ما اتلفيني ويحيرني صدك
وبلحظة احلف ما اودك
و بس تأشر الف لعندك
وتلكاني قادم ملهوف لمحبتك
وشسويت بيه ؟
زهراء العراقية
لفيت الهم دولمة وكريمه سوت تمن احمر وگلت سمج ويه ام اسعد مدري ام مسعد،حطيتها ع الطباخ وطلعت كلي ريحه فلفل و بصل ، دخلت للهول و اشنجت من شفت بت خالته ريما يمنا ، كالعاده صورتها بعقلي سلمت عليها وردت ببرود من غير ما اتكوم جانت كاعده ابصف حماية الكبير كعدت بين لينا ورائد اني لابسة فستان محجبات سمائي وهزين زوج كريمه ماهو بس حماية ، فماخذه راحتي اكثر ،صفنت على لبسها هالمرة كعبها مو بسمار و لابسه قميص لفوق ركبتها جويتي وبنطلون ممزك
لو اعرف هاي اشجابها حظي المجرودة!
-رائد وين توتو
- نيمته بغرفة امي
بتعجب سألت انت نيمته
-اي
التهى بالحديث ويه اخوه وريما تداخل بينهم تفرض رأيها
حركات اديها طريقة نطقها للكلام ملفته الي اشلون رائد الي يدور نزاكه وترتيب تركها واختارني الي ، اني الي اعاند وياه واتصرف على هواي
حتى لينا شاركتهم الحديث اني رحت للهفة ، لهفة صح امها توها سكنت بغداد لكن هي من العام تدوام اهنا بيت جدها حتى عدها غرفة اهنا ، سولفنا سوة وضحكنا على سوالف سما وابو جهالها الي كبسها وظالة تترصده يصادفها وماكو ،
طلعت وقت الصلاة توضيت ودخلت لغرفة لهفة صليت وحدي ، وطلعت لأم اسعد ساعدتها بصب الزلاطة بالمواعين الطرشي و دخلت كريمه وامها بس هنه يدخلن المطبخ الصبايا ما يحبن دخلت المطبخ اضاهر صرنا ناخذ ونحط بالصحون على الميز الام كعدت يم عمي وكالت للهفة واختها
-اكعدي كريمة وخلي بناتج يساعدن نيوفر
ام اسعد راحت المرة ،
كامن وياي ، واني حطيت الدولمة بصينية و طلعت من المطبخ . احتاريت و استغربت من شفت ريما كاعده ابصف رجلي ! وهو كاعد ابصف ابوه الي متوسط الميز اشعدها هاي هيج ماخذه ميانه زايده هي مو حبيبته السابقة ما تستحي اصلا جايه دونا عن اهلها وين امها عنها عايفه مطلكه على حل شعرها
حطيت الصينية ورحت جبت ماي
شو ذني كعدن ياكلن اقلام دولمة لهفة واختها واني وحدي يا دوب نص الاكل نحط بعد اكو صحون الزلايط والروبة و الخبز و الفواكه ركي
رحت للمطبخ حطيت صينية و جمعتهم بيها احسن ما كلساع ارجع يربي ثوبي طويل محلاتي اعثر كدام ناطحة السحاب ريما ام رگبة زرافة كلبه حقيرة تشبه توبا ادردم بگلبي واحط ترست الصينية ترس وشلتها اتهزهز يربي وصلني سلامات ،
وصلت لمحني حماية و رائد ،همين
گاملي ابسرعة
اخذها مني رائد
- ثكيلة وين شايلتها
امه كالت عتبي عالهبنات عافنها وحدها
ظل هو شايلها الي و واكف واني احط بالصحون على الميز رحت صرت كدام ريما وكولت اله
-تعال اهنا
وكف يمي وهمس بخفوت
- صرت الج السفركي شتردين بعد كولي حقنه
كحيت من الضحك اريد الزم نفسي مكدر ما طلعت كلمه مرة كلتها بغضب
وهو هم ضحك
لينا
-ضحكونا عيني
جانت حاطه بتها بحضنها وتضحك من غير سبب ويانا !
اخوها كال الها.
-مرة ورجلها انت شكو عزول
شو هذا الاب حط ايده على متن مرته وكال
- تذكرين ايام زمان من جنت اصب وياج اكل محروك
وخرت ايده وكالت
-انت مو نيتك تذكرني باجمل ايام انت نيتك تذكرني بأكلي المحروك
ضحكو
كل الشفاه ضحكت الا وحده اتعمدت اباوع الها من كعد يمي رائد وتارك مكانه يسار ابوه وامه ع يمين ابوه واجه يمي من كملنا اني وياه حط المواعين ،اطفالي يلعبون بالصالة خلتهم لينا وانطتهم مكعبات غديناهم قبل الصلاة ام اسعد وكلتهم ، عمي فد احرجني بس يحمد بدولمه مالتي هو ابنه .
ياكلون بأديهم عادي وبكل بساطه حتى الاماية تاكل خبز ودولمه بأديها باوعت لريما خرب حضها تاكلها بشوكه من شوك الله عضامها ، اما زوجي ما صب اصلا منها ما قبل ، اكل اشوية تمن وزلايط وظل ياكل روبة ع كيفه ،
ريما
-لذيذة كولش دولمتج
-صحة وعافية
بكلبي اكول سم الهاري مطرح ما يسري تغصين بت اللذين عينج ما انشالت من رجلي عيني عينك دتكولين جيتي على موده ،من رحت اغسل سمعت لينا اتكول لبت كريمه الصغيره ليش كايله لريما رائد اهنا! من شافني وكفت يمهن سكتن ،
،
بعد الغده بساعه رجعنا اني وزوجي
احس برضا وانتصار ذاتي و ثقة جبيرة بروحي اشكد اشوف نفسي عادية واعاند وياه بأهمالي لنفسي لكن اليوم رفع من قدري وما انطى بيه كدام ريما ؛رحت للحمام اخذ حمام دافي بهذا الجو الربيعي الحلو ،
لبست سيت بيتي و طلعت اشوفهم شنو يسون كالعاده لكيت صوفي كاسرله تحفيه ورائد يكنس بالبقايا لا يتعورون ،
بعدها اخذ توتو و راح لغرفتنا ،
رحت وراه واديه بجيوبي
- رائد اشوفكم اليوم انت وتوتو سمنه على عسل
الابتسامة زارت محياه جملت وسامة اكثر
- اليوم صاحلي بابا
-صدوك !؟
باوعلي مستفسر ردة فعلي
- زين
-صدوك هاي ريما اشجابها شو دومها لاطشة يمكم
- ما اعرف ،
كالها وهو يلاعب توتو
- اسويلك شي اشربه لو اروح مسلسلي راح تبدي
جاوبني برخاوة
-روحي !
***
سما
نزلني علي براس الشارع وراح يوصل لهفة ،
فرعنا مو عريض
و تتوسط يمينه قطعه فارغه الناس اتذب بيها زبل و ابو زينب بيته ابصفها يجيب سيارة يلمها منا من بزع وكتب كلب ابن كلب من يرمي النفايا هنا !ما اعرف ليش كتب نفايا مو زبالة هو انت شخليت بالكلب مالتك المهم ما فاد منا من سيجها وخلص منها ، سيارات مصفوفات لبعض الجيران مضيقة الفرع ، حي شعبي لكن ناسه زينه وتتعاشر ، وصلت لنص الفرع
اتلكتني مرة من عمر ماما ،فجاة شو اتقربت عليه ولزمت كفي بأثنين اديها
-خالة ما اتعرفين من وين اتفوت الكيات
- هلا خالة الله يساعدج ، يا كيات؟
- يحفظج لشبابج يمة ما تندلين وين الكيات الي يودن لبغداد الجديدة ؟
- هاااا ، خالة لازم اصعدين للكراج لعد
براس الشارع خاله بس ينشلع كلبج يجن مقبطات
- ما اندل يخاله وين صاير
- تعالي خاله اتمشى وياج نطلع ع الساحة ويصير كدامنا الشارع ،
يا دوب وصلنا لراس الفرع واسمع اصياح شاب
-يمة يمة
باوعت للناس المارة اتباوع ناحيتي
التفتت ووكفت من شفته يأشر النا
-انتظري وين ماخذتها
مفتهمت ظليت ساكته مستفسرة
-وين ماخذتها جرها من ايدها برقه
-يمة خليني اروح اشوف اخوك وخواتك اتأخروا عليه ،
-الله يخليج يمة روحي وياي
هذا الشاب ابو دمعة مثل ما لقبته اني وهاي المرة امة
- يمة اخوتك خاف تاهو بالسوك حباب ييمه اخذني الهم
- اي اي راح اخذج تعالي وياي ادخلي لجوة و اني اجيب الج تكسي
اني واكفه اتفرج عليهم يعاملها كانها طفل مو امه ، هزيت براسي واشرت بأيدي دسأله شنو القضيه
جاوبني بزجر ممزوج بنتر و حدة وحتى خزرني بعيونه
- روحي انت مشكورين
خلاني اروح لبيتنا شبه الراكضه و هو خلفي يمشي بامه اخذلتي نظرة معاتبه وباوعت اله من ورة خشمي مكشولة ودخلت ساده الباب حيل وراية ، احرجني مقصدي التطفل بس دسأل لان اشوفها مرة معدله و ضابطه لبسها و من اهل الله اشبيها خطية ، شو هذا نتر بيه العدواني المزعج اكرهك ،
،
ثاني يوم الصبح خابرت لهفة
-لهوفتي سوري ع التأخير
- ولج راح اطير عليه المحاضرة الاولى وينج
-بالطريق ولج علي دكة دكة ناقصة راح لصديقه بالمستشفى ..
همست لا رضوان يسمعني
- طاح الساني كثر ما اتوسلت برضوان يودينا
- يالله حبي لا تتأخرين
،
وصلنا ع الشارع رنيت الها طلعت
تركض كانت لابسة تنورة بينصل و قميص ابيض و يلك اسود مفتوح ، شعرها ذيل حصان سارح وراها ،نازكه بترتيب نفسها وبسيطة هي لهفة دخلت لشغاف قلبي ودخلت لقلبها خاصه اكو حلقه وصل نيوفر صديقتنا الثالثة وشكلنا احلى ثلاثي مرح ،
اني ابصف رضوان
دخلت
-صباح الخير ،
- صباحوو
رد رضوان وهو يتحرك
- صباح النور ،
انطلق بينا صامت رضوان ماعندي وياه حديث مشترك مثل علي ياخذ الطريق كله حجي و ياي ويه لهفة ، هو يدوام بجامعة المستنصرية مو يمنا ، وصلنا وكف رضوان باوعت للهفة الي تهفي بايدها وغمزت معرفت شنو قصدها
ضحكت
- انتظري انطاني حمرة و اشكد احبها لهالحمرة ٢٥
- ادخلي ابسرعة وحلكج هذا سديه
بلعت ريكي بالعه وياه النصيحة المعجونه برزالة ،
نزلنا
لزمتني من زندي لهفة
-ولج ناااار نااااار وشرار هالرضوان يوووومه
كلبي الصغير ليتني اني الي رزلها حمش
- يا ولج بس لا انعجبتي برضوان
- اي ولج خش لگلبي
-متأكد انت بت الاستاذة كريمة.
-يوووومه ولج اخوج هذا مربك مربك دهولني ولا باوع ناحيتي ذكرني بأخوية وربي مثله حمش
-الله يحفظه الكم
-اكلج هو هذا المطلق السنكل موو
نطقتها وهي تغمز الي
-هههههي هذا عكرة وعقده انعجبي بعلي المرهف بيج واسكتي
- يوه علي كيوت متوفر كولت الج مالي نظرة عليه هذا من عمري ، اني ادور عقده
-اوف واني مثلج ابو دمعة كبسني كبسة ثانيه البارحه
-عزة سد شنو هالمرة بوجهج
-ههههه من نخلص احاجيج
- اكلج اخوج الحمش هذا ما يوصلني وياكم بالرجعة
-لا عيني امج تاخذج مو هذا اتفاقنا ما انصلب اني انتظرج تبطين
-حريمة كون علي يبات يم صديقه باجر ويصبح بوجهنا الحمش
-لا خطية أخر ع دوامه مو ع طريقنا
ضحكنا على افكارنا وكل وحده راحت لقسمها ،
***
نيوفر
رجعت مخابراتي ويه لينا بعد ما رجعت هي مثل قبل بعد ما صارت مطلقة ،
ورجعت تطمنت الها ورجعت اسولف الها تفاصيل عثراتي مع رائد ،
بعد حديث طال بالرسائل تعبت هي تكتب وترد عليه اني غلطانه وراح اضيع رائد من ايدي ، طبعا البارحه كنا متلاغين اني وياه ، رغم لينا ما ترد عليه بس تقرة من ارسل الها مخاوفي وبعدين تنطيني نصيحه مريحه هالمرة اترادد وياي ومن تعبت اتصلت اتصال ،
- انت دا اتظلمين رائد وياج ،
-لينا عوفينا منه وكولي الي امج بعدها تلح عليج
- شعوفج ، لج اشبيج اكو وحده تستقبل زوجها بهذا البرود راح افصل الخط وروحي اله و فكيها عاد
- اكلج انت عبالج اني مهملة ، لا انت غلطانه حاولت وياه بالبداية بس شنو اللبس وشنو اسوي ما يعجب خبلني خليني هيج على راحتي هو بكل الاحوال اني معاجبته ماخذني لخاطر الاولاد طلع
-يااه صدك تحجين ،
- هيج مرتاحه ، بعدين تعالي بيت جبير واطفال و هو بس طلباته وتدقيقه يموتني تعب راسي ملحك احكه ، تصوري لازم اكوي اله جاروبته ههههههه
- يا قلبي ما يصير تنطيه بيه وحتى وان كنت معالجتج اموركم خاصه هذي
- لينا لا والله مقصدي ولا بيوم طلعت شي لهلي خاف عبالج، بس اني بكل الاحوال معاجبته على شنو التعب البي اله الي اكدر عليه وبس
- خليج هيج يعمري هيج ، وسلمي الي على رائد هذا اذا اظل !
سدت الخط لينا بدت تتذمر مني ، يمكن لان اخوها هو زوجي فدا اضوجها ، الاحسن ارجع اتحفظ كدامها وما اسولف الها شي عبالها ويه الكل هيج اطلع اسراري مع اني والله ما كنت احجي هيج امور بسيطه لسما ابد وهي اقرب شخص الي
*
نيوفر
اثر بيه كلام لينا رغم اني عارضتها ! رحت غسلت الكراج ومسحت المرجوحه مسح و دخلت للحديقة المزروعة الم ورقه و وصخ النخله ، و دخلت للبيت عدت تنظيفه مرة لخ سويت كلشي على اتمم وجه حتى من يجي يرتاح ما يحسني ما مهتمه اله ودخلت للحمام سبحت وسبحت الجهال لمعتهم اله ، و فرشت فرشة جديده وعطرتها ، ما اعرف ارسم عيني بعد التجارب رضيت بالكحلة وسكتت بلا ريميل وخط هو اني اسمه الثاني معرف انطقه ، شسورت شعري و لبست سيت اسود يحب الالوان الغامقة ، ودزيت اله مسج
- حبيبي جيب وياك عشى النا راح اعشي الجهال وانتظرك مراح اتعشى ، لا تتأخر مشتاقه الك حيل وحطيت اله قلوب ،
***
رائد
استقبلتنا ريما استقبال حار اني و امير ابن خالتنا الثالث و اخته و اطفالها عازمتنا على العشا ، ما كلت لنوفه من اتعشى برة ما اكول الها وهي ما تسأل ولا بيوم انتظرتني واني هم دوم اجي ب ١١ لو ١٢ اذا اطلع كلك من المعسكر فما تدري البنية موعد جيتي ولا اناوي انزل لو لا الحاح ريما ، فاجئتنا بعزومتها النا ولكيت حتى لينا حاضره مسويتها على شرف استقلالها واخير والدتها صالحتها ورضت عليها لان جانت على خصام بسبب العزلة ، و امها هم كانت حاضره وبس تلمح هي ندمانه ،
كان عشاها جاهز كالمعتاد تعرف شنو احب وشنو اكره ، اكل وعيني على البيانو المتوسط الصالة والتحف كلشي بشقتها يعجبني واعرفه مو ذوقها هيج كأني اني مجهز الشقة ، كمت طلعت بالبلكونة بعد العشا وكفت هي يمي وبيدها كوب شاي
- اتفضل
اخذت منها وسألتني
-عجبتك الشقه
- اي ذوق انيق
اتقربت عليه وهمست
-لأنه ذوقك ! كلشي حطيته اهنا واني اشوفه بعيونك ،
راحت للاهل الي بالصالة و اني ظليت مركز بكلماتها ، مستغرب اهتمامها بالسابق كانت غير وهسة شخص ثاني
اضاهر تجربتها غيرت من طباعها وصقلتها الايام ،طلعت تليفوني اتصل بصديقي اشوف الامور بالمعسكر ،شفت مسج من نوفة اول تالي تراسل خاف محتاجه شي او صاير شي ، فتحتها ظليت فاتح اعيوني مستغرب معقولة هاي كلماتها ! ، تركت الشاي على حافة البرنده و دخلت ، مترخص منهم
اجتني ريما
-بعد وكت
لينا
-عبالي اتظل انروح سوة
- مو عندج سيارتج
-ما اجيت بيها ما اسوق بالليل اني بيت خاله جنت واجيت وياها
-حبيبتي خلي لعد هي هم اترجعج ، ما اريد اتأخر على نوفة تنتظرني خطية
تدخلت ريما بالحديث
-ها انت ما كايل الها لا تنتظرك
كأنها اتريد اتوكعني بالكلام
- تستاحش وحدها اني ما اخليها بالعاده لو احد اخوتها يمها يبات او هي اتروح بس هليام دحاول ارجع بالليل فظل وحدها ،
راحت عن وجهي وسوت نفسها مشغولة ويه امير، اترخصت وطلعت من عدهم طاير طيور بسيارتي لحمامتي تنتظرني ، رسلت مسج جاي مو اتنامين ، ابسرعة ردت ، بنتظارك حبيبي ، رفعت الجهاز وقربته اكثر لنظري ، كاتبة حبيبي ! ، لا خاف متوهم قربته اكثر تهجيت الحروف تهجي ، ايقنت اني مطلع ريما من اعماق قلبي ، لأن ماعنت الي شي، اساسا اذا افكر بيها ابسرعة اقارن نوفة بيها ، اذن الحب هو انك اتشوف مئات الاشخاص وما يروق الك الا حبيبك ومالك فكرك ،
نزلت لمطعم وصيت على طلبية و رحت جبت حلويات و مكسرات اتحبهم و رجعت اخذت البيتزا و طلعت للبيت
دخلت اول ما وصلت للصالة اتلكتني ويا محلا ابتسامتها الراضية ،
-الله يساعدك
اخذت مني الغراض واشكد اعشق حركتها هاي بس عدها شفتها لا عند اهلي المرة تتلكه الرجال هيج تاخذ المشتريات ولا لبنى ، راحت للمطبخ واني رحت غيرت ابسرعه ملابسي ، ورجعت الها
-وين الجهال
-نيمتهم ، تأخرت الا قريت الرسالة ،
حجت وهي اتحضر بالكلاصات
- سوري ، جوعتج
-تمون ،
كعدت واني ابصفها كعدت
مو كدامها ،
-شنو هالحنية نازلة عليج ، اتراسلين و تتلكيني بضحكة مو شادة شعرج كباية مثل بيبيتي
ضربتني على صدري
- مو مال واحد يداريك لازم تعلق
ضحكت على حركتها
اخذت ايدها بستها
-عاشت اديج
-على شنو مسويت شي حبيبي
- عيدي عيدي
-هههههه ما اذا تكرر اصير ماصخه ،
- ههههههههه
-ليش تضحك عليه
يلا ناكل ،
طلعت قطعه وحطيتها كدامه ، وبديت اكل
-شو متاكل ؟
من انتبهت اله الا كام ياكل ببطئ جان حاط ايده ويباوع لوجهي معرف اكل ،
هم رجع ما احسه ياكل باوعت اله هم نفس الصفنه ،
-شنو انت اتحب البيتزا ليش مدا تاكل ؟
- شبعت بشوفة وجهج
اليوم امي اداعية الي اضاهر نوفة كاعده وما نايمة . ريتج دوم هيج
- وانت هم ظل هيج لا تعيب ع اقل شي وتحبطني ،
-يمتى معيب اني ،
-مممم من اجيب شي اني والبسه احسه ما يعجبك ، عكس الي انت تشتريه ، هذا السيت انت جبته ترة
-وانت ما لبستيه
-اي عاندت لأن قبلها بيوم جنت مشترية
ملابس بيتيه انت جبته شنو معاناه
ضرب جبينه بخفة وضحك
-يا الله على الحساسية مالتج وغلاوتج ما فكرت هيج ، بس شفته وعجبني عليج وتذكرتج انت مشترية ملابس بس ناسيه اجيبين هيج نوعية واني احب اللبس المجسم جبته شنو غلط الواحد يدلع نفسه ويه مرته لو غلط
-مممم مدري
-ما شبعتي ؟
- ههههه رائد نسهر ع فلم ترة اريد سهرتنا اطول
- بأمرج سيادة الزوجة العزيزة
-هههه حلوة هاي ، اروح اجيب الببسي اتريد
-لا لا
رحت اجيب من الثلاجه شفت فوني ع الكاونتر ناسيته ، والرسائل مال الواتساب تهل
فتحته
واني راجعه للصالة لأن كعدتنا صارت بيها
وجبت الميز حطيتها بيها حتى اتصير كعده رومانسية ،
هاي محادثة جماعية بينا احنا النساء اخوات رائد ومرت حماية والبنات لهفة وغيرها من بناتهم ،
شو كريمة تحجي عن عزومه ريما للينا
-اي وبعد منو جاي ع العشا اليوم
- خالة و امير ونهلة و فرزدق ورائد اجه ويه امير
-شنو سوت عشى وليش ما عزمتنا
-هههه مدري بصراحه ، اكل جاهز تدرين بيها ما تحب.......
ما كملت المحادثة واباوع لرائد الي يا دوب اكل كم قضمه من البيتزا وهو يحبها ! ، مسوي نفسه مهتم وهو جان يمها من شافني اباوع اله شالها يقضم منها اجيت و ذرة عقل ماكو برأسي، جريتها منه استنكر تصرفي
بحدة وصوت عالي وهو اشلون يكرهني من اعصب
- لا تجبر نفسك لا تتقيئ عيني
متبون وجايني ، ليش جابر نفسك
- اشبيج !؟
-اشبيه بعد ، ست ريما ليش اتعزمك وحدك وما تعزم وياك عائلتك الي هي اني .و تجذب عليه
***
رائد
- ما كذبت عليج !
- شنو من برود عندك هااا ليش مكلت ماكل ما اريد
-ما ردت اكسر خاطرج
-ما يضم بس الي يخاف من شي ، والي عنده شي ، شعندك وياها هاي الصايعة اجيب زلم لشقتها ما تستحي ، والله لو ما عيب لاخذ رقمها اهزئها ،
كنت ساكت و اباوع لوجه الي كان صافي ورايق اشلون تحولت تعابيرة ، تعابير انطتني شعور مميز حسيت اني اهمها و او شي يخصها هذا الشي جديد عليها ، زادتها الق و جمال نيران الغيرة ، وأخيرا شفيتي الي و تمكنت من دخول حصون فكرج الجليدية وحولتها نيران تحركنا اثنينا بمحبة العشاگ ،
رديت عليها ببرود ضاهر عكس الي يدور ببالي
- وشصار يعني عادي
تركت الها الميز وكمت متيقن ردة فعل عصبية منها
- تجبر نفسك وكاعد يمي وشبعان بيج طلع كلامك هذر
ما ضايقتني كلماتها عبالها اتعصبني ما تدري اني ازداد حماس و اثارة كل ما تزيد نبرة صوتها حدة وثورة
- مو كلت ردت اكسر بخاطرج مو زين
-كثر الله خيرك ، زحمت نفسك ،
درت وجهي عليها شالت البيتزا و ذبتها بالزبل ورجعت اخذت الكلاصات
فتحت الحاوية
-ترة ذولة ينغسلون ما ينذبن
باوعت الي بعصبية و غيض
حطتهن ع السنك.
- لا تباوع الي ، روح كمل واشرب جاي اقصد شاي وقهوة واحتسي العصير يم ريم ام رگبة
ما كدرت الزم نفسي واكبت ضحكتي العالية اكثر
اختنكت ضحكتها
-احتسي !ههههههههههههههههههههههه هههههههه ههههههههه
اريد اسكت فقدت من الضحك ضحكت ضحكه فاقدها من سنوات طويلة
حتى دمعت ، شفتها متوخصرة وكدامي واكفة
-هيج تضحك علية موو
راحت من يمي و دخلت للغرفة غسلت وجهي بالسنك اتخربطت احوالي ما ادري شطلعها
-لا تغسل اهنا عيني ترة اكو مغسلة خاصة
بنفس حركتها و عصبيتها لزمت الخلاط وهم رجعت للضحك الي ماله داعي بس تقليدها عليه ما اشوفه غير فكاهي
خاصه احتسي من السانها مثل العسل
دخلت رحت وراها قافلة الباب
- افتحي نوفتي ،
-روح لريمتك الي ما يحفظ كرامتي ما اريده
-لج عزومه بيها عوائل مو بس اني
-اي عوائل لعد ليش اني ما ادري بيها لو اني مو مرتك والله يا الله ، خليني ساكته احسن ، كلت اني مقصرة وخطيه ما مهتمه بيه اخاف ست ريما اتلف عليه ، طلع هو الي لاف عليها ويتعشى و يتهنة وياها وما يفوت فرصة وياي هم اجاني بعد ما شبع عدها تهي بي ،
هاي هي بعد مالي علاقه بيك روح كل يوم اتعشى واتغده يمها خل تكوي الك جواريبك همين بطريقها
سطرت الكلام منا من حسها انقطع ،
هديت الباب ، وعرفت سر تغيرها اثاري غايره منها !
نيوفر بدت اتميل الي ، واتغار و ريما نقطة ضعفها الي كدرت اتخليها هيج اسوي ، هاي هي لعد يا نوفة عرفت مسلكي وياج ! رجعت للصالة افتر هايم بيها وبتصرفتها الصبيانية الي حيت بداخلي مشاعر الشاب المرغوب بنظرها
اكيد بدا القلق بداخلها وما راح يكحل اعيونها النعاس اليوم ، بوجهي الطلاقه وبعيوني الفرح يشع ابتهاج وادندن واغسل بالكلاصات ! ، اشتعل لهيب الحب بداخلي ومنتظرها اشوية تهدأ واروح الها
كنت اعرف لابد بيوم يشرق الضوء بنهاية النفق ، واليوم رضت كبريائي بثورتها ،
عزلت الها المطبخ و دكيت الباب بهدوء
- ثلاث ثواني اذا ما انفتح الباب ينكسر القفل ، شوفي التبذير اذا انكسر وانشخط الباب كله ابدلة
احجي واني ابتسامتي ما واسعها وجهي
انفتح الباب وجانت مبدلة ملابسها بكلبيه عادية
-الله محلية الثوب بجسمج
لانت ملامحها ودخلت انطرحت واني وراها
كالت
-اريد انام
**
نيوفر
حط حلكه على اذني كركشني وقشعر بدني ،
- احبج
- لا اتكركني بأذني
-احبج ،
عادها
- وريما ما تدخل شقتها ،
اخذ منه هسة وعد افضلي واعرفه يوفي بوعده
- ما اوعدج اذا ظليتي لابسه هذي
-هههه عرفتك كارهه هههههه
خلعتها ،و وعدني
اعرف خلافات الازواج هي تجديد للحب وكانت ليلة دافية مليانه حنية منه سرقني من نفسي لمرسى ثاني وعلى ضفة ثانيه من الحياة ، بخبرته وحنكته بكل شي يخص اسعادي ويرسم على وجهي الرضا كلماته ما تسكت عن الغزل بيه و تقبيل كل جزء مني ، و يشيد بجمالي وترافتي ، خلاني انصاع اله
،
ازعجني تليفوني الي يرن وكل ما تخلص المكالمة تعاد ،
كام رائد
كعدت اني هم انتجيت على المخده
-منو يدك عليه رائد
جان واكف يم الميز وفتح خط
- الو ، اهلا خالة ،
خير كولي ،
.اني اهنا باوعت للساعه ب ١٢ و ٥ بالليل
سد.الخط
-شنو هاي خالة تمارة اشعدها متصلة
- البقية بحياتج بيبيتج ام والدتج الله اخذ امانتها
- بيبي !
يتبع