على صراط امي

الجزء الرابع

على صراط امي
الجزءالرابع

كمت متفاجئة ومخترعة معقولة عبالي اتخيل
باوعت بوجهه ودنكت بسرعة خجلانة ..
حجيت لبخوف وبسرعة
عفية الله يخليك روح لا يشوفك اخوي
ضحك بهدوء ..اعصابج معودة ليش ترجفين ..
روح روح بعد لا تجي حجيتها ومشيت بسرعة
متخربطة مااعرف شتصرف
بس اريد اشرد
رجعت للقاعة كعدت واباوع ع الباب
يتصورلي هسه يدخل وراي

ثواني ودكت الاء كتلها رحت للقاعة
تعالي ناكل جوا احسن
بس قلقة ومتوترة حاولت اكون طبيعية حتى
لا تكسفني الاء
بس من دخلت تباوعلي باتهام !
خلت الاكل ع الستيج وتنهدت من التعب ..
افففف طاحن رجليه كله من وراج
وين وليتي؟

ها ضجت وحدي واجيت هنا احسن ..
ضجتي لو شفتي هذا العبد؟
عطت لا اراديا بوجهها ..احترمي نفسج عااد..
حجت برفعة حاجب ..وطن شكو صايرة ترفقين بالعبيد
ماعرفتج صايرة هالكد حنينة ..
صارت عيوني بكصتي من حجيها ..
كمت وكفت وعليت صوتي ..عيب عليج تفرقين حرام
فاهمة حرااام
وللاسف معتبرتج صديقتي ماتستاهلين واحد يصادقج..

عفتها وطلعت افور بداخلي
يعني حرام عليها ليش تكول عبد مو احنا كلنا عبيد لربنا
بعد ليش هالعنصرية
انة مو دفاعاً عن حر بس دفاعاً عن كل واحد مثله ..
وعن كل شخص طبيعي والناس تنبذه لان لونه مختلف
لو لان عشيرته او غيرها...

بقيت اتمشى لوحدي وطكتني كآبة تمنيت ارجع للبيت
وهم خفت حر بعده موجود ويجي يحاجيني
الاحسن اخابر عابد بلكي نرجع من وكت ..
الوو ..هلو بيك لا مابيه شي بس تعبت وماكو محاضرات
ماترجع للبيت ناخذلنا كيم ؟
اي يدلل اليريد ينسحل هسه اجيلج ..
يلا انتظرك..

رحت للقاعة حتى اخذ محفظتي بيها الملازم وسجلي
الاء مموجودة جانت بس كم بنبة من شعبتنا ..
اخذت المحفظة بس السجل مالكيته
دورت وسالت البنات كالو ماشفناه
عزا بس لا ضاع بي المواد كلها شلون بيه
ياااا تذكرت حطيته المصطبة حتى اكعد لان بيها تراب
شكد غبية اخ مني...

رحت ركض لنفس المكان مالكيته راح انجب وينه
انوب لا مخلية تحشيشة لا غيبة ماكاتبتها
بالمحاضرة من مااكدر احجي اكتب والاء تجاوب كتابة
لو الورد البي شكد ااااخ
امشي واشلع واضم بي اخ ياسجلي العزيز

لازم انطي خبر لسكرتارية القسم خاف احد يجيبه
رحت ووصيت السكرتيرة
كالت تدللين اضمه يمي واجيبه الج بنفسي لو جابوه
كلش حبابه واحبها اسلوبها لطيف ...
طلعت منها تمشيت جوا واجه عابد وطلعنا..

اول ماشافني كال ها وطونة خو مابيج شي؟
لا بس ماكو شس نرجع للبيت اريحلنا ..
اي شكو احلى من الرجعة اوف يابة فد نعسان ..
اي تغدا ونام شوراك ..
اكيد بس اذب الخاشوكة اغمض هههه ...

رجعنا للبيت وامي تونست لان من وكت راجعين
ساعدتها وصبينا الاكل والولد كلهم تجمعو وكعدنا ناكل ..
حسين ضايج كلش وبابا هم
طابع الحزن غلب ع الجو وحتى محد اكل عدل
من خلصنا سالت امي كالت مادري
بس حسين وابوج انفردو مساع وطلعو ثنينهم ضايجن ...

ورا الغدا مرتجى راح للشغل وحسين كال راح انام
وعابد اصلا نعسان
بس مختار بقى يمنا وبابا متمدد وايديه ورا راسه
وماما استكان الجاي بيدها صارله ساعة نفسه ماشربت قطرة..

ومر اليوم كله كئيب ومشحون وهالشي نادرا يصير عدنا
متعودين دومنا متآلفين والاجواء حلوة ..
وبقت الاجواء هيجي يومين
الى ان حسين نزل المغرب واحنا كلنا كاعدين
كعد يمنا كال لبابا..
بابا اسف وكدامهم اعتذر والتريده يصير
بس هاي اخير مرة يمشوني بشورهم واسكت
المرة الجاية اريدك انت تكلي افصخ ..

رفع بابا راسه وتنهد ورجع باوع لحسين
اي ابني هيج اريدك
لا تكسر بخاطر بنية وتشيل خطيتها
كل حسرة منها وكل دمعة طوگ تتطوك بي رگبتك
لا تظلم مرة طول ماانت عايش..

انة جنت كاعدة ع القنفة الثانية
كمت ذبيت نفسي بحضنه وشميته حيل..
بابا انت منين مخلوق ..
حضني بايده وباس شعري..
مخلوق من طين بس انت مخلوقة من براءة بعد روح ابوج ..
شلون صارت رجلج خو ماتعورج؟
لا لا الحمدلله ...

ومن بعدها شوية المزاج تغير لان حسين
جان ناوي يفصخ الخطوبة
من مخابرته مرته وكايلتله تريد الحنة بقاعة
وهو رافض ورا شوية مخابره ابوها
ونازل بي دك حجي ومحسيه بالتقصير..
وهم بابا كله طول بالك ولا تطلك بنات الناس مو لعبة...

طبعا بهاليومين الاء ماحاجتني ولا حتى باوعت بوجهي
وانة كلت هي الغلطانة مااعتذرلها
خل تحس ع نفسها لان تصرفها غلط وحرام
بقيت اخذ محاضرتي واطلع بلا مااحجي ولا اختلط

صار يوم الجمعة الي تقرر بي نعزم بيت خالو سلام
الي طبعا لازم قبل شهر بس
طحت وانكسرت رجلي ومارهمت بعد..
بيومها كعدنا من وكت وتحضرنا
ساعدنا امي بالطبخ وكملنا كلشي ...
بيت خالو اجو ب١٠ ونص الصبح وهم ساعدونا من اجو
والولد كلهم كاعدين جوا بالصالة
واني تحاشيت علاء تماما ماباوعتله حتى من سلمت ...

صار الاذان وكلها كامت تصلي
خلصت صلاة انة ويمامة واجينا للمطبخ نشطب شكو عدنا
دخل علينا علاء للمطبخ سلم ووكف شرب ماي
يمامة اختلاطها مو كلش
يعني مو كل وقت تختلط وطبعا الجاف المتقلب
يخلي المقابل يخاف يحاجيها بكل وقت بنفس الاسلوب
لازم يباوع لمودها يلا يختار اسلوبه...

لهذا علاء من شافها قافلة من حرجها بس شرب ماي وكال
مسوين دولمة لو لا ..
جاوبته بخجل ..اي سوت ماما دولمة حالية حامظة
لان خالو يحبها هيجي..
صدك تحجين بلة وينها خل اشوف طبعا نموت عليها
وكل ماناكل دولمة يذكر دولمة عمتي
هسه اصبلك وشوف ..

رحت اخذتله ماعون وجاي اصبله
يمامه طلعت من المطبخ وهو تقرب يمي وانة اصب
اجه الماعون يطيح من ايدي
صرت مثل السعفة بريح كلي اهتز داخلي مهتز
وجسمي يرجف ...
كملت وانطيته الماعون وانة مدنكة
اخذه وكعد ع الميز وكال تكدرين تكعدين شوية؟
حجاها وباوع للباب

هزيت واسي وكتله اي عادي وجريت الكرسي وكعدت...
رفعي راسج شوية ليش متوترة
ماجنتي هيجي جنتي مرحة وضحوكة هسه صارلج فترة مدري شلونج ؟
ههه لا نفسي مثل ماانة بس بعد ماالتقينا هواي ..
صحيح انقطعنا هالفترة لا بس لازم نسويلنا سفرة
وي العمام والخوال شنو رايج؟
اي اكيد حلوو صارلنا فترة ماطاليعن هيجي ..
بعدين نقترح ووننطي خبر للجماعة حتى نحددموعد ..

اكلج صدك يمامة شبيها مو ع بعضها؟
مابيها شي بس هي شوية تتعب من دوامها تطول
هواي بالسغل
اي حقها الله يساعدها انشالله ترتاح
اكلج هي تقبل اذا احد خطبها؟
ماعرف شكلك بس..حاليا رفض قاطع عدها
ماتقبل رغم شكد يجووون ..
اها عود نيتي احاجيها انة اكو واحد  يريد يخطبها
ومتردد يكول امبينة ترفض...

من كال صديقي باوعتله بكل انتباه وفتحت عيوني
كمل كلامه
وانت هم ماناوية تعرسين؟
ههه انة بعدني صغيرة حتى ماتخرجت ..
شبقالج ٣ اشهر وتخلص السنة ..
الله كريم هسه شمفاول عليه بالزواج
مو تزوجت وتريد تزوج الناس كلها وياك...
ههههه اي طلع لسان وطن الاصلي

صدك ردت اسالج بس حاجيني بصراحة حتى لا اخسر
صاحبي ولا اخسرج
باوعتله وبقيت ابلع ريك شنوو؟
باختصار اكو بينج وبين حر شي؟؟

للحكاية بقية
بقلم شقراء(قمر كانون)