سجينة الروح

الجزء الاول من البارت الاخير

سجينة الروح
للكاتبه Reem
(الجزء الاول من البارت الاخير)

(لسان حال ودق لطارق )

احنا النحب وفاركينه
لحديجي ويواسي بينه
عوفو دمعنه الطاح ماراح
اكبرغلط لوما بجينه
هي المشاعرمولعب والراح ننساه
شنسوي خاطر مانحن عالعشنا وياه
المشكلةالفارك حبيبه بكولشي يلكاه
جم واحد يعاني فراك الاحباب💔
وعلى هذا الجرح خلص سنينا 💔
كل مايجيله الحزن يشتد
خلص عمرنا بثوب الأسود
جذاب هذا المثل من كال
ماتوكف الدنيا على احد
وكفت بعد مافاركينا والنفس ضاك
يكولونا القصة انتهت بس احنا نشتاك
يافشلة الگلبة قوي وكسرةالفراك
ليش الموت مايرضى الا بينا
مامرت سنة الا ويجينا
مو اي واحد الي يريد يختار
ياخذ وين ابو روح الحنينة

أيه : اباوع على ودق فتحت عيونها وجمدت بمكانها منحس غير توكع من طولها ركضنا عليها احنه گلنا ماتت لان لارجل ولا أيد موقف صعب ولحد هسه من اتذكره ارجف شفت ودق بأضعف حالتها ركض بابا ومازن وشالوها وصلت مرحله حتى مازن بجه على حالها وبابا عيونه مدمعه ويستحي يبجي كدامنه نضرب على وجهه ماكو كوه صحت هيه بس صحت اشتغل العياط مالتها هزت البيت هز حاسه بيها وبأنهيارها يمكن اني اكثر وحده حاسه بيها لان مريت بنفس موقفها من جابولي خبر ابراهيم بس الفرق اني گلبي عالمني هو عايش وطارق مع الاسف استشهد ومتأكدين من الخبر دخلت بحاله من الهستريا متعرف تملخ شعرها لو تضرب على وجهه

ودق : ولكم عوفوني مامات والله ميعوفني كال جاي باجر ليش طارق هذا وعدك اليه تنزل بتابوت شگال گلبك مگلت شون راح تعيش بدوني مگلت هاي روح طارق المن اعوفها كتلك عوف الواجب وانزل من وكت ليش ليش طارق
أيه : تحجي وفاقده ماما وعمه احلام يلزمون بأيدها حتى لتملخ وجهه ميفيد فاقده تعيط بكل قوتها وكل عيطه منها تجرح صدرها واوتارها الصوتيه واحنا منعرف نبجي عليها لو على الشاب الي مشاف شى من عمره وهو عريس وباجر الحنه مالته ومنحس غير بابا يحضنها حيل ويلزم ايدها لان فقدنا السيطره عليها وحيل حاضنها ويحجي وياها بصوت عالي حتى بس اتسمعه لان عياطها وبجيها غطى على اي صوت يحجي وياها

حامد : بويه ودق اذكري الله اسمعيني حرام الي تسوي ترضين طارق هيج يشوفج انتي مو تحبي احجي تحبي
ودق : عمو عافني واني عروس عكب باجر عرسنه شون انطاه گلبه يعوفني وحدي شون
حامد : ماعافچ بويه روحه يمچ هذا شهيد وبطل لازم تفتخرين بيه وترفعين راسج بويه كولي استغفر الله ولا حول ولا قوه الا بالله يله احجي احجي
ودق : استغفر الله ولا حول ولا قوه الا بالله
عمو اريد اشوفه دخيلك ابوس رجلج اريد اشوفه
حامد : كومي نروح لبغداد
يمامه : وين ماخذها حامد غير اطك وتموت
حامد : واذا تضل ومتشوفه هم تموت
مازن : يابه الافضل تبقى هنا كاعد تشوف حالها فاقده
حامد : أيه لبسي اختج بسرعه وانت مازن حضر السياره
يمامه : اجي وياك مااعوفها وحدها
أيه : اني هم ماما اجي وياكم
حامد : يله بساع لا نتأخر حتى نلحگ عليهم
يمامه : بيومها لبسنا ودق بس هيه مو ويانه بس تبجي وتحجي ويه نفسها وعبالك طارق كدامهم وتعاتبه نريد بس تصحى ماكو وطول الطريق بحضني ودموعها وتناشغ بدون توقف وتحجي ويه الدموع شون تعوفني انطاك گلبك تعوف حبيبتك
يمامه : ودق امي تسمعيني اووف ربي ليش بناتي مكتوب عليهن بس المصايب ليش حظجن بلدنيا قليل يوميه ينلچم گلبي بوحده بيجن دخيلك ربي ساعدني ودق امي احجي ماكو تبجي وتسولف ويه روحها

أيه : وصلنا لبغداد جان بابا يمكن يسوق ٢٠٠ من السرعه احس السياره اطير مو تمشي
وصلنا لبيت طارق جان باب بيتهم مگلوب حالهم يصعب على الكافر نزلت ودق وهيه بغير ملكوت حتى مشي متكدر تمشي ولازمتها اني وماما وبابا ومازن راحو للرياجيل
اول مدخلنا لبيتهم استقبلتها نور وتلطم اخوها الوحيد ودق ونور بجو الصغير والجبير العياط والمنظر لهذا اليوم ميروح من بالي امه اصلاً بالمستشفى ضربتها جلطه وحالتها خطره اباوع بيت جان المفروض يستقبل الهلاهل والخطار علمود العرس استقبل النعي ومكان ما الخطار يجون لابسين احلى الملابس بمختلف الالوان اجوي لابسين اسود والكل يعزي بقينا لليل ننتظر كالو باجر من الصبح تجي الجنازه وجماعته جايبيه
احجي ويه ودق متجاوب
حتى متحركت من مكانها نور وهيه وحده حاظنه الثانيه وتبجي ولل٦ الصبح سمعنا طلقات كالو تشييع اجه
ركضت ودق والمصيبه مزيقه وصينيه الحنه كدام نعشه
جان المنظر يقشعر البدن اله فعلاً اليوم الحنه مالته بس مكان ميركص ويتحنه والفرحه تدخل گلبه تحنه بدمه الشى الغريب بأن سوله حنه وهو فعلاً اليوم حنته والمفروض باجر العرس ودق لزمناها اني وماما وبت عمهم لان فقدت وتعيط ومنا كلها ضباط وقيادات ولد عمه والمنطقه جانت جنازته هيبه ومرادو يدخلوه للبيت لان مبقى وقت لازم يطلعون للنجف وابوه ياعيني عليه مثل النسوان يلطم بلشارع بس صديقه عاط كالو دخلوه اقلها للكراج
مفهمنا ليش هيج سوه اله بعد مده طلع طارق موصي
دخلو الجنازه اول محطوها ودق شمرت نفسها عليه
طارق حبيبي اليوم الحنه مالتنا دخيلك اكعد ابوس ايدك ارجعلي تقبل حبيبتك ومرتك تتأذه انت مو گلت راح اخليج اسعد البنات
ليش موفيت بوعدك انت موگلت اخليج تحبيني وهاي اني مو احبك داموت حب بيك تقبل ودق حبيبتك تبجي وتتأذه يله حبيبي كوم وفرحني واخذني من ايدي بدله العرس والله اشتريتها تخبل ونمت واني احلم اشوف وجهك من راح تشوفني بيها شراح تسوي حتى شعري شوفه مصبغته ولا كصيته طروقي اكعد ياروح ودق كوووووم كافي ليش تشوفني هيج ومتجاوبني

يمامه : امي كافي ولج راح تموتين كومي خلي ياخذون الولد
أيه : الكل التم على تابوته ويبجون بس من كالو كافي راح نشيله شويه درب ودق متحركت وبقت نايمه فوك التابوت ونجر بيها متقبل تتحرك
لكم هذا رجلي وين ماخذي ملحگت اتهنى بيه حرام عليكم اليوم حنتنا وباجر الزفه عوفو هو گلي راح اجي واخذج بزفه تخبل اسد الشارع مالتكم وهو ميجذب اعرفه من ينطي گلمه يوفي بيها
يمامه : بنتي كافي دخيل ربج تعالي منا العالم والولد وعمج كعد يأشر دخليها جوه
ودق : يوم راح ياخذوه ويحطون التراب فوك وجهه ومكان مينام على شعري راح ينام بكبره ليش ماما مو حرام والله ممسويه شى حتى اتصخم هيج والله

يمامه : أيه ساعديني نكومها
أيه : منعرف نحير بنور الي فقدت على اخوها لو ودق الي يشوفها يكول تخبلت لو العمات والخالات الي ملخن ارواحن من اللطم فاجعه جبيره كومناها كوه واخذوه وتريد تروح للمقبره بس كوه لزمناها ومن أيست متروح ركضت ليفوك

ركضنا وراها فتحت الباب وجان انشوف الغرفه كامله وجاهزه حتى فرشه العرس مفروشه وعليها الچگليت والقران مفتوح وكلها عطور عاطت بقوه لحد يدخل اطلعو
حاولنا نحجي مفاد سدت الباب وراها بقينا اني وماما وبت عمهم خطيه تحب ودق تكول طارق من كثر ميحجي بيها حبيناها قبل منشوفها بقينا واكفين بلباب بس نسمعها تبجي وتحجي ماما نزلت كالت عيب لازم اروح يم نور لان وحدها وصغيره ومتعرف بأصول الفواتح وامها بالمستشفى بس أكدت عليه مااترك ودق وره ساعه طبيت على كيف لكيت ودق متمدده على الجربايه نايمه على وجهه وحاضنه الفرشه وتبجي وتسولف كلامها مااسمعه بس كعدت بلكاع قريب عليها اتذكرت حالتي ولو ابراهيم صدوك ميت جان شون عشت وراه

اوف يعين گلبج بقينا اكثر من ٣ ساعات تالي كمت فتحت الكنتور لكيت سجاده سحبتها مااعرف اتجاه القبله نزلت سألت توضيت وصعدت فرشت المصلايه وصليت وسحبت القران الي يم راس ودق الي اصلاً فاقده الشعور بأي واحد يمها
وبديت اقرا وبصوت حتى تسمع اني صوتي بقرائت القران لابأس بيه بس ردت شويه ترتاح اقرا ويزيد بجيها كملت الصلاه وجان تحط وجهه بلفراش حيل وعاطت عياط گلبت الائمه بحيث بس اريد اكوم من السجاده وركض عليها

حضنتها ودق حبيبتي كافي حرام والله الي كعد تسوي والله طارق يزعل منج
ودق : اني الي زعلانه عليه شون يعوفني شون
أيه : امر الله كولي مقدر ومكتوب كومي توضي وصلي كومي حبيبتي
مقبلت تكوم وبقت على وضعها لحد الظهر من سمعت اذان الظهر كوه كومتها بس هنا بدا صوتها يختفي من العياط وكوه ينسمع تصلي وتشهك
وره مكملت
ليش منروح لبيت جدو
ودق : هاي فاتحة رجلي واني لازم اقيم العزاء
أيه :حطت الربطه على راسها ونزلت والمله تقرا كعدت بصف نور مر اليوم بأسوأ مايكون حالة امه ممستقره بيت وعائله مستقره انهجم بين يوم وليله
ثاني يوم الفاتحه كاعده ودق واني بصفها ومتركتها والناس كلها تكول ياعيني عروس وملحكت اتهنت والي تكول والله فال فكر عليهم كرطت الولد هاي البنيه والي تكول والله خطيه منو راح يتزوجها يعني صدوك اكو ناس مال ذبح انتم بيا حال ولكم تشوفون الموت بعيونكم ومتتعضون وشنو فال موزين ليش الموت والحياه بيد واحد اقلها المات يجوز ارتاح وهو شهيد بس محد فكر بحالها وشون عروس طفت فرحتها بعز المصايب والموت والناس تاخذ غيبه حتى الموت هيبته راحت

ودق : أيه
أيه : هاا عيني محتاجه شى
ودق : تدرين هسه المفروض لابسه بدلت العرس وكاعد انتظره يجي بلزفه تدرين هسه المفروض گلبي يدك سريع لان مستحيه ومتوتره لان اليوم زفتي جان هسه كاعده ولابسه البدله بيضه وشعري مفتوح لان هو راده مفتوح
أيه : كافي ابوس ايدج شوفي حالج
ودق : هسه وبهذا الوقت جان المفروض يخابرني ويكولي حبيبي وصلت قريب ليضل بالج ومن يوصل جان حالف اله يهز ويركص من بدايه الشارع لحد ميوصل يمي وكال اوكف كدام عشيرتج كلها وارمي واكولهم اخذتها لحبيبتي والله هيج جان واعدني يسوي واني احلفه اكوله بداعتي لتسوي هيج عيب هسه خلي يجي راضيه والله راضيه يهز ويضرب طلقات ويعيط وكولشي يسوي بس خلي يرجعلي

أيه : سحبتها لصدري وحضنتها وكمت ابجي وياها لحظات انكسار بحياه ودق من هذا اليوم روحها ماتت ويه طارق وامه وضعها استقر ومن اجتي حالها اكيد بعد اصعب ابنها وحيدها وعرسه زفته لوادي السلام اوف اسمك وادي السلام واخذت اعزازنه كلهم

بقينا اسبوع واخر يوم صعدت ودق لغرفتها الي المفروض تعيش بيها احلى ايام عمرها سحبت قطعه من ملابسه وعطره والمخده مالته ونزلت والكل ساكت اجه مازن صاحها
مازن : تعالي غطي شعرج زين صديقه يريد يحجي وياج
ودق : طلعت واني حتى حيل للوكفه ماكو ومازن واكف يمي وصديق طارق بعد مسافه ومدنج ويحجي
اختي عندي امانه الج
ودق : شنو
هاي طارق دزها اخذتها من ايده جانت كلاده صغيره ذهب مكتوب اسمي واسمه بالانكليزي وبنص گلب وداخل الگلب محبس صغير
هاي من جان يعالج انطانياها وكال وصلها الها وكال
ودق : وسكت الولد واني گلي لهفه اريد اعرف شكال جان هذا اعز اصدقائه واعرف بيه دوم يسولف عنه وجنت حتى اغار منه اكوله تحبه اكثر مني واسوي نفسي زعلانه وهو يكزكز عليه ويكولي يروحلج فدوه هو وعشيرته وابقى اضحك
فدوه احجي شگال
كال خلي تبريني الذمه مكدرت اوفي بوعدي وياها وارجع واخذها من اهلها وجان بنفسي البسج هاي الكلاده بعرسنا
وكال كوللها شخبار بذرتي الي بگلبج ديري بالج عليها مو تكطعيها ازرعي بصفها بذره جديده راضي ومحالله وموهوبه وعيشي حياتج اذا تحبيني ابقي سعيده ومرتاحه بس لتشلعين بذرتي
امانتي يمج وكااال احبج ياروح طارق
ودق : هنا مكدرت كعدت بلكاع ابجي واصرخ

مازن : ودق كولي ياالله
اعتذر اخويه كعد تشوف حالها
الله يساعدها بس هاي امانه وهو اعز من اخويه وجان لازم اوصل امانته الله يصبر گلبها وگلبنا على فراكه من رخصتكم
مازن : ودق كومي من الكاع كافي راح تنعمين من البجي
ودق : يكولي عيشي حياتج ليش هيه الحياه الها طعم بلياه شون ازرع بذره واصلاً بذرته صارت شجره واخذت گلبي كله
مازن : كومي واترحميله وثوبيله احسن من العياط هذا امر رب العالمين كومي
يمامه : شبيهه
مازن : تعالي عمه ويايه نشيلها هاي اذا تبقى هيج متعيش

أيه : وبيومها رجعنا ودق نفس وضعها مهدأت ابد والكلاده لبستها وطول الطريق حاضنه قميصه وتلعب بلكلاده
دخلنا العماره محطمين الكل ساكت طفت الفرحه عند الكل حاولنا انطلعها من حالتها فشلنا حتى البدله مال العرس ردنا بس نطلعها منها گلبت الدنيا ومقبلت نشيلها من مكانها كل منحجي وياها تكول راح يجي وياخذني منتظرته

أيه : كاعده يمها اريد اوكلها صار على استشهاد طارق ٣٥ يوم وحالتها من سيئ لأسوأ تاكل يوم وثاني يوم ترفض الاكل ضعفت والوجهه اصفر انسانه بلا حياه جسد ونفس صاعد نازل الكل حاول وياها ومافاد حتى بابا وهيه رافضه فكره موته
وبيوم كاعده احاول اقنعها تاكل انفتحت الباب ونشوف بيبي جميله اطب علينا تفاجأنه حتى هيه فتحت عيونها لان نعرف بيها متكدر تصعد الدرج ونادراً متجي النا للبيت يمكن مرتين بس جايه بس متكدر تصعد صعبه كولش ورجلها تعبانه وعلى العوجيه تمشي طفرت من مكاني
هاي شجابج بيبي

الحجية جميله: جايه على حبيبتي وصوحبتي والشالعه جبدي يمه ودق باعي ليه حبوبه سوده بوجهي شصاير بيج
وجان تكعد بيبي يمها ودق شمرت نفسها بحضن بيبي وتبجي
الحجية جميله: دخيلك ياعلي هاي البت يتيمه وانت كافل اليتامى برد گلبها بحگ الزهره عندك
يمه مايصير كلنا على هذا الطريچ اليوم هو باجر انه وانتي والگل مايضل بس وجه ربچ الكريم
ودق : بيبي والله ميته مو لان مات هذا امر الله وقسمته وقسمتي بس ميته وداموت كل لحظه لان ضليت بنفسه لان مات وضليت بنفسه لو متزوجته ومستشهد جان اهون عليه تعرف شحس واني اتذكر كلامه من يكول هم الله يكتبلي عمر واحقق حلمي وياها ومنكتبله العمر وبقى بحصرتي يكولي ٣ سنين انام واكعد واحلم بلحظه الي تصيرين بيها بحضني وتالي التراب بحضنه

الحجية جميله: استغفر الله يمه قسمته لهذا الوليد من بطن امه يستشهد عريس چاانتي بت مؤمنه وتعرفين الله شون تعترضين على ارادته
ودق : ممعترضه والله بس الغصه الي بروحي شون بيها هاج شوفي حتى ملحكت يشوفني بدلة العرس
الحجية جميله: شوفي يمه گلشي بلدنيا الله خلقه صغير وبمرور الوكت والايام يگبر اله الحزن والمصاب ينخلق جبير وعظيم والعظمه لله عبن الوكت من يمر ربج ينطي الصبر ويصغر وشوي شوي يخف ويبقى بلگلب والدنيا تمشي والحياه ماتوكف على احد
ودق : قصدج انساه
الحجية جميله: الي بلگلب ماينسي يايمه چا نسيت راضي لو وليداتي دفنتهم شباب ولهذا يومچ انوحن عليهم بس ربج يصبر ولازم تفوضين امرچ لله مايصير هيج الراح مايرد ولو البجي واللطم يرد الراحو چا گضينا عمرنا گله انوح حتى يردون ونگعد ساعه وياهم

انه اريدنچ قويه تردين ودق الصلبه المايكسرچ احد
ودق : انكسرت بيبي والله لابقى گلب ولا روح كولشي انكسر
الحجية جميله: يتصلح يايمه بمرور الوكت گلشي يمشي وانتي اذا تحبي صليله واهديله قران ثوبيله هذا الشى يريحج ويريحه يله يمه تره انه مريضه عليچ يشهد الله وكل ليله الزم الدعاء واسبح وادعيلج يهدي نار گلبج يله بنيتي اكلي لخاطري
ودق : والله مجوعانه بيبي

الحجية جميله: شنهي انه مالي خاطر يمج
ودق : شون مالج خاطر متعرفين جيتج ليمي شون ريحتني
الحجية جميله: يله يمه ايه وگلي اخيتچ وانه اريدن اشوفنج زينه تره انه ماارضى شبيهتي هيچ تنكسر يله يبعد بيتي بحگ الحسين ومن صبر زينب يصبر گلبچ يايمه
أيه : امين يله دودي فدوه لخاطر بيبي جميله

وبيومها اكلت وتحسنت حالتها جانت جيه بيبي الها تأثير جبير على ودق ومن يومها تركت اللطم والعياط والتزمت الصلاه والتسبيح وقرائت القران

بعدها بأيام صارت الاربعين ومقبلت تروح ويه اهله رادت وحدها وبابا وافق على طلبها بس يريد تصير زينه ورحت اني ومازن وياها مقبلت اي احد لا ماما ولا احد كوه قبلت اني لان مازن ويانه مرادت تبقى وحدها ويااه قبلت تاخذني بس قبل منطلع طلبت من ماما تظفر شعرها صفنا على طلبها بس شتريد نكولها صار
اول موصلنا كعدت يم القبر ابتعدنا اني ومازن عنها جنت اشوف دموع مازن عليها يمسحها وترد تطلع اعرف بيه متأذي عليها لان جانت حاله ودق تبجي الصغير والجبير مًو عاد مازن الي يحبها

ودق : حبيبي اجيتك يانظر عيني طروقه مشتاقيتلي اني دودي حبيبتك اوف حتى ريحة كبرك حلوه هيج متوفي ويايه گتلي مايوم اكذب عليج وهاك كذبت عليه وعفتني وحدي ابو الضحكه الحلوه اشتاقيت لضحكتك لغزلك لبستها الكلاده عاش ذوقك من زمان ذوقك حلو وصلت امانتك وخلي اكولك شى بذرتك كبرت وصارت شجره جبيره واخذت گل گلبي بعد ماكو مكان لبذره ثانيه كتلك مره گلبي تربته صخر ماينزرع بيها بس انت بطل وكدرت تزرع وفوكاها اخذت الكاع گلها لا اكدر اشلع جذورك ولا ازرع بذره ثانيه بصفك بقيت ابوس بگبره واشوف صورته يضحكلي
انت اول واخر حب بعمري ومثل مابقيت بنفسك انت هم بقيت بنفسي وهذا الشعر يحرم اطوله طول ماضل بنفسك تنام عليه ويبقى بس الك

أيه : وجان نشوفها تكوم واطلع شعرها من الربطه وتفتح جنطتها طلعت مكص
شسوين ودق ركضت عليها لزمت ايدها ومازن ويايه
مازن : شجاج
ودق : رجاءاً لتدخلون من الاول كتلكم تعالو ويايه بس مااسمع صوتكم
مازن : ودق لتتخبلين
ودق : لتخاف عاقله بس شعري اله ولازم ياخذه وياه
أيه : بجيت على وضعها وجان اتجر الكصيبه وتكصها شعرها طويل لنهايه ظهرها وثخين يخبل كصته فوك من جتفها منظر الكصيبه يكطع الانفاس اني ومازن فتحنا عينا بس مكدرنا نحجي اي شى وجان تحفر بصف الكبر بالمكص ظلت تحفر تحفر وتبجي لحد محطت الشعر يم راسه ودفنته مازن متحمل منظرها وراح بعيد اباوع عليه يمسح بعيونه

ودق : حبيبي اجيك مااعوفك ومبري الذمه ياروح ودق بست الگبر مالته ودعت حبي الوحيد الانسان الوحيد الي كدر يستوطن روحي شنو سبب دخوله بحياتي ليش گلبي رف عليه من دون الدنيا كلها ليش عشقته ومات بتوقيت عجيب كلها اسألها خلصت هاي السنين واني اسألها لروحي وماكو اجابه

أيه :
الدوام بدا وهي مقبلت اداوم هاي السنه رفضت الحياه بشكل كامل صح هادئه بس دوم اسمعها بليل تسولف ويااه تقرا قران اني اضطريت ارجع لبغداد لان غياباتي كثرت وخفت انفصل حتى ردت أجل السنه بس ماما مقبلت

مرت الايام بهدوءتام الكل رجع لحياته الا ودق بقت حبيسه الحب والذكريات ويه طارق رغم رجعت تكعد يمنا وتسولف ومرات تروح لبيت جدو بس ضحكتها طفت هيه ودق گلها شمعه وانطفت

ودق : جنت امشي بلبستان وسارحه والهوا والجو طيب مر على وفاة طارق ٧ اشهر بس كل مااصفن نار فركته بعدها بگلبي وكأنها هسه
حالياً احنه سنه ٢٠١٥ خلصت الامتحانات مال نهايه السنه تركت هاي السنه مااكدر اداوم ولا اليه اي طاقه مال ادرس وامارس حياتي انكسرت واحاول الملم شتات نفسي واحاول ارجع حتى اتخرج واخلص انقهر على ماما من تكعد وتصفن عليه ودمعتها بعينها مااريد تعبها يروح
جنت امشي وجان يصير منير كدامي صار شكد مشايفته
منير : شونج ودق
ودق : الحمدلله انت شونك
منير : بالي يمج وكل مااريد اجي اسلم اخاف تفشليني
ودق : ليش شعندي وياك
منير : يعني اعرف سوالفج مو لسان رشاش
ودق : اوووف هاي قبل هسه متثاقله من روحي ملابسي  كوه حاملتهم لهذا ماعندي اي طاقه اتعارك وانت اصلاً ممسوي شى صاير عاقل مدري اني ممركزه وياك
منير : ههههههه اني مااعقل دوم اكمز تعالي خلي نكعد ونسولف
كعدنا جان يكولي ودق ارجعي مثل قبل وين ضحكتج وين لسانج وين صلافتج والله الفقاريه متلوكلج
ودق : شتريد منير تره والله روحي بخشمي
منير : اريد اشوفج مثل قبل توكفين بوجهي وتعيطين وحتى تتلاوين ويايه
ودق : تدري اني اتعجب عليك
منير : ليش
ودق : من باب كتلت روحك على أيه ومن باب انت تطلع من عمو يزوجها لأبراهيم
منير : شمدريج
ودق : مو مهم بس كولي شون غيرت رأيك
منير :اني مااحب ايه بس بنفس الوقت شفت بيها المره الي تكدر تحمي بيتي وتربي جهالي وتصوني اني ردت وحده مثل امج يوم مياخذون جهالها منها تنكلب لبوه وتذبح كل واحد يتقرب من جهالها وتضحي بروحها المهم يبقون بحضنها
ودق : وليش هيج تفكر
منير : انتي معشتي الي عشته اني انحرمت من امي وعمري ١٠ سنين جنت اشوف الجهال كلهم بلمدرسه امهاتهم توصلهم والي تجي عليه ومن يتمرض اداريه جنت من اروح لبيت صديقي واشوف شون امه تستقبله بلباب وتبوسه اموت قهر بس اضيعها بضحك وشقه كل ليله انام واكول هسه ترجع يحن گلبها علينا وترجع ومن شفت امج شون حتى رادت تحرك روحها بس علمود مياخذوكم وراها قبلت تتزوج عمو بس حتى تبقون بحضنها كرهت امي توقعت كل الامهات من يموت رجلهن يذبن جهالهن

ودق : بس امك انجبرت مو بيدها
منير : بس بيدها تسأل علينا بيدها تجي وتشوف حالنا وصحتنا على الاقل تجي للمدرسه تشوفني راحت ودارت وجهه ولا گان عدها اثنين ولد بردنا لبسنا تمرضنا اكلنا شصار بينا ولا يمها مرف گلبها علينا طول هاي السنين وتزوجت وعاشت شون تغمض عينها تالي الليل مااعرف والحلو اجتي تشوفنا وره مصرنا زلم ومعتمدين على روحنا
ومن شفت امكم شون تقاتل لأخر لحظه حتى محد ياخذكم تمنيت تصير عندي مره مثلها حنينه على جهالها وأيه مثل امج اذا مو اطيب بعد لهذا تمسكت بيها بس وروح ابويه لو ادري بيها تحب ابراهيم ولا اتقرب منها
ودق : لعد ليش مقبلت اطلكها
منير : انقهرت حسيتهم طعنوني بظهري وهذا الغبي ابراهيم مگلي احبها اريدها بقى ساكت  ولحظه غباء تمسكت بيها ومن طلكتها وره اشهر رجعت لعقلي بس صعب اكول لأبوي زوج مرتي لأبن عمتي عفت الوضع على حاله لحد مسمعت اختج الخبله شمسويه

ودق : شمسويه
منير : جنت جاي وفتت اخذت غراض من غرفتي وتعرفين غرفه ابراهيم قريبه منها واني امشي سمعتها مشتريه حلقه ولابستها ومنهاره وتحجي وياه وحمدت الله متزوجتها واله جان ادمرت ودمرت حياتها لان اكيد مراح ارحمها لو جانت مرتي وام جهالي وگلبها ويااه وتفكر بيه حجيت ويه ابويه واني اعرف بيه راح يزوجهم بس لازم وره مده طويله ليغرج وكف وكال ماازوجها الكم اثنينكم بس هو راد يطفي النار الي بينا هذا حميد ابو عقل الجبير الي اكبر واحد ميكدر يتوقع شيفكر ودوم يتصرف صح وهاي الشغله جان يسويها واحنا صغار من نتعارك على شغله ياخذها من عدنا ومن تبرد وره اشهر ينطيها للي يستاهلها
بس اني قصرت المسافه وشفت حاله ابراهيم متسمح
ودق : والله صدمتني

منير : اني اهم شى حصلت ١٠ ورقات منه قطيته وتراهنت ويااه كتله خابر اذا مو ابراهيم رايحلها شتريد انطيك واذا فزت بلرهان اخذ ١٠ ورقات ويعقدلهم بنفس اليوم
ودق : هههههههه والله عليك سوالف

منير : شعبالج اعجبج بهاي الشغلات اضحكي ودق كافي حزن تره كل واحد بينا وبداخلنا بحر هموم واحزان اعرف مراح تنسيه للمرحوم بس عيشي حياتج وراح تجيج هواي شغلات يرادلها قوه
ودق : اتغيرت منير
منير : وربج ولا تغيرت بعدني مخبل واموت على الصبايه ليش متتزوجيني تكسبين اجر بيه
ودق : هههههههه اييع لو اموت لازم يوميه اكمشك واگتلك
منير : واني يوميه اسحلج بلشارع لا عيني اريد وحده كتكوته هذا الانتاج الجديد عيون ملونه وبيضه مرصرصه
ودق : ههههههه اخذ مسعده
منير : ولج حبله مسعده وبيبيتج مكيفه
ودق : ياعيبه العيبه بلحرام خزتنا

منير : يله دكتورتنا اريد اروح لبغداد ومن ارجع توكفين تلعلعين وصوتج مثل قبل يسمع سابع جار
ودق : شكراً منير والله يحفظك
منير : امشي لج والله العقل ميلوك الج واني موجود اخاف محتاجه شى من ترحين لبغداد بس خابري هااا مو مسگول دكي لتصيرين جلف وشتحتاجين حاظر
ودق : تسلم متقصر جان يدنج وباس راسي وراح بيومها صدوك حسيت عندي ابن عم رغم كل الي سواه بس منير داخله طيب بس هو طايش هاي ذبته بس ثبت للكل هو طيب

أيه : رجعت للعماره وكولي لهفه لأهلي وخاصه برهومي الي مكضيتها وياه بس تلفونات مااشوفه وحتى تلفون مو هوايه لان ادرس دخلت اركض ابوس بماما وبودق
الْحٍمَدٍ للـّہ على سلامتج امي
اشتاقيت الكم موت موت
ودق : تعالي اكعدي شخبارج وضعج شونه
أيه : الْحٍمَدٍ للـّہ انتي شونج
ودق : زينه
بقينا اليوم كله نسولف جان يدك ابراهيم
ابراهيم : رويحتي ناسيتني
أيه : اخذت التلفون وطلعت اني ابد مااحجي ويه ابراهيم كدام ودق مااريدها تتأذه
اني انساك اووف انسى الدنيا گلها وماانساك اشتاقيت ياانفاسي
ابراهيم : اريد اشوفج ميت على شوفتج
أيه : هسه راح اجي اشوف بيبي وهم اشوفك
ابراهيم : يله انتظرج
سديته وبدلت على السريع واستأذنت من ماما وركض على برهومي اول مدخلت صارت بوجهي جنه
جنه : هاا خيه اجيتي الْحٍمَدٍ للـّہ على سلامتج
أيه : حياتي جناتي شونج
جنه : شبيها عيونج جنهن عيون مطيرچيه
أيه : هاا لا مابيهم شى شكوو
جنه : هااا تره الحب فوك اصعديله
أيه : لا استحي
جنه : عشتووو تستحي خيه وانتي مو حلاله جنتي مكطعه الدرج تكطع ياصاعده يانازله ومن صرتي حلالي تستحين
أيه : جنه لسانج شويه
جنه : أكلج خيه اصيحلج عمتج فضيله تكعدين وياها
أيه : لا دخيلج كله ولا عمتي
جنه : چا شنهي لعد فضيها الوليد تلكيه مثل الحبله يارايح ياراد ينتظرج لو ترحيله لو اصيح بگل صوتي واطلع حبوبتي وعمتج يسلمون عليچ
أيه : يمعوده صاعده اششش بس صوتج ليسمعون
جنه : اروحن لوليدي ولا تأخرين انتظرج عندي اخبار گلها تازه
أيه : لا مااتأخر

صعدت وكلي لهفه وشوق عليه دكيت الباب مباشره فتحه وجان يسحبني ويحضني حيل
اووووف ياريحتج شكد مشتاق الج
أيه : واني اكثر حبيبي
ابراهيم : تعالي يارويحتي شون كيفج
أيه : بخير اذا انت بخير
ابراهيم : تعرفين گلبي ينبض الزمي
أيه : هاي شنو سريع حيل
ابراهيم : هاي انتي تكمزين بيه ماتكعدين راحه
أيه : لزمت لحيته طالعه ومرتبها ومزين طالع حلوو
ابراهيم : استري علي انه الشوق الي بيه يهزني هز مااريد الزمج وانتي مو بيتي اعرف حلالي ومرتي بس مااريد اسوي شى وياج اله انتي بيتي ونتزوج اني راح احاجي ابويه حتى نتزوج
أيه : مستحيل ابراهيم اختي بعدها حتى السنويه مال طارق مطالعه
ابراهيم : اووف اني والله مقهور عليها بس اني هم حالي يقهر انتظر لحظه لحظه تصيرين اليه وتالي لازم انتظر
أيه : اسمعني حبيبي من الاخير مااتزوج اله اتخرج
ابراهيم : شنو يعني انتظر سنه ثانيه
أيه : مااكدر افرح واختي هذا وضعها اكيدانت هم متقبل
ابراهيم : حقج اعذريني رويحتي موبيدي گلبي يرجف عليج واشتاق لكل مسامه بيج تعبت من الانتظار
أيه : هانت حبيبي اروح انزل اخاف يعرفون جايه وزحمه يشوفوني يمك
ابراهيم : مشتاق نكعد يم الشط
أيه : شنو رأيك باجر من الصبح نروح نكعد هناك
ابراهيم : ياريت حيل مشتاق اريد اصفن على عيونج
وتغنيلي اريد اسمع صوتك
ابراهيم : تامرين امر ياشيخه گلبي
اروح انزل اسلم وارجع للبيت وباجر انتظرك الصبح مو تتأخر
تلكيني قبلج الله وياج مريتي
نزلت والابتسامه على وجهي وجان اتجرني جنه

جنه : ها ولج شنهي لاطكعه لا كرصه
أيه : ايا متستحين قابل شايفتنا
جنه : شنهي ابن عمتي مايدبرها يحظي انه گلت صعدت البت راح تنزلنا حبله بعد كل هذا الفراك والشوگ
أيه : والله طالعه عينج ولج عيب بابا
جنه : غير مريته ً
أيه : يعني مرته نسوي كولشي انلحك كولشي بوقته حلو
جنه : شون اثنين ايدحدر الجدر يلكه قبغه
أيه : ههههههه تعالي بشريني اخبار العشيره بلسره اريدها
جنه : اهم خبر زهره انخطبت
أيه : جذب كللللوش
جنه : يا والغسل البت استخفت وتحجي علي

أيه : والله الج هديه تخبل مني
جنه : چا انت غير مريته من شنهي خايفه
أيه : ولج عمتج تخوف تلوب واذا كاطعين مهر اذا تريد تسوي شى بألف ورطه توكعنا ونفسخ بس ماطول زهره راحت هاي هيه وهله وهله
جنه : اردحي خيه اردحي
أيه : وبعد شكوو الاخبار كلها تازه
جنه : انه حبله
أيه : صخام الصخمج
جنه : شنهي وليش صخام ياستار
أيه : ولج انتي مو گلبج تعبان
جنه : گلشي مابيه كل العافيه
أيه : وعرفو هنا
جنه : اي ولعبو جوله بيه وخاصه ابوي گلبها گلاب بس انه اريدن جهال بس واحد واضل شنهي اريدن بعد اخوه لولدي حميد وربج الحارس
أيه : والله خوفتيني
جنه : ادعيلي خيه اكومن بلسلامه وكلشي مااريد
أيه : والله انتي ناقصه عقل عندج واحد احمدي إٱللـِْﷻـِْﮭﮧ واسكتي صحتج اهم
جنه : كولي ياالله وادعيلي
أيه : اًووف ميفيد الحجي بعد المهم الله يكومج بلسلامه وشونج ويه مازن

جنه :هذا لوعت گليبي
أيه : ليش
جنه : خيه يلوبن على اخيتج
أيه : جذب رجع
جنه : چا هو بطل حتى يرجع
أيه : وتالي
جنه : ربج العالي انه اشوفن ودق بغير دنيا والبت بعيده عنه بس هو اووووف ياربي يحومي عليها وانه ساكته ومااعرف شصرف
أيه : انتي أمني من ناحيه ودق مستحيل تتقبل رجال بعد طارق وحتى اذا تقبلت مستحيل مازن
جنه : انه اعرف وگلبي بارد منها بس زلمتي طير وشارد لايرضى يرد لعشه ولا راضي يترك عشت غيره وكل امله من الدنيا هيه وانه نااار خيتي ومنا وليدي وحبلت لا بيه اعوفنه ولا بيه اشوفنه واسكت ظاله اطحن برويحتي طحن

أيه : الله يعينج شون حياه سخيفه يعني حيل هاجرج
جنه : لا خيه الشهاده لله هو زين وحباب واحسن من گبل بهواي ويموت على وليده بس گليبه لج گليبه مو ليه ومن يصفن انه اعرفنه عليها
أيه : والله مااعرف شكول وشون تنحل هاي السالفه
جنه : الي الله ياخيه گلشي اله بيها اراده
أيه : ونًعــٌٓمُٓ باإٱللـِْﷻـِْﮭﮧ اروح تأخرت اسلم على بيبي واروح

الحجية جميله: هله بلحيلوه نورت الديره كلها
أيه : منوره بيج بيبي بستها وجانت عمه فضيله يمها
شونج عمه
فضيلة : هله
الحجية جميله: شنهي تحجي عدل البت تسلم عليچ
فضيلة : وانه شحاجيه يمه
الحجية جميله: عيفيها مسودنه گليلي يهلال بيت راضي شنهي كيفج
أيه : باوعت على عمه فضيله هاي شبيها تريد تشرب من دمي بستها حتى مباستني بقيت ضايجه بس مبينت ودرت وجهي على بيبي
الْحٍمَدٍ للـّہ انتي شونج اشتاقيتلج كولش
الحجية جميله: تشتاقلج العافيه يبعد حبوبتج
گليلي يمه شوكت نفرح بيج
أيه : بعد مو هسه بيبي خلي بس تفوت فتره علمود شغله ودق
فضيلة : وانه ابني يضل هيچ معلك هو شنهي ذنبه چا گتلتي رويحتج عليه وهسه تعززتي
أيه : ممتعززه عمه بس انتي كعد تشًوفين الوضع اختي ترملت قبل يوم من زواجها شون افرح واسوي عرس وحتى سنه خطيبها مطالعه

الحجية جميله: اي والله يمه زحمه انه ردت افرح بيكم عبن هاي الخوثه أكلت راسي تروح وترد شوكت ازوج ابراهيم چا من كثر ماتاكل راسي حسبت الوليد بار مثل النسوان
أيه : ههههههه حقها غير ابنها الوحيد بس اني هم اختي تعبانه ولازم اقدر وضعها

فضيلة : انه خايفه عليه عبن كرفتهن فگر وانه هذا وحيدي ذيج دفنت وحيد الوادم واخافن السره على ولدي
أيه : خلف الله عليج عمه اسم الله على ابراهيم و لتنسين الي كاعد تحجين عنها تره اختي وبت اخوج مو غريبه
الحجية جميله: انهجم راسچ چا انتي ماتكضين لسانج اله اكصه وحگ هو ابو فاضل اذا سمعتها منچ مره ثانيه اكولن لأخيج يعلكچ بتيل
فضيلة : مو يمه
الحجية جميله: كرمينا بسگوتچ وحسچ مااهيسه والله انتي الفگر عبن بس تنگين من كثر نگج الوليد جان خسرناه
أيه : اني اروح بيبي من رخصتج

الحجية جميله: لاتضوجين يمه حظج بلاج بعمه مدمغه تمشي وتهذري فكچ منها
أيه : لا عادي مصار شى
فضيلة : يمه ڤــدّوٌٓوٌٓهْٓ اغديلج حصره اسولف تلطين على حلگي غير وليدي واخافن عليه
الحجية جميله: شنهي تخافين بلجبهه وتخافين والوليد شكالچ شبيه يمشي بطوله وهو راضي لو اله تنبصين
فضيلة : اله يشگي انه امه واحسن بيه
الحجية جميله: هاهاهاها ام احساس چا لو تحسين بيه ماتكدرين رويحته عبن ايه رويحته بس هاي الغيره اچلتچ اچل
أيه : اكوم اني من رخصتكم
الحجية جميله: تعالي يمه ربي ينور دربج لاتكدرين هاي مهبوله ومسودنه انتي واخيتج گل الخير والبركه
أيه : تسلمين بيبي بستها وطلعت والدمعه بعيني ليش هيج تكرهنا احنا بنات اخوها المفروض هي الي تسكت العالم مو تحجي علينا وتتشمت بينا شجاها مجانت هيج

رجعت للبيت ومحسست احد ومر اليوم بين اهلي وبابا حيل جنت مشتاقه اله وثاني يوم من الصبح كعدت گلت لماما حتى ليضل بالها وحضرت لفات كباب عروك وترمز چاي واخذتهم وطلعت وصلت لكيته يدندن
لا لا هذا غش مامسموح تغني گبل مااجي
ابراهيم : هَــْـِْـْْـِلاّ بالصباح الحلو هَــْـِْـْْـِلاّ بنبعه الگلب والروح هَــْـِْـْْـِلاّ برويحتي
أيه : اليوم حبيبي يتغزل من الصبح
ابراهيم : تعالي اكعدي
كعدت بصفه ونزلت رجلي بلمي واحرك بيهم
شون مااتعزل بهذا الوجه السمح وهاي الخدود جنهن تفاح لبناني والعيون غزلان والشفه كرز لو اگلهن للصبح مااشبع منهن
أيه : استحي برهومي
ابراهيم : هههههه اروحن فدووه للي يستحي شونج يابطه مالتي
أيه : الْحٍمَدٍ للـّہ ومشتاق الك
ابراهيم : انه مامشتاق انه مصموط جد جدي من الشوگ
أيه : ههههههههه كون تسمعك عمه هسه تكول موذوله اهلك
ابراهيم : انتي هلي وناسي وكل عشيرتي ً

أيه : نزل رجلك حبيبي المي يخبل جان تطفه ضحكته وتذكرت سالفه رجله نغزني گلبي
والله مو قصدي ابراهيم
ابراهيم : لايضل بالج
أيه : شون ميضل وانت حتى الضحكه راحت
جان يعيط بيه ويريد يكوم
ابراهيم : كافي سدي الموضوع وكومي نروح
أيه : متحملت بجيت
ابراهيم : اوف الله انه چم مره گلت لاتبجين لاتبجين
أيه : والله موقصدي ردتك مثلي ومقصدت اضوجك
ابراهيم : وانه مو مثلج ايه انه بتك رجل والثانيه مااحس بيها صناعيه نسيتي وضعي واذا تنسي انه اذكرج
أيه : لزمته من ايده وكعدته ڤًــدّوٌٓوٌٓهْٓ لتروح خلينا كاعدين لضيع الطلعه من عدنا
ابراهيم : اوووف استغفر الله كعدت بس لاتبجين انه چم مره گتلج دموعج تأذيني
أيه : اذا تريدني اسكت وماابجي راح اسوي شى بس عوفني
ابراهيم : شسوين
أيه : رفعت رجلي من المي وتقربت منه ولزمت رجله الي مابيهم شى وحطيتهم بلمي وهو صافن عليه ورجعت كعدت ومديت رجل وحده والثانيه رفعتها وكتله هسه احنا نفس الاحساس وقربت رجلي وهيه بلمي واتلمس برجله ابتسم ودنج

أيه : اسفه مااعيدها بعد وهاك هسه احنا واحد
جان يجرني لحضنه حيل وباس راسي
ابراهيم : انه اسف لان صيحت عليج وبجيتج
أيه : فدوه الك دموعي واني كولي بس انت هم على كيفك ويايه لتعيط
ابراهيم : مااعيط شون اراضيج
أيه : اريد تغنيلي
ابراهيم : بس هيج غالي والطلب رخيص شتحبين اغنيلج
أيه : اريد اول اغنيه غنيتها اليه تتذكرها وبيومها اعترفت بحبك اليه
ابراهيم : شون مااتذكرها عليك اسأل
جنه : اي غنيها اليه
وبدا يغني واني بحضنه بغير عالم ورجلي ورجله بلمي واسمع صوته وحنيته بحيث غمضت ورحت لغير عالم
ابراهيم : حبيبه شنهي نمتي
أيه : ههههههه لا بس احب صوتك وحنيته وغمضت حتى استمتع بيهم
ابراهيم : لا تسويها بعد
أيه : ليش ً
ابراهيم : مااتحمل شفتج نايمه والشفايف عسل كدامي شون صبرت مااكلتهم ماادري
أيه : هههههه يله خلي ناكل جعت
هسه اذا اگلج احد يلومني
أيه : لا والله ههههههه برهومي
ابراهيم : رويحتي امري
أيه : اني كولش احبك حاول لتتعصب بسرعه مني مرات احجي بدون ماانتبه نبهني علمني بدون عياط وزعل اني ميهون عليه ازعلك
ابراهيم : ولا انه وحق إٱللـِْﷻـِْﮭﮧ اريد دوم ضحكتج اشوفها
أيه : خلينا هيج متفاهمين واذا واحد منا يغلط بدون مينتبه الثاني ينبهه بدون صياح وزعل
ابراهيم : صار اووف شكد اعشگج

بقينا للساعه عشره الصبح جانت من احلى ايامي ويااه هو بقى يشتغل بكاع ابوه بس فلاليح جوه ايده مو مثل قبل بيده لان يتعب بس وضعه المادي زين وعمه فضيله متدخل بيه ابد اعتقد بيبي حاركتها لعمه ومسولفه لأبراهيم وطبعاً جنه كالمعتاد جابتلي الاخبار وعلى اساس كال الها ايه خط احمر مااريدها تضوج ولا تسمعيها حجي ماله داعي انتي امي وعلى راسي وتحترمج وتقدرج وغصب عنها واي قصور منها تجين اليه تكوليلي واني اخذلج حقج بس لتدخلين بيها ابد ومن يومها هيه بحالها واني بحالي
بس من تشوفني احسها متتقبلني بس مغلسه

ودق : كاعدين اني وماما وايه نشرب جاي العصر وكعك وبسكت ونضحك جان يجي مازن
مازن : السلام عليكم
كلنا : وعليكم السلام
يمامه : اكعد مازن ليش واكف
مازن : اجيت اسلم واشوفكم شخباركم
الْحٍمَدٍ للـّہ
مازن : شونج ودق
ودق : الْحٍمَدٍ للـّہ من رخصتكم
مازن : اكعدي عندي حجايه وياج
ودق : خير
مازن : بماان انتي كاعده وماعندج دوام وعطله ليش متجين يمي بلعياده هم تتمرنين وهم تقضين وقت
يمامه : اي والله خوش فّگًــــٌرًهُٓ شتكولين
ودق : مااعرف اخاف ماادبرها
مازن : ليش مدبريها انتي شاطره واني وياج ويمج وهو الدوام من ٣ لل٨ تريدين اطلعين قبل هذا الوقت لو ترحين وتجين ويايه منا لحد متبدي كليتج وترجعين لدوامج شگلتي
ودق : افكر
أيه : والله دودي احسن من كعدت البيت وضيمها
مازن : صدكيني راح ترتاحين وتغيرين جو وهم ضمن اختصاصج
ودق : الله كريم افكر واشوف
كمت من عدهم هيه الفكره حلوه بس شون ابقى قريبه من مازن

بقيت اسبوع افكر لحد ما ماما ادخلت وصعدت تسولف ويايه
يمامه : شبيج ياامي ليش محتاره
ودق : انتي تعرفين بوضعي ويه مازن شون اكون هيج قريبه منه
يمامه : شوفي بنتي لو شكد متكونين قريبه لو عايشه وياه بيت واحد اذا مسمحتيله يتقرب منج مراح يتقرب اي تصرف يصدر منه هو نتيجه رد فعل من تصرف سابق الج
اذا حطيتي حدود لتعاملج وياه مستحيل يتخطى هذا الشى
ودق : وتتوقعين جنه تتحمل قربي منه
يمامه : جنه حبابه واذا كعدتي وفهمتيها اكيد راح تفهمج
أيه : شكعد تسولفون اريد اسمع
يمامه : علمود دوام اختج ويه طارق
أيه : لتصعبين الامور والله الشغله تفيدج وتغيرين جو وهو كلها شهرين ونرجع لبغداد لتضلين متردده
ودق : ماشي اروح وياه والله كريم بس اذا معجبني الوضع ماابقى
يمامه : اكيد اني اكولج لتبقين
ثاني يوم بدلت اني بعدني لابسه اسود لبست قميص طويل اسود وبنطرون وربطه وترانشوز حتى اكون خفيفه بلحركه نزلت ولكيت مازن ينتظرني باوع من فوك ليجوه
هااا اكو شى بلبسي
مازن : هااا لا ماكو يله امشي لنتأخر
طلعت وكعدت بصفه جان يشغل اغاني لزمت المسجل وطفيته
رجاءاً مااحب حالياً اسمع
مازن : اعتذر نسيت
ودق : اتمنى متنسى وضعي
وصلنا وبقى يعلمني على الشغل لاحظت مازن بوقت الشغل جدي جداً وحازم واني هم جنت اركز وياه بكل كلمه واحفظ وحتى اكتب ملاحظات جان يخليني اتقرب من المريضات بس المرضه الرجال من بعيد ممنوع المسه وهذا الشى عادي ميقدم ويأخر عندي واني اعرف عقليته بس مهتميت
صار اكثر من ١٠ ايام وياه وبديت اتعلم على الشغل وايدي اخذت بسرعه وحتى جنت من ارجع من العياده الزم الملازم العملي وكتب ًواكعد اقرا حتى افتهم واتعلم اسرع
كاعدين نشتغل اني وياه دك تلفونه وكف على حيله
شفت وجهه انخطف لونه شبيك مازن
مازن : جنه صار عدها نزيف ونقلوها للمستشفى حالتها خطره

يتبع ....

مساء الـ🌹ـورد نوهت سابقاً على البارت الاخير لكن لكثره الاحداث مكدرت اختصر اربع سنوات من عمر الابطال في بارت واحد جداً صعب لهذا صار جزئين وغداً ان شاء إٱللـِْﷻـِْﮭﮧ الجزء الثاني من البارت الاخير لقصتنا الساعه ١٠ والنصف مساءاً

فقط ملاحظة بسيطه / قصه سجينة الروح ابتدأت احداثها من سنة ١٩٨٦ من شاف حامد يمامه اول مره الى سنه ٢٠١٨ يعني ٣٢ سنه واكيد بيها كثير من المواقف والاحداث وياكلون ويشربون ويطلعون ويمارسون حياتهم حالهم حال كل الناس بكل التفاصيل اليوميه المعروفه لكن اني اخذت الجانب العاطفي من حياه هذه العائله وركزت على المصائب والمواقف الصعبه الي مرو بيها جميع الابطال ولغيت الامور الحياتيه العاديه لهذا الي يقرأ القصه يكول ليش بس المصايب لهاي العائله لان اخذت الجوانب المهمه فقط من حياتهم ولغيت الامور الروتينيه لان لو اريد اكتب حياتهم يوم يوم مراح اخلصها منا لسنه
لهذا حبيت انوه لهذا الامر وبالمناسبه هذا البارت ٦٠٠٠ كلمه يعني بارت طويل مو قصير 😊
لاتنسون تصويتكم للقصه
احـٍُــبٌــ💘ـٍَــْگُِم
تحياتي لًلًـّــ💎ــجٌٓمٍَُٓيِّعَْٓ