ولد الخاله (منقوله )

الحلقة الثامنه

#ولد_الخالة
الحلقه الثامنه

-اسامه : نعمات عندى شعور انك داسة عليا موضوع

..خلينى نسمعه منك انتى خير ..لو سمعته من غيرك

مستحيل نسامحك

-نعمات : حبيبي شن بندس عليك

-اسامه : متاكدة

-نعمات : متاكدة واكيد الاكيد

-اسامه : باهى تحبينى

-نعمات : هلبااااا

-اسامه : وانا نحبك ونمووت عليك يا عمرى انتى

-نعمات: ياريتنى سمعت صوتك من بكرى ..الرعايش

كلها مش منى توة

-اسامه😳: رعايش شنو ..شفتى انك ادسى عليا ..

لكن انا بنسايرك للاخير بنشوفك وين توصلى

-نعمات تبى تغير الموضوع : ستاحشتنى

-اسامه : هلبا حبيبتى ..بالله ماعاد اديريها تسكرى

تليفونك منغير ماتعطينى علم .. عالاقل ابعتى رسالة

انك بخير..خاصه انى مرات  الايام الجاية نمشى للمعسكر ....

-نعمات 😔: قصدك بتمشى

-اسامه : منعطلش عليك حبيبتى ممكن اسبوعين او ثلاثه ونجى

-نعمات : هلبااا

-اسامه : الله غالبى حبيبتى هادى خدمتى اللى معش

نقدر نسيبها ..اللى حط رجله فى هالموال معش قدر يوخر

-نعمات: وعلاش معش تقدر توخر حبيبى ..الثورة وتمت

-اسامه : نسيب جماعتى بيش يقولو عليا مش راجل

.. والله تنكتب عليا

-نعمات: باهى حول هنايا لطرابلس

-اسامه : ناس مقدرينى ويحترمو فيا وشايفيلى بعين

كبيرة خلى يحطونى وين مايبو .. وانتى نرفعك معاى 

وين مانكون انا

-نعمات : كيف بترفعنى

-اسامه : نرفعك زوجة ليا  ..

نعمات قلبها قريب وقف من الفرحه

-اسامه : خيرك سكتى الباين انك مش موافقه😁

-نعمات 😍: مش موافقه على شنو

-اسامه: بلا جو عباطه عاااد ..موافقه تكونى زوجتى ولا لا

-نعمات: ياحليلى وقاعد تسال فيا .. طبعا موافقه

-اسامه : بس عندى شرط

-نعمات: حنكون تحت طوعك يا عمرى ونسمع كلامك

-اسامه : مش هدا شرطى

-نعمات : امالا شنو

-اسامه : نبى نخطبك من بوك وامك الحقانيين

-نعمات: 😳😳😳😳

وقعدو يهدرزو قريب للساعه 3 ..

-اسامه : حقه منسئلك سؤال بايخ

-نعمات : اسأل

-اسامه : ولد عمتكم الامريكى قاعد فالحوش ولا وين

-نعمات : لاااا مشى لبنغازى وعلى اساس بيسافر من غادى

_____________________________

ثانى يوم ...

-حورية : ياسبحان الله فى طبعك يا انور كيف تغير

-انور: انا متاكد ان فى ناس فالعيلة يطبخو فى

طبختهم توة

-حورية : طبخه شنو وكلام فاضى متع شنو ..عمتك

راضيه بتعرفك اليوم بيش يطبخولها ويكدبو عليها

-احلام: انت لو متفاهم معاها البنت خلاص

-انور: صراحة احنا مش متفاهمين على شى ..والبنت

نوعها ماتعطيش فى وجه

-احلام : سعد ايامها كانا جت من نصيبك انت يا نويرة

-حورية : متقوليش هكى يا حلومه نصيبات هيا

-انور : خيرك تحبطى فيا يااام بكلامك كأنك شامه حاجه

-حورية : تبو الحق ولا .. انا مش خاشة راسى

نخطب البنية من راضيه والمهدى ..مدامها عندها

امالى معناها اعمامها اولى الناس نخطبوها منهم

-انور: مش على اساس انها عاجباتك وتحبيها يااام

-حورية : البنت فى حد داتها نشهد بالله عاجبتنى

هلبا اخلاق وجمال وفلاحه ... لكن الحق انا متغوشة

انور واقف وراها وتلفتت لاختها احلام وحركت

شفايفها : نوال

طبعا احلام عندها علم بكل شى وفهمت ان حورية

مسخفتها بنتها نوال انها تحب اسامه ولد عمتها

..وهند حتوقف فى جوازتهم لان انور فاتها

-احلام: نقولك حاجه يا نويرة ..كانا ماصارش منها

عندى ليك بنية..هيا صح صغيرة ..لكن ادب والله

تشوفها ماتنزل منها عينك من ادبها وحيائها ..وامها

مراءة مالاخير تحطها عالجرح يبرا

-انور : انا نبى نعمات ومتاكد ان عمتى راضيه متردنيش

-حورية : بالرغم عمتك راضيه صاحبة هند بنت

اختها هلبا وعارفه موالها كله.. لكن بنسايرك ونكلمها

شن نديرلك هى

-انور: كلميها توة قدامى

-حورية : ايييه علينا

وقامت حورية تليفونها واتصلت براضيه ...

ضبح لكن راضيه ماردتش ...

-حورية : ماردتش

-انور : عاوديلها

___________________________

فى نفس اليوم

-نعمات : غير نعرف امى بس شن دارت بعدى

-راضيه : يابنيتى توة عام احوالك متساوية .. غير

شن جابهالنا احلام هادى توة

-نعمات : امشيلهم انتى يااام وقصقصيها امى

وخوتى شن قالولهم

-راضيه: يابنيتى شن بنقوللها متاعينك الاولين شن احوالهم

-نعمات : لااا ياام ..انتى تعرفى كيف تجيبيلها

السؤال .. نبى نفهم شن قالولهم وكيف صار

-راضيه : باهى غدوة نمشى وننشد ونجيبلك الثابته

-نعمات : لا بريلهم اليوم على خاطرى ..افرضيها

تروح غدوة خالتهم احلام

-راضيه: باهى مش مشكلة يابنيتى ..باهى جيبيلى

التليفون نكلم بوك ونقوله بنمشى قدا حوش ابراهيم

خوى

ناضت نعمات تجرى تجيب فالتليفون

جاباته ومداته لامها .. وفتحت راضيه التليفون

بتتصل بالمهدى .. شافت لقت حورية مكلمتها

-راضيه: خالتك حورية مكلمتنى قريب ثلاث مكالمات

-نعمات : باهى شوفيها .. بالك تبى تطلعى انتى وياها

اتصلت راضيه برقم حورية مرت خوها

ضبح وردت حورية

-حورية : الووو

-راضيه : اهلين حويرة شن حالك

-حورية : الحمد لله حالى باهى ..شن حالك انتى ونعمات والحاج

-راضيه : الحمدلله تنشد عليك الصحه .. شن حال ابراهيم وباقى العويلة

-حورية : الحمدلله باهيين ..كلمتك بكرى وماردتيتيش

-راضية: التليفون ماكانش جنبى ..انشالله خير

-حورية : انشاء الله خير .. غير بنجوك انا واحلام

اختى قلت نستادنك قبل بالك طالعه

-راضيه: لاموجودة مرحبتين بيك انتى وحلومه

-حورية: امالا خلاص نصلو العصر ونجوك

-راضيه : خلاص وانا ونعمات نراجو فيكم

وسكرت الخط

-نعمات : هما بيجونا

-راضية: ايه بتجى توة حورية مرت خوى واختها راضيه

-نعمات : مكنتش نبى نحضر كيف تسالى فيها

..نخاف نرعش ونتلخبط وتلاحظنى

-راضيه : متخافيش بنيتى ..ربي كريم ..انتى اصلا

ليش مقعمزة معانا ..قولى عندك امتحان ..مدى

العصير  والشاهى واركبى فوق ..وتو نحكيلك انا اللى يصير

-نعمات : ايه مكى احسن حاجه يااام

__________________________

-دهيبه : تى والله كانا راضيه اختى تعطيهم ماعاد

يصير طيب بينى وبينها

-حنان : يمى ماتغلطيش ..وهدا نصيب ..كانا انور

يبيها والبنت وافقت خالتى راضيه شن دنبها

-هند : ضمى فمك انتى ..امتى جت وتعرفنا عليها

وبدى حتى يبيها ...لكن والله لو دايرها بونتو فيا لما

نديرها بونتو فى اخته ..وهالحوش ماهى خاشاته

كان توقف على راسها

-دهيبه : حورية اللفعه هادى ..تلقاها هيا اللى زنت

عليه بيش ماياخدكش

-هند : تصدقى يااام كلامك حق .. كيف فاتت عليا

..اكيدة امه المسمومه هيا اللى قالتله عليها ...وانور

طبعا ماعنداشى راى معاها

-دهيبه : غير خلى يكملو وتو نعرف انا شن نقول

بعتالى

-هند : لااازم نقهروهم ياام ..حتى لو الخطوبة ماصارش منها

________________________

العصر ...

وصلت حورية واختها حنان لحوش راضيه

طقطقو عالباب ...فتحت نعمات ودخلتهم

لقو راضيه فالفم سلمت عليهم وخشو

قعمزو عالصالون فالصالة

جابت نعمات العصير والشوكلاته ..مدتلهم وجت طالعه

-احلام : نعمات تعالى قعمزى معانا مانبو شى

-نعمات ابتسمت : هدا اقل شى من واجبكم يا احلام

حطت احلام يداها الزوز على وجهها وبدت تبكى

-راضيه  : اسمالله عليك خيرك يا حلومه 

-احلام : يانعمات حتى ضحكتك زى ضحكت عزيز سبحان الله

-نعمات يانارى نزلو دموعها : الله يرحمه ويطول فى عمرك

وطلعت

لحقتها راضيه : اسمعى معش تخشى انتى ..حتى الشاهى تو نجيبه انا

-نعمات : باهى يااام .. غير اسالى على امى

خشت نعمات للمطبخ توتى فالشاهى

وقعدو حورية وراضية واحلام يهدرزو

بعد قريب نص ساعه هدرزة ونشدة عالحال

-حورية: انا يا راضيه رانى جاياتك نخطب

-راضيه😳: تخطبى

-حورية : الحق من لما جاتك نعمات وولدى انور حاط عليها العين

-راضيه فرحت: وانا بنلقى خير من انور ولد خوى ابراهيم

وبعتالى ادكرت : وهند !!

-حورية : يا رضيوة تو انتى نعمات بنتك وهند

بنتك ..والله على قد ماقلتله راهو عمتك بتحرج

وبديرنا عرس بالزكار ..قالى شى تمشى لعمتى راضيه

تخطبيلى نعمات

-راضيه : والله شن بنقولك يا حورية ..

-احلام : احنا نجيبو الموضوع من نصه ...نادى

نعمات توة ونسالوها ..لو هيا موافقه على انور باقى

العيلة نديرولهم راى ...لكن لو هيا مش موافقه

خلاص ناخدوها من قصيرها ونكدبو الموضوع ولا

من يزعل من حورية ولا من يزعل منك يا راضيه

-راضيه: جبتى عين العقل يا حلومه ..حتى انا منبيش نظلم نعمات ..كانها تبى انور ..منقدرش نحرمها

-حورية : خلاص اركبى ناديها  ..وكان قالت بنفكر نراجوكم

-حورية : هوا هداكه الكلام

وطلعت راضيه تنادى: يا نعمات ..يانعمات

-نعمات : نعم ياااك

-راضيه : تعالى خالتك حورية تبى تكلمك

-نعمات 😳: وشن بدير بيا خالتى حوريه ...

وخشت للصالون قعمزت

-حورية: تكلمى انتى يا احلام

-احلام : احنا بعتنا انور ولد اختى نخطبو فيك...شن رايك

نطت نعمات تجى واقف

-نعمات : لا انا مش موافقه

-حورية وجعتها : وشن بيجيك خير من ولدى انور

-نعمات : لا والله يا خالتى لكن انا مخطوبة لولد عمى

-حورية 😳: مدامه هكى امالا ربي يهنيك

تمت التقعميزة وجو طالعين

-نعمات تكلم فى احلام : البنت اللى قلتى توفقت مع

عمها يا نارى سخفتى زعما امها كيف صاير فيها

- احلام : يانارى حال عدوينك ...مسبوهها من يومها

والفرح ماخشش حوشهم

نعمات بدت تبكى

-راضيه خافت يزبطوها او يحسو بحاجه : يابنيتى

انتى حساسه غير ليش تنشدى عالناس

وخدتها من يدها ودخلتها لداخل وطلعت هيا سقدتهم

وخشت لقت نعمات فى حالة تبكى ...اضبطتها

وقعدت تبكى معاها

_____________________________

فى حوش دهيبه ...

هند واقفه ورا الباب تتصنت ..لانها تخاف من اسامه

متقدرش تناقشه

-اسامه : شن تقولى انتى يااام ..الباين عليك كبرتى

-دهيبه : اللى سمعته توووة ..اليوم نمشى نخطبلك

اميمه بنت خالتك .. لازم نقهرهم حوش ابراهيم زى ما قهرونى

-اسامه : بالك تحسابينى طرف شطرنج تحركيه زى ما يعجبك

-دهيبه : رضاى عليك فالموضوع هدا

-اسامه : رضاك عليا فى موضوع خطبتى لاميمه ..

ولا رضاك عليا فى موضوع قهرة حوش خالى

-دهيبه : الزوز

اسامه حس انه لو عاند امه حترفض تخطبله نعمات

وخاصه انها متكنطيه منها ومن اختها راضيه

قعد يفكر كيف يخلى امه تمشى تخطبله نعمات وهيا مقتنعه

-اسامه : تعرفى كيف يااام .. انا يدبنسايرك .. و بندير

اللى انتى تبيه  ...وبنرضيك عليا ..لكن بطريقه احلى

-دهيبه : كيف ترا

-اسامه : عمتى راضيه ونعمات مستحيل يوافقو على انور

هند فتحت ودانها مليح 👂

-دهيبه : وانت كيف عرفت ..خالتك راضيه تبدلها

فعيونها ومتبدلهاش فصغار ابراهيم

-اسامه : نعمات مش حتوافق

-دهيبه : راضيه حتضغط عليها

-اسامه : قلتلك مش حتوافق

-دهيبة : وانا شن استفدت كانا نعمات ماوافقتش ..

وكيف قهرت انا حورية بالشى هدا

-اسامه : لما نعمات ترفض حورية وتوافق عليك

انتى ..هكى ضربتى خالتى نورية فى مقتل فى

صغارها من الجيهتين ..من جهه بنتها نوال اللى

فوتاها واللى اصلا انا مستحيل ناخدها ..ومن جهه

ولدها انور اللى رفضاته خالتى راضيه وقبلتنى انا

-دهيبه : يعنى نيتك نمشى نخطبلك نعمات

-اسامه : ايه

هند حست ان اسامه عنده رغبه فى نعمات ويدبر

فالدبارة لروحه ..لكن عادى المهم انور ماياخدهاش ...

وتخلى انور قريب يموت من العملة اللى بتصيرله

-دهيبه : انا بنية منعرفش اصلها من فصلها ولا

مانديرها كنه

هند حست ان امها بتلعبلها فالحكاية

خشتلهم  : سامحونى سمعتكم بالصدفه

دهيبه تشبحلها

-هند : مدامة ولدك يبيها اخطبيهاله يااام

-دهيبه : مانخطبهاش لا رينالها عمام ولا رينالها خوال

-اسامه : وشن بنديرو بيهم احنا .. المهم البنية عندنا

-دهيبة: مندرى نرد الشيرة على بوكم وبعتالى ساهل

-هند : اليوووم يمى تمشى تخطبيها .. متخليهاش تبات فينا

________________________________

قولو ردت الشيرة دهيبة على راجلها طبعا ماحكتلاش

ان خوها براهيم ماشي يخطب فى نفس البنت لولده

كانا سمع مستحيلة يخلى عويلته يمشو ويزايد على نسيبه

المهم قاللها كانكم متفاهمين انتى وولدك واختك توكلى

-هند : اسمعى يااام ..نخطبوها .. ونكملو مدامه

متاكدة منها بتوافق .. وبعدها نسيبوها ونفسخو

-دهيبه : وعلاش هكى

-هند : هكى نضربو حوش خالى ضربة قوية

..سيبتهم وخدت وبدنا وبعتالى احنا عفناها وسيبناها

-دهيبة : لااا ماهو خوك اسامه ساهل بيسمع كلامى

-هند : بعتالى خلى الموضوع هدا عليا انا ..تو نعرف

كيف نطفشها قبل ما توصل

-دهيبة : انا مادخليش فى مواضيعكم هادى ... انا

قالى بوك مدامه ولدم بعتك بري .. هيا وتى روحك

ارفعينى انتى

-هند : هيا يااام وبنخش معاك

-دهيبه : لكن مش حشمه نخشو ورا حوش ابراهيم..

-هند : نديرو روحنا مش سامعين بيهم

-دهيبه : باهى هيا وتى روحك سقدى

_______________________________

ركبو دهيبة وهند ومشو لحوش راضيه

واسامه مايبيش يقول لنعمات مخليهالها مفاجئة

وصلو شرينو الشريانه فتحت نعمات

قلبها طق لما شافتهم ..ام الغالى عاد

قعدت تبوس وتعاود وتسلم وهما نفس الشى

خشو للصالة سلمو على راضيه وهدرزو شوى

دهيبه نوعها فالحه وتعرف الحاجه لمن تقولها

-دهيبه : امالا وين المهدى

-راضيه : يتوضا بيصلى العشى

-دهيبه : وينه ناديهولنا خلى نسلمو عليه

-راضيه : نعمات نادى بوك

نعمات تمدلهم فالشاهى والحلاوات فرحانه بيهم

-نعمات : اهو تو اناديه يااام

ومشت نعمات تنادى فى بوها وجت قعمزت جنب هند

طبعا راضيه مالحقتش تحكى للمهدى ان حوش خوها

ابراهيم جوها يخطبو بكرى لانه كيف روح وخش يتوضا

جى المهدى وسلم عليهم

-المهدى: شنحالك يا دهيبه ..وشن حال المبروك

-دهيبه : المبروك باعتنى ليك فى حاجه

-المهدى: حاجته مقضيه انشالله ..كان حاجه

فالحوش ولا فلوس

-دهيبه : لااا الفلوس صحيت وربي يبارك فيك ..لكن

احنا الحاجه اللى نبوها عندكم فالحوش

-راضيه : شنهيا الحاجه اللى تبيها حيرتينا

-دهيبه : نبى نعمات لاسامه

نعمات فرحت وتحشمت ورعشت وكل شى

-المهدى: هادى نعمات وهادى امها ..واللى قالوهولك ماشى عليا

-هند تلفتت لنعمات : شنو نعومه..هدا امك وهدا

بوك ..واكيدة الراى الاول والاخير ليك

-نعمات : الراى لامى وبوى

طبعا راضيه قريب بتموت معرفتش كيف تنهى

الحوار اللى صاير معقولة توة ترد حوش خوها بسبلة

البنت مخطوبه وتوة تعطيها لاختها

تى هدا زى البونتو ..وهيا مش قد مقاطعه حوش

براهيم ليها ... روحها فيهم 

-راضيه : خلو البنية تفكر وبعتالى نردو عليكم يا دهيبه

-المهدى : شنو نعومه بنيتى .. نعطوك ايام تفكرى

-نعمات : انا موافقه يا بوى

-راضيه: 😳

-دهيبه: 😍

-هند: 😈

-المهدى : واثقة من قرارك يابنيتى ..

-راضيه : يا جماعه الخير نردو الشيرة على عمامها

الحقانيين وبعتالى ساهل

-هند : لكن خلى ناخدو عالاقل الموافقه المبدئية

مابين ماسألتوهم

وتلفتت لنعمات: الراى عندك نعومه ...شن رايك

-نعمات متحشمه : انا موافقه

وطاحت دهيبة تزغرط ...

وراضيه صاير فيها يا نارى

ونعمات فرحانه قريب اطير

تراجى غير امتى يروحو وتركب تكلم اسامه على

احلى مفاجئة دارهالها

وناضو دهيبه وهند روحو

بعد ماطلعو

-راضيه : ليش هكى يابنيتى تخلينى فى موقف

-المهدى : موقف شنو انشالله خير

______________________________

هند ودهيبة مروحين فالطريق

قامت هند تليفون امها واتصلت برقم انور ولد خالها

عارفاته لو اتصلت من رقمها مش حيرد

-انورمقعمز جنب امه فالصالة : اهلين عمتى

-هند : غير كيف حالك يا انور ..خيرك متردش على مكالماتى

-انور : اهلين هند شنحالك

-هند : الحمد لله بخير

-انور : شويا بس ترا شن عندى فى يدى نكمله ونعاودلك

-هند : لا لا مفيش داعى تعاودى..غير كنت بنقولك

بارك لصاحبك اسامه خطب

-انور : ماشالله من خطب

-هند : خطب نعمات بنت خالتى راضيه

وسكرت التليفون فى وجهه

انور قعد مصدوم ...

تلفت لامه : مش قلتيلى قالولكم نعمات مخطوبه لولد عمها

-حورية : هما هكى قالو

-انور : اهو هند قالتلى اسامه خطب نعمات

-حورية 😳: تى كيف صار

-انور: هدا اللى قالتهولى هند توة

-احلام : متزعلش روحك يا انور ..تعالة نخطبلك

البنية اللى قلتلك عليها

-حورية : منهيا هيا البنت ومنو اهلها

-احلام : البنت اسمها انعام ..بنت خو عزيز الله

يرحمه ..قنينه زى الغزالة ومتادبة

-حورية :انتى مش قلتى نعمات اللى ماتت مع عزيز

ماتعرفيهاش كيف شكلها هيا واختها  

-احلام : نعمات ماشفتهاش لكن انعام جتنى بعد

الوفاة بشهر ..صراحه تبارك الرحمن عليها

-انور: غدوة تمشى تخطبيهالى يااام ...مش انا اللى يردونى حوش عمتى

_____________________________

تمت ....ويتبع 🌺🌺🌺🌺

نحبككككم ❤