مرحبا حبايبي ..مشتاقتلكم وكل عام وانتو بالف خير
سنة خير وامن وامان يارب..
طبعا هالقصة جنت ماجلتها بعد فراشات تخشى الاحتراق
بس نزلتها هسة لسبب كلش ضروري
وراح ابلش بيها عن قريب
طبها هي مو طويلة كلش مثل السابقات
بس فكرتها مختلفة
راح انزل البارت الاول وحفظوها يمكم لان عن قريب انشرها
متابعة ممتعة...
***********************
على سراط امي
الناس تعشق من خال بوجنته
فكيف بي وحبيبي كله خال
انة وطن سمتني امي بهذا الاسم لان كلش تحبه..
ورادت تسمي اختي الاولى وبابا ماقبل
وكذلك اخواني الاربعة رادت تسميهم
كل ماتصير حامل وتنوي تسمي وطن ابوي
يمنعها
الى ان..صارت حامل بيه وماتدري
بعد وقت طويل يلا عرفت
ومارادتني بالاول وحاولت تنزلني
بس ماما منعها لان يحب يخلف هو كلش يحبها
ورغم منعه اله بقت تحاول
بس بعد مكتوبلي اعيش..
كلها بابا انت مو ردتي تسمين وطن وهالاجاج هذا الطفل وسمي وطن..
صرت اني واول ماصرت امي تمرضت
لان محاولاتها باسقاط الحمل
اثرت عليها هواي
بعد فترة طويلة كلش يلا تحسنت...
كبرت وي اخواني الاربعة _حسين_مرتجى_مختار_عابد ...
واختي الوحيدة يمامة الي هي جبيرتنا ..
عائلتنا كلش مترابطة وابوي يموت على امي
بس امي من نوع الهادئة او الصامتة
ورغم محبة ابوي الها بس احس بيها حزن
يمكن بسبب مشاكل قديمة صارت
وي اهلها....
امي وابوي اولاد عمام وتزوجو
امي الوحيدة لأهلها على خمس ولد
وابوي عنده اخوات ثنين واخوان ثلاثة...
وكلهم متربين سوا عمامي وي خوالي
وكبرو وتزوجو وقوت العلاقات اكثر
واحنا اولادهم هم صرنا مثلهم
الا خالي الصغير سلام..
الوحيد الي معزول ومانلتقي بيهم
وحتى لبيت جدي يجون من مانتواجد
هو وامي مايتحاجون صار ٢٩ سنة...
فد يوم بالليل وي العشا اندك الباب
جنا جاي نصب العشا اني ويمامة
وقتها جنت مرحلة ثانية معهد ..
طفينا ضو المطبخ حتى نطل من الشباك نشوف منو اجه
طبعا فضول بناتي..
فتح عابد اخوي الباب
وشفنا رجال لابس دشداشة بيضة وطويل وابيض حلوو
وياه شباب ثنين اكبر مني
سلمو على عابد بس مانسمع الصوت لان الباب بعيد طارمتنا جبيرة
بس بعدها شفت عابد حضن الرجال حيل
وبقى يبوس بكصته ويهلي بي
وياشرله بيده ع باب الاستقبال
واستقبلهم بحرارة...
اجه يركض فتح باب المطبخ وركض حتى يفتح باب الاستقبال من داخل
مالحكنا نسأله من سرعته
كلت ليمامة خل اروح اشوف ذولة الصاكين منو واجي..
دخلت لكيت الهول فارغ !لعد امي وابوي وحسين وين راحو توة جانو هنا!
طفيت الT.V وتمشيت ع كيفي للاستقبال
الباب مسدود ع النص..
صرت ع جهة واني اسمع صوت نحيب
هذا صوت امي !!
ثكلت رجلية واني اسمع صوت رجال غريب هم يبجي وابوي واخواني يكلولهم
كافي يمعودين راح نبجي وياكم
عوفو البجي وخل واحد يشوف وجه الثاني عدل!
سكت صوت البجي وسمعت صوت
امي..
شلونك يابعد حيلي شلون يا شريچ روحي
جاوبها الرجال هسه انة بخير دام شفت
وجهج الحلو يا بعد اخيج..
عرفته هذا خالي سلام !اي صح
يشبه امي وخوالي البقية
رحت اركض سولفت ليمامة
انصدمت مثلي من حجيتلها بجية خالو
وبعد كل هالسنين اجه لامي وصالحها
ولهسه مانعرف سبب الزعل بينهم شنو
ومحد يعرف ابد غير الكبار...
بهذا اليوم اجه عزم امي على عرس ابنه الجبير
علاء
اجه يمنا عابد حجالنا وكال حضرو العشا
واني طالع اجيب مشويات حتى يتعشى خالو يمنا
احنا بيومها مسوين مركة كبة حمرة
ووياها مقليات وزلاطات
بس رجعنا طلعنا كم شغلة ورتبنا الاكل
واخذنا للهول
اجه عابد بسرعة ماتاخر لان قريب علينا المطاعم منطقتنا كلشي بيها...
وكف ويانا وعدل السفرة ويسولف
عن جية خالو وشلون هو وامي فرحو بشوفة بعض..
بعدها كال تعالو سلمو عليهم حتى نصيحلهم ع العشا...
رحنا اني ويمامة دخل عابد ودخلنا ورا
من شافنا خالو ابتسم
تقربنا اله مستحيات وهو كام لحيله وشبكنا وحدة منا ووحدة منا...
شمني براسي وباسني كلي فدوة لشكارج
وباس يمامة براسها وكلها بعد خالجن الله يحفظجن ...
بعدها وخرنا من حضنه وعرفنا بنفسنا
كلي اسمج يخبل والتفت لامي وكلها
وطن انت بشبابج نسخة منج
امي كلتله تشبهني بكلشي وضحكت بعيون مدمعة...
عرفنا على ولده علاء وفقار
وسمنا عليهم ومن بعدها كنالهم تفضلو تعشو
واجو للهول وبلش الاكل والسوالف
الي صارت اكثر من الاكل والتهو بيها..
اباوع لامي شي جان مفقود بعيونها ورجعلها
اباوعلها وابتسم وهي تضحك
ضحكة مغلفة بشي ماعرف شنو هو ...
سولفنا وي علاء وفقار وطبعهم اريحي مثل اخواني
وبسرعة انسجمنا سوا وكالو تعالو عكب باجر للعرس من وكت
راح يسوونها ببيت بابا الحجي
(احنا الاحفاد كلنا نسمي جدو بابا حجي)...
بعد ماراحو امي وابوي دخلو لغرفتهم
وطبعا مانكدر نستفسر شلون اجه خالو
وشعجب تصالحو
هالاشياء ممنوع نتدخل بيها احنا..
يمامة راحت نامت لان عدها دوام يوم
ثاني هي تشتغل بشركة النفط
مخلصة علوم جيولوجي ..
عمرها ٢٩ وهي اختي الجبيرة..
بقينا اني وعابد اخوي الاكبر مني بسنة
طالب مرحلة اولى معهد تقني
هو اكبر مني بس اني سابقته بالدراسة
هو يرسب هواي..
واني وياه علاقتنا قوية ومقربين
دومنا نتمالخ وبوقتها نتصالح...
سولفنا اني ويا بسالفة خالو وهو يكول
ماعرفت شي ولا حجو كدامي شي
بس هو من فتحتله الباب كلي اني خالك سلام
وشبكني وشكله فرحان بشوفتنا
مهما يكون سبب الخلاف المهم راح...
صار يوم ثاني رحنا للدوام ورجعنا
تجمعنا ع الاكل ومحد جاب سيرة الموضوع
بس اشوف امي احسن من قبل
يعني الكسرة الي جنت اسوفها بعيونها
مو اختفت انما قلت كلش...
ورا الغدا اخذتنا اني ويمامة اشترينا
فساتين للعرس
وكلنا اهل واعراسنا ببيت جدي تصير
لهذا مانتقيد بلبسنا
واصلا مانلبس حجاب لا من اولاد عمامنا ولا خوالنا ولا عماتنا
اني اخذت فستان اسود ردان مزركة بفضي
شبه شفافة بس الشغل البيها ميخلي الايد تبين بسهولة
ومخصر كلش وطويل ومن الصدر دائري بس حفرته مو واسعة
يوم ثاني رحنا للحلاقة اني ويمامة وماما
واني شعري اشقر ومخصلة عليه بلاتيني
وسويت مكياج عيوني اسود طوخ
كلش احبه لان يبرز وجهي اكثر ويبين لمحة الخضار الي بعيوني
هن عيوني صفر بس فاتح صح مو خضر بس بيهم لمحة خضار يبرزها المكياج
كملنا اني وامي واختي ورحنا لبيت جدو
اخذنا عابد بالطريق مرينا على بيت عمي
منذر جبنا بته شهد ومرته ..
وصلنا لبيت جدو ب٣ الظهر
جان شهر الثاني والجو زين مو حيل بارد
وشمس حلوة بيومها
شفنا الشارع مال بيت جدو مكطوع بالسيارات
دك هورن عابد حتى مل وماكو محد يفتح طريق
ركن السيارة ونزل حاجه الكدامنا وشوي تزحزح عود وخلانا نفوت..
بس ماكدرنا ندخل زايد لان رتل كامل واكف شيعبرنا...
كال تعالو نزلو بس دنكو وامشو بسرعة
امي ابوي يكلها بالمناسبات من تتمكيجين تبركعي يعني بسهولة تفوت لابسة بركع
ويمامة لفت الشال ع نص وجهها..
انة اخاف ع التسريحة مخلية الشال حجة..
واجاني عابد تغطي وعدلي شالج لا اغسل وجهج واخرب جهرتج
وانة ويا نتناكر ولفيت الشال عدل
ونزلت ادردم واداهر وياه
من نزلنا اجه فقار يمنا ركض
سلم وكل لعابد صير كدامهم سوي طريق وانةوراهم
الولد الي جان وي فقار واكف قريب من عدنا ويمه سيارة كمارو
بس ناطي ظهر
السيارة سودا لامعة تسحر واني ضعيفة كدام السيارات
مشينا كتله فقار بربك الواكف يم السيارة يستاهلها لو لا ؟
هو ضحك كلي طاح حظج شعليج
التفت عليه كتله مو بيه سولة
اذا شفت سيارة حلوة اباوع للراكبها يستاهلها لو لا
اذا لا حتى اخذ غيبته..
عابد مات من ضحك وامي كلتلي سدي حلكج خزيتينا انة الج
هو ضحك ودخلنا ..
امي والبنات راحن وفقار كلي..
يستاهلها ونص هذا حر والنعم منه
باوعت بوجهه ببلاهة حر صفته لو اسمه!
عابد يمنا كله هذا ابو سمرة راعيها ؟
اني اباوع بوجوهم واستمع للحجي
جاوب فقار ..اي صديقنا اسمه حر
بس شنو ذهب ماكو منه..
التفتلي عابد وضربني براسي
شعدج هنا شطحي جوا وعوفي سالفة السيارات جنج هتلي
سمعتي ابو الكمارو طلع ابو سمرة
يعني اخذي غيبته جوا عدل لحد يشوفج
حط ايده بظهري ودفعني يتشاقى...
فتت جوا واني افكر يعني هذا ابو الكمارو اسود!
زين ممبين من ناطي ظهر مانتبهتله اسود
بلشت امشي واسلم بس اريد الزم الدرج واصعد اباوع من غرفة ابن عمي حتى اركز على ابو السيارة
صعدت وفوك جاي يتحضرون يريد
يطلعون للزفة وصايرة ملحمة
تعديتهم ودوست فوك الرجلين ووصلت
لمودة مرت ابن عمي
دخلتني لغرفتها بحجة اعدل روحي
غرفتها سنتر كدام الباب ..
قفلت الباب وطفيت الضو ووكفت ورا البردة
اباوع مركزة ادور ع السيارة
شفتها بنفس مكانها بس محد يمها
بقيت مطنبرة بمكاني
وبرا هوسة عالكة واشوفهم بدو يطلعون للسيارات
انة ماريد اروح لبيت العروس دكت مودة الباب
عفية وطن من تطلعين قفلي الباب عيوني..
ايي روحي روحي لا يضل بالج...
جاوبتها واني ادور بعيوني
شوية وشفت واحد تقرب من السيارة
وكف يمها ...
لابس سترة وجينز وبوت انيق بشكل
صح نفسه مساع اليمها لاحظت بوته
باوعت لوجهه صح اسمر طوخ يعني من اخوانه البشرتهم سودا!!
بس شنو هالوسامة العنده يبووو
بدلت رايي اريد اروح لبيت العروس
فتحت الباب ونزلت ركض وحذائي بيدي
طلعت ركض جني ضايعه
اباوع للسيارات متروسة وكلها تدك هورنات
اني اتلفت اريد سيارة تاخذني
مشيت قريب واعدل بشالي
شفته وكف السيارة لان جان يريد يطلع
بس ماباوعت عليه
اجاني عادل ابن عمي وحط ايده ورا ظهري
ومشاني حيل ويحاجيني
متكولين وين جنتي سيارات كلها طلعت
يحجي عالي لان صوته ماينسمع
اخذني لسيارة العروس بس هي فارغة وبيها علاء
لان السيارات الكبار طلعت
والصغار كل واحد وماخذ شباب بسيارته
عاد صعدت وي علاء
هو ابتسملي وكال يلا فال خير حتى تعرسين وراي
بس وين جنتي كلها طلعت..
ها جنت اعدل ومالحكت عليهم..
يلا سهلة سهلة هسه نتوكل لان طلعو كدامي
ها اي اي ..احجي ومرتبكة ومشتته كله من ابو الكمارو هسه شعليه بيه بلة؟
فتح علاء اغاني ويدكوله هورنات
كتله رح تركصني هنا من صوت اغانيك
كال صبري ننزل وذبي لحم
وبقى يركص السيارة يمين وشمال واني مدنكة
رفعت راسي واشوفه نفسه بصفنا ويكسر على علاء ومبتسم
اجت عيني بعينه وبلعت ريك
مادري يمكن اول مرة اركز بولد
بقى يسوق وكلساع يكسر ويباوع
اني مدري شبيه كمت ارجف
كتله علاء لتروح تدعم وانت عريس ويكولون
وطن وجهه فكر من صعدت وياك
ضحك كال لتخافين قابل جديدة علينا هالسوالف غير حتى سيارتنا فرحانة
سويت روحي خايفة عليه بس اريد اجر حجي منه..
هو العتب مو عليك على هذا البصفنا
الغبي مايدري بيك العريس يمكن
هههه ولج هذا حر صاحبي واكثر من اخوي..
يااا صدك شكد عيب كلت غبي
بس شنو اسمه حر؟؟
اي هذا ابو ناذر من يصير عنده ولد يسمي حر
حتى محد يصيحله عبد
على كولته ابوي يريد يسونا بيض كوة هههه
ياا لعد شبي شكله مرتب وحلو
ها ولج عاد احترمي شواربي حجاها بزمخة ويتشاقى
ههه لا لا مو قصدي شي بس ردا على كلامك..
لا فاهمج يمعودة ههه...
بعد مارفعت راسي استحي من علاء لحد ماوصلنا ونزلنا لبيت العروس
شوي واخذناها ورجعنا
صعدت وي البنات بالكوستر وفاتحين اغاني
ونصفك ونصور همزين امي مو بسيارة جان طيحت حظي
وصلنا لبيت جدي ووكفت السيارات
بدينا ننزل شي ورا شي وازدحام رهيب...
نزلت اني وشايلة ملابسي لان تخط والموجة ماخذتني
درت وجهي شفته واكف وي شباب
بس اجت عيني بعينه غمزلي
دنكت بسرعة ورحت ركض
خفت احد شافني شكد عيب
دخلت للبيت وبلشت الحفلة...
ركصنا وتونسا وصار العشا
تشكلنا وبقينا نوزع
مرت خالي تعرفنا عليها خوش انسانة حبابة
وبناته ثنين هم بكدنا ..
كملنا العشا وبعدها كالو راح يزفومالبست عباتي بس الشال لان كلنا اقارب
كالو تسترو راح يدخلون جماعته ثنينهم وي الزفافة
بس منو تسمع كلها التهت
اجه فقار كال تسترن لا كلجن تدخلن جوا
عود تسترنا يعني
وكفنا كلنا تجمهرنا والهوسات الحلوة
دخل علاء والولد زافي وعلى يمينه اباوع
حر يمشي ويا ..
مدري ليش اشوفه وتصير عندي صعوبة بلع ريك
هو وياهم وعينه كل شوي تصير عليه واني اصفك وخجلانة كلش
بعدها ودو لغرفة جدو ..
عدنا عادة كل واحد يعرس يزفو بغرفة جدو علمود البركة
وصلو للباب والهلاهل والجكليت فلكونا بي
قبل لا يدخل علاء نزع رباطه
واندار على حر ولبسه اله وكامو يهلهلون اكثر..
عدنا عادة العريس ينزع رباطه قبل لا يدخل والي يلبسه اله يتزوج ورا...
هو لبسه وحضنه وتباوسو وعلاء بعدها دخل
والولد بقو يطلعون وحر وويا فقار والولد طلعو
بس قبل ليطلع باوعلي بنظرة ربكتني
استحيت ماعرف خفت مادري
بتنا بيومها ببيت جدو ويوم ثاني الصبح باركنا للعرسان ورجعنا للبيت
لان امي تمرضت ضغطها ارتفع
ورجعنا من وكت ...
بس رجعنا للبيت راحت لغرفتها نامت
وبابا كال سوولها عصير لان مااكلت
وشكله مقهور بسرعة يتاثر على امي..
سوينالها عصير وشوي شربت وولعصر يلا طلعت..
بس احسن شوية صارت زينة
ومنكدر نسالها لان اكيد ماتحجي..
صح احنا كلشي نحجيلها معلمتنا
بس نخاف نسالها عن اي شي
يوم الاحد صار الدوام ورحت كالعادة
عابد ياخذني ويا لان يداوم وياي نفس المعهد
اخذت محاضرتين ورحت
للنادي وي صديقتي
الاء ..
جاي اكل وحسيت شخص يباوعلي
عادي تصير هواي بس اغلس
بس هالمرة لفتت نظري ايده واني مدنكة
اجت عيني عليها..
معقولة هذا حر!
رفعت نظري اله شفته كاعد يشرب كهوة
ومخلي رجل على رجل ونظراته ساكنة
يعني متخلي الكل ينتبه هو وين يباوع...
بلعت لكمتي كوة وعفت لفتي ع النص وكمت
سحلت الاء وياي وهي مامفتهمة شي
بس المهم نكوم
طلعنا من الصالة مالت الاكل المختلطة
هي كالت شبيج كتلها شفت هذا قادر المزعج
واحد حاط عينه عليه ومو راحة
هي تعرفه لهذا عذرت تصرفي...
بلحظتها طلع حر ..اجه علينا واني لزمت بالاء
هي صفنت عليه وعليه
ووجهه عليه دهشة واستغراب مينوصف...
صار قريب علينا كال ..
السلام عليكم ..وطن بلا زحمة اريدج تودين هاي لعلاء
هزيت راسي وكلت ششنو!
انطاني علاكة مالت هدية وكال
مشكورة وسلمي على علاء هواي
وترخص وراح...
للحكاية بقية
بقلم شقراء(قمر كانون)