#مسارات_حياتنا_ستتغير
الحلقة الاولي 1
في حوش الحاج محمود مقعمزين الحاج وزوجته فاطمة وبنتهم أميرة في الجنان وقت الغذاء
الحاج : الحمدلله مديلي اطويسة الشاهي يافطومه
فاطمة : تفضل ياحاج وناقص سكر راهو كيف ماتحب
الحاج : تسلم ايديك ويعطيك الصحة
فاطمة : الله يسلمك صحة
اميرة : بابا نبي نعدي لسوق بعدين سيارتي في الورشة
الحاج : كلا اليوم مش فاضي انا شوفي حد من خوتك
فاطمة : شوفي خواتك والله نقولك رني علي ملوكه اكيد تقول باهي واصلا بالها واسع بكل في سوق
اميرة : فكيني منها هضا زمان بالها واسع وجوها سمح كلا توا طشه وتنفصل وتهزب وتقول هيا بسرعة
الحاج : ربي يهديها كلا هيا وضعها كل مالها تزيد عصبية وجوها ماهو عاجبني غير نمشي فيها عشان امها ومازال صابر عليها
فاطمة : ﻻ رد بالك ياحاج بروحها نفسيتها تعبانه بعدين ياحاج من اللي صارلها مش ساهل هيا ماتبي معاندة وبعدين خيها اللي مات مش براني راهو
اميرة : ماهو خونا كلنا والله
فاطمة : صح بس كلنا نعرفوا ان ملاك ومراد علاقتهم كيف كانت وماتنسى كيف مات ومن كان معه وبعدين يااميرة ﻻزم انتن خواتها تساعدنها مش هك تحكي
اميرة : والله كلنا حولنا بس هيا ماتعطي لحد مجال
الحاج : ربي يهديها والله يرحمه ويسامحه بعدين وقت توفى مراد هيا قريب لحقاته مستحيل ننسى منظرها وقتها اااه ربي يصبرها
فاطمة : اي والله الله يرحمه ويحفظها لنا من كل سوو
الحاج : امين يارب بس غريبه مارنت مني تشكي منها لعند توا
اميرة : صح غريبه مازالت مارنت
فاطمة : ﻻ رنت عليا مبكري وقالت طلعت بدون ماتقول عديت رنيت عليها قالتلي ماشيه للجامعة وبعد صكرت طمنت مني عليها
اميرة : اهاااا
الحاج : ﻻحول وﻻقوة الا بالله توا انا قلتلها معش تطلع بطريقة هذي وتفجع امها بروحها مريضة بس بلا فايدة
فاطمة : الله غالب عاد حتي انتم وسعوا بالكم البنت تمر بوقت صعب
اميرة : صح يابابا وسعوا بالكم كلكم تهزبوا فيها طول بالعكس ملوكه هك تعاند وتحرق دمكم
الحاج : ربي يهديها ويحفظها من كل شر انا بنخش نتريح
فاطمة : باهي خش بعدين نوعيك علي العصر
الحاج : باهي هي
اميرة : عدا بابا جوا برمت علي ماما ....بابا مضايق من وضع لوكه
فاطمة : شايل همها وخايف عليها بس مافي يده شي
اميرة : ربي يفرجها عليها وعلينا كيف ماحد من الشباب جاء
فاطمة : ﻻﻻ اللي هضا شغل ومروان زارد
اميرة : احسن حاجة
فاطمة : كنك العفووو خيك
اميرة : تي ماهو خواتي بيجن ولوكه بتجي معاهم قالت باهي توا نعدي وفكينا من ولدك هضا حاط عليها هالحصلة حطها في راسه
فاطمة : من جهة حصلة ننقنا خوك هضا حصلة ربي يهديه وخلاص وبالمرة نقول لامجد يحكي معاها بلكي تهدا شوية هيا تسمع منه
اميرة : بالكي تركح شوية
فاطمة : ان شاء الله هيا صبي نبرموا علي الحوش
اميرة : هيااا
~~~~~~~~~~~~~~~~~~
مني : يابنات هيا عشان نعدو لحوش باتكم
ايناس : ملاك ماتردش
مريم : اكيد في الطريق توا تجي بعد كلمتها امي فاطمة
مني : اكيد هيا قالت لمنيرة ان بتعدي معانا هيا بس مريومه عشان نعدو بسيارتك باهي
مريم : باهي هيا بدلي دبشك انتي ونوسه علي ماجت لوكه
مني : باهي هيا نوسه انتي اطولي وقت انا واتيه لبسه ومازال انتي يامريومه
ايناس : هيا هي بنخش نبدل .....خشيت نجري
مريم : وانا نعدي نولع السيارة ونسخنها ....طلعت
مني : قعدت نستنا فيهن يبدلن دبشهن خشت عيا ملوكه .....اهلين اهلين بالغالية ونور العين
ملاك : اووووو امي تستنا فيا ....طبست عليها حضنتها بقوة
مني : اااااه عليك ريحه ياعمري
ملاك : رفعت راسي .....ريحت الغالي ياغالية صح
مني : الله يرحمه ويسامحه الله غالب ياامي ﻻزم الحياة تمشي ﻻزم تصبري ياابنيتي
ملاك : ياامي حاجة ماتت معه حاجة جوا قلبي ناقصه مش بيدي ياامي والله مش بيدي فاقدة الشعور نفسه فاقدة نبض جوااا قلبي هناا ياامي جوا فرااااغ ....انهرت نبكي
مني : كلامها واااعر وفقدت وليدي واعرة ....قعدت نبكي معاها حضنها بكل قوتي نبي نحطها جوا قلبي ونمص وجعها
ايناس : سمعت صوت البكاء طلعت نجري لقيت ماما وملوكه يبكن .....كنكن شن في
مني : مسحت ادموعي ......شي ندلع انا وبنيتي مرايفه عليها شن دخلك تقصقصي
ايناس : علي اللي يعبركن باهي
ملاك : مسحت ادموعي ....ومن عفس علي ديلك انتي ههههه
ايناس : حيواااانه خزززي
مريم : لوكي تعدي معانا
ملاك : اهااا بنعدي بس ندوش سريع ونعدو
مريم : بسيارتك
ملاك : ﻻﻻ مش بتعدي بسيارتك او سيارة ايناس
مني : بسيارة مريومه
ملاك : خلاص معناها سريع ندوش ونطلعوا ....عديت خشيت
مريم : تم
مني : بعد عدت ملاك برمة عليهن .....الحمدلله حسيتها رايقه
مريم : اها الحمدلله
ايناس : نعدي نكمل لبس احسن انا
مني : ايوااا
ايناس : عديت داري
مني : حتي انتي خشي بسرعة البسي
مريم : هيا هي
~~~~~~~~~~~~~~~~~~~
فاطمة : ياميرو جيبي الحاجات في الجنان هيا
اميرة : هيا حاضر
امجد : السلام عليكم
فاطمة : جابك ربي تعال ساعد خيتك
امجد : ههههه غير ردي السلام بس
فاطمة : ههههه سامحني ياحبيبي وعليكم السلام امك مني وخواتك جايات واختك حايسه هيا بس ساعدها
امجد : حتي لوكه جايه
فاطمة : اها
اميرة : امجد خود هذينا غادي فرش الجنان
امجد : هاتي ربي يساعدك هههه
اميرة : نجك ليااااا
فاطمة : كملنا حوسة انا والعيال وقعمزنا انا واميرة في الجنان وامجد خش جوا وخش علينا احمد وزوجته ندي
احمد ، ندي : السلام عليكم
فاطمة واميرة : وعليكم السلام
احمد : خير ياامي كيف حالك اليوم
فاطمة : الحمدلله كيف حالك انت
احمد : الحمدلله
ندي : خير يااعميمه كيف حالك شن دايرة كراعك اليوم
فاطمة : الحمدلله سلم حالك خير من امس
ندي : الحمدلله ميرو شن حالك
اميرة : الحمدلله كويسه
احمد : جايكم حد او شن
فاطمة : ماحد براني امك مني وخواتك
احمد : اها كيف حالهم شن دايرين
فاطمة : كويسات اهو ماصدقن ملوكه قالت جاية
احمد : شن جوها ملوكه
فاطمة : نفس قبل
اميرة : بس اليوم قالوا هادية
ندي : ربي يصبرها ويبرد النار في قلبها
كلهم : امين
احمد : باقي العيلة وين
فاطمة : مافش حد غير باتك راقد وامجد في دار جوا
احمد : اها ومروان
فاطمة : زارد مع جماعته
احمد : تمام
*نتعرفوا علي عائلة الحاج محمود
الحاج محمود : راجل كبير في العمر واااعر مع اعياله وحنون عليهم تاجر عنده محلات مواد بناء وكهرباء حالته المادية متوسطة متزوج اثنين :-
** فاطمة : زوجته الاولي طيبة وحنونه ولسانها عسل مع الناس كلها وصاحبة عشرة وواجب عنده منها 3 شباب وبنت هما :-
-أحمد :- كبير خوته متزوج من ندي بنت خاله هو دكتور في جامعة وطيوب مع الناس عنده بنت وعيل
- مروان :- اصغر من احمد طبعه واعر وعصبي عازب وعنده معرض سيارات مع صاحبه شراكه وحصله بككل
- امجد : اصغرمن مروان متخرج من كلية الهندسة وطيب وعاقل مهندس معماري ومصمم ديكورات وعنده مكتب خاص مع اصحابه واعزب
اميرة : البنت الوحيدة للحاج من فاطمة طالبة في كلية الاقتصاد طبعها مزاجية بكل
**مني :- زوجته التانية كانت زوجة اخ الحاج بس توفه زوجها في حادث اهل الحاج خلوه يردها علي ذمته عشان كان عندها بنتين ومايبوا البنات يتربوا في حوش غير حوش العائلة وخافوا تتزوج براجل براني ويقعدو في مشاكل فاردها الحاج بموافقة فاطمة وفعلا تزوجها وحصل منها علي بنتين وعيل وهيا عندها بنتين من اخ الحاج وخلونا نتعرفوا عليهم :-
منيرة :- بنت اخ الحاج الكبيرة دكتورة اطفال وشخصيتها قوية كلمتها في الحق تقولها ولو شن متزوجه من محامي اسمه باسط وعندها منه عيلين (سليمان ، مراد)
مريم :- بنت اخ الحاج التانية اصغر من منيرة طيوبة وحنونه بكل وماتحب تزعل حد تحضر في دراسات في المحاسبة في كلية الاقتصاد وتشتغل في شركة ادوية خاصة محاسبة
ايناس :- بنت مني من الحاج طبعها مزاحي مرة كويسه ومرة عكس تقرا في معهد ادارة ومصارف
(ملاك ، مراد ) :- تؤوم اعيال الحاج الصغار مراد اكبر من ملاك ب 5 دقائق ويقرؤ مع بعضهم في كلية الهندسة ومتعلقين ببعضهم واجد
~~~~~~~~~~~~~~~~~~
مني : السلام وعليكم
كلهم : وعليكم السلام
مريم ،ايناس : السلام عليكم
كلهم : وعليكم السلام
فاطمة : مرحبتين مرحبتين تفضلوا
مني : يزيد فضلك ياغالية ...خشيت نسلم
مريم : امي فطومه كيف حالك
فاطمة : مريومه حبيبتي الحمدلله كيف حالك انتي شن دايره في قرايتك وشغلك
مريم : الحمدلله
ايناس : اوووو ماما فطومه رايفت عليك
فاطمة : ام لسان ههههه اللي يرايف يجي ياحنه
ايناس : معقوله ياماما انا ام لسان
مني : ﻻﻻﻻ لساناااات واااجد بسلامتك
كلهم : ههههههه
احمد : خشي ياحالة هههه
ايناس : شقيقي الغالي يادكتوركيف حالك
احمد : هههه كويس ياحنه كيف حالك انتي وقرايتك
ايناس : تموووم والله
ملاك : السلام عليكم
كلهم : وعليكم السلام
احمد : اووووو هضا القمر او شن
ملاك : ههههه ﻻ الشمس
فاطمة : اهلين اهلين بقرعتي ملوكه ابنيتي
ملاك : خير ياامي كيف حالك ....طبست عليها نسلم بوست يدها وراسها
فاطمة : حضنتها وقعدت نبوس فيها ..... رايفت عليك يابنيتي
احمد : ﻻﻻﻻ هك فيها حق حتي انا ماهك استقبلتيني
ايناس : اسماله علينا وكنا نحن ياامي هاااا
فاطمة : ههههه اسس خطوني توا ملوكه قرعتها بروحها بطلوا غيرة
ملاك : ههههه مساكين
كلهم : هههههههه
امجد : اوووو الحبايب عندنا انستونا
مني : الله يانسك ياغالي كيف حالك ياامجودة
امجد : الحمدلله ياامي كيف حالك انتي
مني : الحمدلله بخير ونعمه
امجد : نوسة ومريومه كيف حالكن
ايناس : انا تمام
مريم : الحمدلله شن اخبارك انت
امجد : الحمدلله لوكه الهبله شن جوك
ملاك : الحمدلله انت شن جوك
امجد : مرايف عليك والله
ملاك : الله يسلمك ياطير
احمد : اوووو اهو افرحو اهو رد مالك خيكم
ملاك : ههههه ياسامط
كلهم : ههههههه
مني : كيف وين مروان والحاج ماله
فاطمة : الحاج راقد ومروان عدا زارد مع اصحابه وانتي شن اخبار منيرة
مني : والله علي الخبر كويسه
مريم : حال شغل وتعب العيال تعاني قاعدة
اميرة : نوسه تعالي نديرولهم قهوة
ايناس : هيا ....عدينا للمطبخ
فاطمة : وانتي ياملوكه كيف دايره في الجامعه
ملاك : ماشي حالها
احمد : شدي حيلك عاد نبوا تصفيات سمحه
ملاك : يستر الله
مني : هيا غير تعدي ماتعدي الا بعد كم وكم
احمد : معقوله يالوكه كيف صار عهدي بيك منتظمه علي الحضور
ملاك :
امجد : تخصصك هضا يبي حضور محاضرات راهو
ملاك : خلوها بالجو مش ﻻزم كل العائلة شهادات وعلم
مريم : شن كلام هضا من جدك تحكي
احمد : كلام جديد هضا
مني : يابنتي هضا مستقبلك كيف هك اديري
ملاك : خلااااااص عاد فوتوني انتي قلتيها مستقبلي معناها مش شور حد
امجد : يالوكتي نحن عشانك ياهبله انتي توا ماتفكريش بعقلك
احمد : بعدين نحن نحكوا عشانك مش عشان نضايقوك بس واجبنا ننصحوك وقت انتي تقعدي ماشيه في اتجاه غلط
ملاك : ااوووووف فهمت ممكن تفوتوا الموضوع كان بتحكوا بنصبي نروح خير
فاطمة : خلاص خطاها انت وياه خلوها براحتها
مني : ﻻﻻ كيف هك لنا فترة ساكتين وهيا تلبز بس لعند مستقبلها خلاص عاااد وين ماشية تلبزي هاااا
امجد : ياامي وسعي بالك لوكه بس متعصبه خليها توا تغير رايها
ملاك : مش مغيرته وانتي مش شورك ايوااا واصلا معش نبي نعدي وﻻنقرا حاجة تخصني انا بس
احمد : عصبتني .....هاااااي انتي وين ماشيه ادقي صكري فمك وانتي تحكي مع امك شن كلام هضا
امجد : عرفت احمد عصب وكان ملاك ردت حتزيد تكبر حبيت ننهي موضوع .....باهي يابناااات وين القهوة شن تصنعن في ذرة
مريم : اكيد يهدارزن توا نعدي نستعجلهن
ندي : لوكه مديلي نقالك نشوف صور
ملاك : خودي راهو مافش شي جديد
ندي : غريبه كل جديد قبل عندك
ملاك : ايام الحياة حلوة وفيها طعمة
مني : زيدي اقهريني زيدي لعند نلحق مراد وانتريح
احمد : تي ياملاك كنك انتي روفي بااهلك ازح شوفي امك خواتك باتك شوفي روحك لعند امتي بس ترا جاوبي
ملاك : انا نصبي نروح خير ....صبيت وخذيت شنطتي
فاطمة : ﻻﻻ رد بالك تعدي وانتم خلوها في حالها خلاص عاااد
احمد : صبيت ....ارتزعي مطرحك
ملاك : احمد حووول من قدامي تراااا
امجد : خلاص اسكتواا
احمد : قلت قعمزي احسن مانوريك شكلك معش ينفع معك الكلاااام
ندي : احمد خلاص اسكت وسيبها
احمد : دفيت يدها ......ابعدي انتي قلت توا تقعمز انا احسن ما والله يصير جو اخرررر
ايناس : سمعنا الصوت والعياط طلعنا نجرو .....كنكم شن في
احمد : قعمزي انا قلت
ملاك :
امجد : ملاك خلاص قعمزي وانت احمد اسكت خلاص هدى روحك
فاطمة : ياعيااال اس الحاج راقد جوا طاح سعدكم
مني : خليه يجي يتفاهم معاها هذي خلاص مش بعقلها بتودر روحها ماسكتنا الا وااااجد
ندي : يااعميمه هذي اعصابك اسكتوا بس
مريم : لوكه قعمزي عيب كنك عصبتي خوك
فاطمة : ياامي قعمزي عشان خاطري
ملاك : عزقت الشنطة وقعمزت قعدت نبكي
فاطمة : تريحتوا توا هااا بكيتوها
احمد : اعوذ بالله من الشيطان الرجيم .....قعمزت
امجد : طبست جنبها ......سلم خيتي خلاص اسكتي نحن بس خايفين عليك بس نبوك تكملي حياتك الحزن مش كويس والله اللي اديري فيه مش كويس احميدة وامي وكلنا خايفين عليك عشان هك نعصبوا عليك
مني : ياماما من خوفنا عليك هك نحكوا خلاص الحياة ﻻزم تكمل ومستحيل ننسوا خيك ماهو وليدي وخوهم كنك عاد ﻻزم تصبري
ملاك : انتم يالي كنكم شوفوا اروحكم قبل هااا له سنة ميت ترا من فيكم مش حزن ترااا احكوا كلكم علي بعضكم حزنين احكي يااحمددد احكي ليش مسيب لحيتك طويله هااا جاوب ترااا وانت ياامجد رد قوووولي ليش ماحلقت وحتي الحاج ومروان نفس شي وانتي ياامي احكي ليش ماتعدي للمناسبات هاا وانتن يابنات ليش ماتعدن للافراح هااا يامريم احكي قولولي ليش احكوووواا ليش تلوموا فيااا انا وانتم الحزن عايشين فيه ليش تلوموا فيا انا انتم اللي خوته هك مش قادرين تكملوا حيااتكم عادي حتي بعد مرت سنة انا غير انا مش خوية اللي ماااات انا خسرت روحي انا خسرت نبض قلبي انا ومراد مش خوت نحن واااحد كنا وبموته خسرت روحي خسرت نبض كان في قلبي واختفى خسرت حياة جواااا هنااا كانت فهمتواااا انتم ليش انسيتوا ان مراد كان كل شي عندي ليش انسيتوا ان انا كنت نحس بوخزة الابرة فيا مجرد مايخبط ويطيح هو توا تلوموا فيا اااناا من جوااا متت متت افهموااا خلااااص ....صبيت خذيت شنطتي .....مريم هاتي مفاتيح السيارة
امجد : استني نعدو مع بعضنا
ملاك : طلعت قدامه برا
امجد : طلعت لحقتها
احمد : امجد افطلها
امجد : ماتنشغلش ....لحقتها بسرعة .
فاطمة : ﻻحول وﻻقوة الا بالله ضغطوا عليها ياناااس
مني : ربي يصبرها ويهديها
ندي : واااعرة راهو انتم ضايقتوها عليها عندها حق انتم بروحكم مازال مافكيتوا الحزن وانتم اكثر ناس عارفين علاقتها كيف كانت بمراد الله يرحمه وفوقها ماتنسوا كيف توفي نحن نفجعنا يبال لوكه اللي كانت معه الموضوع مش ساهل
مريم : صح كلامك ياندوش بس نحن خايفين عليها
فاطمة : لو قعدتوا هك تضغطوا عليها مش حيصير خير شوفوا اللي صار توا هااا
مني : ﻻحول وﻻقوة الابالله
احمد : خلاص خلونا نردو نسايروها خاصة انتي ياامي مني معش تضغطي عليها وان شاء الله ترد خير من قبل
مني : ان شاء الله
اميرة : شن رايكم نديرو مشوار شور المزراعة نغيرولها جوها
ايناس : صح والله
فاطمة : ماهو حتقول ﻻ
ايناس : ﻻﻻ لو كلنا عدينا توا تعدي
مريم : صح ياماما لو عدينا كلنا توا تعدي معانا
احمد : خلاص كان هك نسقوا انتم وقولولي وانتي ياندي هيا وقت نحطك ف الحوش عندي مشوار
فاطمة : اقعدو كنكم
احمد : عندي شغل بنطول نحطهم ونعدي مرة اخرة خليها
فاطمة : ربي يساعدكم
ندي : هيا ناخذ العيال بس
مني : احميدة راك تزعل من ملوكه مش قصدها راهو
احمد : مستحيل نزعل من خيتي عارف لوكه ووضعها ربي يصبرها ويحميها لنا
مني : يارب
احمد : هيا سلام توا ....طلعت برا
ندي : بسلامة
كلهم : بسلامة
فاطمة : طلعوا عيت احمد ونحن قعدنا نهدارزو
~~~~~~~~~~~~~~~~~~~~
امجد : ركبنا في السيارة ولعت وطلعنا ......شن رايك نعدو للبحر
ملاك : زمان كان البحر يهدي فيا توا معش عرفت شن يهديني بروحي معش نحس بشي امجد قعدت نخاف من روحي نحس في روحي معش نحس بشئ مافش وﻻ مشاعر فيا تصدق حتي حرق اعصاب اهلي معش توجع فيا معش فهمت نفسي انا نحس في روحي ضايعه مافش شئ جوا
امجد : تستغربي كلامي ممكن بس هضا شعور طبيعي انتي قلتي انك من جوا في شئ تغير مافش احساس فطبيعي التغير هضا يصير بس ﻻزم تقعدي مع نفسك وتحاولي توصلي لحل وكان انتي ضايعة مش عارفه بس نقولك الاستشارة النفسية ماضرش
ملاك : هههههه يعني نخش علي العلاج النفسي
امجد : لو في مصلحتك ليش ﻻ ومافش ﻻزم حد يعرف حتي اهلك
ملاك : ياريت متت معه هضك اليوم ياريت ماعطيته السيارة يسوق ياريت انا كنت مكانه ياريت وياريت
امجد : حرام عليك تحكي هك هضا مكتوب من ربي انتي هك ماتساعدي في روحك
ملاك : ياااارب
امجد : وصلنا في البحر وقفت ونزلنا شور الشط .....شن تقعمزي هنا
ملاك : اهااا ....قعمزت انا وامجد علي الشط
امجد : ماشاء الله البحر زحمه بكل
ملاك : ههههه صيف عاد ياحالة
امجد : صدقتي ههههه والله كلا انا هبل
ملاك : باهي يامهندسنا مافش شي جديد عندك
امجد : ههه في شن بضبط
ملاك : مش ناوي تفرحنا بيك
امجد : هههههه كنك واخدة دور امك فاطمة
ملاك : صدقت فيك خلاص عاد خليها تفرح بيكم كلا انت رسمي داعيتلها امها اللي بتاخذها كلا مروان غضيبت ولدين قيسها ربي يهديه
امجد : هههه نعليااا وننقنا ان شاء الله ربي يهديه
ملاك : باهي شن وضعك
امجد : كساد ياحنه شن عندك عروس
ملاك : هههه ماعندش صاحبات عشان نقولك عليهن
امجد : ليش متباعدة عن صاحباتك
ملاك : ماعندش نية نجامل وانت عارف معاكم ويالله نتفاهم يبال مع بنات
امجد : تمام بس نصيحة حاولي تردي معاهن واطلعي وادهوري وهك ممكن تتاقلمي
ملاك : ااااها توا نشوف
امجد : توا نجي نجيب اسبول وحاجات نكسدو بيهن
ملاك : باهي ماطولش
امجد : حاضر .....عديت وسيبتها علي الشط وعديت شور عربة السبول تصادفت انا وشيماء بنت عمي....انتي شن اديري هنا
شيماء : ههههه انت شن جابك هنا
امجد ياباردة انا سالت الاول جاوبي
شيماء : نشم في نسائم البحر وانظر الي امواجه المرتفعة
امجد : ههههه ياخرياطة تشفطي عليا
شيماء : عاااد يامجودي شن بندير تسال في اساله غبية هههههه
امجد : لمي روحك عن محماط انتي ومن هنا
شيماء : بينا هاااا نحكي
امجد : فنصت فيها .....شن في
شيماء : قربت منه وجيت عند واذنه وقلت بصوت واطي .......رد بالك تنفصل قدام الناس
امجد : تي كنك مع من جيتي
شيماء : باهي اهدي بس
امجد : فنصت فيها ..... تي احكي قلت
شيماء : مع بابا وماما هههههه
امجد : تي نعنجد ام وجهك يابااااردة باهي
شيماء : ههههه عرفتك فكرت ان بروحي جاية
امجد : ماندري عنك انتي مش طبيعية اصلا
شيماء : اها صوبات الله غالب
امجد : هههههه حيوانه شن تبي تشري وين اهلك
شيماء : نبي اسبول وعصير وشكوﻻطة وبابا وماما خليتهم يتمعشقوا علي حالهم هههه
امجد : هههههههههه نعنجد البرادة بتاعك تحشمي اززح
شيماء : من من نتحشم منك قصدددك
امجد : نعممممم وانا شن قدامك عشان ماتتحشمي مني
شيماء : نعلوووشي منك انت بس بلا زعل ننقنك هك وجهك بارد وجوك سمح مانتحشم منك كان الحصلة مروان وحق ربي راهو مبكري مخربلي اسنوني مش واقفه نحكي ونسهوك معه
امجد : ههههه عليك دلاله باااارد اخرى وجهي باهي ياحالة وخري توا انا نجيبلك
شيماء : يانعليا ياجنتل مان وادفع بالمرة ايوا
امجد : ههههه من عيوني
شيماء : تي تعال هنا خطرها انت ومن هنا
امجد : ههه ادللي ياستي انا ولوكه
شيماء : والله وين خليتها نعدي نكسد معاها شن جوها
امجد : غادي هناك شفتيها
شيماء : اها باه شن جوها
امجد : والله جبتها هنا عشان تغير جوها صارت طحنة في الحوش مع احميدة وامي مني عشان الجامعة رايحة تلبز ملاك معش بتقرا قالت
شيماء : ﻻحول وقوة الا بالله ربي يهديها ويصلح حالها معناها خليني نعدي نشوفها نسامط عليها علي ماجيت
امجد : احسن شئ فيك عارفه روحك سامطه ههههه
شيماء : هههههه حقير سلام
امجد : سلام ....عدت شيماء وانا قعدت نستنا في دوري من الزحمه
~~~~~~~~~~~~~~~~~~~
ملاك : كنت مقعمزه بروحي علي الشط ونفكر في الوضع وكل شي صار فجاة نطيت علي صوت بنت وقفه قدامي
البنت : معلش كنك تبحثي
ملاك : انعم شن قلتي
البنت : انتي كنك مفنصة فينا من مبكري شن تبي
ملاك : معلش مش بقصد بس كنت سارحه
البنت : وان شاء الله فيشن سارحه
ملاك : كيف وانتي شن دخلك بشن سارحه
البنت : اصلا واضحة ثبحتي فينا وعينك علينا من مبكري
ملاك : ﻻ غلطانة كنت سارحه وحتي شوف ماشفتكم
البنت : ﻻﻻ واضحة مفنصة فينا وخاصة في راجلي لعند رقيتيها ليا
ملاك : هههههههه والله ضاربكم النقص وماتخافش مش فاضية ﻻ بيك ﻻ براجلك وﻻ غيره بس كنت سارحه اطمنوا مش شوركم
البنت : تمام ممكن تسرحي بعيد عنا
ملاك : رقتها ليا ....خلاااص راهو سماطتيها اكثر من اللازم عدي لراجلك وفوتي امي واشقي بروحك مش ناقصني انا
البنت : احترمي روحك
ملاك : محترمه روحي والدليل انت قاعدة تقطفي في كلام فاضي وانا نسمع فيك ومش فارق عندي راجلك تراا فوتيني احسن
البنت : تي ...
شيماء : لوووكه حبي
ملاك : اووووو شوشو الهبله شن جابك هنا ....قعدت نسلم عليها
شيماء : ههههه مع اهلي ياحنه
البنت : تم ياابله
ملاك : برمة عليها .....شن رايك تشقي براجلك وتفوتيني ﻻن وصلت حدها معايا من كلامك الفاضي وانا بايعه ام الدنيا ومافش مشكلة ندفنك حيه زي ماابولهب كان يدير في البنات
البنت : انتي شكلك واحدة صايعة وخطافة رجالة
شيماء : هااااااي انتي لمي روحك احسن
ملاك : ههههه شوفي راجلك واقف مع بنت عدي اجري
البنت : شن
شيماء : برمة وين ماتأشر ملاك ....حييي
البنت : منصوووووور
ملاك : عدت تجري ......ههههههه نعنجد البنات اللي هك وخلاص
شيماء : ﻻﻻ يامالك انت ههههه
ملاك : ههههه انتي شن جوك ياخرياطة
شيماء : الحمدلله قعمزي نهدارز قبل مايجي امجد
ملاك : شفتيه قصدك
شيماء : اها تصادفنا جنب عربة السبول
ملاك : اها اكيد هو دازك ليا
شيماء : ﻻ انا سالته مع من جاء قالي مع لوكه قلتله نعدي نشوفها ونسيب اهلي في العسل بروحهم
ملاك : ههههههه طاح سعدك هك حكيتي
شيماء : هههههه اها وضحك من قلبه علي الكلام
ملاك : هبله كلا انتي المهم شن اخبار اهلك واخبارك
شيماء: تمام والله انتي شن دايره
ملاك : حال عدوك والله ربي يفرج
شيماء : يارب رن علينا احمد قال بنعدو المزراعة كلما كم يوم
ملاك : امتي
شيماء : ونحن في طريق جايين
ملاك : اكيد عشان المشكلة اللي صارت تعاركت انا وياه
شيماء : هما خايفين عليك يالوكه
ملاك : عارفه بس مافش حد يقدر يفهمني امجد بس نوعاا ما متفاهم والباقي يفكرو ان عادي او الموضوع في يدي امجد قالي لو تتريحي عدي لدكتور نفسي احكي معه
شيماء : لوكي عادي او تتريحي لو في مصلحتك ممكن تتحسني
ملاك : والله معش عرفت شئ وﻻ فهمت شئ حياتي بموتت مراد نقلبت راحت تصدقي حتي مشاعر معش في مانحس في شي فراغ جوا قلبي نهتني موتت مراد ياريت ماطلعنا هضك اليوم ياريت كان هضا قاعد جنبي توا وقلبي فرحان ومبسوطه
شيماء : ابكي يالوكه بلكي تتريحي
ملاك : بكيت وعيطت بس مانفع ياشيماء انا بروحي معش عرفت روحي وﻻاحساسي شن وﻻ في شن قاعدة ندير بروحي نتخبط وطايرة النية من كل شئ اوووف
شيماء : قولي يارب صبرني وقويني وفرج همي
ملاك : يارب
شيماء : بس حاولي تتغيري ممكن مش حتري ملاك زمان بس علي الاقل كوني ملاك جديدة هادية ومريحة اهلها وتفكر بعقلها
ملاك : وشن اخرة ياحنه تبي شئ اخر في التحديث الجديد
شيماء : ههههه والله صدقتي حتي انا غبية عليك طلب
ملاك : الحمدلله عارفه روحك ههههه
شيماء : ههههه شوووفي حي عليها طحنة البنت زاقبه علي واحدة
ملاك : برمة .....هههههههه ياننعليا علي راجلها يكركر فيها وهيا خانقه البنت
شيماء : هههه عطها حبه كلا هيا
ملاك : عليك اهبال
شيماء : فووتي بس شوفي الطروف اللي غادي يبحثوا شورنااا
ملاك : بطلي سخافة ياباردة
شيماء : انتي بنعرف كيف قاعدة هك بلا راجل
ملاك : رفعة حاجبي وبحتث فيها ....شن تحقي فيا نعنجد اصلك
شيماء : هههههه ﻻﻻ مش هك ياحيوانه قصدي حبيب
ملاك : زي ماانتي بلا حبيب وغيرك واجد زي مريومه وبنات صاحباتي ماعندهن
شيماء : وايناس واميرة ووفاء وكملي تسميت باقي بنات هههه
ملاك : بس تصحيح ايناس عندها حبيب
شيماء : كذابه
ملاك : بينا بس زرقت عليها كم مرة تقول حبيبي وانحبك ههههه
شيماء : غريب ماحكيتي معاها
ملاك : رد بالك تطلع منك وانا شن دخني بيها في نهاية هيا اكبر مني وبعدين ياحنه الحب مش في يد الانسان الواحد مايعلم امتي يطيح علي وجه ويحب
شيماء : معك حق اهو خوك جاء
ملاك : هههههه الحب يعني
شيماء : هههه زارقه عليا ماله
ملاك : اكيد من النظرات
شيماء : هههه استريني بس
ملاك : هههه تم
امجد : السلام عليكم كنكم شن صاير هنا
ملاك : بنات دايرات طحنة
شيماء : علي راجل هههههه
امجد : هههه كيف صار ياخرياطة انتي
شيماء : والله جد اسال لوكه
ملاك : هههه صح كلامها المهم هات السبول ترا
امجد : خوذي هااا
شيماء : هات قرعتنا بنعدي لاهلي سادهم عسل
امجد : هههه صبي نوصلك هيا
شيماء : نعرف الطريق ماتعبش روحك
امجد : تي امشي قدامي يافرخه
ملاك : عدي يافرخه
امجد : ههههه امشي
شيماء : هيااا ....عديت انا وامجد
ملاك : قعدت بروحي ناكل في السبول رن نقالي رقم معدلتش سكن درته صامت شوي وجاء امجد
امجد : قبل كملتي السبول
ملاك : ههههه ﻻعقبتلك شوف
امجد : في الكيس اخرة هههه هااتي
ملاك : تفضل
امجد : شن جوك توا
ملاك : كويسه هيا كول عشان نروحوا خلاص
امجد : مازال بدري
ملاك : مليت نعدو نبرموا بالسيارة احسن هيا
امجد : باهي صبي توا بعد مليتي
ملاك : هيا
امجد : صبيت طلعت انا وياها ونحن طالعين تصادفت مع اصحابي
منير : اوووو طيري
امجد : اهين نيرو شن جو
منير : تمام والله انت شن جوك
امجد : الحمدلله
ملاك : امجد انا ماشيه شور السيارة
امجد : تم هاكي مفتاح
ملاك : خذيته وعديت شور سيارة فتحتها وركبت قعدت نستنا فجاة دق روشن السيارة بحتث لقيته راجل البنت اللي جتني ع الشط فتحت .....نعم تفضل
الراجل : معلش يااختي زوجتي دارت مشكلة مبكري عشانك وجت حكت معك انا جيت بس نعتذار منك
ملاك : اها مش مشكلة صار خير
الراجل : معلش والله تزلطت معش عرفت مانديرلها
ملاك : ربي يهديها ان شاء الله وصار خير ياخوية
الراجل : تمام هيا نستاذن منك
ملاك : تفضل .... الراجل عدا وامجد جاء
امجد : من هضا
ملاك : راجل البنت اللي دارت طحنه ع الشط
امجد : اها وكنه شن يبي ....ركبت وولعت السيارة وطلعت
ملاك : ياسيدي .....وقعدت نحكيله .....هضا اللي صار
امجد : مبرد ام وجوهم هما الاثنين
ملاك : ههههه فوت.....عدينا برمنا وروحنا للحوش
~~~~~~~~~~~~~~~~~
بعد مرور ايام
ملاك : كنت مروحة من الجامعة رن نقالي امي فاطمة .......اوووف ياامي والله مروحه وعديت حضرت محاضرتي سكنتواا
فاطمة : باهي باه يالوكه انا سكنت باه
ملاك : ﻻﻻ مش انتي اصلا رن احمد والحاج وامجد وامي ومريم ومنيرة وتوا انتي
فاطمة : هههه ماشاء الله ماهو انتي مش بتاع يسيبوك بروحك اربع ايام فايته الجامعة المهم
ملاك : باهي شن في
فاطمة : وراس بنيتي بما ان مروحه انتي نبي نوصيك توقفي علي حلواني تجيبي منه نوعين حلوا و3 موالح
ملاك : كنك شن في
فاطمة : اختك منيرة جايه هيا وعربها عشان مرضت الحاج
ملاك : تمام هضا بس تبي
فاطمة : اها الباقي جابلي امجد
ملاك : تمام خلاص توا نجيبلك الحاجات ونحطهن في طريقي قبل نروح
فاطمة : ﻻﻻ جيبيهن معك بعد تجي مع امك وخواتك
ملاك : ﻻﻻ فوتي مش جايه انا
فاطمة : تعرفي ياملاك كان ماتجي والله العظيم نزعل منك واجد وانتي عارفه زعلتي باهي ،،،،طوووط
ملاك : عليك قصة صكرت في وجهي ....عديت شور الحلواني جبت الحاجات وكنت طالعه تصادفت مع زين صاحب مراد
زين : اوووو ملاك
ملاك : زين اهلين شن اخبارك
زين : الحمدلله انتي كيف حالك وشن دايرة وينك معش شفتك
ملاك : والله قاعدة في هالدنيا وعارف انت الجو
زين : اها كيف معش تجي للجامعة ماله
ملاك : ﻻ نجي بس معش في نية نحضر هضا وين نظمت شوي من الحادث
زين : الله يرحمه الله غالب ياملاك ﻻزم تقعدي قوية انتي عارفه مراد مايحبش تضايقي هك
ملاك : اااه ربي كريم
ام زين : ملوكه كيف حالك ياامي
ملاك : اووو امي فتحية كيف حالك يالغالية
فتحية : مرايفه عليك معقوله معش تجي وﻻ تسالي ديما نسال في زين يقولي معش شفتها
زين : نسال في امجد الحق ديما يقولي ماشي حالها
ملاك : الله غالب مازلت ماتعودت علي الحياة بدون مراد
فتحية : الله يرحمه ويسامحه نحن بروحنا ماتعودنا يبال اهله وخاصة انتي تؤوم روحه ربي يصبرك يابنيتي
ملاك :يارب ادعيلي ياامي والله تعبااانه بدونه
فتحية : الله يصبرك ويقويك يابنيتي
ملاك : يارب باهي انا نستاذن منكم هضوما سكنوا رن مستعجله
زين : عطيني رقمك قبل عشان نطمنوا عليك
فتحية : اها علي الاقل نتواصلوا معك
ملاك : هات نقالك
زين : هاكي
ملاك : كتبت الرقم ورنيت ....اهو يرن خلاص نحكوا بعدين بسلامة
فتحية : بسلامة سلمي ع اهلك
ملاك : حاضر يوصل انتي سلميلي ع البنات واجد سلام .....عديت شور السيارة حطيت الحاجات وولعت وطول شور الحوش عديت وصلت نزلت وصكرت السيارة وخشيت لقيت امي ومروان ومريم في الجنان ....السلام عليكم
كلهم : وعليكم السلام
ملاك : حطيت الحاجات علي الارض ....مريومه خوذي هذينا حطيهن ف مطبخ بتاع امي فاطمة وصت عليهن
مريم : جيت خذيتهن وخشيت المطبخ
مروان : وين كنتي انتي
ملاك : برمة عليه .....في الجامعه
مروان : والله
مني : ماهو قلتلك عندها جامعة
مروان : كذابه فرخه هذي
ملاك : وعليش بنكذب كان ماكنتش فيها راهو حكيت ماعندي ليش نبرم ونكذب وماحد عنده حاجة عندي
مني : خلاص ملاك خشي غيري دبشك وتعالي بدلي دبشك عشان نحطوا الغذاء مسكت مروان علي الغذاء
ملاك : ماعندش نيه
مروان : اكيد واكله برا
ملاك : ﻻ النية انسدت والله
مروان : احسن بعدين شن قلت انا علي الحجاب
ملاك : مش شورك والموضوع هضا اخر مرة تفتحه ليا
مروان : تي يافرخة تحشمي علي فسختك طالعه هك بشفاشيف ولبس هضا كنك انتي
ملاك : فووووتني ترااا.....برمة بنخش فجأة..
يتبع...
ﻻيك وتعليقكم ورايكم في الحلقة الاولي وياريت تتفاعلوا مع الحلقات واسفه علي اي تقصير صار بدون قصد تحياتي سنيورينآ آآ