على صراط امي

١٢

مساء الخير

على صراط امي
الجزء الثاني عشر

حاولت اتهرب من بابا لان فاهمني شنو احس
رحت للغرفة بدلت ودخلت للفراش..
دخلت يمامة وقفلت الباب واجت يمي..
انت كل عقلج توافقين؟انت شكد غبية جاي تنتقمين من نفسج..
خليتها تحجي انطيتها ظهر وتغطيت ..
سمعت الفون دك طلعته اباوع للرقم ..اه منك عرفت اكيد...

بقى يدك اخر شي رديت..انة ساكته وهو ساكت..
حجيت بصوت يرجف..الو..
جر حسرة طويلة..ليش وافقتي؟؟
ليش تسأل..اعتقني حر من حبك ..حبنا فقاعة ماله اي اساس..
حجه بيأس..يجوز حبج انت فقاعة..
انة حبي بحر وبحر واسع وعميييق بعدين حول نبرته للجد..
بس هالحب جان قبل مو هسه ..دفنته بيدي وقريت الفاتحة..
نزلت دمعتي وماريد يحس برجفة صوتي..
اذا اذا ما ات ليش تخابر؟
استغفر الله..اخابر حتى اكلج زواج ماكو
اذا توافقين تعمين ع نفسج..

هه وليش تمنعني اذا ماتحبني..
لان لازم اوفي بوعدي واخطيبج مو كاتلة روحج ع الزواج..
انة؟؟؟؟حجيتها باستغراب وارتفع صوتي..
اي انت ليش مستغربة؟ماصدكتي افترقنا
وقبلتي باول واحد اجاج..
غلطان هواي حر..مو اول واحد..
مو مهم اول لو عاشر المهم كتلج انة وحطيها ترجية بذانج
زواج من غيري ماكو..
بس انة انطيت جواب!
ها ..يصير خير ليش لا ..حجاها بغضب
وسدة بوجهي ..

لكيت يمامة حاطة ايدها ع خدها وصافنة عليه
كالت..ليش تظلمين روحج وانت تحبي
افترقو ميخالف بس لا تتزوجين
وطن جرح الحب عنيد ومايطيب بسرعة
شوفيني كدامج شكد صارلي
هسه يلا بديت اتشافى منه..ترى محد يتعب غيرج
فكري بيها عدل..

هي تحجي وانة حاضنة ركباتي لصدري وساندة راسي عليهم
اسمع كلامها ودموعي تصب..
لازم مااضعف ولا انكسر ..خلاص محد مات من الحب
وخصوصا من يكون الحبيب مخادع
من يخابر مامقهور لان يحبني لا بس يريد يثبت لنفسه
هو كد حجايته ويريد يسقط الفرض العليه..
احس نظري تشوش من البجي
صايرة بس ابجي نظري يتشوش وبصعوبة يلا يرجع...

مسحت دموعي وكلت ليمامة..
انة مقتنعة بقراري والسويته هو الصح وخلاص
قصتي وي حر انتهت
مو ضعيفة حتى يكسرني حب واحد متلون وياي
وماعرف تصرفاته الغامضة شنوسببها
لا تهتمين انت ارتاحي...
عوجت حلكها باسف ورجعت لفراشها...

يوم ثاني حاجاني بابا مرة ثانية وكال فكري عدل
وهم عندج الخطوبة تفكرين بيها
اذا شفتي روحج ماتكدرين كولي وانة وياج بالتردي ..
كتله اكيد احاول اتفاهم وياه هسه واذا شفت نفسي ما
متفاهمين اكيد اكلك انت تعرف كلشي بداخلي..
جرني لصدره وبقى يمسح ع شعري بلا مايحجي
مجرد حضنه احس بامن الدنيا كلها...

بيومها العصر رحنا لبيت خطيبة مرتجى
انة وماما وبيبي وعمتي ..
شفتها كلش كلش استغفر الله ومااقصد اعيب بس مو حلوة
يعني بالضبط تشبه خطر
بمسلسل الحيالة بس على ضعيفة قصبة..
وامبينه بسيطة ومن الاهل القافلين كلش ..
بحيث اجتلنا بدشداشة موديل  هريسة نزلت قبل سنوات
وجانت الها وكتها ويكشخون بيها
وشعرها مسويته ذيل حصان وضافرته
وصوتها ما ينسمع كلش..
بقت يمنا شوية وكامت ..وامها وخالتها كاعدين
وتفاهمو وياهم ع التفاصيل مال الخطوبة..

من رجعنا اجه علينا عابد ..كلي ها وطن شلونها جنتنا..
ابتسمتله..زينة ..
قاطعتني بيبي كالت شزينها خايبة تضحكين علينا
هي غير جنها فرس النبي عووووع تلعب الروح
امداك يا مريجي منين حصلتها عووع...
امي كلتلها لا يمه زوينة بس تحف وتتعدل
والمهم هو مقتنع بيها احنا ماراح نعيش حياتنا كلها وياها..

بقيت افكر بكلام ماما يعني هسه هاي مراح تعيشين وياها
والمهم هو مقتنع
بس انا لا صارت العشيرة كلها راح تعيش وي حر
والمهم كلها تقتنع
وانة مالي دور ولا الي مراعاة بالاحساس..

رجعنا للبيت وبلغت بابا بجوابهم ومرتجى هم اشوفه فرحان
فرحت لفرحة وابتسمتله
ضحك كال انشالله فرحتنا سوا ..
هزيتله راسي وابتسمت..
وكعدنا كلنا كالعادة نسولف بخطبة مرتجى وشنو نحضر
وشنو نحتاج..
انة جنت مثل الحاضر الغايب ..
اسمع واشارك بي منعزلة بداخلي ...

ورا العشا امي حاجتني..كالت لا تضوجين ولا تزعلين
لان صرت ضدج من الاول..
بس ردت ابعدج عنه لان اعرف راح يرفضوه
وماردتج تمرين بالمريت بي..
صدكيني تنقهرين وتحنين اله بس بعدين تنسين
خصوصا من تتزوجين وتخلفين
صح حبيت فخري حب ماله مثيل بس حب ابوي اقوى
وطاعته اوجب..

ومن تزوجت ابوج صح عانيت وبقيت اقارن..
بس ابوج مايتقارن لان ماكو مثله رجال ..
خلاني احبه بدون مااحس..
واكيد انت راح تحبين خالد من تعاشري
وهو شخصية وحلو يعني يجذب وحلو اسلوبه...
يعني نسيتي ابو حر خلاص؟؟؟
ماما ماضي وراح وماله دور بحياتنا وابوج يستاهل كل
الحب
يعني نسيتي ؟؟
كتلج كلش انسى واندثر وراح صارله سنين بعد...

حجيت بحركة وقهر...
لو ناسية ليش من شفتي حر بعرس علاء وعرفتي
ابن فخري تخربطتي؟؟؟
ليش من عرفتي احب ساندتيني ومن عرفتي حر كتلتيني
وتصيحين مالكيتي غيره؟؟
كمت وكفت واشرت ع عيونها...
لو ناسية صدك!!!ماعيونج يمطرن حزن دوووم....

من رخصتج ماما انة مامحتاجة نصيحة
اعرف اتصرف وسويت التردو...
عفتها وطلعت ..
بس طلعت ارجف كوة اوكف اريد انسى اريد اتقوى
تذكروني بي ليش ..
مصرين عوفي عوفي عوفي مايفيدج مايناسبج
عفته انة عفته ..
بس بس ..بس احبه ..ذبيت نفسي بفراشي
وخليت المخدة ع حلكي وبقيت ابجي بقهر
احبه اي اريده واتمنى هسه يكلي خل نرجع حبايب
بس هو مايحبني وكل همه يحقق الاباله...
بقيت ابجي وعلى بجيتي نمت ..

ومرت يومين واجو اهل خالد لبيتنا
وكعدو وي اهلي وتفهمو ع الخطوبة ..
وكالت امه يريد يشوف البنية ويكعد وياها
اتفقو يجي باجر حتى نكعد ونتعارف...
بس تمنيت مايجي باجر ولا اشوفه..
بس اتصرف عكس مااحس..وابين للكل
انة مقتنعة بالجاي اسوي...

اجه يوم ثاني العصر ..لبست بنطرون جينز وقميص ابيض
ودخلت للاستقبال ..
كاعد بابا وماما وام خالد ..
سلمت بلا مااباوع بجهته اصلا ..
بقو يمنا شوية وترخصو ..كالو احنا بالصالة كاعدين
وانت اخذو راحتكم وتفاهمو..
هو ضحك كلهم اخذو راحتكم..عابت عبالك بيته...

طلعو والباب مفتوح بقت عيني عليهم ماريد يطلعون..
كال ..جنج طفلة عايفيها اهلها شسالفة ههه..
باوعتله وبعدت نظري بلا مااحجي شي..
وهو جان كاشخ ولبسه كلش مرتب لايكله
لابس قميص مقفل زيتوني وبيجي والبنطرون خاكي
وساعته فضية وشعره مرتب ..

رجع حجه..اي وطن يابة شدعوة كلش قافلة..
ماجنج مداومة ووياج طلاب يعني لازم متعودة!..
جاوبته بحدية..اختلاطي قليل بالطلاب
واليجمعني بالطلاب مجرد شي يخص الدراسة
مو مثل سبب كعدتنا هسه...
هو تعدل وحط رجل ع رجل وابتسم ..
صحيح....زين شنو رايج بيه؟؟
اها ..بعدني ماعرفك حتى انطي رايي بيك ..
يلا بالايام التجي نتعرف اكثر ..
شنو طلباتج للخطوبة؟؟
بعد اتفقنا امس ع كلشي..

حسيته ضاج من اسلوبي الجاف وياه
تحمحم وكال..
اذا هيج خوش حجي..بس تحضري ورتبي امورج
ع يوم الجمعة..
انشالله ...
حجيتها وكتله اترخص منك..
كام وكف وياي وانة طلعت ..بابا مترقبني ويباوع
بتساؤل..
راحو كعدو يمه وانة رحت للغرفة
ورا شوية طلعو واجاني بابا للغرفة..

ها وطون شنو الاخبار؟ابتسمتله وكتله ..
كلشي تمام حبيبي لا تفكر ..
ابتسم وبقى يحاجيني شوية وراح...
ويمامة تحوم بس ماتدخلت بقراري
بس اشوفها تحس بوجعي وتعرف البية...

مر الاسبوع واجه يوم الجمعة ..
رحت للصالون الصبح وي يمامة وشهد بت عمي..
لبست فستان طويل فصال حورية
لونة نيلي وبي شغل من كدام ابيض..والردان كاملة
وماسويت تسريحة
بس شسورتلي وفركته صفح ونثرت الشعر بطلب مني
لان البدلة دلعة وجبت شعري عليها...

من وصلنا تلكوني الكل بالهلاهل والضحكات وانة
عبالك روبوت
منين مايسيروني اسير...
كعدت وبابا واخواني كلساع واحد يجي يبوس بيه
ويشاقيني..
بس ابو السقا عابد مو ع بعضه
ابتسامته فاترة وحتى حجي مايحجي هواي..

للساعة ب٥ اجو بيت خالد..ودخلو اخواته واقاربه بهوسات
وامه اجت تحسبلي حرمل
وتسوي هوسات وصلوات ..
ورا شوية كالو راح يعقد..بس احس هاللحظة مثل
الجان نايم وكعد..
فز كل جرح بيه وحيلي انهد..
وعيت ع نفسي راح اتسمى باسم رجال غريب
ماعرفه ولا احبه
مو جان لازم حر بمكانه..اه ياحبيبي الشوكولا
لو انت هسه لابس هذا القاط الحبري
والرباط البيجي والاناقة العندك والوسامة
كلشي بيك يجذب...

بهاللحظات انة كاعدة وحاطة رجليه بطشت
ماي وورد وياس
ويمامة تفرك برجلي من جهةوشهد من جهة ..
وتشيل الماي الفاتر وتذبه عليها وتفززني
وانة ذاناتي انسدت عن الحجي اليمي واحس
انعزلت عن الحواليه..
بدا نظري يغوش وافترت بيه الدنيا
وبعد ماحسيت بشي...

للحكاية بقية
بقلم شقراء(قمر كانون)