Book 2 chapter 33
Saamnay manzil thi aur peechhay uski awaaz
Rukta to safar jaata , chalta to Bichhar jaata
Maikhaana bhi uska tha ,mehfil bhi uski
Agar peeta to emman jaata, Na peeta to sanam jaata
Saza aisi mili mujhko,Zakham aisay lagay dil par
Chupaata to jigar jaata , sunaata to bichhar jaata
Anonymous
🌿🌿🌿🌿🌿🌿🌿🌿🌿🌿
" kyun kar rahi ho ye sub Aayat....? Is sub ka main kya matlab samjhoon..!?" Mateen ka lehja sakht tha , aur uski aankhain Aayat ko apni aag main jalaanay ko tayaar. Aayat ka pooray jism main sard leher dorti mehsoos huwi.
" Aayat Mateen tumhaara shohar hai...uski har zaroorat ka khayaal rakhna tumhaara farz hai...mujhay yaqeen hai tum apna farz achhay se nibhaao gi." Ye alfaaz thay jo Fehmida beghum ne Aayat se kahay thay. Lekin kya sirf is liye Aayat Mateen ka khayaal rakh rahi hai...?
Nahien...! Sirf ye wajah nahien hai...wo ye sub sirf kisi ke kehnay ki wajah se nahien kar rahi , par ye uska zameer hai jo usay apna farz nibhaanay par majboor kar raha hai , ye uska zameer hai jo usay Mateen ke usay bachhanay ke ahsaan ko bhulaanay nahien de raha. Ek ek lumha wo uskay andar pachtaaway ke beej ko paani de raha hai ke Aaj Mateen ki ye haalat uski wajah se huwi hai. Agar us din Aayat karachi wapas aanay ki zid na karti to shayad Mateen pe ye hamlaa hota hi nahien , aur us haadsay main Aayat ko bachaatay huway wo itna zakhmi na hota.
,
aur shayad isi wajah se aaj Aayat wo sub kar rahi thi jo pehlay karnay ka wo soch bhi nahien sakti thi. Paanchh saal pehlay jo kuchh huwa uskay baad to bilkul bhi nahien.
par aaj..! Is waqt wo yahaan khari hai..Mateen ke saamnay...uskay itnay nazdeeq...Wo kya karnay jaa rahi thi...? Uska khayaal rakhnay tak to theek tha, lekin ye...!?....Kesay wo Mateen ke liye ye sub karnay ke liye aamaada ho gayi...?
.Mateen ke taptay haath main uskay sard partay haath main itni quaat bhi nahien thi ke Mateen ki giraft se chhoot sakay.
Mukaamal khaamoshi main Mateen ka poochha gaya sawaal Aayat ke kaanon main goonj raha tha. Lekin Aayat ka seena is qadar bhaari ho raha tha ke wo theek se saans bhi nahieen le paa rahi thi , to uskay sawaal ka jawaab kesay deti.
Aayat ne apni nigaahain uski aankhon se phair lien . Jisay dekh Mateen ke honton par tanziya muskraahat dar aayi thi.
Jub wo us say nazrain tak milaa nahien sakti to phir azdwaaji zindagi ki shuruaat kesay karay gi.
" main sirf apna farz nibha rahi hoon..jis ki sub mujh se umeed rakhtay hain..mera aur koyi matlab nahien tha.!." Be saakhta uski zabaan se ye jumla niklaa. Koshish ke ba wajood uska lehja kamzor par gaya tha.
jisay suntay hi Mateen ka dil jo aag main jal raha tha Aayat ka ye jawaab uskay jaltay seenay par ek dum se paani ka asar kar gaya tha. Mateen ne uskay haath ko apni giraft se azaad kar diya. Lekin uskay chehray ko apni aankhon ki qaid se azaad na kiya.
"Hmm.. Theek hai phir nibhaao apna "farz".." Mateen ne khaas tor par farz lafz ko dabaa kar kaha tha. Jis par Aayat ne uskay chehray ki taraf dekhay bagair dobaara se apnay aglay amal ka sochnay lagi , lekin uska haath jo abhi bhi wahien Mateen ki shirt ke qareeb tha aagay barhnay se inkaari tha.
Wo apnay chehray par Mateen ki aankhain mehsoos kar sakti thi , aur ye ahsaas uskay maathay par paseena phaila raha tha. Aayat ne mushkil se ek gehri saans li. Aur dobara apna haath uski shirt ki taraf barhaaya jo is baar bhi waaza tor par kaanp raha tha. Lekin is se pehlay ke Aayat ka haath Mateen ki shirt tak pohanchta , Mateen ek dum se chair se uth khara huwa.
Aur Aayat jis ka dimaag apni hi dunya main tha Mateen ke is tarhaan achaanak uthnay se ek dum se badak kar peechhay hat gayi. Lekin is se pehlay ke Aayat kuchh keh paati Mateen ne usay haath se pakar kar bathroom ke darwaazay se bahar khara kar diya .
" jis din mujhay muaaf karnay ke baad tum humaray rishtay ko dil se qabool kar lo gi..us din main tumharaay farz qabool karoon ga...aaj nahien...jub ye farz tumhain itni takleef de rahay hain... " Mateen ka lehja narm tha , lekin uski aankhon se saaf zaahir tha ke wo kis aziyat main mubtlaa ho kar ye sub keh raha hai.
Aayat khamoshi aur taajub se usay dekhti reh gayi. doosray hi lumhay Mateen ne bathroom ka darwaaza bund kar diya . Aur darwaazay ki awaaz ke saath hi Aayat ki aankhon se darya beh niklaa tha. Usay samajh nahien aa raha tha ke wo kya karay...usay mehsoos ho raha tha jesay faraar ke sub raastay uskay liye bund ho gaye hon. Naa aagay barh paa rahi hai aur naa hi peechhay hat sakti hai.
Ek taraf baaqi sub hain jo us se ye umeed baandhay bethay hain ke wo apnay farz achhi tarhaan nibhaaye gi. Wo bachi nahien thi jo Fehnida beghum ki aankhon main chhupi jhijhak dekh na sakay jub unhon ne Mateen ki zimmaydaari usay sonpi thi. Wo jaanti thi ke Fehmida beghum Mateen aur uski shadi ki asal haqeeqat se thori bohat waaqif hain . aur kahien na kahien is sub ki zimmay daar wo Aayat ko maanti hain..wo samajhti hain ke Aayat apnay maazi main itni phans chuki hai ke Mateen ko wo khushiaan nahien de paa rahi jo Mateen ka haq hain. Aur har baar jub wo usay aur Mateen ko saath main dwkhtien , us waqt unki aankhon main lehraatay pachhtaaway ke saayon ko Aayat kayi baar dekh chuki thi. Be gunaah honay ke bawajood wo har baar unkay saamnay khud ko mujrim samajhti.
Uski apni Ammi bhi usay ek baar is baat par daant chuki thien ke wo Mateen ka sahi se khayaal nahi rakhti . Sub ko lagta hai ke Aayat Mateen ke saath bilkul achha bartaao nahien karti. Lekin wo sub ko kya bataaye ke uskay is bartaao ki asal wajaah kya hai...?
Naa jaanay kab tak wo is sub main yunhi jalti karhti rahay gi.
Din isi tarhaan guzartay gaye lekin Aayat ki zindagi jesay abhi bhi wahien ruki thi. Mateen is ek mahinay main kaafi had tak behtar ho chuka tha. Is pichhlay mahinay main Aayat ne apni poori koshish ki ke wo Mateen ki har zaroorat ka achhay se khayaal rakhay. Lekin us raat ke baad Se un dono main koyi khaas baat na huwi. Lekin Aayat usi tarhaan uski baaqi zarooraton ka khayaal rakhti rahi. Haftay main do baar uskay saath dressing ke liye hospital jaati , aur ghar aakar uskay liye alag se kuchh na kuchh banaati. In sub cheezon main kisi ko shikaayat ka moqa nahien dena chaahti thi.
Rozaana Zoyan Aayat ke mutalliq Mateen se mukhtalif sawaal karta ke jin se usay kuchh pata chalay , lekin har baar Mateen ka jawaab sun kar usay sirf maayoosi hoti. Aur aakhir main usnay ne haar maan kar apnay sawaalon ko rok diya. Lekin Zarish Zoyan se mutaffiq nahien thi , wo ab bhi yehi maanti thi ke uski Aapi main waaza tabdeeli aayi hai, aur usay poora yaqeen hai ke wo din door nahien jub Mateen bhai aur Aayat ki zindagi main bhi khushiyaan qadam rakhain gi. Un donon ke saath betha Mateen sirf unhain khamosh dekhta hi rehta.
Wo ab bhi kisi khush fehmi ko paana nahien chaahta tha is liye usnay khamosh reh kar Aayat ka usay muaaf karnay ka intzaar karna tha. Lekin kehtay hain na ke kehnay se zyada karna mushkil hota hai ' wesay hi Mateen ka intzaar guzartay har din ke saath usay be chaini aur be sukooni hi bakhsh raha tha.
uska zakham kaafi had tak bhar chuka tha. Is liye usnay Murad sahab se office aanay ki ijaazat maangi ke wo ab ghar main beth beth ke bezaar ho gaya hai , Lekin Murad sahab ne usay saaf inkaar kar diya ke jub tak wo bilkul so feesad theek nahien ho jaata tab tak wo usay office main qadam bhi nahien rakhnay dengay. Jisay sun kar Mateen to udaas huwa hi tha , lekin us se zyada shakal Zoyan ki kharaab ho gayi . Ke usay Murad sahab ka kharaab mood kucch aur waqt bardaasht karna paray ga.
Sunday ki subha thi aur naashta karnay ke baad sub lounge main bethay thay. Lekin Zarish ki gair mojoodgi ko kehsoos kartay huway Murad sahab ne Zoyan se uskay mutalliq poochha.
" wo kal raat se uski tabiat kharaab ho rahi thi poori raat so nahi paayi bechaari , is liye subha maine usay uthaaya nahien. " Zoyan ne bataaya jisay sun kar wahaan bethay sub pareshan ho gaye.
" Zoyan tum ne mujhay pehlay kyun nahien bataya..! Mujhay laga ke aaj aisay Zarish ko uthnay main dair ho gayi hai.tum itnay laa parwaah kesay ho saktay ho..! Main abhi usay dekh ke aati hoon.." Fehmida beghum jo apnay haath main magazine lekay bethien thi , usay wahien rakh kar uthien aur Zoyan aur Zarish ke room ki taraf barhien. Murad sahab usay is tarhaan dekh rahay thay ke jesay ab wo uski izzat afzaayi karain ge. Jis par wo sharmida hota jaan chhura kar utha aur Fehmida beghum ke peechhay ho liya. Baaqi sub bhi uth kar Zarish ke kamray main aa gaye.
Zarish jo ab uth chuki thi sub ko wahaan dekh kar sharminda ho gayi . wo sub ko kehnay lagi ke wo bilkul theek hai , Zoyan ne be wajah sub ko pareshaan kar diya hai. Jis par Zoyan usay ghoorta reh gaya.
" Fehmida abhi isay hospital lekar jao , dekho bachi ki rangat hi kitni zard par gayi hai. " Murad sahab mufakkir lehjay main bolay.
Fehmida beghum jo kuchh sochtay huway muskuraa rahien thien. Murad sahab ke ye kehnay par wo unki taraf mutwajja huwien.
" aap fikar mat karain , main abhi doctor se appointment le leti hoon" fehmida beghum ne muskuraatay huway kaha. Jisay dekh kar Murad sahab usay na samjhi main dekhnay lagay lekin Fehmida beghum unhain jawab main sirf ek aur muskaan hi de sakaien.
Shaam ko jub wo Aayat ko doctor ke paas lekar gayien to unhain jis khabar ka be chaini se intzaar tha wahi sunnay ko mili. Jisay sun kar wo khushi se phoolay nahien samaa rahi thien. Wahien kharay kharay Zarish ke sar se hazaaron ke note sadqa karay wahaan khari maasiyon ko de diye. Zarish alag khushi aur sharam se laal ho rahi thi. Usay yaqeen nahien ho raha tha ke wo maa bannay waali hai.
Jub ye news baaqi ghar waalon ko mili to ghar main khushin ki nayi lehar dor gayi . Zoyan paanchh minute tak to uski Amma aur aur Zarish ko be yaqeeni se dekhta raha , lekin Jub Murad sahab ke pehlay usay sar pe halki si thapar lagaanay aur baad main usay apnay seenay se lagaa kar mubaarki denay par usay yaqeen aaya ke ye sub sach hai.
Mateen jo wahien khara tha wo bhi Zoyan ko galay lagaanay se nahien rok paaya.
Dadi ko ye khabar denay ke liye sub un ke kamray main jamaa thay. Zarish sharam ke maaray gardan bhi utha nahien paa rahi thi. Par Zoyan ki khushi se baanchay kkhuli huwien thien. Lekin ye khabar sun kay jahaan Dadi jaan ko khushi huwi thi wahien unkay andar ek afsos bhi ke shadi ke itnay mahinon baad bhi Mateen ki taraf se unhain ye khush khabri sunnay ko nahien mili thi.
Muskuraatay huway jub wo Aayat ko dekh rahien thien tab Aayat ne sharminda hotay huway apni nazrain jhuka lien thi. Aayat unki muskurahat ke peechay chupi udaasi ko ba asaani dekh sakti thi. Uska dil kiya ke wo abhi yahaan se chali jaaye lekin ikhlaaq usay wahan rokay huway thay.
Raat ke waqt jub sub dinner kar chukay to Fehmida beghum Dadi jaan ke kamray main chali gayien, Rida aur Murad sahab apnay apnay kamray main aur Mateen Zoyan aur Zarish Aayat aur Mateen ke kamray main aa gaye.
" mujhay lagaa tha ke Zarish se shadi se bari khushi mujhay aur nahien mil sakti , lekin aaj pataa chalaa ke wo meri galat fehmi thi , kyunkay aaj is khabar se mera dil kar raha ke main......main"...ye dekho mujhay to alfaaz bhi nahien mil rahay.." Zoyan boltay huway hansnay lagaa. Aur Zarish usay pyar bhari aankhon se dekhti rahi. Usay is baat ka yaqeen nahien ho raha tha ke uski zindagi kitni perfect ho gayi hai. Achhi family , achha husband aur ab ye. Be saakhta uska haath apnay pait ki taraf utha.
Ye ahsaas ke ek nayi zindagi aap kay andar pal rahi hai , Zarish ko dar aur khushi dono main mubtlaa kiye huway tha.
" bus ab tumhaari taraf se khush khabri mil jaaye ..phir to meri zindagi safal ho jaaye gi. " Zoyan abru achkaatay huway Mateen ki aankhon main dekhtay huway bola. Jis par Mateen sirf usay muskraa kar hi dekh sakaa. Ain usi waqt par Aayat green tea se bharay cup tray main lekay aagayi. Uskay honton par bhi halki muskraahat thi.
Tray table pe rakhnay ke baad usnay ek ek cup sub ko pakra diye aur khud bhi ek cup haath main lekay Zarish ke baraabar main beth gayi.
" Ammi ko ye good news tum do gi ya main doon...? " Aayat ne Zarish ko chhairtay huway kaha. uska chehra khushi se chamak raha tha , Zarish ki is khabar ki wajah se Aaj us ka mood bhi khush gawaar tha.
" humaari news to hum kal wahaan jaa kar unhain khud dengay , lekin aap kay paas bhi aisi hi good news hai to aap bhalay unhain bataa dain.." Zoyan ne achaanak se kaha , jis par Aayat ke chehray se rangat hi ur gayi. Aur Zarish usay khaa jaanay ki nazron se dekhnay lagi. Lekin Mateen ne to apnay baraabar se takiya utha kar Maasoom banay Zoyan ke sar par de maara.
" kya hai bhai...kya ab main apni bhabhi aur saali saahiba se mazaak bhi nahien kar sakta...? " Zoyan ne khafgi se Mateen ko dekhtay huway kaha.
" Nahien.." Mateen ne foran jawaab diya.
Zoyan ne heraangi se pehlay Mateen ke chehray aur phir Aayat ki taraf dekha jo gardan jhukaaye apnay haath main pakray cup ko dekh rahi thi. Tab usay ahsaas huwa ke Aayat uski baat pe kesay khamosh ho gayi thi.
Lekin wo ab kya keh sakta hai.....ye ke wo to mazak kar raha tha...?
" chalo Zarish hum apnay kamray main chaltay hain , tumhain is haalat main zyada dair tak jaagna nahien chaahiye. " boltay huway Zoyan usay ghoorti Zarish ko apnay saath baahar le gaya.
Yun to to Zoyan ne aisi koyi bari baat nahien kahi thi , lekin Jin jin logon ne Dadi ki maayoosi se bhari nazrain Aayat pe mehsoos ki thien , wo samajh saktay thay. ke Aayat is waqt kya mehsoos kar rahi hogi. Lekin bechara Zoyan is se bilkul bekhabar tha. kyunkay us waqt wo apni khushi main is qadar masroor tha ke wo ye sub dekh hi nahien paaya tha
******
Is khush khabri ke baad din dobara apni usi raftaar se guzartay gaye.aur is tarhaan ek mahina palak jhapaktay guzar gaya. Aur is ek mahinay baad jub Mateen ne bilkul theek ho kar dobara office join kiya to Aayat ki routine dobara pehlay jesi ho gayi. Bus farq itna tha ke ab wo Mateen ko dekh usay nazar andaaz nahien karti thi. Wo uska har kaam bakhoobi sar anjaam de rahi thi.
Aur doosri taraf Mateen tha jo intzaar ke bawajood wo un dono ke darmyaad haayil is doori ko bardaasht nahien kar skta tha. Aayat chaahay us se mohabbat karay ya na karay, lekin uskay liye to mohabbat ka matlab hi Aayat thi. is liye apnay machaltay dil ko kuchh sukoon denay ke liye wo har wo koshish karta jis se Aayat thoray faaslay par hi sahi par uski nazar ke saamnay hoti.
Aur ye baat Aayat bhi mehsoos kar rahi thi. Kayi baar jub wo Office se ghar aata aur Aayat uskay liye chaaye laati aur wo dono kamray main akelay hotay. tab Aayat is awkward khamoshi se bachnay ke liye khud ko wahaan room main kisi na kisi kaam main masroof kar deti. Kyunkay Fehmida beghum ke mutaabiq Jub Mateen aur Zoyan office se thak kar aayien to Aayat aur Zarish ko kam az kam us waqt tak unkay saath bethna chahhiye jub tak unki chaaye na khatam ho jaaye.
Aur ittefaaqn Mateen ko chaaye aaraam se peenay ki aadat ho gayi thi. Jis wajah se usay wahaan rukna parta. Us doraan aksar Aayat apnay chehray par Mateen ki nazron ki tapish mehsoos karti. Wo jaanti thi ke Mateen usay dekh raha hai. aur ye ahsaas uskay andar ek bechaini bhar deta. Lekin uskay kayi wehem o ghumaan ke bar aks Mateen ne kabhi uski taraf barhnay ki koshish nahien ki. Lekin kabhi usay apni nazron se azaad honay ki ijaazat bhi nahien di. Wo jub bhi kisi bahaanay se kamray se baahar jaanay ka sochti wo koyi aur bahaana soch kar usay wahien apnay saath kamray main hi bithaaye rakhta.
Jis tarhaan Mateen jaanta tha ke Aayat ab bhi us se door rehna chaahti hai par wo usay khud se door nahien jaanay de sakta. Usi tarhaan Aayat bhi jaanti thi ke Mateen jaan boojh kar usay apnay saamnay bithaaye rakhnay ke bahaanay talaash karta hai. Lekin wo dono ek doosray ko is se mutallq mukhaatib karnay ki himmat na kartay.
Lekin is guzartay ek mahinay main Aayat ne ek baat mehsoos ki thi aur wo thi Daadi jaan ki guzartay waqt ke saath barhti Mateen ke bachay ki khuahish.
Wo jaanti thien ke Mateen aur Aayat ki shadi ko abhi ek saal bhi nahien guzra hai , lekin jub se Zarish ki taraf se unhain khushi mili thi , guzartay har din ke saath Aayat ki taraf se is khamoshi par wo be chain huway jaa rahien thien. Wo apnay betay ko kho chuki thien aur uskay baad wo apnay potay ka bacpan bhi dekh nahien paayien thien. Lekin ab unkay dil main ye aakhri khuahish reh gayi thi.
Wo Mateen ke bachay ko apni goad main lena chaahti thien. Lekin Unka dimaag ajeeb o gareeb wehmo gumaan ka shikaar ho gaya tha. Unhain lag raha tha ke wo Mateen ka bacha dekhnay bagair hi is dunya se rukhsat ho jaayen gi. Aur is ka zikr wo fehmida beghum se karnay se na rok paayien.
" Fehimda mujhay lagta hai tumhain Bahu ko kisi achhi doctorni ko dikhaana chaahiye....ho sakta hai kisi maslay ki wajah se Aayat bahu ko abhi tak bacha nahien ho raha."
Fehmida beghum jo Amma jaan ki dil ki baat samajh saktien thien. Muskra kar unka haath thaamtay huway bolien.
" Amma abhi unki shadi ko itna waqt kahan guzra hai , khair se abhi sirf aadha saal guzra hai , aap be wajah pareshan ho rahien hain , waqt ke saath humain Aayat ki taraf se bhi ye khush khabri sunnay ko mil jaaye gi.
Lekin Amma jaan ab bhi fehmida jaan ki baat se mutmaeen nahien huwien thien. Unkay jhuri daar safaid chehray par pareshaani se aur jhuriyaan namoodaar ho gayien thien. " fehmida aadha saal kam nahien hota , aur agar ek saal baad bhi bacha na huwa to tab bhi to humain Aayat bahu ko doctor ko dikhaana paray ga na.. to phir abhi kyun nahien...! Meri zondagi ab itni baaqi hahien hai ke main mazeed intazaar kar sakoon , ho sakta hai ke main ek saal bhi jee na sakoon..." Amma jaan ki aakhri baat pe Fehmida beghum ne ek dum se nafi main sar jhataktay huway Amma jaan ke haathon ko choom liya.
" Amma aap aisi baatay kyun kar rahi hain...! Abhi to aap ko Zoyan aur Mateen ke bachon ko apni goad main khilaana hai , Allah aap ko daraaz umar de.
" Nahien Fehmida tum sub ne mujhay kabhi Wahab ki kami mehsoos nahien honay di , lekin ab ye meri aakhri khuahish hai ke main Mateen ka bacha dekh sakoon usay apnay Wahab ka naam de sakoon , lekin na jaanay kyun dil main dar beth gaya hai ke ye khushi mujhay naseeb hogi ke nahien...." Ammma jaan ki daanaayi se bhari aankhain aansuon main bheeg chuki thien.
" Amma aap pareshan mat hon , insha Allah bohat jald aap ko Mateen ki taraf se bhi khush khabri sunaayi degi..lekin aap ki sehmati ke liye main kal hi Aayat ko Doctor ke paas le jaaoon gi. Aap is tarhaan khud ko pareshan na karain " Fehmida beghum ke ye kehnay par Amma jaan ka chehra waaza tor par pur sukoon ho gaya tha , lekin Fehmida beghum ko mehsoos ho raha tha jesay unkay seenay pe kisi na ek bhaari pathar rakh diya ho.
💞💞💞💞💞💞💞💞💞💞