سجينة الروح
للكاتبة Reem
البارت الاربعون
(بارت طويل لعيونكم )
مشتهـيك
وگلـبي مثل الطير ويرفرف عليك
#يمتـه_أشـوفـك
ولـو تواعدنـي بحلـم هميـن أجيك
مـرلـي #غبشـه
مـرلـي #نسمـه
مـرلـي #طيـف
لا تـظم شـوگـك حـبيبي
وأني أدري الـبيه #بيـك
أرد #أشـوفـك
أرد #أحـضنـك
وأنسـه كـل أهـمومي بيـك
ودق : سمعت صوت مازن ورايه جمدت انداريت واني قطره دم مابيه شجابه لو هذا حظي
مازن : كومي
طارق : انت وين شايفك
مازن :كومي ودق بسرعه
ودق : اسمعني مازن
طارق : فهميني هذا منو
مازن : انت الي منو سمحلك تكعد وتتمضحك وياها بس اني مااعتب عليك اذا بنت عمي العاقله المؤدبه سمحتلك بهذا الشى
طارق : اي عرفت وين شايفك انت الي جنت كاعد من خطبتها
ودق : ابن عمي مازن
طارق : اسمعني اخي
مازن : كلمه زياده احرك الگليه عليگم خلوني لازم اعصابي منا الطلاب ومااريد فضيحه
ودق : فدوه مازن على كيفك بس افهمني جان يجرني حيل من ايدي وجان يلزمه طارق
على كيفك وياها انت هسه كلت مااريد فضيحه ولتنسى هاي بت عمك وسمعتها من سمعتك واي تصرف راح يطعن بيها
مازن : وخر ايدك لااكسرها مو انت الي تعلمني التصرف
طارق : لا اعلمك واذا تشوفني هادئ وساكت بس لان اخاف على سمعتها وعيب يطلع صوتنا واحنا هنا واختي وبت عمك يصيرون علچ بحلك الطلاب
ودق : دخيلكم صوتكم الطلاب بدت تباوع
مازن : انتي لو مهتمه بسمعتج متكعدين ويه ولد غريب وتضحكين بس مبين انطيناج ثقه زايده واخاف متربيتي صح ارجع اربيج
طارق : تره انت حيل مصختها اني مكاعد وحدي وياها اختي كاعده وتشوف المسافه بينا ومسوينا شى غلط وكاعدين كدام الطلاب كلها
مازن : ودق وروح ابويه اذا متحركتي هسه ميهمني شى اخذج سحل امشي تحركي تره وصلت حدها
ودق : اي كايمه
طارق : شنو جهال كدامك متحترم
ودق : دخيل الله صوتكم وانت طارق فدوه اسكت اخذت ملازمي وجنطتي ومشيت ومازن يفور
جان يلزم طارق ايد مازن وگله لتأذيها تره ممسويه شى غلط افتهم بالاول
مازن : انت لتدخل وحسابك بعدين ويايه
طارق : واني انتظرك
ودق : تحركنا وامشي واقرا ايات حتى معدتي خبطت وتأذيني شراح يسوي مازن صعدنا وشخط السياره بكل قوه واخذنا ١٠ دقايق منحجي ساكتين بس كتله مازن والله ممسويه شى لو تكول فتحت باب جهنم عليه
مازن : شتريدين بعد تسوين مستحيتي على نفسج كاعده ويه رجال غريب
ودق : تعرف كلش زين مكاعده وحدي اخته ويايه
مازن : خوش هاي مال اخته ويايه هو جاي عليج واني حذرتج انتي مو ادميه واله اطيح حظج لج حقيره كاعده وتتمضحكين وياه لهاي الدرجه احنا مو بعينج
ودق : لتخبلني اني شسويت حتى كل هاي الاعصاب
مازن : لج انتي شايفه اليوم اله اخليج تتندمين على الساعه الي فكرتي اتكعدين بيها يمه
ودق : مازن بعدني ممكمله حجايتي جان يلزم راسي وركعه بلدشبول مال السياره بكل قوه احس راسي اتفلش من ضربته من الالم مباشره نزلت دمعتي وكمت اعيط انت شون تمد ايدك وتضربني
مازن : وحق الله اذا ماسكتي انزع الحزام واكطعه عليج وهنا وبلشارع
ودق : انت وين موديني
مازن : ترحين تلمين ملابسج نرجع للعماره
ودق : هو كال هيج لو انهاريت
فدوه مازن كله ولا العماره ورايه دوام
مازن : من اليوم ماكو كليه احنا دازيج تاخذين شهاده مو تصادقين اني من الاول حس گلبي عندج شى وياه وگتلج ونكرتي وصرتي بس انتي وبس خلي يجي ابويه الي يدافع عنج يشوف ست ودق شون كاعده
ودق : انت مو جنت بلكليه وتعرف عادي هيج كعدات ليش تكبرها لو حجه هاي
مازن : اولاً هذا مو زميلج واني وياج نعرف گلش زين جاي عليج واكيد مصادقته ولج احمدي ربج مسحلتكم اثنينكم بنص الگليه
خلي اخلص منج وبعدين ارجع لهذا الساقط العديم الشرف
ودق : انت لكيتها حجه عليه اني لو عندي شى وياه احجي وكدام الكل والولد قبل خطبني واني رفضته كافي اطلع حرگتك بيه واذا ديجي لان اخته صديقتي ورجع مد ايده وضربني على حلكي حيل احس سني انكسر من الضربه وشفتي تأذت حيل وضربني راشدي ردت بس احمي وجهي منه حتى تكفخ على راسي فقد بهذا اليوم شفت واحد ثاني غير مازن بحيث يريد يگتلني خلاص ويعيط ويرجف سكتت لان صدوك خفت منه حسيت اي حجايه زياده يمكن يخنكني ويموتني بأيده
وصلنا لبيت جدي كتله فدوه مازن تهدى واسمعني والله ماعندي شى وياه
مازن : انزلي ودق جيبي غراضج لو اخذج هيج بملابسج هاي يله بسرعه ١٠ دقايق وتجين واذا مأجيتي ادخل للبيت وكدامهم اطيح حظج واريد اشوف يابنيه متجي ويايه
ودق : نزلت ابجي بس دخلت دكيت على ماما
يمامه : هلو حبيبتي هااي شبيج يوم خلي افتهم صار شى لتبجين
ودق : ماما الحكيني فدوه
يمامه : ولج شصار گلبي راح يوكف
وحجيت لماما
يمامه : صخام الصخمج
ودق : حتى انتي ياماما والله ممسويه شى والله شبيكم ويايه
يمامه : روحي خلي اخابر عمج واشوفه شيكول
دكيت على حامد وحجيتله
حامد : خابريها تجي وي ابن عمها لا تخافين انه احلنها اريدن اعرف شصار ومنو العايل بيهم
يمامه : ماشي هسه اخابر
ودق : بقيت الوب وسمعت الهورن مالته دخيلك ربي دكتماما الوو هااا يوم بشري
لا عفيه شون ارجع ورايه دوام
يمامه : تعالي هسه تره الوضع تعبان خلي نحل الكارثه الي بيها احنه وبعدين نفكر بدوامچ
ودق : اخذت كم قطعة ملابس ودك تلفوني مازن
الوو
مازن : وجع وين صرتي
ودق : اجيت بس خلي الم غراضي
مازن : لتتأخرين بسرعه
ودق : مااشي سديته ورجع دك نور شلته
الوو ها نوره
نور : بشري گلبي نار
ودق : شبشر والوضع تعبان وجان اسمع صوت طارق
طارق : سوالج شى
ودق : فدوه طارق ابتعد عني اترجاك شفت هذا ابن عمي الكتلك عليه وراح ياخذني للعماره والله اعلم شراح يصير هناك
طارق : لتخافين مااعوفج لو شميصير
ودق : كلشي مااريد بس ابتعد عني اترجاك
طارق : روحي هسه ولتخافين اني تره يمج وراح احل الموضوع
ودق : اروح هسه باي
طارق : ودق
ودق : نعم
طارق : اني احبج ومستحيل اعوفج وحدج وانتي مسويتي شى غلط صيري قويه مثل معرفتج
ودق : الله كريم وسديته ونزلت وشافتني بيبي خطيه ظل بالها وخابرت على ماما تستفهم منها لان مقتنعت ليش ابن عمي جاي ياخذني
صعدت بلسياره واني الدمعه بعيني وراسي كولش يوجعني من الضربه عدا شفتي الي تحرگني فجأه حسيت بصداع قوي والم مكعد اتحمله منا الضربه ومن ضغط التفكير بلي راح يسوي مازن والطريق طويل ومماكله زين كلها التمت بحيث احس راح اخرب من الالم وره ساعتين هدوء وهو يسوق سريع متحملت الالم عطت ااااخ راسي
مازن : شبيج
ودق : راسي مازن مكعد اتحمل الالم مباشره خفف السرعه وطبك السياره وفتح الباب واجه من جهتي
شبيج احجي شنو الي يوجعج
ودق : راسي مدااتحمل كمت ابجي من الالم احسه ينفض والدم مديصعد بيه حتى عيوني تأذيني
حسيته ارتبك وبدا يحير بيه
مازن : شويه رجلج خلي اشوف بلچكمچه اكو حبوب وجع الراس
ودق : حركت رجلي لكه شريط براسيتول اخذت اثنين واكو مي بلسياره شربت وهو فتح الباب وكعد گبالي
مازن : اشرب بعد مي
ودق : شربت كافي
مازن : اكمل سياقه لو ترتاحين شويه
ودق : لا كمل حتى نوصل من وكت راح يصير المغرب واحنا مواصلين
مازن : خلي اشوف استراحه تاكلين وتغسلين
ودق : فدوه كولشي مااريد بس وصلني لان حيل تعبت
صعد وبدا يسوق رجعت الكرسي شويه ليوره حتى استرخي وغمضت عيني اريد بس الم راسي يفك وره مده حسيت الالم قل بس بقيت مغمضه صاح مرتين ودق مجاوبته مااريد حتى اشوف وجهه قريب منوصل العماره كال
مازن : ودق اكعدي وصلنا
ودق : منايمه اصلاً
مازن : ليش متجاوبين مو صحتج قبل شويه
ودق : مالي خلك احجي
مازن : الحجي جايج شايفه انتي
ودق : مازن الي سويته ظلم بحقي يجوز غلط ولو اني مشفته غلط لان مكاعده وحدي وياه بس اكو الف طريقة غير الي سويته وفوكاها مديت ايدك عليه
مازن : احمدي ربج مو بلعماره احنا وبلكليه جان مبقيت حزام مااكطعه عليج
ودق : مالك حًق من اسوي غلط بذاك الوكت حاسبني
مازن : خلي نوصل وراح اراويج الحساب شونه
يمامه : أيه أيه
أيه : نعم ماما
يمامه : اختج جايه بلطريق
أيه : ليش صار شى
يمامه : مازن رايح لبغداد بشغله وشافها كاعده ويه نور واخوها
أيه : طارق
يمامه : اي هو بس تعالي يمي اكو شى بين اختج وطارق احجي الصدوك اعرف بيها متضم شى عليج
أيه : لا والله ماما ماكو شى بس هو لازك الها وهي ممنطيته مجال
يمامه : شون ممنطيته وهي كاعده تسولف وتضحك اوف ربي يعني شلون كولولي شوكت ارتاح لا من انتن صغار ارتاحيت ومن كبرتن مصايبجن أكبر
أيه : على كيفج ماما تره والله ظالميها لودق
يمامه : وشراح يفهم مازن وعمج هذا الشى مازن رادها حجه من الله متشوفين دوم يروح الها للكليه حتى بس يلزم شى عليها شكد حجه عمج وياه ولا فاد
أيه : الله يستر
ودق : وصلنا للعماره واني منتهيه من التعب وحتى الم راسي احسه رجع ودخلنا للبيت وكف السياره بلباب ونزلت اركض واخذت الجنطه الصغيره الي جبت بيها كم قطعه ملابس اول مدخلت شمرت الجنطه بلكاع وركض لحضن ماما الي لكيتها كاعده تنتظر على نار وايه كاعده يمها شمرت نفسي بحضنها
يمامه : اسم الله امي على كيفج وهذا شنو حالج
أيه : دودي شبيج لج هذا شنو حالج وجان يدخل مازن وبابا حامد وياه
حامد : تعالو ليه واكعدو وفهموني شصار
مازن : شفهم وبت اخوك مستهتره وتفتر ويه الولد بلكليه وكاعده ولا هامها احد وتضحك وتلكه سمعتها على كل لسان
ودق : والله جذب عمو لك انت ليش متحجي الحق لو بس تريد تذب تهمه عليه
حامد : بسگم حسگم مااهيسه انه مو كاعد چدامگم چلمه ثانيه اركع راس براس
احچي گل الي شفته وانتي مااسمع چلمه لحد مايكمل
مازن : يابه اني رحت لبغداد بشغله وگلت مناك امر عليها اخاف محتاجه شى ومن وصلت شفته كاعده هيه وياه وصوت الضحك والسوالف ولوما بلكليه والطلاب كلها موجوده وحق الله اكطعهم اثنينهم بس هين انه اله لذاك السافل
حامد : انت شعندك نازل لبغداد انه اعرفنك ماعندك اي شغيله هناك وليش رحت ليها هناك
مازن : يابه جان عندي شغله متعرف بيها وگلت امر ربك يريد يگشفها
حامد : وانتي احچي الي كاله مازن صگد
ودق : والله عمو مجنت كاعده وحدي جانت اخته ويانه اصلاً هو كاعد بجهه واني بجهه وكدام الطلاب وممسويه شى غلط
حامد : هو مو طالب عدگم شعنده چاي
ودق : اني شعليه عمو قابل گليه اهلي وامنعه واخته موجوده مو وحدنا والله ومازن گبر الموضوع بس حتى يرزلني
حامد : انتي غلطتي حتى لو چاي لأخته مايصير تكعدين وياهم لو تبلغين صديقتچ من يجي اخوها تروح عنچ الطلاب گلها تاخذ نظره عليج
ودق : بس والله من كاعدين موجوده نور
حامد : حتى لو موجوده عبن الوادم عليها الظاهر يعرفون اخته يشوفها بلبيت ليش چاي للكليه موش صح تصرفچ ودق انتي لوما عاجبج الوضع چان گلتيلها انه اترخص ومن يروح اخوج ارد أكعد يمچ وهو هذا الوليد مو خطبچ منا ورفضناه شون تردين تگعدين بمچان وهو بيه
ودق : عمو دخيلك افهمني اني لو عندي شى وياه جان وافقت على الخطوبه بس
حامد : بسچ انه ماراضي على تصرفچ البت اهم شى سمعتها وانت موش ايه بت انت بت شيوخ والچلمه التجي عليچ تمس العشيره گلها
ودق : باوعت حتى عمو حامد مراضي شون ياربي توقعت يوكف ويايه دمعت عيني
مازن : يابه هاي مااداوم بعد تنجب وتكعد مو وجهه گليه
ودق : وكفت على حيلي لا دخيلكم كله ولا گليتي والله حتى نور اعوفها بس ارجع للدوام
حامد : ادخلي لحچرتج
ودق : فدوه عمو والله ممسويه شى غلط ومستعده حتى امشي وحدي بس لتبطلوني
يمامه : حامد فدوه بقت الها سنتين لضيعون مستقبلها
حامد : بسچ يمامه وانتي ادخلي لحچرتچ ومااريد اسمع چلمه بسرعه
ودق : باوعت على مازن بحقد ودخلت منهاره ابجي يعني بعد مااداوم غير اموت حتى على ضربه اليه محجيت لان الوضع كله ضدي
أيه : كافي دودي هسه كم يوم يهدا الوضع ونرجع سوه اني وياج لبغداد
ودق : كله من وره هذا الحقير مازن الله لايوفقه شرايد مني
أيه : هسه انتي توازيتي تكعدين وطارق موجود
ودق : والله ماعندي شى وياه ليش محد مصدگني
أيه : خلي اكولج شى اتوقع انتي بديتي تميلين لطارق
ودق : انتي شكعد تحجين
أيه : هذا واقع انتي اصلاً متتقبلين تكعدين ويه ولد حتى لو اخته موجوده بس طارق متقبله وجوده وتضحكين معناه داخلج ارتاح اله ولو باقيه فتره يجوز تحبه ومتأكده
ودق : اني مستحيل احب
أيه : لا تحبيه او على الاقل تتعلقين بيه طارق كد يستحوذ على اهتمامج وهاي اول خطوات الحب
ودق : بله متسكتين ام الحب هسه اني شون اقنعهم ارجع للدوام
أيه : خلي تبردالشغله وماما اكيد راح تحاول تقنع عمو
ودق : اوف منين اجتني هاي المصيبه
أيه : الله كريم متبقى على هذا الحال اصبري يمكن طلعو
حامد : مازن تعال وراي
يمامه : حامد فدوه ودوامها
حامد : انه بعدين اشوفن شون
طلعو حامد ومازن واني گلبي نار بس لا يبطلوها ويضيع تعبها وتعبي
ودق : مر اليوم هادئ وحتى عمو محجه اي شى كدام ماما شكد رادت تفتهم منه بس گلها تعبان اريد انام من كثر البجي حتى راسي مكعد يسكن من الالم
ثاني اليوم نزلت يم ماما وكاعدين بس نفكر شون نقنع عمو حتى ارجع للدوام وحتى غدا متغديت مالي نفس لكولشي وجان تدخل جنه بس شنو الوجهه مگلوب والدموع عشره عشره احنا گلنا واحد مات نريد نسكتها حتى نفتهم منها شصار كوه سكتتها أيه وشربتها مي واني واكفه اريد اهديها بس سكتت باوعت عليه وجان تكولي مازن نهى عليچ
ودق : شنو نهى عليه ليش وعلى اي اساس رجعت تبجي واني الصدمه الي بيها كافيه احرك الگل عطت بيها بقوه اسكتي واحجي مو وقت البجي مالتج من شافتني اعصاب وابجي مسحت ادموعها وبدت تسولف شصار
احنا چنا كاعدين بسلامه وابوي گال لمازن عمامك عدهم طلابه واليوم چايين واريدنك وياي عبن الشغله تخص فخذ من افخاذ العشيره وكريبه وهم يسولفون دخل عمي حسان گال چايين خطار من بغداد
ودق : كملي اي
جنه : هما تفاجأو وراحو وبس ردو اسمعهم يصارخون ابوي ومازن
واجيتكم اركض
ودق : هسه اني شفتهمت متكوليلي وجان يدخل عمو حامد وجنه مسحت عيونها وطفرت للبيت حتى بدون متباوع على ابوها
حامد : تعالي يمامه اريدنج
يمامه : ركضت عليه دخلنا للغرفه واني لشتي كلها ترجف شنو نهى عليها حامد صدوك الي سمعته مازن نهى على ودق
حامد : اي صگد
ليش وشنو معنى تصرفه
حامد : اكعدي افهمج حتى تفهمين البت
انه خذيت مازن عبن عدنا كعده لشيوخنا ورايحين ليهم وسمعنا من حسان اجانه خطار تفاجأت ولما دخلنا الديوان لگينا الديوان مليان زلم وساده وگلها ناس واصله وشيوخ الديوان انترس تكول ٥٠ زلمه قليل
سلمنا اباوعن واشوفن الوليد الي راد ودق وبسببه صارت شغلته
يمامه : طارق
حامد : اي هو جاي وياه مشايه يخطب البت تكول ناگل الدنيا گلها وگلها ناس الها اسمها وحتى شيوخ معروفين والي صداقه وياهم وساده وحتى من جماعه السيد مابقي زلمه يعتب عليه الديوان مچال مابي للوكفه موش الكعده
يمامه : وتالي
واجو يقدمون الگهوه مارضو يشربوها
احد الشيوخ : اليوم چايين للشيخ حامد واحنا نعرفه صاحب كرم ومايردنا ومانشرب ضيافتك اله تكضينا شغيلتنا
حامد : اعتبرها مكضيه چا انه اليوم عندي عيد عبن الشيوخ والساده والزلم الخيره گلها بضيافتي
وضلينا نسولف ونتسالم لحد محجه جبيرهم سيد معروف بلبصره اعرفنه اله كرامته ومايدخل بطلابه اله يحلها واله شان جبير اليوم جااين نطلب كريمتك بت اخوك الجبيره لولدنا طارق ونتمنى ميردنا
حامد : انه هنا الصراحه تخاجلت عبن الوادم هاي گلها الها شان وزحمه اردهم وبعدها الچلمه ماطالعه من حلگي وكمز مازن
مازن : من رخصت ابويه وشيوخنا والكل الحاظرين على الراس اني الدكتور مازن ابن عمها واني ناهي عليها
هنا انه تسودنت لابي ارده ولا اسگت وهو ظل يسولف الوادم تصافنت وطارق وگف يريد يتعارك وياه
طارق انت بأي حق تنهي عليها وانت متزوج وبت عمها ليش تظلمها وفوكاها دكتور شگلت لروحك متخاف من الله
وگب الصياح همه ردو طارق وانه رديت مازن بس مازن نهى الموضوع وگلهم انه من حقي انهي على بت عمي وانه نهيت عليها كدام الكل ومالكم مره يمنه وجيتكم على راسنا وضيافتكم واجبه بس مره مالكم يمنا
وطلعو والكل ماراضي بس النهوه سگتت الگل حتى الشيوخ عبن يعرفون اذا تمت النهوه انتهى گلشي
يمامه : عزه شون يسوي هيج وشنو من حقه حامد غير تسكته
حامد : انه جبيره العشيره بس اكو عادات مااكدر اخالفها مازن حگه ينهي عليها وانه جنت خايف من هاي عبن مااكدر احلنها وهو علن نهوته چدام الكل حتى چدام شيوخنا والبت ماتزوج اله يفك نهوته منها وهو يگول لو اموت ماافكن النهوه
يمامه : ليش هيج هاي تاليها ينهون على بنتي وانت ساكت حامد ذني برگبتك ويتيمات ليش قبلت ليش وكمت ابجي والطم على خدودي
حامد : بسچ يمامه انه ماراضي وطردته لمازن ومايدخل البيت وانه اعرفن شون اربي
يمامه : البنيه مسوت شى حتى يصير كل هذا وحتى الولد اجه مره ثانيه يعني شاريها
حامد : انه اعرفن الوادم من نظره عيونها الزلمه شاريها لبتج بس هاي قسمتها خلي تمر فتره والله كريم تهون ماتضل هيج
تهدي يمامه لاتضلين تصارخين وتلطمين
يمامه : شون ماالطم واني اشوف مستقبل بنتي انتهى ومن وره مازن هسه لو منير گلشي اتوقع منه بس مازن هذا العاقل الي دوم اعتبره سند لبناتي
حامد : هذا تسودن عبن حس راح تروح من ايده ولو ما ناهي عليها چا هسه نقرا فاتحة البت لان مااكدر ارد طلبهم انه حسيت وراه طلابه من شاف وجهه طارق وهو ورث ويلوبن
يمامه : بس بنتي شنو ذنبها وهي متريده
حامد : انه متأذي اكثر منچ يمامه لاتنسين مازن ولدي ومتزوج وحيدتي موهين علي اشوفن بتي الوحيده دمعتها على خدها ومااسوي شى انه تمنيت مازن غريب واله وحگ هو علي چيله بنص گلبه انه غضب عليه بس مااكدر اگتلنه خلاص الله اعلم بحالي ولدي گسر بتي وگسر بت اخوي وگبل گلشي گسر چلمتي
يمامه : والحل حامد شون
حامد : تنحل ماتظل هيج وانتي هدي البت وانه اعرفن دوا مازن يمي اروحن للديوان الوادم تنتظر
يمامه : حامد
حامد : هاا يطيرتي لا تبجين امسحي دموعچ اتكدر (اضوج ، انقهر ) من اشوفن هاي العيون تبچي
يمامه : امانتك ودق فدوه لتظلمها
حامد : لا تخافين هاي بتي وانتي هم بتي عبن حبيتچ وعمرج ١٤ سنه
يمامه : بقت بنيه كبرنا يحامد
حامد : شما تكبرين تحلين بعيني وتضلين بت ١٤ سنه وكصيبتج تلعب على گلبي بسچ بچي انه گلبي موجر لاتزيدها علي
يمامه : مسحت عيوني بس لتضوج
حامد : انه اريدنچ قويه مايهزج ريح هاي گلها ريح تهب وتروح انتي مرت الشيخ حامد لاتنزلين راسچ ولا دموعچ تهل اريدنچ سباعيه شيخه تفكر اكثر ما تبجي
يمامه : اذا انت ويايه اكيد قويه
حامد : اروحن انه يبعد رويحت حامد وسگتي البت وهديها ودزي على جنه البت هم بتچ هديها اعرفنها مكسوره وانه گلبي تكسر عليها انه اعتمد عليچ يمامه
يمامه : من عيوني توكل بالله وليضل بالك
حامد : تعالي ليه اشمنچ واروح
يمامه : حضنته مرات احس حامد موبس رجلي عبالك ابويه من الحنيه الي شايلها
حامد : افيييش ياريحه الجنه انه شمه منچ ترد رويحتي
يمامه : انتبه لنفسك فدووه ولضغطك تره ماعدنا بس الله وانت
حامد : لاتخافين گل مااتعب اشمنچ اطيب
يمامه : الله يحفظك اليه
حامد : اروحن انه
يمامه : إٱللـِْﷻـِْﮭﮧ وياك حبيبي
طلعت وراه وشفت ايه ودق كاعدات وايدهن على خدهن والصدمه حيل مبينه على وجهه ودق وحجيت كولشي الها
ودق : يعني هسه وكته لطارق
أيه : هاي فوك متكولين الولد شاريني ويحبني مكعد تسمعين ماما شكالت ممبقي رجال مجايبه ويااه علمود يخطبوج
ودق : وشحصلت مازن نهى عليه وگتله عليه ومسمع كلامي
يمامه : يعني انتي تحجين وياه اكو سوالف وتفاهم
ودق : لا ماما مفهمتيني بس مره كعدنا نسولف وكتله هسه اني شون ودوامي والي سواه مازن شون اخلص من كل هذا
يمامه : كافي بچي وخلي كم يوم يهدا الوضع واحجي ويه عمج أيوته روحي صيحي جنه خطيه هاي هم ابتلت بلوه المسكينه
أيه : اي رايحه
اخذت ربطه ولبستها ومشيت اول مدخلت ادور على جنه لكيت ابراهيم بلصاله بقيت اباوع عليه اووف صار كم يوم مشايفته صافن على التلفزيون وماكو احد يمه وكع الريمونت من ايده راد يدنچ مكعد يوصله خفت ادخل ويرزلني بس من شفته يريد يوكع متحملت خلي يرزل المهم ميوكع ركضت اوكف اوكف ودنجت انطيته اله هو تفاجأ بشوفتي
ابراهيم : شسوين هنا
أيه : اجيت على جنه
ابراهيم : وجنه بحجرتها روحي عليها
أيه : باوعت عليه وصرت گباله
ابراهيم : ساده عليه التلفزيون اريد اشوف
أيه : اني بعد ٣ ايام اروح لبغداد مباشره فتح عينه وباوع عليه
ابراهيم : ليش
أيه : راح يبدي الدوام ولازم اروح وجان يتعصب
ابراهيم : واني شنو متروحين شسويلج
أيه : ردت اكولك لو شكد مااكون بعيده عنك انت بس روحي يمك
ابراهيم : ماتوبين ماتملين هسه ترحين للكليه وتشوفين اشكال الزلم وتنعجبين بواحد ويجوز تحبي ويحبج واهم شى كامل مو سگط بتك رجل
أيه : حطيت ايدي منا ومنا على العربانه مالته ودنجت عليه حسيته ارتبك وگتله بصوت ناصي لو الف شاب ميهزون شعره مني ولا يملون عيني اني بت ابراهيم والبطه مالته ورويحته وام بيته
ابراهيم : أيه
أيه : ياروح ايه
ابراهيم : عيشي حياتج ولاتلتفتين ليوره انسيني وانسي كولشي يخص ابراهيم اعتبريني متت مرجعت والله احسن الج اني ادرى بمصلحتج
أيه : ههههههه
ابراهيم : اني مكعد اتشاقه
أيه : لا والله تتشاقه وتنگت هم شوف عيونك شون تحجي عكس لسانك ابراهيم اني الك لدوخ روحك ولا اتعبها مو حلفت الك
ابراهيم : واني احلج من الحلفان
أيه : مو بكيفك قابل انت أمام وتحلني وشوف لو تتزوجني لو اني انهي عليك صدوك اريد اسأل بابا يصير انهي عليك
ابراهيم : هههههه مايصير ولج
أيه : اروح فدوه لضحكتك
ابراهيم : شون بيج گليلي شون
أيه : من الاخير لا ادوخني ولا ادوخ روحك انتي مالتي اليه وبس واني قريبه ومدنجه عليه جان اسمع احد چاي وكفت عدل جان اطب زهره وامها اني شفتها لو نار وشبت بيه وهلمره جايه وضاربه تخم مكياج تكول طالعه لعرس ممبقيه لا احمر ولا اخضر بلسوك محاطته تكول علوه مخضر مو وجهه
فضيلة : ادخلي خيه زارتنا البركه
أيه : اباوع عليها شون تباوع عليه تريد تاكله الگلبه گلت اليوم ولا اتحرك جان ابراهيم يكول ايه مو اجيتي على جنه مترحين الها
أيه : هااااا هو كعد انتظرها كالت نص ساعه وتجيني واني لو بيدي اشرب من دمه شنو يريدني اروح حتى يخلى الجو لست زهره بله هاي هم زهره شمسويه بروحها
زهره : شلونك يبن عمي عساك سالم
ابراهيم : الحمدلله
فضيلة : يمه ابراهيم زهره اجت تشوفك
ابراهيم : هله بيها
أيه : توترت واني اشوفهم كاعدين يسولفون فضيله وام زهره وابراهيم وهيه الدمعه رادت تطفر من عيني حسيته مندمج وياها كمت اذا ابقى دقيقه يمكن ابجي
رحت اركض لجنه دخلت لغرفتها لكيتها تبجي
خرب حظنا بس نبجي ذوله راح يموتونا
جنه : بله انه ابجي عبن رجلي يحبله بت عمي ونهى عليها انت شبيج
أيه : هاي زهره هنا ويحجي ويضحك وياها متت قهر
جنه : ثول يازهره لچ ابراهيم انت الهوا اله
أيه : يمكن حبه تغير
جنه : مسحت دموعي تعالي ويايه وهسه اشوفنج شنهي حبه
انتي الي عليچ ماتنشف دمعاتج وجع شو ضحكتي
أيه : شو من تحجين وحاجب مرفوع وعيونج تتغمز منظرج يضحك
جنه : والغسل لا استفادينا ولي مو صوجج صوچي انه عايفه مصيبتي وحايره بيج
أيه : لا هذا هو راح ابجي
جنه : تخيلي عرس ابراهيم وزهره وتمددي على الكرويته والزمي رجولچ عود تأذيتي يله لاتصفنين علي جنچ صخله طارحه
أيه : هههههههه
جنه : اروحن اولي وطبچ حريشي
أيه : لا لا سكتت
جنه : شوفي هاي زفه ابراهيم وجنه وراح يبوسها وتنام بحضنه
أيه : يمه غير اموت
جنه : چا تخيلي خيه حتى تبجين
أيه : اني تخيلت لو روحي طلعت كمت صدوك ابجي بحركه شو هاي اركضي
جنه : الحكو ايه وكعت وتإذت
ابراهيم : شنهي وينها
جنه : متمدده على الكرويت
زهره : قابل انكسر راسها هيه رجلها
جنه : چا هيه هينه البت مفرفحه من البجي
فضيلة : يمه حطي ثلجات على رجولها
جنه : مايفيد عمه البت تصارخ
ابراهيم : اخذيني ليها
جنه : چا بس هيج تامر خويه وركض اخذته بلعربانه وحطيته گبالها وهاي ايه صگد مفرفحه چا شنهي صدگت البت واجت زهره وياي شون ادعبلها هاااا
تعاي زهره خيه اريدنج تساعديني عبن انتي ام بيت وشاطره حظري الشوربه لأبراهيم
زهره : اذا لبراهيم من عيوني
جنه : سالمه عيونج خيه وخذيتها وعفت البلابل وحيدهم عمه وام زهره ظلو بلصاله يعرفون زهره ويه ابراهيم مايعرفون خذيتها حتى تضل ويه أيه
أيه : اني شفته گبالي كمت ابجي من گل گلبي
ابراهيم : ايه شنو اليوجعج
أيه : ماكو شى روحلها
ابراهيم : منو الي اروح الها
أيه : بت عمك
ابراهيم : هسه اني بحال بت عمي رجلج شونه كالت جنه وكعتي
أيه : اي وتأذيت
ابراهيم : ادز على امج
أيه : لا
ابراهيم : لا اله الا الله لج بابا لتبجين كل دمعه منچ تموتني كافي
أيه : انت مو متحبني
ابراهيم : ياابن گلب گال هيچ
أيه : انت
ابراهيم : خلف الله عليج اني ابن گلب
أيه : لا حشاك بس انت تكول مااحبج وروحي عيشي حياتج
ابراهيم : غير من ضيمي لج ماتعرفين شحس اااااااااه لو اصرخ تصعد لربچ اني داموت ايه ومحد حاس بيه
أيه : اني حاسه بيك والله
ابراهيم : هسه عوفج من كولشي رجلج شونها
أيه : كول گلبج شونه
ابراهيم : گلبج شعليه
أيه : ديأذيني ابراهيم حيل يأذيني
ابراهيم : ياستار بيج شى
أيه : اي
ابراهيم : شبيج
أيه : بيه انت اي لتصفن عليه بيه انت گلبي يوجعني منك وميته غيره عليك وحطيت ايدي على وجهي واشهك
ابراهيم : ههههههههه والله طفله وتبجي نزلي ايدج اريد اشوف عيونج
أيه :مااا
وجان يسحبهم
ابراهيم : عيدي شگلتي ليش تبجين
أيه : سمعتني زين
ابراهيم : تغارين من شنو ً
أيه : من هاي سوك المخضر
ابراهيم : منوو هاي
أيه : بت عمك الي حايره شحاطه بوجهه احمر واخضر وردي تكول علوه مال مخضر كله والله علمود تعجب الاستاذ ابراهيم ومبين عجبتك كاعد وتسولف وياها اكلتها اكل بعيونك
جان يقرب وجهه مني
لج هاي العيون تحلى بنيه بيهم غيرج
أيه : مبين من هيج گابلتها وتسولف وياها
ابراهيم : ايوته شتريدين هسه
أيه : متسولف وياها ومتشوفها بعد وممنوع تكعد وياها ونهائياً متاكل من ايدها واصلاً انسى عندك بنت عم اسمها زهره
ابراهيم : وتسكتين متبجين
أيه : اي اسكت ماابجي
ابراهيم : صار تدللين
أيه : يعني راح تنفذ الي اريده
ابراهيم : واني الممنون بس لتبجين
أيه : مسحت دموعي وابتسمت
ابراهيم : راح اشتاق لضحكتج ولوجهج الحلوو
أيه : اني مراح اشتاق تعرف ليش
ابراهيم : ليش
أيه : لان انت ويايه بكل مكان
ابراهيم : ارحمي گلبي
أيه : انت ارحمني وارحم نفسك وكافي عناد اني راح اعوفك كم شهر ترتاح بيهم بس حط شغله بالك انت مالتي اليه وبس واتزوجك حتى لو غصب عنك
ابراهيم : ولج شو انتي طالعه عينج وين ايوته الفقيره الي تخجل من خيالها
أيه : غير انت تخبل الي ميتخبل من راك كمت اتجرأ هيج احجي
ابراهيم : يعني اذا مقبلت اتزوجج شسوين
أيه : اطلع قرار جديد بلعشيره واكولهم انهي على ابراهيم واتزوجك غصب
ابراهيم : ههههههه صايره تخوفين
أيه : شعبالك اني بت الشيخ حامد ابن الشيخ راضي
ابراهيم : والنعم بس انتي بت عادل
أيه : لا مو سجلت اسمي بأسم بابا حامد لهذا اني الشيخه ايه بت الشيخ حامد وراح اتعلم من بيبي جميله اصول الشيخه حتى غصب عنك امشي كلامي عليك
ابراهيم : بس انه ماكو مره تمشي كلامها عليه
أيه : اني امشي واتزوجج غصب عنك
جنه : هااا شونها رجلج خيه
أيه : نسيت نفسي وكمت اكمز باوع صفح ابراهيم عرفت كذب مواكعه وضحك
زهره : الشوربه شوي وتكمل ابن عمي وراح تعجبك
أيه : باوعت عليه بنظره هاا شگلنا جان يكول
ابراهيم : مجوعان وعااشت ايدج مااحب الشوربه
زهره : چا انه المن سويتها
ابراهيم : اخذيها وياج تعالي ايه اخذيني لحجرت جده اريد اشوفها اليوم ماشفتها
أيه : طفرت والابتسامه بوجهي وحركت الكرسي ومباشره لبيبي جميله
الحجية جميله: هله بجايني هله يبعد بيتي
ابراهيم : شونج جده
الحجية جميله: بخير يمه نحمده ونشكره
أيه : شونج بيبي
الحجية جميله: هله يبعد رويحتي تعالي ليه ابوسنچ
بست ايدها وراسها وكعدت يمها
الحجية جميله: شوكت ترحين لبغداد
أيه : بعد ٣ ايام
الحجية جميله: أسمعي حبوبه هذا الوليد يحبچ ورويحته معلكه بيج
ابراهيم : حبوبه
الحجية جميله: انجب وبسگ مرمرت چبدي
أيه : هههههههه كملي فدووه لحلگج هذا الحجي الزين
ابراهيم : تضحكين موو اني الج اله اصيح زهره
الحجية جميله: شنهي زهره هاي الصخيله مسعده احلى منها غير امك تسودنت وتريدها ليك هاك شوفن بنيتنا چنها العافيه
ابراهيم : كون تسمعج يمكن تنجلط
الحجية جميله: عساها شنهي تاخذ زهره المسلوعه جنها سحليه حبله
أيه : ههههههه اي والله بيبي من تمشي
ابراهيم : خو انتي كيفتي
الحجية جميله: يمه هذا الوليد مسودن عليچ والليل كله ينوح لاتعيفي
أيه : شون اعوفه للموت وياه
الحجية جميله: عفيه ببنيتي اريدنچ ذيبه وتكضي من حلك السبع وامه انه ليها لو اعرفن اطگها بحزام جدچ واربطنها بلمراح چا هيه وليه تخطب زهره بت الفگر الرجلها گل فطر بيه تبات بيه الحيايه وتعوف الجمار
أيه : هله هله من فدوه لبيبي الرافعه معنوياتي
ابراهيم : ههههههههه كيفي ست ايه اليوم الحجيه راضيه عليج
الحجية جميله: انه دوم راضيه عليها هاي العزيزه وانت العزيز واريدن اشوفن فروخكم گبل مااموتن
أيه : عمرج طويل بيبي
ابراهيم : عمرج طويل جده
الحجية جميله: يله ولو منا ومااريدنكم تكدرون وانتي ترحين لبغداد ومن تردين انه احجي ويه حامد عبن تصيرين حرمت ابراهيم
ابراهيم : مو هسه جده خليها
الحجية جميله: چا حبها ولبط انه ماگلت هسه من ترد للعماره
أيه : قصدج من اخلص السنه
الحجية جميله: اي يمه وانت وليدي صير سبع وتشافى وراك مره وعرس لاتضل هيچ
ابراهيم : الله كريم حبوبه
يله ايه رجعيني للصاله
أيه : ماااا اله تروح زهره وامها
الحجية جميله: اي هيچ يمه صيري گويه
ابراهيم : راح اطلعين عينها حجيه علينا
الحجية جميله: اسگت خاب دطير اطلع عينها هاي فقيره ومن اهل الله عيطه منك هسه توكع دمعتها
أيه : هاا بيبي شنو السالفه هسه جنتي تنفخين بيه
الحجية جميله: چا يمه اكسر واجبر
أيه : ههههه اموت عليج بيبي اروح اني اشوف جنه
ابراهيم : مودعه بالله وانتبهي على نفسج اخافن مااشوفنج من تسافرين
أيه : تتذكر من گتلي راجعلج وهسه اني اكولها الك راجعتلك
ودق : مر اسبوع واني ممداومه كطعت الاكل والشرب احس اللكمه متوكف بحلكي تعبت نفسياً وخاصه من راحت ايه لبغداد وكاعده ضايجه طبت جنه
جنه : مساج الله بالخير
ودق : هلو جنه تعالي اكعدي شونج
جنه : انه حبله
ودق : شنوو حامل
جنه : اي
ودق : مبروك گلبي وبستها شبيج مفرحانه
جنه : انه انتظر هذا الوليد ساعه ساعه عبن افرح مازن بيه بس
ودق : شبيج احجي
جنه : من يوم شغلتچ وهو مارد البيت وابوي حالف يمين عليه
ودق : انتي معرفتي شنو الي صار بين عمو ومازن
جنه : سمعت يسولف لجده ويگلها بس طلعت الوادم كضيته وخنگته وعمامي كوه هادي من يده وطارده وحالف يمين عليه مايرد ولا يوكف على گبر ابوي اسم الله عليه ومن يومها لا رد للديوان ولا للبيت وامي احلام تگلي لازم ترحين لرجلج
ودق : ليش هو وين هسه
جنه : فتح بيت البستان الصغير وكاعد بيه
ودق : روحي كوليلي على خبر الحمل بلكت يعقل ويتعدل وياج
جنه : ماظن ياخيه ماظن يهمه
ودق : غلطانه اكيد يفرح روحي وجبري مخسرانه
جنه : اروحن هسه
ودق : ههههههه لهاي الدرجه مشتاقه اله
جنه : هذا زلمتي وانه احبنه
ودق : الله يهدي يله روحي واني اي احد يسألني اكله يمي فوك بلغرفه
جنه : يبعد خيتج
باستني وطلعت جنه فقيره وبسيطه بس مازن ميعرف قيمتها
راحت وره ساعه رجعت هااا بشري
جنه : بارگلي بس حسيته تكدر
ودق : احساسچ غلط يجوز تفاجأ المهم هو هسه يعرف انتي حامل
يمامه : هاي منو الحامل
جنه : انه عمه
يمامه : حبيبتي الف مبروك هسه حامد يطير من الفرح
جنه : امي گالت أكله بس يرد من الديوان
يمامه : الله يتمم بالخير حبيبتي
جنه : اروحن انه ضلت يمكم العافيه
يمامه : الله يعافيج بنتي
راح تبقين هيج ياماما لااكل ولا شرب
ودق : رجعوني لدوامي والله حرام السنه راح تضيع مني
يمامه : اني اليوم احجي ويه عمج
ودق : لا اني احجي ويااه
يمامه : براحتج المهم تاكلين كافي ذبلتي
ودق : مااشي
انتظرت عمو اجه بليل الله يساعدك عمو
حامد : هله بويه
ودق : من رخصتك بس دقايق اريد احجي وياك
حامد : تعالي جاري امري
ودق : لا يأمر عليك ظالم عمو فدوه ابوس ايدك رجعني لدوامي والله ماعندي شى ويه الولد والله ومستعده حتى نور اعوفها والله لو تعرف شكد اتعب بلدراسه عيوني راحت من كثر ماادرس في سبيل انجح واتخرج والله عمو الي تأمر بيه راضيه بس خليني اداوم مستقبلي واكف على هاي السنتين اترجاك عمو
حامد : انه اريدن چلمه منچ ومو اي چلمه اريدن چلمه شيخه بت شيوخ ماتشوفين هذا الوليد ولا تكعدين بأي مچان وهو موجود انه راح اخليج تردين لگليتچ وهاي اخر فرصه الچ اي غلطه ولو وحده وروح ابوي تحلمين تشوفين الگليه والبت مالها ذنب انه سألت عليها وحمدولي بأخلاقها بس الوليد مايوصل جارچ ولا انتي تقبلين چلمه منه اخته اذا لحت وتودي حچي وتجيب الافضل تترگيها
ودق : صار والله بس رجعني
حامد : عگب باجر ادزج بيد حسان ومااريدن غلطه يودق
ودق : صار عمو بست ايده
حامد : الله يرضى عليج بويه
ودق : صعدت فرحانه وحتى اكلت وحظرت غراضي
ثاني يوم العصر اندكت الباب وماما جانت يم عمه احلام لان تعبانه وراحت تسويلها اعشاب حتى اطيب وتضربها ابره وعلاوي يمي يلعب اندكت الباب ركض علاوي فتحه وطلع مازن وعيونه ناطه من الاعصاب
مازن : شون ترجعين للكليه
ودق : مالك علاقه عمي وراضي انت شنوو
مازن : اليوم احرك الدنيا عليگم شنو هذا الاستهتار انتي مو مال گليه مو اهل للثقه
ودق : عطت بيه كافي مازن تره زودتها تعرف گلش زين ماعندي شى وياه وبسبب تصرفاتك خليتني اقارن بينك وبينه
جان يلزم شعري حيل
مازن : لج شنو هاي الصلافه وتقارنين بينا
ودق : عوفني مكافي ذاك اليوم ضربتني ومحجيت جوز مني انت رجال متزوج مو من حقك تتحكم بحياتي وجريت شعري منه
مازن : اني بعد نهيت عليج
ودق : ميهمني وعود انت مسوي فد انجاز لا غلطان مازن انت اصلاً سقطت من نظري جان لازم تتعرف تتصرف ويايه صح متتعامل هيج من قبل وايدك والضرب لو العياط لو الرزايل ولا مره عرفت تتعامل ويايه بهدوء حتى يوم معترفت بحبك اليه جان بعد ليله وزواجك لتجي تذب الصوج بيه كل الصوج منك لتصير هسه روميو براسي لو صدوك تحبني مدمرني تحاول تستوعب گميه الالم الي بداخلي انت اخر شخص انطي عذر لان تعرف عقدتي من الرياجيل وبسبب عادل شسوه بيه جان المفروض من عرفت تكون اعقل وارزن بلتعامل وتتقرب مني شويه شويه
مازن : انتي منطيتيني مجال
ودق : شنو المجال الي انطي اذا انت بس گتلك مااريدك رحت ركض اتزوجت وانت متأكد من جوابي لتسوي روحك المخدوع المضروب بوري مني اني موعدتك بشى ولا انت حاولت ولا تعبت نفسك حتى تكسبني غير الضرب والاهانه والعياط عندك تدري هذا الولد شسوه
مازن : لتجيبين طاريه
ودق : بس رفضته حاول بكل الطرق يتقرب وبهدوءوبقيت رافضته ومتنازل وتمسك ليوم مااجيت وبقيت تعيط
مازن : وانتي حبيتي مو
ودق : لك افهمنيداكولك الفرق بينك وبينه
مازن : تحلمين تتزوجيه وهو ولا غيره
ودق : مااريد اتزوج بس ابتعد عني رجاءاً وخليني اكمل گليتي
مازن : روحي كملي وعيوني عليج واني اعرف شون اكسر خشمج
ودق : خله وطلع واني حيل اختنكت من تصرفه وخفت لطارق يجي للكليه ويخرب الاول والتالي ركضت فوك من يوم الي صار واني متصلت بنور ومن تخابر مااجاوبها دكيت خطيه مباشره شالته وسلمت وسألتها عليه كالت حال الضيم حاله من يوم رجوعه من العماره والتحق رغم مجاز من خنكته
نور انطيني رقمه
واخذته ودكيت عليه
طارق : الوو تفضل
هلو طارق اني ودق
طارق : ااااااخ ياگلبي شونج ياروح طارق گلبي نار عليج وممصدك خابرتي شكد توسلت بنور تنطيني رقمج مقبلت كالت محلفتها متنطي وسكتت مردت اخرب العلاقه بينكم
ودق : اسمعني طارق ورجاءاً افهمني زين وبديت احجيله على وضعي
طارق : يعني شنو مااشوفج ولا اسمع صوتج
ودق : اترجاك ياابن الناس ابتعد عني شفت بسبب خطوبتك نهه عليه وجان ضيعت گليتي
طارق : المطلوب شنو مني
ودق : ابتعد عني وعيش حياتك اني ماافيدك ومن زمان گتلك ماافيدك والله يرزقك بت الحلال
طارق : اني مراح اتقرب منج مو خوفاً منهم بس حتى ليأذوج وخاصه همه لازميج من ايدج التوجعج بدراستج بس لتتوقعين اعوفج اني احبج وابقى انتظرج ويجي يوم وتصيرين اليه ولو اعرف احاول الف مره المهم تصيرين اليه
ودق : لتعب نفسك بعد صارت النهوه
طارق : الي يحب واحد لازم يحارب الدنيا كلها حتى يحصله ومستعد احارب عشيرتج گلها بس تصيرين اليه بس اهم شى انتبهي لنفسج
ودق : الله كريم وشكراً على كولشي
طارق : الله وياج ياروح طارق
سديت التلفون منه واني افكر بكلامه ممكن يحارب الدنيا على مودي مااتوقع كلها فتره ويمل
ثاني يوم رحت لبغداد اوووف واخيراً رجعت لگليتي
جنه :كعدت الصبح وانه گلبي موجر عليه طگيت العبا ورحت للمستوصف واخذت باص وانتظرت سراي ودخلت عليه تفاجأ
مازن : جنه خير بيج شى وشجابچ هنا
جنه : عندي چلمه واريدنك تسمعها
مازن : مو وقتها راسي يوجعني وعندي مراجعين روحي للبيت
جنه : وانه گلبي يوجعني
مازن : ليش شبيج
جنه : شبيه هسه تذكرت تسأل شبيه انه محروكه بحبك وانت محاس بيه انه مره اشوفن زلمتي عاشگ غيري ويحومي عليها وينهي حتى لا تزوج غيره وانه ساكته انه مره اشوفن زلمتي ينوح على بت عمي ومافكر مره وحده يگلي اخاف زعلانه بيج شى ليش هيچ انه ماهمك ليش تحسسني انه حيوانه مااحس ومومهم گلشي تسوي بيه
مازن : شبيج جنه شجاج
جنه : شجاني لهاي الدرجه ماتشوف رويحتك شعملت بيه لهاي الدرجه وصلت ادوس عليه ومادير وجهك تشوفني عايشه لو ميته
مازن : اعرف بيج ضايجه وزعلانه وحقج بس اني
جنه : انت شنهي مازن انت شنهي دمرتني ودمرت ودق انت ماتعرف شتريد انه ماجيت وضربتك على يدك تزوجني ماحسبت حساب يجي يوم ودق تزوج شنهي تريد گلشي الك اذا انه مااعجبك وماطايقني المن ظال وياي طلكني
مازن : انت من كل عقلچ
جنه : ليش انه ظل عقل عندي شوف حالك شعملت دمرت رويحتي دمعتي من يوم ماتزوجتك مانشفت زعلت ابوي الي رباك حتى ودق التحبها راح تضيع مستقبلها عبن شنهي والله مارضت بيك چا هسه تحارب على حبها وين جنت وهي چدامك اذا انت ماتتحمل غيرك يكضها ليش تزوجت ليش ماانتظرتها ليش مانهيت عليها گبل زواجنا ليش ماوكفت چدام الكل وحچيت هاي البت ليه ماارضى تزوج غيري
مازن : انتي مراح تفهميني واكيد شايفتني واحد اناني وموخوش رجال
جنه : لا انه دومي اشوفنك احسن زلمه انه حبيتك وانه حديثة وفتحت عيني عليك واشوفنك احسن الوادم گلها عبن هادئ وعقلگ جبير وفاهم انت عاشگها وماتعرف تصرف تشبچ ناس بناس لا تصور بهاي سوالفك راح تحبك ودق گلبها رافضك لو مو تنهي عليها
تدري شى انه رحتلها وطلبت منها تقبل بيك وراضيه تنزل مره عليه تعرف شگالت
مازن : رحتيلها ليش وشون تتصرفين بكيفچ
جنه : اشوفنگ مثل السمچه المزوهره وتلوب عليها ومااطيق الچلمه مني گلت اخطبها ليك وابرد نارك عسى تحس بيه وترضى عليه تعرف شگالت
مازن : شگالت
جنه : لو يصبوه ذهب ماارضى بيه لو اخر زلمه بلدنيا انت ياابن عمي خسرت يوم ماتزوجت وعفتها وحيدها انه مو هينه علي اشوفن زلمتي هيچ بس انه بشر وتعبت وحيلي وياگ راح انه اريدن تطلگني
مازن : تعالي جنه اكعدي گبالي واسمعيني زين
جنه : كعدت سولف اسمعك
مازن : اني اعرف كعد اجرحج وأذيتج وقهرتج هوايه ويايه والله ممتقصد وانتي غاليه عندي وحبابه وحلوه ومابيج اي قصور
جنه : انه اعرفن انه مره زينه وحبابه ومامقصره وياك بس ماتحبني
مازن : لا ليش احبج انتي زوجتي
جنه :مايفيد مازن انه وياك طريقنا مسدود وانت تشوف ابوي شون غضبان عليك وماراضي وطردك وانه رضيت بگلشي دستني اكثر من مره صرت علچ بحلگ النسوان گلها تكول زلمه جنه وابن عمها مايحبها ويريد بت عادل الجبيره ونهى عليها انت قللت من قيمتي جدام الوادم گلها وانه ماارضى بت الشيخ حامد مالها كرامه طلگني يبن عمي انه مااصلح اكون مريتك
مازن : واني مااطلكچ
جنه : چا انت لاترحم ولاتخلي رحمه الله تنزل تريدها گلها انه ودق ورضا ابوي وشغلك وكلشي الدنيا ماتنطي گلشي يمازن وكلشي اله ثمنه لا تطمع لتخسر گلشي وترد ندمان
مازن : انتي هسه حامل وتعبانه ومااريد ازيدها عليچ
جنه : انه من يوم ماتزوجتك وانه تعبانه اذا شفت يوم حلو وياك اشوفن عشره مر گلبي مابي مجال انلچم هواي
مازن : ارجعي للبيت والله كريم
جنه : عوف ودق بحالها گلها بالجبر والغصب اله الحب اسألني انه حرت شسويت حتى اخليك تحبني وهاي نتيجتها ماحصلت بس المرار ضلت يمك العافيه يمازن
عفته وطلعت ورديت للبيت
مرت الايام واني اشوف طارق من بعيد كل شهر مترك عاده جيته بس هلمره يوكف مسافه حيل بعيده يشوفني ويروح ونور ابد متجيب طاريه بس احسها متأذايه عليه حتى اني بديت انقهر عليه گلت بگلبي يجي يوم ويمل ومرت الاشهر وانه اروح لدوامي وايوته هم اداوم والحلوو كل يوميه جايها عريس من الگليه وتطردهم تموت ضحك من يجون تضوج وتكول عبالك بس اني بلكليه لحد مابيوم تفاجأت طابه وبيدها الحلقه عزه ولج هاي شنوو ومنين
أيه : شوفي اني مليت تكول بس اني بلكليه الي يجي يصارح والي يخطب والي يتغزل تكول كاعدين بسوك اتفقت ويه جمانه هاي البنيه الگتلچ عليها
ودق : اي شبيهه
أيه : ابن عمها صايغ وانطيتها شهريتي وجابتلي حلقه وطشيتها بلكليه انخطبت
ودق : عزه العزاج صدوك تحجين
أيه : اي والله حتى اخلص وهاج لابستها وافتر
ودق : بله مصارت قسمتج ويه ابراهيم شون
أيه : مصارت مااصير لغيره المهم هسه الطلاب گلها درت انخطبت والبنات من يسألون شسمه خطيبج اكلهم ابراهيم هلمره الفضوليات يردن صور الخطوبه گتلهم عدهم فاتحه ومسويت خطوبه لبسنا الحلقات بلكاظم
ودق : هههههههه خرب والله صايره لوتيه بس ماما اذا عرفت تكسرج تكسر
أيه : متعرف بس انتي الزمي لسانج كدامها وكولشي ميصير
الله يستر
خلصنا امتحانات نهايه السنه ورجعنا للعماره واثنينا ناجحين ومكيفات وطايرين جنه بشهر السابع وبطنها جبيره وشكلها حلوو ويضحك ودوم حاطيها بنصنا ونضحك وياها واحنا كاعدين جان تعيط
جنه : الحكولي ولكم وليدي راح ينزل
ودق : من الخبصه معرفنا شنسوي وركض ماما وعمه احلام خابرو مازن وشفته بعد ٦ اشهر مشايفته ولا اعرف اي خبر عنه بس اعرف لحد هسه عمو مرجعه للبيت
بقينا بخوف وقلق
يمامه : رحنا للمستشفى اول مره اشوف حامد هيج خايف جان يرجف على جنه لزمت ايده وگتله
راح تصير جد واحلى جد بلدنيا
حامد : انه خايف عليها يمامه هاي جنتي واول فرحتي وشفتي الدكتوره تكول گلبها ضعيف وخايف تطلع على امها واخسرها
يمامه : لا ياستار ان شاء الله مابيها شى لتخاف گلبي تاخرو ساعه ونص والقلق اگلنه شفت مازن يرجف وخاف بس واكف بعيد عن حامد ميتقرب بس اباوع بعيونه لهفه على عمه بس يخاف يتقرب ليفشله اصلاً اثنينهم واحد محتاج الثاني
وطلعت الدكتوره مبروك اجاكم ولد سبيعي
حامد : والبت
الدكتوره : بًخٌــُيّر بس شويه تعبانه ليضل بالكم بس يفك البنج ترجع طبيعيه
احلام : كلللللوش بالخير يمه مازن
يمامه : شفت مازن ركض على عمه وحامد هم حضنه ضل مازن يبوس بحامد حتى على رجله نزل وخطيه حامد كومه بجه الكل ويكوله انت ابويه والله شاهد ايامي مره بدونك لان متحجي ويايه
حامد : انه احبنك عبن انت وليدي وقطعه من رويحتي وغضبي عليك مااريدن اشوفنك مسودن وماتعرف تصرف انت عاقل رد لمازن القديم الثگيل انه اريدن ارد افتخر بيك
مازن : ارجع لعيونك ارجع والله
احلام : شسمون الوليد
مازن : حامد اسمي حامد على اسم ابوي
يمامه : حسيت الدمعه راح توكع من عينه اوف شكد حنين هذا الرجال لخاطر إٱللـِْﷻـِْﮭﮧ ومن شال حفيده ومقبل مازن اله حامد يكبر بأذن الطفل ويوزع بلفلوس ويرجع ليوره صدوك من كالو اعز الولد ولد الولد
وثاني يوم الذبايح والهلاهل ملت المنطقه كلها
ودق : ركضنا اني وايه على جنه من رجعت ثاني يوم
ودق : الف مبروك گلبي
أيه : ولج خبله صرتي ام اثكلي بعد وشاورتها ولتتصنطين
جنه : الله يبارك بعمرچن وهاا مااجوزن خيه يمشي بدمي
ودق : ههههههه اي والله ويمعوده عوفيها خليها تسمع لعد منو يجيبلنا الاخبار شسوين سوي حياتي المهم نسمع كولشي
ودااضحك شفت مازن
مبروك
مازن : شكراً
ودار وجهه عفته وطلعت مااريد جنه تركز ويايه خطيه خليها بفرحتها
وره اسبوعين جنت هستوني مكمله صلاه المغرب وداانزل سمعت صوت مازن ايه فتحت الباب اله وجان تصيحني مردت اشوفه بس ايه كالت جاي عليج
نزلت وشفت وجهه ميتفسر هذا شبيه
هلو مازن
مازن : هلو ودق
ودق : خير صاير شى
مازن : اجاني البارحه طارق للعياده
ودق : شنو طارق وشجابه
مازن : كلمه وحده تقبلين بطارق
ودق : بشنو اقبل مداافتهم
مازن : يصير زوجج
يتبع .....