"Di maipaliwanag ang nararamdaman,
Di masabi pagka't baka tanggihan.
Tahimik lang habang magkaharap tayo,
Darating ang tamang oras, maghihintay ako.
"Maliliit na pekas at kulay abong buhok,
Ginawa kang perpekto't puso ko'y mas pinatibok.
Sana ikaw'ng katabi sa bawat pagmulat ko,
Maging sa'king paghimbing, maghihintay sayo.
"Muli akong kumatok sa iyong pintuan,
Sumasamo na sana nawa'y pagbuksan.
Tila may pumipigil at ito'y ikinandado,
Gayunpama'y nagtitiis, naghihintay ako.
"Gusto kang yakapin ngunit di magawa,
Gusto kong kausapin ngunit baka mahiya,
Sapat na muna sakin ang bawat sulyap mo,
Sinta, maghihintay ako. Maghihintay sayo.
"Mag-aabang ako hanggang sa'king makakaya,
Hangga't ang apoy sa dibdib ay lumagablab pa,
Hangga't kayang mahulog kahit walang sasalo,
Pakaasahan mo sinta, sayo'y maghihintay pa ako.
"Ngunit lahat raw ng bagay ay may katapusan,
Minsan nga'y natatapos kahit di nasimulan.
Kaya't 'pag napagod na at tumigil ang pusong ito,
Sana'y 'wag magtampo, nakapaghintay na ako."