على صراط امي

٦

مساء الورد

على صراط امي
الجزء السادس

فتحت خط وسكتت..حجه هو بنبرة هادئة ..
يا حيا الله وطن ..كيف الحال..
هنا بلعت لساني اريد انطق ماكو بس اتنفس حيل..
علة صوته اكثر ..ترى اني مو يمج شىوية خففي الخجل..
أ..أ.. وياك ..
اريدج طول العمر وياي ..
سكتت واحس متت خجل واحتريت وبقيت اهفي بيدي..
ها هم سكتي ..يابة هالاتصال صار شهور اعدله
وانت ساكتة ..
احم مم لا بس عفية شوية محرجة ع كيفك وياي..
وغلاتج كلش ع كيفي بس انت خجولة ..
ممم ...

اي يالخجولة اريد احجي وسمعيني ..
ها اي اسمع ..
يبت الناس لا ابالغ ولا اغالي ..بس من شفتج وانت
طيرتي تفكيري
صح قبل عندي علاقات واكون وياج صريح
بس تنتهي بوقت قليل لان ماكو تفاهم
ولان اساسها مو الحب القوي لهذا تموت وتنهدم
على اقل سبب...
بس بيوم شفتج لكيت ضالتي وكلت احصلها
لو مهما كان الثمن غالي ..

جذبتيني من اول لحظة نزلتي بيها من السيارة
خصلات شعرج الذهب انطبعت ببالي
ابتسامتج العفوية تصرفاتج حركاتج ماشفت بيها
وحدة ملوتة لو وكحة
رغم شفتج بلبس جريء ومكياج بس هذا كله
مو هو الخلاني انسطر بيج
روحج التخبل وسنيناتج الي جنها سنون طفل
وانت تضكين وعيونج تلمع
هذا الخلاني اكول حر لكيت الشي التدور عليه
والي مالكيته قبل ...

ويوم عن يوم تملكين كلبي وتترسخين ببالي
وردت اجي واخطبج
بس مو قبل مااتأكد من مشاعرج تجاهي
شنو جوابج وشنو رأيج بالحجيته
وو...بيه..؟
طبعا جنت اسمعه واتمعن بكل كلمة يكولها
متمكن بكلامه ونبرة كلامه راكزه
خلاني استمعله باهتمام ...
جاوبته بعد ماجمعت الكلام قدر امكانيتي..

بصراحة كلامك قنعني وفهمت قصدك
بس خايفة ..
من شنو؟
من علاء لان هو سالني قبل فترة شنو علاقتي بيك..
اوف اي الغلط مني ..لان سمعني سالتي عمتي عليج
بيوم الطحتي كلش خفت عليج
وكتله خابرهم شوف بت عمتك عيب ..
كال لا اودي اختها واشوفها
ويوم ثاني دزيت امي سالت عنج ..

بس بعدها سالت عمتي هيج بحجة اتطمن
وهم اسال عنج واعرف اخبارج
بس عمتي حست بيه
لان تكررت اسالتي عنج وبيوم كاعد اسولف وياها
وهي كلتلي حر صيدتك صعبة
كتلها مستعدلها ومستعد انطيها عمري مهر
بوقتها اجه علاء وسامعنا
هو مابين كدامنا بس لاحظت تصرفاته اختلف
وكانه يريد يجرجرني بالحجي
وعمتي نبهتني كالت من يوم كتله خابرهم واهتميت
هو انتبه وحط السالفة بباله
دربالك لا تجيب الشبهة للبنية ..

لهذا كلت احاجيج واشوف رايج اذا مقتنعة بيه
اخطبج لان ماريد علاء يعرف بينا شي
وتتاثر خوتنا لان احنا ربينا سوا وعاده اكثر من اخوي ..
ها ايي بس يعني مو هسه ..
شوكت؟
خل امتحن واخذ النتيجة يلا لان تعرف سنة اخيرة
ويحتاجلها تركيز ومو مال خطوبة هسه...
اي حقج صح يعني بشهر السادس تخلصون؟
اي ..
يلا نصبر ميخالف ..

بس ماكتيلي شنو رايج بيه؟
يعني انت شخص محترم ورزن واهم شي عندي بالرجل
هيجي صفات ..حجيتها وسكتت شوي..
تنهد وكال اي فدوة لعينج ليش تسكتين ..
امم مادري هه..
فدوة للخجل يلا ميخالف شوية شوية تتعودين
مااعتقج بعد الا اموع ذانج باتصالاتي..

هههه ..بس مو كل وقت اكدر ..
لان بعدني ماحجيت لاختي ولا امي..
دخيلك ربي شعدنا سلفة ..
هههه لا بس لازم يعرفون اصلا اختي بنفس الغرفة وياي
وامي متعودة كلشي احجيلها..
تنهد وكال..اختج احجيلها بس لتكليلها منو
وامج لتحجين هسه ابداً..
بس ماعرف اضم عليها..
وطن لخاطري اعتبري سر وامنتج عليه
خليها لوقت الخطوبة كلش احسن ..
اوكي عادي مثل ماتريد..
اي عفية عليج ..

زين هسه انة اترخص لازم اروح ..
خوش روحي وخلي جهازج يمج ومن تلكين فرصة انطيني خبر ..
اي ..يلا مع السلامة
مع السلامة يالغالية...

سديته وخليت الفون ع قلبي وصفنت بالسكف
شنو هالاحساس الجديد الي تغلغل بيه
منو جان يستهزء بالحب واليحبون
هسه قبل كم يوم اكول مدري شلون يحبون
طلعت انة غاطسة بالاعماق وماادري
اه شكد حلوو بس كون تكمل وينا على خير...

اخذتني الاحلام والتفكير بالمستقبل ونمت
كعدت المغرب
لكيت يمامة تصلي ..تمطيت ومن خلصت حاجيتها..
ليش ماكعدتيني ولج.؟
ماعدنج شي باجر ابقي مرتاحة شوراج..
ايي بس هواي نمت ..حجيتها وفتحت الفون اتصفح بي..
يلا كومي صلي مدامج كعدتي
حتى نروح نحضر عشا..

ها اي بس عندي سالفة وياج..
امبينة عندج سالفة ..منو هذا بلة ؟
شنو منو حجيتها وفتحت عيوني..
امبينة حبابة عاشكة بس ياترى يستاهل
لو هم مابيهم واحد يستاهل..
اف يمامة شبيج كسرتي جناحاتي..
لا عيني ست فراشة سولفي اسمعج ام جناحات..

ههه واحد حباب ومحترم وعاقل ..
رفعت حاجبها وكالت ..ماريد اخطبه ..شنو اسمه
يا مرحلة شيشتغل ؟ ابن منو؟
حكيت راسي ..امم خريج سجون هههه..
نطت عيونها شنووو؟
لج اتشاقى قصدي خريج مو طالب ..
طاح حظج صدفتيني ..خريج شنو؟
صيدلة بغداد..ويداوم بأبن غزوان ..
يعني بصرة وراح لبغداد؟
اي اي ..زين شلون عرفتي؟
اجه للمعهد وي اخو وشافني..
اخو يداوم عدكم؟
اي بس غير قسم..

صفنت شوية كالت واثقة منه؟؟
اي وفاتحني بالخطوبة بس كتله ورا الامتحانات..
تنهدت ودنكت ..رجعت باوعتلي بخيبة ..ديربالج وطونة صيري ذكية..
باستني بكتفي وكامت..
متت قهر عليها ..الله ياخذه الاذاها ولا يشوفه الراحة
هي الي مثلها تنترك..

رحت توضيت وصليت وبعدها رحت وياها نسوي عشا
امي يمنا بالمطبخ وبابا هم كعد يمنا
وكملنا العشا وكعدنا بعدين كلنا سوا مثل كل يوم ...

ومن بعد هاليوم تعودت وتعلقت بحر كلش
يومي نصه اخلصه اسولف وياه
لو رسائل لو اتصال ..
يمامة دائما تحذرني ..وامي حست بيه واكثر من مرة
تحاول تفتح الموضوع
اخر شي قبل لتخلص امتحاناتي بيومين
فتحت الموضوع كتلها ..

اي بس استحيت احجيلج ..
وليش تستحين ماما شنو علمتكم انة؟
اعرف بس استحي..
ماكو خجل بين ام وبتها ..انت العشتي بنص حشاي
تستحين مني ؟

تعاي نامي هنا واحجيلي اريد اعرف شنو الغلط
الي خلاج تضمين الموضوع..
هي كاعدة ع القنفة وانة تمددت ع رجلها وبقت تلعب
بشعري..
اي بلة سولفي مدام ابوج مو هنا ..
حجيتلها نفس الحجيته ليمامة بس ماسالتني عن اسمه
ومنطقتهم كتلها منطقة مختلفة
وكتلها ورا الامتحانات راح يجي يخطبني
بطلب مني التاجيل
حسيتها ارتاحت شوية وكلتلي شوفيني صورته ماعندج؟
كتلها لا اخاف احفظها..
ونصحتني هواي كالت ماريد شي ينضم
ووعدتها مااضم شي بعد..

بيومها بالليل خابرت حر ..
طبعا يمامة يومية تنام وتحط سماعة
بذانها واصلا تنام من وكت..
بس بيومها راحت لغرفة عابد لان محتاجة اللابتوب ..
وانة بقيت بغرفتنا وكعدت اخابره
كتله ماما سالتني وحجيتلها...
شحجيتي بالضبط؟؟وشكالت؟
حجه بنبرة شخص مفزوع..وامبين جان متمدد وكعد من ارتفاع النبرة وثباتها..

نفس حجيي وي يمامة وماكالت شي بس نصحتني
وكتلها رح تخطبني ورا الامتحانات
اي عفية عليج ..مابقى شي بعد كم امتحان عندج؟
بس ثنين ..
الله يسهل بس تخلصين نجي..
لا لا حبيبي وين والنتيجة..

صارت نبرته هدوء وبيها بحة..شنو كلتي..
كلت النتيجة..
لا قبلها انت كلتي لا لا وبعد وراها كلمة؟
امم ..
احجي لا تسكتين موتيني بهالخجل
شكد صارلنا نتخابر ونفس خجلج ولج كون الزمج
الا اطلع الخجل من عيونج..
عزاا شتحجي روح روح ترى مااحب هيجي..
اخ يانار كلبك يا حر مو شيبت من وراج..

ههه وين يبين الشيب شعرك خفيف ..
اي زينته حتى يستعدل للخطوبة تعرفين بعد
امريكي وشعري ماي ..
ههه لا مااحب الاميركان حلاتك وانت مملوح ..
صدك وطني الحلو شعجبك بيه؟يعني شگرا ووجهج
يضوي ..شنو الخلاج تحبين مثلي؟
اسألك انة اول..انت حبيتني لان شكرا؟؟

لا طبعا شما يكون شكلج احبج ..
انة الجذبني شخصج وروحج وهو شي لا ارادي الحب
يعني جان العرس متروس بنات
بس ماطاحت عيني على وحدة ابد وخطفت كلبي
من باوعتلج حسيت انت حركتي شي بيه
يعني شنو تحرك شلون؟
ههه بريئة مو بيدج ..غير حركتي احساسي يا
كل غلاتي انت ..
اي صح حتى انه تحرك احساسي ولاول مرة احط بالي
وي شاب..

منيلي شاب شايب..
ليش شكد عمرك؟
٢٨ سنة ..
لا بعدك شباب و..تخبل ..
يابعد كل عمري شكد احبج واحسج تصعدين وي النفس..
امم ..
مااتغزل بعد بس نطقي ههه ..
اي اي ع كيفك ..ههه
صدك حر نسيت اكلك...
انة حجيتها وانفتح الباب ذبيت الفون من ايدي
بفزع وانا اشوف حسين اجه تجاهي متعصب...

للحكاية بقية
بقلم شقراء (قمر كانون)

بس ملاحظة صغيرة حبيباتي هواي طلبو مني حسابي بالفيس
سويت حساب بأسم شقراء كانون
وسويت كروب اسمه
قصص شقراء(قمر كانون)
راح انشر بي القصص السابقة وهاي القصة
بس كتبو بالبحث يطلع يمكم واهلا بالجميع 😘😘

وبلا زحمة وسوو وياكم متابعة للكاتبة نسرين الجبوري
هذا حسابها
Nsreen_94