Book 2 :chapter 44
Ahtraam lab o rukhsar ko aa pohnchay hain..
Bu-alhawas bhi meray mayaar ko aa pohnchay hain..!
Jo haqaaiq thay , wo ashkon se hum aagosh huway..
Jo fasaanay thay , wo sarkaar tak aa pohnchay hain..!
Ab to khul jaaye ga , shayad teri ulfat ka bharam..!
Ahl e dil , juraat e izhaar ko aa pohnchay hain..!
Qateel shifaayi
⭐️⭐️⭐️⭐️⭐️⭐️⭐️⭐️⭐️⭐️vote⭐️⭐️⭐️⭐️⭐️⭐️⭐️⭐️⭐️
Aayat dil thaamay us manzar ko dekhti rahi. Yun to kehnay ko ek ya do lumhay guzray hongay , lekin Aayat ko lagaa na jaanay kitna taweel waqt guzar gaya ho.
Aashir ne apni gun ka lock hataaya .khaali kamray main goonjti uski awaaz se Aayat ko hosh aaya. Aur wo yak-lakht aagay bhaagti Mateen ke saamnay khari ho gayi.
" Aayat..!!?.." Mateen aur Aashir dono be yaqeeni se chillaaye.
" bhaai please aisa mat karain..aap poora sach nahien jaantay..."
" Aayat hat jaao saamnay se..!"
" Aayat tum yahaan kyun aayi ho..!?"
Aayat ki baat ko nazar andaaz kartay , Mateen aur Aashir phir se ek saath uspay chillaye thay.
" nahien...! jub tak aap-aap meray saath wapas ghar nahien chaltay , main nahien hatoon gi...!" Aayat hat dharmi dikhaatay huway boli. Aashir ki pistol par pakar mazboot ho gayi . Wo abhi goli chalaanay hi waala tha jub Aayat Mateen ke saamnay aa khari huwi thi. Agar ek second bhi usay khud ko roknay main dair hoti to Mateen ke naam ki goli Aayat par chal jaati.
"Aayat baahar jaao...! Jo ho raha hai , wo tumhaaray aur meray. Dono ke haq main behtar hai..!" Mateen ne peechhay se usko dono shaanon ko pakartay huway kaha , aur usay apnay saamnay se hataanay ki koshish ki.
Wo aaj apnay pachhtaaway, aur is takleef se humaisha ke liye azaadi paanay waala hai , aur Aayat ko bhi is beech aanay ki ijaazat nahien de sakta , jub wo usay zinda rakh ke mazeed zehni aziyaton ke hawaalay karna chaahti hai.
Aayat jazbaatiyaat main doob chuki thi.
Mateen ke haath khud se jharaktay huway Wo gussay se Mateen ki taraf muri. Aur apnay dono haathon se usay collar se pakar liya. "Chup ho jao Mateen...!! Bohat ho gaya...!! Tum ab ek lafz nahjen kaho ge , tum shaayad bhool gaye ho tum ne apni zindagi meray naam ki thi ,aur isay khatam karnay ki ijaazat main tumhain bhi nahien doo gi...!!" Kaanpti awaaz ke baa wajood wo gussay se cheekhi thi.
Mateen be yaqeeni aur na samjhi main usay dekhnay lagaa.
Aashir ko alag Aayat ke ye alfaaz hazam nahien ho rahay thay.
" Aayat..!!" Aashir gussay se chillaya. Aur do teen qadmon main hi wo Aayat tak aaya tha aur usay baazu se pakar kar Mateen se door hataaya. Mateen Aashir ko rokna chaahta tha lekin wo jaanta tha ke Aashir wahi kar raha hai , jo Mateen bhi chahhta hai.
" bhaai chhorain mujhay...!! Aap aisa nahien kar saktay...please..!! Sirf ek baar meri baat sunlain..!." Aayat apna baazu chhuraanay ki koshish karti rahi lekin Aashir ne usay ek haath se pakray , apnay pistol pakray haath aur Mateen dono se door khara rakha.
Wo machhli ki tarhaan uskay haath se nikalnay ko machalti rahi. Lekin Aashir ki giraft uspar inthaayi mazboot thi.
Aayat ko Mateen se door hataanay ke foran baad Aashir ne dobaara Pistol dobara Mateen par taan di. Aur apni ungli trigger par rakhi di.
Aayat ki aankhain Aashir ki trigger par rakhi ungli par thi. Us ek lumhay usay apni saansain rukti mehsoos huwien. Aur uski khud ko chhuraanay ki koshish bhi ruk gayien.
Trigger se nazar hataa kar usnay Mateen ki taraf dekha.
Mateen ne apni aankhain bund kar lien aur apni is nakaam zindagi ke khatam honay ka intzaar karnay lagaa. Aaj Aayat ne uski hifaazat ki thi. Phir chahay apnay bhaai ke liye hi sahi , lekin Aayat ne uskay aur Maut ke beechh aakar usay do lumhay ke liye wo khushi di thi , jis ke baad wo sukoon se apni aankhain bund kar sakta hai.
Aayat ke liye waqt jesay tham gaya tha. Uskay dharaktay dil ki awaaz usay apnay kaanon main drum ki tarhaan mehsoos honay lagi .
Aayat jaanti thi ke Aashir ki giraft se nikal kar wo Mateen tak nahien pohanch sakti . Aur naa hi us main itni quat thi ke Aashir ke haath se wo pistol chheen sakay.
Wo laa chaar mehsoos kar rahi thi. Ba-wajood koshish ke wo kuchh nahien kar paa rahi.
be ikhtiyaar wo Aashir ki taraf muri , aur us se pehlay ke Aashir kuchh samajh paata ke wo kya kar rahi hai , Aayat uskay seenay se lag gayi.
Aayat ka ek haath pehlay hi Uski giraft main tha. doosra haath usnay uskay gird lapait diya.
" bhaai agar usay kuch huwa to main mar jaaoon gi....Mateen mera shohar hai , please mujhsay meri zindagi mat chhennay...please bhaai...aisa mat karain...." Zaaro qataar rotay huway wo uskay seenay se lagi bolti jaa rahi thi.
" Aayat....?" Aashir ko apnay kaanon par yaqeen nahien aa raha tha. Wo jo pehlay ye samajh raha tha ke Aayat insaaniyat ke naatay Mateen ka bachaao kar rahi hai , uska ye iqraar sun Aashir shadeed herat ka shikaar huwa tha.
Mateen bhi be yaqeeni , khauf aur musarrat se milay julay jazbaat se ghiraa Aayat ke siskiyon se laraztay wajood ko dekhta raha.
Aayat ne chehra utha kar Aashir ki taraf dekha. Jo usi ko dekh raha tha. " Main Mateen ke bagair nahien jee sakti...!" Aayat ne sargoshi ki si awaaz main kaha tha. Uski surkh aankhon se musalsal behtay aansoo uski thori se Girtay Aashir ki shirt main jazb ho rahay thay.
Wo jaanta tha ke Aayat ne ye keh kar apnay bhaai ke saamnay Mateen se mohabbat ka izhaar kiya tha.
Ye kesay ho sakta hai...!!?
" Tum Mateen se...?..." Aashir ke jism main taish ki ek aur lehar dor gayi thi. Aur uski kuchh second ke liye Trigger se hati ungli dobaara apni jagaah par pohanch gayi thi.
Aayat ne khuaf main Uskay pistol pakray haath ki atarf dekha. Wo jaan chuki thi ke uskay itnay baray iqraar ke baad bhi Aashir ne apna iraada nahien badlaa.
Wo jaan chuki thi ke wo ab chaahay kuchh bhi karlay , kuchh bhi keh de , Aashir ko wo trigger dabaanay se rok nahien sakti. Usay apna galaa bund hota mehsoos huwa. uska dum ghutnay lagaa. Aur dheeray dheeray uski aansuon se dhundli aankhon ke aagay andhera chhaanay lagaa.
" Aayat...?..meri taraf dekho.." Usay Aashir ki awaaz aayi thi. Aayat ne inkaar main sar hilaatay huway us se khud ko door karnay ki koshish ki.
" Aayat.." Aashir ke usay pukaarnay ke beech usay Mateen ki awaaz bhi sunaayi di. Wo uski taraf mur ke dekhna chaahti thi. Lekin usay apna wajood apnay dimaag se alag mehsoos huwa. Jesay uska jism uskay bus main hi na ho.
Aayat ko apnay gird kisi ki giraft mehsoos huwi. "Door raho meri behn se...!!!." Aashir ki awaaz uskay kaanon main suiyon ki tarahaan mehsoos huwi thi. Aayat ke honton se dard main doobi awaaz nikli thi.
Aur kuchh hi lumhon main uski aankhain aur dimaag ke gird mukammal andhera phail gaya.
" Aayat....!!!"
**************
" kesi hai Aayat..!" Aashir doctor ki taraf barhaa.
" Aashir maine aap se pehlay hi kaha tha Aayat ko kisi zehni dabao ka shikaar mat honay deejiye. Lekin aaj jo haalat maine Aayat ki dekh aaya hoon uskay baad mujhay aap se bohat maayoosi huwi hai. Aayat ko nervous breakdown ka attack huwa hai. Hum ne bohat koshish ke baad uski condition ko stable kiya hai. lekin abhi bhi main kuchh nahien keh sakte , lekin aap logon ko ab bhi khuda ka shukar karna chaahiye ke uski dimaagi ragain phat nahien gayien.warna humaaray liye usay bachaana na mumkin hota." Aayat ka puraana psychiatrist honay ki wajaah se unhain uski haalat ka pehlay se hi ilm tha. Is liye aaj Aashir pe naaraazgi zaahir karnay se wo khud ko rok nahien paaye thay.
Aashir sharminda sa nazrain jhuka gaya tha. Aayat ko apni baahon main bejaan hotay dekh , uski apni jo haalat huwi thi , wo sirf wahi jaanta hai.
Ye waaqayi uski galti thi ke apnay qussay main andhaa ho kar usnay Aayat ki bhi parwaah nahien ki , aur is had tak chalaa gaya ke apni maasoom behn ke saamnay wo maar dhaar par utar aaya.
Aur Agar Aayat ki ye haalat na hoti to aaj uskay haath Mateen ke khoon se rangay hotay.
Usnay tirchhi nazar se Mateen ki taraf dekhaa jo us se thora faaslay par bench par betha sar apnay haathon main thaamay zameen ki taraf dekh raha tha. Aur Zoyan us se halki awaaz main kuchh keh raha tha.
" Bhaai aapi ko kuchh hoga to nahien...?" Zarish ne uskay baazu ko haath lagaatay huway poochha.
Wo aur Zoyan us waqt ghar pohanch gaye thay jub wo Aayat ko hospital laanay ke liye usay gaardi main rakh raha tha. Aur Mateen jo Aashir ki dhamkiyon ke baawajood deewaana waar Aayat ke liye uskay saath saath chalta Aayat ko uthaanay ki koshish kar raha tha. Usay Zoyan ne hi Aashir se door kiya tha. Kyunkay wo jaanta tha ke Aashir usay Aayat se door rakhnay ke liye gussay main phir se uspay haath uthaa sakta hai.
Aur Zoyan ki fikar sahi thi. Kynkay Aashir Aayat ko gaardi main rakh kar uski taraf uspay haath uthaanay ke iraaday se hi muraa tha. Wo nahien jaanta ke Mateen ne khud ka bachaao kyun nahien kiya , lekin Aashir apnay taish main is soch se aagay nikal chuka tha.
Yahaan hospital main aanay ke baad jub unhain pata chalaa ke Aayat ka nervous breakdown huwa hai , uskay baad Mateen bilkul khaamosh ho gaya. Aur uski aankhon main aansoo dekh Aashir ko Aayat ka behosh honay se pehlay kiya gaya iqraar yaad aaya tha.
Kya hai in dono ke darmyaan...kya Aayat ne ye nahien kaha ke wo us se talaaq le rahi hai..? Phir ye sub kya hai...usay kuchh samjh nahien aa raha tha.
" bhaai.." Zarish ne usay phir se mukhaatib kiya. Uski aankhon se aansoo beh rahay thay , aur wo inthaayi fikar mand nazar aa rahi thi. Aashir ne apni baaqi sochon ko jhatak kar Zarish ko apnay saath le kar bench par bithaa diya aur uskay gird apna baazu phair liya.
"Aayat ko kuchh nahien hoga. Usay hosh aa jaaye ga.." Zarish ne halkay se asbaat main sar jhutlanay ke baad apnay aansoo ponchhay. Wo bhi Aashir ki is baat pe yaqeen karna chaahti hai.
Do minute baad Usnay gardan ghumaa kar Mateen aur Zoyan ki taraf dekha.
Wo abtak nahein jaanti Ke kesay Mateen ab bhi zinda saans le raha hai , lekin uski chhati hass keh rahi thi ke is ki wajaah shayad Aayat ki ye haalat hai...? Wo pakkay se abhi kuchh nahien keh sakti , kyunkay Mateen abhi kuchh bataanay ki haalat main nahien hai , aur Aashir se ye sawaal poochhnay ki himaat wo kar nahien sakti.
Poori raat wo teenon usi tarhaan Aayat ke hosh main aanay ka intzaar kartay rahay , is beech Zarish Aayat ke saath thi. Lekin uskay ilaawa doctor ne kisi ko andar jaanay ki ijaazat nahien di.
Zoyan ne sub ko chaaye ki offer ki lekin kisi paani tak ko haath nahien lagaaya.
Fajar ka waqt bhi guzar gaya aur subhaa ke 6 bajay Aayat ki palkain halkay se hilnay lagien. Jisay dekhtay hi Zarish ek dum se uthi aur baahar doctor ko lenay bhaagi.
Jub Doctor andar daakhil huwa to Aashir bhi unkay humraah andar daakhil ho gaya.
Doctor ne Aayat ka moomooli check up kiya aur uskay baad usay uthaanay ki koshish ki.
******
Aayat gehri neend main thi jub usay apnay kaanon main ek beep musalsal bajti sunaayi denay lagi.
Koyi isay bund kyun nahien karta...! Wo kitnay sukoon main thi , lekin ab uska dimaag is awaaz se phat'ta mehsoos ho raha hai. Wo jaagna nahien chaahti...yaad nahien aa raha ke kyun , par wo aankhain kholna nahien chaahti.
"Aayat...aankhain kholo..." Beep ke saath saath ab usay kisi ki awaaz sunaayi di. Usnay gair iraadi tor par apni palkain aur mazbooti se bund kar lien. Usay to yaad bhi nahien tha ke wo kyun jaagna nahien chahhti.
Aayat...Aashir...wo jaanti thi ke ye Aashir ki awaaz hai , aur isi ke saath uskay dimaag ne wo sub wajaain dohraa dien thien jin ki wajaah se wo jaagna nahjen chaahti thi.
" Mateen.." Aayat ke labon se nehaayat halki aah ke saath uska naam nikla tha. Aur usi ke saath usnay Aankhain khol dien thien.
Aashir ka chehra uski aankhon ke saamnay tha. Uski haalat bataa rahi thi ke wo uskay liye kitna ghabraaya huwa hai.
Aashir pe nazar partay hi wo poochhna chahhti thi ke Mateen kahan hai , lekin uski himmat aur jhijhak dono ne usay rok diya , aur uski aankhon se do aansoo beh niklay.
Doctor ne us se kuchh sawaal poochhay , jin ke jawaab wo sar hilaatay huway deti rahi.
" Aayat ki haalat mujhay tasalli bakhsh lag rahi hai. Main kuchh ghantay baad phir se visit karoon ga. Tab tak Aayat ko aaraam karnay dain."
" doctor kya main apni behn ke saath akelay main baat kar sakta hoon.." Aashir Aayat ki pareshaani aur jhijhak samajh gaya tha. Aur wo jaanta tha ke wo kya jaanna chaahti hai. Kyunkay khilaaf e tawaqqa Mateen andar daakhil nahien huwa tha. Aur zaroor usay apnay saamnay naa paa kar wo wahi soch rahi thi , jo Aashir ka iraada atha.
" theek hai..lekin dhiyaan rakhna.." Doctor naseehat karnay ke baad baahar chalaa gaya , aur Zarish aur Zoyan bhi unkay peechhay baahar chalay gaye.
Aashir Aayat ke baraabar bed par beth gaya , aur Aayat ke safaid chehray ko dekhnay lagaa.
" Bhaai..." Wo jaanta tha ke Aayat kya jaannay ke liye betaab hai.
" Mateen theek hai...usay kuchh nahien huwa , wo baahar hai.." Aashir ne usay bataaya , aur wo dekh sakta tha ke kesay is khabar se Aayat ke chehray par tamaaniyat phail gayi thi.
" Bhaai main aap ko sub kuchh bataana chahhti hoon.." Aayat ne kaha.
" nahien ...abhi nahien..jub tum ghar chalo gi tab bataana..abhi kisi baat ke liye khud ko pareshaan karnay ki zaroorat nahien hai. " Aashir bola.
Lekin Aayat ne nafi main sar hilaatay huway zid ki. " nahien bhaai , main abhi aap ko sub kuchh bataana chaahti hoon.." Jub Aashir ne Aayat ki aankhon main zid dekhi to usnay asbaat main sar hilaatay huway usay bolnay ko kaha.
Aayat ne shuroo se lekar saari baat usay bataa di , is doran Aashir ba mushkil apnay aap ko baahar jaa kar Mateen ko khoon se lat pat karnay se rokay huway tha.
Agar Mateen nashay main tha to wo kis ki galti thi...? Uski apni ghalti thi ke usnay is had tak sharaab pi ke usay apna hosh bhi nahien raha. Aur phir pakistan aanay ke baad usnay Aayat se shaadi karnay ka socha bhi kesay..!! Sirf uski is himmat ke liye hi Aashir ka dil Mateen ke tukray tukray karnay ko kar raha tha.
" Bhaai aap waada karain , aap phir Mateen ko nuqsaan pohnchaanay ka sochain ge bhi nahien..." Aayat ki awaaz ne usay Mateen ke tuqray karnay ki soch se nikaala tha. Aur wo usay chor bana haami main sar hilaatay bola.
"Theek hai..lekin.."
Aashir ke lekin ne Aayat ko ek dum se chokanna kar diya tha. " lekin kya bhaai..?" Wo dartay huway boli thi.
Aashir khud sharminda ho raha tha Aayat se ye sawaal poochhnay main. " tum ne jo wahaan kaha...kya wo sach tha..?" Aayat ko yaad aaya ke kis tarhaan us waqt wo Aashir aur Mateen dono ke saamnay Mateen ke liye apnay jazbaat ka izhaar kar gayi thi. Sharam se uskay safaid rukhsar gulaabi hona shuroo ho gaye.
Sach kahay to ab wo Mateen ko Aayat ke aas paas bhi dekhna nahien chaahta , lekin wo is sach ko bhi nahien badal sakta ke Mateen uska shohar hai , aur Aayat Mateen ke liye ahsaasat rakhti hai.
" wo sach tha..." Aayat ne nazrain churaatay huway halki awaaz main kaha. Aashir Aayat ko bagaor dekhnay lagaa.
" jo kuchh Mateen ne jo tumhaaray saath kiya , kya tum wo sub itni aàsaani se muaaf kar do gi Aayat..?" Is ka jawaab jaanna Aashir ke liye bohat zaroori tha. Wo jaanna chaahta tha ke Aayat apnay aur Mateen ke rishtay ko kesay dekh rahi hai.
Is sawaal ka jawaab to wo ab bhi nahien jaanti , ye kesay mumkin hai ke jis shakhs ko aap muaaf karnay ki himmat bhi na karsakain , lekin usi shakhs ke bagair saans bhi na le sakain...jis ki takleef aap apnay jism main mehsoos karain...ye kesay mumkin hai...?
" bhaai...kya Abu mujh se nafrat karain ge agar main Mateen ke saath zindagi guzaarna chaahoon...? Aashir ke sawaal ka jawaab denay ke bajaaye usnay apnay dil main chubhta sawaal poochha tha.
Aashir ne apni behn ko hamdardi aur pyar bhari nazron se dekha. Aayat ne har mor par saabit kiya hai ke wo ek perfect beti hai...unkay Abu agar Aayat se subsay zyaada pyar kartay thay , to Aayat bhi apnay andar unkay Abu ke liye apni har khushi qurbaan karnay ki himmat rakhti thi.
Phir unkay Abu kesay us se naaraaz ho saktay hain. Agar wo jeena chaahti hai to...
" nahien...Abu tum se kabhi naaraaz nahien hongay..kyunkay unhain poora yaqeen hai ke unki Aayat kabhi kuchh ghalat kar hi nahien sakti. " Aashir naem lehjay main bola.
" aur aap....?" Aayat ne apnay dil main chubhtay is sawaal ko bhi apni zabaan tak laaya.
Aashir usay bagor dekhta raha. Wo ek azaad khayaal larki thi , unkay Abu ne kabhi us par koyi naa jaaiz paabandi nahien lagaayi , jis ki wajaah se wo humaisha apni marzi ki karnay waali thi. Lekin is ke baawajood Aashir ne kabhi khud garzi ki parchhayi bhi us main nahien dekhi. Uski apni khuaahish sirf us had tak uskay liye qaabil e behas rehti , jubtak ke uski wajaah se kisi aur ko takleef na pohnchay.
Wo apnanay rishton ke liye khud ko sooli par charhaanay waalon main se hai.
" agar main kahoon ke main tumhaari wajaah se Mateen ko koyi nuqsaan nahien pohnchaaoon ga , lekin tumhain Mateen ko chhorna hoga , us se har rishta torna hoga , to kya tum meri baat maano gi...?" Aashir jaanta tha ke ye sawaal poochh kar wo Aayat ke saath inthaayi zulm kar raha hai , lekin wo apnay dil ki taskeen ke liye khud ko ye sawaal poochhnay se rok nahien paaya.
Aashir ke is sawaal se Aayat ka dil do tuqray ho gaya tha.
Aisa kyun hota hai ke usay humaisha apni khushi aur apni zimmaydaari main se kisi ek ko chunnay ke liye chhor diya jaata hai. Kya wo kabhi ye dono cheezain saath le kar nahien jee sakti...?
Uski aankhain ek baar phir baras parien thien. Kyunkay wo jaanti hai ke wo kabhi apnay bhaai ko naaraaz karkay khush nahien reh sakti.
" aap jesa kahain ge. Main wesa hi karoon gi bhaai...main Mateen ko bhoolnay ki poori koshish karoon gi. "
"kitna aasaan hai na ye kehna.." uskay andar se awaaz aayi thi.
" Aayat....kyun ho tum aisi...? Jahaan khud garz hona ghalat baat hai , wahien khud faramosh hona bhi ghalat hai , aur tum inthaayi darjay ki khud faraamosh ho.." Aashir ne maamooli gussay aur thora khafgi se usay ghoortay huway daanta.
Aayat heraangi se usay dekhnay lagi. " main khud-faraamosh nahien hoon bhaai.."
" Achha..!?...to phir kya ho tum...?" Aashir ne abru charhaatay huway poochha. Lekin Aayat ne apni nazrain phair lien.
" Tum ne Mateen se talaaq bhi tab maangi jub tumhaari reports aayien...kyunkay is tarhaan tum gair iraadi tor par uski bhalaayi ka bhi soch rahi thi. Tum chaahti thi ke Mateen doosri shaadi karay aur apni zindagi ki nayi shurooaat karay...Kyun..? sahi keh raha hoon na main..agar aisa nahien hai hai to jhutlaao meri baat ko.." Aashir ne uski aankhon main dekhtay huway kaha.
Aayat ne Aashir se nazrain phairtay huway apnay haath ki pusht se apnay aansoo ponchay.
Jub Aayat ne is baat se inkaar na kiya to Aashir ne haath barhaa kar uskay sar par haath phairtay huway bola. "Aayat...agar tum waaqayi Mateen ke saath apni zindagi jeena chaahti ho to iskay liye main tum se kabhi naraaz nahien hoonga , kyunkay meray liye sirf tumhaari khushi maainay rakhti hai. Aur aaj agar Abu hotay to wo bhi tum se yehi kehtay.
Aayat bed se uthtay huway Aashir ke seenay se lag gayi. Aaj Aashir ne uskay dil main jo dar tha wo bhi khatam kar diya tha. Itnay saalon baad wo phir se apnay dil pe chhati dhund ko chhat'ta mehsoos kar rahi thi.
" thank you bhaai..." Wo jo mehsoos kar rahi thi , uskay ke liye ye thank you lafz bohat kamzor lag raha tha. Aur ye baat Aashir aur Aayat dono jaantay thay.
Wo Mateen ko shayad abhi muaaf na karay , lekin wo Aayat ke liye usay bardaasht karnay ke liye tayaar hai. Ya koshish to wo kar hi sakta hai.
Aayat ko khud se alag karkay usay bed par waapas letaa kar wo baahar chalaa gaya.
Aayat ne bhalay hi na kaha ho par wo jaanta tha ke wo Mateen ko dekhna chaahti hai.
Mateen aur usay ab apnay maamlaat suljhaanay hongay. Baahar nikal kar wo Mateen ki taraf mura jo abhi bhi usi tarhaan bench par apni hi dunya main ghum dikhaayi de raha tha.
Uski ye haalat dekh Aashir ke dil ko kuchh taskeen si mehsoos ho rahi thi , ke Aayat ko rulaanay waala khud bhi khush nahien hai.
" Zarish Mateen se kaho ke andar jaaye.." Zarish jo Zoyan ke baraabar se uth ke uski taraf aayi thi us se inthaayi saada lehjay main keh kar khud doctor se baat karnay ke liye wahaan se chala gaya.
Mateen Aashir ka hukum sun chuka tha. Aur uska apna dil bhi tarap raha tha usay dekhnay ko. Lekin....lekin wo kis moon se uska saamna karay.
Aayat us se paanchh saal se mohabbat karti hai , lekin wo apni jalan main Aayat ke pyar ko kabhi dekh hi mahien paaya. Par uskay saath Baar baar Haadi ka naam jor kar usay takleed deta aaya tha.
Haan ab wo sub jaanta hai , lekin kyun ye mehsoos ho raha hai ke ab bohat dair ho chuki hai....? Aaj uski wajaah se Aayat phir maut ke moon se waapas loti hai.
Aayat se mohabbat ke daaway kartay kartay wo humaisha usay sirf dard aur takleef hi deta hai....
Kyun...!?
Zoyan ne usay sub kuchh bata diya , wo sub kuchh jo Aayat ne Zarish ke saath share kiya tha.
Usay samajh nahien aa raha tha ke wo kis par naraaz ho , Aayat par jis ne us se itna bara jhoot bola ke wo Haadi se pyar karti hai..?
Ya phir khud se , jo Aayat ke pyar ko kabhi dekh hi nahien paaya.
Kehtay hain pyar alfaaz ka mohtaaj nahien hota , ye to jazbaat ka naam hai jo aankhon se parhaa jaa sakta.....?..to phir wo kesay naakaam ho gaya Aayat ki aankhon se uska dil dekhnay main.
Wo kyun lafzon ka mohtaaj ho gaya....?
Aur wo khud hi to Aadi se kehta tha ke uski Aayat subsay alag hai..phir kesay wo us se ye umeed lagaa betha ke Aayat apni asmat , apni paakeezgi ko bhula ke uskay paas dori chali aaye gi....wo kyun us se ye umeed kar bethaa..
Aayat ki uskay liye mohabbat paak thi , jis main wo hawas aur nafs ki mail milaana chahhta tha.
Usay apnay maazi se mazeed ghin mehssos honay lagi. Aur mumkin hai to uskay pachtaaway main mazeed izaafa ho gaya tha.
Kyunkay paanchh saal pehlay agar wo Aayat se waqayi ishq karta to kabhi us se apnay saath taaluq rakhnay ki umeed nahien karta.
Kyunkay mard agar kisi se sachi mohabbat karta hai to wo us aurat ki izzat ki hifaazat apni jaan se bhi zyaada karta hai , naa kay usay badnaami ke raastay pe le aaye aur usay apni hi nazron main giraa de.
Aur ye baat usay Aayat ko khonay ke baad samajh aayi. Jub wo ishq ki inthaa par pohanch chuka tha.
" Mateen..."Zoyan ne uskay shaanay par haath rakhtay huway mukhaatib kiya. Mateen ne uski taraf dekha.
" andar jaao.." Zoyan ne kaha. Lekin Mateen ne nafi main sar jhatka. wo sharminda mehsoos kar raha tha.
" Aayat se baat karo...ye tum dono ke liye behtar hai..." Zoyan ne usay samjhaaya. Mateen ne apnay haath se paishaani pe aaye baal peechhay kiye.
Aayat ke Aashir se kahay gaye alfaaz ab bhi uskay kaanon main goonj rahay thay. Unka matlab jaantay huway bhi wo khud ko kisi khush fehmi ka shikaar nahien honay dena chaahta tha. Lekin uska dil jaan gaya tha ke Aayat to sirf usi ki thi. Wo hi tha jo usay kisi aur ka kehta aa raha tha.
Zoyan ki baat sahi thi , wo Aayat ko nazar andaaz nahien kar sakta. Na hi ye sahi hai , aur naa hi uskay bus main.
" theek hai.." Wo bench se utha aur andar daakhil huwa.
Zarish Aayat ke bed ke saamnay chair par bethi us se kuchh keh rahi thi. Uskay qadmon ki awaaz par wo dono uski taraf mutwajja huwien.
" Aapi...ahh..main jaakay Zoyan ko dekhti hoon..." Zarish Mateen aur Aayat ko baari baari dekhnay ke baad boli , aur wahaan se baahar chali gayi.
Mateen Aayat ko ek nazar dekhnay ke baad nazrain churaanay lagaa. Lekin Aayat usay yak tuk dekhay gayi.
Mateen ke baal bikhray huway thay. Uski silvaton se bhari safaid shirt par khoon ke halkay nishaan lagay huway thay. Lekin uskay chehray pe koyi nishaan nahien tha. Siwaaye uskay ek hont ke kinaaray par soojan ke.
Is ke ilaawa wo bilkul theek tha. Aayat ne dil hi dil main khuda ka shukr kiya. Wo wahien kharaa tha. Jesay Aayat ke paas aana uskay liye dunya ka mushkil tareen amal ho.
" Mateen.." Jub kitnay lumhay guzarnay ke baad bhi uskay chehray se zaahir hoti kashmakash khatam na huwi to Aayat ne halki awaaz main usay pukaara.
Aur uskay honton se apna naam suntay hi Mateen ke aagay khari is nayi hishkichaahat ki deewaar chaknaa choor ho gayi thi.
Usnay apni nazrain Aayat ke chehray par jamaa dien. Aayat bhi usi ko dekh rahi thi.
Wo khud ko rok nahien paaya aur uski taraf barhaa aur Aayat ke baraabar uskay qareeb beth gaya.
Mateen ki aankhon se do moti toot kar giray thay. Aur usnay Aayat ke haath ko apnay dono haathon main thaam kar apni aankhon se lagaa liya. Wo aankhain bund kiye uskay lums ko mehsoos karnay lagaa . Uska angusht uskay haath ki pusht ko narmaahat se sehlaa raha tha.
Aayat kuchh kahay bina usay dekhti rahi. Pehli baar Mateen ko dekhtay huway wo koyi boj mehsoos nahien kar rahi thi. Pehli baar uska dil o Dimaag sirf uskay aur Mateen ke liye soch rahay thay. Na ke usay kya karna chaahiye , kya sahi hai aur kya ghalat hai , ye sochnay ke.
Aashir ke alfaaz ne uskay pairon main bandhi zanjeeron se azaad kar diya tha. Ye sach hai ke wo ab bhi Mateen ko mukammal tor par muaaf nahien kar paayi hai , lekin wo is sach se bhi inkaar nahien kar sakti ke Mateen uski rooh tak main bas chuka hai , aur jis se juda hona ab uskay liye naa mumkin hai.
" Mujhay kyun nahien bataaya ke tum bhi meray liye wahi mehsoos karti ho jo main tumhaaray liye karta hoon...?" Mateen ki shikaayat main doobi awaaz aayi thi. Lekin uski aankhain ab bhi bund thien.
Zarish usay bataa chuki thi ke Zoyan ne Mateen ko sub kuchh bataa diya hai. Is liye usay uskay is sawaal ki tawaqqa pehlay se hi thi. Lekin wo ye nahien jaanti thi ke ye sawaal Mateen ki zabaan se sunnnay ke baad uska seena kis tarhaan dard se bhar jaaye ga.
Wo kuchh keh nahien paayi.., kya kehti , is sawaal ka jawaab to wo pehlay se hi jaanta hai.
" jaanti ho... , main ye bhi nahien keh sakta ke jo tum ne kiya main uski wajaah se tum se naaraaz hoon, kyunkay ye sach nahien hai.." Mateen ne is baar aankhain khol kar Aayat ko dekha.
Aur Mateen ki jazbaat se doobi nam aankhon ko dekhtay hi Aayat ke dil ki dharkan barh gayi thi.
" kyunkay sach jaannay ke baad meray dil main tumhaaray liye izzat aur mohabbat aur barh gayi hai..." Mateen ki awaaz main apnay liye fakhar mehsoos karkay Aayat ki nam aankhain phir se baras parien thien , wo hont kaat'ti usay dekhti rahi , lekin kuchh kehnay ki himmat na ki.
" sach jaannay ke baad mera dil baar baar mujh se ye sawaal kar raha hai , jis ka jawaab meray paas nahien hai..kya tum mujhay is ka jawaab de sakti ho..?" Aayat uski baat na samjhtay huway usay dekhnay lagi.
" kya...?" Aayat ne poochha. Jis par Mateen ke honton par inthaayi halki muskaan dar aayi thi. Lekin uski aankhin wesi hi num rahien.
Mateen ne Aayat ke haath ko apnay honton ke qareeb kar diya. " agar paanchh saal pehlay humaaray beech wo haadsa na hota to kya tum mujh se shaadi apni khushi se kartien.....mujh se apni mohabbat ka iqraar kartien...?" Ye sawaal poochhtay huway Mateen uski aankhon main aankhain daal kar uskay pal pal badaltay jazbaat dekh raha tha.
Aayat ki saansain taiz ho gayien thien.
Ye sawaal sirf Mateen ka nahien tha ye sawaal har raat uskay dimaag main bhi goonjta hai , lekin uska jawaab wo kabhi khud ko de nahien paayi.
Par aaj Mateen ko wo is ka jawaab dena chaahti hai. Lekin wo jaanti hai ke alfaaz uskay jawaab se shayad insaaf na kar paayen.
So usnay wo kiya jis ke baad Mateen uskay dil ki har baat jaan le.
Bed se uthtay huway usnay Mateen ko apni baahon main le liya. Jesay wo kabhi usko khud se juda nahien honay de gi.
" Mateen...kya ye jawaab qabool hai tumhain...?" Usnay hakil muskraahat aur thoray ghum ka ansar liye , Mateen ke kaan main sargoshi ki si awaaz main poochha.
Mateen do lumhay ke liye to saktay main aa gaya , lekin phir Aayat ke honton ko apnay kaan ke itnay qareeb sargoshi kartay sun us ne Aayat ke gird apnay baazu mazbooti se lapait liye. Aur apni aankhain bund kar lien, lekin iskay baa wajood uski aankhon ke pooron se aansoo aur rawaani se behnay lagay.
" haan...aur ab main kabhi tumhay mujh se door nahien jaanay doonga...kabhi nahien..." Mateen ne uskay baalon ko choomtay huway kaha.
" main bhi yehi chaahti hoon Mateen...kabhi mujhay khud se door mat jaanay dena...." Aayat ne apna chehra Mateen ki gardan main chhupa liya aur uski khushbu se apnay taiz dharaktay dil ko aitdaal par laanay ki koshshish karnay lagi.
Wo nahien jaanti ke uska fiasla kitna sahi hai , baaqi sub uskay baaray main kya sochain ge , lekin aaj Mateen ki baanhon main wo sirf apni aanay waali zindagi ka soch rahi thi.
" main tum se bohat pyar karti hoon..bohat pyar.." Pehli baar Aayat ka khulaa iqraar sunnay ke baad agar mumkin hai to Mateen ne usay khud ke aur qareeb kar liya.
*************
Salaam 😥😥😥
Main bataa nahien sakti ke main kitni khushi aur dukh mehsoos kar rahi hoon , khushi ke finally Sazaye ishq apnay ikhttaam tak pohnch gaya.
Wesay kesa lagaa End...? Agar achha nahien lagaa to please hateful comments ke zariye mujhay hurt mat kariye ga. Main zara sensitive bandi hoon. 😔😔
Aur agar achha lagaa to apnay comments ke zariye zaroor aagah kariye ga.
Question of the week:- Aap ka favorite character kon tha is book main. Aur kyun...?
Do saal baad Aayat aur Mateen ki life kesi hogi...?
Epilogue kis ko chaahiye...?