سلطان بعد ما سكت يدته و عمته طلع من البيت هو وأخوه و نوف وعياله وأمه
ام سلطان وهي تصيح : سلطان اتصل على خالك سهيل خل يروح يشوفها هو اقرب و بيلحق عليها
نوف وهي تهدي ام سلطان : اهدي عمو لا تصيحين .. وانا كلمت طلال من اول ما طلعت مهوور وان شاء الله يلحق عليها
منصور بعتاب : يمه ليش ما تكلمتي .. ليش ما وقفتيهم عند حدهم يعني .. ليش جذي اتسوين ف مهره حرام عليكم والله البنت بتروح من ايدينكم وانتو السبب
ام سلطان وهي يزيد صياحها : تعرف اني اذا تكلمت بيحطون كل شيء على تربيتي وتربية ابوك .. وانا ما ارضى عليه
منصور : خل يتكلمون ... بس اهم شيء اختي
سلطان : خلاص ما له داعي هذا العتاب الحين
ميره وهي اتصيح: ماما ليش كله يزاعقون ما احب جذي انا
نوف وهي تمسح على شعرها: ما في شيء ماما .. ما في شيء
.........................
عند مهره من بعد ما كسرت كل شيء فالغرفة
حطت رأسها على اليدار وهي ماسكه رأسها واتصارخ : طلعوا من مخي ... ما أباكم ... خلاص خلوني بروحي ... ما يخصنيييي انا ما ليييي دخل فيكم .... ما احبكم اكرهككم كلكم ..
سهيل وهو يدق الباب بخوف : مهره .. مهره بطلي الباب .. انا سهيل ... مهره...
يوم سمعها قاعده اتصارخ و سمع صوت التكسير زاد .. ياب مفتاح الاسبير و فتح الباب وشاف غرفتها الأنيقة الي تحولت الي فوضى .. من الزجاج والأغراض الي عقتهم
سهيل وهو يروح لها : مهره اهدي اهدي .. تعالي قعدي
مهره وهي اتصيح واتصارخ : ما أباكم .. خلوووني بروووحي خلاص .. اكرهكم ما احبكم .. كله منكم كلللله منكم .. والله ما اخليكم وبتشوفون ...
سهيل قرب من مهره وحظنها وخلاها تقعد ومن قعدت بدا ريلها يهتز بكل قوته ومع كل هزه مهره تصرخ من الالم
سهيل وهو يحظنها: مهره .. مهره .. اهدي اهدي ما صار شيء
مهره وهي تبعده عنها بكل عنف : قووووموا عني مالكم دخل فيني وهي تشد شعرها بكل قوه ... اطلعوا من مخي ما أباكم اكرهكم اكرهكم
وصلوا قوم سلطان وهم خايفين على مهره ... اما نوف وعيالها راحوا قسمهم عشان العيال ما يخافون
ام سلطان وهي تروح عند مهره : مهره .. يا امي شو سويتي بالغرفة .. اهدي ما صار شيء
مهره وهي ترفع رأسها واتشوف امها ورجعت بخوف وكأنها شايفه جني قدامها: وخري عني لا تقربين ما أباكم انا اكرهكم .. يبولي خالي سهيل ابا خالي ما أباكم انا اكرهكم
سهيل وهو يقرب : انا موجود .. موجود
مهره وهي تقرب منه وتدفن رأسها بحظنه : ما سويت شيء والله ما سويت لهم شيء
ام سلطان وهي اتصيح و تمسح على راس مهره : مهره يا بنتي شو فيج قبل ما كنتي جذي
مهره وهي تدفن رأسها اكثر ف حظن خالها وتتمسك فيه اكثر عشان امها ما تلمسها
مهره : ما أباهم .. كلهم يكرهوني .. بيذبحوني ما أباهم
سهيل وهو يحظنها اكثر ويمسح على شعرها : ما بيسون لج شيء لا تحاتين
وأشر عليهم عشان يطلعون برا ويخلون مهره ترتاح شوي
سهيل وهو يكلم مهره بهدوء : بتروحين معاي البيت ؟؟
مهره وهي تهز رأسها و ريلها ما زالت تهتز
سهيل وهو يمسح على ريلها وطلع تلفونه وشغل سورة البقره وطرش مسج حق سلطان. عشان ايبون لها ماي أتهدي فيه أعصابها شوي
دقايق و دخل منصور وهو شال ماي ورد.. خذاه منه سهيل ومسح على رأسها ويهها الي ارتعشت اول ما لامس الماي ويها و بعدين شربها الماي ... مرت ساعه ومهره ما زالت بحظن خالها بعدها رفعت رأسها وابتسمت له وكأنها توها قايمه من النوم ما تدري شو صار كل الي تعرف ان يتها الحاله وبس
سهيل بابتسامه : الحمدلله على السلامه
مهره بصوت رايح من الصراخ : الله يسلمك
سهيل وهو يقومها : يلا قومي جهزي ملابسج باخذج معاي البيت
مهره وهي تقوم : ان شاء الله
راحت اتحط ملابسها ف شنطة صغيره و حطت أغراضها الشخصية .. اما سهيل نزل عشان... يطمنهم عن مهره .. شوي ونزلت مهره وبدون ما اتطالع او تقول شيء طلعت برا .. طلع ورآها سهيل وراح لبيته .. اول ما وصلوا خذت مهره شور بارد عشان تهدي أعصابها وحطت رأسها ورقدت اما سهيل راح يقعد عند ابو حمدان عشان مهره ترتاح شوي
...........................
في بيت ام سلطان .. كانوا كلهم مجتمعين ف الصاله
منصور : يمه ممكن توقفين صياح الحين واتقوليلنا شو صار ؟
ام سلطان وهي بعدها اتصيح .. ما تقدر تتكلم
سلطان يوم شاف حالة امه: خلاص منصور .. مب لازم تعرف شو صار
منصور بعصبيه: واختي .. تبون كل مره يصير نفس الشيء وتيها الحاله وخلاص .. ونحن ابدا ما نعرف شو السبب
نوف : خلاص منصور مب وقته الحين .. سلطان ود عموه غرفتها عشان ترتاح شوي
راح سلطان عشان يودي امه غرفتها و رجع الصالة .. وخبرتهم نوف بكل الي صار من اول ما دخلت مهره الصاله الين يوم صارت السالفه ف غرفة الطعام
......................................
المكان: بيت اليد
من اول ما طلعوا قوم سلطان واليد طايح هزاب في مريم وامها واليده .. هو يعرف انه هم الي ورا السالفه
ام طلال : يبه مهره هي الي غلطت عليّ .. هي الي بدت انا ما يخصني
مريم: وبعدين يدي مهره تستاهل .. وايد شايفه نفسها ما ادري على شو
طلال ما تحمل يسمع ها الكلام عن مهره وقال بعصبية: بس خلاص .. مهره انا اعرفها ما اتسوي جذي بس انتو شكلكم مقهورين من البنت .. ولا تبون اتسوون شووه على حساب الغير
ام طلال: انت جب ولا كلمة ... وبعدين ليش انسوي شووه هذا الصدق
مريم تكمل بأسلوب مستفز: هه ولا الظاهر الحبيب ما يرضى على مهره حبيبة القلب .. لا تحلم وايد تراك متزوج هااا
طلال وهو يقوم بعصبيه وراح عند مريم وو... طرااااااااااااااااااخ .. كف على ويها عدل مخها الخربان .
اليد: زيين اتسوي فيها ... وانتي يا شيخه شكلي ما عرفت اربيج عدل .. اول شيء ولدج وبعدين مهره لين وين تبين توصلين بالضبط
ام طلال : يبا هذيل من بعد وفاة اخوي اختربوا .. امهم ما عرفت تربيهم .. كل واحد لسانه صار اطول عن الثاني
اليد: لانهم ما عادو الصغار .. العيال كبروا وعيب انج تمدين ايدج على البنت قدام الناس
اليده: ومنو ناس ها .. الا نحن اهلها ترا وهي ما ضربتها الا انها تبا تأدبها وتربيها عدل
اليد بحزم: اسمعوني عاد ...عياال سعيد محد يقرب منهم دام راسي يشم الهوا .. حتى لو بكلمة ولو عرفت ولا سمعت ان صارت مشكلة معاهم وانتو السبب يا ويلكم مني سمعتوا ولا لا ؟؟
الكل : ان شاء الله
...........................................
اليوم الثاني ف بيت ابو حمدان ... كانت توها مخلصه شور و قاعده ترتب أغراضها و اتمشط شعرها وتتلبس عشان بتطلع مع خالها ..
مهره بخاطرها : يا ربي شو صار امس .. انا ادري انه يتني الحاله بس شو سويت .. اففف فيني فضول... اممم خل سهيل يرجع وانا بسأله اكيد هو كان موجود وقتها .. دخل سهيل..
سهيل وهو يأخذ بوكه ومفتاح السياره و النظارة : انتي بعدج ما خلصتي ؟؟
مهره وهي اتطالعه كيف يتهرب : لا خلاص خلصت
سهيل وهو يطلع : انزين يلا تعالي بسرعه
مهره : غريبه خذ الغرفه كلها الا تلفونه .. كل هذا عشان ما اسأله عن شيء ؟!!
لبست مهره عبايتها وخذت كل أغراضها وتلفون خالها و بعد ما تأكدت انها سكرت كل الكهربا طلعت وسكرت الباب ورآها .. راحت السياره وشافت سهيل ينتظرها ومشغل أغنية حسين الجسمي وموطي الصوت وسرحان .. حطت أغراضها ورا وراحت قعدت قدام .. اول ما رقبت تحرك سهيل بدون ما يتكلم
مهره وهي تعطيه فونه : فونك نسيته داخل
سهيل وهو يأخذ الفون : اوك
مهره : ممكن الحين اتقولي شو صار امس
سهيل لف وطالعها ورد يطالع قدام : لا
مهره : ليييش!!! .. سهيل انا ابا اعرف شو صار فيني بالضبط .. انزين بسألك سؤال
سهيل بدون ما يطالعها : اسألي
مهره : اممم امس انا ضربت حد او غلطت على حد ؟؟
سهيل وهو ما يبا يقولها الصدق : لا ما غلطتي ولا ضربتي حد
مهره" افففف شكله ما بيتكلم .. كل أجوبته مختصره " : انزين .. ضربت ايدي ف شيء
سهيل : لا
مهره : انزين مر الصيدلية باخذلي شيء
سهيل : شو تبين انا بيبلج
مهره : ايدي تعورني من امس .. ابا شيء يتم يضغط على ايدي
سهيل وهو عاقد حواجبه : اي أيد ؟؟
مهره : اليسار
سهيل وهو يمسك أيدها ويهمزها حقها : خلاص اسكتي الحين لا تتكلمين ... وبعدين لا اتمين تفكرين عشان ما تتعبين
مهره وهي تضحك : شو اتسوي انته .. وبعدين قولي شو صار وانا ما بفكر .. اييييه مب جذي شو اتسوي انته
سهيل طنش كلامها : كيف عيل .. خلاص اتري يوم بنزل بشتري لج ضاغط و قولي حق امج يوم بتردين البيت خل اتهمزلج اياه مع كريم او فكس
مهره كانت مبتسمه بس يوم سمعت اسم امها تلاشت الابتسامه : لا ما بسير عند امي .. بروح يا عند سلطان او منصور .. وبعدين ما يحتاج حد يهمزه
سهيل : مهره ترا ما يصير كل ما تعبتي. تكرهين امج .. هي ما لها دخل ف الي يصير
مهره وهي اتطنش كلامه : متى بنوصل المطعم ؟؟
سهيل وهو يهز راسه : الله يهديج بس
.......................
ف بيت ام سلطان .. كانوا أهل ابو حمدان هناك عشان يطمنون ام سلطان على مهره وبالمره يسألون عنها وشو صار ف مهره لان سهيل رافض يقول حق حد ..
ام سلطان بحزن : والله يا خوي اني تعبت .. البنت هذي من توفى ابوها وهذي حالتها ما ادري شو ياها بالضبط
ابو حمدان وهو يطمنها : ما عليه يا ميره لا تعبين نفسج .. مهره مضغوطة وايد عشان جذي تتعب البنت ما تتحمل
منصور وهو يطالع امه بنظره : هه .. مو هي اذا حصلت حد يدافع عنها ويوقف اعدائها عند حدهم ما بيصير فيها جذي
وطلع من الصاله قبل لا حد يقوله شيء .. يعرف ان الي يسويه ف امه حرام وعيب بنفس الوقت بس يحس ان لازم يضغط عليها شوي عشان تقدر تحمي مهره اكثر
ناصر وهو يسكر باب الصاله : منصور شو الي قلته داخل ..حرام عليك اتسوي ف أمك جذي وبعدين عيب
منصور وهو يرفع شعره : ادري .. بس مهره وايد تعبت من تصرفاتهم مب من الضغط هي يصير فيها جذي .. مهره فاقده اهم شيء ف هالبيت
ناصر برفعه حاجب : شو هو ؟؟.. لا تقولي ابوك ؟
منصور : لا مب ابوي .. مهره فاقده الاهتمام والحنان ..مب لاقيه هذا الشيء هني
ناصر :بس عمي سهيل مب مقصر معاها
منصور : ادري وهذا الي محيرني
...................
قاعدين ف الصاله يسولفون مع أخوهم الكبير
جاسم : خليفه ليش خليت سلوى تروح مع ساره
خليفه : قالتلي انها تبا تقعد عند ساره .. لانهم بعد المغرب يمكن يروحون عند مهره
جاسم: الله يعينها مهووور .. اكيد يتها الحاله
خليفه وهو معقد حواجبه بستغراب : انزين ليش ما يكلمون قوم يدوه عن حالتها يمكن يخفون شوي
جاسم باستهزاء : ههههههههه .. لا اتضحكني خليفه ..من متى اصلاً يهتمون ف مشاعر حد .. اذا اختك ما سلمت منهم .. مهره بتسلم
خليفه فخاطره: صدقك والله .. الله يعينج يا مهره ...اااااااه اول ما تخلصين دراستج ان شاء الله اني بخطبج وبحطج بعيوني و بحميج من يدو وعمو شيخة ومريم بعد
......................................
ف المطعم عند سهيل و مهره .. كانوا توهم مخلصين الاكلو دفعوا الحساب وطلعوا
مهره وهي تركب السياره : الحين وين بنسير
سهيل : البيت بعد وين
مهره : لا سهيل دخيلك ما اريد اروح البيت ودني اي مكان المهم ما أرد البيت الحين
سهيل : مهوور تراني عارف حركاتج ها.. وبعدين باجر وراي دوام بنزلج وبروح دبي
مهره : اففف .. انزين ليش ما تحول شغلك ف ابوظبي لازم دبي يعني
سهيل : هيه هيه لازم .. ومن الحين اقولج اول ما تنزلين اتسلمين على امج سمعتيني
مهره وهي تهز ريولها على الخفيف : لا ما سمعت .. وبعدين لا تجبرني على شيء انا ما أباه
سهيل : امج هذي امج .. شو اجبرج وما اجبرج .. مهره كبري عقلج شوي
مهره : خلاص لا تضغط علي اكثر من جذي .. لاني تعبت منكم افف
سهيل : تعبتي ها .. اوك مهره اوك بشوف لين وين بيوصلج عنادج هذا
......
توهم كانوا مخلصين الغدا وقاعدين فالصاله يتريون وصول مهره ..
ام سلطان : سلطان دق على خالك شوفه وين .. تأخروا
سلطان : قريبين يما من البيت الحين بيدخلون خلاص
شوي ولا يدخل سهيل
سهيل وهو يشل النظارات : السلام عليكم
الكل : و عليكم السلام
منصور : خالي وينها مهره ما أشوفها
سهيل : قاعده اتشل أغراضها من السياره .. روح اسبحها ودخلها الصاله .. لانها ما تبا تي
ام سلطان : ليش ما تبا تي
سهيل وهو منزل راسه : ما تبا ات ..
ام سلطان تقاطعه : ما تبا اتشوفني .. انزين انا امها ..والله ما يخصني ف شيء
سهيل وهو يقوم ويبوس رأسها : لا تحاتين .. انا تكلمت معاها شوي وان شاء الله فهمت الكلام .. وبعدين لا تنسين انها تعبانه
سلطان بعصبيه خفيفه : بس يا خالي هذا دلع مب تعب
سهيل : ما عليه خلوها شوي يومين وبترجع على طبيعتها
انفتح الباب ودخلت مهره و و رآها منصور شال الأغراض : السلام عليكم
الكل : وعليكم السلام
قامت ام سلطان : هلا هلا ببنتي .. تعالي يميه تعالي عند امج
مهره وهي واقفه واتطالع امها و خالها سهيل
سهيل : مهره تعالي سلمي ما فيها شيء تعالي
مهره راحت وسلمت على الكل ووقفت عند خالها سهيل
ام سلطان : مهره شفيج تعالي بحظني .. اشتقتلج
مهره وهي ماسكه قميص خالها : ما اريد اسلم .. خلاااااص!!!
الكل أنصدم من رد مهره .. وأم سلطان نزلت راسها بحزن اول ما سمعت الكلام .. وسلطان فار دمه يوم شاف امه بهذي الحاله و سببها مهره
.
.
.
.
.