PARANG gustong magsisi ni Freya na sumama-sama pa siya sa gig ng banda ni Ziggy. Naa-out of place kasi siya sa porma ng mga tao roon. Paano ba naman, black slacks at red blouse na pinaresan niya ng black shoes ang suot niya habang ang ibang mga kababaihang nandoon ay naka-party clothes—maiiksi, maninipis, at kumikislap.
Nararamdaman na nga niya ang mga tinging ipinupukol ng mga tao roon sa kanya na parang nagsasabing: "What the hell is with the outfit?", "You call that clothes?" o "You got the wrong place, Miss."
Para kasi siyang pupunta sa opisina sa suot niya. Ngayon parang pinagsisihan niyang hindi niya piniling suotin ang nag-iisang minidress niya. She's definitely invading the wrong crowd at the wrong place. Samantalang ang kasama niya, walang ka-effort-effort na nagmukhang "in" sa crowd.
Hindi nga niya alam kung magiging masaya ba siya o hindi na nasa tabi niya si Ziggy nang mga oras na iyon. Panaka-naka kasi siyang tinatapunan ng mga matatalim na tingin ng mga fans nito. Kulang na lang ay itapon siya ng mga ito palabas ng bar. Pero dahil na rin nandoon si Ziggy sa tabi niya ay sa lalaki na napunta ang lahat ng attention ng mga babae at mga bakla sa loob ng bar.
Paano ba naman, kahit simpleng "I Hate War" T-shirt at ripped jeans lang ang suot nito ay parang ang bongga na niyon sa mga mata ng mga die-hard fans nito na nagsitilian pa nang pumasok ito sa loob ng bar. Kaya hindi na siya masyadong pinansin ng mga ito at pinagnasaan na lang ang anyo ni Ziggy.
Magulo ang pagkakaayos ng buhok nito na umabot na sa batok nito. Tila sinadya talaga nitong magmukha rakista sa porma nito—minus the hair color, piercings, hardcore accessories at eyeliner. He just simply looked ruggedly handsome. At talaga namang mababanaag ang excitement sa anyo nito. Nagniningning ang mga mata nito sa hindi niya maipaliwanag na dahilan. Tila excited ito sa kung anong mangyayari. Baka ganoon talaga ang anyo nito tuwing magpe-perform ito sa entablado.
Hindi mo alam kasi first time mo namang pumunta sa gig niya, 'no, isip-isip niya. Bakit nga ba hindi siya dumalo sa ibang mga gig nito? Sana noon pa niya nakita ang ganitong side ni Ziggy.
Lumakas ang tilian nang umakyat na ang banda ni Ziggy sa entablado. Para itong artista na pinagkakaguluhan ng mga fans nito. Hindi naman niya masisisi ang mga fans nito dahil may dahilan naman kasi ang banda ni Ziggy. Hindi lang magagaling ang mga itong tumugtog, may mga hitsura din kasi ang mga ito. May kanya-kanyang dating 'ika nga. Pero kahit ganoon parang napako lang ang tingin niya sa iisang direksiyon—kay Ziggy.
Matapos ang dalawang kanta at sa kabila ng tilian ay biglang tumikhim si Ziggy na tila pinapatahimik ang lahat. Tumahimik naman ang mga ito at naghintay ng sasabihin ni Ziggy.
"Good evening, ladies and gents. Are you having fun?" Malakas na tilian at hiyawan ang naging sagot na sinuklian ni Ziggy ng isang makalaglag panty na ngiti. "Thank you. But tonight, I would like to sing a song that would express my feelings for a certain woman." Agad na may nagreklamo sa sinabi nito. Meron pang bading na sumigaw ng isang dramatic na "No!" habang may paluha-luha pa. Pigil-pigil niya ang kanyang hininga nang mga oras na iyon. Parang biglang sumikip ang dibdib niya at nanuyo ang kanyang lalamunan.
"I'm so sorry, everyone, but human as I am, I also fall in love with a special person. Kaya lang, sa kamalas-malasan, ilang taon na siyang nasa puso ko at lahat na yata ng pagpapapansin nagawa ko, eh, wala pa ring effect sa kanya..."
"Akin ka na lang, Papa Ziggy!" sigaw ng kung sino sa loob ng bar.
Kinindatan ni Ziggy ang direksiyon ng kung sino mang sumigaw na iyon. "I'm sorry, baby, but she got to me first." Ang mga reklamo at hindi pagsang-ayon ng mga fans nito ay biglang naging kilig na tilian. Tila kinikilig na ang mga ito sa mga pinagsasasabi ni Ziggy. "Anyway, this is for that special girl somewhere who's been blind to all my efforts... Kaya magle-level-up na ako ngayon." Pumalatak ito. "Parati mo na lang akong pinapahirapan, honey..." Nagsigawan ang mga tao at may ibang nagsipulan pa.
Hindi niya alam kung paano re-react sa sinabi nito. Halu-halo ang pakiramdam niya—kaba, lungkot, at inis. Parang gusto niya ring sumabay sa pag-iyak ng ibang kababaihan na nabigo rin dito. She definitely can't deny it anymore. She has fallen for the stupid jerk. Pero wala na ring kapag-a-pag-asa iyon dahil mayroon na itong ibang napupusuan.
Mabuti na lang at pumuwesto siya sa may gilid ng bar kung saan hindi siya masyadong mapapansin ng mga naroroon. Um-order siya ng bottomless iced tea at sinimulang tunggain iyon.
"Oh yeah... Oh yeah... So scared of breaking it but you won't let it bend... And I wrote two hundred letters I won't ever send... Sometimes this cut is so much deeper then they seem... You'd rather cover up, I'd rather let them be... So let me be, And I'll set you free... I am in misery... There ain't nobody who can comfort me, oh yeah... Why won't you answer me? The silence is slowly killing me, oh yeah... Girl, you really got me bad... You really got me bad... Now I'm gonna get you back... I'm gonna get you back..."
Pakiramdam niya tumigil sa pagtibok ang puso niya. Bakit ba iyon pa ang naisipan nitong kantahin? Naaala niya lang tuloy ang nangyari sa birthday ni Jorick noon. Kung paano umiba ang pagpintig ng puso niya sa hindi niya pa malamang dahilan noon. Pero ngayon, alam na niya ang dahilan doon. It's because he already feels something for Ziggy.
"This is stupid," kausap niya sa kanyang sarili bago inisang lagok ang baso ng iced tea. Kung nakakalasing lang ang iced tea malamang ay kanina pa siya natumba sa kalasingan. Pakiramdam niya nga ay tumahimik ang buong paligid.
Nagsalubong ang mga kilay niya. Talagang tumahimik ang paligid. Walang hiyawan, sigawan, tilian, at iyakan maliban na lang sa pagkanta ni Ziggy at pagtugtog ng banda nito.
Pumihit siya paharap sa stage. Napasinghap siya nang makitang nasa harap niya si Ziggy na kumakanta habang nakatingin sa kanya. Ang lahat ng tao ay nakatingin na sa kanila. Bakit hindi niya man lang ito naramdaman na lumapit? Masyado ba siyang naokupa sa kanyang kabiguan na hindi na niya napansin ang paligid niya?
Pero nanlalaki ang mga matang napaawang ang kanyang bibig nang ma-realize niya ang ibig sabihin ng mga nangyayari.
"CLOSE your pretty mouth, honey, at baka pasukan pa 'yan ng bangaw." Isinara ni Ziggy ang nakaawang na bibig ni Freya pero nanatili pa rin siyang estatwa, nanlalaki ang mga mata.
Hindi siya makapaniwala sa mga nangyayari. He's actually implying na siya ang babaeng matagal na nitong mahal! Tanga na lang siya kung hindi pa niya makukuha ang mga sinabi at inakto nito.
Pero teka... "In misery" ang tema ng kinanta nito at hindi ba may balak ng paghihiganti sa kanta? Ano ngayon ang pinapalabas nito?
Nagpakawala ito ng malalim na hininga. "Maganda ka sana kaya lang manhid ka naman. Walang epek ang mga pagpaparamdam ko sa 'yo," nakalabing komento nito, walang pakialam sa mga nanonood sa kanila.
Inirapan niya ito. "Nanliligaw ka ba sa lagay na 'yon? Akala ko manyak ka lang talaga kaya mo ginagawa 'yon." Pigil-pigil niya ang sarili na mapangiti. She felt her heartbeast raise. Tila may lobong in-inflate sa dibdib niya at parang sasabog na iyon sa antisipasyon.
"Hay naku, Fresca Yanika Belandres. Kung hindi lang kita mahal matagal na kitang sinakal," nakangusong sabi nito. Naghiyawan ang mga tao sa pahayag nito. Parang nanonood ng teleserye ang drama ng mga ito.
Ramdam na ramdam niya ang pagputok ng imaginary balloon sa dibdib niya. Narinig na niya ang magic words na gusto niyang marinig mula rito! Pahihirapan pa ba niya ang mga sarili nila kung pareho lang din naman pala sila ng nararamdaman?
Ngumisi siya na ikinagulat nito. "Sasakalin mo pa kaya ako kung sasabihin kong mahal din kita?"
Nanlaki ang mga mata nito, mukhang hindi makapaniwala sa narinig. Nanatili lang itong nakatingin sa kanya habang ang mga kamay nito ay nasa ere na aktong hindi alam kung yayakap sa kanya o hindi.
Nagulat silang pareho nang biglang nag-ingay ang mga kabanda nito. "Wooo! Kasalan na!" hiyaw ni Cypren, ang drummer at pinakabatang miyembro ng grupo, nag-ingay ito gamit ng drums nito.
"Congratz, pare!" sabi naman ni Jazz na nasa bass.
"Don't worry, ladies, nandito pa naman kaming tatlo para magpasaya sa inyo," nakangiting hayag ni Mason na siyang guitarist ng grupo, nag-flying kiss pa ito na parang artista. Tila kinilig naman ang manonood sa sinabi nitong iyon dahil pagkatapos silang i-cheer ay kanya-kanya nang sigawan ng mga pangalan ng mga kabanda ni Ziggy ang mga ito.
Napailing na lang siya nang makitang tuwang-tuwa naman ang mga ito sa pagtanggap ng atensiyon. Pagharap niya kay Ziggy ay nakangisi ito habang nakatingin sa kanya. "So... puwede na bang dumiretso sa 'kiss the bride'?" gumagalaw-galaw ang kilay na tanong nito.
Mahinang tinampal niya ito sa pisngi. "Tumigil ka, Zigmundo kung ayaw mong masapak," banta niya rito, nanlalaki ang mga mata sa kapilyuhan nito. Maraming tao sa paligid kaya hiyang-hiya siya sa mga inaakto nito. At ang magaling naman ay parang nasisiyahan pa sa nangyayari!
"Sige na, isa lang naman..." nakangusong pangungulit pa nito. "Sige na, sige na, sige na, sige na—aw!"
Naiiritang sinikmurahan niya ito. "Tapusin niyo na ang act niyo at nang makauwi na ako. Sa labas na ako maghihintay." Pigil-pigil niya ang kanyang ngiti nang tinalikuran niya ito para lumabas na sa lugar na iyon. Wala siyang pakialam kung may mga tumitingin sa kanya nang kakaiba basta ang alam niya ay masaya siya.
Sana lang ay wala siyang pagsisihan sapinasukan niyang ito...