لاخر نفس <3
الحلقه 13 😍
مشيت خذيت شيتات وطلعت وروحت للحوش ومعتز مازال ماجاء غيرت دبشي
ولبست سترتش اسود وتيشرت وردي وخليت شعري مطلوق وخشيت المطبخ طلعت الغذاء وقعدت نسخن فيه
وصوت الباب انفتح طلعت من مطبخ وشفته
كان وجه باين مش تمام بكل
معتز" السلام عليكم
انا " وعليكم السلام
وكان جايب مع غذاء
انا " درت غذاء
معتز " امتي لحقتي اديري وعندك جامعة
انا" قالولك بايره نعرف نصرف
معتز " كان تبطلي طولة لسان تقعدي كويسه
انا" للاسف مانقدرش خصوصا معاك تلقائيا يطلع
معتز " نخش نغير دبشي ونجي
انا "تم
كنت دايره لازانيا وشربة عدس وسلاطه
وتيت الطاولة وجاء وقعد ساكت وماعطش اي كومنت
انا" كنك في حاجه
معتز " رفع راسه وجت عيني في عينه
كنك
انا " انت كنك ساكت في حاجه
معتز " لا ولا حاجه
شن درتي انتي في جامعة
انا" حضرت محاضرتي وروحت
عادي يعني مافيش حاجة
معتز " باه كويس
انا" سكتت لانه حسيته مضايق ومايبيش يدوي
عند نور
طلعت من المدرسه ونحس في حد يمشي ورايا لين خفت وشارع كان فاضي
قعدت نسرع في مشيتي خفت
جاني صوت نعرفه كويس
مهند " راه اطيحي بس
نور "برمت
هو انت ؟
مهند " من تحسابي
نور" ولا حد
مهند " كنك خفتي
نور " فجعتني بس نحسابه حد يعاكس
مهند " وكنك ماتخلي عمي يروح بيك
نور "المدرسة قريبه مش بعيده راه بينا شارعين
مهند " حتي لو شارعين الدنيا تخوف
نور" قعدت تمشي وهو يمشي جنبها
بابا عنده شغل مش فاضي
مهند " نروح بيك انا
نور " لا طبعا
مهند " وعليش لا
وفي نهاية ولد عمك انا
نور " لانك ولد عمي لا
مهند " بحت فيها وعليش
نور " مافي شي
انت ليش كنت جاي ورايا
مهند " كنت طالع للمحل هنا وشفتك جايه
نور "اهاا
كيف حال يدك توا
مهند " كويسة
تو فوتي يدي وقوليلي عليش لانك ولد عمي لا
نور" مانقدرش نحكي
مهند " دزيتلك مسج كنك مارديتي
نور" شن نبي نرد عليه
مهند" اي حاجه قولي
نور" خلاص وصلنا للحوش
وخشت وسيباته بره
مهند " ماعرفتش كنها حسيت انها تهرب مني وماتبيش تحكي معايا غمتلي بكل منها
جاء وقت نبي نمشي للمعهد
معتز كان في الصاله وحاط يده ع راسه
انا " فيك حاجه انت مش طبيعي بكل اليوم
معتز "لا راسي يوجع فيا بس
انا " باهي تبي حاجه انا نبي نمشي
معتز " تو نوصلك انا
انا " شن قلنا نحن !!
معتز " ماورايا شي توا واصلا طالع مكسد مع اصحابي يعني في طريقي مش غلا فيك راه
انا " سامط
معتز" هيا قدامي
وطلع وسكر الباب ونزلنا
رن فوني وكان مهند
معتز " منو
انا" هنودي
معتز " هنودي صـار ؟؟ :/
انا" ضحكت وفتحت عليه
انا " ايوه
مهند " مرات خويا الغالية
انا" كنك مرايف عليا ران
مهند " نبيك في موضوع
انا " الي هو شنو
مهند " وين قاعده في الحوش
انا" في طريق طالعه للمعهد
مهند " كنت نبي نحكي معاك في موضوع اختك
انا " هنودي مش وقته الموضوع هذا
مهند " امتي باهي ازف
معتز " شن تحكوا انتو
مهند " الاخ النكدي جنبك
انا "هههههههههه اها
مهند " نسكر فكيني منه بعد تقعدي فاضيه نبي نجي نحكي معاك
انا "تم سلام
معتز " كنه
انا" موضوع خاص
معتز " لما نسالك انا تجاووبي
انا" كيف تغار ههههه
معتز " ماتستفزينيش
انا " بحتت فيه
انت سالت وانا قتلك موضوع خاص
معتز "شن في بينك وبين مهند
انا" نعم شن قلت انت عاود
معتز" نحكي جد
خوفك عليه امس وصبيتله تجري وهنودي
انا" قعدت نضحك من جدي
معتز " ماقلتش نكته انا
انا" انت كلامك كله يضحك اصلا من جدك تسال في سؤال هذا بجد متخلف انت
معتز " سكري فمك
انا "مش ساكته مش لعبه انا تقولي اندير الي تبيه
معتز " خبط بي يده ع دومان
معش ننبي نسمع صوتك
انا " وجعتني انه عيط في وجي برمت وجي للجيهة لاخرة
ودموعي حينزلن بس مسكت روحي
لعند وصلنا للمعهد جيت نبي ننزل
مسكني من يدي
معتز " ساعه كم تكملي
انا " مش داعي اتجيني لاني مانبيش نروح معاك
معتز " فنص فيا
كلمتي مانعاودهاش
انا " تو نكلم هنودي يروح بيا اطمن :/
معتز " نسرين
انا" اطلق يدي تاخرت
معتز " اخره مره نقولها لكي ساعه كم تكملي
انا" 7
معتز " نلقاك مروحه
حتصير حاجه ماتعجبكش وماتجربيش تحديني
انا" فكيت يدي منه ونزلت بدون مانحكي معاه
قهرني همجي هذا خزي
معتز مشيت للقهوه لاني كنت متفق مع علي انتلاقوا غادي
علي " خير ي طير
انا " اطلبلنا قهوه
علي " تمام قعمز بس
انا " شن امورك
علي" تمام كنك قارن حواجبك شن فيه
انا" خليني ساكت
علي" متعارك مع مها ولا نسرين ولا شن صاير بالضبط
انا " حسيت روحي اناني
علي" عليش
انا " مانبيش نسيب نسرين ولا مها
علي" هههههههههههههههه حلوه هذي
انا" تعاركت معاها
علي " عليش :/
انا" بديت نتعلق فيها
واانا مانبيش غصبن عني بس هيا رفضتني
علي " طيح سعدك حبيتها في اسبوع
انا " يمكن ههههههه
علي " ومها
انا" مانقدرش نوخر ونسيبها نطلع عيل
علي " كيف تحب هذي وهذي في وقت واحد فهمني ازف
انا " مش عارف روحي شن نبي اصلا قتلك دايخ بكل
علي " انت حالتك ميؤس منها قتلك من قبل حتحبها وانت قتلي لا
انا " تععاركت معاها قبل مانجيك هنا
علي " لانك متخلف
انا " هيا استفزتني
علي " انت ماتلعبش مع البنت كان مازالت تبي مها
حرام عليك تلعب بي مشاعرها ازف
انا" اسبوع قعدت معاها بدون اي ضغط من مها ومكالمتها حسيت اسبوع راحه ليا
علي " مش ع اساس تكرهه ومش متقبلها بكل
انا " انقلب عليا كله
علي" يستر الله وخلاص منك
ورنت مها
علي " منو
انا " مها
علي " رد باهي انا توا نبي نمشي عندي مشوار نبي نديره وبعدها نحكو فون تم
انا " تمام
انا " طلعت من القهوه وركبت في سيارتي وعاودت عليها
مها " حبيبي
انا" خير
مها " كيف حالك
انا " كويس انتي شن جوك
مها " تمام بسمع صوتك
وين قاعد
انا " في القهوة مع علي
مها " اهاا باهي تغير جو
انا" نحس فيك تبي تقولي حاجه احكي الي عندك
مها " لا مافي شي مغير كنت مرايفتلك ونبي نحكي معاك
انا " حتي انا كنت مرايفـلك
وسمعت صوت هرجه
انا " وين قاعده انتي
مها " قاعده عند خويلة
هرجة البنات
انا " كنك ماقلتلي تبي تطلعي
مها " نسيت حبيبي خلاص ماصا رشي
انا " مش اول مره هذي
مها " اسفه مش قصدي ي بيبي ماكنتش نبي نمشي بس ماما جبرتني ماتبينش نقعد في حوش بروحي
انا" اخر مره اديريها فاهمه
مها " حاضر ي قلبي
قعدت نهدرز مع مها ولين فطنت الساعة 7 ونص
انا" مها سكري توا
مها " خليك مازالت ماشبعتش منك
انا" نحكي معاك بعدين
نبي نسوق توا
مها " وين ماشي باهي مروح للحوش
انا" مها بطلي قصقصه هذي فاهمك انا شن تبي توصلي
مها " من غيرتي عليك بس نسال انا
انا" خلاص سكري توا سلام
مها " باي حبيبي نحبك
سكرت ومارديتش عليها
ولعت السيارة ومشيت للمعهد
هاله " انتي طول المحاضره راقيلك شن صايرلك
انا " خليني في حالي توا
هاله " جايك معتز
انا " اها روحي خلاص
هاله " بابا يستنا بره
انا " تمام اطلعيله ماتخليش يستنا
هاله" جوك مش عاجبني بكل
انا" بعد نهدا تو نحكوا
هاله "تمام بجوك
روحت هاله وانا قعدت نستنا في السي السيد يشرف ويذكرني ويجي مابيتش نرن عليه بكل
شويه وشفته خاش من باب المعهد وكان ماسك فونه يبي يرن شكله عليا صبيت وطلعتله بدون مانحكي مع كلمه
ركبنا للسيارة وانا ساكته ومابحتش فيه
لعند وصلنا للحوش ونحن ساكتين
معتز " نسرين
خشيت لي داري وسكرت الباب ومارديتش عليه
غيرت دبشي وخذيت شيتاتي وقعمزت ع السرير نقرا
تاخرت واجد في قرايتي وحسيت الدنيا كلها تركمت عليا
سلوي" ي ماما شن فيها لو مشينا لعيت جدي يعني
عمتي احلام "عارفتك ماشيه تشوفي جمال ريحي روحك في حوش هنا مادام انا مش ماشيه غادي انتي ماتمشيش
سلوي " وعليش هبه وصفاء يمشن عادي
عمتي احلام "قلت كلمه انا معش تعانديني
سلوي " اوف يعني ننحبس في حوش انا
عمتي احلام " ايوه خليك هك هنا قدام وجي
يعني تبيني نصدق انكم ماتحكوش مع بعضكم ومافي بينكم شي
سلوي " مانطيقه بكل انا جمال اصلا
عمتي احلام " باهي ليش وافقتي عليه
سلوي" ولد خالتي ماهو
عمتي احلام " عليك طروح ماتعرفي تكذبي بكل انتي خشي لي دارك احسن ماننقلب عليك
وعليش تبي تمشي غادي امس كنا مع بعضنا
سلوي" وووه عليك عيله ظالمه
عمتي احلام " خشي اقري في دارك خيرلك
سلوي" باهي صفاء وهبه ليش ماشيات
عمتي احلام " صفاء ماشيه تقرا هيا ونور لانه عندهن امتحانات وهبه فاضيه ماشيه معاهاا انتي ريحيني وقعمزي
عند عيت جدي
مهند خشيت للحوش لقيت نور وصفاء مقعمزات في جنان ويقرن
قعدت من بعيد نتفرج عليهن وهنا يقرن
نور" معش عرفتها بكل انا هذي
صفاء" الدرس هذا كله مش فاهمته
نور " والحل بكره امتحان امتاعنا
صفاء" انا كنت عابيه عليك
نور "قعدت تبكي
خايفة بكل انا
صفاء" بلا بكاء وخلينا نحاولو في
مهند " شن اديرن
نور كنك تبكي
صفاء" خايفه من امتحان بس
مهند " تي ي هبله توا تحلي
صفاء" ماهو في درس مش فاهمينا
مهند " هاتي ورينين
نور "مسحت دموعها
تفهم في رياضيات
صفاء" عيونها قلوب صاح نسيت انك متخرج من رياضيات
مهند " قعمز ع الكرسي الي جنبهن
اول حاجه امسحي دموعك
نور " مسحتهن خلاص اهو
صفاء" هيا اشرح وقربت الكرسي امتاعها من مهند وقعدت تبحت فيه
نور "فطنت لي حركات صفاء بس تجاهلت قلت خليني في قرايتي توا احسن
قعد مهند يشرحلنا وانسجمت امعاه
عنــددي انا
كنت نقرا وغمتلي من معتز ومانبيش نطلع من الدار بكل
لين انفتح الباب الدار
انا " رفعت راسي
معتز " تقري ؟
انا" مارديتش عليه وطبست راسي
معتز " نحكي معاك انا
انا" وانا مانبيش نحكي معاك
معتز " مش قصدي امبدري ننفصل عليك
انا " انت اساسا فطنت لي كلامك الي قلته امبدري
ولا انت هكي تجرح الناس بعدها تقول مش قصدي حتي كلمة اسف مستخسر تقولها خايف ينكسر غرورك كان قلتها يعني
معتز " موضوع مش مستاهل هذا كله
كنت متعصب وانفصلت
انا "انت من يوم ماعرفتك وانت متعصب
بالله عليك خليني بروحي
معتز " ماتبيش تطلعي
انا" مانبيش شكرا
نبي نقرا ممكن تسيبني
معتز " سكت وطلع من الدار
خزي مغرور يحاسب الناس بي جوه هو بس
خذاني الوقت نقرا مافطنتش للساعه لعند جت ال12
طلعت مالقيتش في الصاله قلت اكيد رقد ولا يكلم في سنيوره امتاعه
خشيت قعدت اندير في حاجه ناكلها كنت جعانة بكل كليت وطلعت وانا راده للدار نسمع في صوت تلفونه يرن في الدار وهو ماردش قعدت نستنا نبي نسمع كان رد
وقعد الفون يرن يرن
كنت نحسابه مسيب فونه في الدار وطالع فتحت الباب الدار بي شويه وشفته كان راقد ومش متغطي اخره استغربت غريبه مش فاطن لي فونه يرن قربت منه
وشفت الفون كان مها هيا الي ترن درت الفون صامت وجيت نبي نطلع بس حاجه خلتني نرد استغربت انه ماحسش بي وجودي بكل وهو نومه خفيف اصلا
انا " معتز وحطيت يدي ع راسه
كان ساخن بكل
انا " خفت عليه بكل قعدت نوض فيه
معتز نوض
قعد يفترش في كلام مش مفهوم
كان المكيف والع طفيته وقعدت نديرله في كمادات
اول ماحطيتها
معتز " حط يده يبي يحولها
انا" انت خليهن حرارتك عاليه
معتز " خليني تو تنزل
انا" بلاش عناد ولو مره بس
معتز " حوليهن
انا" علشاني انا بس خليهن تنزل حرارتك بس
غمض عيونه وهو ماكانش قادر يحكي
وجيت نبي نصبي مسك يدي
معتز "خليك
انا" توا نجي نجيبلك دواء بس
مشيت للمطبخ جبتله دواء وعطيته له
انا" ارقد تو تريح
معتز " وانتي
انا " كني !!
معتز " بتمشي ترقدي
انا " بحتت فيه وسكتت
معتز " خليك ماتمشيش
انا" قعمزت جنبه ع السرير
قاعده ارقد انت بس
ورديت حطيت كمادات عليه
معتز " غمض عيونه ورقد
قعدت نبحت فيه معقوله نكون حبيته هكي لا مستحيل مانبيش نحبه ونتعلق فيه وهو في قلبه بنت تانية وانا نقعد احتياطي له مانقدرش خفت عليه واجد مع انه تصرفاته امعايا كلهن ينرفزن فيا بس تعلقت بيه ونبيه يكون جنبي خاطري نغيرله طبعه هذاا
وانا سارحه ونفكر فيه يرن تلفونه اخره وكانت هيا
قفلت الفون بكل نرفزتني بجد
قعدت طول الليل جنبه ماقدرتش نصبي لين رقدت بدون مانفطن :/
في الصبح
بابا " نور خلاص ي بنتي تو تحلي ويجي ساهل
نور " ي بابا نسيت الي قريته كله
ماما" قعمزي افطري قبل ماتمشي بيش تركزي
مروه " ياريت نشوف نهي تحرق علي قرايه
نهي " تو ليش تنابشي فيا
بابا " قريتي ي نهي
نهي " قريت الحمدالله
نور من يومها هكي
نور " انتي ماتحسيش بس
نهي " هههههه اوكي ي إليسا انتي
بابا "نهي خلاص
نور" خلاص انا نبي نمشي طولت
بابا " نوصلك
نور "لالا تو نمشي بروحي
ماما " ربي يوفقك
نور "ان شاء الله
خذيت شنطتي ونزلت ولقيت مهند في جنان يدخن
مهند " واخيرا نزلتي
نور " صباح الخير
مهند "صباح النور علي العيون السماح
نور " مهند كنك
مهند " لا شي هيا نوصلك
نور " شنو لا تو نمشي بروحي
مهند " انا قررت اني نوصلك
الموضوع منتهي
نور "مهند ورايا امتحان انا
مهند "انتي الي تأخري في روحك راه
وفتح باب الحوش
وطلعو قعدو يمشو
نور" تمشي وهيا متوترة وخايفة
مهند " خايفه
نور" شويه
مهند " ركزي بس توا تحلي
نور " يستر الله
مهند " فطرتي ولالا
نور " اها كليت
مهند" كان يحاول يفتح موضوع يقعد يحكي معاه نور بس هيا كانت ترد ع قصاد السؤال وتسكت
نور " خلاص قربت من مدرسه رد انت للحوش
مهند " لا تخشي قدامي للمدرسه بعدها حنروح
نور" مهند مانبيش حد يشوفك معايا
مهند" وعليش من شنو خايفه
نور " البنات كان شافنك معايا يقعد يحكن في قصقص وانا مانبيش
مهند " محد يقدر يحكي عليك وانا قاعد وانتي ماديري شي غلط
نور" سكتت
كنت خايفه صفاء تشوف مهند تفهم غلط
وصلني لي باب المدرسة
وع وصلت صفاء
مهند "بحت فيا
اهي صفاء جت
نور " قعدت بحت في صفاء الي عيونها يفنصن واضح فيهن الغيرة
صفاء" صباح الخير
مهند " صباح النور
خلاص اهو وصلنا خشن
نور " باي وخشت وسيبت صفاء وراها
صفاء" نور استني
نور " كنك
صفاء" عليش مهند يوصل فيك شن فيه
نور " بالصدفه الموضوع صار
صفاء" والله راه يكون في شي بينكم
نور " شن تخرفي انتي مش فاضيه للمواضيع هذينا ورانا امتحان راه
وخشت وسيبتها
نضت في الصبح ومعتز مازال راقد طلعت بي شويه من الدار وسكرتها
وطلعت دوشت ولبست وشفت الساعة كانت 12
انا "يييييييييي محاضرتي نسيتها بكل
غمتلي بكل اني راحت عليا نومه ونسيت
طلعت نفطر وحطيت القهوة ع النار ونسمع فوني يرن في الدار مشيت نجري خذيته ورديت للمطبخ كانت هالة
هاله "وينك ي كلبه راحن عليك محاضرتين راه
انا " اس بالله ماذكرينيش
راحت عليا نومه مافطنتش
هاله " وعليش انتي من امس جوك مش تمام
انا " معتز امس مريض سهرت ومارقدتش بدري بس
هاله " ههههههههه
انا" شنو الي ضحك
هاله " نعليا نهتمو بيه قعدنا ونخافوا عليه
انا" بطلي سماطه
هاله " المهم اليوم سيبتيني بروحي
انا" غمتلي بكل
حسيت روحي قعدت فاشله -_-
هاله " هههههههه تستاهلي هذا الي يجوز
انا" هاله سكري ماتخلينيش ننفصل عليك
هاله "باهي باه
لاباس ع عزو
انا " يا سامطه
هاله " هههههههه باي
سكرت منها وحطيت فون ع طاوله وقعدت نصب في قهوه
معتز " نسيتي جامعتك اليوم
انا " برمت عليه
لا عادي ماصا رشي
انت كيف حالك توا
معتز " لا احسن
انا "متاكد
معتز " والله كويس
انا" قربت منه وصبيت ع روس صوابعي بيش نوصل فيه وحطيت يدي ع راسه
انا " باه الحمدالله نزلت حرارتك
هذا كله من المكيف ادوش وترقد قدامه مش كويس راه
معتز " هههههه قعد يبحت فيا
خايفه عليا
انا" انت ديما بارد هكي وخرت
معتز " بس شن فيها لو طلعتي خايفه عليا
انا" برمت وعطيته بي ظهري
امشي دوش ع ماوتيت الفطور
معتز " باهي باه
وتيت الفطور وجاء ونحن نفطروا
معتز" اسف علي الي صار امس
انا" شنو الي صار امس
معتز " الي حكيته في السيارة
انا" من قلبك
معتز " تبي اذليني انتي
انا" لا بس لو مش من قلبك الاسف هذا مش داعي منه
معتز " من قلبي ي ستي
انا "اوكي مقبول
معتز " لا جيد جدا
انا" هههههههههه بطل حناطه
معتز " وشكرا ع درتي
انا" ولو العفوا واجبي
معتز" قعد يبحت فيا زين
انا" شيرتله بي حواجبي
كنك
معتز " لا شي وقعد يشرب في قهوته
مها " امس ماردش عليا بكل
امها " اكيد مع مراته مش حيعبرك
مها " ماما بدال ماتخففي عليا قاعده تحرقي فيا بي كلامك راه
امها" ماهو انتي مفروض تشغلي مخك كان هكي حتقعدي في رقبتي
مها" شن نقوله تعال اخطبني استعجل مانيش رخيصه انا بيش نقعد نفرض عليه في روحي
امها " معناها خليكي هكي لين يقعد يحب مراته
مها " لا هو يحبني انا مايقدرش يحب حد غيري
امها " تحسابي يبي يقعد عليك هكي
مها " شن تبيني ندير امس كله نرن عليه مايردش وبعدها قفل تلفونه
امها " ومازالتي تسالي معاناها مايبيلكش وجه
مها" ماما خليني بروحي
امها " باهي براحتك -_-
قعدت نرن عليه مازال مقفل رقتلي منه بكل
نور " الحمدالله حليت وانتي شن صار فيك
صفاء " لخبطت في اخر سؤال نسيت بكل
نور" باهي المهم حليتي
صفاء" اهو خالد بره هيا نوصلوك
نور "لا توا نروح بروحي
صفاء" متاكده
نور "اها نبي نسال ابلة العربي ع حاجه في امتحان بكره ونطلع
صفاء " سلام
نور " خشيت دروت الابله وسألتها ولما طلعت نبي نروح نلقاه مهند قدامي
نور" انت شن ادير هنا
مهند "انا قتلك حنروح ونجيبك يعني حتحمليني
نور" مهند ارجوك لا
مهند "ليش بس نبي نعرف
نور " مانقدرش نحكيلك
مهند " امشي هيا
نور" اوووف
مهند " لو تحكيلي بس حنفهمك وتريحيني ونريحك
نور "مانقدرش نحكي قتلك
مهند " معناها حنقعد هكي لعند تحكيلي
نور " استغفر الله
مهند " شن درتي في امتحان
نور " الحمدالله حليت
وع فكره شكرا لانك شرحتلي امس بفضلك حليت
مهند "فرح بكل
ماتشكرينش ي هبله في خدمة واي حاجه تبيها قوليلي وعيوني لكي
نور " انحرجت وسكتت
مهند " بكره شن عندك امتحان
نور " عربي
مهند " ثقيل بكل
نور" بكل مانحبش :/
مهند " زمان الماده الوحيده الي كنت نديرلها في حجابات ونغش
نور "ضحكت
قصدك كنت تغش
مهند " يعني اهو مانحبش نحفظ
نور "شن داير في التاريخ معناها
مهند "أس خليني ساكت خير
كوارث
نور "هههههههه نفس الجو مانحبهنش
مهند" في طلعنا نتشابهوا في حاجه
نور " هههه يدك كويسة
مهند " عادي مانحسش فيها
نور" سكتت
وصلنا للحوش
نور " شكرا
مهند " غمزلها ولو العفوا
ركبت فوق وانا نحس بي شعور غريب فرحانه احساس حلو كان
عندي انا
وتيت الغذاء وتغذينا ولميت الحوسة المطبخ
وخذيت شيتاتي وقعمزت في الصالة نقرا
معتز " مافطنتش لي رنتك
امس كنت مريض وراقد
مها " لاباس عليك ي روحي
باهي تعالي نتلاقوا
معتز " ماعنديش نيه نطلع لي اي مكان
مها " مرايفتلك انا
معتز " نشوفك بكره توا نجيك في جامعه
مها " امتي باهي
معتز " ساهل بكره نتفقوا
مها "انت قاعد في الحوش
معتز " اها
مها " معاها
معتز " مها شن قلنا
مها " خلاص سكتت
معتز " سلام توا
مها " باي
جاء وقعمز قدامي
انا" كنك
معتز " لا شي
وطلع دخان يبي يدخن
انا" مادخنش ايوه
معتز" عليش تكرهيه
انا " مش عليا نحكي انا
عليك انت مريض وادخن اخره
معتز " هههههههه عجبني الاهتمام
انا" انا حماره اساسا اني نعبر فيك واسكت نبي نقرا
معتز " كنك رقتلك
انا " اسكت قلت
معتز " هههههه
مر الوقت وقعدت نقرا ومعتز يتفرج ع تلفزيون جنبي
شويه وصباه هو وخش جوا
والضي ينقطع حي عليا وانا نخاف من ظلام واجد
انا " قعدت في مكاني وقريب نبكي
وقعدت نادي فيه
معتز وين مشيت تعال
قعدت انادي فيه مايردش عليا بكل خفت والحوش ظلام وفوني مش جنبي بيش نولع الفلاش
صبيت قعدت نمشي بي شويه وطلعت من الصاله وكنت ماشيه لي داره نبي نشوفه
فجاءه حد يمسكني من لاوره
قعدت نعيط
معتز " حط يده ع فمي
اسكتي تبي تلمي ناس علينا
انا " دموعي نزلن
معتز " حول يده
ولع الفلاش امتاع فونه
عليش تبكي وحضني
انا" قعدت نرعش وخفت بكل
معتز " اهدي مافي شي صار :/
انا " حول اطلقني
معتز " نبصر معاك
انا" خبطته ع كتفه قتلك من قبل نخاف من ظلام ليش تفجع فيا هكي
معتز " ههههههه مش قصدي والله
انا" بارد اطلقني
حول من قدامي
معتز " قعد يمسحلي في دموعي
بطلي بكاء بس
انا " ليش درت هكي
معتز " لما نقطع الضي وسمعتك تنادي قلت خليني نفجعها بس مانحسبكش لدرجه هذي خوافه
انا" انت سامط بكل -_-
معتز " مقبوله منك
انا" حسيتك عجباتك التصبايه هذي اطلقني
معتز " باهي وجاء يبي يخش لي داره
انا" وين ماشي :/
معتز " نبي نرقد نعسان
انا" لالا مافيش قعمز جنبي لين يجي الضي
معتز " نخدم عندك انا اصلا
انا "مجبور والله تحمل
معتز " الصبر ياربي
انا " استنا خلينا ندورو شمعة
معتز " هي ي خوافه
انا" بطل معش تقولها
وخشيت للمطبخ وقعدت ندور لقيت وحده
طلعتها ولعتها
معتز " هيا امشي للصاله
انا "فنصت فيه وانت وين ماشيه
معتز " وراك والله ماني هارب
انا " نحسابك بس
حطيت الشمعة ع الطاولة وقعمزت
معتز " مش وقته قطع الضي
انا " ماني عارفه
معتز " لو ماكنتش في الحوش شن كنتي اديري
انا " تلقاني مقعمزه في مكاني مانتحركش لين يجي الضي
معتز " معقوله تخافي من ظلام
انا " تبي تمسكها ليا معناها :/
معتز " هههههههه حنذلك بيها
انا " حيطول زعمك
معتز " مش حيطول اهدي بس انتي
سكتنا شويه بعدها هو قال
معتز " باهي احكيلي
انا" شنووو
معتز " مهند شن كان يبي فيك امس
انا" شاغلك الموضوع
معتز " لا عادي غير كساد قلت نمشي الوقت نهدرزو
انا" مدام مش شاغلك وماعندكش فضول تعرف مش داعي نحكي
معتز " نسرين وفنص فيا
انا " احم كم تدفعلي بيش نحكي
معتز " عزق فيا مخده تحكي
انا" رديت عزقتها فيه
معش تعاودها راه مانحكيش
معتز " تي تو انا نخش نرقد ونسيبك بروحك في ظلام تقعدي تبكي
انا" تمسك فيا من يد الي توجعني
معتز " ههههههه نستغل موقف شويه
انا" مبردك
مهند خوك يبي نور اختي
معتز " نور الطشه البيبي هذي
انا " اها هيا
معتز " ومن امتي الموضوع هذا
انا " قالها ليا الفترة الي فاتت وانا مانبيش يحكيلها حاجه
معتز "وعليش
انا " نور صغيره مازالت
معتز " ياطروح انك الكبيره وخايفه ع اختك
انا " قلبت وجي عليه
اسكت احسن انت
معتز " هههههه مسرع ما ترقالك
انا "كيفك بالضبط
معتز " صباه
انا " وين ماشي
معتز " نبي نفتح البلوكني وبندخن بس اطمني مش هارب
انا " نحسابك بس -_-
معتز" هههههههههه ي خوافه
انا" معتز عاد
مر الوقت لين جاء الضي و مر اليوم هذا عادي وجاء تاني يوم مر الروتين كيف اي يوم
مها " باهي امتي حتفتح الموضوع مع امك وتجي تخطبني
معتز " بس اسمعي فرح انا مش حندير
انتي ديري فرحك وانا نجي ناخذك بس
مها " كيف مش حديرلي فرح هذي ليلة عمري
معتز " قدري ظروفي شوية
مها "دورت وين نسكنوا
معتز " توا ندور حوش نأجره بحيث يكون في نفس المنطقة الي فيها نسرين
مها "والله نسكن في إيجار
معتز " فتره قتلك
مها " والله هيا تاخذ الحوش الي مفروض يكون ليا وانا نسكن في إيجــار
معتز " انتي تبيني انا ولا تبي الحوش والفرح
مها " نبيهن كلهن
معتز " معناها استني لعند نحصل حوش ونشري تمام
مها " احسن مانطلع في ايجار
لانه مش هكي كان اتفاقنا وماما مش حتوافق
معتز " كل حاجه مخششتيلي امك مش حتوافق
نبي نجوزك انتي ولا امك
مها " جت تبي تحكي
رن تلفونها
معتز " منو
مها " ولد عمي
معتز " نعم من امتي وانتي علاقات انتي وعيال عمك
مها " باهي خليني نرد نشوفه كنه
معتز " ردي
مها قعدت تحكي مع ولد عمها وبعد سكرت
معتز " كنه
مها " ماشيين عيت جدي للبحر ويبو ياخذوني معاهم
معتز " وانتي قتلهم باه
مها " اها قدامك توا حنمشي نغير جوا
معتز " انتي كنك تصرفي بلا عقل هكي
مها " كنك رقتلك انت
معتز " لا مارقتليش وجوي تمام
وصباه
مها " انت كنك رايح ترقالك من اي حاجه
معتز " انتي اديري في حاجات يبغددن فيا وكل حاجه انا نكرها نلقاك انتي دايرتيها
مها " يعني قصدك مش موافق
معتز " انتي اساسا خذيتي رأي امتاعي
قررتي وتتبي تنفذي واحتمال لو ماصارش قدامي موقف راه ماشيه اخره بدون ماتقولي
مها " انت ديما هكي حرمني من كل حاجه
معتز " هنا كلمتين تمشي مع عيت عمك للبحر انسيني انا وماتحوليش ترني عليا
مها " وكان مشيت شن حدير
معتز " رقمي تمسحي واعتبري كل حاجه بينا انتهت
مها " ماتقدرش تقول هكي بيش تهددني كيف كل مره
معتز " انتي جربي وشوفي شن يصير
مها " معتز عاد
معتز " سلام
ومشاه وسيبها
هاله " انتي تحبي مغير تكابري بس
انا " هههه نحب الثقيل هذا متكبر المغرور
هاله " المتكبر المغرور هذا خلاكي تكبدي فيه
انا" انتي ليش اذكري فيا بيه
هاله " والله مغير تكابري بس واهتمام انه هو الي وصلك للجامعه اليوم انتي مش عاطيه مجال لي قلبك بس انه يعترف
انا " ديما لما نحكي معاك تلخبطي في مشاعري
هاله "لاني نقول في الحق
انا" امتي جاي باتك ياخذك بيش نتريح منك
هاله " شوفي قدامك معتز اهو مصبي غادي
نعليا بجد ي ناني عطيه ليا سمح
انا" تفضلي تو نغلفه لكي وخوذيه
هاله " اهو يشيرلك خزي مش مقدره النعمه الي انتي فيها
انا " حسيتك خذيتي راحتك عيونك ي ابله هيا سلام
هاله " حقاتك ي حنه باي
مشيت لي معتز
معتز " شن جوك
انا" تمام وانت
معتز " تمام هي
ومشينا وركبنا في السيارة
معتز " قتلك
انا "شنو
معتز " ........
يتبع