سجينة الروح

part 18

سجينة الروح
للكاتبة Reem
البارت الثامن عشر

شحچيلك بعد ماضل حچي الينگال
اضن خير الكلام ويــاك مـاقــلـه
لان شما اسولف انته بيه تـلــوم
وعلى ابسط حچايه اتدور الـزلـه
مو هيچ العشك احسبها مره وشوف
وخل گلبك يـدلك انته لـتـدلـــه
راح تشوف زين وتعرف الموضوع
اليعشك صدگ مـــــايجرح بخله
ممنون على جرحك هذا حضي وياك
وشكرآ عـالــحزن ولآه والـعلـه

يمامه : رحت اجيب مي لأيه رجعت للغرفه ملكيتها تخبلت بنتي وين كمت اركض بالبيت مثل المخبله ومااشوف غير ابراهيم ينزل يركض ويعيط گلب البيت بالعياط وطلعت عمتي وفضيله واحلام على صوته
شبيك ابراهيم
ابراهيم : ايه شمرت نفسها من السطح
يمامه : لطمت على صدري يمه بنتي وركضت وياه لبره البيت وعياطنا اخذ الدنيا والكل تركض
حامد : شنهي هذا العياط ياستار واركض واشوفن يمامه وابراهيم يركضون
يمامه : طلعت واشوف بنتي غركانه بدمها يعني ليش مكتوب عليه العذاب منظر بنتي يكسر گلب الكافر شمرت روحي عليها يمه ايه بنتي الحكوني ياناس راحت بنتي من ايدي واملخ بشعري حتى الربطه نزعتها من حلات روحي
لج ايه اكعدي يمه لاتحركين گلب امج عليج
حامد : ابراهيم اركض جيب السياره ناخذها للمستشفى
يمامه : راحت بنتي ماتت يامستشفى
حامد : بيها نفس على كيفج ويه نفسج
يمامه : يمه ايه ليش ياماما تأذيني اذا صار بيج شى اموت والله
الحجية جميله: يبوو راحت البت يبوو تسودنا وعلي يبوو يلطام وجهج جميله
فضيلة : يمه على كيفج لتتخربطين
الحجية جميله: عساني بالموت ولج هاي بنت المرحوم هاي عزيزه گلبي ايه حبوبه ليش هيج تأذينه
ابراهيم : يله بويه نشيلها شغلت السياره
يمامه : اجي وياكم
حامد : وين تولين وهذا حالج
يمامه : بنتي كاعد تموت وانت حاير بحالي تره والله هسه اشمر نفسي جوه السياره اذا مأخذتوني وياكم
حامد : فضيله استريها ويله امشينا تعال ابراهيم نشيلها
يمامه : سوده بوجهي اباوع على بنتي الي جانت جنها بطه وكل الدم بوجه والحسن والضحكه متفارك وجهه تالي اشوفه اصفر والنفس كوه اتجره وغركانه بدمها
مدداشوف ورجلي ترجف كعدوها بحضني
بسرعه دخيلكم بنتي راح تروح من ايدي
ابراهيم : اسوق مثل المخبل مااريدنها تموت چا اذا ماتت اموتن وراها
حامد : استر يارب دخيلك ياابا الحسن احضرنا البت راح تروح من ادينا
يمامه : امسح بوجهه والدم مغطي واشم بيها يمه اخذو روحج واخذو فرحتج ياحبيبه امج اخذو زهره شبابج گتلو كولشي بيج
بيه ولا بيج بعمري ولا بعمرج دخيلك ربي هاي يتيمه واليتم ماله حوبه عندك مو اليتيم عزيز عليك لتوجع گلبي بنتي ماعدها اذيه والله طفله هيه مااريدها تموت هي امانتك بس لتاخذها هسه اخذني بمكانها اخذ كولشي مني راضيه بس عوفها تعيش مشافت شى من عمرها فدوه ابراهيم استعجل ايه دتموت
حامد : مابقى شى ونوصل
اخذنها ونرجف النفس كوه انجره استقبلونا بالسديه واخذوها اشوفها تنكط من كل جهه دم ربي شسوت هلطفله حتى هيج يصير بيها
محسينا غير مباشره ياخذوها للطوارئ وحامد كال مدير المستشفى صديقي وابوه شيخ صديق ابويه
ركضنا بيها واني حسيت شى حار براسي مديت ايدي اذني طكت دم مسحتها متهميت عساني اموت المهم بنتي تصير زينه
مازن : نزلت اركض خير شصاير
الحجية جميله: يمه بروح ابوك اخذنا وراهم
مازن : شصار جده عمه فضيله فهميني شصار
فضيلة : ايه شمرت نفسها من السطح ومانعرف ماتت عٌاًشُـت حامد خذاها ويه ابراهيم وركضو بيها للمستشفى يمه مازن خذنا ليهم گلبنا نار ونرجف
مازن : سترك ربي وين جانت امها عنها من شمرت نفسها
الحجية جميله: چا انه اعرف ويه تولي المصخمه عايفه بنيتها وتالي تثغب عليها من يصيبها شى يمه يله بسرعه امشينا وراهم انه گليبي راح يوگف من الرجيف عليها
مازن : حضرو نفسكم راح ابدل بسرعه
ورحنا نركض للمستشفى بهذا المستشفى عندي معارف اصدقاء هوايه اطباء ركضت على طبيبه نسائيه اخت صديقي وشاطره بشغلها بسبب وضع ايه الحرج اكيد راح نتعرض للتساؤلات اني اعرف ابوي حامد وابراهيم من كثر خوفهم نسوا وضع ايه الاستثنائي واكيد راح راح يثير الشك والطبيب المشرف على حالتها مراح يسكت ركض على الطبيبه وصلت الحجيه وعمه فضيله دخلتهم واني رحت على قسم الطبيبه
وسلمت عليها وفهمتها وضع ايه رغم كنت محرج حيل بس مابليد حيله
الدكتوره : دكتور مازن انت تعرف البنيه اليوم مغتصبيها شون مجبتها النا او اقلها وديتها دكتوره نسائيه امينه او انت اتخذت الاجراءالمناسب لازم يتم فحصها واعطائها ابره جرعة علاجية وقائيه واقراص لمنع الحمل وضعها خطر وفوكاها عايفيها تنتحر
مازن : الصراحه دكتوره اليوم كله نركض منا ومنا مثل المخابيل دربنا معرفنا لان تعرفين بهيج حاله ندخل بمشاكل واحنا مردنا احد يعرف
بس هاي اجرائات ضروريه دكتور على كلاً راح اروح اشوف منو طبيبها وانصق ويااه الوضع وان شاء الله تكوم بالسلامه
مازن : بسبب صداقه ابويه حامد بمدير المستشفى اتكتمو على الخبر واختار المدير اطباء اثنين امناء يشرفون على حالتها ومن ضمنهم الدكتور ه رجاء اخت صديقي
الدكتور : المريضه حالتها خطره كسور بالايد والرجل وارتجاج حاد بالدماغ ونزف داخلي حاولنا نسيطر على النزف بس المريضه حالتها جداً خطره ادعولها
حامد : بس الدكتور انطانه وضع ايه ومااحسن غير يمامه توكع من طولها ولا ايد ولا رجل
فز گلبي ويه وگعتها وتخبلت عليها
الدكتور : صيحولي الممرضات يشيلوها حتى نفحصها احتمال ضغطها بسرعه
حامد : انه اشيلنا انتظر الممرضات واعوفنها هيج مدده وشلتها وانه مسودن وگل اعضاي ترجف عليها واركض بيها
فحصوها وضغطها ٢٠ على ١٢ جان جلطتت
اباوع منا ايه تموت وگلبي نار عليها ومنا طيرتي متمدده وجان خسرتها
وين انطي وجهي محسيت بروحي غير اروحن لامي وفضيله ومازن اوصيهم على ايه ورديت ليها وهي مدده وانطوها ابره منوم وخافض للضغط اباوع عليها وهي نايمه وجهه اصفر وخدودها كلها ملخه بيها اثر اضافيرها بيوم وليله انگلب حالها الله يعينها مو هين الجرى
صفنت چا انه ليش ماعندي حظ گلت درت بمرار گلبي وحمل السنين راح وخلص وراح ارد اعيش براحه گلي الزمن لا مااعوفنك مرتاح
تمنيت بيوم تحس بيه يمامه واحجيلها واشكيلها على حالي وترد لحضني وتحبني واجاني الي كسر گلشي مااعرفن حالي وياها شون يصير ومنا فضيله اذا عرفت شكللها
الدنيا گلها افترت وطاحت على راسي ورجع الضيم والقهر لگلبي چا هي كوه الماعنده حظ يظل طول عمره طايح حظه
اعدل شيلتها مااريدن شعره منها تطلع والطبيب يطب ويطلع يشوف حالتها بعز ماانه مقهور عليها وعلى ايه گلبي يرجف عليها واغار عليها من گلشي
يمامه : فتحت عيني لكيت حامد يعدل بربطتي على كيفه وعيونه كلهم قلق طفرت ايه شصار بيها حامد
حامد : على كيفج ويه نفسج چا محد راح يموتني غير فزاتج تدرين چان انجلطتي على كيفج
يمامه : ابجي واحجي احجي بنتي شصار منها
حامد : بعدها على حطتها وكاعدين ندعي الله يرحم بحالها وحالنا
يمامه : اريد اشوفها وشلعت المغذي من ايدي
حامد : شبيج تسودنتي شوف ايدج تنزف
يمامه : انه گلبي ينزف ياايدي بنتي كاعد تموت طبني مرض اريد اشوفها
حامد : تعالي وحطيت ايدي على مكان النزف واجت السستر وحطت ليها بلاستر حتى ماتنزف وركضت بسرعه ماتندل دربها من البجي
عمه فدوه شصار منها
الحجية جميله: بيد ربج هو اعلم بحالها وحالنا ويعرف بحرگه گلبنا عليها قادر يرحم بحالنا ويردها لينا اكعدي ادعي والزمي قران واقري انت امها ودعوتج مستجابه
حامد : مازن اخذ حبوبتك وعمتك وارجع للبيت اني وابراهيم ويمامه هنا وجودكم ماله داعي وحبوبتك تعبت
الحجية جميله: چا تريدني ارد والبت هيج ومااعرفن حالها مااردن لو تنگلب السما على الكاع انه الوبن واريدن ادخل ليها بس هذا الدكتور مايقبل چا عاط علينا انه لو بصحتي چاكسرت العوجيه على راسه شون يمنعنا منها
حامد : يمه هي بالانعاش ممنوع الدخول والزلمه يسوي واجبه خلف إٱللـِْﷻـِْﮭﮧ عليه
الحجية جميله: چا انه حبوبتها شنهي مكعدني هنا غير ادخل يمها اقرا على راسها احصنها ادعي ليها
مازن : جده ميصير ادخلين والدعاء بكل مكان امشي نرجع للبيت وهناك اقري قران وادعي كولشي سوي انتي تعبتي وحالتج متتحمل
الحجية جميله: مابي شى لا گل شوي تعبانه وتعبانه شنهي مابي جني صل (قويه) واقوى منك ومنكم گلكم بس بطلو مني لا اتسودن عليكم تره انه طاك جبدي منكم
حامد : يمه رحمه لأبوي ردي للبيت چا عيني عليج على البت على يمامه مايصير هيج
الحجية جميله: انت حير بطيرتك ومالك شغل بيه چا هو گلمن يحود النار لكرصته انه اربي وهي تاخذ على الجاهز امده حظي
حامد : مازن اخذ حبوبتك وعمتك يله يمه اسمعي كلام لاتوجعين گلبي وحگ عالي ظال شوي واطك
الحجية جميله: تعاي يمه جميله اخذيني تسودن الولد علي وانتي انتبهي على بتج لاتغفلين حطي عقلج براسج كل ماتعوفيها البت توكع بمصيبه
فضيلة : يمه ابراهيم ماترد ترتاح وراك روحه لبغداد مابقى للفجر كلها ساعتين
ابراهيم : يمه مااروحن لبغداد لحد مااطمن على ايه
فضيلة : لاتخبلني انت مهدد والوادم تدور عليك انه ماينفعني احد اذا صار عليك شى ايه يمها امها وابوك وحبوبتك وكلها انه منو عندي اذا صار بيك شى
ابراهيم : ميصير يمه لاتخافين بس ادعي تكوم بالسلامه
فضيلة : لزمته من جتفه وكتله
يمه الي بالك شيله ماتفيدك لاتكسر گلبي عليك وتكسر بختك انه اعرف گلبك مشلوع عليها بس ماتفيدك واستر على نفسك وروح لبغداد
ابراهيم : مو وكت هذا الحچي بس ترد لينا گله يهون
فضيلة : يبن بطني لاتنسى شصار لاتضيع گلشي بنيته
ابراهيم : شصار يمه شنو قصدج
فضيلة : انه مو غبيه اعرفن البت مكسوره واليوم حالها وحالكم كله يكول هيج انه ساكته عبن لاتكبر الشغله ومنتظر حبوبتك تگلي چا انه اكبر واتعب واربي وظهري مكسور تالي تطيح المصيبه يركبوها لولدي
لا وحگ الرضا اگلبها چا انت وحيدي واريدن افرح بيك مو اصخمنك
ابراهيم : الله كريم بس هسه لاتحجين وادعيلها تكوم سالمه
فضيلة : انه احبنها لأيه وليدي بس بعد الجرى ماتفيدك
ابراهيم : انه ميت عليها وگلبنا نار وامي حايره شون اريد وحده مكسوره هي قابل بكيفها حظها المسكينه الله اعلم شون حالي عليها وعلى ساعه گلبي يوكف من الخوف
طلعت اشرب چكاير والدموع بعيني اريد اشوفها مااكدر اصبر شون ادخل عليها شون
حامد : كومي يمامه ارتاحي لاتكعدين بالكاع
يمامه : كاعده بالكاع وايدي على راسي وابجي رفعت راسي
كله منكم انتم السبب الي كاعد يصير بيه وبناتي منكم
حامد : اسگتي حسج عالي لاتنسين نفسج احنا بالمستشفى والوادم تروح وترد
يمامه : هذا الهامكم الناس وكلامهم واني طز بيه وبناتي المهم الناس شحصلت من الناس هاي بنتي بين الحياه والموت بسبب ناس زباله متخاف الله ولازم نسكت ومناخذ حقها والله شنو حتى ليروح مستقبلها ولتصير علج بحلكهم ليش هو بقى مستقبل بقت حياه الها طفله راحت تشتري ترجع مغتصبيها
حامد : كافي حسج مااهيسه تره اردج للبيت خليني مااتعبج انه مقدر وضعج بس اسكتي وعدنا بيت نحجي بيه
يمامه : يابيت من كل عقلك ارجع وياك لذاك البيت
حامد : كافي اكلچ لاتسودنيني وارجعج سحول للبيت اسگتي
يمامه : بقيت ساكته واني نار بصدري اريد اعيط اريد املخ حامد واهله والناس كلها روحي من روحي مخنوكه وابجي وادعي الله مياخذ ذنب عادل بنته
ودق : كعدت من النوم سمعت هوسه وعياط بس بهذا البيت تعلمنا على هيج اصوات عادي دوم لو طلق لو عياط وصياح
بس باوعت لا ايه ولا ماما كمشت الساعه شفتها ساعه ٣ الفجر وين راحو
طلعت وجان اشوف احلام كاعده وبيدها القران دورت عليهم ماكو
اكولج عمه وين ماما وايه
احلام : هاااا راحو للمستشفى
ودق : شنوو شبيهم وكمت ارجف كله ولا ماما او وحده من خواتي مااتحمل يصيربيهم شى
احلام : لا هيچ البت تعبت صخنت وركضو بيها وهيه هسه زينه ردي لحجرتج ونامي وراج دوام باجر
ودق : شون انام وماما وايه بالمستشفى ودااحجي واشوف هاي المسمومه فرحه تنزل تتمخطر كبر اي والله شكلج ينكط سم شكد اكرهه
فرحه : خاله ليش مكتيلها هي مو اختها ليش تضمين عليها قابل طفله
احلام : وجه المصايب ادخلي لحجرتج ولا توجعين راسنا وشعندج كاعده روحي انخمدي تفترين علينا جنج الشمر
ودق : شكو شصاير احجو
احلام : ودق ادخلي نامي ومالج دخل بيها
فرحه : اختج انتحرت
ودق : لطمت على وجهي عزه شنوو انتحرت شنو
احلام : لج انتي ماتجوزين اله اسحلنج مراح الحلال (حضيره الحيوانات ) واخلي الحلال كله يدوس عليج
انه گلبي وجر منج
فرحه : ليش نضم عليها لازم تعرف اختها شبيهه اني مسويت شى حتى تصيرين عصبيه خاله
احلام : يا وخلخاله بگلبج من ساعده السوده الجيتي بيها چا احنه ناقصنا طلايب شگول عليك يبن عمي من تزوجت هاي الطركاعه خلي اسكت احسن
ودق : كمت ابجي واعيط ايه حبيبتي ليش هيج سويتي شجاج ياروح اختج وكعدت بالكاع ابجي
احلام : كومي يمه لاتكدرين (تضوجين) نفسج وادعيلها ربج كريم
ودق : عمه ليش سوت هيج ايه لحد هسه مااعرف شنو الي صار بيها الصبح محد يقبل يكولي وهسه انتم تكولون شمرت نفسها من السطح شنو الي صار فهموني اختي كاعد تموت ومااعرف ليش ومنو مأذيها
فرحه : اني اكولج شنو الي صار
احلام : وحگ العباس يافرحه اذا ما كضيتي لسانج لااكطع شعرج شعره شعره وماتعرفين وجهج من گفاج (ظهرج) كضي لسانج صبري خلص منج
ودق : احجي فرحه شبيهه اختي لتخبلوني احجو
فرحه : اخاف احجي واطلع موزينه شو هي تلعب لعب محد حجه وياها والكل تركض وياها وطمطمو شغلتها واني حصره احجي الكل تمد لسانها
ودق : انتي لو تحجين لو تسكتين لا كل شويه تكمزين على راسي
فرحه : عيني اختج لعبو بيها صارت مو بنيه
ودق : شنوو مداافهم شنو لعبو بيها
احلام : لا انه مااسكت بعد شو تعااي
ودق : ومااحس غير احلام تنزل النعال وركض على فرحه وهذيج طفرت تركض بس احلام يمكن عدائه ركضت ركضه ولزمي فرحه من شعرها هذيج شعرها طويل ودوم مفتوح وجان اتجرها من ثالث بايه من الدرج للكاع ودك بالنعال ركضت اريد افكها ماكو كامت احلام مددت فرحه بالكاع ونامت فوكاها ودك بالنعال وين ميوجعها وذيج تعيط وتدفع بأحلام طلعت جنه تركض على صياح امها
احلام : اليوم اله اربيج چا اگلج اسكتي وانتي تعاندين وجه الكطوه جيتي وكل الطلايب اجت وياج چاانه تكسرين چلمتي وتعانديني
ودق : عمه عوفيها راح تموت بيدج
جنه : يمه فدوه گلبج موزين عليه
احلام : هدني عليها مشعوله الصفحه بت الفگر اليوم اكطعنج وهذا الشعر لزمت راسها وركع بالكاع اله اهلسه الج واخليج چنج ديج هراتي مهلوس شعره
فرحه : كومي مني والله اله اكول لحامد من يجي واخلي يطيح حظج ويطردج بالشارع اااااااخ كووومي موتيني
احلام : انه امج يجنه يطردني چا اطمن روحي احسن انتي ياام الرجوله يلتفترين على الزلمه بكد ابوج تخلين حامد يطردني
امشي ام الوصخ
جنه : فدوه يمه كافي گلبج راح يوكف ونسحب بيها اني ودق وهي مجلبه فوكاها ودك بالنعال بأيد والايد الثاني لازمه شعرها كطعته تكطع
ودق : عمه دخيلج البنيه راح تموت بيدج
احلام : يطبها حريشي وموتت اهل البلا اليوم انعل والديها هاي خرابت البيوت عوفني عليها ولجن عوفني
الحجية جميله: ولج احلام تسودنتي كومي من البت
احلام : عمه محد طلع عينها مشعوله الصفحه غيرج
الحجية جميله: حسجن ساعه ٣ الفجر والوادم نايمه شيكولون علينا بيت الشيخ ونسوانه تعاركن الفجر ماتستحن چا انه ماموجوده تلعبن لعب
فرحه : ابجي واحجي والله يمه محجيت شى بس لان وحدي وانتم ماكو اخذتها فرصه حتى تأذيني
مازن : عمه كومي منها شوفي حالها مكطعتها صدوك كذب كولي ياالله انتي الجبيره ميصير هيج
جنه : يمه اخاف على گلبج ليتعب كومي دخيلج
الحجية جميله: لج احلام انه البيه كافي تره اذبن حرگت گلبي بيج كومي تسودنتي
احلام : جان الزم شعرها حيل وركعت راسها بالكاع وكمت منها وشعرها نصه بيدي هلسته تهلس
فرحه : ابجي والله بس يجي حامد اني اعرف شكول اله يعني اني مظلومه بهذا البيت حصره احجي تغلطون عليه واني مكلت شى باطل ولا كذبت ودق سألتني وجاوبتها
الحجية جميله: شسألتي حبوبه
ودق : اختي شبيها بيبي
الحجية جميله: تعبانه شوي وراحت للمستشفى وچم يرم وترد شنهي بعد الحجي الزايد
ودق : شنو قصدها فرحه اختج لعبو بيها
الحجية جميله: فرحه شنهي هذا الحجي
فرحه : يمه قابل هي صغيره ومتعرف ردت افهمها حال اختها
الحجية جميله: واحد صخم وجهج وگلج تگليلها ولي لحجرتج من ولت روحج وماردت
فرحه : اليوم كلكم عليه هو هذا الفقير مينراد بهذا الوكت
احلام : يمه يعياره النسوان چا انتي فقيره انتي راضعه ويه ابليس وتصخمتي واجيتي حتى تصخمين حياتنا
فرحه : صعدت ابجي اني مستحيل ابقى بهيج وضع لازم اسوي حل وانتهز شغله ايه لمصلحتي اكيد راح تعلك بينهم وحامد يلتهي بهاي الشغله ويأخر شغلتي هاي احسن فرصه اليه لازم اسوي المستحيل حتى اصير زوجته ااااخ شعري تكطع وجسمي يون عليه من انكسرت ايدج تكول ايد رجال مو مره كل جسمي يحركني ويموتني من الالم انه الج احلام اذا مااطيح حظج واخلص هذا البيت من الزبايل الي بيه مااسمى فرحه
ودق : رجعت لغرفتي ابجي واني كولشي ممفتهمه شبيها اختي وشنو حجي فرحه شتقصد اندك الباب طلعت وشفت مازن
مازن : تعالي ودق اريد احجي وياج
ودق : طلعت ويااه للصاله وكعدت وهو كعد قريب مني
مازن : اسمعي انتي موصغيره ولازم تعرفين شصار حتى توكفين بجانب امج واختج
لان همه هاي الايام حيل محتاجين الج
ودق : شصار عفيه ليش احس الكل يعرف اله اني
مازن : الصراحه الموضوع جبير ولازم تتقبلين الموضوع ولتنهارين اني المفروض مااكولج بس دااشوف هاي فرحه مراح تجوز اله تكولج ومااريد تصدمج وامج حالياً ملتهيه لهذا الافضل اني ابلغج
ودق : تره راح يوكف گلبي احجي
مازن : ايه تعرضت للاغتصاب
ودق : شنوو لا اكيد تتشاقه لا اختي مابيها شى مجرد وكعت وتأذت
مازن : على كيفج لترجفين
ودق : كمت اطك سن بسن وارجف لا كعد تكذب عليه اختي مابيها شى وهسه راح اطب الصبح هيه وماما وتضحك وبيدها علاكه الحلويات وتاكل وتضحك وتكول اهم شى كرشي
مازن : نزلت راسي مااعرف الي سويته صح من بلغتها لو المفروض مااكولها بس من شفت هاي تلوب عليها مردت تنصدم منها احنا نفهمها احسن كامت ترجف وتفرك ايدك بأيد وتبجي واحس اعصاب راسها كلها طلعت من العصبيه
ودق : احجي كول جذب كول اختي مابيها شى كوول
مازن : مع الاسف هذا الي صار والي اغتصبوها اخذو عقابهم بس اليوم جان صعب كولش وايه متحملته لهذا حاولت الانتحار
ودق : وكفت على حيلي وهنا فقدت واعيط واغلط كله منكم انتم السبب دمرتونا الله ياخذكم اختي صغيره تبجي على بطنها من وراكم كامت تبجي على شبابها الي ضاع قبل متشوفه ولكم بيدكم موتو اختي انتم الي اغتصبتوها واغتصبتونا من شلعتونا من مكانه وجبتونا هنا غصب عنا وجبرتونا نعيش عيشه منريدها لكم ليش هيج ياظلمه
مازن : لزمتها من ايدها تحجي وتلطم فقدت وتعيط
احلام : اجيت اركض انه وجنه وفضيله واحنا نسمع ودق بس تعيط شبيج يمه شجرالج
جنه : ودق شبيج
ودق : شيصير بعد بيه اختي الي ادمرت لو امي الي صارت خدامه الكم لواني الي فقدت الرغبه بالحياه دمرتونا مكافي ذاك مات وعافنا مكسورين وتحت رحمتكم مكافي لعبتو بحالنا وسحلتونا اني اكرهكم كولكم
فضيلة : خلف الله عليج بنيتي بس ماالومج گلبج مجروح على كيفج على نفسج
مازن : كافي الزمي لسانج هو مو صوجج صوجي اني عبالي واعيه وجبيره واحجيلج مردتج تتأذين وتسمعين من غير ناس
ودق : لتخاف واعيه اكثر منك واعقل منك وبعد شسون حتى تأذونا مكافي الله ينتقم منكم الله لايوفقكم اكرهكم انتم احقر ناس وجان مااحس غير راشدي طبع على گلبي حسيته موو على خدي الراشدي بكل قوه بس قوته صارت بروحي موو بخدي ضربني مازن حيل
مازن : اذا تجاوزتي بعد وروح ابويه اطيح حظج لتشوفين ساكتين الج ومتحملين لسانج الطويل تنجبين وتحترمين واذا ممتعلمه الاحترام اعلمه الج
احلام : يمه دخيلك هي بياحال بسگ من البت
وجان تجي جميله تمشي وبيدها عكازتها والايد الثانيه السبحه مالتها
الحجية جميله: عوفي يكسر راسها هاي ماتكض لسانها اله نكطعه ليها يله
احلام : تعاي ودق روحي لحجرتج ميخالف اخيج الجبير
ودق : شفت هذا الراشدي اله ادفعك ثمنه
مازن : ومو بس اضربج راشدي لا روح ابويه الغالي وترابه اكص راسج اذا سمعتج تجاوزتي بعد احنا انطيناج اكبر من حجمج ومبين غلطت من حجيتلج جان المفروض اعوفج شماته لفرحه وغيرها بس كلت بت عمي ومو هين عليه اشوفها متأذايه
الحجية جميله: عوفها يمه هاي وحده حكرص (وكحه) ماتنرد اله بالضرب خلي نخلص من ايه وترد سالمه والي حساب وياها ويه امها الماعرفت تربيها
ودق : اني امي مربيتني احسن تربيه بس انتي المعرفتي تربين ابنج وخليتي يلعب بحالنا وبحال بنات العالم وهسه طلعت حوبه العالم بس بأفقر وحده بأيه الي صوت الورد ينسمع وصوتها مينسمع هذا ابنج عادل دمرنا وانتي السبب تربيتج لتحجين على امي
مازن : لج كافي لسانج
الحجية جميله: تعالي ليه اليوم احرگ الخلفتج
وجان تشيل العوجيه تريد تضربني ولزمها مازن
جده عوفيها بعدين حسابها
الحجية جميله: لاتكضني اليوم احرك سلفه سلفها هاي البت لسانها اطول منها
فضيلة : يمه صگد جذب شبيكم توليتو على البت غير متأذايه على اختها
تعالي يمه ودق روحي لحجرتج وكافي تره حسنه اليوم الديره كلها سمعته
احلام : يله ودق اسمعي كلام عمتج وروحي
ودق : رحت لغرفتي ابجي واني منهاره واتذكر شكل ايه عطت بكل صوت هز البيت هز ااااااااااااااااه ليش بس احنا نتأذه والله مالنا ذنب فوك ماصرنا لعبه الهم يدمر مستقبلنا ليش ياربي بس الفقير يتأذه ليش ماعدنا حظ ويه الناس صوجي اني شون عفتها تروح وحدها وكمت اضرب على وجهي صوجي صخم الله وجهي ليش عفتج يبعد اختج اني المفروض احميج دوم اتعارك وياج واكولج لتصيرين ضعيفه صيري سباعيه وهاي تاليها وكعت بيج سوده عليه شون حالج وذوله الجلاب يأذوج ااااااااه ياربي هذا المكتوب النه ليش احنا مو يتامه اما اليتيم فلا تقهر شو شفنا القهر بكل انواعه شوكت ترحمنا بعدنا صغار واتعزينا وتصخمنا اختي ضاعت ضاعت والطم على وجهي
مازن : اسمع حجيها لان صوتها عالي وعيطتها عاليه انمرد گلبي عليها هسه اني هم مدري شبيه فقدت اعصابي عليها جان لازم اتحمل لسانها لان انهارت على اختها گلبي حيل اذاني حسيت بخنكه واني اسمع عيطتها لو ما العيبه الا ادخل عليها واحضنها واضمها بصدري واكولها اني يمج والله بعد مااعوفج بس شون وانه وياها من نتشاوف مثل الرويسيه دوم نتعارك بس گلبي يعشقها بس مااتحمل لسانها واعصابها
لج كافي اسكتي ااااه مالتها تيزاب على صدري تنزل
صحت عمه فضيله فدوه عمه ادخلي الها هاي راح تموت من القهر والبجي
فضيلة : اي عمه دااسمعها رايحه ليها لايضل بالك
ودخلت عليها عمه
تعالي بنيتي لتبجين
ودق : عمه فدوه اريد اروح لماما وايه فدوه
فضيلة : انوديج والله بس تصير زينه ايه من عيوني بيدي اخذج بس اسگتي موو مردتي گلبي
ودق : بقيت بحضن عمه فضيله ابجي وراها تعبت ونمت ومرحت حتى للمدرسه كرهت كولشي شون اروح وايوته موو ويايه ومااعرف شصار منها كل الي عرفته بعدها فاقده الوعي
يمامه : بقيت الليل كله ابجي وابراهيم كاعد مثلي بنهايه الممر بالكاع وعيونه تحجي حسيت ابراهيم اله مشاعر خاصه لأيه لان عيونه حمره مبين يبجي والي سواه وتضحيته تأكد شكي جان حامد مثل الاسد المجروح لا يكدر يحميني ولا يكدر يعوفني عيوني كلها نظرات ملامه اله احسه يتهزم من عيووني وبنفس الوقت يراقب حركتي
صار اربع ايام وايه على نفس الوضع بنتي بالانعاش بين الحياه والموت ونسبه ان تعيش كلش ضعيفه ويوم بعد يوم تقل فرصه ان تعيش بديت انهار انتهى صبري حتى دعاء كمت ماادعي من كميه القهر والالم الي كاعد احسه صرت بركان اي واحد يتقرب منه ينفجر العطوه مال ابراهيم تمددت وابراهيم ويايه سكن المستشفى اما حامد يركض بين الشيوخ والناس حتى يفض سالفه ابراهيم واهل السفله مصرين يردون راس ابراهيم لافصل ولا فلوس اله ابراهيم
وخطيه فضيله منهاره وخاصه من عرفت السبب موضوع ايه
فضيلة : ليش يمه هيج هاي تاليها تضحين بولدي هاي المرجيه منج حجيه ليش چي يتيم وانته ياخوي هذا وليدك تضحي بيه چا تكول ولدي ولدي تذبه بالنار لو ولد فاضل جان ذبيتهم لو لان ولد المكروده فضيله الي لا تهش ولا تنش وحيدها گلت اضحي بيه
حامد : فضيله شنهي هذا الحجي صايره تخربطين هذا ابراهيم روحي ولدي الثالث چا انه المن مأمن حلالي وبيتي وكلشي بأيده چا غير ابني
فضيلة : يشتغل فلاح عندك تگرب عليه چا مثل ولد فاضل كبرتهم واحسن الگليات دخلو
الحجية جميله: لهنا وبسچ چا منهو النشف بلعومه ويحجي ويه ابراهيم وتوسل حتى يكمل مو خاله حتى گال ليه الكاع الك بس لاتترك الدراسه وهو تمسك بالشغل وانتي شجعتي لاتذبين الصوج بينا انتي وابراهيم ماقبلتو يكمل
فضيلة : عوفج يمه من الدراسه من گلشي ليش وليدي ليش هذا وحيدي هذا عوجيتي يمه للزمن انه طاح حظي والدنيا جارت عليه لاتاخذون ولدي مني
حامد : ابنج رجال وحافظ على عرضه وافدي بروحي وروح ابوي مااخلي شعره تكضه لاتخافين
فضيلة : لا اخافن ياخوي هذا وحيدي اسمع واسمعي حجيه وليدي اذا صار عليه شى خطيته برگبتكم ومااسامحكم ليوم الدين
وعفتهم وطلعت
الحجية جميله: يمه حميد الوليد عينك عليه هاي اخيتك اذا صار شى على ولدها تموت
حامد : لاتخافين يمه ابراهيم ولدي وامانه برگبتي هذا زلمتكم بعدي هو ومازن
الحجية جميله: چا ومنير
حامد : منير طار وفار روحه محامله انطي مشاكل وطلايب وركض وره النسوان نسخه عادل هذا يمه
الحجية جميله: وشبيه المرحوم لاتحجي عليه ماارضاها منك يحميد
حامد : لااحجي ولا اعيد ولا ازيد اروحن لشغلي وللمستشفى
الحجية جميله: روح يبعد امك وعينك على البت هاي امها مسودنه لاتتركها
يمامه : جنت كاعده الوب باب غرفه ايه واباوع عليها من بعيد وگلبي نار اجه حامد
حامد : ماتردين للبيت ترتاحين
يمامه : شرتاح وبنتي هذا حالها عوفني فدوه
حامد : مايصير هيج سمعتي كلام الطبيب البت احتمال اطول ايام واسابيع ويجوز اشهر تبقين هيج
يمامه : لو العمر كله ابقى مكابلتها وكاعده
حامد : وتالي ويه عنادج
يمامه : حامد اريد اخذ ايه ونروح لبغداد
حامد : انتي صگد تحجين
يمامه : اي البنيه هنا مكعد تتحسن واكو هوايه مستشفيات زينه هناك مامستعده اخسر بنتي لازم اخذها واروح
حامد : البت تصحى وناخذها هناك للعلاج هسه ماتكدر وضعها خطر
يمامه : نسأل الطبيب ونشوف
وسألنا وكال اذا متصحى منكدر نحركها لان وضعها خطر واي حركه خطره على حياتها بديت اتعب وتتأزم حالتي واني مكابلتها وكاعده
خابرتني ودق تبجي هي وهمسه يردون يشوفوني اني واختهم كلت ارجع ساعه اشوفهن واسبح وابدل وارجع الها ابراهيم باقي وخابرت فضيله خطيه اجتي تركض
رجعت طبيت للبيت وكارهه كولشي اجوني البنات بحضني يبجون شبيكم ماما
ودق : ماما ايه شون صارت
يمامه : تحت رحمه الله ادعيلها بنتي
ودق : خابرت بيبي وجدو يكولون اندك على امج ماكو
شكتيلهم
كتلهم ملتهيه ويه ايه بيها تيفو ومكابلتها وكاعده
يمامه : زين سويتي عفيه اروح اسبح واخذ ملابس وارجع ماما عينج على اختج اريدج مثل ظلها وتقريها اريدج بمكاني ودق وروحي للمدرسه كافي ضيعتي هاي الايام كلها
ودق : مااريد اروح والمدرسه راح اعوفها
يمامه : هي بكيفج اسكتي
ودق : كمت ابجي ماما اني عرفت كولشي عن حاله ايه
يمامه : شنوً وكفت على حيلي منو كلج
ودق : مازن والكل يعرف بالبيت
يمامه : اني هنا تخبلت احس صرت شون اللبوه المجروحه وادافع عن اخر ماتبقى من حياتها وكمت اعيط طلع حامد وجميله احلام وحتى فرحه نزلت وكفت على الدرج ومازن
يعني الله واكبر متكدرون اله تأذوني شسويت الكم مكافي المشموره بالمستشفى ضاعت وانتم السبب تالي تريدون تاذون ذني مكدرتو تسكتون اله تحطموهن يعني شنو هذا الظلم
الحجية جميله: حسچ مااهيسه چنك وحده كيوليه وتعيط چا مالج رداد اسكتي وانت حميد لطها على حلكها خلي تسكت لا وروح ابوك انعل اهلها
حامد : حسج وتالي وياج وهذا الحس العالي اله بيوم اكسر سنونج بحلكج يله اتوبين
يمامه : كافي تهدد شبعت تهديد منك ومن امك شبعت ضيم وقهر منكم
وتعالو كولولي انتم هم الكم عين وتحجون
حامد : لج يمامه اسگتي تره صبري اله حدود
يمامه : كتلي ياشيخ تعالي عوفي بغداد لان اخاف على بنات اخويه سحلتني مثل الچلبه واتزوجتني غصب ويايه بناتي وكلت ميخالف المهم هنه كبال عيني گتلك منكدر نعيش هناك دكيت رجل انت وامك اله هنا هاي موو العماره مو ديرتكم شون يصير بنتي هيج وانتم ساكتين مو بغداد موزينه وخفتو عليهن ليش ماحميتوهن هنا
احلام : قضاء وقدر ياخيه گلشي بيد ربج
حامد : كافي ادخلي كملي حتى اوديج للمستشفى
يمامه : لا خلي تفهمني عمتي الي دوم تتهمني بأن اني مهمله وتذب الصوج بيه وتكول شون مره تربي ٣ بنات وحدهن
ربيتهن وجنت محاوطتهن بعيوني جنت اوديهن واجيبهن بأيدي ومابيوم خليت الهوا يلمس شعره منهن وهنا كتلكم خلي اني اوديهن كلتو لا شون عيب من الناس تاكل وجهنا شون مرت الشيخ تودي بناتها ولد عمهن همه يودوهن وينهم هاك بنتي انذبحت ولا واحد منكم جان وياهن هاي الحمايه يلشيخ هاي الحمايه يلشيخه هذا حجيكم ونفخكم وبس احنا وبس وتالي بنتي كدامكم وبديرتكم تنكسر يلتحفظون اعراض الناس عرضكم انداس وكدامكم
حامد : لج گافي راح اضربج كافي اسگتي
انه اعرفن كل چلمه منها صح بس انه اتأذه منه احسه نار تسعر بروحي بس مابيدي حظي الي أذى البت ومن دون بنات الديره كلها يصير بيها حتى يكطع اخر خيط يربطني بطيرتي
يمامه : شسكت وانتم وعدتوني بالحمايه وتالي ظلمتوني وظلمتو بناتي اني بعد ماابقى هنا واخذ بناتي وارجع واريد اشوف منو بيكم يفتح حلكه
وجان يلزمني حامد حيييل من ايدي ولواها مو انتي بكيفج چا ماكو زلمه وراج
وجان يدك التلفون عليه ودفعني وفتح الخط واسمع عيطت فضيله الحك حامد ايه

اريد يوصل هذا البارت ل ٥٠ تعليق حتى انزللكم البارت الجديد بليل