#العنب_العنب_العنب
البارت2
ورود الخالدي
ناريمان:::
دخلت لبيت جدي..لكيت امي كاعدة بالصالة ويمهاناس شكلم غريب مركزت كولش بيهم رحت ركض لغرفتنا..ورة شويه امي جتي..وبدت تحجي حجي عجيب غريب فهمت منه انه ذولي عمامنه وجايبن ياخذونه مستوعبت كلامها..يا الله شنو ياخذونه اني عندي دوام ..وضليت احجي ويه امي وفهمتها مستحيل اروح وياهم فكالت :
ماما عمامج ناس ريفيين.يعني شرانيين وسلاحهم جواهم والمرة عدهم ما الها كلمة..
وضلت تشرحلي عنهم اني كلبي وكع بالكاع حيل خفت منهم كلت:
يوم خلي اطلع احاجيهم بلكي يخلوني ع مود كليتي؟؟
وقبل مترد طلعت من الغرفة لكيت رجال جبير بالعمر ديصلي ومسدسه ع الميز يمه ..وولد شاب كاعد ع القنفة اووف شكلة يرهب لابس دشداشة حني..وعلى راسه جفية هم حني..لابس نظارات...وبيده جكارة..وسبحة وباصبعة الزغير محابس فضة واحد فوك اللاخ..نزع النظارات وضل يباوعل من فوك لجوه لج يوم شكد يخوف هذا..اوف كلبي همه ذولي عمامي صدوك يخوفون بمجرد مشفت الولد الشاب كمت ارجف بعدهم ..ممحاجيني اخذني الرجيف رجعت دخلت للغرفة من خوفي محجيت ولاكلمة...ورة شوية امي اخذتني من ايدي ودخلتني عليهم.وكالت:
ابو ماجد هاي نريمان بنتي..مرحلة اخيرة بالكلية..تكول بلكي يخلوني اكمل بس هالسنه؟؟
جان يباوعلي الرجال الجبير ويكول:
بنيتي هناك هم عدنا كليات ورحمةمن الله وانقلج بساع لاتفكرين بالكلية..
اني مكدرت احجي اخاف..احجي ويبين صوتي يرجف وهو كمل حجية وكال:
مايصير خاطرج الله طيب بعدعمج وراح تعيشين وي بناتي هم بعمرج وادللج دلال ابوج صح عافنا..بس انتي دمنا ولحمنا..
هزيت راسي يربي شبيه ما اكدر احجي:
فكال:
يالله عواطف خوية لبسي عباتج..ولبسي البت عباتها وامشن ويانا خل نوصل كبل الليل..دربنا طويل..
فامي كالت
ابو ماجد..العفو معدنا عبي احنا هذا لبسنا؟؟
لا خويه هذا لبسجن مايرهم عدنا
وباوع للولد الي جان بس يباوعلنا ميحجي..كله:
بويه خالد اخذ مرت عمك..وبت عمك اشتريلهن عبي..ولبسهن بس استعجل من حيث تعطلنا هواي؟؟
فامي كالت:
خلي خالد ياخذ نريمان ويشترون عبي..اني راح اجمع ملابسنا..
خفت راح اروح وحدي ويه هذا جنه اسد يخوف..مشيت كدامة ومشه ورايه طلعنا من بيت جدي..فتحلي باب السيارة صعدت وهو هم صعد بس حركت السيارة سمعت صوته يكول:
اسمعي نريمان مدري بيذنجان مدري شسمج..لاتتعطلين بالمحلات مال العبي..بسرعة اشتري وفضيها ترة ماعدنا وكت ودربنا طويل!
هزيت راسي وكلت بصوت ناصي:
اي؟؟
خالد::
وصلنا للمحلات نزلنا اخ..شكد ضايج وروحي طافرة هسه انه تالي وكتي امشي ويه وحدة لابستلتي..شندح مندح..شني هاي لامستحه ولاعيب تمشي بالشارع حسبالك ابيت الخلفوها..اول مادخلنا للمحل زمخت بيها:
استعجلي خاتون!
بسرعة اخذت 2عبي اسلامية وشالات..وجتي يمي تركض:
شكو..جايه روحي جوه لبسي وحدة فوك هدومج خزيتينا..هسه اذا اصفكج راشدي هم واحد يكلي ليش شكد فاهيه!!!
راحت ركض لبست العباية فوك هدومها واجت العباية طويلة ومستورة ارتاحيت بس لازمة الشال بيدها:
ادنيت منها:
انتي شبيج ثولة لو خرسه لو ماتفتهمين غطي راسج.شمتانيه؟؟
اي ..اي
من طلعنا لهسه ماسمعت منها بس اي واي وبالكوه اسمع صوتهاوقبل منطلع من باب المحل عثرت..ورادت توكع على وجهها..كضيتها بساع صارت بين ادية:
اللهم طولج..ياروح..شبيج تتعثرين بالحماد؟؟
اويلي..بووووية شالت راسها باوعت بعيوني وكالت:
اسفه..اسفه..بعدني ما اعرف امشي بالعباية..كولش اسفه..عيني
يمه..بسعاد..لحكي على ابنج كلبي راح يوكف هاي شلون تحجي..شنو هذا صوتها..هاي مايعه ميوع..تكول نستله ام العسل..اخ ..عيونها
بعيوني..شهل ويدوخن والشفايف مرسومات رسم اخ..اخ كمر..ومصوركاضها بيدي جسمها طري..دوختني بت الاوادم جسمي ثكب نار لا وفوكاها انه لابس دشداشه بس لا انفضح.ويبين كلشي!!!!!!!!!والناس تنتبهلي..
هديتها بسرعة خاف..انفعل اكثر..وعيب من الوادم..مشيتها كدامي صعدنا السيارة والدرب كله الوم بروحي شبيه بس كضيتها صعدت عندي الحماوة هاي شلون راح تعيش ويانه شلون اصبر على روحي هناك..هو انه كاض..روحي بالكوه من الغلط..وصلت لبيت جدها لبست امها العبايةهي دارت بالورة بصف امها وابوي كعد بصفي..بالصدر..طريق الناصرية طويل شغلت تبريد كال ابوي
طفي وافتح الجامات الهوه طيب..
اصلا الصيف مخلص على ابواب شته بوكتهافتحت الجامات ابوي ومرت عمي يسولفون امها تحجي بغدادي لعد ولويش وكولش واكولك..وابوي كلما حجه هي تخلي ايدها ع حلكها وتتبسم..شلون ابتسامة..تذبح ذبح..والشال كل شوية يوكع اخزرها وترجعه..الهوه يلعب بكذلتها..هاي منين طلعتلي..دخيلك ربي..استرها..وياي..كلبي رهيف..ومااتحمل ..الطريق كله ساكته بس تباوع من الجامه انه..هم ساكت..بس عيني عليها..مشدوه بيها..بس مامبين الها اعرف شلون ابوك النظرات ما اخليها تحس اني مهتم وروحي..تفرفر..مسوي روحي لابسها...
وصلنا لبيت اهلي..الحجيةاستقبلنا..سولفنالها وعرفناها عليهن اخواتي كيفن بيها حسبالك ممثلة وجاية لبيتنا حارن بيها ارتاحيت من اخذنها وطبن جوه..ع الاقل اريح روحي..عيوني راح تنشلع عليها..
رحت لغرفتي فاطمة اختي صعدتلي اكل لان تعبان كلش اكلت..ومانزلت نمت ما ادري بروحي من دوخة الطريق..كعدت الصبح نزلت من فوك رحت اغسل وجهي..حته اتريك..وشفتنها طالعة من غرفة البنات بيدها خاولي زغير وفرجة اسنان ومعجون..اهوووه..هاي شلابسه شو هم فاتحة الشعر ولابستلي تراك لازك عليها..هاي شلون سالفة
عوجه هسه..انه بلا عزة معزة..شلون بيه يعني اخلي تيب على عيوني:
وبس وصلت يم..المغسلة صيحت عليها:
اسمعي ولج بيذنجان مدري بطيحان ما اذكر اسمج مشكلب..هاي هدومج ماتلبسيها بعد البسي هدوم محشومة افتهمتي؟؟
بس زمخت بيها طاحن الفرجة والمعجون من ايدها وكالت:
بس..بس احنا..هسه بالبيت..محد يمنا؟؟
شني محد يمج..انه مو رجال واكف يمج..لو شني بالضبط؟؟
بس انت ابن عمي..مو غريب..قابل اضل لابسه عبايه..طول الوكت..
البسي دشداشه من البنات وشعرج لمي وغطي بشال.شني ماتعرفين العيب..انه خواتي مايلبسن هيج كبالي؟؟
بس اني هم اختك يعني كاعدة عدكم؟؟
بطلي هاي السوالف..لا اختي ولاشي انتي بت عمي..شني انتي ماتصلين..ماتعرفين العيب ماتعرفين الحلال والحرام..شني هاي تربيتج..خاف حسبالج مثل بغداد تمشين مصلخة..ضهرج اكسرة لو اكتلج موت وادفنج بكاعنا..احسبج دجاجة وذبحتها..
شنو..شكلت..تذبحني..مثل الدجاجة؟؟
اي..ماعندي مانع!!!
هههه خافت خلت الخاولي على راسها..
هااا اي راح اغطي شعري والبس دشداشه فدوة لتصير عصبي..عليه
ماطولج حبابه وتسمعين..كلمتي ما اتعصب عليج يالله روحي لبسي دشداشة وشال..وتعالي تريكي
اي هسه
ركضت ..اخ..شلون ورك..يتهزهز..سودنتني بت..الاوادم..
ومن ذاك اليوم هي تلبس دشداشه وشال..بيضة جنها جبنه كل الالوان تاكل وتشرب وياها لو تلبس كونيه هم حلوة عليها..
ناريمان:::
مر اسبوع واني ابيت عمي..البيت مابيه بس بنات عمي اربعة ومرت عمي وامي راحت لبغداد..ع مو وظيفتها وع مود اتجدد اجازتي بينما اسوي نقل..شفت هوايه شغلات مشايفتها قبل خبزهم طيب واكلهم دسم بس تعودت عليه..بنات عمي يشتغلن وميتعبن اني مابيه اشتغل ومحد كلفني بشغل بيتهم حيل جبير ومرتب..صح هو ابستان بس كولش عجبني البناء كوله حديث الحمامات مرتبه..والغرف
سيراميك لنقاط الكهرباء والبنات ينطفن طول النهار وعدهم غرف بره كولش كبار مفروشات ومرتبات حيل والبخور معلوك من الصبح لليل الغرف الكبار بعيدات عن غرف العائله كل غرفة مساحتها يمكن 100متر يسموها مضيف ..وخطارهم مستمر اتعجب عليهم يذبحون طليان اذا يجيهم شيخ لو شخصيه معروفة..احنا منشوفهم بس اسمع البنات يسولفن ع الخطار..والبنات كولهن يعرفن يخبزن ويطبخن..اني بس اتفرج..واكو شغلات هم استغرب الها..البنات يخافن حيل من خالد بس بنفس الوقت يحبنه ويحترمنه ويسولفن بيه حجة خالد وكال خالد واذا شافنه يرجفن منه رغم هو ميتواجد يمهن هوايه مشفته فد يوم كعد ويه اخواته سولف وضحك لو اتناقش وياهن يجي من بره لو يصعد لغرفته بعد مينزل الا لو للحمام..لو يكعد يم عمي بالمضيف..لو ياخذ عمي ويرحون مشيات ما اعرف شيسموها..شخصيته غريبه بس الشهادة لله بس اشوفه ولو من بعيد عبالك اجاني وراح يقبض روحي حيل اخاف منه..ومرت الايام واجه موعد عرس فاطمة لان هي عاقدة ومنتظرين بس الحنه والزفة..خطيه معدهن البنات موبايلات بس اني عندي موبايل مكنكة بيه ع الشريحة افتح ماسنجر احجي ويه صديقاتي..لو فيس اتصفح بالكروبات وفاطمة هم عدها موبايل نوكيا اشترا الها خطيبها حته يتخابرون بسكوت..
انتظروا بارت3