على صراط امي

٩

مساء الورد

على صراط امي
الجزء التاسع

لانعل ابوك لابو فخري ..ولك هاي سهير
هاي صبي عيني انطيها لفخري العبد؟
ليش هسه صار العبد مو كبل تكله اعزك مثل ولدي..
اي مثل ولدي يعني حسبة اخو لبتي
ولو تنطبك سبعة على سبعة ..لا فخري ياخذ سهير
ولا سهير تقبل بفخري..
مو انة سائلها وراضية بي..
بعدها جاهلة ماتعرف مصلحتها ..ورد خبر لفخري كله
شيل هالسالفة من راسك ودربالك مني..

وبذاك الوكت خالج زعل عليه وسهير تخاف تحجي
ادري بيها رايدته لان عرفتها عاشكته
بس ادري بيها جاهلة وماتعرف مصلحتها وباجر من تاخذه
وتشوف بنات عمها وخالها شلون يعيبن
ساعتها تكول ليش مامنعتوني..لو خلفتها التطلع مولدين
انة ابوها واعرف مصلحتها زين..
وضلت هالسالفة سنتين فخري اجاني وحاجيته بالخوية
وبوية وكتله ابعد من دربها
بس ماتاب ولا هي تابت واخوها قابل ومساندها..
وضلت توكف بوجهي وتكلي اريده
بس كل مرة اكول صغيرة ووحيدتي وماريد اقصى عليها

بس باخر مرة فخري جاب طبابين خير بكد شعر راسه
وحتى توسل توسل بيه
كتله خوش اردلك خبر ..من راحو سهير وكفت بوحهي
وكالت لو هو لو ماريد وعلت صوتها بوجهي
واول مرة اطكها بيها هاي ..ماضنيت تراددني
وتعلي حسها عليه ..
هددتها كتلها لو قبلت بي اتبرى منج واغضب عليج
وسمع ابوج واجه ..
ابوج يحبها يموت عليها من صغرها بس هي تكول
حاسبته مثل سلام
وبيومها اجاني وكلي لا تقسى عليها وهي بحدها تفك
بس هسه لان عصبية ومقهورة منك..

وكال ابوج انة احاجيها واقنعها هي تسمع حجايتي
ومن راح حاجاها واجاني..
كال حاولت وياها بس ماكو فايدة ..تكول لو يقبل بفخري
لو ابقى عانس طول عمري
واذا مارضى بي هسه اخلي يرضى غصبا عليه..
بساعتها وجعني كلبي وخفت تاذي روحها
لان يهو اليحاجيها تكله نفس  الحجي تخلينا نرضى غصبا عنه
خفنا تاذي روحها

حاجيت سلام كتله روح لفخري وكله ياخدها
بس لا اكعد بخطبتها ولا اعرفها ولا تعرفني
بالساعة اليمهر عليها فخري سهير تموت بالنسبة الي..
سلام تعارك وياي وراد يقنعني
بس بقيت نفس حجايتي..وصدك اجه فخري وجابلها ذاك
الحگ وذاك الذهب
وبس سلام الكعد بخطبتها وابوج هم اجه لان كال شما
يصير لازم يعرفون وراها احد
وما يستوحدونها لو يذلونها..

ومهرت سهير وفرحانة بس انة اهيس نار بكلبي
شكد ماجنت متمني هاليوم وافرح بيه
بس مع الاسف كسرت حجايتي وخذته غصبا عني..
بس فرحتها ماطولت وتندمت وضلت تريد تراضيني
واجاني فخري بلا ماتدري وراد يحاجيني بس طردته
كله صوجه هو الخرب بتي علي
وكلت مااحاجيها ولا اقبل باعتذارها بلكي تعوفه..
هي مثل الجانت ماخذها العزم والعصبية
وهسه بردت
وماعبالها اسويها صدك وابقى زعلان عليها ..

بس انة شني حيلي راح وتمرضت ضليت
اللكمة الاحطها بحلكي اذبها ماتسلك ببطني
احتارو بية بالدكاترة ومحد عرف علتي
بقت بطني تسلح والماي احسه سم من اشربه..
لا فادني علاج ولا عشب
بس واحد من الدكاترة كال قالونك العصبي هايج
يعني سالفة اعصاب ونفسية
بعد سهير عرفت بغلطتها وعرفت هي السبب
تخبلت واجتني تبجي وتدك على وجهها..

اجتلي وانة جاي اسبح بالسبحة
وطاحت يم رجليه وتتعذر
دفعتها وكمت كتلها كتلج لابتي ولا اعرفج وحتى بجنازتي
ماريدج تلطمين ولا توصلين لكبري من اموت
احجي هالحجي والعبرة خانكتني مو بيدي بنيتي ومجافيتني
بس ماردت احسسها السالفة سهلة
ردتها تعرف غلطهها جبير والسوته ما ينغفر

كالت شتريد اسوي بس ارضى عني نوم ماكدر انام
انت اللكمة ماتوكف ببطنك وانة يحلالي عيش
عساني متت ولا سويت بيك هالسواية
كلي شتريد اسوي وانة حاضرة بس لا تضر روحك
وصحتك اغلى من الدنيا كلها..
كتلها تردين ابوج الاولي يردلج تعوفين فخري
سكتت ماحجت شي شوية وكامت طلعت..

وراها بسوية اجه سلام يصيح ومقهور
شسويت لسهير وخليتها تخابر فخري تكله طلكني
كتله حسك لا تعلي على ابوك واختك مالي غرض بيه
شما سوت بكيفها..
وسوتها صدك سهير وعافت فخري وشكد سلام حاجاها
وعاركها كلها انة وياج حتى لو كلها ضدج
بس هي كلتله ماريده بعد مدام هو بجفة وابوي بجفة
مايتوازن الميزان
ومن اهدها كلها سلام اذا تطلكتي منه انسي عدج اخو
وصدك من تطلكت عزل وطلع بحده

بس امج مو الاولية صارت ساكته ودومها محزونة
ماردتها تتعذب وكله لصالحها
ورا مدة ابوج حاجاها وقبلت وتزوجو
بس سلام لا وصل لعرسها ولا شافها
لحد ذاك اليوم يلا تحاجو..

شوفي ياجدي ليش اكلج هالزواج مو من صالحج
يعني ترضينها لابوج يناسب واحد جان يريد مرته
لو ترضينها لامج النست
الصار كل هالسنين وعاشت بعيد عن فخري
ترجع تنطي بتها اله ؟؟
تقبلينها على اهلج انت لو لا ؟صدكيني ابنه لا يحبج
ولا يحزنون
صدكيني جاي ياخذ ثار ابوه من عدنا
ولو انة غلطان ماجان كلج ضمي السالفة عن امج
يخاف تدري بي وتمنعج
لان هو يدري بالسالفة كلها وابوه حاجيله ..
هسه شكلتي بعد هذا الحجيته؟؟

مسحت دموعي وباوعتله بيأس هزيت راسي وكتله
لا هذا هو اعتبر الموضوع منتهي..
بس اريد ابقى لوحدي شوية..
ضلي هنا ارتاحي وانة طالع مو تبطين
غسلي وجهج وارتاحي وتعاي اتانيج...
هزيتله راسي وباسني بخدي وطلع...

بعدني مصدومة بالسمعته ومامتقبلة الفكرة
يعني ماما مرت بهذا الشي قبل ووي منو !
وي ابو حر هه والمصيبة هو يعرف وخلاني اتعلق
بي يعني صدك هو يريد ينتقم لابوه
لان لو صدك يحبني ماورطني بهالحب
واصلا لو ماعنده غاية مامنعني احجي لامي
بس للاسف اول شخص اسلمه قلبي يسوي بيه هيجي
قررت من هاللحظة ينتهي حر من حياتي ..
صح..انة ضعيفة ومو كد الفراق بس..
الله يعين ...

طلعت غسلت وجهي ورحت لكيت البنات قسم بالمطبخ
وقسم بالصالة يم الولد والكبار كاعدين يسولفون
ماكدرت اباوع لماما لام الي عتب عليها
خلتني اعاني معاناتها لو حاجيتلي يمكن  اختلف الموضوع..
شفت الشباب والبنات كاعدين يمامة يمهم
تباوعلي بعيون خايفة
تدنت وسوتلي مكان يمها..

كعدت وكال فقار ..ياحي الله وطن ناقصتج الكعدة ..
ههه الله يحييك مشكور ..
يمامه تهمس بذاني عيونج منفخة شصار بالي يمج..
درت وجهي عليه وحجيت باذنها..
تطمني ماكو اي شي بس جوعانة..
ضحكت هي وكالت هسه جاي يصبون..
كال فقار اي من مساع وتعاي خليتينا نشوف ضحكة يمامة..
هي صارت حمرة وبقت تفكر بيديها..
بهاي اللحظة حسيت بنظرات فقار ليمامة!
وفسرت كلام علاء من كال واحد يريدها
يعني يقصد فقار بكلامه..

حاجتني يمامة ..كومي نروح نساعدهم...
هزيت راسي وكمت وياها..
ماعرف منيلي هالقوة بعد السمعته وماانهاريت
احس نفسي قوية بس مااعرف شنو المصدر..
ساعدناهم بالاكل وصبينا وتجمعمو الكل
بين سالفة وضحكة ووناسة
تسحبت وطلعت برا ..اريد اشم هوا..
اريد ..اريد..ومااعرف شنو اريد...

التفت شفت سبأ وراي اشرتلها تجي..
قبل لا تحجي كلمة كتلها..
هذا الكلام اريدج توصلي لحر..بالحرف الواحد..
كليله تكول وطن ..ماكو شي يبقى مضموم..
صح دخلتني باللعبة..بس ماكدرت تفوز..
وصح عرفت متأخر ..
بس ماخسرت...

فتحت عيونها حيل كالت شبيج شنو هالحجي؟؟
طبطت على كتفها كتلها..
ماعلى الرسول الا البلاغ...
ودخلت جوا..
لكيتهم متحضرين حتى نرجع للبيت..
جدو صاحني وباسني براسي وحجه بذاني
كون مازعلانة..
بوسته وكتله لا..
بابا وجهه حزين واعرفه حس بيه
بس ماما ابد ماحطت عينها بعيني ...

من رجعنا عاتبت يمامة لان تعرف وماكلتلي
بس تبريرها كان..
مالج ذنب بالماضي وامس يختلف عن اليوم
وحاولت تفهمني حر مو مذنب..
بس انة اعتبره مذنب وهو السبب بكلشي...

واحنا نحجي حر دزلها رسالة..
عذريني اختي اراسل هيج وقت
بس اذا ممكن احاجي وطن ضروري ..
قنعتني احاجيه واجاوبه..بس رفضت رفض قاطع..
ماكدر احاجي مااكدر
لان خدعني..لان اذاني..لان استغفلني..
لااااا اكذب ع نفسي
لان ضعيفة كدامه لان ...احبه...

كتلها تكتبله رسالة وتكله ماتريد تحاجيك ..
كالت انة افهمه معليج..
ومن يومها ماسالت عنه ولا ردت اعرف اي شي..
وحاولت استرجع نفسي القديمة وي اهلي وي الناس
الاجواء بالبيت تحسنت ..خصوصا من سمعو بحمل ماما
الولد يضحكون وفرحانين
ورجعت كعداتنا سوا وسهراتنة ..
وهذا كله علاقتي بامي عدم..
لا انة ابادر ولا هي...
بس بابا يطلعنا ويجيبلنا الاشياء النحبها
حتى يغير نفسيتنا...

ورا فترة اسبوعين ..اجونا بيت خالو سلام ..
بقو يمنا ع العشا
ومن رحنا للمطبخ حاجتني سبأ ..
وطن حبوبة حر بس يريد يحاجيج لان كل مايخابر اختج
ترفضين ..
حاجي وفهمي لو بس هالمرة..
لخاطري حبوبة الولد مربط ومايكدر يوصلج
اوكي تعاي للغرفة وياي...

رحنا انة وياها للغرفة وانطيت يمامة خبر
حتى تنتبه خاف احد يجي
دكت عليه وانطتني الفون..
جاوب بصوت متنهد..الو..
رجف صوتي وكوة حجيت..حر انة وطن..
فز وحجة بصوت عالي اول مرة هيج يحجي...
ااااااخ وينننج وين رحتي وين وطن حسابج عسير
على السويتي بيه...

مابينا حساب حر..خلاص احنا انتهينا وبعد ماريدك
رجاء لا تتواصل وي يمامة
ولا تضغط على سبأ وتحرجها..
انة بعد ماريدك ومامجبورة ابقى وي شخص ماريده
ولا تبرر ولا شي
حبيتك اي بس هسه ماريدك ...
ثارك واخذته كافي لحد هيج..
وطن وطن شنو هالنبرة شنو هالاسلوب!هذا حجيج كله
غلط وماله معنى ..
خلاص حر اترك المثاليات والرزانة الوهمتني بيها
ماريد اتواصل وياك بعد
وابريلي ذمة...
سديته وانطيته لسبأ ...

للحكاية بقية
بقلم شقراء(قمر كانون)