#مسارات_حياتنا_ستتغير
الجزء الاول من الحلقة 24
مريم : ماقدرتش نرقد نحس في الفراش جمر تحتي صبيت وطلعت برا الدار جيت للتلفزيون ولعته وقعدت نقلب في القنوات
محمد : ماجانش نوم واصلا مريم تتقلب واجد عرفتها مش جايها نوم قعدت وبعدها صبت طلعت سمعت التلفزيون ولع ماتريحتش لحقتها .....ماجاكش نوم
مريم :
محمد : قعمزت جنبها ....ميمي نحكي معك
مريم :
محمد : مريم نحكي انا ردي عليا عارفتيني مانحبش الحو المعفن هضا
مريم : برمة عليه ....ماتحكش هك معايا وماتفشش الغل اللي فيك فيا عدي لصاحب الرسالة وهزبه انا مش شوري
محمد : استغفر الله يامريم ماتكبرش الموضوع خلاص
مريم : عزقت الريموت علي الصالون وصبيت خشيت لدار
محمد : لحقتها ....بعد نحكي معك معش تعدي وتفوتيني حركات الفرخات فكيني منها تسمعي
مريم : انا مانديرش في حركات احكي كويس معايا شوف روحك انت قبل
محمد : تي شن تقولي انتي لمي فمك خير ما تشوفي جو مايعجبك
مريم : برمة عليه ....ماتقوليش لمي فمك شن تحق فيا ندير وشن بدير يعني كان ماسكتت انت اللي شوف روحك كيف تتصرف وتحكي معايا قبل
محمد : رقتلي الضغط بدون مانفطن رفعت الطاسه من علي الطاولة ......اسككككتي .... وطلقتها شورها
مريم : وااااك ...جت فوق من راسي نصدمت
محمد : فطنت بعد عيطت ....بعد نعصب فوتيني ازززح كم مرررة نقولك فوتيني وانا معصب مانفطنش بروحي شن اندير
مريم : قعدت نبحث فيه وساكته
محمد : طلعت وخذيت مفاتيح وجاكه وطلعت
مريم : هو طلع وانا قعدت في صدمتي هضا اللي كنت خايفه منه من اول مشكله يتصرف هك صبيت لميت القزاز وخشيت الحمام نحس في رقبتي من لوراء تحرق مديت يدي حسيت بحاجة بزتني عرفتها قزازه جيت علي المرايه وسحبتها بيدي ومسحت مكان جرح صغير كان خشيت دوشت ولبست روب شرت قصير وبدي كات من قدام مفتوح وفوقه طرف طويل صكرته وطلعت خلاص نحس في معدتي الم جيت لدوﻻب ندور في احبوب اعصاب المعدة لقيت الباكو بس فاضي قعدت نقربج عديت للصيدلية الشقة قربجتها مافش شي ...حي ع امي مافش احبوب شن بندير ...عديت طبخت كمون وشربته هدا شويه وردت عديت نجري للحمام نستفرغ طلعت قعمزت درت نعناع شربته قعدت شويه وصبيت نستفرغ خلاص من الم معش تحملت قعدت نبكي خذيت نقالي رنيت علي محمد رن نقال في الدرج مسيبه خلاص انهرت بكاء من الحظ المعفن وبخث ومن الوجع طلعت للصالون معش فطنت لشي
محمد : طلعت قعدت نص ساعة لعند رقت وهديت اعصابي وروحت فتحت الشقة وخشيت حطيت مفاتيح في المدخل وخشيت نفجعت لقيت مريم طايحه في الصالون خشيت نجري .....مريم مريم ....رفعتها علي الصالون ....ميمي ....كان واضح عليها باكيه واجد ...مررريم .....عديت نجري جبت عطر بخيته علي يدي وحطيته له علي خشمها شويه وفتحت عيونها .... مريم كنك شن صارلك
مريم : قعدت نبكي
محمد : اهدي بس كنك شن في
مريم : معدددتي
محمد : خذيتي احبوب
مريم : الباكو فاااضي رنيت بنقولك تجيبلي لقيتك مسيب النقال هنا
محمد : ﻻحول وﻻقوة الا بالله صبي باهي توا نجيبلك توا
مريم : نضت نجري شور الحمام قعدت نستفرغ
محمد : ﻻﻻ صبي نعدو مستشفي انتي الحبوب معش يديرلك شي ....طبست عليها رفعت شعرها وغسلت وجهه ...صبي هيا
مريم : ساعدني صبيت وسندني لعند قعمزت علي سرير .....اااه ياماااما ااااه
محمد : فتحت الدوﻻب طلعت دبشها ساعدتها تلبس وعدينا شور العيادة لقينا دكتور لبناني خشينا عليه ....السلام عليكم
الدكتور : وعليكم السلام تفضلوا شو الحاله
محمد : المدام عندها اعصاب معدة وتاخذ في الحبوب هذي ....مديتهن له
الدكتور : عم تستفرغ
محمد : نعم
الدكتور : مايا دخلي المدام للفحص
مايا : تفضلي
محمد : امسكيها لو سمحتي تعبانه بروحها
مايا : حاضر
مريم : اااه .....سندتني وشالتني قعمزت علي سرير وحطتلي جهاز وغطتني
مايا : تفضل يادكتور
الدكتور : تفضل معي يااستاذ
محمد : صبيت معه وجيت وقفت مقابل مريم
مريم : اااه ....برمة وجهي للساس
الدكتور : شو عم تحسي مكان الالم هون
مريم : نعم اااه
الدكتور : اووو معدتك متهيجه كثير
محمد : عطيها علاج معقوله تقعد هك تتوجع
الدكتور : اكيد ح اصرفلها علاج بس ﻻزم ترتاحي وابتعدي عن اي حرق اعصاب وزعل واي توثر هاي الفترة
محمد : حاضر
الدكتور : خلاص مايا ساعديها توقف وتفضل استاذ معي
محمد : هيا ....جيت معه
الدكتور : هضا علاج ضروري تاخذ الابرة هالحين
محمد : تمام شكرا
مايا : يلا معي اعطيك الابرة
مريم : ااه ياارب ...عديت معاها ...عطتني الابرة وطلعت لقيت محمد يستنا فيا قدام الباب
محمد : شن كويسه
مريم : من الله بخير ...عديت وسيبته
محمد : في عقلي يااارب عطيني الصبر وبرود الاعصاب واهديني بالصبر يارب ....لحقتها فتحت السيارة وركبنا طلعت طول للصيدليه شريت العلاج وطلعنا طول الطريق وهيا ساكته وانا ماحبيتش نحكي مرات تتعقد وتزيد وصلنا للحوش ونزلنا وخشينا للشقه طول خشت لدار
مريم : سلحت البالطوو علي السرير وخشيت سرير وسحبت الغطاء عليا
محمد : خشيت وراها .....حبيبي ميمتي ...قعمزت جنبها وطبست عليها ...ميمي انا اسف انا من قبل قايلك بعد نعصب فوتيني انا بعد نعصب مانفطنش بتصرفاتي شفتي شن صار مبكري وانا اسف والله
مريم : قعدت نبكي
محمد : رفعت عنها الغطاء وطبست عليها وسحبتها في حضني
مريم : حوول ماتقربنش حووول
محمد : ضميتها بين ايديا ....مستحيل نحول ونسيبك انتي حبيبتي ومراتي وكبيدتي ياهبله خلاص اسكتي والله اسف سامحيني ونوعدك نتحكم في تصرفاتي
مريم : معش تعصب علياااا تسمع والله نعدي لخوتي يتفاهموا معك
محمد : بوست راسها .... حاضر نوعدك اسف والله
مريم : باهي من اللي عكر مزاجك هضا
محمد : شن رايك بكرا نحكوا في الموضوع تريحي قبل باهي
مريم : هزيت راسي بمعني باهي
محمد : بوستها علي خذها ..نحبك ياقلبي انتي
مريم : حتي انا
محمد : غمزتلها بعيني ....شن
مريم : نحبك
محمد : ربي يحفظك ليا بعقلك
مريم : وانت ربي يعطيك عقل هادئ ويهديك
محمد : هههههه صار ماعندش عقل انا
مريم : اممم اهاا
محمد : صار هك ...ونبدا ندغدغ فيها ...هااا هااا
مريم : ﻻﻻ مادي مانحبهش ﻻﻻﻻ هههههه حووول اااه
محمد : هههه سماح المرة هذي هيا صبي بدلي دبشك عشان نرقدو وتتريحي
مريم : وبكرا نحكواا
محمد : ان شاء الله حاضر
مريم : هيا ....صبيت للحمام ولبست روبي وجيت خشينا رقدنا
~~~~~~~~~~~~~~~~
وسيم : كنت طاير من الفرحة بعد عرفت ملاك متقبلتني ووافقت ان نخطبها بعد ركبنا في سيارة طلعنا من الجامعه رنيت عليها شويه وفتحت ....لوكتي
ملاك : نعم
وسيم : نقصي السرعة شويه يامجنونه
ملاك : هههه حاضر
وسيم : تقدري تحكي او ﻻ وانتي تسوقي
ملاك : اها دايره سماعة احكي
وسيم : تمام شن قصة مروان امس
ملاك : تي هضا متخلف امس جايب عريس طالبني شخصيا والحاج واحميدة رفضوا ودارو عركه معه
وسيم : عليش رفضوا
ملاك : الاخ طلع بتاع حشوش هههههه
وسيم : شن تحكي جد
ملاك : هههه هضا الواقع جايبلي واحد حشاس ولا بعد رفضوا الحاج واحميدة قاللهم علي اساس بنتكم تمام
وسيم : نعن جد اصله خزززي الواطي كيف يحكي هك علي اخته
ملاك : فوووت جت غير عليه حتي انت سبيت اصلنا
وسيم : حي ع ام التفليم اسف والله بس خوك رقاها ليا
ملاك : ههههه وسع اعصابك وسع اعصابك
وسيم : ههههههه عليك صوت نشاز تغني اخرة
ملاك : رودي كان يحب نغنيله بصوتي الشين هضا هههه
وسيم : الله يرحمه وانا نسمعك عادي
ملاك : هههه ﻻ وحياتك وقضني من توا كان زي رودي من ناحية الصوت خليني نفوتك من توا
وسيم : ههههه كنك
ملاك : تي مرة كبد علي صوتي المعفن هضا كل شوي غني وانا مصدقه روحي من بلعوم بلعومي نغني من جدي ههه لعند صوتي نبح والحاج شالني للمستشفي قالوله ضغط كبير علي احبالها الصوتيه شن دايرة سال امي قالتلك تسحب روحها فيروز تغني ريحت صوتها وريحتنا سمعنا ههههه
وسيم : ههههههه يانعنجد وجوهكم لدرجة هذي وصلتوا
ملاك : ااااه ياوسيم ماشفت شي سبحان الله ننقنا مافي انسان ياخذ مكانه الله يرحمه
وسيم : الله يرحمه باهي ياحنه وين معهد اختك حسيتك معش وصلتي وتبرمي
ملاك : هههه عندك شغل انت
وسيم : ﻻ ليش
ملاك : ههههه اصلا بنطول عليها الحيوانه هذي وبالمرة نهدارز معك توا كيف مشيت شور معهدها
وسيم : هههههه باهي ليش هالتعب وقفتي شي مكان برا طريق كنا حكينا
ملاك : ههه ﻻ خلاص هذي ساكنه هيا وحسام رن معش فيها
وسيم : حسام كيف رقمك عنده الاخ
ملاك : الاخ حصل رقمي من الاخت عشان رنت عليه بنقالي ويوم ......هضا اللي صار
وسيم : تمام باهي فكيني منه جوا اتصالات عندها رقم تحكي منه وهو معش يرن عليك
ملاك : اممم
وسيم : نعم شن قلتي
ملاك : امبااااه
وسيم : تمام
ملاك : اهو الشارع وصلت
وسيم : خشي وانا حنقعد بعيد بعد تطلعي نطلع وراك تم ورد بالك من روحك
ملاك : حاضر وحتي انت افطن لروحك سلام
وسيم : سلام ،،،،طووووط .....قعدت نستنا شفت اختها وخطيبها طلعوا واختها ركبت والباشا وقف جهة الروشن ملاك ويهدارز ...اوووف عليك قصة ...طلعت نقال ودازيتلها رسالة ."سادك هداريز امشي احسن مانجي نتفاهم مع الاخ " طول وصلتها وشفت السيارة تحركت عدت طلعت وراها ورن نقالي يوسف ....طيري
يوسف : صباح الخير
وسيم : صباح النور كيف نضت ماله
يوسف : اها شن برا شكلك
وسيم : اها عند ملاك
يوسف : حي ع امك ياساقط معقوله عند ملاك تفوووه
وسيم : ههههه علي فسختك ياواطي وبطل سخافة خيرلك
يوسف : ههههه شن اخبارها العروس
وسيم : مية مية قلتلك
يوسف : نعم
وسيم : امس حكيت لهيما عليها
يوسف : باهي تمام بكل شن قال
وسيم : قالي بعد انت تبيها مافش مشكلة وقلتله نبيك انت تحكي لاحميدة قالي تم بس احكي للبنت وشوف ردها الاول بعدها احكي اهلك وشوف ردهم الباقي ساهل
يوسف : علي خير ياباشا فرحتني والله ربي يسهلك
وسيم : يارب
يوسف : في سيارة انت
وسيم : اها ماشي نوصل ملاك لعند حوشهم
يوسف : قصدك صح كنت معاها
وسيم : هههه في الجامعه ياغبي وطلعت وراها كل حد في سيارته
يوسف : اهااا تمام هههه عقلي خاب
وسيم : عارفك عاد بتقولي
يوسف : خلاص نحكوا بعدين كمل ملاحقتك ههه سلام
وسيم : ههه سلام ،،،طوووط ....صكرت من يوسف وقعدت وراها لعند وصلت نزلت اختها فتحت الجراج هيا باتخش درتلها بالضي وبيبت بيبتلي وخشت وانا عديت شور الحوش وقفت ونزلت لقيت امي وغادة مقعمزات ....السلام عليكم
وفاء،غادة : وعليكم السلام
وسيم : قعمزت ...شن تقري
غادة : اها بكرا المادة سامطه
وسيم : طلعت الورقة مديتها لها ....هاكي
غادة : شن هضا ...فتحتها لقيتها امتحان بحتث فيه ....من وين جبتها
وسيم : ملاك
غادة : غمزتله ...شن صار حكيت معها
وسيم : هههه اها
غادة : باهي شن قالت بشرني
وفاء : شن كنكم
غادة : ويسو يبي يخطب صاحبتي
وقاء : من هذي
وسيم : امسكي لسانك انا نبلغها هههههه
وفاء : احكي هيااا
وسيم : بنخطب ملاك صاحبة غادة واخت احميدة
وفاء : ملاك
وسيم : اها شن رايك
وفاء : ماعندي مانقول فيها بس انت متاكد تبيها كيف ماهي فكرت كويس ياوسيم الزواج عمر مش يوم او شهر بس
وسيم : انتي عارفتيني عمري ماخذيت قرار بدون تفكير
وفاء : خلاص وانا اهم شي عندي انت تبيها كيف ماهيا بكل شي فيها انا ماعندش مانع موافقه علي ملوكه وربي يجعلها من نصيبك
وسيم : نبيك تحكي لباتي وتشوفي رده وكان وافق بنقول لهيما يحكي مع احميدة يقوله علي موضوع وانتم قولوا ان انتم عجبتكم وتبوها ليا
وفاء : حاضر ربي يسهلك ويجعلها نصيبك
غادة : لوووووولووولوووولي
اماني : كنكم
غادة : بنخطبوا لوسيم اخيرا
اماني : مبروك وسيم ومن بتخطبوا
وفاء : ملاك
اماني : من
غادة : ملاك اخت احميدة
اماني : شششن ملااااك
غادة : اهاملاك كنك شهقتي
اماني : قصدك بتاخذها هك هذي
وسيم : كنها شن تحقي فيها البنت
اماني : مش لكي بكل واصلا اسلوبها مش تمام وﻻ شكلها كيف بتاخذ واحدة هكي
غادة : اماني لمي روحك ماتحكش عليبنت الناس وبعدين انتي بروحك خذينك بشكل واسلوب وفجاة تغيرتي 180درجة
وفاء : خلاص غادة المهم وسيم ريد البنت والباقي رايهم مش حيغير شي
وسيم : وبعدين يااماني ياريت بعد تحكي عليها ماتتجاوزي احدودك واحكي كويس
اماني : والا
وسيم : نحكي لابراهيم وهو يتصرف معك
اماني : تهدد فيا بخوك هااا
وسيم : افهميها بجوك وانتي عارفتيني
اماني : العتب عليا ننصح فيك اقعدو فيها ....عديت وسيبتهم
غادة : عليك برادة
وفاء : فكونا منها هيا انتي صبي عدي اقري
غادة : حاضر قلتلك عادي انابش ملوكه هههه
وسيم : هههه فكيني من براتك بس
غادة : بيني انا وصاحبتي اطلع منها
وسيم : تي عليش نحكي خليها هيا تهني محتاجتني غير انا ههه
غادة : هههه هيا سلام
وسيم : وانا بنخش ندوش وبنطلع ليوسف
وفاء : باهي رد بالك بس
وسيم : تم ....عديت خشيت للحوش
~~~~~~~~~~~~~~~~~~
احمد : كنت مقعمز نتغذاء رن التلفوني ...ندوش جيبي النقال معك
ندي : هيا هي ....عديت جبته لقيته اميرة ....ميرو ترن ....مديته له
احمد : خذيته وفتحت .....الو ها ميرو
اميرة : احميدة وينك
احمد : في الحوش كنك شن في
اميرة : نرن علي بابا خارج تغطية ومروان مايردش عليا
احمد : كنك شن في وين امي
اميرة : ماما مريضة راسها وعينها تقول دم وقلتلها هيا نشيلك العيادة مابتش
احمد : من امتي
اميرة : من الصباح
احمد : اميرة نعنجد وجك امك من الصباح مريضة ومادتلي وجهك هضا وين رنيتي ياغيبة ملاك والله الواحد مايعتمد عليك في حاجة ،،،طوووط
ندي : كنها اعميمه
احمد : صبيت نجري ....اكيد ضغط راسها وعينها قالت وماده فسختها تتفرج اااه وخلاص ...خشيت بسرعة لبست وطلعت ....ردي بالك من روحك وصكري الباب عليك كويس
ندي : حاضر بس طمني
احمد : تم ....طلعت بسرعة ركبت السيارة ولعت وطلعت رن نقالي امجد مارديتش رنت ملاك .....ها ملاك
ملاك : كنك
احمد : ﻻ شي
ملاك : تي صوتك واضح في حاجة وبعدين انت في سيارة توا وقت غذاء غريبه حد من العيال او ندي فيها حاجة
احمد : ﻻﻻ امي فاطمة مريضة بنعدي نشيلها للعيادة
ملاك : كنها حي ع امه شن تحس
احمد : ااه غبيه اميرة رنت توا قالت من صباح مريضة ومعاها مابتش تعدي انا توا كيف طلعت من الحوش
ملاك : انا توا طلعتلها تم وحنشيلها انت تعال منك غادي طول لعيادة ال .......تم
احمد : تم هيا ،،،،طوووط .....صكرت وطلعت شور العيادة الدنيا زحمه رنيت علي ملاك ....ها لوكه شن صار
ملاك : وصلت في العيادة انا وميرو وتوا قاعدة نحجزلها وبنخشوا
احمد : باهي شن ياملاك مريضه واجد
ملاك : تهيالي ضغط مرتفع توا تقيسلها فيه الممرضة تم احميدة شويه ونعاود عليك
احمد : تم ردي بالك اوكي ،،،،طووووط .....شويه ووصلت للعيادة خشيت طول شور غرفة الطؤارى لقيت اميرة برا ...شن صار
اميرة : الضغط مرتفع عندها خشت هيا وملاك عطوها حبة ضغط تحت اللسان بيشوفوا ينزل او ﻻ
احمد : ان شاء الله خير وانتي معقوله ساكته عليها لعند توا
اميرة : مابتش شن بنديرلها
احمد : كيف جابتها ملاك
اميرة : هزبتها واجد قالتلها والله كان ماتطلعي معايا توا ورحمة مراد ما عاد نجي وﻻ نحكي معك ونزعل منك صبت تجري معانا
احمد : عارفها تهني ملاك صحة لها ....قعمزت قعدت نستنا شويه وطلعت ملاك ....شن صار معاها
ملاك : بيديرولها دخول مابش ينزل الضغط وانتي ياحمارة كنك ماحكيتي من الصباح ماده وجهك تتفرجي عليها عاجبك توا
اميرة : مابتش قلتلكم
احمد : فوتيها توا شن دخول عشان ضغط
ملاك : اها قالوا عشان يعدلوه لها وبعد يتعدل يراقبوه ويطلعوها بعد يقعد تمام مشيط بكل عندها خش شوف عينها
احمد : ﻻحول وﻻقوة الا بالله عادي نخش عليها
ملاك : خش انت وميرو انا امي سكنت تسال نرن نقوللها تم
احمد : تم وانتي خشي قدامي هي
اميرة : هيااا
احمد : خشيت انا واميرة عليها .....السلام عليكم
كلهن : وعليكم السلام
احمد : خشيت جنبها ...امي لاباس عليك
فاطمة : الله لايوريك باس ياحبيبي
احمد : كانت عينها حمراء بكل ....معقوله ياامي مريضة وماتقوليش قاعدة ساكته واميرة تقولك نعدو عيادة ماتعدش معاها
فاطمة : مافيا شي كويسه
احمد : تي اي كويسه الضغط مشيط وعينك تقول دم ودارولك دخول عشان ضغط مابش ينزل شن رفعلك ضغط
اميرة : مروان البلاء عشان مشكلة ملاك
احمد : وشن فتحها سيرة موضوع ملاك بس
اميرة : هو قعد يعارك بعد روحنا وماما تناقش فيه رفعلها ضغط
احمد : عليك قصة وليش ياامي تحكي معه هو مش شوره خليه يحكي جاي عنده كلا موضوع ملاك مستحيل يصير منه
فاطمة : خوك هضا خلاص معش يتحشم يقول في كلام علي اختك قليل التربية
احمد : كلام شن
اميرة : صح امس حرق اعصابنا والله
احمد : شن يحكي
فاطمة : يقول اخته مش كويسه وهذي نتوقعها ادير وجيج مع الرجالة وﻻ بنت سايبه بلا حجاب ولبس وطلوع بجوها وتندرو عليها انتم تتزوج هضا يربيها
احمد : فوووتيه الكلب هضا احسابه عند الحاج توا يشوف غير انتي الله يربحك ريحيلي اعصابك وخلينا هالضغط ينزل بس
ملاك : احميدة انا بنعدي للحوش انجيب امي رنت تهزب فيا قالتلي توا تجي تاخذيني راهو نهار بوك اسود هههه
احمد : هههه اكيد مشغوله مسكينه عدي جيبيها
فاطمة : ردي بالك من روحك
ملاك : امي الله يربحك ريحيلي اعصابك وخلينا هالضغط ينزل
فاطمة : نجيلي خيت خوتها ياااربي نفس كلمة خيك احمد هههه
احمد : هههه نفس ماقلتلها بضبط
ملاك : ههههههه تمام بكل قلتلك تعال شويه نبيك
احمد : هيا ....طلعت معاها
ملاك : قلتلك انا دفعت عربون الدخول تمام انت كملت الاجراءات لعند يركبوها غرفتها تم
احمد : عليش تدفعي انا جايب معايا افلوس
ملاك : خلاص جايب عدي كمل باقي المبلغ انا دفعت حق اليوم انت ادفع بكرا وكان طلعت هيا خيردو قيمة تم
احمد : تم توكلي وردي بالك من روحك
ملاك : تم مش حنطول انا
احمد : تمام ....عدت ملاك وانا خشيت ركبنا امي فوق ودفعت قيمة بكرا مقدم وقعدت نستنا
~~~~~~~~~~~~~~~~~~
ملاك : طلعت من العيادة رن امجد عليا ......ها مجود
امجد : وين في سيارة شكلك
ملاك : اها
امجد : مازلتي ماوصلتي للحوش قصدك
ملاك : ﻻﻻ طالعه بنجيب حاجة كنك
امجد : بعد ماحصلتكش رنيت علي احميدة ماردش
ملاك : اكيد ماشفش النقال كنك انت
امجد : انا كلمت هيثم علي تصميمك قالي قوللها تجيبهن ليا قبل العصر في جماعة جايين يبوا مجموعة تصاميم حواشين قالي نعرض تصميمها
ملاك : تمام خلاص توا ناخذهن ونشيلهن لها توا تم
امجد : تم شن امورك كيف حال العيلة كلها
ملاك : تمام كويسين
امجد : خلاص ياصقع تبي شي
ملاك : سلامتك
امجد : هيا اوكي
ملاك : اوكي ،،،،، طوووط ....صكرت رن وسيم فتحت .....الو
وسيم : خير ياسمحه
ملاك : اهلين
وسيم : كيف في سيارة انتي
ملاك : اها
وسيم : وين ماشيه في هالقوايل
ملاك : العيادة امي فاطمة ضغطها مرتفع دارولها دخول في العيادة توا كيف طلعت منها بناخذ امي انحطها عندها وبنعدي لمكتب امجد
وسيم : ﻻباس عليها امتي دخلوها
ملاك : ماتشوف باس من صباح مريضه مابتش تعدي طلعت انا شلتها بالغصب ودارولها دخول خليت احميدة واميرة معاها وانا روحت بناخذ امي نشيلها للعيادة
وسيم : اهااا تمام باهي وشن قصة مكتب امجد
ملاك : عندي تصاميم نبيهم يعرضوهن ليا للبيع عشان هك بنسلمهن لهيثم رفيق امجد
وسيم : اها كنك مستحقه فلوس انتي
ملاك : نبي ندير شغل بالتصاميم ونبي نساعد الحاج بالجو جاي فرح اختي ونوسه كل شي تبيه وظروف الحاج مش تمام وخوتي قديش منهم علي الاقل نساعدها شويه
وسيم : اسمعي خلاص التصميم اللي قلتلك عليه نبيه خليه ليا وشوفي كم حقه ونشريه منك تمام
ملاك : مستحيل
وسيم : شن مستحيل
ملاك : مستحيل ناخذ منك حاجة انا قلتلك هدية زواجك تصميم بتاعي ههههه
وسيم : تصميم حوشنا هضا ياهبله هههه وبعدين حقك هضا تاخذيه
ملاك : مش حناخذ شي منك تبي هك باهي ماتبش دور حد اخر تم
وسيم : ﻻ ماتماش وتاخذي حقه غصب عنك
ملاك : مش انت تحبني
وسيم : فكيني من الوتر الحساس
ملاك : جاوب بس
وسيم : اها نحبك
ملاك : خلاص اللي يحبني نعطيه له بلاش تصميم زي الحاج
وسيم : ههههههه باهي شكرا ياستي هو حوشك اصل
ا
ملاك : عشان هك عطيته لكي بلاش هههههه
وسيم : هههه باهي عيادة شن اللي دخلتوا فيها امك
ملاك : عيادة ال .....
وسيم : تمام شن قريب توصلي لحوشكم
ملاك : اها وصلت الشارع خلاص بعدين نحكوا تم
وسيم : تم سلام
ملاك : سلام ،،،،،طووووط ....وقفت قدام الحوش لقيت سيارة مروان برا ....اوووف عليك خرافة ام بسيسي هضا بيصدع راسي نزلت وفتحت وخشيت لقيتهم في الجنان ....السلام عليكم
كلهم : وعليكم السلام
مني : شن صار معك
ملاك : هيا كان بتعدي نحطك دارولها دخول ضغط مابش ينزل
مروان : من هذي
مني : امك ضغطها مرتفع في عيادة قاعدة
مروان : من امتي
مني : مبكري رنت ملاك علي احميدة سمعته منه عدت شالتها بالغصب
مروان : اها ...صبيت ....انا ماشي معناها وانتي ايناس كيف ماقتلك شوفي نوع السيارة اللي تبيها شن ونجيبها لكي
ايناس : تم خلاص
ملاك : بعد ماشي شور العيادة خود معك امي
مني : صح كان ماشي طول للعيادة خلاص نعدي معك
مروان : تمام هيا معايا
ايناس : وانا بنعدي معكم نشوفها
مروان : بس بسرعة نستنا فيكم برا
مني : باهي هيا
ملاك : طلع مروان خشيت للدار قعدت نفرز في التصاميم حولت بتاع الحاج وبتاع وسيم وحطيت الباقي في كيس كلهن وخشيت للحمام دوشت وطلعت خشيت درت قهوة راسي مصدع قعمزت نشرب فيها شويه غسلت الفنجان وخشيت غيرت لبست سروال اسود وبلوزه كحلي لعند فوق الركبه وحاكه قصيره فوقه درت مكياج خفيف بسرعة وخذيت نظارات وكيس التصاميم وعديت شور المكتب وصلت وقفت ونزلت لقيته مفتوح خشيت ....السلام عليكم
هيثم : وعليكم السلام
ملاك : انا ملاك اخت امجد
هيثم : كنت نستنا فيك كلمني امجد تريحي قعمزي
ملاك : قعمزت ..... هذينا التصاميم ....مديتله الكيس
هيثم : تمام ....خذيتهن فتحت وقعدت نتفرج ....انتي مازلتي تقري
ملاك : اها نقرا كنك
هيثم : اصلا بصراحة تصميماتك ماشاء الله دقيقات وماتقولش تصميم بنت مازالت تقرا
ملاك : تمام يعني كيف ماقال امجد يمشي جوهن ...رن وسيم درتله مشغول
هيثم : اكيد يمشي ماشاء الله علي شغلك
ملاك : شكرا
هيثم : عفوا ، خلاص ملاك انا حنحطهن ونشوفوا شن حيصير
ملاك : خلاص وامجد حيقولي الاخبار تم نستاذن منك توا
هيثم : اذنك معك تفضلي
ملاك : سلام توا
هيثم : سلام
ملاك : هيا اوكي ....طلعت من المكتب ركبت السيارة عاودت علي وسيم ....ها وسيم
وسيم : وين كنك درتيلي مشغول
ملاك : كنت في مكتب نتفاهم مع صاحب امجد ....ولعت وطلعت بسيارة
وسبم : وردي ليش مشغول
ملاك : كيف بنرد وانا نتفاهم مع الراجل علي الشغل عيب
وسيم : تمام تمام وتوا شن طلعتي من عنده
ملاك : وسيم فكني من طريقة كلام هذي مانحبهش وتعصب فيا الموضوع مش لدرجة تنفتر هك وتتعقد
وسيم : انا مانحبش الجو هضا عشان حد اخر ماتزعجيش اديريلي مشغول
ملاك : مش قصة وعشان نحكي في شغل مارديتش مش قصة ..فجاة ...وااااك
يتبع......
ﻻيك ورايكم في الجزء الاول من الحلقة 24 وتوقعاتكم للجزء التاني وطبعا الجزء التاني بكرا حيكون تحياتي سنيورينآ آآ