شرقية الهوى

20

#شرقية_الهوى
#طيبة الربيعي
~البارت العشرون~

جوري: الو؟
غسان: الووو، ها يا حلوة شلون صار حبيب الگلب
جوري بعصبية: انتة مناااوي تفتك منيييي ياا نذللل شتريييد
ضحك: وراچ وراچ، ردت اكتلة بس گلت خطية، اول مرة مطلقة وانوب ارملة، هواااي موو؟؟؟

گمت علة حيلي خليت ملاك عالسرير وطلعت للصالة وعطت بي

جوري: لك الله ياخذك انشاءالله، هاي انتة ورة كل الصااار !!!
غسان: مو گتلچ ماخليچ تتهنين، حمدي ربچ محطيت براسة طلقة، بس ايامنة هواي واني وياچ والزمن طووويييل
جوري: لك لو انتة رجال متغدر بي چان اجيت ووگفت گبالة ياا خسيس من زمان اعرفك مو رجال تسوي مصيبة وتغط بعد متطلع نذذلل
غسان: انچبي لچ، لو اريد اجيبچ يمي سحل بس مابالي غير انتقم منچ واطيح حظج واكسر خشمچ اليابس'طيبة_الربيعي'
جوري: نزاار وييين يا حقير، والله لو صار عليه شيء لا ثامر ولا اهلة يرحموك لو يعرفون يطلعوك من جوة الگاااع
غسان: ههه جايچ الدور بنت خالتي العزيزة

وطبگة.. تخبلت نزلت ركض لعمتي اصيح وابچي

جوري: عمةةة الحگيني ويينچ عمةة
طلعت من المطبخ: ها ها شبيچ
جوري: خابرني غساان الحقير، هو الي سوة هيج بثامر ونزار
شهگت: شنوووو
جوري: والله
اجة عمي: شنو غسان منوو
ام ثامر: ابن خالتهة وطليقهة، الله لا ينطي انشاءلله عساهة بحظة وابختة
ابو ثامر: بابا خابريلي ثامر خل يجي ويجيب عمامة وياه
جوري: هسه اخابرة
ابو ثامر: زين انتي تعرفين اهلة وين ساكنين؟؟ هو وين؟؟
جوري: ماعرف وين ساكنين انتقلو بس اسأل اهلي اكيد يعرفون، وغسان منعرف عنة شي من زمان سافر بس مادري وين
ابو ثامر: بسيطة، خابريلياه لثامر

خابرت ثامر

جاوب: الوو هاا
ابچي واحچي: وينك ثامر'طيبة_الربيعي'
ثامر بقلق: ابيت عمي، ليش شبيچ
جوري: تعال للبيت بسرعة وجيب عمامك وياك
ثامر: ليش ولچ شكووو ابوية بيي شي؟!!!
جوري: لاااا، بس تعال الله يخليك استتتعجل
ثامر بصياح: وچ فهميني شكووو!!
جوري: خابرني غسان هو ورة مصيبتنة هو المسوي بيك هيچ
ثامر بعصبية: شوكت خااابر!
جوري: هسه مصار كم دقيقة، تعال فدوة
ثامر: جاااي

وسدة.. شوية وانملة البيت كلهم اجوي.. ثامر اخذ موبيلي يمكن تسجلت المكالمة.. طلعت المكالمة متسجلة وهو الي مخلي برنامج التسجيل مادري بي.. ماعرف شنو چانت غايتة بس الفهمتة يشك بية..

بقت بداخلي وحسيت بأهانة بس سكتت مو وقت عتاب ومشاكل هسه.. البينة مكفينة..

ثامر... طلعنة اني ونزار للكرادة.. بعدنة عالشارع مطابين للكرادة طبگن علينة سيارتين يمكن منتبهت زين لان انشغلت بالملثمين النزلو منهة وطلعونة سحل.. خدروني مالحگت حتة ادافع عن نفسي..

وكلشي مفتهمت غير الضرب والصلخ.. تعذبت عذاب بحياتي مشايفتة بحيث وصلت للموت وحسيت روحي تنتزع مني.. بس الله كتبلي عمر جديد من رجعوني وذبوني اگبال باب بيتنة.. وهذا كل الي اذكرة..

بعدها لگيت نفسي بالمستشفى والممرض فوگ راسي.. جسمي متكسر والوجع بكل مكان.. ومن عرفت نزار ماكو عبالك جبال الدنيا كلهة انهدت فوگ راسي.. اخوية ماكو؟ ماعرف بي عايش ميت جوعان عطشان بردان..

من تحسنت شوية حلفت اذا لگفت المسوي بينة هيچ مارحمة لو اعرف اصير قاتل.. بس الكاتلني كلشي ماعرف علة نزار مااااااكو اختفة.. عمامي وولدهم كلهم واگفين وياية.. حيلي مهدود بس قويت نفسي علمود نزار.. والله اذا صار عليه شي تصير يا كاتل يا مكتول..'طيبة_الربيعي'

وبيوم گاعد ابيت عمي النقيب چان يحچي وية معارفة علة قضية نزار.. دگت جوري.. طلعت جاوبتهة وتخبلت من سمعت غسان مخابرهة والخسيس ال****** هو ورة الصار بينة.. گبل وصلت العمي وخابرت البقية التمينة ابيتنة..

من صارت الحادثة مال غسان قبل من خابرهة نزلت برنامج مال تسجيل المكالمات بجهازهة حتة اذا خابرهة وحچت وياه ومگلتلي اسويهة قضية.. بس مخابرهة ابد.. واني شكم مرة منبهة لجاوبين علة رقم غريب ماكو ولا عبالك گايللهة.. اخذت الجهاز وسمعت عمامي..

جوري... بيوم واحد التمت العشيرة واجة شيخهم الچبير.. گالو مندخل القانون لان مراح ياخذ حقنة.. گالو نگاومهم عشيرة بعشيرة ونشوف يا زلمة بيهم مينطينة حقنة ويطلع ابنة..'طيبة_الربيعي'

تلث ايام عيونة مشافت النوم.. رايحين هادين علة بيت خالتي بس ميعرفون شي عنة محد يقبل يحچي مدري صدگ ميعرفون شي..

تعبنة كلش كلسع واحد جاي نسويلة اكل ونقوم بواجبة.. الله ينطيهة عمتة بس سمعت بالصار اجتي من الموصل ركض.. وثامر ميهتم الصحتة شكم مرة وگع واخذو للمستشفى.. الدكاترة يگلولة موزين لازم ترتاح وتتغذة بس هو لا يسمع ولا يشوف كل الي ابالة نزار..

وحقة محد يلومة الاخ عزيز.. اني قصي زاعلني فترة شصار بية شحال لو اختفة.. واخوتي عجبوني مقصرو معافو ثامر ولا لحظة.. حتة قصي رجعت علاقتة بثامر مثل قبل واقوة.. گلة دخل الگفة لا ما اقلع عيونة عالسواه..

كلهم حادين اسنونهم عليه.. حتة بابا.. سودة اعلية فد خجلان لان من طرفنة.. بس ثامر گلة عمي انتة شعليك انتة عالراس بس وگفتك ويانة كافية.. يعني ابساطة هل مصيبة قوت علاقة ثامر وابوية واخوتي ابعض بس خربت علاقتي بثامر..

ورة كم يوم دخلو الزلم يبچون.. گاعدين اني وعمتي وعمة ثامر واختة بالمطبخ نتريگ.. وثامر كالعادة يطلع من غبشة علمود يبحث وياهم حتة نوم مينام.. دنتريگ چان نسمع الباب تنفتح ويصيحون ويبچون.. مفرزنت اي صوت غير صوت ثامر

ثامر: يااااخوية ليش ولك رحت وعفتني، نزااااااااار گوووم ولك ليش نااااااايم گوووووووم'طيبة_الربيعي'

عمتي طلعت ركض وصار الصياح بفلس.. اني متت بچي روحي راحت عليه.. ممصدگة نزار ميت كل ضني حلم ويختفي.. بس دخلو للبيت.. دخلو شاااحب ابييض وازرگ مابي نفس.. وعلة وجهة كدمات وريحة مطيبة.. ثامر حاضنة ميقبل يهدة وعمتي وگعت بالگوة صحيناهة..

مأسات عشناهة بهذا اليوم.. مادري منو مخبر رقية محد بينة خابرهة بس يمكن سمعت.. اجتي شصار بيهة مثل المخبلة تعيط وتصيح واطفر.. والبنات گرايب ثامر يلزمهة ويبچون وياهة..

رقية تحبة النزار.. بس مشكلتهة الحقد عماهة.. وگلبهة الاسود عم عليهة.. وحقدها زاد بعد وفاة نزار..

خلصت الفاتحة بعد معاناة.. ثامر طول الفاتحة ساكت وگاعد علة صفحة.. عمتي صارت مثل المجنونة تگمز بين النسوان تنعة وتبچي.. اني ماعرف بيمن احير دخولني للمستشفى وشكلولي مغذي لان تعبت واعصابي تلفت..

فجاة الدكتورة تگلي لازم اديرين بالچ عالطفل.. بقيت صافنة عليهة

جوري: دكتورة يا طفل
الدكتورة: ماما شنو يا طفل متدرين بنفسچ حامل؟؟؟

ماعرف افرح لان حامل لو ابچي لان ابد مو وقتهة.. لا اني الي الية واهس افرح ولا ثامر حالتة تسمحلة يفرح ويداريني اني والبطني..'طيبة_الربيعي'

مگدرت اعوف عيالي رغم اهلي عرفو بحملي ورادوني اروح وياهم حتة ارتاح.. يا راحة هاية واني حماية واخوية توفة.. تندمت لان غلطت عليه وعصبتة.. تندمت بگد شعر راسي علة المشكلة الي سويتهة بيني وبينة..

رقية اخذوهة اهلهة لان تخبلت گامت تضرب بنفسهة مثل الخبلة.. ثامر مشايفتة ميجي للبيت.. من خلصت الفاتحة ورة يومين گاعدة بحضني ملاك تلعب بمميتهة وترضع واني صافنة افكر بضيمي..

عمي عزل نفسة وبس يبچي حتة اكل مياكل ولا ياخذ دواه وعمتي هملتة البيهة مكفيهة.. يعني حرت بمنو اعتني ومنو اقنع.. دخل ثامر عيونة حمر وجهة شحالة صاير ماصولة ضعفففففف كللللش.. عيونة جواهن اسود وشفتة يابسة..

اخذ ملاك من ايدي بوسهة.. گمت اريد احچي خنگتني العبرة من منظرة.. ومشتاقتلة حييييل.. شافني جر راسي وباسة..

حضنتة وبچيت بقوة

جوري: وينك ضل بالي عليك

سمعتة يبچي.. وخرت راسي باوعتلة مو ثامر القوي.. اضعفهم كلهم.. اخذت منة ملاك خليتهة بكاروكهة وخليت الممة بحلگهة..

اخذتة للسرير گعدنة وخليت راسة بحضني.. هو يبچي واني ابچي بس احاول اهدي بي'طيبة_الربيعي'

جوري: هذا قدر ربك حبيبي لا اعتراض على حكمة، ادعيلة الله يرحمة ويجعل مثواه الجنة
ثامر: ولچ راح اخوية جوري بعد ماشوفة ولا اصبح بوجهة الحلو، شلون فهمييييني اريد اموت وراه ماتحمل العيشة بدون اخووووي
جوري: ششش گول يا الله عمري گول يا الله لتگول هيج، راح لرحمتة احسنلة من هل دنيا الغبرة شمحصلين منهة

وخر من حضني وعض ايدة حيل

ثامر: ااااااااخ لا ما الگفك يا غسان مااسمي ثامر ولا اطلع زلمة اذا ما علگتك وكتلتك بدية
لزمت ايدة: كاااافي ايدددك، كافي حبيبي الله ياخذ حقنة منة حسبي الله ونعم الوكيل بي انشاءالله يتعثر ومحد يگومة
گام يضرب علة صدرة: ناااار بصدري نااار اريد اطفيهة شلووون گليلي، شللون انام الليل وكتال اخوي عايش ويشم الهوورة شلوووووون
رجعت لزمت ايدة: انشاءلله تاخذ بثارة والله صدگ الله ميضيع حق احد ويعوف دم البريء بلا ثار

بيومهة گوة خليتة يهدأ وينام.. نومتة بحضني والعب بشعرة.. الله لينطيك يا غسان ولا ينطي كلمن يقتل انسان بريء بغير حق.. لك شنو انتة عليمن طلعت؟؟؟ معقولة چنت عايشة وية هيچ بشر اااني؟؟ الله ياخذك ويخلصنة منك ومن شرك..

شيطان رجيم انتة ويمشي عالأرض مستحيل تكون انسان وعندة ذرة من الانسانية.. زين ليش شمسويلك ولد ماعندة زايدة ناقصة ومنتظر ابنة ينولد بفارغ الصبر.. الله يضوگك مثل لوعتنة واكثر..'طيبة_الربيعي'

شگد دورو عليه النذل ماكو.. آخر شي عشيرة ثامر هدو علية عشيرتة وچان صارت بالسلاح لو ما الله ستر وسخر واحد من اهل الله يهدي النفوس بينهم..

عشيرتة من سمعو بالسواه وشافو اللوعة البگلب ثامر وعمامة شحتو من العشيرة تبرو منة.. يعني ثامر وين ميشوفة يگدر يكتلة محد يحاسبة لو يگلة ليش..

خبرت عمتي بحملي خطية باركتلي ومبين فرحت شوية.. جرح نزار ميسمحلنة نفرح بالطفل.. رجع ثامر متأخر چنت منتظرتة علمود اخبرة.. بدل وراح تمدد.. رحت يمة نمت علة صدرة

جوري: ثامر
ثامر: همم
جوري: اني حامل
ثامر: شنو
جوري: حامل
گام واعتدل بگعدتة: والله؟
جوري: والله

ابتسم ابتسامة خفيفة وجرني باسني

ثامر: مبروك حبيبتي يتربة بعزنة
جوري: الله يبارك بيك حبيبي، يحفظك النة ويخليك تربي احفاد احفادنة
باسني وخلة ايدة علة بطني: من شوكت؟'طيبة_الربيعي'
جوري: قبل فترة مصارلي هواية من عرفت بس حبيت اتأكد بالبداية يلة اخبرك

نمنة مرتاحين ولو قليل.. رغم چان تعبان گعد يسولف وياية عالبيبي ويگلي اذا ولد اسمي نزار واذا بنية انتي سميهة.. فكرت بأسم أمينة بس اغار هههه.. فگلت آمنة احلة وحتة ما انقهر من يصيح بأسمهة لان مهما يكون اني هم امراة واغار على زوجي..'طيبة_الربيعي'

معبالي اكو شي لازم اخاف منة اكثر من انو ثامر بنيتة يقتل غسان.. الراعبني ليحاسبة القانون وينسجن واحتمال چبير اعدام.. وهذا من ضمن الي چنت خايفة منة.. مچنت اعرف المصيبة الثانية المنتظرتني الة لمن بعد ما خلصت عدة رقية واتصلت بثامر تبچي..

يتبع...
محبيت اتعمق بتفاصيل الحزن اكثر البينة مكفينة

وهذا الكلام لغسان ولكل واحد حثالة مثلة👇🏻