العنب_العنب_العنب(مكتملة)

بس الليلة ضلي بحضني♡♡♡

#العنب_العنب_العنب

البارت8

ورود الخالدي
خالد:::

طردتها من غرفتي..احس راسي راح يطك فكري انشل..شسوي..يربي شسوي..اخذها للبستان واكتلها وادفنها صدك..بس لو اريد اكتلها..ليش..ما كتلتها..توها جانت بيدي..ليش من خنكتها وشفت روح تفرفر..طاحت دمعتي وركضت خليت اذني على كلبها..وانفخ بحلكها اريد اردلها النفس..ياالله ما اكدر ما اكدر اكتلها..مو شغلة حب وعشك بس..ايدي ماتاخذ عليها..ما اتصور روحي كاتلها بيدي..جا شسوي..شسوي اروح اكل لبوي اخلي يطكها جيلة ويكتلها..بس ابوي شيخ ..ومعروف ولو كتلها ماتنظم السالفة راح ننشهر..وننفضح..ونصير مكصة للوادم..جا شسوي..تكول..اغتصبني..يعني مو من رضاتها..يعني كاسرها بالكوة..فكرت..اني مو ذيج الليلة ردت اكسرها لو ما تتنخى بغيرتي..ومروتي وعرضي..هم ردت اكسرها..بس الله ستر وعفتها..تكول ماكدرتله ..اخذني بالكوة وماكدرتله يعني ما الها ذنب..يعني اذا كتلتها هاي عدالة الله..يعني هم هي ضحية جلب من جلاب بغداد اخذ وجهها وذبها..وفوكاها تنكتل بلا ذنب..واذا مذنبه شني ذنبها..ادور على ذنب شو ماجاي اعرفة...خطية تكلي ماعندي غيرك..تبوس بيدي تكلي لاتكتلني..استر عليه ولاتفضحني..تكلي اتزوجني وخليني خدامة جوة رجليك..شسوي يا الله شسوي صح ما الها ذنب بس الشرف عزيز..والناس ماترحم وماتعرف..اغتصبها..ذاك الجلب اذا انفضحت..تدمر..دمار.واذا كتلتها ما تستاهل..ما الهاذنب..ضليت كاعد للصبح افكر فكرة تاخذني وفكرة تردني..من صار الصبح قررت اخر قرار
رحت لبوي كتلة:

بوية اريد اعرس!

اي بويه هاي الساعة المباركة..كلي بوية حاط عينك على بت كلي باهلها اليوم امشي عليهم..واذا ماحاط عينك اخلي امك ادورلك على بت حلال.

بويه لاحاط عيني ولا ادورلي امي..انه اريد بت عمي حسين

بت عمك حسين!!!بس بويه هاي تدرس بالكلية
خاف ماتوالمك؟

بوية ياكلية يابطيخ اخذها وابطلها؟؟

بويه ليش ماتشوف غيرها...خاف ماتتوالمون..

بويه شني مانتوالم بت عمي واريدها دمي ولحمي خو ما انطيها للغربة؟؟
بكيفك بوية اليوم احاجي عواطف..تاخذ رايها..ما طولها هنا؟؟

بويه شني رايها..الخميس اخذها

هاي الاصول لازم ناخذ راي البت..واذا رضت الخميس ازفها..والله..لسويلك عرس لاصار..ولاتصور..

بويه لاعرس ولادوخة بيناتنا تسوي عرس زغير وفيمالله

ولك تحجي صدك جذب ولك انته وحيدي..شلون عرس زغير والله لخلي الناس تسولف بعرسك سنه ورة سنه..

بكيفك بويه...

طلعت من يم ابوي احس حلكي متروس دم..روحي لايجة..فكرت كلت هذا احسن حل..اخذها شهرين 3واطلكها..بس مجرد استر عليها وماتنفضح..بس ما امد ايدي ولا انام وياها ما اجيسها لان كلبي انطفة من يمها وروحي جزت..بعد ما اكدر..اخليها مرتي صدك..جانت حلم صدك عشكتها عشك مخابيل..بس كلشي راح كلشي  انتهه وبعد مايرجع..