ကားတန်းက ရှုစီရင်စုရှိရာကိုပြန်လာနေစဉ်မှာပဲ Base မှာလဲ အလွန်ကြီးကျယ်တဲ့ကိစ္စတစ်ရပ်ဖြစ်သွားတယ်။ Zombie Virus ကာကွယ်ဆေးကို အောင်အောင်မြင်မြင်နဲ့ ဖော်နိုင်လိုက်ပြီ!! ရောဂါပိုးကူးစက်ခံထားရပြီး Base ကိုရောက်လာခဲ့တဲ့ 7 ယောက်မြောက်လူနာက အခုအချိန်မှာတော့ အန္တရာယ်ကင်းကင်းနဲ့ လူကောင်းပကတိပြန်ဖြစ်ခဲ့ပြီ။
"လည်ချောင်းယားသေးလား?? ခေါင်းရောကိုက်နေသေးလား?? ရေငတ်တာတွေဘာတွေရောရှိလား?? အခု ကျွန်တော် လက်ဘယ်နှစ်ချောင်းထောင်ထားတာလဲ??" ဓာတ်ခွဲခန်းဝန်ထမ်းတစ်ဦးက တစ်ထောင့်တစ်ကြိမ်မြောက်သောအမေးကိုမေးလိုက်တယ်။
လူနာကလဲ အလွန့်အလွန်ကို စိတ်ရှည်လက်ရှည်နဲ့ ပြန်ဖြေတယ်။ ဒီလူတွေ သူ့ကို ဒီမေးခွန်းတွေကိုပဲ သုံးနှစ်လောက် ထပ်ခါတလဲလဲပြန်မေးနေရင်တောင် သူ ဖြေရတာဘယ်တော့မှငြီးငွေ့သွားမယ်မထင်ဘူး။ မနေ့တုန်းကအထိ သူ့ကိုယ်သူ Zombie တစ်ကောင်ဖြစ်လာတော့မယ်လို့ပဲ ထင်ထားခဲ့မိတာ။ အဲ့ဒါကြောင့်ပဲ သေခြင်းတရားကိုရင်ဝယ်ပိုက်ပြီးတော့ ဒေါက်တာ့ရဲ့ဓာတ်ခွဲခန်းက စမ်းသပ်ခံတစ်ယောက်အဖြစ် သူကိုယ်တိုင်ရွေးချယ်ခဲ့တာ။ ဒါပေမဲ့ ဒီနေ့မှာတော့ သူ့ခန္ဓာကိုယ်က အံ့ဖွယ်နှုန်းနဲ့ ပြန်လည်ကောင်းမွန်လာခဲ့တယ်။ သူက ခရစ်ယာန်ဘာသာဝင်တစ်ယောက်မို့ ကိုးကွယ်ရာဘုရားသခင်အပေါ်ကို ယုံကြည်လေးစားသင့်တယ်ဆိုတာသိနေပေမဲ့လည်း အခုအချိန်မှာတော့ သူ့ရင်ထဲမှာ ဒေါက်တာ့ကိုပဲယုံကြည်ပြီး တစ်ဘဝလုံးစာ ကိုးကွယ်သွားချင်စိတ် ပြင်းပြင်းထန်ထန်ဖြစ်မိတယ်။
ဘုရားသခင်က လူသားမျိုးနွယ်ကို စွန့်ပစ်ခဲ့ပေမဲ့ ဒေါက်တာကတော့ လူသားအားလုံးဆက်လက်ရှင်သန်ဖို့ မျှော်လင့်ချက်ကို ယူဆောင်လာပေးခဲ့တယ်။ ဒေါက်တာ့ရဲ့စမ်းသပ်ခံတစ်ယောက်အဖြစ် သတ္တိရှိရှိနဲ့ရွေးချယ်ခဲ့တဲ့ကိုယ့်ကိုကိုယ်လဲ ဂုဏ်ယူလို့မဆုံးဘူး။
"ကျွန်တော် လည်ချောင်းလဲမယားဘူး။ ခေါင်းလဲမကိုက်ဘူး။ ရေလဲမဆာဘူး။ နောက်ပြီး လက်က သုံးချောင်းထောင်ထားတယ်။ ဒေါက်တာ...ကျွန်တော် ဒေါက်တာ့လက်ကို ကိုင်လို့ရမလား??"လူနာက အိပ်ယာဘေးမှာရပ်နေတဲ့ဒေါက်တာကို မျက်ရည်ဝိုင်းနေတဲ့မျက်လုံးတွေနဲ့ကြည့်ရင်းပြောလိုက်တယ်။
ကျိုးယွင်ရှန့် လူနာရှေ့ကို လက်ဆန့်ပေးလိုက်ပြီး စိတ်ရှည်လက်ရှည်ရှင်းပြလိုက်တယ်။ "ခင်ဗျားရဲ့ဆဲလ်တွေက Zombie Virus တွေကို ဝါးမျိုပစ်လိုက်ပြီမို့လို့ ခင်ဗျား နောင်လဲ ဗီဇပြောင်းအကောင်ဖြစ်လာမှာမဟုတ်တော့ဘူး။ ခင်ဗျားအတွက် ဘာအန္တရာယ်မှမရှိတော့ပါဘူး"
"မဟုတ်ဘူး။ ကျွန်တော့်ကိုကယ်လိုက်တာ ဒေါက်တာပါ။ ကျွန်တော့်ကိုယ်ထဲကဆဲလ်တွေမဟုတ်ဘူး!!" လူနာက သူ့ရင်ထဲမှာ နှစ်ပေါင်းများစွာသိမ်းဆည်းထားခဲ့တဲ့ ဝမ်းနည်းမှုနဲ့ အကြောက်တရားတွေကို အကုန်ဖွင့်ထုတ်ပစ်လိုက်ပြီး ဒေါက်တာ့ရဲ့လက်ကို မြဲမြံစွာဆုပ်ကိုင်ကာ ရှိုက်ကြီးတငင်ငိုတော့တယ်။
ဝမ်းသာလွန်နေကြတဲ့ဘေးကဓာတ်ခွဲခန်းဝန်ထမ်းတွေလဲ ငြိမ်ကျသွားပြီး အားလုံးရဲ့မျက်ဝန်းတွေမှာ မျက်ရည်ဝိုင်းကျရပြန်တယ်။ ဒီနေ့ကိုရောက်ဖို့ စောင့်နေခဲ့ကြတာ ဘယ်လောက်တောင်ကြာခဲ့ပြီလဲ။ အဖြစ်အပျက်တွေအားလုံးက အိပ်မက်လိုပဲ။ နိုးထလာတဲ့အချိန်မှာ အားလုံးပျောက်ကွယ်သွားမှာစိုးမိတယ်။
"ဘာလို့ငိုနေကြတာလဲ?? ဒီနေ့က ဒီလောက်မင်္ဂလာရှိတာ ခင်ဗျားတို့အားလုံး ရယ်မောနေသင့်တာ။ မျက်ရည်တွေကို သုတ်ပစ်လိုက်စမ်းပါ။ ကျုပ်တို့ ဒီည အောင်ပွဲခံကြတာပေါ့!!" ကျန်းယွမ်ရှန်း မျက်လုံးနှစ်လုံးပိတ်မတတ်ရယ်မောရင်း အခန်းထဲကို ကသိုက်ကရိုက်နဲ့ဝင်လာတယ်။
"ဒါ ရောဂါပိုးကူးစက်ခံရတဲ့သူလား?? ကျုပ် ကြည့်ကြည့်မယ်" ကျန်းယွမ်ရှန်း လူနာရဲ့မေးစေ့ကိုကိုင်ပြီး ဂရုတစိုက်စစ်ဆေးကြည့်ရှုလိုက်တယ်။ "သူ့မျက်နှာက တကယ်ပြန်ကောင်းလာတာပဲ!! ကောင်လေးရ၊ မင်းမသိလို့ကွ။ မနေ့တုန်းကဆိုရင် မင်းပါးစပ်တစ်ခုလုံးမှာ အစွယ်ချွန်တွေနဲ့အပြည့်ပဲ။ နောက်ပြီး ပါးစပ်ကနေလဲ အနံ့ထောင်းထောင်းထနေတဲ့ အဝါရောင်ပုပ်အဲ့အဲ့တံတွေးတွေ အဆက်မပြတ်စီးကျနေသေးတာ။ ငါတို့တွေက မင်းကို မရတော့ဘူးလို့တောင်ထင်နေတာ"
လူနာလေးကလဲ ရီမောလိုက်ပြီး "ကျွန်တော် ဒေါက်တာ့ကို တကယ်ကျေးဇူးတင်လို့မဆုံးဘူး။ ကျွန်တော်လဲ ကိုယ့်ကိုကိုယ် သေပြီလို့ပဲထင်ထားတာ။ တကယ်က သေတာအဲ့လောက်ကြောက်စရာမကောင်းဘူး။ မကောင်းဆိုးဝါးဖြစ်သွားတာကမှ တကယ်ကြောက်စရာကောင်းတာ။ ဒါပေမဲ့ အခုတော့ ကာကွယ်ဆေးကိုသာ လူသားအားလုံးဆီရောက်အောင်ဖြန့်နိုင်ရင် ကျွန်တော်တို့ဘယ်သူမှ မကောင်းဆိုးဝါးတွေဖြစ်လာနိုင်စရာမရှိတော့ဘူး။ ကျွန်တော်တို့တွေ တဖြည်းဖြည်းနဲ့အင်အားတောင့်တင်းလာပြီး တစ်နေ့တော့ Zombie တွေအားလုံးကို အမြစ်ဖြတ်သုတ်သင်နိုင်မှာပါ"
ကျန်းယွမ်ရှန်းရီမောလိုက်ပြီး ဒီနေ့ရဲ့အပြောင်မြောက်ဆုံးစွမ်းဆောင်ရှင်သူရဲကောင်းကို ချီးကျူးဖို့ နောက်လှည့်ကြည့်လိုက်ပေမဲ့ ဒေါက်တာပိုင်ကတော့ ပျောက်ခြင်းမလှပျောက်သွားတယ်။
လူတွေအားလုံး ဝမ်းသာပျော်ရွှင်နေကြတဲ့အချိန်မှာပဲ ကျိုးယွင်ရှန့် အခန်းထဲကတိတ်တိတ်လေးထွက်လာခဲ့တယ်။ အခန်းပြင်အရောက်မှာ အပျော်လွန်ပြီး မျက်ရည်ပင်လယ်ဝေနေတဲ့ကျောက်လင်ဖုန်းကို လက်လှန်းပြပြီး လာခဲ့ဖို့ခေါ်လိုက်တယ်။
နှစ်ယောက်သား ဓာတ်ခွဲခန်းခေါင်မိုးထပ်ကိုတိတ်ဆိတ်စွာတက်လာကြရင်း နေရိပ်တဲ့တစ်နေရာကိုရွေးပြီး ထိုင်လိုက်ကြတယ်။
"ဘာလို့ငိုနေပြန်တာလဲ?? ခင်ဗျား အရင်က အဲ့လောက်အငိုမသန်ပါဘူး" ကျိုးယွင်ရှန့်ခင်ဗျာ လက်ကိုင်ပုဝါကိုဆွဲထုတ်ပြီး သစ္စာရှိခွေးကြီးရဲ့မျက်ရည်တွေကို သုတ်ပေးရပြန်တယ်။ နောက်တော့ ကျောက်လင်ဖုန်းရဲ့ခပ်တိုတိုဆံပင်ကြမ်းတွေကို အသာဆွဲဖွလိုက်တယ်။ ကျောက်လင်ဖုန်း ဒေါက်တာ အလွယ်တကူဖွနိုင်အောင် ခေါင်းကို ဒေါက်တာ့နားထိုးပေးလိုက်တယ်။
ကျောက်လင်ဖုန်း ငိုသံကြီးနဲ့ပြောလိုက်တယ်။ "ကျွန်တော် အရမ်းဝမ်းသာတာပဲ။ ဒေါက်တာ။ ဒေါက်တာလုပ်နိုင်မယ်မှန်း ကျွန်တော်သိတယ်" နောက်ပြီး အဲ့ဒါကလဲ နှစ်ကြိမ်တောင်ဖြစ်ခဲ့တာ။ ဒီလောကကြီးထဲမှာ ဒေါက်တာ့ထက်မြင့်မြတ်တဲ့သူမရှိနိုင်တော့ဘူး။
ကျိုးယွင်ရှန့်ပြုံးလိုက်ပြီး လက်ဖဝါးကနေတဆင့် ကျောက်လင်ဖုန်းမျက်နှာကို အတန်ကြာအောင် စမ်းသပ်ကြည့်နေမိတယ်။ ရုတ်တရက် ကျိုးယွင်ရှန့် အရှေ့ကိုငုံကိုင်းလိုက်ပြီး သူတို့နှစ်ယောက်ရဲ့နှုတ်ခမ်းတွေကို ထပ်တူကျစေလိုက်တယ်။
ခါးတယ်....
ပြီးတော့... ငံတယ်။ ကြည့်ရတာ ငိုထားတဲ့မျက်ရည်တွေကြောင့်ဖြစ်မယ်ထင်တယ်။ ကျိုးယွင်ရှန့် အသေအချာ အရသာခံကြည့်ပြီးသွားတဲ့နောက်မှာတော့ ခြောက်ကပ်ကပ်အပြုံးတစ်ခုနဲ့အတူ လူချင်းခွာလိုက်တယ်။
ကျောက်လင်ဖုန်းလေးခင်ဗျာတော့ ခုထိစိတ်နဲ့လူနဲ့မကပ်ရှာသေးဘူး။ အတန်ကြာမှ သတိပြန်ဝင်လာပြီး ရဲရဲနီနေတဲ့ပါးနှစ်ဖက်ကိုလက်နဲ့အုပ်ရင်း လှေကားအောက်ကို အသည်းအသန်ပြေးဆင်းသွားတော့တယ်။ သူ့အတွက်တော့ ဒေါက်တာဆိုတာ ကောင်းကင်ယံမှာ သာနေတဲ့လလို၊ တောင်ထိပ်ဖျားက နှင်းပွင့်လို၊ ဟိုး ပင်လယ်ပြင်တွေရဲ့အနက်ရှိုင်းဆုံးနေရာမှာ နှစ်မြှုပ်ထားတဲ့ပုလဲရတနာလို အသန့်စင်ဆုံး၊ အမွန်မြတ်ဆုံးနဲ့ အလှပဆုံးဖြစ်တည်မှုပဲ။ သူ ဒေါက်တာ့ကို လေးစားတယ်။ ကြည်ညိုတယ်။ ဒါ့ကြောင့်ပဲ ဒေါက်တာ့အပေါ် မသန့်ရှင်းတဲ့စိတ်နဲ့ မြူမှုန်တစ်မှုန်စာလောက်တောင် မပြစ်မှားခဲ့ဖူးဘူး။
ဒါပေမဲ့ အခုတော့...မမျှော်လင့်ပဲနဲ့ ဒေါက်တာ့ဖက်ကစပြီး သူ့ကို...အကြင်နာပေးလာခဲ့တယ်!! သူ့စိတ်ထဲမှာ အရာအားလုံး ရုတ်တရက် ဇောက်ထိုးမိုးမျှော်ဖြစ်ကုန်သလိုခံစားရတယ်။ သူ တိတ်ဆိတ်တဲ့နေရာတစ်ခုခုအမြန်ရှာပြီး ခေါင်းအေးအေးထားစဉ်းစားဖို့လိုနေပြီ။
ကျောက်လင်ဖုန်း အရေးပေါ်ထွက်ပေါက်တံခါးဝကိုရောက်ရောက်ချင်းမှာပဲ ဂုတ်ကနေလှမ်းဆွဲတာခံလိုက်ရပြီး လျှပ်စီးတွေတစ်ဝင်းဝင်းတောက်နေတဲ့ လက်သီးတစ်ချက်က မျက်နှာပေါ်အရှိန်နဲ့ကျရောက်လာတယ်။ လျှပ်စီးသံနဲ့ လေတိုးသံကိုကြားလျှင်ကြားချင်း မသိစိတ်မှာ အန္တရာယ်လို့သတိပြုမိတာနဲ့တစ်ပြိုင်နက် ခန္ဓာကိုယ်ကို သတ္တုတွေနဲ့ရစ်ပတ်ပြီးကာကွယ်လိုက်တာတောင် ထိုလက်သီးချက်ဒဏ်ကို မကာကွယ်လိုက်နိုင်ဘူး။ ကျောက်လင်ဖုန်း မြေပေါ် အရုပ်ကြိုးပြတ်လဲကျသွားပြီး ပါးစပ်ကနေ သွေးတစ်ပွက်အန်ထုတ်လိုက်တယ်။
"မင်း ဒေါက်တာ့ကို ဘာလုပ်လိုက်လဲ??" လိန်ချွမ်းရဲ့ သွေးရောင်လွှမ်းနေတဲ့နီရဲရဲမျက်လုံးတစ်စုံနဲ့ ဒေါသတကြီးမျက်နှာက သူ့ကိုအုပ်မိုးကြည့်နေတယ်။
"ကျုပ်...ကျုပ်.. ဘာမှ မလုပ်ဘူး" ကျောက်လင်ဖုန်း သွေးနောက်တစ်ပွက်အန်ထုတ်မိတယ်။
"မင်း အယုတ်တမာကောင်!! မင်းရဲ့ရွံစရာကောင်းတဲ့ပါးစပ်နဲ့များ ဒေါက်တာ့ကို ထိရဲသေးတယ်!!" လိန်ချွမ်း လက်ကိုနောက်တစ်ကြိမ်မြှောက်လိုက်ပြီး မိုးကြိုးစွမ်းအားတွေကို နောက်တစ်ကြိမ်စုစည်းလိုက်တယ်။ လက်ပေါ်မှာ တဖြည်းဖြည်းစုစည်းလာတဲ့စွမ်းအားတွေက ကြက်သီးထဖွယ်အတိပဲ။ လေထုထဲမှာပြင်းထန်တဲ့စွမ်းအားသက်ရောက်မှုကြောင့် ကျောက်လင်ဖုန်းအရိုးတွေကျိုးကြေမတတ်ဖြစ်လာတယ်။
"ခင်ဗျား ကျုပ်ကိုသတ်လိုက်ရင် ဒေါက်တာဝမ်းနည်းရလိမ့်မယ်" ကျောက်လင်ဖုန်း ရဲရဲဝံ့ဝံ့ပြန်ပြောလိုက်တယ်။
လိန်ချွမ်း ကျောက်ရုပ်လို အတောင့်လိုက်ဖြစ်သွားတယ်။ ခဏကြာတော့မှ မိုးကြိုးစွမ်းအင်တွေစုစည်းနေတဲ့လက်ကို ပြန်ရုတ်လိုက်ပြီး ရင်ထဲမှာ တလိပ်လိပ်တက်လာနေတဲ့ဒေါသတွေကိုမျိုသိပ်ရင်း ကြိမ်းဝါးသံနဲ့သတိပေးလိုက်တယ်။ "နောက်ဆို ဒေါက်တာနဲ့ဝေးဝေးနေ။ မဟုတ်လို့ကတော့ ငါ မင်းကို တစ်စစီစုတ်ဖြဲပစ်မယ်!!"
"ဘာလို့လဲ?? ဒေါက်တာက ခင်ဗျားအပိုင်မှမဟုတ်တာ!!" ကျောက်လင်ဖုန်း တစ်ကိုယ်လုံးနာကျင်နေတဲ့ကြားက အံကြိတ်ပြီးပြောလိုက်တယ်။
"အခုချိန်ကစပြီး ဒေါက်တာ့ကို ငါပိုင်သွားတော့မှာမို့လို့ပဲ" လိန်ချွမ်း ထိုတစ်ခွန်းပဲပြောပြီး ခေါင်မိုးထပ်ရှိရာကို လှည့်ထွက်လာလိုက်တယ်။ လိန်ချွမ်းခင်ဗျာ အချစ်ကိုဖွင့်ဟဝန်ခံဖို့အတွက် ပြန်လာလာချင်းမှာပဲ ဒေါက်တာက ကျောက်လင်ဖုန်းကို ကိုယ်တိုင်အနမ်းပေးလိုက်တဲ့မြင်ကွင်းကိုမြင်ရလိမ့်မယ်လို့ သူဘယ်တုန်းကမှမထင်ထားခဲ့မိဘူး။ ရင်ထဲမှာ တလိပ်လိပ်တက်လာတဲ့မနာလိုမုန်းတီးမှုတွေက နှလုံးသားကို ဆာလဖျူရစ်အက်ဆစ်အပြင်းစားနဲ့ လောင်းချလိုက်သလိုပဲ။
လိန်ချွမ်း ဓာတ်ခွဲခန်းတံခါးဝကိုရောက်တဲ့အချိန်မှာတော့ ရင်းနှီးနေတဲ့ အောင်ပွဲခံမြင်ကွင်းတစ်ခုကဆီးကြိုနေတယ်။ ဒေါက်တာ ကာကွယ်ဆေးကိုဖော်နိုင်ခဲ့ပြီမှန်း သူချက်ချင်းသဘောပေါက်လိုက်တယ်။ လိန်ချွမ်း ဒေါက်တာ့ကို အသည်းအသန်လိုက်ရှာတော့တယ်။ ဖြစ်နိုင်ရင် ဒေါက်တာ့ကိုဖက်ပြီး ပထမဦးဆုံးဂုဏ်ပြုပေးမယ့်သူက သူပဲဖြစ်ချင်မိတယ်။ ဒါပေမဲ့ အဖက်ခံရမဲ့သူကတော့ လူတွေအားလုံးနဲ့ဝေးရာ တိတ်ဆိတ်တဲ့ချောင်လေးတစ်ချောင်မှာ တစ်ယောက်ထဲအထီးကျန်စွာဖြတ်သန်းနေတယ်။
လိန်ချွမ်း ခေါင်မိုးထပ်ရှိရာကိုမော့ကြည့်လိုက်ပြီး မြန်နိုင်သမျှအမြန်ဆုံးပြေးတက်သွားတယ်။ သူ ဒီအချိန်၊ ဒီပုံရိပ်တွေကို အတွေးတွေထဲမှာ အကြိမ်ပေါင်းမရေမတွက်နိုင်လောက်အောင် ပုံဖော်ကြည့်ခဲ့ဖူးတယ်။ ကာကွယ်ဆေးအောင်မြင်သွားတဲ့အခါ သူ ဒေါက်တာ့ကိုကျောပိုးရင်း လှေကားထစ်တွေတစ်ထစ်ချင်းစီနင်းတက်သွားပြီး ခေါင်မိုးထပ်မှာ ဒေါက်တာနဲ့အတူ နေဝင်ဆည်းဆာကိုကြည့်ရှုကြမယ်။
ဒါပေမဲ့ သူ အခွင့်အရေးကို နောက်တစ်ကြိမ်လက်လွှတ်လိုက်ရပြန်ပြီ။
ဘာလို့များ ကံကြမ္မာက သူ့အပေါ် အမြဲတမ်းနောက်ပြောင်ရက်ရတာလဲ??
တချိန်ထဲမှာပဲ ကျိုးယွင်ရှန့်ကတော့ သူ့ရဲ့ဆိုးရွားလွန်းတဲ့ကံကြမ္မာကို မေးခွန်းထုတ်နေမိတယ်။ ကျောက်လင်ဖုန်းကို သူ့ရဲ့ချစ်သူဖြစ်လိမ့်မယ်လို့ပဲ သူတစ်ချိန်လုံးမှတ်ယူထားခဲ့မိတာ။ ဘာဖြစ်လို့လဲဆိုတော့ သူဘယ်ကမ္ဘာကိုပဲရောက်ရောက် အဲ့ဒီလူက သူ့ဘေးနားကို မရောက်ရောက်အောင်ပြန်လာလေ့ရှိတယ်။ သူ့ကို တိတ်တိတ်လေးချစ်နေပေးပြီး သူ့အပေါ်အမြဲကာကွယ်ပေးနေလေ့ရှိတယ်။ ကျောက်လင်ဖုန်းက ဒီအချက်တွေအားလုံးနဲ့ကိုက်ညီတယ်။ သူအရင်တုန်းကတွေးထားခဲ့တာက ကာကွယ်ဆေးအောင်မြင်သွားတာနဲ့ လိန်ချွမ်းရဲ့မျက်စိဒေါက်ထောက်စောင့်ကြည့်ခံနေရတဲ့ဘဝကရုန်းထွက်ပြီး လက်ကျန်ဘဝကို ကျောက်လင်ဖုန်းနဲ့အတူ တိတ်ဆိတ်တဲ့နေရာလေးတစ်ခုမှာ အေးအေးလူလူပဲဖြတ်သန်းသွားတော့မယ်ပေါ့။
ဒါပေမဲ့ သူတွက်ကိန်းမှားသွားခဲ့တယ်။ ကျောက်လင်ဖုန်းက သူရှာနေခဲ့တဲ့ 'သူ' မဟုတ်ဘူး။
'သူ' ဘယ်ရောက်နေခဲ့တာလဲ?? ကျိုးယွင်ရှန့် ကောင်းကင်ကြီးကိုမော့ကြည့်နေရင်း ရုတ်တရက်မောပန်းလာသလိုခံစားရတယ်။ သူ အဲ့ဒီလူရဲ့တည်ရှိမှုကို ခံစားလို့မရဘူး။ သူ့မှာ အဲ့ဒီလူဖြစ်ကြောင်းကိုအတည်ပြုဖို့က အနမ်းကလွဲပြီး တခြားနည်းလမ်းမရှိဘူး။ အခေါက်တိုင်းမှာ အဲ့ဒီလူကပဲအရင်စပြီးတော့ သူ့ဘေးနားကိုရောက်လာပြီး သူ့ကိုဂရုစိုက်ပေးခဲ့တာ။ ဘဝပေါင်းများစွာ သူ့နောက်ကို တကောက်ကောက်လိုက်နေခဲ့ပြီး ကျိုးယွင်ရှန့်ကိုယ်တိုင်ကလဲ အဲ့ဒီလူ သူ့နှလုံးသားကို တံခါးမရှိဓားမရှိ စိတ်ကြိုက်ဝင်ထွက်ခွင့်ပေးထားခဲ့တယ်။
ဒါပေမဲ့ အဲ့ဒါနဲ့ပဲ အဲ့ဒီလူက သူ့ဘေးမှာထာဝရအတူရှိပေးပါ့မယ်ဆိုတဲ့သတ်မှတ်ချက်ရှိလို့လား?? အဲ့ဒီလူ သူ့ဘေးနားရောက်လာခဲ့တာက သူ့ရဲ့စွမ်းအားတွေကိုလိုချင်လို့လဲဖြစ်နိုင်တာပဲ။ ဒါမှမဟုတ် သူနဲ့ဆုံတွေ့တဲ့အချိန်မှာ အဲ့ဒီလူရဲ့ Code က တစ်ခုခုလွဲမှားနေခဲ့ပြီးတော့ အခု ပြန်ကောင်းသွားလို့များ သူနဲ့ပြန်မတွေ့ရတော့တာများလား?? အဲ့ဒါမှမဟုတ်ရင် ကစားပွဲတစ်ခုကို အပျော်သဘောနဲ့ဝင်ဆော့ခဲ့တာများလား??
ဒါပေမဲ့ ကျိုးယွင်ရှန့်အတွက်တော့ အရာအားလုံးက အစစ်အမှန်တွေလေ။ သူ တကယ်နှစ်နှစ်ကာကာကိုချစ်ခဲ့မိတာ။ သူ့နှလုံးထဲကအချစ်တွေကနက်ရှိုင်းလွန်းလို့ လက်လွှတ်လိုက်ဖို့ဆိုတာ ဘယ်လိုမှမဖြစ်နိုင်ဘူး။
ကျိုးယွင်ရှန့်ဘဝမှာ တစ်ခါမှ အခုလောက်ထိ ရင်မမောခဲ့ရဖူးဘူး။ ရုတ်တရက် အားအင်တွေကုန်ခမ်းသွားသလိုပဲ။ ကျိုးယွင်ရှန့်မျက်လုံးတွေ မှေးမှိန်သွားပြီး ခန္ဓာကိုယ်ထဲက ဝိဥာဉ်ကိုဖြည်းဖြည်းချင်းထုတ်လွှတ်လိုက်တော့တယ်။ ဒီလောကကြီးထဲမှာ သူ့အတွက်တွယ်တာစရာဘာမှမှမကျန်တော့ပဲ...