تنهد جبل بغيظ ، وهو كايفكر ... لهاد الدرجة ماعندو كلمة عليهوم !!،... كل واحد كايدير لي بغا على حسب هواه كايلعبو ويجريو بحال لبراهش ... لكن هاهو رجعلهوم وغادي يوقف هاد المهزلة وغادي يحط النقط على الحروف باش كل واحد يعرف مقامو من هنا لفوق ،.. وزيد عليها ديك مولات شعر لحمر لمشكرد على شوفات دارت فيه ، عاجبها راسها وزايداها بطنيز ... واخا كون سرقلها رزقها كون دارت بحساب اليوم لي جمعهوم على اليخت ، ولكن بنادم دغيا كاينسا لخير .
طرد جبل دوك الأفكار من عقلو و دخل لڤيلا كونتيسا وهو داير يديه فجيب بنطالو الضيق وطلع لغرفتو
وغير حوايجو وهاد المرة لبس كبوط أزرق فاتح لاصق على جسمو الرياضي وبارز كل معالم عضلاتو الضخمة لكن مايمكنش تكتمل أناقتو إلا ما أضافش عليها اللون الأسود ، فكان السروال هو صاحب هاد الشرف السموكي ...
خرج من الغرفة وتوجه لمصدر الضحكات فصالة الطعام الرئيسية ولي هي أضخم من مجرد صالة أكل ... كانت الخادمات الإسبانيات كايجهزو سفرة الأكل بينما دون ماركيز و عصام ورافاييل وحتى أسية لي جات من بعد وروعة وتاليا كانو چالسين فالصالون المغربي لي فالقنت ديال الصالة وكايهضرو ويضحكو ، وغير دخل جبل سكتو كاملين وشافو فيه .
علّى جبل حاجبو بإستغراب وقال:
- مالكوم سكتو ؟
ناضت آسية وسلمت عليه بحرارة وهي كاتقول :
-على سلامتك سي جبل.
جاوبها ببرود وهو كايطلع ويهبط فيها:
-الله يسلمك.
ثم رجعت كلسة فبلاصتها وشافت فروعة وعلات حواجبها بإستغراب من تصرفاتو الباردة وكأنه ماشي جبل لي تعرفو عليه وسط البحر لكن روعة قلبت عينيها بعدم إهتمام فقال الدون ماركيز وهو كايضحك بتصنع :
-هه ... كيتي هولستون ...اه بغيت نقول أسية تبارك الله عليها قايما بالواجب فـ..
لكن قبل مايكمل كلامو قاطعو جبل وهو كايقول بصوت جليدي :
-من بعد الهضرة ماشي دابا .
تنحنح الدون ماركيز بإحراج بسبب القمعة لي دار ليه جبل وإكتفى الجميع بالصمت وهوما وكايشوفو فيه وفديك الهيبة وداك الغرور لي محاوطو من كل جيه .
-السفرة جاهزة
قالتها الخادمة "تيماء" فناض دون ماركيز وطلب من الباقين يشاركوهوم وجبة الغداء يعني عرض عليهوم بمناسبة هاد اليوم المميز برجوع جبل لڤيلة كونتيسا.
تقدم جبل وترئس السفرة و چلس وكان فجنبو دون ماركيز ورافاييل وقدام رافايل عصام وقبالتو تاليا وحداه روعة لي كانت كيتي ولي هي أسية قبالتها مباشرة .
وهوما فديك الحالة من الصمت دخل عليهوم ياسين وهو كايقول بصوت مرح :
- سلام عليكم
ردو عليه السلام كاملين وقرب من جبل سلم عليه وهو كايقول :
-مرحبا بيك فڤيلا كونتيسا اسي جبل
رد عليه جبل بجمود :
-ماتحتاجش ترحب بيا فداري .
شافو فيه كاملين بتعجب من طريقة الرد الغريبة ديالو فتنحنح ياسين بإحراج ومشا جلس قبالت روعة وفجنب اسية لي بتاسمت ليه بأنوثة وخجل.
كان فرحان بوجودو قربها لكن غير علا راسو وشاف فروعة كحل بلعمة فاش شاف إبتسامة المكر فعيونها وفكر انها غادي تفرشو مافيهاش الشك وغادي يسدق محشم مع حبيبتو أسية بسببها .
تمتمت روعة بدون صوت وهي كاتشوف فيه وكاتحاول تكتم ضحكتها :
-روعة روعة كلك روعة روعة روعة يا أحلى روعة
خرج فيها عينيه باش تسكت لكنها كملت :
-بانااات فاتايااات
مالقاش شي حل باش يسكتها غير أنه يزطملها على رجليها لكن مع الأسف الضربة جات فعصام لي غوت بربي لي خلقو وطلقتها روعة بواحد الضحكة شريرة بقا جبل غير كايشوف فيها.. ماعمرو شافها على وجهها ولا سمع رنتها خارجة من بين شفايفها . عجباتو ديك الضحكة وعشق ديك الشهقة لي كاتخرج بين الضحكة والضحكة ...
-هاهاهاهاها تسديدة موقفة وكوووول.
وكملت وهي كاتفرشخ بالضحك بينما بقاو كايشوفو فيه لوخرين مافاهمين والو ومع ذلك كايضحكو.....
سرط عصام الدغمة لي كانت فمو بسيف وقال بسخط:
-شوف فين كاطلق رجليك اصاحبي !
تمتم ياسين بتوتر :
-سمحلي أعصام .
لكن روعة تدخلت وقالت بسخرية :
-كان باغيها فيا أنا لكن جات فيك الفقير .
عقد عصام حواجبو وقال :
-علاش كنتي باغي ضربها شنو دارتليك هاد القملة عاود؟
خرجت عينيها فعصام وقالت :
- يااااااا .... شحال من مرة كانقولك أنا ماشي قملة .
شاف فيها عصام بسخط وقال وهو كايشوف فياسين:
-شنو دارت ليك عاوتاني ... راني كانجمع ليها الزبايل من شحال هادي وجاء وقت الحساب .
بسرعة جاوب ياسين فاش شاف روعة مطرطقة عينيها فيه :
-والو مادارتلي والو !!
وكمل بصوت منخفض وهو كايشوف فيها بغيظ:
-نساي أمر الرهان أنا ماغاديش نوقف معاك وماغاديش نتراهن عليك .
خدات روعة نفس طويل و تشاورت مع إبليس ثم قالت وهي كاتشوف فأسية :
- واش مالاحضتوش أدراري أن كيتي أقصد أسية
لكن قبل ماتكملها جمع معاها ياسين بضربة لرجليها خلاتها تعض على شقتها السفلية و تكتم الغوتة بسيف عليها وهادشي كامل تحت الأنظار ديال جبل لي حس براسو غريب وسطهوم .
لاحظ أنهم كونو صداقة قوية بيناتهوم فالوقت لي كانت هو خارج الدائرة ... تمنى لو أنه حتى هو تعرف عليهوم كثر يمكن كون دابا شاركهوم الهظرة والضحك بدل ماهو ساكت وكايشوف فيهوم مافاهم والو ، فاتوه بزااف ديال الأمور وهادشي لي توضح ليه من خلال تصرفاتهم العفوية .
تحسست روعة رجليها بألم ثم نفثت الهواء من فمها بسخط و شافت فياسين بنظرات الإنتقام وقالت:
- دراري بالنسبة لأسية وياسين.
شافت فيها أسية بإستفهام كاتسناها تكمل وشاف فيها ياسين بتحذير الا نطقات بشي كلمة غادي يقتلها
فضحكت روعة بشر وقالت :
- تاليا ...عصام ... رافاييل... ومانساش دون ماركيز
لاحظ جبل أنها إستثنت إسمو لكن تصنع الا مبالاة وكملات روعة وهي كاتشوف فيهوم بمكر :
- هل تفكرون فيما أفكر أم أنا أفكر فيما لا تفكرون أم أن التفكير يفكر في فكرة تفكرنا في الأفكار التي نفكر بها!!!!
شافو فبعضياتهوم بإستفهام مافاهمين والو ونطق ياسين بتوتر قبل ماتزبلها :
- 100 يورو
قلبت روعة عينيها بالرفض وقالت:
-اممم خليها 500
-اشنو
-لساني أياسين لسااااني كاياكلني ومكايستحمش الأسرار .
شاف فيها ياسين بغضب وقال :
-صافي واخا ، يعطيك موصيبا
ردت عليه بغيظ:
-تصيبك إنشاء الله
شافت فيهوم أسية وقالت بإستفهام:
-علاياش كاتوشوشو نتوما ؟؟..أنا لحد الأن مافاهما والو !!
جاوبوها لي كالسين على الطبلة كاملين :
-وحتى حنا مافاهمين والو !!!
لكن تدخل ياسين باش ينقد الموقف وقال وهو كايضحك بدون فكاهة :
- واش ماعارفينش هاد لهبيلة راه بعد لمرات كايهرب ليها لفريخ
وافقاتو روعة الرأي ماعندهاش مشكل ينعتها بالهبيلة إلا كان غايحط 500 يورو فالرهان على قبلها.
-اه اه ... اوييلي ماتديوش عليا ،... كملو ماكلتكوم بالصحة والراحة .
وداكشي لي كان كل واحد تلهى فالصحن ديالو وغير اصوات لمعالق والصحون لي كايتسمعو ونظرت الحب بين آسية وياسين عصافير الحب ... حتى قرر رافايل يقاطع الصمت فاش قال وهو كايتفحص الجريدة الإليكترونية لي فالهاتف ديالو :
-اخر الأخبار ولات مملة ، مافيها حتى حاجة لي كاتلفت الأنظار ... وماكتبوش گاع على لي وقاع بين المافيا والإنتربول فالسيمانة لي فاتت فديك المداهمة لي دارو لمصنع تزوير الأموال .
تأفف بإزدراء فاش حتى واحد ماداها فيه وحط التلفون ديالو وشاف فجبل لي دارليه إشارة بعينيه كاتعني "من بعد " وشاف فروعة لي كانت كاتاكل بشراهة بإمتعاض وحنى راسو وهو كايقلب فعينيه بغيظ ... لكن دون ماركيز كان حاس بالغضب ديالو من روعة وعصام فقرر يهضر باش يكسر الصمت .
-روعة .. كايبانلي خصك تبدلي لون شعرك ... رجعله أسود كيف كان من قبل ، كاينا ولا لا ااسية.
شافت فيه أسية وقالت بإعتراض:
- لا أنا مامتافقاش معاك اسي دون ماركيز ... هاد اللون لي فشعرها كايعطيها الحيوية لملامح وجهها وكايزيدها جمال.
إبتسمت روعة بتأثر وقالت:
-اووووه حبيبتي ، يخليك ليا عويناتك لي زوينين ماشي بحال شي ناس ماكايعرفوش فالدوق .
حس دون ماركيز براسو تقمع فحنا راسو على الصحن ديالو وهو كايتهرب من نظرات جبل لي كايدرها فيه :
قالت اسية بسخرية فاش تفكرات شئ مهم :
-مازال نعقل على النهار لي خسرتي فالتحدي الأكل الحار مع عصام اروعة ... مرمدك هاهاها
قلبت روعة عينيها بغيظ وقالت :
-ماشي وقتو ااسية.
ضحك عصام وتاليا ورافاييل وهوما كايتفكرو نهار لي جابو أحر نودلز فالعالم ودارو تحدي لي غادي يساليها الأول وغادي يصبر على لحرور ديال النودلز يحكم على الخصم بلي بغا لكن روعة خسرت وأصبح الحمام هو مزلها الثاني على طول اليومين وجاوها لبواسير من بعد وكان الحكم لي عطاها عصام هي تصبغ شعرها فاللون لي بغا هو .
قال عصام وهو كايموت بالضحك:
- كون شفتي وجهها كيف كان أياسين ولات بحال مطيشة ديال الحك.
قهقه ياسين ورافايل بأعلى صوت على روعة لي كانت كاتشوف فيهوم بعيظ وكاتوعدهوم بالإنتقام بالأخص ياسين .
قال ياسين وهو كايشوف فيها وكايحاول مايضحكش:
- ولات داخلا خارجا للحمام هاهاها ... ولكن الزوينة هي فاش صبغليك عصام شعرك بيديه شبعنا عليك ضحك داك نهار .
قلبت روعة عينيها وقالت وهي كاتخنزر فيه :
-ايوا صافي باراكا من ضحك راه ضحكتو داك النهار بما فيه الكفاية .
لكن رافاييل هاد لمرة اصر يستفزها وقال وهو كايشوف فعصام:
-قولي أعصام كيفاش جاتك الفكرة ديال هاد اللون لي فشعر روعة !!
شاف عصام فروعة وكان متأكد ان لهضرة لي غايقول غاتخلي روعة تقتلو لكن ماشي مشكل اهم حاجة يضحك عليها شوية :
- عرفتي ارافاييل فداك نهار ديال التحدي عيطاتلي جداتي مسكينة فتلفون وهضرت معاها ،... فصراحة كنت متوحشها بزاف هدا علاش كونت باغي أي حاجة تفكرني بيها ،... فجداتي مسكينة شعرها شايب وملي كاديرليه الحنة كايولي برتقالي محمر .
غوتت روعة بصدمة وقالت :
- كيفاااااااش ؟؟؟؟..دابا أنا كانفكرك فجداتك!!!
هز عصام راسو وقال ببساطة :
-تماما ومن داك نهار غير كانشوفك كانتفكر جداتي مسكينة
تصدمات روعة من لي قال عصام بينما كولهوم بداو يضحكو عليها من حد حتى جبل غلباتو الضحكة واخا كان كايحاول يخفيها باش يحافض على مظهرو الجاد .. لكن روعة مارضاااتش وحست بالشمتة وفكرات تنتقم منو .
مكانش عندها شي حل اخر من غير انها تزطمليه على رجليه بمأخرة الكعب ديالها حتى غوت وهزت كاس ديال الماء وخواتولو على راسو ... خلات كولشي كايموت بالضحك عليهوم بجوج وحتى جبل بتاسم شوية فاش نتاقمت من عصام وخلاتو كايتأوه (يتأوه )بألم ، بحال شي بنت أول مرة غاتجيها الدورة الشهرية ...
-واخا غير بلاتي عليك ألقملة ... فالحلبة وريني عضلاتك غادي نعفس عليك بصبعي .
قلبت روعة عينيها بملل وماجاوباتوش خلاتو يتقلا غير بوحدو ... مرو بضع دقائق وهوما كاياكلو بصمت لكن تمتمت روعة وعصام لي كانو كايتوعدو بالإنتقام لبعضياتهوم كانت مخليا جبل معصب ... لكن لفت إنتباهو مشهد عصام لي وقف وجا مور روعة وتحنى عليها وهمس فأدنها بشي حاجة ، وهي هزت راسها بالموافقة ودفعات الكرسي للخلف ، فشدليها عصام فيديها وسحبها خلفو ، وهاد المنظر كان كافي باش يشعل نار الغضب فقلب جبل ...
لاحظ دون ماركيز غضب جبل وقال بسرعة :
-عصام فين غادين؟
جاوباتو روعة ببساطة:
-غادي يدربني باش نفرشخو فلعشية باقي غير ساعة على المبارة .
لتافت عصام وسحبها من يدها متجاهل نظرات دون ماركيز المحذرة لكن فجأة تسمعت ضربة على الطبلة تهزو معاها كاع طباسل لي عليها ، وخلات عصام وروعة يوقفو بصدمة وضارو يشوفو شنو واقع
شاف فيهوم جبل وقال وهو كايبرك على سنانو بغضب:
-من قلة الإحترام ، تنوضو من على الطبلة قبل مايسالي كولشي .
شافو كولهوم فبعضياتهوم بإستفهام ودهشة من ردة فعلو الغاضبة لي ماليها داعي ، صافي جوج شبعو وناضو اش فيها گااع .
شافت روعة فعصام بمعنى "شنو غانديرو" فإبتسم عصام بهدوء باش يغطي على الإحراج لي كايحس بيه وجرها لعند السفرة وقال:
- چلسي كملي ماكلتك
وكمل وهو كايشوف فجبل بهدوء متصنع:
-إلا سمحتيلي معليم ... بغيت نمشي عندي مايدار
شاف فيه جبل ببرود وعدم إهتمام ودارلي إشارة بيديه كاتعني " تحرك من قدامي"
تنحنح عصام بإحراج ومارضاش بالمعاملة لي دارليه قدام كولشي لكن مع ذالك تجاهل الأمر ونزل للقبو ودخل لصالة التدريبات وغير قرب من كيس الملاكمة عطاه ضربة قوية حتى تهز من بلاصتو وماكرهش كون ديك الضربة سددها فوجه جبل حيت فعلا زاد فيه...
بينما فالأعلى كانت روعة غير ساكتة ومربعة يديها وكاتشوف فالصحن ديالها ، فعلا كان الجو متوتر ومكهرب .
وضع جبل الشوكة من يديه فاش شاف روعة مكاتاكلش وغير ساكته وقال وهو كايمسح شفايفو بالمنديل :
-الحمد لله
تبعوه كاملين وضعو من يديهوم الماكلة وكأنهوم كانو كايتسناوه غير يسالي ... الهيبة ديالو كانت فايحة فالفيلة كاملة حتى أن شادو وسيزي ماتجرؤش يدخلو للفيلة وبقاو كايشوفو فيهوم غير من برة من خلف الزجاج .
- دون ماركيز ، تبعني للمكتب.!
قالها جبل وناض من على الطبلة ومشا بحالو خلاهوم كايشوفو فالضل ديالو عاد تنفسو الصعداء... بوحدو رافاييل لي مكانش مهتم ولا هاماه قسوة جبل وبرودو اصلا هو هاد العام ونصف كاملة ماتفارقش معاه... إلا ماتلاقاهش مباشرة كايهضر معاه فالتلفون وعلاقتهوم مزيانة أولاو أصدقاء مقربين بزاف .
شافت تاليا فروعة بهدوء وقالت :
-تقبريني ... ماتقلقيش من خويا اروعة ، هو هاكا غادي يخصو غير شوية ديال الوقت على مايولفنا وغادي يولي يتصرف عادي ...
ماهتمتش روعة لكلامها وفضلت تحافض على هدوئها فكملت تاليا وهي كاتقول وكاتشوف فيهوم كاملين:
-خويا قلبو كبير وإلا تقربتو منو غادي يعجبكوم ، وراكوم شفتوه كيف كان كايتعامل معاكوم فاش كونا فاليخت ... ماتاخدوش فخاطركوم وتقلقو منو يمكن عندو شي مشكلة معصباه؟!
ردت عليها أسية بإستياء:
-أنا كانفكر غير كيفاش غادي يتصرف معايا فالشركة ، واش غادي يعجبو داكشي لي خدمتو هادي عام ونصف ولا لا !!
قاطعتهوم روعة وهي كاتنوض من بلاصتها وقالت:
-سمحولي غادي نهبط ندرب شويا ...
أومأت تاليا وأسية بتفهم لرغبتها و تنهد دون ماركيز بإنزعاج وهز الكأس شرب منو شوية ديال الماء ثم ناض وتبع جبل للمكتب ديالو وهو كايدعي لله يدوز هاد نهار على خير ...
غير حل الباب شاف فيه جبل لي كان جالس على الكرسي الجلدي الأسود وداير إصبع الإبهام والسبابة تحت دقنو بينما خاتم الياقوت الأخضر متألق فإصبع الخنصر الصغير ...فقال بصوتو الرجولي الغليض:
-تقدر تقولي شنو هاد المهزلة لي شفت !!
رد عليه دون ماركيز بهدوء وهو كايتقدم باش يچلس على الكرسي المجاور للمكتب:
- مهزلة !!... اشنو كاتقصد؟؟
قرب جبل وشبك أصابعو فوق المكتب وقال بصوت مبحوح:
-أولا أسية .. شنو مازال كادير هنا ؟... ثانيا روعة شنو علاقتها بعصام ؟
قلب دون ماركيز عينيه بغيظ وقال :
- انت لو أنك كلفتي خاطرك ولو شويا وتاصلتي باش تسول فالخدمة وفينا ، كنتي غادي تعرف شكايديرو هنا ...
نفث الدون ماركيز الهواء من فمو بغضب وكمل بغيظ:
-نتا كاتلوحلي الأوامر ديالك ومن بعد يوماين كاتغبر و جميع وسائل الإتصال كاتقطعهوم مكانبقاو عارفينك لا عايش ولا ميت ... اش بغيتيني ندير ليك؟
تنهد جبل بهدوء ورد عليه:
-نتا راك عارفني ماعنديش مع قوة الهضرة فتلفون وزيد عليها أنا كانتيق فيك لدرجة تخليني مانحتاجش نراجع لخدمة موراك .
شاف فيه دون ماركيز بإستياء فاش لمح نظرة جبل العنيدة وقال ردا على سؤاله الأول :
-أسية إستعنت بالخبرة ديالها فالإقتصاد وبفضلها الشركة ديال العطور غادي تمام التمام ، وياسين نتا لي طلبتي مني نقنعو باش ينظم لينا .
-وروعة ؟
قالها جبل بجمود فرد عليه دون ماركيز ببرود مماثل:
-مالها روعة؟!
قلب جبل عينيه فاش شعر بالمماطلة لي كايديرها دون ماركيز باش يتهرب من موضوع روعة وقال:
-انا وصيتك قبل مانسافر وقلتليك عطيها لفلوس وشريلها الدار يعني خليها مديونا ليك ... قلتليك غرقها فالديون ومضيها على مستندات الإقتراض ... درتي هادشي ولا لا ؟
تنحنح دون ماركيز بتوتر وبدا كايكح بلعاني لكن فاش شاف عينين جبل لمطرطقين فيه تنحنح وقال:
- أحم ...فالحقيقة هي إنسانة ذكية كثر ملي كنت كانتصور لا أنا ولا نتا ..
سكت شويه فاش شاف نظرات جبل القاتلة وكمل بتوضيح:
- شوف ،...هي رفضت مني أي مساعدة مالية قدمتهالها ، حتى أنني ديتها لدار لي شريت على قبلها فالحي الراقي لكنها رفضاتها بقوة ومابغاتش تسكن فيها ، بحجت أنها ماعمرها تمد يديها لشي حد و مكاتبغيش تاخد الحاجة الباردة ولحاجة لي ماعراقتش عليها و بلا بلا بلا... فمكانش عندي شي حل أخر باش نشدها هنا على ماترجع من غير أنني نطلب منها تكون الحارسة الشخصية ديال تاليا ، لأنها كاتعرف شويا ديال الحركات الكاراتيه هذا مكان... ولكن ماشي هادشي لي خلاني نعرض عليها هاد الخدمة ،.... كيفما قلتليك انا غير درت ليها السبة بتاليا باش ماتغيبش على عيني على ماترجع ، واصلا أنا حاط حراسة ليها هي ولتاليا كايتبعوهوم فينما مشاو بلامايشعرو ، ..حيت هي مكاتبغيش تهز معاها السلاح ورفضات حتى تقيص فيه.. وحاليا هي ساكنة فواحد المنزل صغير ومتواضع وكاتبقى مع تاليا نهار كامل لكن مع 6 كاتمشي للخدمة ديالها الثانية ،... مؤخرا ولات كاتغني فواحد النادي كلوب ...
كرر خلفو جبل بإمتعاض
-نادي كلوب !!! اشنو قلتي كادير تما؟؟؟
رد عليه دون ماركيز بلا مبالات
-ماعرفتش ماسولتهاش ، يمكن كاترقص تما ولا كاتغني ؟؟...غالبا غاتكون كاتغني حيت عندها صوت زون ..
ضحك دون ماركيز وشاف فجبل وكمل:
-كانأكدليك إلا سمعتيه غادي يعجلك
قلب جبل علينيه بعدم إهتمام وقال:
-ماجاوبتينيش على أهم سؤال . شنو علاقة عصام بروعة.
تنحنح دون ماركيز بتوتر وقال:
- احم ... مجرد صداقة ... لا تقدر تقول أخوة ... هو لي تكلف بالتدريب ديالها بعندما قبلات تخدم معانا اولاو أصدقاء مقربين هذا مكان .
ضحك جبل بإستهزاء وقال:
-مكاينش شي حاجة سميتها صداقة بين الرجل والمرأة ، كاين فقط العاطفة ، العداوة و الحب... مكاينش شي علاقة بريئة بين بنت وراجل كيف ماكان نوعها فهمتي ...علاقة الصداقة بين الجنسين هي قصر مبني بالرملة ، بمجرد هبوب عاصفة بسيطة ، كاتعرى النوايا وكاتظهر المشاعر الحقيقية لمتخبية بين طيات الصداقة الوهمية . يعني ياإما هو كايبغيها ياإما هي... غير مالقاوش الفرصة فين يعتارفو .
تنهد دون ماركيز بقلة حيلة وقال:
-ماعرفتش شغادي نقولك !!!.. حتى لقلبهوم ماغانقدرش ندخل نشوف شنو مخبي فيه... ظاهريا كايبانو صديقين أما فباطن كل واحد منهم ربي لي عالم .
نفثت جبل الهواء من فمه بإمتعاض وناض من على الكرسي وهو كايقول:
- نتا ضيعتيلي الخطة لي كنت موجد على قبلها ، هادي أول مرة غاتفشل فشي حاجة كلفتك بيها اداوود .... خصك توضع شي حد لهاذ المهزلة
شاف فيه دون ماركيز بإستفهام وقال.
-بحالاش زعما !
رد عليه جبل بإصرار:
-ماعرفتش تصرف نتا ولقا لحل ، مازال عندي معاها مصلحة وفاش نسالي عندها حرية تحب ولا تكره لي بغات لكن دابا هي ممنوع تحب حتى شي واحد حتى نقضي غرضي
ناض دون ماركيز من بلاصتو وقال:
-انا غانموت ونعرف شنو هادشي لمهم لي مخليك دير ديك البنت فراسك
جاوبو جبل وهو كايشوف فلاشئ :
- عندها مقومات مناسبة لمتطلباتي زوينة وهذا هو الأهم
رد عليه دون ماركيز بغيظ:
-جواب مارضاش فضولي مع الأسف
قلب جبل عينيه بملل وقال وهو كاينوض من بلاصتو:
-الأمر غادي يكون سر بيناتنا انا وهي وإلا وافقت عليه عاد غادي نعلن عليه لكولشي وداكساع عاد غادي تعرف .
حرك رجليه ومد يديه فتح الباب وجا خارج لكن تفكر شي حاجة ورجع سد الباب وقال:
- سمعتكوم كاتهضرو على شي مبارة شنو كايعني هادشي؟
ضحك دون ماركيز وقال بمرح وهو كايشوف فالساعة:
- باقي عشرين دقيقة وغادي يبداو ... روعة وعصام غادي يتقاتلو فالحلبة هاد نهار ولي غادي يربح غادي ياخد جزء من فلوس الرهان .
عقد جبل حواجبو بتعجب وقال:
- عصام مع روعة ... داك جوج متر غادي يتقاتل مع نصف متر ، من نيتك ادون ماركيز !!! ، بعدا واش هي تقدر عليه؟
قهقه دون ماركيز وقال بسخرية:
-هاهاها...هي غير إلا زطمليها شي حد على رجليها بالغالاط كاتحمي السوق بلغوات ، اما إلا شافت سراق زيت عرفها غاتحرق الدار بلي فيها بقوة الخوف ... قول غير دافعة جبهة وصافي .. ولكن أنا متحمس نتفرج هاد نهار غادي يديرو لينا فيلم كوميدي غانشبع ضحك ...
كمل وهو خارج من الباب:
-أنا متحمس من دابا .....غانمشي نشوف شحال جمعو ديال لفلوس فالرهان ، وحتى نتا تقدر تراهن على واحد فيهوم ولكن أنا غانراهم على عصام ماعنديش إستعداد نخسر ابدا ، ديك القملة مافيها فايدا من غير لغوات .
خرج دون ماركيز وخلاه غير كايشوف وكايفكر فهاد المعادلة الصعبة ، وزيد عليها ماعمرو شاف شي تلميد كايغلب المدرب ديالو إلا إلى كان شي قلدة أما هي راه غير نصف كيلو كيف غاديرلها .. حرك راسو يمينا وشمالا ثم خرج وسد الباب وتمشى فالممر بكل رزانة وخيلاء باش يطلع لغرفتو يرتاح شوية ، لكن وهو فطريق كانت بابا من الأبواب مفتوح فيها غير النصف وكان كايبان ظهر روعة وسمع صوتها وصوت عصام.
برك على أسنانو بغضب وقرب من الباب باش يدخل عندهوم ينكدها عليهوم شوية لكن لفت ٱنتباهو حوارهم المثير للإنتباه فوقف خلف الباب باش يسمع لكمالة ديال الحوار وهو كايختالس النظر
كان عصام چالس ومبعد بين رجليه وروعة وافقة قريبا منو تقريبا بين رجليه وماداليه يديها ،.... كان كايلوي ليها العصابة على يديها بجوج وهو كايقول:
- واش عارفا شنو هي نقطة الضعف ديالي؟
عقدت روعة حواجبها بإستفهام وقالت:
-ماعرفتش شنو هي ؟؟
جاوبها عصام بجدية:
- رجلي ليسرية ، كان سبقلي تهرست منها ، ولحد الأن إلا قاصني ليها شي حد بقوة كانتقصح .
بقات روعة غير ساكتة وكاتشوف فيه بإستهجان ثم قالت:
-أنا ماعمري شفت شي حد كايقول للخصم على نقطة الضعف ديالو ؟
إبتسم عصام وهو كايشوف فعينيها بهدوء ثم قال وهو كاينوض :
-ولكن نتي ماشي أي خصم عادي .
ابتسمت روعة وضارت شافت فيه وهو كايجبد قفازات الملاكمة وقالت بجدية :
- شوف اعصام ، بغيت نلعب معاك بجدية مابغيتكش تتساهل معايا واخا نتا مازال مكاتأمنش بالقدرة ديالي على القتال ومكانعمرليكش عينيك ، ولكن كانأكدليك أنني قدها والله ، لهذا مكاين لاش تقولي على نقاط ضعفك خليني نكتاشفهوم بنفسي.
إبتسم عصام وقرب منها وقال وهو كايلبس ليها قفازات الملاكمة فاللون الأسود.
- نتي محتاجة لديك لفلوس كتر مني اروعة
إبتسمت روعة بحزن اوقفات على صباع رجليها وطبعت قبلة سريعة على خدو وقالت:
-شكرا حيت كاتفكر فيا يا أحسن عصام فالعالم .
شاف جبل داك المنظر وحس بالقلب ديالو كايغلي بالغضب والأعصاب وقال وهو كايحدث نفسو.
- أنا علاش ، كانحس بالغضب حتى لهاد الدرجة
لكن قاطعو صوت عصام لي تحنى لطول روعة وقرس خدها بلطف وقال :
-ونتي هي أحسن روعة فهاد العالم ... وماتعاوديش تبوسيني بهاد الطريقة باش مانعضكش
عقدت روعة حوابها بطفولية وقالت:
-وعلاش غادي تعضني .
عض عصام على شفته السفلية كايمنع نفسو باش مايضحكش ثم قال وهو كايبعثر شعرها بيديها :
-كتلة اللطافة ياروعة نتي ...كتلة من اللطافة قدها قداش .
تنهد جبل بغضب وضغط على أنفو باش يكبت نفسو لكن سمع صوت خطوات قرابين للباب فبسرعة فتح باب الغرفة لي فالخلف وتخبع علاما خرجات روعة وعصام من الغرفة عاد حل الباب وخرج وهو كايشوف فظهر عصام وروعة لي كانو فطريقهوم للخروج من الممر وقال بصوت حاقد:
- أنا لي غانستعمل نقطة ضعفك اسي عصام
تبعهوم للحلبة وغير حل الباب لقا كولشي مجموع وكالسين على الكراسي ديالهوم كايتسناو تبدا المبارة بينما ياسين هو الوحيد لي طالع صوتو وهو كايغوت بصوت متحشرج ومحرج :
"روعة روعة كلك روعة روعة روعة يا أحلى روعة "
كانت تاليا وأسية كايموتو عليه بالضحك بينما الحراس كايشوفو فيه بتقزز وكأنهم كايقولو " هدا مالو تحول لأدومة فجأة "
كان ماركيز حاط قدامو جوج سلات وحدا عامرا بلفلوس اوحدا فيها بحرا 500 يورو ديال ياسين و200 يورو ديال أسية وتاليا لي ناضو كايغوتو حتى هوما مع ياسين:
"روعة روعة كلك روعة ، روعة روعى يا أحلى روعة"
الهم الوحيد ديال روعة كان هو السلة ديالها لي كاتشوفها خاوية عكس السلة ديال عصام لي عمرت على الأخر ، هي محتاجة لهاد لفلوس باش تسيفطهوم للدكتور فالمغرب هذا علاش كانت مصرة دير مبارة مع عصام باش يجمعولها لفلوس وهي ماختارت عصام غير حيت عارفاه حنين عليها وماغايأديهاش بزاف عكس الحراس لخرين ..
شافت واحد من الحراس قرب من السلة وفيديه لفلوس وهي تغوت :
-هييي ... علي مورو .
ضار شاف فيها وهي تبتاسم ليه وكملت :
-غادي تراهن عليا ياك ...
طلع علي مورو عينيه فيها وهبط ثم قال بصوت غليض:
-لا مامستاعدش نضيع فلوسي ... شوفي مع إبراهيم بولوط ولا ارولف ولا دانيال .
ضيقت عينيها فيه وقالت بغيظ :
-ياك غير ديرها فين تجيك احنطوال ... مازال طيح بين يديا ونتفرج فخويا ..
قلب عينيه بغيظ وحط لفلوس فسلت عصام ورجع كلس بلاصتو مخلي موراه عينين روعة غادي ياكلوه ...ونفس الشئ دارتو مع بولوط وأرولف ودانيال وحتى واحد مابغا يراهن عليها من غير ياسين لي كانت مهدداه من قبل ولبنات حيت صحاباتها ...
كانت روعة وعصام داخل الحلبة كايديرو التسخينات لعضلاتهوم بينما الحكم لي هو دانيل كان واقف فالوسط بيناتهوم.
رفع يديه باش يعطيهوم إشارة للبدئ لكن صوت جبل قاطعهوم وهو كايقول بصوت مرتفع :
-بلاتي أدانيل .
توقف دانييل وضارو كاملين شافو فيه بإستهجان وهو كايطلع لفوق الحلبة وداز من حدا روعة وهو كايحاول يتجاهل وجودها لكن هي كانت كاتشوف فيه بإستنكار حيت قاطع المبارة بهاد الشكل .
قال جبل بصوت مرتفع :
-اش بان ليكوم فشي مبارة بيني وبين عصام ؟
بداو الهتفات ديال الرجال الحماسية بينما شافت روعة فعصام وبإستفهام وكأنها كاتسولو " شنو واقع " لكن عصام طمأنها وهو كايقول :
-احسن ليك أروعة حتى أنا مابغيتكش تتأداي ، لكن ماتخافيش لفلوس لي غادي نربح غادي نعطيهالك القملة ديالي .
غمزها بعينيه وسحب الفقازات من يديها وسط دهشتها حتى انه ماخلالهاش فرصة باش تعترض
كان جبل كايشوف فيهوم بنصف عين وهي كاتحاول تمنعو باش مايحيدش ليها لفردة الثانية ديال القفاز لكن عصام كان معاند وحيدهوملها بسيف عليها وخرجها برا الحلبة ...
شافت روعة فجبل بحقد ثم خرجت من الصالة وزدحات الباب موراها ... كرهاتو فديك اللحظة ، هو ضيعليها كولشي ، كانت محتاجة لدوك لفلوس باش تسيفطهوم للدكتور على قبل ماماها لكن جبل ضيع كولشي .
ابتسم جبل بمكر و قال بصوت عالي :
-غادي نعاودو الرهان ، لي غايتراهن عليا يحط فلوسو فالسلة ديالي ولي هي خاوية ولي غايتراهن على عصام يحط فلوسو فالسلة لوخرا
ناضو الرجال كايهزو فلوسهوم من سلة عصام وحطوها فسلة جبل ومابقا غير لقليل عند عصام لي تنهد بإستياء بينما جبل كانت الضحكة واصلة ليه لودنيه.... واخا هكاك ماشي مشكل لي غادي يربح هو لي غادي يدي كولشي .
شاف عصام فجبل وإبتسم بتحدي ورماليه القفازات لي كانو عند روعة فلتاقطهوم جبل وضحك وهو كايهمس بين نفسو :
-الأسود لوني المفضل
لكن حطهوم فالأرض وبدا يحيد فحوايجو باش يبين على ضخامت عضلاتو الرجولية وقال :
- خصنا شي صورة تذكارية لهاد اليوم لي غادي يكون اخر يوم ليك على هاد الحلبة اعصام.
شعر عصام بجدية كلامو رغم أنه كان كايتظاهر بالعكس لكن تجاهل الأمر وإبتسم وهو كايشوف فالكاميرة حتى لتاقطو ليهوم صورة وعطاهوم الحكم إشارة البدء.
كانت روعة كالسة برا و كاتحس بالحكرة فاش سمعات تصفيقات الحراس وهتافاتهم على جبل وعصام .
علاش زعما مايعطيوهاش فرصة حتى هي؟ ،... لهاد الدرجة كايستخفو بيها!!! ،... هي راها كاتدرب كل نهار وزيد عليها عندها مداليات تقديرية ملي كانت صغيرة ...،لكن هذا غير منصف ليها وغير عادل بتاتا ..
يعني واخا غلبها عصام شحال من مرة ، وفواحد المرة عطاها ضربة حتى فقدها الوعي ، لكن أهم حاجة أنها فاقت من بعد والأهم انها مافقداتش الذاكرة ،...
وحتى مرة وحداخرة فاش كانت كاتدرب على تقوية عضلات البطن عطاها عصام بضربة لكرشها ثواني من بعدها وتقياتلو على كمارتو ،... عادي ..، لكن هدشي كلو مكايهمش هي راه تقدر تقاتل عصام اش فيها ،؟؟!....
يعني هو.... يعني واخا داك لمرة زراقتلها عينيها بسبب لكمة عصام ، ولكن غير حيتاش جاتها على غفلة اما هي راها تفرشخو ،...
حتى نهار لي شافت سراق زيت دايز من حداها وبغات تهرب لكن تعكلات فجسد عصام لي كان كايدير حركات الضغط بيديه على الأرض وتضرب راسها مع لحيط حتى تهرست ليها سنتها ،... لكن ماشي مشكل راه صلحتها عند طبيب الأسنان ،... عادي ....، هادشي كلو مكايدلش على أنها ماتقدرش تهزمو ...
هزت راسها بالموافقة لأفكارها وقالت:
-اه بطبيعة الحال السنة صلحتها وعضلات كرشي قصاحو ومابقيتش كانتقيا ، فاش زايد عليا هداك سيهوم جبل فاش؟؟؟ ... عندو جوج بزولات نافخهوم بالمنشطات وشوك ديال مني البغل وكايتبومبا عليا .....، زعما غير هو لي عندو العضلات ....
رفعت راسها وكملت وهي كادعي للسماء على الله تكون مفتوحة وتستجاب دعوتها :
-ياااربي يغلبو عصام ويهرس شي ضرسة لداك البزناس لحشايشي ،... هاه بقات فزين ولعينين زرقين مخضرين ، باشار كيف داير .
_____________
نهاية الفصل