بين العقل والطريق
للكاتب غزوان علي
البارت الثالث عشر
كيف لاا شتاق اليك
وفي غيابك لا أعرف أين يكون المصير
يختنق كل ما في الكون رغم أنه كبير
لم أعد أرى شمس الصباح ولا القمر أراه ينير
كيف لا اشتاق أليك
وفي غيابك أبحث عنك في كل مكان
كل شي ساكن لا يتحرك كانه توقف الزمان
في غيابك اخاف كل شيئ ولا أشعر بالأمان
كيف لا أشتاق أليك
وقلبي يصرخ شوقــــــا أليك
ينادي أين أنت أحتــــــــــاج اليــــــــك😔
عاصم .. على كيفك فدوه غيث افتهم الموضوع اذا متت راح تدخل السجن
غيث .. لواعرف اعدام اليوم اخذ بدم اختي منك ياساقط
عاصم .. اتهدى غيث لا غيث لا
غيث .. محسيت غير الطلقه طالعه من السلاح وكع عاصم بالكاع والطلقه اجتي بصدره دااضربه الثانيه اريده يموت شون اختي كتلها ودفنها بأيده ويتعامل الوضع عادي ولا عبالك مسوي شى ودااضرب الطلقه الثانيه ولزموني الحرس مال الفندق
ولكم هدوني اليوم احرك ابوه لهذا الساقط كتل اختي بسببه دفنا اخت شابه مشافت شى من حياتها ولك ناقص چلب عوفوني
ردت افرغ المسدس براسه وبصدره بس لان مو محترف بأستخدام السلاح ملحكت اكتله
جتفوني وخابروا الشرطه وذبوني بالمركز
زيد. دك تلفوني رقم غريب وبلغوني بغيث والي سواه
شنوو ولكم شكعد تحجون هسه جاي وركضت على المركز وقدمت هوياتي حتى على الاقل يساعدوني اشوف اخويه
دخلت عليه بالتوقيف
يول هاي سوايه تسويها تخبلت
غيث .. لتعيط زيد لو تعرف الي صار جان سويت مثلي واكثر
زيد.. تكتل عصام تخبلت فوك مخسر زوجته وانهدم بيته
غيث .. هذا الساقط لجيب طاري اسمه كدامي هو الي كتلها زيد هو
زيد.. هو منو شكوو فهمني
غيث .. عاصم كتل ندى
زيد.. انت شكعد تحجي تخبلت
غيث .. متخبلت وتكدر تتأكد من كلامي واسأل تيم ابن ندى وراح يحجيلك شاف بيوم الحادث ولك زيد اختك ماتت قتل مو وكعت مثل مكال النا النذل
ود.. خلصت الفاتحه وماعندي حجه بعد ابقى بيت اهلي وخاصه هشام تعب يروح ويجي بين بيت اهلي وبيت اهله والولد مقصر
صح اني اتهزم منه بس بعد اتزوجته وميفيد الي كاعد اسوي لميت ملابسي وحضرت كولشي واجه دياخذني اتصل زيد على بابا واشتغل العياط منه
وهوسه انريد نفتهم شى ماكو تالي من كام يخابر على عمامي وخوالي افتهمنا السالفه وامي لطمت هم لان ندى ماتت كتل وبأيد زوجها وهم تلطم اذا مات عاصم معناه غيث ضاع راح مستقبله كمت ابجي واعيط وعياط جهال ندى من الخوف هز البيت هز ودخل هشام بهاي اللحظات
هشام ... خير گلبي صوتك واصل للشارع
ود.. ابجي واحجي الحك هشام غيث كتل عصام زوج ندى
هشام ... ياستار وليش كتله
ود.. لان طلع هو كاتل ندى ضارب راسها بالطبله الجاام وميته بسببه ماتت هشام بسببه
هشام ... اشش گلبي على كيفج راح يوكف گلبج من البجي وعيونج راحت يعني معودت هاي اليومين هدأتي من البجي ترجعين هم تبجين وهم تعيطين
ود.. موبيدي والله كاعد تشوف المصايب الي كاعد تصير مصيبه اكبر من الثانيه الاولى موتت اختي والثانيه يطلع زوجها كاتلها وهسه اخويه كتل زوجها ويمكن يضيع مستقبله من وره هذا التصرف
هشام ... ااكعدي كافي خلي نفتهم موكلشي بجي وعياط ارحمي نفسج وكاعد تشوفين الجهال شصاير بحالهم منهارين ويبجون اسكتي اقلها مولخاطري لخاطر جهال ندى
ود.. موبيدي والله اخوتي ضاعوا وادمرت عائلتنا شون تريد اهدأ واتعامل وكأن الوضع طبيعي
هشام ... اني مكتلج اتعاملي گان الوضع طبيعي بس اقلها لتعيطين وتبجين وتسمعين الجهال وهاي المسكينه امج منو يوكف وياها اذا انتي هيج منهاره كولشي ينخل وكله بيد رب العالمين المهم هسه خلي نشوف شراح يصير
طلعت من ود ورحت للمركز على غيث وقابلته وحجالي كولشي صفنت على وضعي ليش مكعد اشوف يوم حلوو وياها ليش بس مستشفى ومكابر وهسه مراكز ليش مكعد اعيش لحظات كأن عريس جديد زوجته بحضنه صح الي كعد تمر بيه هي صعب ومقدر موقفها داحس روحي فگر عليها جبت كل المصايب على هاي العائله من اجيت وبقيت اركض ويه زيد وطلع عاصم بعده عايش بس حالته خطره واهله گلبوا الدنيا وعشاير وناس طابه وناس طالعه وحتى لبيت اهلي مرجعت لان ماالحك
موج .. اتصل بغيث ماكو اي رد وبعدها انغلق التلفون واني اصلاً كعدت من الصبح گلبي يلعب اريد استرخي مااكدر والوب وهاي دعاء مراحمتني ورايه ورايه
دعاء... يله ست الحسن روحي اغسلي الطارمه
موج .. موغسلتها البارحه ونظيفه
دعاء.. ارجعي اغسليها اليوم
موج .. دعاء تره كاعده وروحي بخشمي ومالي حيل عركه وياج متجوزين مني
دعاء.. شنو شنو اجوز منج كومي بابا اشتغلي شتريدين اشتغل جواج خدامه
موج .. هوانتي مشتغله اصلاً هو بس الغدا تسويه وتكعدين شوفي حالج من يوم مااجيت وانتي حايره بروحج صبغ ونفخ وتفخ وتحيرين شسوين لان مرتاحه وذابه الشغل عليه
دعاء.. عيني عندي رجال ويحب انفخله واصبغله واعدل بروحي اله مو مثل غير ناس ضلت بحصره اضفر رجال وبقت عاله علينا واطلكت وكعدت
موج .. اولاً اني موبعازه الرجال واني الي طلبت الطلاك وثانياً اني مكاعده بيتج ولا بيت الخلفوج كاعده بيت ابويه افتهمتي
دعاء.. جان صار بيتي لوما رجوعج المصخم خرب كولشي
موج .. شنو قصدج
دعاء.. مومهم يله امشي غسلي الطارمه لااسويلج هوسه متخلصين منها للعصر
موج .. طاح حظ الوكت الي خلاج تتأمرين عليه شوكت ارجع اخلص منج وارتاح
دعاء.. مبقى شى اصبري
موج .. طلعت غسلت وكملت كولشي وطبيت غسلت كومه ملابس ظهري انكسر وصار العصر وحتى متغديت من القلق واني اباوع على التلفون اكول بلكت اتصال رساله وغيث ماكو ومو من عوايده ابد بعز الفاتحه واخته متوفيه جان على الاقل يدز رساله يطمني بيها بقيت من السمجه الوب وماكو احد يريحني كلت ماكو غيرها ود اتصلت عليها بالبدايه مجاوبت بثالث مره يله جاوبت
يمعوده حرك التلفون عليج وينج متكوليلي
ود.. الوو هلو موج
موج .. شبيه صوتج موطبيعي صار شى رجفتيني
ود.. كمت ابجي واحجيلها
موج .. دخيل اسمك ربي لتكوليها وغيث هسه وين
ود.. بالمركز
موج .. حسيت الدنيا افترت بيه وگلبي يوجعني وخفقان قوي وكع التلفون من ايدي
مروه اخت موج .. شبيج ميمي ياستار
موج .. دخت واحس روحي راح اوكع
مروه .. تعالي اكعدي وركضت جبت مي هاج اشربي باعي وجهج اصفر وشفتج ترجف شجاج ويه منو جنتي تحجين
وهيج رجفج
موج .. احجي ويه ود صديقتي بس هي صدفه صارت الحاله هيج
مروه .. زين ليش تبجين وتحجين لتخبليني صار شى
موج .. لزميني وصليني للغرفه اريد اتمدد وارتاح
مروه .. كله من وره هاي الحيه موتتج بالشغل وامي الله يسلمها متحجي ولا تدخل تخاف من المشاكل ومن اكولها كولي لأبويه تكول مااريد تصير مشاكل لان اخوج راح يصف بصف مرته ويشد ويه موج بله بربج هذا حجي اهل البيت يخافون من الچنه
موج .. موكلتيها حيه وكولشي تسوي حقها امي متدخل لان تعرف راح تصير مشكله جبيره ويضيع حقي لان بشار تغير ودوم بجانب مرته حتى لو بالباطل
مروه .. كومي كمتي ترجفين اكثر وعيونج صاروا دم يمكن ضغطج صعد
موج .. ماعندي صعود عندي هبوط
مروه .. صعود هبوط المهم حالتج مأساويه يله كومي
واخذتني كوه لغرفتي وطلبت منها تعوفني ارتاح وكوه اقتنعت وعافتني بس طلعت حطيت وجهي بالمخده وكتمت حلكي وبعلووو صوتي اعيط ااااااااااااااااه ليش ياربي كل مااكول تفرج تضيق واعيط وابجي انهاريت بس كاتمه البجي والعياط بقوه بالمخده
واعيط غييييييث ضعت مني ليش مفكرت بيه مكلت هاي منو الها وين تروح اااااااه يارب شمسوي بدنيتي واتعذب
لازواج مثل الناس لاطفل واحس مثل كل مره بالامومه وحتى بيوم من حبيت ضاع مني شون اكدر اعيش بدونك اذا راح غيث ينحكم ينعدم وكمت الطم على وجهي واكطع شعري انهاريت ضاع حب عمري ضاع غيث مني
مروه .. دااسمع عياط بس مكتوم دخلت على موج ولكيت حالتها حاله حاصره عياطها وتبجي وتعيط وتلمخ بروحها
اسم الله شجاج اوكفي وسحبت المخده وشمرت نفسها بحضني وتبجي
فدوه شبيج شصار مو راح اموت احجي
موج .. ضاع مني مروه
منو الي ضاع اكرم
موج .. ولج يااكرم حب عمري الحب الي انتظرته كل حياتي الانسان الوحيد الي يحس بيه ودوم واكف بجانبي
منوو هذا ولج
غيث راح غيث مروه احسب يوم يوم حتى تنتهي العده مالتي ونتزوج وابتعد عن كل المآسي الي عايشتها شفتي اختج وحضها المصخم
مروه .. قصدج غيث الي مره اخذج للمستشفى من ضربج اكرم
اي هو نفسه
لتكوليلي مسويه علاقه ويااه وانتي على ذمه اكرم
موج .. انتبهت اني شسويت جنت محتاجه اشكي احجي ومن كثر ما مضغوطه نسيت المفروض محد يعرف بعلاقتي بغيث وخاصه مروه لان صغيره بعدها طالبه اعداديه سادس ومراهقه مااعرف راح تفهمني او لا دنجت وخجلت وتندمت لان حجيت بس هسه اني بوضع حتى عقل مابيه
فدووه مروه مالي خلك وملامه اني هسه منهاره ومامستعده اسمع منج او من اي احد كلمه واذا سمعت يمكن احرك روحي
مروه .. لاقلبي انتي مااكدر الومج لان انتي مو صغيره واكيد تعرفين مصلحتج بس انتي عاقله ومااتوقع تحبين وخاصه وانتي متزوجه
وبديت احجي تفاصيل بسيطه عن حب غيث وهاي مروه مراهقه حبت روح المغامره عند غيث بس وراها رجعت ابجي وحجيت الها عن حاله
مروه .. حضنت موج كافي ياعيني اسكتي ربج يفرجها اكيد اهله مراح يتركوه وهسه يفضوها
موج .. شيفضون هذا قتل يعني حكم واحتمال اعدام يعني اني خسرت حبيبي وروحي كوليلي شون اعيش بدونه داموت ومحد حاس بيه
مروه .. حقج ماالومج بس كافي تسوين هيج لتحس وتسمع الحيه الي عدنا وتصير كارثه
دعاء..ايا چلبه اني حيه هسه اراويجن الحيه شسوي اله اهججكم من البيت اصبرولي
جنت اصنط على كلامهن وعرفت كولشي عن موج مسويه نفسه الشريفة العفيفه اني الج اذا مااذلج مااصير دعاء
هشام ... رجعت لبيت اهل ود بليل وحبيت اطمن عليها وارجع
ود.. جوعان
هشام ... اي والله كولش حتى غدا ممتغدي بس اذا ماكو اكل لتسوين وتعبين نفسج
ود.. لا كولشي موجود بس شتحب اكو تمن ومرگه باميه مال الظهر واذا متاكل هيج اكل بليل عندي گبه حلب وگبه برغل اگليهم الك
هشام ... تمن ومرگ ثگيل اذا تكدرين گلبي كليلي كبه حلب وشويه طماطه
ود.. تدلل
دخلت للمطبخ اگلي فتحت طاوتين على السرعه ووحضرت الخضره والطرشه ودااكلي وطب هشام للمطبخ
اكدر اكعد هنا اكل استحي بالصاله اخاف ابوج او احد يجي
ود.. البيت بيتك هشام اكعد بالمكان الي ترتاح اله
كعدت واباوع عليها من تشتغل رغم شكد تعبانه لان جانت ايام فاتحه وراها موضوع اخوها وبس تبجي ولابسه اسود بس حلوه اشوف تتحرك ويه كل حركه من جسمها اصفن عليها بحيث اتمنيت بذيج اللحظه ماخذها وصايره زوجتي اذا اني لحد الان مااخذتها وبعدها بنيه ومااحب اضغط عليها بس اني هم بشر واحبها وزوجتي واشتهيها يعني اريدها بس بنفس الوقت مااكدر اضغط عليها كمت وكفت وتحركت وكفت وراها وحطيت وجهي برگبتها فزت
اسم الله
ود.. دااشتغل وظهري على هشام مااحس غير حط وجهه برگبتي فزيت وانداريت عليه
اكعد ليجي احد عفيه
هشام ... مااسويلج شى بس اشم ريحتج
ود.. خلي اكمل الاكل حتى تاكل مو جوعان
هشام ... حاوطتها بأيدي وحصرتها وتقربت اشم برگبتها وهي ترجف بحضني وابوس بهدوء بوسات ناعمات برگبتها وخدودها وفاقد عليها
ود.. عفيه هشام كافي
هشام ... اريدج ود ميت عليج شوكت تصيرين مرتي
ود.. خفت منه ودفعته بهدوء
ان شاء الله اصير قابل وين اروح اطير
هشام ... سحبتها عليه وحطيت شفايفي على شفايفها وغمضت ردت اعيش ولو لحظه وحده وياها مطالب هوايه وبديت ابوسها برقه بس هي مستجابت ويايه وبقت جامده محسيت حبت هذا الشى وخرت منها ورجعت كعدت بدون اي كلمه
ود.. رجعت انداريت واني كوه اجر النفس اول مره احد يبوسني اني مااعرف ابوس لهذا جمدت وبنفس الوقت متوقعت هشام يتجرأ يبوسني وبقيت متوتره واني اشتغل وكمت استعجل اكمل ودااسوي زلاطه وجرحت ايدي ااااخ
هشام ... طفرت من مكاني بيج شى
ود.. لا هيج جرح بسيط
هشام ... يابسيط واصبعج طار ياعيني غير تنتبهين لو ادري ولا اخليج تسوين اكل
ود.. لا شدعوه هو دااگلي قابل دااسوي قوزي ومجرد صفنت وجرحت نفسي شى عادي
يوم بعد يوم يصدمني هشام بتصرفاته واشوف الخوف بعيوني ويرجف غسل ايدي
وعطت الكبه راح تحترك
هشام ... فزيت والله وخلي تحترك حتى لو محروكه اكلها من ايدج
ود.. ابتسمت مااعرف احب سوالفه وعفويته بالكلام
هشام ... شو تعاالي وسحب ايدي وحط لاصق جروح وجان يسحبها ويبوسها اني هنا رجفت بقوه اليوم ناويها هشام همزين موبيته جان مااكدر افلت وكملت تفضل
هشام ... تعالي اكلي ويايه
ود.. مجوعانه
لعد مااكل شيلي الاكل
ود.. ليش
هشام ... اذا متاكلين مااكل تدرين من يوم متزوجنا مأكلنا ولا مره سوه
ود.. صحيح بسبب الظروف موبيدي
هشام ... مدااولومج ياعيني بس حاب تاكلين ويايه
ود.. كعدت
هشام ... اكلي يله اكل
ود.. حاضر وبديت اكل على كيفي وهو صافن بوجهي وياكل
ود.. اذا تبقى هيج مااكل
هشام ... شبيه
ود.. صافن وتاكل
هشام ... وربج ممصدك كاعد ناكل سوه وانتي زوجتي لوتعرفين شكد حلمت بهذا اليوم
ود.. لهاي الدرجه تحبني
هشام ... اووووف ياود لو تعرفين شكد احبج
ود.. صفنت عليه بس انت تعرف بيه مااحبك
هشام ... اعرف
ود.. وشون رضيتها
هشام ... الي يحب من طرف واحد يرضى من حبيبه اي شى حتى كلمه هلو عنده تسوه الدنيا
ود.. صفنت وتذكرت حبي لخالد وفعلاً جانت الهلوو مالته عندي تسوه الدنيا
هشام ... حبيبي وين صفنتي
ود.. هاااا لا هيج يله كمل اكلك حتى احضرلك الحمام تسبح وتنام
هشام ... غمزت الها وين انام
ود.. هاااا غير بالصاله
هشام ... انتي موكعد تنامين بغرفتج
ود.. اي
هشام ... خلي انام يمج
ود.. شنوو لا مااكدر
هشام ... هههههه وشبيج رجفتي عبالك منومه صاحبج يمج شنو نسيتي اني زوجج
ود.. موقصدي بس جهال ندى ينامون يمي ومااكدر اخليك تنام بالغرفه ويانه
هشام ... ماشي براحتج
ود.. اعرف بيه ضاج بس مااكدر انام وياه على جربايه وحده يمكن الي صار لهذا اليوم رحمني من ان انجمع ويااه بمكان واحد مرات احب اهتمامه بس كزوج بعدني ممتقبلته
حضرتله الحمام وسبح وطلع والفراش وتمدد
محتاج شى
هشام ... اي
ود.. شنوو
هشام ... محتاجج
ود.. اعرف تعبتك ويايه ومشفت يوم حلوو من تزوجنا لهسه بس هذا حالي واذا حاب نترك ونطلك اني مستعده وماازعل منك لان اني دربي طويل ومااعرف شوكت ارجع وياك لان كعد تشوف حالنا اذا متنحل شغلت غتوو ماارجع لبيتك
هشام ... سحبتها من ايدها وكعت بحضني وصرنا وجهه بوجهه
اسمعيني هاي اول واخر مره اسمع منج كلمه طلاك اني شفت منج حتى اطلكج
ود.. لهذا دااكولك ماطول بعدنا على البر تكدر تعوفني واني والله ماازعل منك
هشام ... وده انتي على البر اني بالبحر وغركت بحبج مااكدر اطلع بعد لهذا مامسموح الج ابد تحجين هيج انتي زوجتي وابقى بجانبج لو سنين موو ايام وان شاء الله ايام سوده وتمر
ود.. يارب خلي اكوم ردت اكوم وهو حيل حاضني هشام عوفني خلي اكوم ليجي زيد او واحد من الجهال
هشام ... مشيت ايدي على شفايفها
ود.. فدووه كاافي
هشام ... تقربت من اذنها ليش ترجفين من المسج
ود.. هاااا ماادري
هشام ... بعد مده من المسج والمس هذا الجسم ومشيت ايدي بجسمها بهدوء راح تعرفين سبب هاي الرجفه اما اذا صار وياها حب اووويلي الله تكومين تموتين على اللمسات
ود.. عفيه انت شكد جرئ
هشام ... هههههههه والله حاس اني صاحبج مو رجلج هسه عمي راضي اكون صاحبج اقلها اكدر ابوس واحضن براحتي موو هيج حصره عليه الزمج تكمزين لو تتشنجين
ود.. عوفني فدووه
هشام ... ماااا
ود.. هشام تره اني تعبانه وانت كاعد تدلع عليه ومستحمله عوفني اروح انام
هشام ... مااا مااا
ود.. افففف وتااالي ويااك
هشام ... تبوسني يله
ود.. تره والله اني بمود موو مال شقه ودلع شوو وخر ودفعته وكمت وعفته
هشام ... ضجت من تصرفها جان قصدي اغير المود مالتها اريدها تضحك ولو ثواني من حبي الها اتعب من اشوفها حزينه حبيت بس اغيرلها شويه من مودها واقلل توترها وعافتني وصعدت عفتها براحتي ااااخ ياود شضامتلي الايام وياج من تعب وضيم
غيث .. دخلوني تحقيق وروح وتعال واسطات وفلوس ذبوني بالتوقيف كل هذا مهامني بس ادعي عاصم يموت حتى هذا تعبي مراح بلاش وبقيت اليوم كله توتر واعصاب ومحامي يجي وابويه وزيد والدنيا مكلوبه واجه الليل
ااااه ياليل شكد طويل بليه الاحباب بعد ماالكل راح وبقيت وحدي بديت اهدأ وهاج حنيني لأمواجي وكأن جنت مغيب ومتذكرتها من اعصابي ومن قهري على اختي فقدت احساسي بكولشي بكل الي حوالي حتى بموج لان هاي اختي والاخت غاليه وتنقتل وهي مالها ذنب
وبديت ارجع غيث العاشق الي يلوب على محبوبته وامواجه شون حالج هسه ياحبيبة روحي شصار بيج بدوني وياترى عرفتي بلي صار بحبيبج
وبقيت ايام على هذا الحال بالنهار مخبوص بقضيتي وناس رايحه وناس جايه وابويه وزيد انتهوا رجل بين العشاير والفصول لان اهل عاصم سوها كعده عشاير وبين المحامين والشرطه وتحقيق
وبليل تهيج مشاعري والالامي على موج واشتاق الها بجنون بحيث من يصير الفجر اصير مثل المخبل اريدها اريد اسمع صوتها انفاسها وهسه اني صار ١٥ يوم بالحجز وبعده عاصم بالانعاش ومتوقفه كل قضيتي عليه حتى عشائرياً لان لا العشائر ولا القانون اخذو بكلام تيم لان طفل عمره ٦ سنوات واصلاً اعتبروا تصرف طايش مني شون اصدك بطفل صغير واني متأكد وحتى ابويه وزيد متأكدين كلام تيم صح بس محد اخذ بيه اني اتمنى يموت اقلها اخذت بحق اختي بس شون بموج اااه ياامواجي شونج هسه بدون حبيبج
موج .. ميته بدون روح يوميه اتصل اكثر من مره على ود حتى تنطيني الاخبار ومثل معرفت الاخبار يوم بعد يوم تسوء
واني بس ابجي ولا اكل ولا شرب مره ود تواسيني ومره تبجي ويايه ومروه ويايه ويايه معافتني
من اشتاق اطلع صوره ابقى ابوس بيهم واقرأ اشعاره وابتسم لو كلماته المجنونه
غيث تعبت تعال يارويحتي وشوف حبيبك شون تعبان انطاك گلبك تعوفني مواني انتظر يوم يوم اكون الك ليش بعدت المسافه بينا ليش ياغيث
اباوع على صوره واشكي الك ومنك
أشكيك لمين .. يشعر بقلبي اللي أنظلم وياك سنين
أشكيك لمين والخصم أنت والحكم
أنا شكوتي منك إليك .. وفرحتي ودمعي في أيديك
وإن كان ضميرك نفسه ما بيقدر عليك .. أشكيك لمين
اسمعها وابجي المن اشكي يانظر عيني وانت بعيد اذا انت جنت ملاذي الامن وضاع ملاذي واماني مگلت هاي مالها احد ضعت ١٥ يوم وداموت لو اشهر او سنين شون ياغيث
مروه .. هم بعدج تبجين موعيونج خلصت والله
موج .. داموت مروه والله داموت
مروه .. صلي وادعيله الله يطلعه من هاي الشده
عاصم .. صحيت والالام بصدري وتذكرت الي صار واجه ابويه وكل اهلي وبعد ٤ ايام من استقرت حالتي اجوي اخذوا افادتي
الشرطه .. المدعو غيث قام بضربك طلقه بصدرك وبشهاده شهود بس هو يدعي السبب انت قتلت اخته كلامه صح او لا
عاصم .. اني مقتلت احد وجنا نتشاقى اني وغيث
ابوعاصم .. شنوو تخبلت انت شنو تشاقى وصلت للموت واتريد اطلعه منها وحتى اذا طلع بالقانون اكتله خلاص مواني الي ابني يوصل للموت والجاني يفتر براحته
عاصم .. يابه مو وقتها هسه
الضابط .. يعني مضربك متقصد لو شنو
عاصم .. جنا نتشاقى وطلعت الطلقه
الضابط .. وكلام غيث بخصوص اخته
عاصم .. عادي احتمال يكول هيج حتى يطلع من قضيه ضربتي رغم هو يدري شقه بس كال يجوز يموت خلي اطلع هاي الحجه
الضابط .. متأكد من اقوالك
عاصم .. متأكد سيدي المهم الولد برئ وماكو شى
ابو عااصم .. انت شون تتنازل انت متعرف شسوينا بيهم لخاطرك
عاصم .. هذا الصح يابه
ابو عاصم .. وشكوو للناس والعشيره الي متحزمه حزام حتى نربيهم ونأدب ابنهم ونكسر ظهرهم
عاصم .. راح اكولك الحق وانت احكم
حجي غيث صح يابه اني كتلت ندى كتلت ام بيتي وجهالي وبأيدي هاي
ابو عاصم .. انت صاحي لو تتشاقه لو تغطي على ابنهم
عاصم .. اكو واحد يتشاقى بهيج موضوع يابه تمنيت اموت ومااصحى اقلها استاهل موتت حبيبه عمري والي صاينتني والله شنو مااريدها تروح لعرس اختها
وحجيت التفاصيل كلها لأبويه وكاام يدك على راسه
ابو عاصم .. اياك تحجي هذا الحجي لأحد لان بذاك الوقت مو بس قتلك حلال حتى احنا ياخذون فصول منا ويكسرون ظهرنا نبقى هيج مسيطرين واحنا صاحبين الحق ونتنازل بحجه الجهال والنسابه الي بينا اياك تحجي ايااك
عاصم .. حاضر يابه
زيد.. غتوو واخيراً صحى عاصم
غيث .. عساه لاصحى موتتني هسه من كتلي ليش غلطت بالضربه ليش موو بگلبه
زيد.. لعبالك اني ممقهور مثلك على اختنا بس مو بهاي الطريقة غيث لو كل واحد مثلك ركض اخذ السلاح وكتل واحد جان الدنيا خلصت
غيث .. وشتريد ابقى اتفرج
زيد.. موو تتفرج بس اكو هواي طرق اندمره بيها ونخلي يتمنى الموت كل لحظه الموت لهيج واحد رحمه غتوو ولو جاي وكايلي وروح ندى اخلي كل دقيقه وكل ساعه باليوم يدعي يموت ولا العذاب الي يشوفه واخذ حق اختنا منه بس انت استعجلت غتوو
غيث .. هسه صرت اني الغلطان لان دااخذ بدم اختنها واكتل الي كتلها
زيد.. كل واحد وجهه نظره وطريقته بالانتقام بس طريقتك تبقى غلط واني مااريد الومك البيك كافي
غيث .. زين وشكال بأفاده مالته
زيد.. نكر وسحب القضيه بس بقى الحق العام واتوقع تنحكم على الاقل ٥ اشهر واحنا نحاول نقللها
غيث .. وانحكمت ٣ اشهر بالواسطات وفلوس
ابو زيد.. اتحمل ابني كلها كم شهر وتطلع واني هم مااسكت لحد مااطلعك
غيث .. لتخاف بابا بس انتبه على امي تره تعبانه
امك رتح تموت من القهر عليكم
وحجيت ويه الوالد وبست راسه وكام يبجي وطلع
اريد منك شغله زيد
زيد.. عيوني الك كوول
غيث .. اريد تلفون
زيد.. صعب هسه بس من اينقلوك للسجن بيها مجال ادخلك تلفون
غيث .. ولو دقايق
زيد.. علمود موج
غيث .. گلبي نار عليها ابوس ايدك دبرها بمعارفك بفلوس دقايق والله ميت على صوتها
زيد.. والله انت موو عاقل حير بمصيبتك شون راح تتحمل ٣ اشهر بهيج مكان انت بره متبات اذا موو بفراشك وهسه راح تنام ٣ اشهر وين بالسجن وحايرلي بموج
غيث .. هي الي راح تهون عليه هاي الايام حاول زيد لخاطري
زيد.. انتظرني بليل
غيث .. بقيت اعد دقيقه دقيقه واجه واحد من السجن
هااك بس لتتأخر
غيث .. شكراً لا مااتأخر
ادك ومتشيله انتهيت عفيه جاوبي وجان اسمع صوتها
موج .. جنت ابجي لان عرفت انحكم ٣ اشهر بس هم حمدت الله موو سنين او اعدام بس اني اليوم وهو بعيد اعتبره سنه وحاضنه صوره وابجي دك التلفون رقم غريب مجاوبت وبعدين مااعرف ليش نغزني گلبي وعبالك يكولي جاوبي
الوو
من فدوه لصوتج وانفاسج وروحج يابعد روحي
طفرت من مكاني غيث حبيبي
عيون حبيبج وانفاسه
موج ...كمت ابجي
اشششش مااريد اسمع دموعج تدرين بيه اختنك اذا تبجين
موج .. شون انطاك گلبك هاي تاليها هذا الوعد مالتك راح تكونين اليه ايام وبحضني هيج اتذب نفسك بالنار حرام عليك مفكرت بيه
غيث .. موج اني هذا التلفون حصلته بطلعان الروح وعندي كم دقيقه مااريد اخلصهم بالعتاااب اريد اسمع انفاسج وصوتج حتى اتنفس ولج ميت بدونج اريد احيا بأنفاسج
موج .. دموعي تنزل بهدوء واحجي ويايه واتنفس اشتاقيتلك ياانفاسي اااه ياغيث بدونك اليوم والليل محلوو جنت اعرف احبك بس متوقعت هيج مجنونه بيك
غيث .. اووويلي من فدووه لمجنوني
موج انتظريني راجعلج يادنيتي
موج .. منتظرتك وعيونك العمر كله انتظر غيث
غيث .. غمضي
موج .. غمضت
غيث .. تخيلي اجيت يمج وحضنتج وحطيت وجهي بصدرج واكولج افيييش ياريحتج
موج .. واني العب بشعرك واكولك نام وارتاح بحضن حبيبتك
غيث .. بيه صرخه شوق تهز اركان السجن كله
يله اخي بسرعه التلفون اخاف يجي احد
غيث .. ثواني
امواجي رايح اني انتبهي لنفسج يانفسي
موج .. انت انتبه لنفسك وراح ادعيلك يوميه
غيث .. اكلي لج مااريد هذا اللحم يروح اريد امصمص بلحم موو بعظام
موج .. ههههههه اروح كولي فدووه الك
غيث .. خديداتج مااريدهم يرحون اذبحج اريد من اطلع واجي واخطبج ابقى بس اعض واكرص بيهم ذوله مالاتي
موج .. بس اطلع كولي الك
حبيبي
غيث .. عيونه
موج .. لااله الا الله
غيث .. محمد رسول الله
انتبهي لنفسج وانتظريني
موج .. منتظرتك ياروحي
سديت الخط ومسحت دموعي وتوضيت وصليت صلاه الشكر ورحت اكلت وبديت اتقبل الوضع الي عجبني هاي الفتره كلها دعاء هادئه حتى متسوي مشاكل ويايه حتى مرات من كثر ماابجي ومااكل يهبط ضغطي مااكدر اشتغل تكوم هي تكمل الشغل بمكاني هدوئه مخوفني هاي اعرف بيها وحده متخاف الله وهذا الهدوء موو طبيعي
دعاء.. انت تفتهم شتريد هاي كارثه واذا احد عرف اسوي الي تريده يذبحوني
محد يذبحج
دعاء.. وشراح استفاد يمه من هاي المخاطره
المجهول .. راح تخلصين منها وللابد لان اكيد اهلها مراح يرحموها
دعاء..واذا كتلوها وكعت برگبتي شون
المجهول .. لتخافين ميكتلوها وحتى اذا كتلوها جلبه وراحت المهم ادمرها
دعاء.. مااشي بس اريد هديه حلووه ويااها موو اتعب واخطط وكولشي مااحصل
عيوني الج بس نفذي الي ردته منج
دعاء..اكو تخم مال ذهب عجبني سعره ٧ مليون اريده
ولج شكد استغلاليه انتي
ياااا فدوه احمدربك مطلبت اكثر الي راح اسوي اطير رگاب بيه والله يستر شراح يصير اذا متشتري براحتك عود انت حلها
المجهول.. لا يمعوده التخم باجر يمج
دعاء.. مقدماً اريده انت متتأمن
بعيوني بس فضيني
دعاء.. هاي الايام راح اهدي اللعب وياها والمضايقات حتى لحد يشك بيه وانت من انطيك الاوكي جيت
انتظرج لتتأخرين
مروه .. امشي ويانه ميمي اقلها تتونسين حفله والبنات كلهم هناك وحتى الولد وبابا كلها راح تروح تعرفين حفلات بيت عمج
موج .. مالي خلك هو اني مال ونسه بربج
مااروح وراح يسألوني ليش اطلكتي وشنو السبب وخاصه النسوان مراح يكعدن راحه
مروه ..لعد تبقين وحدج
موج .. شكووعليه وسن هم متروح اذا هيج اروح يمها اكمل شغلي واسبح واروح يمها
مروه .. براحتج گلبي المهم انتبهي لنفسج
دعاء.. عندي شغله اريد اكولها الك بشار بس موو تعيط
بشار .. خير ياطير على منوو جاي تفتنين
دعاء... افتن لو اكول الحق هو الحق بهذا البيت مينراد بس رغم هذا لازم اكولك هذا شرفك وشرف ابنك ولازم تصونه
بشار .. تخبلتي ياشرف شبيه شرفي احجي لااذبحج
دعاء.. خلي الذبح لأختك موو الي
بشار .. منوو قصدج
دعاء.. ست الحسن موج
بشار .. اعرف بيج تكرهيها بس مووو مال اطعنيها بشرفها لهنا ومااسمحلج
دعاء.. عيني لااسمحلك ولا تسمحلي ياكلمه ردي لمجانج
بشار .. ولج هاي موو گٌٰــلمه وترد هاي كارثه احجي لا والعباس اكطعج هسه
دعاء... صوتك يمعود لحد يسمع
بشار .. احجي بنت الگلب
دعاء.. مقبوله منك بس هم احجي وبعدين احاسبك على المسبه
سمعت اختك تحجي ويه واحد وتتواعد ويااه باجر من اطلعون اجيبه للبيت
بشار .. صرت نار وخنكت دعاء جذابه مووج متسويها
دعاء ... دفعت ايده واكح متت خنكني قوي على شنوو اجذب
بشار.. رايح اموتها واخليها تعترف
لزمته وين رايح اكيد لو تكطعها تكول كذب انت الزمها بالجرم المشهود وافضحها كدام اخوتك وابوك لان اذا هسه نزلت وضربتها راح يلوموك ويتهموك تسمع كلام مرتك
الزمها لزم يد وافضحها وكأن انت صدفه وجعت للبيت وشفتها
بشار .. تخبلتي شيصبرني الباجر لوبيدي هسه انزل اذبحها ومتعرفين منو الولد
دعاء.. لا مااعرف بس الوقت باجر ساعه ٦ العصر
فكر بكلامي وصبر نفسك لباجر العصر
موج .. صار ثاني يوم والكل تحضر يطلع واني انتظرهم حتى انظف وراهم واسبح واروح لوسن اقلها اتونس وياها ماابقى وحدي
دعاء.. طلعنا كلنا وعفتلك المفتاح جوه اول زرعه بصف الباب الي عليه سويته الباقي يمك
مقصرتي والتخم هم وصل الج
اي عااشت ايدك يله اروح قبل لحد يحس
موج .. كملت الشغل وسبحت ومشطت شعري ودااطلع من الغرفه وجان يجيت عليه بوس وحضن وشمرني على الجربايه ويتلمس بجسمي وهو ضخم وبدا يكطع بملابسي واني ابجي
لك وخر حقير سافل واضرب بكل قوه
ومااشوف غير بشار اخويه فوك راسي وسلاح بيده
يتبع .....