليها
نداريت عليه اكله شبيج ليش هيج دسوي
ايوب.... اني مو رجال جنه
جنه ... اني من شفته نزع التشيرت مالت وشمره وصعد فوكايه اني تخبلت صرت اعيط وخر شبيك شنو مو رجال
ايوب... دكولين بهنومه اني مو رجال لان مامتقرب عليج خل اشوفج المو رجال شيسوي
جنه ... اني ظليت احجي وابجي اجه بالي بيبي كالتله بس اني ماكلت عليه هيج ابد
ظليت اصرخ والله ماحاجيه عليك هيج والله وروح ابويه وامي ماكلت عليك هيج والله
هو من شافني نهاريت ابجي واحلف بسرعه كام من فوكايه وكعد على صفحه اني كمت كعدت عدلت نفسي اشوفه يتنفس سريع وعصبي
رحت كعدت بين رجليه بالكاع لزمت ايده كتله ايوب والله ماحجيت عليك هيج اخابر بيبي كدامك واسئلها
باوع عليه واحس عيونه تجدح لزمني من راسي وقربني عليه وصار يحجي بعصبي ....فهميني ليش جاي سوين هيج ليش ترى تعبت الى متى اظل انتظر ليش دايما اني اللزم اعتذر واصالح ليش
ليش تحسسيني ماعندي اي قيمه عندج
جنه ... وخرت ايده وخضنته حيل واني ابجي... اسفه والله اسفه والله احبك وماكدر بدونك انت روحي اسفه لان ضوجتك والله مجان قصدي متعرف اني شون احبك ومتعلقه بيك
من حجيت هيج جنت بس اني حاضنته بعد ماكملت كلامي بادلني الحضن حضني قوي ظليت حاضنته وابجي ماعرف منين دموع صارت تطلع اشهك وابجي يمكن كرهت نفسي لان سويت بي هيج جانت حالته اول مره اشوفه هيج جان لازم اسامحه الصار لابيدي ولابيده
ظلينا فتره واحد حاضن الثاني جنت اسمع بس تنهيداته القويه
بعدني عنه ظل يباع بوجهي ويمسح دموعي باسني من عيوني ورجع خل راسي على صدره جنت اسمع دكات كلبه السريعه
مدد ومددت بصفه نمت على ايده جان حاضني بطريقه عجيبه مثل الخايف اهرب منه
همس بصوت هادء اريدج باوعت عليه واني واحس دكات كلبي تخربطت وصار لويه بطني
ابتسمت اله كتله واني هم اريدك ظليت اتلمس وجهه ولحيته نزلت على شفته تلمسها هاي حركه خبلته بسرعه صار فوكايه بدون كلام اخذ شفتي صح جنت ارجف خوف لهفه ماعرف بس بادلته وصرت اني الي ابوس بي
نزل على ركبتي صار يوزع بوسات خفيفه بعدين تحولت الى عنيفه وصار مثل الواحد الجوعان ولكه اكل كدامه
نزعني الجنت لابسته بثواني جان المغطيني جسمه مظل مكان ماطبع عليه اثار لمساته جانت مثل البنج الي خلاني اتهور وياه
وكل حركه مني زيد جنونه ويايه جنت مستسلمه اله
باوع بعيوني وهمس احبج بعدها ...... ...
ك
جنت نايمه على ايده واحس جسمي كلشي بي يوجعني
جان يدخن ويزفر الهوى فوك جان محتويني بشكل عجيب واحساسي بي هسه وهو رجلي يختلف عن قبل اكو شي صار اقوى شي ثاني صار يربطنا
خلص الجكاره ورجع نام فوكايه حاوطت ركبته بتملك
كتله بدلع تعبت كافي
ايوب... واحنا سوينا ترى جان مجرد احماء
جنه .... ههههههه كل هذا واحماء لعد الاغتصاب شون يصير
ايوب... هسه اشوفج شون رجع يبوس بيه واني اضحك
نام على صدري وظلينا نسولف وكلسع ماخذ ايدي يبوسها جنت العب بشعره واسولف وياه
ايوب... ماتعرفين من قفلتي الباب صار بحالي
جنه .... صار
ايوب... حركتي شبيب الخلفوني
جنه .... هههه ليش
صعد راسه باوع عليه ورجع نزله كال الشرطه غلبت الجيش
جنه .... هههههه
حسيته ثكل راسه عرفته غفه
رجعت راسي ماعرف ليش نعست مع العلم قبلها جنت نايمه قفلت عيوني غفيت بس شويه وكعدت شفته بعده نايم على على صدري رجعت العب بشعره وابوس بي ممصدكه الصار
ابتعدت عنه على كيف وكمت اخذت المنشفه ودخلت سبحت طلعت بدلت وطلعت للمطبخ اسوي اكل جوعانه خالينا كبب وبورك طلعت منها وبديت اسوي اكل ماحست الا ايد حاوطت خصري فزيت من حركته همس ...شبيج فزيتي
جنه ... خفت
ايوب.... متخافين وانتي يمي
جنه ... اكيد نداريت عليه وبسته من خده كتله يله فوت اسبح بين ماكمل عشه عضني من خدي وراح يسبح يموت عالعض جسمي كله يوجعني من وراه
كمل سبح واجه جنت محضره السفره ومسويه اجواء خاصه
جر الكرسي وكعد وجرني كعدني بحضنه
جنه ... حنظل هيج
ايوب.... قابل شمسوي
جنه..... حبيبي اريد اسئلك منو خابرك وهيج خلاك عصبي
ايوب... عوفج من هاي السالفه خل تولي
جنه ... بيبي هنومه
ايوب.... جنه كتلج عوفي سالفه
جنه .... لا اريد اعرف ظل ساكت بعدها كال ....امي سامعتج تحجين لبيبي عليه
جنه .... بس اني ماحجيت هذا الكلام اصلا بيبي جانت ترزلني لان سويت وياك هيج وجنت ناويه من ارجع اصالحك
ايوب... وليش مصالحتيني
جنه ... ماعرف استحيت انت جنت مدايرلي بال
ايوب... غير جنت دحترك حرك وانت كبالي وحلالي وماكدر الزمج
جنه .... ايوب محكلك ليش صدكت باامك وجيت عليه هيج لان السوته امك هالمره جمعنا وخلانا نصير واحد
—————-
سمر ..... بيوم عرس جنه وايوب من رجعت للبيت جنت مدده العب بالتليفون
اجاني مسج من بلال جان ويايه بالجامعه بس كلش حباب مرات احسه يريدني ومرات اكول اتوهم مابطل بسؤال عليه من اتخرجنا
كاتب ... 📩 شونج سمره شو ماكو
رديت 📩هلو الحمدلله والله هالايام جنت ملتهيه بعرس جنه
شويه ودكلي اني متعلمه احجي وياه عادي يعني ولد ماشفت منه اي شي محلو كعدنا نسولف ونحجي جنا مندمجه بسوالف وياه وهو فكاهي جدا يعني هواي يضحكني او يعرف نقاط ضعفي بشنو ويضحكني فاهم تركيبتي
فعبودي جان طالع من الغرفه وتارك الباب شويه مفتوح
فاني يمكن جان صوتي او ضحكي عالي وياه جنا نذكر سوالف جامعه
وسفراتنا وطلعاتنه جنا شله من اربع بنات ولد اثنين
فاني ممنتبه ابد درت وجهي للباب اشوف مثنى واكف ومجتف ايده ويباع عليه طبعا اني من حاله الضحك الى حاله الصفنه ظليت اباع عليه جفلت من كل كلبي وماعرف شوكت فاتح الباب
هو من شافني صفت عليه وتليفون باذني
طلع جكاره من جيبه ورثها وياشرلي كملي كملي
باستهزاء
اني سويت الموضوع عادي وكملت حجي ويه بلال
بلال افتهم من اسلوب كلامي اكو احد يمي فاسلم وسده
نزلت التليفون من اذني وباوعت على مثنى وماحجيت بس اباع عليه
هو جكاره بحلكه كتله هذا بلال جان ويايه بجامعه وخابر يسلم عليه
هو بين فتره وفتره يخابر علينا يشوف اخبارنا
مثنى ... لا رحم الله والديه وين اكو واحد هيج ماتنطي رقمي يخابر عليه وياكم يشوف اخباري
سمر ... باوعت عليه عرفته جاي يستهزء كتله اي ميخالف عود انطي رقمك
عافني وركع الباب وره اني كلت عفيه ميعدي جم يوم اذا منتعارك
تركته ثاني يوم مشفته وتغدينا وهو ماكو العصر اجه عليه ايوب اخذنا بقينا لليل ورجعنا هم مشفته
ثالث يوم رحنا لبيت سعاده من صبح حتى جان حارث بعده مطالع للدوام
تقصدت اروح لبيت سعاده اريد اشوفه شيسوي
العصر اجاني مسج 📩جم مره محذرج متروحين بيت حارث
باوعت عالمسج مدري شبي شاد ويه حارث مع العلم الرجال كلش حباب وبس تنشدي بسرعه يجي
يعني حباب
فعفته مجاوبته
اجه حارث كال يله بدلوا نطلع نتعشه بره بدلنا وطلعنا بطريق دكلي اني مجاوبته
دزلي مسج 📩لاجاوبين اني اعلمج ويه منو تلعبين
ضحكت عليه بسرعه يتعصب سويت التليفون صامت وذبيته بجنطه رحنا كعدنا مطعم على شط جان كلش حلو واجواء عائليه
تعشينا ظلينا كاعدين سوالف وضحك حارث مابطل شقه يخليني اني وسعاده نموت ضحك
اني ممنبه جان عبودي يلعب على صفحه اجاني لازم التليفونه كلي ...مثنى يريدج .... اني ظليت اباع عليه ماعرف شسوي اخذت التليفون منه وجاوبت الو بس كلت الو سمعت صوت زرف اذني زرف انتي وين ... يعني والله صوته سعاده وحارث سمعوا بحيث سعاده ظلت تباع عليه. اني بسرعه كمت سويت نفسي اتمشى يمهم
فضحني كتله... شبيك ليش تعيط
مثنى ... انتي وين
سمر ... طلعنا بره نتعشه
مثنى .... اني شحجيت ذاك اليوم مو كتلج اذا تروحين لبيت حارث رجلج اكسرها
سمر ... ظليت ساكته بس ازفر الهوى
مثنى .... مجاوبين
سمر ... من تنصي صوتك اجاوب هي مو عركه
مثنى ... اني اعلمج شون تكسرين كلمتي اني اعلمج
سمر ... مثنى ترى زودتها ترى لا خطيبتك ولا مرتك حتى تتحكم بيه
مثنى ... وحق هذا الله ياسمر اذا مااندمج على هذا الكلام والله ماسمى مثنى
سمر .... مثنى ترى مسويت شي ترى عبودي ضايج واجينا لسعاده تععرف بي شون متعلق بجنه ومو مال اروح لجنه
مثنى ... ليش ماكلتيلي جم مره اكلج من اطلعين احجي كولي انه مو خراعه حضره
سمر ... انت وينك مو زعلان ماعرف ليش
مثنى ... متعرفين ليش مو بله اخذتي اذن بلال
سمر ... لا اخذت خشمه هههههه مثنى كافي والله زودتها يعني ابقى بيت جدو ويه منو اسولف
مثنى .... سولفي وياي
سمر .... لاتخاف والله محد يجي من اهل حارث اطمئن لان سعاده متحبهم اعرف بيش تفكر
مثنى .... شوكت ترجعين
سمر ... عبودي يريد يبات يم سعاده
مثنى ... اي خل يبات وانتي ترجعين
سمر ... مثنى عبودي وين يقبل يظل بمكان مابي لا اني ولاجنه
مثنى ... ترجعون انتي وياه وماعندي غير هالكلام افتهمتي
سمر ... مثنى والله ماكدر خليني بس اليوم وصبح ارجع
مثنى ... هاهيه براحتج ابقي ولاترجعين
وسد التليفون بوجهي شكد يسد هالتليفون بوجهي رجعت كعدت سعاده كالت شبي مثنى
كتلها لا هاي بيبي رادت تحجي ويايه ومثنى دكلها
هي سكتت بس شكلها مصدكني
رجعنا للبيت بعد مافترينا جنا كاعدين نتفرج تلفزيون ندك جرس الباب
طلع حارث شويه ودخل كال مثنى بره يريد ياخذ سمر وعبودي
سعاده باوعت عليه كالت انتي كلتيله تعال اخذنا
كتلها لا عمه ماكتله بس خاف مايدري نام يمج
هي كالت ابقي انتي وعبودي لاطلعون لابست حجابها وطلعت هي وحارث اني وكفت يم الباب اسمع سعاده دكله تفضل جوا كل ماتجي ماتدخل هو يكلها لا والله مستعجل واجيت اخذ الجماعه
عمتي سعاده كلتله لعد اجيت هيج لان اليوم ينامون يمي
هو كلها مادري يله عود غير مره يباتون بعد جيت عليهم
كلتله يمعود لو داك عليه جماعه ناموا وشبعوا نوم
هو انحرج من حارث وعمتي عاد سلم عليهم وراح
اني دخلت للبيت اركض قبل ميشوفوني دخلت سعاده عليه نزعت حجابها بس وجهه مكلوب احسها عدها شي تريد تحجيه
اني ظليت اسوي نفسي اباوع تلفزيون
بعدها فرشتنا الي والعبودي حتى نام هي طلعت وشويه ودخلت عليه
كلتلي سموره كومي خل اسولف وياج
اني بس كالت اسولف وياج احس كلبي وكع كمت واني احس صفريت عبالك مسويه جريمه رحت كعدت يمها كتلها ها عمه
سعاده ... شعنده مثنى وياج
سمر ... ظليت اباوع عليها احسها كشفتنا هسه داكلها ماعندي شي كالت ... ديربالج جذبين انه سعاده لاتنسين
هي من حجت هيج اني كتلها ... عمه والله الصار غصبن عليه
سعاده ...،صار
سمر ... ماعرف شحجي كتلها يريد يزوجني بس وره مجيب فرح
سعاده ظلت تباع عليه مصدومه
سعاده .... وانتي قابله
سمر ... ظليت اباع عليها وساكته استحيت اكلها اي
سعاده ... مادام سكتي يعني تريديه
سمر ... والله عمه حاولت ابتعد عنه بس هو جان ميخليني كل ماابتعد هو يقربني اله
سعاده ... سمر مثنى مزوج ومرته حامل شلون ولج فرح كامت تحجيلج كل اسرارها شلون هيج سوين بيها
سمر ... سعاده والله اعرف والله اني لحد هذا اللحظه واني مموافقه على الصار بس ياسعاده مداكدر اتحكم بكلبي
سعاده... وانه اكولن ليش كتل نفسه الا فصخ خطوبتج من احمد تالي يريدج اله
سمر ... ظليت ساكته ومنزله راسي خجلانه من كلامها الي واحس حنفجر من البجي المشكله كلامها صح بس اني ماعرف شون ابتعد عنه
جنت احجي ويه سعاده دك تليفون جان سعاده كالت شوفي منو باوعت شفته مثنى كتلها هذا هو
كالت ... انطيني هل احجي وياه
سمر ... لا عمه فدوه لاتحجين وياه
جرت التليفون مني وفتحت خط عليه ....يتبع ❤️
—————-
رغم العطش وجوع والتعب اكتبلكم كله لعيونكم
#لاتنسون تعليقاتكم حتى استمر
والي يكول بارت قصير 👊🏻👊🏻👊🏻
علقوا ترى محتخسرون شي 😒