همام:::
رجعت للبيت ساعة 9حيل تعبان وجوعان ونعسان وبوجهي رحت للمطبخ حنين صبتلي عشة تعشيت وكمت امي كالت:
وين رايح يمه همام..اكعد شوية اريد اسولف وياك.
حيل نعسان يمه..رايح لغرفتي
والتفتت علي حنين
حنة اذا مسوية جاي جيبي لغرفتي بروح ابوج راسي راح يطك..
اي هسه اجيبلك جاي
رحت لغرفتي تمددت ع الجرباية خمس دقايق واجتي حنين بيدها كوب جاي خلته يمي ع الكومدي وطلعت..بعدني ممخلص الجاي دخلت امي وسدت الباب وراها كعدت يمي وكالت:
همام يمه اريد احجي وياك بموضوع!
اي يمه كولي خيرج؟
يمة اريد ازوجك..صار عمرك28سنه موكافي ضال عازب لحد هسه.
يمه..شفطنج هسه ع الزواج؟؟
ليش يمه انت وليدي الجبير واني احس بيك واكيد محتاج مره تشاركك حياتك!
ههههه يمه قابل شفتني كاتل روحي ع الزواج لوباجي بحضنج على مرة..اصلا الزواج مو ابالي ولامفكربيه!!
مامفكر بيه شنو بعد شكد يصير عمرك يا الله تفكر البعمرك عدهم كومة جهال؟؟
والله يا الله يمه شبيج انتي قابل الناس تتزوج بس ع مود الجهال هذا شلون حجي؟؟
اي يمه تتزوج حتى تستقر وتخلف هذه سنة الله ورسوله!
يمه من الاخير...كولي شايفتلي مرة وتردين تزوجيني ؟؟
اي يمه شايفتلك مرة وشلون مرة زينة البنات !
اها...هنا الحجي..انتي مرهمتها ومخلصة ومرتبة كلشي..ههههه والله فاجأتيني..ومنو هاي تعيسة الحظ الي راح تاخذني؟؟
ليش تعيسه الحظ يمة شبيك اشو مال وجمال..وشخصية..وخريج وين يلكن واحد مثلك وبعدين البنية هم معلمة وحلوة وابوها مقاول وشبعانين والخير منا..ومنا...
اهووووو..معلمة؟؟..من زغري واني اكره المعلمات!!
هههه ولك يمه شبيك ادور حجج انت بس تشوفها وتتعرف على اهلها تكلي زوجينياها من الصبح..ولك ابوها مقاول وعنده معارف كومة بكل مكان بلكي
تتعين ورة العرس وترتاح..والبنية مو قاصرة حلوة وعمرها25سنه.وهالوحدة لهلها يعني مدلله وراح تورث خيرهم كله انت فكر لبعيد فكر بمستقبلك ومستقبل اطفالك يحظي..
يمه بس احنا ما محتاجين الحمد لله هم عدنا خير ليش ازوج وحده واني افكر بحلالها وورثها..هذا شلون حجي يمه؟؟
اهوووو..والله شلعت كلبي يعني انت متفكر بيه متفكر بابوك احنا نريد نشوف ضناك ونريدك تستقر حالك حال كل الشباب..بطل ادور حجج الخميس اخذ موعد من اهلها ونروح نشوف البنيه تره والله اذا تضل ادور حجج ما ارضة عنك طول عمري!!
حنين:::
سمعت حجي ابيت عمي عن همام وعرفت اكو مشروع خطوبة بصراحة حيل فرحت اله لان همام حيل حباب ويعاملني معاملة حلوة وعمرة مضوجني لو رفع صوته علية بالعكس جان حاسبني مثل ميادة وكولما يجيب حلويات لو كرزات لميادة يعزل حصتي..هو شخصيته حلوة ومحبوبة بس ميلحك يكعد ويانا بالفترة الاخيرة خطية حيل يتعب يجي من المحلات يلف راسه وينام ويكعد من الصبح هم يرجع للمحلات..هو حيل جذاب..شعره اسود ومخصل وسرح ولحيته مرتبة ومعتني بملابسه رغم هو ميلبس قاط مثل عمي بس يلبس تيشيرتات او قمصان او بنطرونات كابوي...ويخلي عطر حلو..مرتب ونظيف..وامه تتباهة بيه تكول هيج النسوان تخلف لو متخلف احسن. فعلا هو شاب مميز ربي يسعده ويفرحة باطفاله
واجه يوم الخميس كلهم مستعدين يردون يرحون لبيت البنية طبعا اني مو وياهم لان اعرف مستحيل عمتي تخليني اروح تريدني ابقة بالبيت وتتباهة بهمام وميادة كدامهم شعليه بيهم خلي يروحون ..ربي يتممها بخير..شفت ميادة وعمتي ميعاد مخبوصات ويبدلن ويرتبن بسلام وهمام اسمعه يدردم بغرفته:
يمه اني ويني اوين القاط ومكمطتني بيه اصلا ما اعرف البس قاط لا وفوكاها رباط هم..ولج حنة....حنين...حنة وينج تعالي سويلي الرباط المصخم.. 3
ركضت
لغرفته لكيته مبدل وحاير بالرباط وسمعته يكول:
حنة بعد اخوج شديلي الرباط..تعرفين مو؟؟
اي اعرف..دائما..جنت اشده لعمي..
وبديت الف..الرباط وارتبة واباوع على همام فدوة..شكد حلو وشخصية ومرتب هنيالها خطيبته..يربي هم فد يوم يجي شاب حليو مثل همام ويخطبني..لو اضل طول عمري اخدم..وضليت اباوع عليه هو ملتهي يرتب بشعره ع المراية واني عيوني تراقب عيونه العسليات اووف يدوخن والله..ولحيته محلقها وتخبل وريحة الرجولة تشع من جسمه..فدوة لطوله شلون جذاب ويرهب..ربي يحميه ويفرحة بحياته...ومن خلصت سمعته يكول:
هااااحنة شلوني..مرتب شتكولين...خوش شاب مو؟؟
استحيت ودنكت:
اكيد خوش شاب لا والله زين الشباب بعد اختك طالع تخبل وروح امي
اشكرج حنة الوردة وانتي هم تخبلين يوم ال الج بعد اخوج..
فدوة همام اذا صارت القسمة خليني اروح وياكم بالزفة..لان عمتي ميعاد دائما متخليني اطلع من تصير مناسبة!!
صدوك جذب..حنين اكيد ترحين ويانة بالعقد وبالحنة وبالزفة ..والله ميصير شي اذا متجين ويانا شنو قابل اني شكم مرة اتزوج معليج لتفكرين خليها ورا..اخوج ترحين ..يعني ترحين
صدوك..فدوة لعمرك همام ربي يتمملك بخير ويسعدك..
وسمعت صوت عمتي ميعادتصيح على همام:
وين صرت همام يمه تأخرنا..
همام::
طلعنامن البيت صعدت سيارتي وابويةبصفي وامي وميادة وسلام بالورة كاعدين.اهل البنيةمقبلو تجي المشية الا اشوفها وتشوفني كالت امي عادي نروح نشوفها وبعدين نمشي عليهم المهم رحنا لبيتهم جان بيت جبير وضخم وبيه كراج سيارات واكفات بيه سيارتين حديثات بالمقدمة..دخلنا كعدنا بالاستقبال امي تسولف ويه امها وتكولها بنتج راح ادللها دلال احنا معدنا شي يتعب حتى خدامة عدنا بالبيت قصدها على حنين حيل ضجت من سمعت امي تسميها خدامة ..خطية تكرهها وتهينها حتى بغيابها..
ورة شوية كالت امها راح تجي بنتي اجت البنية شايلة صينية مال عصير ..لا يا الله هاي شطولها..يمكن..ميوصل راسها لصدري..صح بيضة..وملامحها مقبوله بس كصيرة وشعرها مبين بيه ردة قوية ومعالجته بالمسرحات..وبعدين ..تارسة يعني مورشيقة..مواصفاتها ابد مو ابالي..جنت احلم اخذ وحدة رشيقة وجسمها مفصل اذا موطويلة ع الاقل متوسطة بالطول وبعدين لعبت نفسي من شعرها مسرحته بالكوة وتارسته دهن..ابد معجبتني..بقت البنية كاعدة خمس دقايق بعدين امها كالت عيني بعد كم يوم اندزلكم الخبر الاكيد..وطلعنا من بيتهم صعدت سيارتي ضايج وسمعت امي تكول:
ها يمه همام..شلونها خو تخبل؟
يا تخبل يمة..شو جنها بستوكة مال طرشي تحجين صدوك جذب انتي؟؟ 5
يااااا..ياااااشبيها يمه شو بيضة ومتفتفة وشحلاتها..واذا كصيرة شوية يعني احسن تاخذلك وحدة عرويدة جنها كصبة ولك يمه بنية حلوة ومربربة لتدور حجج؟؟
يمه وشعرها شفتيه..يمه شعرها سيم اماعين ومسرحته ؟؟
لا..لا..لا عاد لهنا وكافي..البنية شعرها ما عليه تعيوب..وحتى اذا شوية خشن..المسرحات تارسة السوك ويترتب شعرها..
ابوية كلها:
يامرة الولد ما اقتنع بيها يعني هو غصب خو ماغصب؟؟
ليش عيني ما اقتنع بيها شوف عيشتهم شوفها شلون مسبحة بالذهب تسبح كاملة مكملة..لو تريدها اله حلوةكولش مثل عفاف الحبيبة؟؟
هسه شجاب طاري عفاف الله يرحمها كولشي مخليه بيه عفاف..والله زهكتينا من هالعيشة؟؟
لحد يحجي من كيفة البنية ماعليها تعيوب..هسه احنا الملائكة تضحك علينا منو يكول اهلها يطوها ويوافقون..والله اذا انطونياها يرادلها بخت..
ههههه يرادلها بخت مو خاطب..الاميرة ديانا؟؟
اي صنف..صنف والله..اذا قبلو اهلها اذبحلي ذبيحة؟؟ +
رجعت للبيت افكر..شبيهاامي معقولة عدها اهم شيء تزوجني وكبل حتى اذا البنية معحبتني!