سجينة الروح

البارت السابع والثلاثون

سجينة الروح
للكاتبة Reem
البارت السابع والثلاثون

خربت والسعف كض الجمر بيده
وعليه گربت منيته الچانت ابعيده ..
خربت من بقه الراعي بحلاله يحوف
ومضيف السلف ضل يذم بجاويده ..
لاتهتم اذا كثرت اسيوف اعداك
السنبل يغله اذا كثرت حواصيده ..
وماينطي النخل عثگه لهذاك وهاذ
النخل يطي العثك بس الصواعيده ..
والبروحه صگر ميدنك لاي طير
يدنك راسه بس عالطير اليصيده ..
واذا محني الظهر ينحني الشايل خير
الغصن ماينحني لو ما عناگيده ..
ولأن اسود كلب ينهاب كام الليل
اجاه كل النجم واتعلك بجيده ..

ودق : حاولت ماما تلزمه واني وايه نبجي ونتوسل مفاد هو طويل وضخم مكدرنا دفعنا بقوته حيل وراح هناك واحنا نركض وراه ماما اصلاً حافيه وجان يدفر الباب ويصير منير ومازن كدامنا

حامد : لك منير تعال ليه اليوم احركك ساقط
منير : شبيك يابه شصار
مازن : يابه على كيفك ونزل السلاح خلي نفتهم
الحجية جميله : شنهي يحامد تهدى يمه شجرالك دخيلك يـاعلي ولك يمه تسودنت
حامد : انت شون تكض ودق ماستحيت ماگلت هاي عرضي محسوبه عليه هاي امانه عندي ياعار احنه انلوم بلوادم الكضت ايه وانت تطلع مثلهم
مازن : يابه دخيلك فهمنا شصار
منير : كذابه يابه ماكو هيج شى ولا وصلت يمها
ودق : لتجذب حاولت تتحارش بيه وبيومها لو ما راكضه منك وضربتك وانهزمت الله اعلم شصار
الحجية جميله: من عزه العزاك طركاعه ولفت علينه
حامد : اليوم ماابقيك عايش گله ولا الشرف ياعديم الشرف
منير : يابه دخيلك نزل السلاح وشتريد اني حاظر بس نزله
مازن : يابه على كيفك خلي نفتهم ونزل السلاح ومنير انطيحلك حظه بس نزل السلاح
يمامه :حامد ابوس ايدك لتضربه
حامد : انه گسرت ظهري عليكم دوم اكولن ذوله حزام ظهري انه الله مارزقني بوليد گبل جيه علاوي واكولن انتم بمچاني تراعون حرمه الوادم وتراعون الله بيهم وگلشي تحملت واكولن يجي يوم وتعبي مايضيع واليوم يمنير انت ضيعت تعبي
منير : هاي حقيره يابه لتصدكها كله علمود تخرب زواجي من ايه
فضيلة : اسمع كلام ابن اخوك خويه هاي ًحيه وتريد تهدم بيتنا دومها من اجت لهنا وهيه تكرهنا ومااطيق چلمه من عدنا وين جانت المزيونه ماتحجت گبل

حامد : انت احجي مازن مو انت نفسك اجيت وگتلي على اخوك وشفت رگبته
مازن : اي يابه وبيومها اخذناه سحل الها ونكرت
فضيلة : چا هسه تذكرت عبن عرس اختها گلها چم يوم وحبت تخرب فرحتهم
حامد : بسچ فضيله لا وحگ هو علي حتى انتي اضربج
الحجية جميله: يمه تعوذ من الشيطان لاتنسى هذا ولدك
حامد : چا يمه شكسر گلبي ونفسي غير لان ولدي
منير : يا ودق اذا الزمج اله اشكج نصين
حامد : وتهدد فوكاها
ودق : جان البيت عياط وصياح وكلها نار ومنحس غير مازن جيت على عمو حامد حتى بس ياخذ السلاح منه تقاوه ويه عموو وطلعت الطلقه وكع منير جانت لحظات بس مثل الاعصار عياط على دم على هوسه بس انتبهت الكاع كلها دم وأيه مكنبصه بالكاع وحاطه ايدها على اذنها ومغمضه عيونها وتبجي وتصرخ مباشره عفت كولشي وركضت عليها ايه رغم طابت من الي صار بس بعده منظر الدم يرعبها وخاصه من كتل ابراهيم الحقراء فوكاها ودمهم صار عليها كامت كل متشوف دم تنهار وتتذكر الموقف حضنتها حيل واحجي باذنها

ايوته افتحي عيونج
أيه : مات مو مات
ودق : لتخافين هذا عار ميموت افتحي عيوونج فتحتهم على كيف جان منير واكع بلكاع والطلقه بجتفه والكل داير مدايره ويعيطون اله عمو حامد يباوع عليه بحقد وگلهم بصوت عالي اخذوه للمستشفى واله الچيله (الطلقه) الثانيه بكصته

شاله مازن وخابر على حسان واجوي ركض اخذوه بيبي تلطم على راسها واحلام تبجي هيه وجنه بس ميكدرون يطلعون صوت وحتى ماما جانت تبجي جان عمه فضيله تعيط
فضيلة : الله لاينطيجن هجمتن بيتنا لعبتن لعب بزلمنا بس الطلايب وراجن من يوم مالفيتن علينا ماشفنا خير
حامد : بسچ فضيله حسچ ماهيسه جنچ نسيتي نفسج
فضيلة : چا هيج يخوي حكك دافعن عليهن عبن مريتك وبنياتها مو كالوها الزلمه اخو مرته
ودق : هيه حجت هيج ومنشوف غير عمو حامد يجرها لعمه من شعرها كطعها تكطع ذب حركته كلها بيها وهي ولا تسكت دك غلط وحجي علينا وهيه جوه ايده وبيبي والبنات يردون يفكون ايد عموو ماكو ملخها تملخ
حامد : ولج انه اخو مرتي انه انطيتچ عين وكبرت راسج تجاوزين علي اليوم احركچ واطلع حليب امي منچ
فضيلة : كله من مريتك هجامه البيوت لفت علينا ودمرتنا لابقت وليداتنا واحد هج والثاني راد يموت الثالث شراح يصير بيه من وراهن ذني مرض وطاحن علينا

حامد : ولج كضي لسانج لجن ماكو غيرج مرض لعبتي بلگل لعب وانه اكولن فقيره ومهضومه طلعتي ساس البله وانه راح اربيج وهذا عمرج واذا ماتجرين عدل اطيح حظچ وكل يوم انومچ بگتله واكعدج بكتله لحد مااموتج واخلص من شرج
يبووو يمه لحكيلي
الحجية جميله: يمه حميد اترك البت يمه دخيلك بروح ابوك بروح جدك اتركها راح تموت بيدك
حامد : انه اريدنها تموت هاي بتج طالعه عينها وتجاوز وتلاسن ومايوكف بعينها احد لج انه حامد توكفين بوجهي وتراددين چلبه اليوم ماابقي عظمه صاحيه بيج
ودق : لزم عمه كطعها تكطع ملخها لا بقى شعر بيها وكل ادفر حتى اني انقهرت عليها كوه عمه وماما وبيبي كدرو يوخروه منها بعد ما وجهه انترس دم من الضرب

حامد : اسمعن والحچي للكل الي ماتجر عدل وماتسمع الچلمه وحسها يعلى بلبيت مااضربها لا اذبحها بيدي وهذا للكل طلعتنها من ماعونها وانه اعرفن شون اخليجن تمشن على مسطره والي تحيد بيجن يوم واحد تتشاهد احسنلها
الحجية جميله: بسگ يمه لا يصعد ضغط وتموت
حامد : مااموت اله وانه مربيهن كلهن وانتي يمامه اخذي بنياتج ويله للبيت مااريد اشوفجن ملمومات هنا يله
يمامه : يله بنات اخذتهن وطلعنا نركض جان الوضع مو مال ابقى ولا اجاوب اصلاً كافي الي صار اول مدخلنا كعدت البنات گبالي

يمامه : اسمعوني زين كل الي مرينا بيه بكفه والي جاي بكفه ثانيه اني مااعرف وين الخلل بيه وبتربيتي الكم لو بلظروف الي انحطيت بيها لو بأختياراتي وتصرفاتي بس اني بالي مقصرت وياجن بشى دوم احاول اوفر الكم احسن حياه وابعدكم عن اي شى يأذيكم ومع الاسف فشلت
ودق : لا ماما والله انتي ممقصره ولا فشلتي
يمامه : خليني اكمل يجوز كل الي صار انطيكم عذر اتضمون عليه وكولشي متحجون لان اكو بنات ومراهقات وميعرفن يتصرفن بس بعد مااقبل ابد منكم اي غلطه ابد متضمون عليه لو من البدايه حاجين الي صار مجان وصلنا لهنا تدرون لو عمكم اليوم جايه الطلقه وموته لمنير جان شصار صح هو غلط ويستاهل بس حامد مراح يتحمل يشوف ابن اخوه ميت وبأيده لو مهما كان الظرف بسبب سكوتجن انخطبتي ياايه وابراهيم ادمر وبسبب سكوتجن اليوم جان منير مات وعمكم جان انتهى والعائله كلها تروح بلرجلين لهذا من اليوم الي تضم عليه شى وروح ابويه اطيح حظها هسه كبرتن واي تصرف محسوب عليجن هذا الهوا محسوب وانتم شفتو شون حامد كطعها لفضيله لعبالكم تسكت واحتمال حتى راح تگلب بيبيتكم عليكم بنظر الكل هسه احنا مذنبات بكولشي صار وسمعتن كلام فضيله لهذا مااريد اي غلطه يصير شى تجون تكولولي لومهما جان صعب واي شى يصير تتصرفن بهدوء لحد متعدي هاي الايام على خير

أيه : ماما تتوقعين منير يطلكني
يمامه : كولشي مااكدر اتوقع لان كلنا بعدنا بحاله من الصدمه ومنير بالذات منكدر نحزر شنو بعقله اذا تحبوني وتخافون عليه لتضمون شى حتى اعرف اتصرف انتم بناتي ونقطه ضعفي لتخلوهم يأذوني بيكم
ودق : لتخافين ماما منضم شى
أيه : هذا هو ماما كولشي منضم
يمامه : تعالو بحضني اوووف ياربي دخيلك امانتك بناتي كولشي مااريد بس الستر وراحه البال تعبت وهنه هم تعبن يله لغرفكم ومن يجي عمكم لتنزلون مااريد تنفتح مواضيع هو هسه اعصابه مدمره ومااريد يذب حرگته بيكم

مازن : اخذنا منير للمستشفى وهناك صديقي ومدير الجناح هم اعرفه وطلعو الطلقه والحمدلله ممتأذي حيل
الدكتور : لازم نبلغ
مازن : لتبلغ ولا شى هيه طلقه تايهه واجت بيه شمدرينا منو ضاربها وتعرف المنطقه اشكال بيها بين اعراس وفواتح وفصول ودوم سالفه الطلقات موجوده

الدكتور : بس هذا اجراء روتيني لازم يصير ماطول طلقه
حسان : دكتور كلك طلقه تايهه وين نلكاه لتعب نفسك وادوخها بس عالجني زين وخلف الله عليك
الدكتور : هاي لخاطر دكتور مازن واله المفروض ابلغ
مازن : شكراً دكتور مقصرت
خلي اليوم يبات حتى اخاف تصير مضاعفات شى والحمدلله على سلامته
إٱللـِْﷻـِْﮭﮧ يسلمك
حسان : شنهي العمل گلي
مازن : مااعرف عمو الوضع تعبان بلبيت ودكه منير مستحيل ابويه يسامحه عليها  تدري اني هسه من اتذكر ارجف لو بيدي اطب واخنگه واخلص منه
حسان : لازم مايرد البيت تره حامد موجر منه وانت هم بعده مايحچي وياك يعني كملت
مازن : خلي ادخل لمنير واشوفه
هااا صحيت
منير : اااااخ نار بجتفي
مازن :طبك مرض انت تستاهل الطلقه بگلبك مو بجتفك
منير : جاي تتشمت بيه
مازن : لا عبالك اني من حاولت اخذ السلاح من ابويه لخاطر لتموت انت الموت قليل عليك اني اخذت السلاح حتى ليكتلك بيده ويضل العمر كله يتأذه لك سافل بت عمك ليش هيج بايع ومخلص هيج ولاذره اخلاق ولا رجوله يعني كولشي اتوقع منك بس ماتتعدى على بت عمك هاي الي عقلي ميشيلها 
منير : روح منا تره اني تعبان وانت كاعد تغلط عليه شوف حالي وانتم ليش صدكتوها لهاي الحقيره
مازن : انجب واحترم نفسك اصلاً اني بيومها شكيت بيك بالخراميش وكتلك ونكرت وگلبي بقى يلعب وحتى من كالت مسوه شى مصدكتها وبقيت ايام ماانام بس افكر بهذا الموضوع لو مااخاف الله اله هسه اموتك بأيدي

منير : بس خلي اطلع منا واني الها اذا مااندمها
مازن : الزم شعره منها حتى انسى انت اخويه والطلقه هلمره بنص گلبك بس مو من ابويه مني اني اياك توصل يمها
منير : والي سوته ودمرت كولشي وخلت ابويه يكرهني
ودق : هيه مالها ذنب انت السافل ولو جار عدل وممتحارش مجان صار كل هذا

يمامه : بقيت اليوم كله انتظر حامد ومأجه دكيت عليه مجاوب اووف وينك بالي كله يمه بقيت لصلاه الفجر كاعده وهم مأجه حاس بيه وتمنيت اوكف بجانبه مر اليوم وهو ماكو والبنات بس اكلو وصعدو واي خبر مسمعنا بس جنه من اجتي كالت منير زين وطلعوه من المستشفى وراح لبيت حسان
واليوم الثاني على العركه وحامد ماكو بقيت هم انتظره عسى ولعل يجي وصارت بلوحده  دزيتله رساله كتبت بيها
اعرف تعبان لان حاسه بيك جنت قبل اكول هم يجي يوم واحب حامد واوصل وياه لدرجه الاحساس بتعبه وبألمه اليوم تأكدت بان وصلت لمرحله اذا تكول ااااه احسها بنص گلبي تعال بحضن طيرتك دوم تكول اليه انتي راحتي وعلاجي تعال حامد لعلاجك وراحتك طيرتك اليوم هيه تصيحك وتكولك تعال الها انتظرك ياروح يمامه وعمرها

بقيت انتظر وصارت ساعه ٢ بليل أيست وجان اسمع صوت المفتاح طفرت من مكاني وفتحت الباب صار بوجهي باوعت بعيونه التعب شكد شفت حامد مرات يضوج او يتعب بس مثل اليوم مشايفته هيج بعيونه كسره قويه وموبس كسره عين كسرة نفس حضنته بس هو مبادر بلحظن
الله يساعدك
حامد : ويساعدك اريدن اسبح وانام
يمامه : من عيوني رحت حظرت الحمام وملابسه سبح وبقيت كاعده انتظره دخل للغرفه وينشف بشعره وكفت گباله وسحبت الخاولي منه بهدوء وهو بس يباوع بعيوني
تعااال سحبته من ايده وكعدته على الجربايه وبديت اني انشف شعره وهو هادئ بشكل عجيب انقهرت هذا مو حامد الي صوته يهز الدنيا هز شمرت الخاولي وسحبت راسه لصدري وحيل حضنته
بالي كله يمك همزين اجيت
حامد : اريدن انام تعبان
يمامه : تمددت وسحبته بهدوء لحضني وافرك راسه بأطراف اصابيعي وهمست بأذنه حبيبي حبيبي
حامد : امممم
يمامه : احجي لتضم بگلبك كول ليمامتك شبيك
حامد : مابيه لايضل بالج
يمامه : شون ميضل واني اشوفك هيج متأذي احجيلي بداعتي وبداعت علاوي عندك اسمعك وكولشي مااحجي بس طلع الي بگلبك وارتاح

حامد : من يوم مامات فاضل وانه شفت ولده تيتمو حلفت على كبره اكبرهم واسويهم احسن الوادم ودوم اكولن يارب انطيني العمر حتى اوصلهم ومااخلف وعدي ويه اخويه جنت اشوفهم عكازتي بكبري وحتى مااخافن لان ماعندي وليد لان منير ومازن ولدي وحتى ابراهيم دوم اكولن عندي ٣ ولد اشد ظهري بيهم من يسألوني وهمه صغار ودوم وياي مااكولن ولد اخوي لو ابن اختي اكولن ذوله ولدي وانه ابوهم الليل كله اباوع عليهم وهمه نايمين واكولن هم يجي يوم واشوفكم بطولي وتوكفون جاري واتباهه بيكم علمتهم على گلشي الصلاه والصيام وحقوق الوالدين ودوم اكللهم لاتظلمون ولا تبوكون ولا تسبون ولا تتكبرون على الوادم الفقير يصير صاحبكم قبل الغني والمعتاز انطوه گلشي بجيوبكم ولاتنامون وجاركم جوعان ولا تبيعون الخوه بينكم لومهما جرى والفلوس لاتخرب نفوسكم كلها وصخ دنيا وكل الي املكه الكم وعلى قول لسانهم انطيهم وصرت الصديچ گبل الابو   وامشي واعلم واكولن صله الرحم لاتكطعوها حتى الله لايكطع رحمكم ولا تقربون للمحرمات شرب ونسوان وقمار حتى الله يبارك بيكم والحرام لاادخلون بجيبكم ودوم أكد عليهم عرض الوادم امانه برگبتكم لاتدنون على عرض غيركم حتى الله لايعيب بعرضكم انه قصرت بشى يمامه

يمامه : لا ياروح يمامه حشاك من التقصير
حامد : ليش بعد كل هلتعب هيج يطلعون محد بيهم بار الجبير يزامط ويتهدد ويوكف بوجهي وانه ياما وياما حذرته والثاني يتعدى على عرضه انه عندي اهون لو كاتل ولا تدني نفسه على حرمه تعرفين شنهي يعني يتعدى على بت عمه انه مااعرف شون ماكتلته الچيله طلعت بجتفه ليش مارجعت وخلصت عليه تعرفين شنهي انه هسه مثل واحد حط اساس وباع گلشي يملكه وانطه صحته وعمره كله حتى يبني جامع ولمن كمل شافه ملهى موش جامع انه حطيت الاساس بس نتيجة الاساس دمرني انه گلشي كضه وراح من عمري حسيته راح بلا قيمه
تمنيت الوادم كلها تگلي ربيت والنعم ماربيت يحامد بس كسروني يمامه وليداتي والي اكولن يكسرون عيون عدويني كسروني الي

يمامه : لتكول هيج حبيبي مازن روحه بيك وكلها فتره ويرجع لعقله ومنير طيش شباب ومراهقه وهسه كبر واكيد يجي يوم ويحس على غلطه يبقون ولدك ويحبوك بس انت على كيفك ويه نفسك بلحياه كولشي نشوف وهاي اني كدامك كولشي شفت والي مر عليه مو هين وهم اكول  الْحٍمَدٍ للـّہ احسن من غيري ايام صعبه وتمر گلبي الاصعب منها مرت عليك متمر هاي هم
حامد : تعرفين شنهي المهون عليه
يمامه : شنوو
حامد : انتي موجوده
يمامه : اوووف ربي موجوده والله ويمك ومااعوفك بس لتسويها بعد ومن تتعب تبقى وحدك مثل مااذب حمولي عليك وهمي انت هم اريدك وياي هيج
حامد : احضنيني حيل اريدن انام وانسى گلشي
يمامه : حضنته واحسه مثل الطفل المكسور خاطره وخاتل بحضن امه

ودق : صار ١٠ ايام ومنير وحتى مازن مرجعو للبيت واحنا موصلنا هناك ولا تجرأنا نوصل لحد مدز علينا عمو حامد كلنا بس مااخفي الخوف الي بداخلي وبداخل كل وحده من عدنا دخلنا ولكينا بيبي وعمو كاعدين
الحجية جميله: تعالن يمه اكعدن
ودق : شونج بيبي وبستها وخايفه منها لتروح تبدي ترزل ولازم اسكت مااجاوب لان ماما وعمو موجودين
الحجية جميله: هله يمه تعالي ليه ابوسنج
ودق : شويه ارتاحيت من شفت بيبي مزعلانه بلعكس حسيتها مقهوره علينا وتبوس بيها بأشتياق

يمامه : اكو شى حامد صار شى
حامد : اصبري
ودق : كعدنا ونترقب شراح يصير جان يدخل منير وايده مشدوده ومازن وحسان اني اصفريت شراح يصير جان منير ينزل يم ايد عمو يبوس بيها ويتعذر
منير : يابه سامحني لحظه شيطان وصارت
حامد : هاي اللحظه التحجيت بيها چان كلفتك نفسك وعرضك
منير : صحيح والله يابه جنت صغير وطايش وماافتهم
حامد : ١٩ سنه عمرك وصغير وماتفتهم چا شوكت تفهم من يصير عمرك ٩٠
منير : والله يابه ندمان واعتذر وهاي ايدك ابوسها وحتى رجلك بس ارضى عليه
حامد : انه ماارضى ليوم الدين عبن طلعت ناقص وقليل شرف وانه مااحوي ناقص عندي
مازن : يابه الي تريده يجرالك بس لتغضب علينا انت زعلان من عدنا واحنا منرضى بزعلك انت ابويه ومنعرف ابد غيرك ويشهد الله مضكنا طعم النوم براحه من يوم مزعلت علينا
حامد : مايفيد وياكم گلي هسه انت ياحضره الدكتور اذا تقدم زلمه لودق راح تسكت وتبارك الها
ودق : اباوع على مازن وجهه صار دم وسكت
حامد : هااا شو بلعت لسانك
وانت منير اعتذر من بت عمك وبوس راسها
ودق : (بگلبي احجي ) دخيل الله كلشي مااريد بس يبتعد من عدنا تقرب منير وعيونه دم مني وكال اعتذر منج ودق جانت غلطه وهاي راسج ابوسها ومحقوقلج
ودق : سكتت شكول واني احس الكلام مو من گلبه غير هذا منير شنوو تغير بين يوم وليله مستحيل

حامد :أيه بويه
أيه : نعم بابا
حامد : هذا رجلج كدامج تريدين تكملين زواجج منه لو لا
أيه : اصعب سؤال ينسأل اليه وبنفس الوقت صار سنتين منتظرته باوعت على منير وكان بعينه نظره قاتله وكأن ديكول اياج تكولين مااريده واله اذبحج اني جبانه وبهيج مواقف دوم مالي ردت فعل غير السكوت او البجي وهذا الي طيح حظي واذاني اتذكرت ابراهيم وصوته العالي بعرس بشرى من كال

البگلب بلگلب ياام ابراهيم ومايسكن الگلب غيره وتحرم مره تنام بحضني غير الي گلبي يهواها ولو تنام بحضني ويرتاح گلبي لو انام بحضن الگبر
وكلامه هذا يرن بأذني ويحرك نبضات گلبي بقوه
حامد : حسچ مااسمعه بويه تحجي تريدي لو لا
أيه : لا بابا مااريده
منير : شنو مو بكيفج انتي مرتي
حامد : بسگ هم الك عين وحسك يعلى
منير : يابه هاي زوجتي ومستحيل اعوفها
أيه : واني مااريدك ومااريد اتزوجك
حامد : سمعتها زين تطلكها ورجلك فوك راسك
منير : شوف يابه انت ابويه على عيني وراسي بس طلاك مااطلك وهاي مرتي ولو تزوجوها اليه برضاتكم لو اخذها غصب عن الكل
حامد : انجب شنهي غصب لك صگد انت ماتعدل هو ذيل الچلب شيعدله اطلك البت لا مايوكفني عنك هلمره لو مو ترباتي ليك اگتلك واذبك بجول
الحجية جميله: خايبين الله واحد شنهي عزيزه ذابين علينا وتكتلون بينكم لك يمعزه والمصخم الوجهه طلك البت چا شنهي ماتريدك وشنهي حسك يلعلع على حامد چا نسيت نفسك
منير : جده هذا حقي وهاي زوجتي وطلاك مااطلك
الحجية جميله: من كسر راسگ كون حگ ابو حلگ هذا ابوك كون يگلك تذب رويحتك بلنار تذبها موش تگله مااطلك حرام الربى بيك يناقص

حامد : هو بكيفه ماتولي منا اله اطلكها واليوم ماتبات الشغيله لباجر
مازن : يابه على كيفك وانت منير البنيه متريدك طلكها والله يقسملك غيرها الزواج مو غصب وشفتها بنفسها كالت مااريده
منير : كتلكم مااطلك وشسون سوو
ودق : وجان يهد عليه عمو حامد ضربه راشدي ودفره برجله وشال الطبله اله كدامه وركعه بيها بس مصارت بيه لان حسان ومازن وماما وبيبي وكفو كباله والعياط واصل للدنيا كلها وايه من الخوف ختلت ورايه وكفنا على صفحه

حامد : اسمع لك اذا ماطلگتها افصلك من العشيره گلها
حسان : اذكر الله ابو علي شنهي تفصله چا هيه هينه
حامد : اي هينه انه گلبي مورث منه وهو بگل عين وكحه يوكف ومايقبل يطلك
منير : يابه اني اجيت اليوم حتى اعتذر منك وانت تحقني بشغله ودق بس شغله ايه لا اي واحد ماله حق بيها هاي زوجتي واني رايح لبغداد وبس تكمل امتحانات اجي اخذها

حامد : انت زلمه ومن ظهر زلمه وتعال وحگ هو علي اطرك نصين والي ماعملته گبل گم يوم وماكتلتك خلاص اگتلك وانت تقرب عليها واريدن اشوف شون تاخذ البت غصب
مازن : لك اطلع بره طايح الحظ هاي عود اني امشي واوصيك اطلع
منير : طالع وراجع وره متخلص امتحانات وانتي لج لو تموتين مااطلكج وراح تصيرين اليه وبعيني وطلع ويضرب بلباب برجله
أيه : من الخوف كعدت بلكاع ابجي
ودق : اششش اسكتي لتخافين هذا واحد جبان ميكدر
يمامه : ركضت على ايه ماما ايوته لتخافين احنا يمج
أيه : راح يأذيني ماما شون
يمامه : لتخافين گلبي
حامد : كومي بويه منهي يكضچ  وانه اشتم الهوا مايكضج منير اله وانه جوه الكاع
الحجية جميله: اسم الله حميد چا شنهي على كيفك ويه نفسك دهر طرك منير ماتعرف تحجه وحرگت الكل وليت
وانتي يمامه اخذي بنياتج ولي لبيتج وهدي البت لايصير بيها شى وانت حميد تعال ليه اريدنك بشغيله

يمامه : حاظر عمه كومي ايوو يله ودق ساعديني نكوم اختج
رجعنا للبيت وايه مبطلت دموع ماكو ساعه وشويه واجتي قناه رويتر للاخبار ست جنه تنقل الاخبار من قلب الحدث هلمره كعدت وياهن لازم اسمع شصار
جنه : اسمعن خيات جده لزمت ابوي
الحجية جميله: يمه حميد شنهي هاي اعصابك نسيت ذوله وليداتك
حامد : لا يمه مانسيت بس همه نسو انه ابوهم واحدهم لسانه اطول منه
الحجية جميله: مايصير هيج هاي مرته ولازم تكضه وتحجه وياه بعقل وهدوء هذا مسودن وزاهيتله الدنيا ومايعرف عناده وين يوديه
حامد : شنهي اتوسل بيه
الحجية جميله: انه مااكلك توسل بس بلسياسه يمه انت هوست وضربت شنهي الحصلته الوليد عاندك وتحداك وراح البت توكع بيها وتخلصها ضيم بضيم اكعد وياه وفهمه
حامد : يحمد ربه ماكتلته صابر عليه وانه صبري خلص منير اذا تگرب منها ادفنه بصف ابوه
الحجية جميله: خوش خوش تالي عمرك تگتل وليداتك وتشمت الوادم بينا يبعد بيتي تهدى بلرحمن واسكت هسه ومنا لچم شهر الوليد يعگل شگثر دردم بس يرد يمه ويحس على نفسه انه اريدنك رزن چا ويه الوادم گلها رزانه وعگل وتحل الماينحل ويه وليداتك ادور الدم
حامد : انه ماعرفت اربي وضاع تعبي ورباي
الحجية جميله: ماضاع ولا شى شيطان ويفتر علينا واخيتك تريد تبوس راسك سامحها ومازن رجعه تحت جناحك لاتضيع الكل منك يمه ويضيع تعبك گلشي وربك يحله بس لا ترد على سالفه الدم
حامد : اروحن يمه
الحجية جميله: حامد بنيات عادل بنياتك انه اعرف تحبهن وليدات فاضل قطعه من روحك الزم العصا من النص يمه ولاتفلتها انت خيمتنا واذا خيمتنا طاحت احنا انطيح وننداس بلرجلين
حامد : الله كريم ادعيلي حجيه
الحجية جميله: يحرسك ويحميك يبعد رويحتي

ودق : يعني هسه اني مفهمت ايه راح تفصخ لو شنو
جنه : والله خيه انه هذا السمعته بس فضيله عمتجن تلوب جنها ناويه على نيه گشره
أيه : هو اني ناقصه هلمره فضيله عليه اصلاً كل الي كاعد يصير بيه هيه السبب بيه حال الضيم حالي
ودق : ربج كريم شفتي من ساعه لساعه فرج وكتلج من الاول خلي نحجي جان هسه انتي فاصخه ورايحه وخلصانين منه بس اني هم صوجي سمعت كلامج وبقيت انتظر
جنه : چا انه لو منچ اگلبها عاليها سافلها شتنتظرين يحظي
أيه : من الخوف ومتوقعت عمو يوكف هيج ويانا خفت ميصدك
جنه : انتي الشفعلج مازن شاف الي برگبتج واله مايصدكون ابد
ودق : المهم عرفو وهذا منير بس يهدد لتهتمين اله اقري وانجحي وشدي حيلج
أيه : بعد كل هاي المصايب وتريدين اقرا
جنه : چا شنهي لازم ادكين وتركصين عبن راح تخلصين منه گلها چم شهر ويولي لو متزوجته شون اسگتي فضت وفكري بدراستج وفرحينا
ودق : يمعوده هذا سادس مو لعب جهال وصار شكد تنتظرين هاي السنه اقري وان شاء الله مثل متأجل عرسج يلغي اصلاً
أيه : يـِْ♡̨ـِْا رَبّ
جنه : انه اروحن اخاف امي تنشد عليه
ودق : وانتي شونه وضعچ
جنه : على حطت يدچ خيه يوم زين وعشره مايباوع بوجهي
ودق : والى متى تبقين هيج
جنه : هذا حظي وبختي
ودق : والحظ والبخت شعليه سوء تصرف منج
جنه : خيه انه راسي يطگ مابيه محاظره شطولها اروحن لهلي وغير مره نكعد
ودق : روحي اعرف الحجي ميفيد وياچ
جنه : ضلت يمجن العافيه
ودق : وايه إٱللـِْﷻـِْﮭﮧ يعافيج

أيه : الليل كله ابجي تمنيت ابراهيم هنا وينك تعال شوف حالي شصار بيه
ودق رجعت لبغداد واني التهيت بدراستي ويوم بعد يوم والكل ساكت كلمن حاير بهمه
وبيوم كاعد اقرا العصر وباجر امتحان احياء وصعب وراسي يوجعني صعدت ماما عليه
يمامه : هاج امي هاي ودق ادك عليج وتكول مشتاقه الها اخذت التلفون من ماما وعافتني ونزلت مثل كل مره تخابر ودق على تلفون ماما ابقى اسولف وياها ومن اكمل انزل التلفون
لج حقيره وينج صار ٣ ايام ممخابره
ودق : عوفج مني دك عليه ابراهيم
أيه : لزمني گلبي حيل شنوو ابراهيم بيه شى
ودق : وجع على كيفج كتلج دك عليه وسأل عنج بس صوته مو طبيعي وكال شوكت ترحين لأهلج حتى يخابر على تلفوني ويحجي وياج تالي كتله اتأخر يله اروح
أيه : خرب وهسه شلون عفيه
ودق : اسمعي اتفقت ويااه اخابرج ومن ماما تنطيج التلفون اسده ودكي عليه بحجه تحجين ويايه انتي بغرفتج
أيه : اي ومحد يمي بس هو مغير رقمه من زمان ومااعرفه
ودق : يبووو شكد ثوله راح ادزه الج برساله اصبري واتصلي يله باي
أيه : باي ثواني وصلت الرساله كتبت الرقم ويه كل رقم ادكه اسمع نبضه قويه لگلبي دكيت جان يرفضه ماكو ثانيه ودك جسمي يرجف خوف على لهفه فتحت الخط وصوتي كوه يطلع
الوووو وسمعته يحجي بعصبيه وبعياط اريد افتهم منه شى ماكو
أيه : شبيك عفيه ليش تعيط والله مداافهم شى
ابراهيم : انت صدك كطعتي مهر محكمه والشهر الجاي زواجج
أيه : عزه وين اكو هيج شى
ابراهيم : انه اتصلت على امي وكالتلي
أيه : والله لا مصار هذا الشى اصلاً كلت لبابا حامد مااريده ومااتزوجه وهو كال لمنير مستحيل تتزوجها يعني كلها اشهر وغصب عنه يطلكني
ابراهيم تسمعني جنت اسمع انفاسه السريعه وحتى حاسه بدگات گلبه ورجفته
ابراهيم : ايه عليج العباس هيچ گلتي
أيه : شنو متصدگني تعرف بيه مااحلف
ابراهيم : احلفي تره اني راح انجلط مبقى شى واموت بسكته قلبيه من التعب والضيم
أيه : اسم الله والعباس هذا الي صار وحط شى بالك حتى لو بابا اجه وحجه ويايه مره ثانيه راح يكون هذا موقفي ومااغيره وجان يعيط عيطه يمكن بمكان فارغ لان بيه صدى قوي
ابراهيم : لج احبج وحق الله وعرشه وكتبه ورسله اموت عليج
أيه : ههههههه لا اريدها بلعمارچي
ابراهيم : اروحن انه والعماره گلها فدووه لسنونج الي تضحك
أيه : ابراهيم
ابراهيم : يارويحت ابراهيم
أيه : ارجع كافي محتاجتك حيل والايام الجايه اريدك يمي توكف ويايه شفت عمه شسوت لو مامتصل الله اعلم شصار
ابراهيم : امي خبلتني ومكعد ترحمني متعرف من گالت هذا الخبر ردت اذب روحي من التله مدري شون تذكرت ودق
أيه : صدوك منين جبت رقمها
ابراهيم : اخذتها منها اخر مره من نزلت للطوارئ وربج رحم بحالي لان رقمها يمي
أيه : تدري مشتاقه لصوتك كولش همزين عمه هيج كالت حتى تخابر واسمع صوتك يمكن اروح ابوسها لان كذبت عليك
ابراهيم : ههههههه والله اني لو بيدي يوميه اخابرج بس مااكدر النفس تهواج وماتصبر اله اتغزل بيج وانتي مو حلالي بس اطلكي وروح ابويه اشبعج اتصال وغزل امللج مني

أيه : مااريد لااتصال ولا غزل اريدك يمي
ابراهيم : زوج الي يعوفج بعد بس كون تفض وترجعين اليه اويلي الله يمكن من الفرحه گلبي يوكف
أيه : هاي شنو من القهر يوكف من الفرح يوكف متكولي شوكت يمشي عدل
ابراهيم : من تكونين بحضنه ااااااخ الله
أيه : ماما كعد تصيح خلي اروح
ابراهيم : رويحتي
أيه : هاا عيني
ابراهيم : انتظريني راجعلج
أيه : العمر كله انتظرك ابراهيم اني كولش كولش احبك
ابراهيم : اويلي عليك ابراهيم وانه احبنچ حد گطع النفس محروسه بالله ومحمد وعلي
أيه : ويحرسوك حبيبي انتبه لنفسك مع السلامه
ابراهيم : مع السلامه يرويحتي

ودق : مرت الاشهر واني بين گليه مالتي وبين استاذ طارق الي كل شهر مواضب على الجيه يوم جايب ورد يوم علبه حلويات يوم لعابات وطبعاً كلهم مااخذهم انطيهم لنور وهو يگلها ضميهم حتى من تنور بيتي احطهم كدامها واكولها هاا شفتي ذوله خلوني اتلوك الج بس حتى ترضين
طارق من النوع الي يعطي للشخص الي ميعرفه طابع الغرور والرزانه وثقل الدم لكن الي يتقرب منه يشوفه شون يضحك للهوا وطيب رغم كل صدي اله بقى مستمر بمحاولاته للتقرب مني وهذا الشى الي خلاني افكر بيه وگلبي انجبر يقارن بينه وبين مازن وموقف من المواقف الي كبره بعيني من مسؤول امن الكليه دفع مره جبيره بلعمر يطلع عمرها فوك ٨٠ سنه وكعت وخطيه اتكردت ايدها لان واكفه قريب بوابه الجامعه جنت واكفه وهو ميدري وسمعته شون دافع عن المره
يعني انت متستحي مره بكد بيبيتك هيج تدفعها متخاف الله
الحرس : شنو واكفه باب الكليه العميد ميقبل
طارق : ياعميد طز بيه وبيك لك هاي حاله انسانيه
الحرس الثاني : استاذ ممنوع غير انطبق التعليمات احنا نتحاسب
طارق : اعرف تعليمات بس اكو شى اسمه خوف من الله يعني تكدر مكان متدفعها وتوكعها تحجي وياها على كيفك وتفهمها
الحرس : حجيت ومفاد

طارق : تحجي مره واثنين وتلاثه لتشوف نفسك شاب وماخذ الدنيا طول وعرض تره يجي يوم وتصير بعمرها سوي شى لأخر ايامك حتى ربك ليخليك بنفس الموقف ونفس الحاجه الي هسه هيه بيه ويسلط عليك الي ميرحمك الدنيا كما تدين تدان وكله بميزان حسناتك ومردوده الك شستفاديت من وكعتها وخليت ايدها كلها دم متذكرت امك بيبيتك لكم راعو الله بلناس الفقره حتى ليگلبها بينا
تعالي حجيه
يمه ينطيك ومايحرمك ويحفظك
هاج حجيه
ودق : وشفته طلع فلوس بس مبين مو قليل هيه جانت تبيع گلينگس اشتراه كله منها وانطاها فوك سعره مرتين
هاج يمه اعتبريني وليدج واخذيهم مني اوصلج لمكان اخاف متكدرين تمشين
لا يمه انه اروح
محتاجه شى اخذج لطبيب اخاف يوجعج شى
لايمه ردتك سالم يحفظك الله لشبابك
وباس راسها والله دمعت عيني واندار واتفاجأ بوجودي ودنج والمره كعد تمشي جان يصيحها حجيه رايد شى منج
كول يمه عيوني الك
تشوفين ذيج البنيه
ودق : فتحت عيوني هذا شراح يسوي

اي يمه حليوه وتخبل
طارق : ادعيلي تصير من قسمتي
ودق : دنجت ومتت مستحه واكفه نور وبنات ٤ مرحله اخيره على صفحه وماتن عليه
روح يمه ان شاء الله ربك مايضيعلك تعب وتصير ام بيتك وماتضل بنفسك ويرضيك مثل ماراضيتني
طارق : فدوه لگلبج حجيه
بنيتي هذا ذهب اخذي وخطيتج بهلرگبه
طارق : سمعتي اني مالي علاقه
ودق : ههههههههه الله كريم خاله
ومن يومها واني من يجي اضحك واسولف ويااه بس بحظور نور ومثل الاصدقاء بس هو ميجوز لازم يذب گلمه يخجلني بيها او يضحكني

صارت ٢٠١٢ هاي السنه ماانساها بعمري شهر الخامس كلها ايام وامتحن حاطه راسي بلكتب واقرا  منير من يوم العركه مشفناه مازن وجنه علاقتهم هادئه متخلى من المشاحنات ماما وبابا حامد علاقتهم طيبه وملتهي بابا بلفصول وامور العشيره الي متخلص ابد مازن نوعاً ما رجعت علاقته بابا زينه بس مو مثل قبل
ابراهيم قبل شهر حجيت ويااه صح دقايق معدوده بس احسن من كولشي ماكو مااكدر اتصل لان دوم يكول مااكدر الزم نفسي مااتغزل واهيم بيج وبعدج على ذمه منير وحرام عليه اخاف الله بيج وهذا الشى يخليني اتعلق بيه اكثر

سمعت هوسه ناس تعيط وسيارت تتشاخط وبيبات تتراكع اصوات وكأن يوم القيامه راح تقوم حطيت شال على راسي ونزلت ركض دورت على ماما ماكو واكيد علاوي وهمسه هناك مديت راسي شفت الباب مليان رياجيل وكلها متوتره واشوف الكل عليهم علامه الحصره والي يكول متأكدين والي يضرب ايد بأيد ويكول حرامات جان خوش وليد الله يرحمه شكوو شصار طلعت ودخلت بسرعه لبيت جدو وصار بوجهي عياط فضيله الي مدده بالكاع وبشرى الي مكطعه شعرها وتشك بهدومها والحجيه الي كاعده وتلطم على راسها واحلام تنعي وتلطم وماما تبجي ومنهاره ردت بس واحد يكولي شكوو باوعت زين مثل الغواش بعيوني اجتي جنه تركض وتضرب على صدرها وحضنتني حيل وتبجي وتعيط كتلها بصوت مبحوح شكوو منو مات
جنه : لج ابراهيم مات اتعزيتي واتصخمتي ايه حبيبج مات
أيه : دفعتها حيل لا مامات متأكده مابيه شى
ركضت على بشرى وجريت ايدها واعيط عليها شكوو تشكين ملابسج هاااا مو حرام ابراهيم مميت وانتم كافي اسكتوووووو ابراهيم عايش وگلي انتظريني
يمامه : ركضت على ايه واكفه بنص الصاله وتعيط بكل قوتها وتريد تسكتهم ودمعه منزلت من عيونها حضنتها
أيه : ماما ابراهيم مميت والله
يمامه : اويلي على حظج يمه
أيه : لتبجين ماما ابراهيم مميت بس جاوبيني جابوه
يمامه : شون يعني
أيه : راح يستلموه
يمامه : بعدهم ماما بس انطو خبر من الوحده مالته وكالو ابنكم استشهد وراحو الولد كلهم لديالى
أيه : ليش ديالى
يمامه : طالعين عمليه استطلاع على الارهابيين ومفخخين البيت واكع عليهم ولا واحد طالع منهم جان تدفعني
أيه : ابراهيم عايش وراجعلي وسكتيهم مااريد اسمع عياطهم
يمامه : بنتي ضاعت ولج ماما ايه باوعي عليه

أيه : اششششش اسكتوو جاي ابراهيم
فضيلة : ولك يمه المن عفت امك ورحت انهجم بيتج فضيله راح شمعه الدار راح وليدي ريت يومي گبل يومك يبو طول الحلوو يبوووو وليدي شاب ياناس ماتهنى بيومه
أيه : ماما اني رايحه للبيت انتظر ابراهيم
يمامه : لطمت على وجهي بتي راح تتخبل اجر بيها متباوع بوجهي وطلعت ومثل الفاصله عن العالم وطبت للبيت وطبيت وراها وزاد العياط هناك مدري شصار مكدرت اروح خايفه تسوي شى بنفسها
طبت للحمام اباوع عليها تتوضى
يمامه : شكعد تسوين
أيه : اريد احاجيه
يمامه : المن
أيه : لله يرجعه اليه هو يعرف بيه من اتعب ومن اتأذه احاجيه وينقهر عليه ويساعدني وادري هلمره الله مراح يعوفني

يتبع .....