لازم عليها تقوم بالخطوة هذي تتحدى مخاوفها شحال وهي تتعالج ياك وعدت نفسها تبدل من روحها وهي راها في تطور هايل تنفست مليح شدت على قبضت يدها لقات ريمان ديجا ركبت حلت الباب الورانية وقعدت مكبوسة على روحها تقول قاعدة على الشوك مع بدات الطونوبيل تتحرك قلبها بدا يخبط بالقاوي غمضت عينيها تحاول تشغل تفكيرها بأشياء تافهة او حتى عندها معنى المهم تنسى أنها في طونوبيل ومتتفكرش ذاك النهار المشؤوم كانت سواقت أسيف هادية مسرعش بزاف شافها من الطروفيزور مغمضة عينيها عرفها خايفة تفكر ذاك النهار واش دارت كي زاد السرعة غيث بقا يمشي بسرعة متوسطة باه تطمن قلبها رجع لدقاتو الطبيعية قبضتها خفت شوية بشوية رتاحت حلت عينيها تلقى عينيه يراقبو فيها دارلها حركة كأنو يسألها اذا مليحة غمضت عينيها وعاودت حلتهم إشارة منها تجاوبو بنعم وفرحت من أعماق قلبها لأ نها تغلبت على خوفها بقات تتبسم وحدها و أسيف حاير فيها مسافة الطريق وصلو للمول
دينيز:واش جينا نديرو هنا ..
أسيف :باه نقراو ...في ميزك لاه ؟
دينيز:تعيي ..
عطالها تقحيرت موت بلعت لسانها ضربة وحدة دخلو تسوقو الحوايج كانو من إختيار أسيف طبعا هي كانت تحوس على ستيلها أما هو كان معارض عراض نهائي خيرلها ليغوب وليشورط جين وليسرفات بالمختصر كل ما يخص الانثى مع مكياج من أفخم مايكون تكسات من الساس لراس حلف عليها لوكان يلقاها لابسة من لي كانت تلبسهم يقطعهم على لحمها ...
لحقت لدار ميتة بالعيا فتحتلها الباب تاليا رفدت معاها القش لي شراتو وعاونتهم ريمان تاليا عينيها بقاو يتفحصو في دينيز تحاول تفهم لحكاية خاصة أنو أسيف بذات نفسو وصلهم راحت ريمان ودخلو تاليا ودينيز للبيت يخملو الشريان
تاليا: أسيف..ريمان...قضيان..من البارح مشفتكش..نهار كامل مكاشك وين كنتي ؟؟فهميني واش راه صاير ؟؟
دينيز: تاليا أتنفسي ..سقسي بالحاجة خليني نبدل نفرسو هذي الحالة ومنها نحكيلك وزيدي باه نقولك حاجة تفرحك
تاليا تحمست:لي هي اهدري خفي ..
دينيز راحت عنقتها :وأخيرا موليتش نخاف من الطونوبيل ليوم ركبتها ..
بقاو يسوغو في زوج ويصوطو من الفرحة ...
دينيز باه نزيدلك :راني نتعلم في البوكس والكوتش انتاعي هذاك المسموم تاع أسيف ..تعكي عليه ضحكت تاليا ..
تاليا:يتسمى فيها كاش بوطولة ؟
دينيز:وي بلاك ...ايا خليني نبدل ونجيك نحكيلك بالتفاصيل
تاليا: راني نستنا نروح نطيب قهوة ونرجع .....
أسيف حط ريمان في الدار بدل حوايجو رجع لنادي يبدا تدريباتو لي هملها اليوم ..جاه غيث وبقاو يدربو كيف كيف ....
في لعشية راحت دينيز مع مرهف شرات كيس ملاكمة مع بونداج وقفازات وكاصك وسيلكون(لي يديروه في فمهم) علقت كيس لملاكمة في ذيك الغرفة لي قررت تدرب فيها لبست سورفات دارت قفازاتها وبدات تدريباتها الليلية …
_________________
حل نهار جديد لبست دينيز سورفات ملي شراهملها أسيف
دارت لي كيت في وذنها نطالقت في الفوتينغ انتاعها تلاقات مع أسيف وهاذي المرة درب معاها مور الفوتينڨ راحو لصال جوزو نهار كيف كيف علمها حركات من البوكس وأساسياتو وأهم لحوايج لي لازم تعرفها منها نقاط ضعف الخصم ونقاط لي طيحو بالكاو من بينهم من جيهة ﺍﻟﻜﻠﻴﺔ
ﺗﻀﺮﺑﻴﻪ ﺛﻢ ﺑﺪﺑﺰﺓ ﻗﻮﻳﺔ ﺗﻌﻮﻗﻴﻪ..تضربيه في ذقنو تنفعص رقبتو ميزيدش يتحرك(راني عطيتكم زوج يكفوكم😂)
كثرت لقائاتهم بحكم دينيز تحب الرياضة كل دروسها تتعلمهم بسرعة وكي تروح لدار تزيد تدرب لي في صال كلهم لاحظو شغفها بالرياضة لحقت وين ولا أسيف يخليها تاخض كومبات مع بنات لي فم وكانت تربح ...
شافت بنت تقوم بحركة صعيبة بزاف هي تاع تتسلق الكيس وتكروازي رجليها وتبقى تعمل بومب بقات دقق في حركاتها لاحظها أسيف لي كان بعيد عليها كلما يزيد إنبهارو بيها خاصة من الاصرار والعزيمة انتاعها مي أكثر حاجة لي تشدو ليها كسوحية راسها عارف لوكان هي مكانتش حابة تغيير من روحها هو مكان يقدر والو عارفها كلمتها رصاصة اذا خرجت محال تتراجع عليها وتوقف عند كلمتها على هذي دار شروط ميقن انها راح تخضع خاصة كي دارو رهان بيناتهم ....
فرح لأنو غيير لو قليل منها قلبو لي راه يميل ليها بطريقة غريبة خلاه متفاجأ من نفسو أما عقلو مش باش يصرح لي بيه ووعلاش راه يصرالو هكا
بقى يتأمل فيها وهي تحاول تطبق الحركة هذيك طاحت شحال من خطرة مي ماشي دينيز لي تستسلم راح ليها شرحلها الخطأ لي دير فيه لي علاجالو راها طيح ومدلها الطريقة لي باش تتسلق بيها نفذت تعليماتو بالحرف الواحد ونجحت قالتلو :مرسي
أسيف: عاودي مسمعتش ..
دينيز:اوووف والو خلاص
خبطها بيدو ضربة خفيفة في راسها همسلها قدام وذنها رعشت من انفاسو لي تضرب فيها :بلامزية بلوطة
صوتو المحشرج زاد على مابيها فلتت رجليها وجات طايحة ضحك أسيف بالصوت على منظرها خاصة كي عقدت حواجبها خبطاتو برجلها في رجلو شد أسيف رجلو يتظاهر بالألم قلبت عينيها ناضت من الارض شدت قرعة تاع الما شربت وراحت لدوش أما أسيف فرفش شعرو راح يكمل لي بداه .....
#أريولة
االحركة لي كانت تتعلم فيها 😍✌👌
_____________________
هاني زدتلكم هاذي شرايكم في المشاعر الجديدة لي دور بين أبطالنا واش تتوقعو منا لجاي زعمة يعتارفو ! كيفاش راح يعتارفو ؟
أرائكم توقعااااتكم متنساوش الفوت 😍 تحققو الشروط راني نحط ❤
وبالنسبة لي يحبو يقراو الروايات رجاءا اضربو طلة على رواية غابة كالفودرين سبق وحكيت عليها نتمنى كلكم تقراوها لأنها رواية مخالفة على واش تعودتو وهي خيالية 😍😘
في الأخير تبقاو على خير باي تشاو في لامان 👋