سجينة الروح

مشاهد من سجينه الروح مستقبل الابطال بعد انتهاء القصه

صـباح الـ🥀ـورد والعافيه ورمضان كريم لجميع المتابعين
طبعاً الكثير منكم يتسائل عن ابطال القصه وماحدث معاهم بعد انتهاء القصه واني موجوده بكروب وعضوات الكروب لمده اشهر يطلبون ولو مشاهد بسيطه من القصه ونزلت المشاهد حصرياً للكروب لكن الي صار تم تناقل المشاهد البعض نقلها بصوره صحيحه والبعض بدون ترتيب مع الاسف
ولاحظت بلتعليقات كثير مستاء من عدم تنزليها بلواتباد اني من نزلت المشاهد ابد ماكان بنيتي انزلها بلواتباد او بأي مكان كانت حصرياً للكروب
ولكن مااحب متابعين القصه يستائون مني ويضوجون لهذا راح انزلها هنا حتى تقروها فقط ارجو الانتباه لنقطه مهمه هذه مشاهد من حياه الابطال وليس جزء ثاني ارجو الانتباه لهذه النقطه ليس جزء ثاني اعتبروها هديه رمضان للمتابعين قراءة ممتعه لًلًـّــ💎ــجٌٓمٍَُٓيِّعَْٓ

#سجينة_الروح

حزينه اشبيج جنج فاكده أحباب
وعليهم لابسه اسود يشبه اليل
حتى رموش عينج هم حزينات
ما تفتح عيونج شايفه الويل
اليودع حبيب هواي معذور
لأن فگد النحبهم يهدم الحيل💔

من العَصر مَعصُور گلبي
و جآني الغروب و زآد تَعبي
گادر عله كلشي يربي
جيبه ولو مرّه أعله دربي

صافنه وايدي تتحرك بهدوء على البدله الي صارلها سنين متعلگه بلكنتور وبصفها قميصه مال العرس واحاچي بلهفه شونك حبيبي تره اشتاقيتلك ليش صار مده مكعد تجيني بلحلم تعبت واني انتظرك شوكت تحس بلهفتي لا انت الي جايني ومريح گلبي التعبان ولا انت الماخذني يمك
طارق تعبت محد كعد يرحمني الكل تطلب مني اتزوج ونزلت دموعي بهدوء وكأن طارق مقابيلي واسولف وياه

شون اكدر اخلي رجال يلزمني شون انام على انفاس غير انفاسك تقبلها حبيبتك تنام بحضن غيرك شفت حتى شعري طول وميقبلون اكصه منتظره اجيك واكصه مثل كل سنه  الكل ضدي الكل يگلي شبابج راح يخلص وانتي منتضره بلهفه وهم وخيال يكولون مات زين ليش اني مو مثلهم ليش احسك عايش وتتنفس نفس الهوا الي اتنفسه ليش احس حتى بلمستك وحضنك تالي الليل وانت حاضني محد يحس بيه طارق تعبت اخذني يمك وارحم حالي
ايه : دخلت على اختي وشفتها حالها الي يبجي الصخر ولج وتالي وياج سنين وانتي على هذا الحال
ودق : اسألج سؤال وانتي هسه ام تكدرين تعيشين بلا ابنج
أيه  : اسم الله طبعاً مااكدر

ودق : اني هيج مااكدر مااحاجيه مااكدر مااحسه طارق عايش وبدمي يمشي وبروحي
ايه : ارحمي حالج وارحمي  امي راح تموت من وره التفكير بيج وهي مريضه
ودق:عوفوني بحالي ابوس ايدكم وروحي جيبيلي هشومي العب وياه حبيب خالته مشتاقتله
خلصت اليوم العب واتشاقى ويه جهال مازن وابن ايه همه بلسم روحي وياهم انسى همي وقهري ساعات احسهم جهالي مو جهالهم ومرت الساعات مثل اي يوم بدون اي تغيير بس الشوق ياكلني على حبيبي الشهيد

رحت للدوام ومارست عملي وبعدها العصر للعياده جنت احب شغلي بطريقه عجيبه اذب حيلي كله بيه حتى بس امشي يومي واخلص من القال والقلت رجعت للبيت وعلاكه الحلويات بيدي مثل ممتعلمه للجهال احب لهفتهم من يجون يركضون ويصيحون دوده اجت طبعاً لان اسمي صعب عليهم سموني دوده خرب والله اسم شكد حاولت اعلمهم اسمي ودق يسموني دوده لو يدرون المراجعين مالتي اسمي دوده ولا واحد يجي يشلع سنه يمي 
اووي اروح فدووه لدوده حتى حبيته من وراكم
دوده اذبتينا( جبتينا)

ودق: جبت اشكال والوان الك ولأختك ولهشومي يله تعالو
دخلت والضحكه مرسومه على وجه الجهال تسوه الدنيا عندي شفت الكل بلصاله سلمت وكعدت بلكاع ويه الجهال  ومثل كل يوم اوكلهم والعب وياهم واعرف كل العيون تراقبني واولهم هو الي لهذا اليوم نظراته تختلف عن الكل شكد حاولت افهمه بس ميفيد مازن بعده عايش على امل ارضى بيوم اكون زوجته رغم شكد صديت ردت ابد اخر شى كام يراقبني بصمت مثل ظلي وحتى بشغلي يدخل اذا حس المراجع عينه عليه مليت من الكلام وكمت اسكت ومااهتم لو شميسوي

تعبت من اللعب وصعدت وتركت الكل كاعد بلصاله يحسبون الانفاس عليه واني تعبانه وحيل مابيه فتحت الكنتور وانصدمت البدله والقميص ماكو عطت عيطه هزت البيت هز وركضت ليجوه
ماما ماما وينج
يمامه: اسم الله شبيج امي
ودق: احجي وارجف وكوه اتنفس وين البدله وينها
يمامه : ذبيتها كافي مصختيها انتي لا اول وحده خطيبها يموت ولا اخر وحده حرام الي كعد تسوي بروحج
ودق : وانتم شعليكم عسى مااحركها لروحي اريد البدله جيبولي بدلتي مكافي الزمن اخذ فرحتي هلمره انتم تاخذون الي بقى من ريحته عندي وكمت الطم واعيط فقدت حتى شعري كطعته

أيه : صوت ودق هز البيت وسمعناها شون تسأل عن البدله ومنهاره اجيت اركض اني وجنه وخطيه مازن بقى بمكانه متحرك بس اعرف بيه ميت خوف عليها ميكدر يدخل الوضع ميسمح وجنه هنا صعب
جنه: خيه تهدي بلرحمن شجرالج واكض ايدها وهي تدفعني
أيه : على كيفج ودق گلبج راح يوكف غير علمودج ياعيني اني وماما وجنه بس نريد نسكتها وهي تزيد متنقص وعيوني على ماما الي كعد تبجي وترجف وهي بدور نقاهه من مرضها
ودق : رب الحلو انتم شعليكم هاي حياتي وحق الله اذا منطيتوني البدله هسه احرك روحي كدامكم واخليكم تحطوها على تابوتي
ركضت ودق لوره البيت مكان جلكانات النفط وتريد تلزم النفط واتذب على روحها وجان نلزمها
ولج تخبلتي
عوفوني كافي موتوني من ساعه السوده الي انولدت بيها حسو بيه مااريد اتزوج ومااريد اعيش بليه طارق كافي انتم متخافون الله شوكت الله يخلصني منكم
وسمعنا عيطه هزت البيت هز

حامد: بسچ شنهي مالج رداد حسچ مسمع الديره گلها كافي تنوحين ماعدنا مره يطلع حسها عبن عفتچ براحتچ هاي جزاتها ماتحترمين حتى امچ
ودق : ركضت على عمي وكعت يم رجله فدووه عمو خلي يرجعولي البدله دخيل الله ودخيلك والله بعد متسمعلي صوت

حامد : انه گلت البت ركدت ورد عگلها براسها تاليها تسودنتي علينا لا هذا الوضع ماينسكت عنه چاانه اكولن مالج غير حل واحد
تزوجين وتفض السالفه گلها
يمامه : فدوه حامد على كيفك وياها اباوع على بنتي عيونها فاتحتها والشفه بيضه وترجف وجوه رجل عمها
حامد : انه چلمتي ماتصير اثنين عطيناها وكت وانه اكولن يجي يوم وترد لعقلها لچن انه غلطت وعمر البت ضاع وانه اتفرج عليه احسبو حسابگم باچر العصر جاينا ناس تطلب ايدها واريدن اشوف يابت ماترضى وحگ هو علي اطرها  نصين

ودق : باوعت عليهم واحس گلبي يدك الف دگه بلدقيقه وكفت على حيلي وگتلهم
مو اني الي انجبر اتزوج واذا مصرين اتزوج موتوني احسن الكم وكتله وحق الي حلفت بيه مااخليكم لان مااسوي الي تريدوه كلمتكم اكسرها
رفع ايده عمي يريد يضربني وجان يلزمه مازن
مازن : يابه على كيفك وياها شنو نسيت هاي منو

حامد: لاتكضني انعل يومها انه اكولن دكتوره وراكزه وعيب على كبرتي امدن يدي عليها لچن هيه تسودنت وتفرعنت مو انه توكف بوچهي وبعلو حسها تريد تكسر چلمتي انه ابوك يمازن اليوم اكسر ضلوعها تگسر
يمامه : فدوه حامد بداعتي وغلاتي عندك بداعه الشده الي اني بيها على كيفك وياها اني الصوج مني مجان لازم اخذ بدلتها عبالي اسوي شى زين الها انگلب شين

حامد: لشوگت نضل هيج البت راح تموت وانه ساكت اگولن الله كريم يچي يوم وتصحى على روحها بتچ تسودنت لا وتتهاوش وياچ وحسها واصل للديره گلها
ودق : عمو بس انطوني بدلتي والله مااريد شى منكم والله
حامد: لا اله الا الله بتي انتي كبرتي والوادم گلت وچهي ليش بت المرحوم ماتزوجت
ودق : وهمه شعليهم وانت ليش تسمع كلامهم
حامد : انه مااسمع چلمت احد لچن احنه مو وحيدنا بلدنيا وانه ماارضى تمسچ چلمه احرگها گلها الوادم گل بالها وسكتت
يمامه :شنوو شبيهم ليش سكتت
حامد: روحن ولن منا اريدن ودق وامها وحيدهن
أيه : حاظر بابا يله جنه امشينا
جنه: خيه لاتملخين برويحتج الروح عزيزه مايفيدج احد
ايه : امشي يمعوده هسه ننكتل امشي نشوف الجهال تلكين ناس كتلت ناس
حامد:
من رخصتك بويه مازن

مازن : مرخوص يابه عفتهم وطلعت وجسمي كله يرجف عليها بس لو افهم شنو الي مسوي الج ومخليج بعد كل هاي السنين تحبيه ولهفتج ودموعج كانه عايش وياج وصلت مرحله احسد ميت اي اني احسد طارق لان ودق هيج تحبه ومخلصه اله شسوي واخليج تحبيني حرت شسويت وكل مااحاول وياج اكثرتبتعدين اكثر
اااااااه ياشلعه گلبي احس گلبي كل ميشوفها تتكطع شراينه لوتعرفين انتي شنو عندي ودق وحق كل قطره نزلت من سما الله احبج بكد مطر الله ورحمته احبج شوكت تحسين شوكت

يمامه : لزمت ودق ومشينا للصاله دخلنا وكعدنا واباوع عليها جثه وتمشي ويايه سوده بوجهي شجاني سمعت كلامج حجيه جميله هسه اني ماعندي عقل واسمع مشورتها دوم اخالف كلامها شجاني ونفذته
كعدنا وحامد بيده السبحه ويسبح برجفه ورجله تتحرك بقوه اعرفه زين من يتوتر

باوعت على ودق الي مدنجه ومكسوره اوف رِّبًـــ♡̨ـــٍْيٌٓ هاي البنيه دومها تعبانه مشافت طعم السعاده بيوم
حامد: انه دوم اكولن ودق تشبهني عبن قويه وسباعيه وبميه زلمه وگلشي صار وياچ وانتي واگفه شامخه ومايوم دنجتي راسچ وكملتي شهادتج وعياتچ والديره كلها تحلف بثگلج ويسولفون شزيناتها للبت وانه راسي مرفوع عبن اكولن هاي بتي موش بت عادل
وگلشي ردتي گتلج تم
قصرت بويه وياچ تحجي ليش ساكته قصرت انه بيوم

ودق : لا عمو مقصرت بشى احجي ومنزله راسي ودموعي تنزل بهدوء وايد تفرك بأيد ومخنوكه حيل
حامد: بويه انه اريدن مصلحتج اريدچ تعرسين عمرج كضه وانتي تنوحين
ودق : شنوو لا فدوه عمو كله ولا الزواج حسيت هلمره كلامه مو تهديد وكأنه امر واقع وراح يصير
حامد: وتاليها تضلين هيچ العمر گله حتى الله مايرضاها خيره الزلم طالبيج ومارضيتي گليلي وضعج هاذ لشوكت يفض
ودق : ميفض ومااتزوج افهموني اني ممأذيه احد ولا مدخله بحياه احد ليش تأذوني هسه كلكم متزوجين ومرتاحين شلكم دخل بيه ارحموني من تحكمكم تره والله اهج ومتلكولي مكان
وجان يوكف وعاط بيه ويرجف يريد يضربني

حامد: اسمعي يبت عادل چلمه اهج اذا كالها لسانچ وحگ علي اكصن لسانج واحش رجولج حش ماعدنا مره تهج لااطلعيني من طوري ساگتلچ واكولن تعبانه واقدر وضعج چا انه مو بعينج شنهي من صلافه وچدامي وتهددين
يمامه: حامد على كيفك وياها ياعيني هي موقصدها
حامد: تگصد او ماتگصد اسمعيني زين وحطيها الچلمه براسچ اذا اريدن ازوجج باجر اعكدلج على زلمه واشوف يامره تفتح وتسمعني حسها بس انه اكولن هي تختار وضليت انتظر تداوين من جرحج وعفتج بكيفج تجولين لهنا يبت عادل وبس انه مااريدن الديره گلها تسولف ليش بت اخوك ماتعرس اخاف كاضها خطيبها ومو بت وتخاف تزوج مره ثانيه
يمامه : ينكطع لسان الي يحجي على بنتي شنو مخابيل هي غير كاطعه مهر ولو ما امر الله والقدر جان هسه بيتها وابنها بطولها الرجال الله يرحمه مالمسها شون من ناس مريضه ومتخاف الله 
حامد : الوادم صايرها لا شغل ولا عمل گلها عينها على غيرها واحنا بلذات بيت الشيخ وكل واحد بهذا البيت لزم ينتبه على تصرفاته النفس محسوب علينا وبت حفيده بيت الراضي ومسؤوله مني وانه اريدلها الزين والزين تعرس وتسكت حلوك الوادم
وانه باچر اشوفن الوادم الچايتج اذا مناسب تعرسين الشهر الچاي

ودق : يعني غصب تزوجوني زين مو الزواج الغصب حرام شون تعرفون الله وتحجي بلعشاير والاصول وتريد تغصب بت اخوك على الزواج هذا معناه انت تكذب على العالم وتتدعي المثاليه  وجان يلزمني من دشداشتي وجرني حيل يريد يضربني
وجان تعيط ماما وكفت بينا وباقي يعت بيه فدوه حامد ابوس ايدك عوفها ولج اسكتي من صخام بوجهج

ولج هاي عليمن هيچ تحچين انه حامد الي الوادم گلها تحلف بعقله وبعدله وتهابه الزلم والشيوخ تچي بت اخوي تجاوز علي لاتشوفين نفسج دكتوره لدكتوره على نفسج مو علي اليوم اريدن اعرفنچ منو حامد ومنحس غير ماما توكع من طولها وعطت عافني عمو وركض عليها
يمامه يمامه اكعدي
لاحس ولا نفس جسمها ثلاجه كمت الطم على وجهي وعاط عمو عليه لج جيبي مي
ركضت وجبت كلاص مي اجيت لكيت عمو شايلها من الكاع ومخليها على القنفه ويكعد بيها
يمامه حبيبتي تسمعيني
يمامه : الموقف بين حامد ودق تعبني احس من الخوف گلبي يريد يطلع والدنيا تفتر بيه خفت على ودق من غضب حامد هو من يتعصب ميشوف كدامه وهاي تخبلت رجعت تتجاوز على عمها واني افاككهم محسيت غير الكاع جوه رجلي تفتر ومحسيت غير وجهي وهدومي كلها مي وكوه افتح عيونه واشوف ودق ترجف وتبجي وراسي بحضن حامد ويفرك بصدري
ويمسح بوجهي حتى بس اصحى
لتخافون مابيه شى
ودق : شون مابيج وانتي حتى النفس اختفى منج
حامد : اطلعي بره
ودق : عمو بس خلي اطمن عليها واطلع
حامد: اطلعي ودق لا ابتلي بيج هسه
يمامه : كوه اجر النفس واحجي حامد على كيفك وياها
حامد: اسگتي انتي يله بسرعه اصعدي لحجرتج خلي امچ ترتاح مااريدن اشوف جهرتج
ودق: طلعت ابجي وخايفه على ماما موقصدي اتجاوز واتعارك اني مطالبه شى بس يعوفوني بحالي ليش الناس مترحم وتدخل بلي يخصها
حامد تعالي اسندج لحجرتج
يمامه : مااكدر دايخه عوفني هنا ارتاح
حامد : انه اشيلنچ
يمامه: شتشيل غير ظهرك هسه يطك
حامد : انه اخوك يفاضل انه الشيخ حامد ماادبر اشيلن مريتي چا هيچ اروحن تنازل عن الشيخه

يمامه : ههههههه الشيخه شعليها بلشيله
حامد : چا اشيل طلايب الوادم گلها ومااشيل طيرتي تعالي اشيلنج وافرچ بلبيت گله واريدن اراويج انه كدها لو لا
يمامه : لا فدووه كدها والله كدها منا البنات شيكولن  وابنك يطب ويطلع يشوف ابوه شايل امه عيب ميصير
حامد : شنهي عيب غير مريتي وطيرتي وروح ونفس حامد چا هاي يمامه موش اي يمامه واريدن اشوف يهاي تنفس
يمامه : الله يحفظك اليه يله الزم ايدي ونتمشى
حامد : وحگ علي بنابي طالب ماتتحرك رجولج خطوه بلكاع جاانه وين وليت
يمامه : اوف اروح فدوه لحنيتك بس ها من هسه اذا ظهرك طك مالي دخل انت دكيت رجل
حامد : وانه كدها يله يبعد بيتي اشيلنج بضلوعي موش بحضني

شالني واني كاتمه ضحكتي وكل شويه اكول اله اذا طك مالي دخل وهو يضحك ويمشي وصلنا لغرفتنا نزلني على الجربايه ويتنفس سريع انقطع نفسه من شفته كمت اضحك
انه ضحكتج عندي تسوه العماره گلها

يمامه : حامد
حامد : يبعد حامد وهله وعشيرتها گلها امريني
يمامه : فدوه بداعه يمامه عندك على كيفك وياها كعد بصفي تنفس بقوه وجر حسره  نزع العكال وتمدد يمي ويسولف
حامد : انه احبنها يمامه هاي بنيتي موش بت عادل
يمامه : قبل شويه تصيح الها بت عادل وبت عادل
حامد : مو انه من تحرك افادي اگولن بت عادل من تسايرني وتمشي بشوري تصير بتي

يمامه : انت اكثر واحد لازم تحس بيه انت جربت نار الحب وعذابه
حامد : انه وياچ بس الى متى گليلي البت كبرت والوادم كثرت السوالف عليها انه لو بيدي العمر كله اعوفنها على راحتها گلشي بلغصب الا الحب والزواج لچن اعگليها انتي احنا ماضالين العمر كله ليها انه اريدن انام بكبري ومرتاح حاطها امانه عند زلمه حوك يراعي الله بيها
يمامه : اسم الله الرحمن من عمري على عمرك لتحجي هيج عفيه
حامد : هذا موت وحگ علينا حبيبه وانه اريدن إمنها گلها استقرت وعدهم بزر الا هي گاضيتها شغل بشغل انه من خوفي عليها اريدن تعيش موهين علي دمعتها ولوعتها
وحگ ابا الحسنين البت لو ترضى ازوجها لمازن
يمامه : شنوو مازن شون وهو متزوج جنه وجنه بتك
حامد : جنه ودق اثنينهن بنياتي وجنه مو اول وحده تنزل عليها ضره انه مااريدن الوع جبد بتي بس اعرفن ودق عاقله ومازن مايرتاح اله يتزوج بت عمه

ومن يرتاح يريح جنه انه من اشوفن بتي عيونها طايره على مازن وهو ولا يمه تتوگعين ارتاح اعرف بنيتي مشلوعه گلب وياه ولو ترضى باجر اطلگها منه اطلگها وانه الي تامر بيه يجرالها بس البت تحبه وراضيه بلقليل وهو سمچه مزوهره مدوهن على ودق گليلي شون اريحهم انه حاير بتي الگلبها تعبان ومايتحمل تشوف مازن ومايحبها لو احير بولدي الي ربيته وعيونه طايره على بت عمه وگلبه يلوب عليها ويذكرني بشلاع چبدي من چنتي بعيده عني لو احير  بودق وانه اشوفنها غصن ريحان ويذبل چدام عيني وياهن طلايب الوادم چا زين مني وامشي
يمامه : واني من ذوله كلهم وين
حامد : اااااااه يبعد رويحتي انتي چا انه شگاسر ظهري غيرج هاي الوادم وعيالي وهلي گلها بچفه وانت بچفه ثانيه انتي النفس الي ينزل الريه (الرئه) ومايهلي اطلعه وحگ هو علي

يمامه : الله يحفظك اليه وميحرمني من حنيتك بدونك اني اضيع بغلاتي عندك لتتعصب وتتأذه اذا تريدني مرتاحه انتبه لنفسك وكافي حامل هم الكل اني اخاف عليك من التعب والقهر
جان يحط راسه على صدري واني العب بشعره بهدوء
حامد : يمامه خافي الله بيه انه عضاي گلها ترجف من شفت طولج چدامي ومدده لا ايد ولا رجل والنفس كاطعته انه كل هزه منج تكطع الروح بيه لاتخوفيني عليج ماتحمل

يمامه : والله من شفتكم تتعاركون خفت ورجفت ويجوز الضغط هبط لهذا تأذيت وكعت ليضل بالك اني تمام والحمدلله
حامد : مااوديچ للطبيب اخافن صحتج تتعب اكثر
يمامه : مابيه شى گلبي لو بيه اكولك لتخاف حبيبتك بطله
بقى نايم على صدري مثل الطفل لحد محسيته ارتاح هو هم وجهه انخطف من وكعت
حبيبي راح اكوم اشوف ودق
يمامه : اگعدي مكافي السوته اخاف عليچ تتأذين
يمامه : لا قلبي مااتأذه خطيه اني ادري بيها هسه كعد تبجي واخاف عليها تأذي روحها
كمت على كيفي وعيون حامد تراقبني وفتحت الكنتور وطلعت البدله والقميص

حامد : هاي انتي ضامتهن توقعت حرگتيهن وين موديتها
يمامه : اصعدها الها
حامد : واتكسرين چلمتي
يمامه: شفته فتح عيونه وبدا تظهر دمارات ايده عرفت بدا يتعصب تمشيت ورجعت كعدت يمه قريبه لصدره ولزمت ايده وحطيته على صدري واحجي بهدوء وياه
ماعاش الي يكسر گلمتك بس فدوه لطولك بداعه طيرتك بروح ابوك لتأذيها وتجبرها على الزواج

حامد : اگلها هاي بتي تگلي تأذيها الحچي گله مافهمتي اكلها انه لو بيدي ازوجها ضره على بتي وحيدتي عبن ادور راحتها وانتي تگليلي لا تأذيها
يمامه :احنا اثنينا نريد راحتها وسعادتها بس مابيدنا شى شفت حالها انهارت وفقدت حتى توازنها
حامد : چاتعرفين بتچ ماترضى شون خذيتي ثوبها
يمامه: هاي سوالفه الحجيه واني سمعت كلامها
حامد : والحجيه اذا درت بيج رجعتي ثوبها تلعب فلك بيچ
يمامه : شسوي خلي تسوي راضيه بس كون ودق بخير ومرتاحه واذا على كلمتك اني اكول الها توسلت بعمج حتى يرضى ترجعلج البدله
حامد : والوادم الجاي باچر

يمامه : انت تعرف تتصرف وياهم فدوه حبيبي لتكسر بخاطري وخاطرها وبست ايده
حامد :اااخ بس لو تبطلين حلفانج الكاسر ظهري بويه لاتحلفيني بيج ماتحمل من اشتعل ابهات عبيس
يمامه : هههههههه والله عبيس خطيه مينزل لا من حلكك ولامن حلك الحجيه اكوم انطيها البدله وارجعلك
حامد: انه من شفتها تصارخ گلت حركتيها

يمامه : مكدرت گلت اشوف اذا تقبلت الفكره احرگهن واذا تأذت ارجعهن الها وشفت حالها اني وياك نريد سعادتها وهي متقبل وهسه گلبها يوجعها على البدله ادري بيها لهذا خلي ارجعها يجوز يجي يوم ومن وحدها أذبها
حامد : مااضن يطيرتي ودق على عمها من عشگ ماعشگ سواها وضل ٢٠ سنه يتلوع لحد ماكضها ونامت بحضنه وانه لو عايش الله يرحمه لو بأخر الدنيا اجيبه ليها بس بعد امر الله  الْحٍمَدٍ للـّہ على گلشي
يمامه :  الْحٍمَدٍ للـّہ خلي اروح وشوي واجيك
حامد : لاتأخرين مشتاگلج
يمامه : جايتك گلبي مااتأخر

صعدت بهدوء وصلت لباب غرفتها واسمعها تبجي وتشهك دخلت بسرعه عليها مااتحمل دموعها ومن فتحت الباب تفاجأت كاعده بلكاع وحاطه راسها بين رجلها مثل الطفل وتبجي
ماما ودق حبيبتي
ودق : ماما انتي زينه وحضنتها حيل
يمامه : مابيه شى حبيبتي لتخافين
ودق : احجي واشهك بلبجي والله موقصدي اخوفج والله موقصدي اتجاوز على عمو كولشي مردت بس بدلتي ركزت زين مسحت دموعي شفت البدله بيد ماما
يمامه : هاج امي اخذيها علكيها هي والقميص
اخذتها بهدوء اباوع على عيونها تكول رديت طارق الها مو مجرد بدله وقميص حضنتهم من كل گلبها وباست قميصه ودخلته بلكنتور وسدت الباب ورجعت حضنتني

يمامه : انزلي على عمج اعتذري منه
ودق : اني موقصدي اتجاوز اني ردت
يمامه : بلا حجي زايد انزلي على عمج بوسي راسه واعتذريله تره هو من حبه الج هيج سوه
ودق : اعرف بيكم تحبوني بس اذا تريدون راحتي عوفوني بحالي والله مااذيكم

يمامه : متعرفين حالج هذا ولوعتج كعد ادمرنا بس مابيدنا شى انتي راضيه بهذا الوضع والنا الله
يله يابنتي انزلي لعمج وبوسي راسه حتى لتكبر وصدوك هلمره يزوجج غصب عمج يحبج ويتمنالج كل الخير
ودق : نزلت على عمو من دخلت للغرفه عدل كعدته بس ميباوع بوجهي نزلت على راسه بستها وبست ايده سحبها وسحبني لحضنه وكمت ابجي
حامد : بسچ بويه لا توجعين گلبي انه اريدنلچ الخير ويشهد الله اريدن اشوفنج سعيده ومرتاحه

ودق : اعتذر عمو والله موقصدي بس بداعت علاوي بداعتي اني اذا تحبني عوفني براحتي لتزوجني ومستعده حتى ابطل من الدوام حتى لتجيكم حجايه المهم مااتزوج
حامد : لا بويه دوامج سندچ وانه اريدلچ سند مااريدن بيوم تحتاجين لحد طول ماانه موجود مايمسچ الهوا بس انه اخافن عليج من اموت وهاي دنيه
ودق : اسم الله عليك عمو لتكول هيج انت سندي وقوتي وظهري
يمامه : وتالي وياك حامد اله تحرگ گلبي بكلامك
حامد : ههههههه لاتخافين گلبچ رچيچ يطيرتي

ودق : اطلع ماطول صار بيها طيرتي عفت عمي يتغزل بماما وطلعت اضحك وحتى مكملنا الكلام لان مبين عمي مستوي على ماما هههههههه
رجعت لغرفتي وسديت بابي وفتحت كنتوري عالمي الخااص وطلعت قميصه وبيومها نمت واني حاضنه ريحتها ااااه ياطارق كل يوم يمر بعمري احبك بيه اكثر من اليوم الي قبله
مرت الايام هادئه وكدر عمي يرفض العريس الجاي ورجعت من العياده مثل كل يوم اتمشى گلت خلي اروح لبيبي صار فتره مرايحه الها ومن الباب اسمعها تعد وتصف

الحجيه جميله : اليوم اصمط أبهاتگم ولگم مشعولين الصفحه اكعدو
ودق : شونج بيبي وبست راسها
الحجيه جميله : تعاي ليه خايبه الفروخ لعبو بيه فلك
ودق : اباوع جهال مازن وبلكاع ابن أيه وناس تملخ بناس وكل شويه شامرين غراض والعاب على بيبي كمت اضحك وجان تكفخني على راسي
ايا والغسل تضحكين علي
ودق : لا بيبي اضحك ويه الجهال
الحجيه جميله : دهر فرچ مجابلتني وتجذبين علي انه امك يحميد اليوم أكلچ اكل بسنوني

ودق : هههههه هي وينها سنونج بيبي ولا واحد باقي
الحجيه جميله : اطگج بعصيه اچسر راسچ بيها چا انتي دغتوره وگل شوي موليه للديره وراده وتفترين علي كل شوي فاتحه حلگي چنج الشمر چا وينهن سنوني
ودق : والله بيبي ديسون القالب كلها يومين واجي اركبهم الج وتصير اسنونج احلى من سنوني
وجان يركع حامد ابن مازن الخاشوكه بيد بيبي وعاطت
من احترك ابهاتكم اليوم اهلسكم تهلس ولچن يمسودنات وين وليتن فروخج موتني
بيبي على كيفج
وجان تضربني بلعوجيه خرب بس لو تعوفها يوم من ايدها اله اضمها لو احركها كل شويه ضاربتنا بيها اااخ والله تإذي اجيت اشوفج لو انكتل يابيبي قابل همه چهالي
وجان نسمع عيطت عمه فضيله وطلعنا نركض شكووو
ايه احتركت بلتنور
يتبع