إلتفتت روعة بخوف وشافت فهذاك الغريب ، كان بطول المترين متكي على شجرة كيف الزرافة بطولها ... عدل وقفتو وقرب منها بخطوات ثقيلة ورزينة حتى وقف أمامها مباشرة ،.... فكانت روعة مضطرة تعلي راسها باش تشوفو وجهو لي نصفو مخبي تحت لحية كثيفة .
- عفوا أسيدي؟
إنحنى لمستواها ومد يديه الكبيرة وهو كايقول بصوتو الرجولي :
-عصام .... إسمي عصام الهاشمي ...أنا رفيق السيد جبل
شافت روعة فيديه لي ممدودة ناحيتها بتردد ثم تمسكت بيدو سلمت عليه وسحبت يديها بسرعة وهي كاتقول:
- حتى نتا سوري ؟
حرك عصام راسو بالنفي وقال بصوتو الخشن:
-يعني غير من لقبي غادي تعرفي انني أردني ماشي سوري
همهمت روعة بتفهم وقالت :
-همم عندكم لهجة مشابهة للسورية ، لكن كانحيك على براعتك فاللهجة المغربية
إبتسم عصام بهدوء وقال :
-يعني كانحاول نتأقلم معاها ، هادي اربعة سنوات وأنا عايش وسط لمغاربا هنا وسط الغربة فضروري ناخد منهم شوية من ثقافتهم ولهجتهم ...
شافت فيه روعة ثم ردت عليه ببرود:
-مزيان براڤو عليك
وقلبت عينيها بغيظ واضح معناه أنه قاطع خلوتها فماكرهاتش يا سيد عصام تتفضل من غير مطرود ... لكنو ماتحركش من بلاصتو وبقا كايشوف فيها ،.. تنهدت روعة في محاولة تمالك أعصابها ثم قالت :
-واش كاتسناني نصفقليك مثلا؟!
رد عليها عصام بهدوء :
-لا ولكن الأنسة تاليا والأنسة أسية لداخل كايقلبو عليك ملي وصلو .
همهمت روعة وقالت :
-اام فهمت ... تقدر تمشي شويا وغاندخل .
وقف عصام بطولو المهياب وقال بعناد :
-يعني لو دخلي دابا يكون أحسن ، لبرد عليك هنا غادي تمرضي.
شافت فيه روعة بتهكم وقالت بإستهزاء :
-شكرا على إهتمامك سيد عصام الهاشمي ، فاش غادي يقولهالي راسي غادي ندخل تقدر تمشي .
على عصام كتافو بعناد وقال. :
-أنا ماعندي مايدار ، غادي نتسناك حتى تسالي بالهضرة مع الشجر ونجوم والأرض ولبحر وعاد ندخل أنا وياك .
شافت فيه روعة بغضب وقلبت عينيها بغيظ وهي كاتقول فنفسها :
-ولايني موصيبا كحلا هادي تسلطات عليا ، كان ناقصني غير هاد عمود الإنارة يكمل عليا حتى هو .
فاش شافت أنه مصر وجاد فهضرتو وغادي يبقا واقف عند راسها بحال ملاك الموت إلى يوم يبعتون ، ناضت بغيظ اوقفت أمامو بتحدي ، كان فرق الطول بيناتهوم بحال السماء مع الأرض ،... شافت فيه فالأول بتحدي وبغات تسمعو شي كليمات قاصحين لكن فاش شافتو كايشوف فيها بملامح جامدة ماعليها حتى شي تعبير كايدل على حياة صاحبها فقررت تتراجع وسرطات لسانها بغيظ قبل مايعفط عليها عصام بصبعو صغير بحال شي سراق زيت فضولي ..
تمشات قبل منو وتبعها هو بجسمو الرياضي المنحوت تحت البدلة الرسمية السوداء.
دخلت روعة ولأول مرة غادي تعطي لعيونها فرصة تتفحص فخامة "ڤيلا كونتيسا" من الداخل بإضائتها القوية وروعتها .... شافت فعصام لي دارلها إشارة للصالة لي كانو فيها مجموعين .
تبعاتو لمكان الصالة وكان ياسين ودون ماركيز وأسية جالسين بينما تاليا كانت فغرفتها كاترتاح من قوة الدوران فمحلات المول من لي صبح الله .
-أنسة روعة ، تفضلي چلسي معانا .
قالها دون ماركيز غير شافها ، فإمتثلت روعة لطلبو و قربات من الكنبة لي كانو كالسين عليها ياسين وأسية وچلسات فجنبهم ...
لاحظت أن الجو مكهرب شويا بيناتهم ، فشافت فيها أسية وقالت بهدوء:
-كيف بقيتي شويا ؟ قالينا سي دون ماركيز أنك طحتي وتجرحتي فجنبك .
شافت فدون ماركيز بدهشة وتفكرات أنها وصات جبل يخلي موضوع حملها سر فأومأت برأسها مع إبتسامة خفيفة وقالت:
-أنا بيخير دابا ...شكرا .
شاف فيها ياسين بمكر وقرب من أدنها ثم همس بصوت منخفض باش مايسمعوهش :
-كانعتادر حيت فرشت موضوع حملك وكانتأسف على موت الجنين
شافت فيه بتعابير جامدة كاتعني "غير سكت شكوا بيك لله" ، وقالت فنفسها "تبارك الله عليك اسي جبل نتا لي نعولو عليك " ... تحنحنت بتوتر وهي كاتحاول تبتاسم باش تغطي على توترها ثم قالت:
-اه مكانتش شي طيحة قوية
شاف فيها ياسين بمكر ورجع قرب لعندها وهمس فودنها :
-واخا يكدب جبل ، أنا مايقدرش يكدب عليا حيت هادي هي خدمتي ،... أنا دزت عندك فصبح وراقبت حالتك الصحية
ضحكت روعة بتصنع وقالت:
-هاهاها ...ااااه شكرا بزاااااف ...
وكملت وهي كاتمتم بين سنانها بصوت منخفض :
-واش دابا الكلام الفاحش باغي تفرشني؟ ماتسرطش لسانك ودير فيا خير .
قهقه ياسين وقال بسخرية وغير بصوت خافت :
-عجبتني ديك الكلام الفاحش غادي نتسلفها منك مرا مرا نستخدمها مع لي يستاهلو الكلام الفاحش .
شافت فيه عقدت حواجبها بطفولية وقالت بصوت منخفض :
-ماتحاولش عندي عليها حقوق الملكية . راه نقدر نوصل مع خويا للحبس
قاطع همساتهوم أسية لي كانت كاتشوف فيهوم بغيظ طفولي وقالت :
-احم احم احم ... نحن هنااااا يا قوم ... فاش كاتكتمو ، شركوني باش نضحك معاكوم هاد شارف من صبح وهو يشوف فيا بحالي باغي ياكلني .
ضارو ياسين وروعة شافو فالدون ماركيز لي إبتسم ليهوم لكن قاطعهوم دخول جوج ديال رجال وجوج ديال البنات شقراوات ،... وقف الدون ماركيز باش يستقبلهوم ثم قرب لعندهم وسلم عليهوم وهضر معاهوم بالإسبانية ثم إلتفت عند لبنات وياسين وقال :
-هادو هوما لي غادي يتكلفو بيكوم .
شافو فيه كاملين بإستهجان مافاهمين والو فقالت اسية بفضول قاتل :
-باش غادي يتكلفو اسي دون ماركيز؟؟
شاف الدون ماركيز فالضيوف بإبتسامة عريضة ثم طلب منهم المغادرة و إلتفت عند اسية وياسين وروعة وقال وهو كايرجع لبلاصتو باش يچلس :
-باش نكونو واضحين مع بعضياتنا نتوما بثلاثة هاربين من جرائم إرتكبتوها .
شافو فبعضياتهوم بصدمة مامتيقينش شي لي قال داوود لكن كولهوم دخلت عليهوم شويا ديال الراحة النسبية بما أنهم جميعا سواية وكلهوم مزبلينها .
كمل داوود وهو كايقول :
-وأولهم نتا أياسين بلا مانقول شنو هي التهمة ديالك قدام لبنات.
توسعو عيون ياسين بصدمة وقال بتوتر وهو كايتمتم
- أشنو كاتقول؟ انا ...
لكن دون ماركيز قاطعو بصوت ثابت :
-مكاين لاش ندرقو الشمس بالغربال... نتا اياسين متهم بجريمة القتل الغير عمد ...
وكأنه قال غير دابا واحد شويا "بلا مانقول شنو التهمة ديالك" لكنه بزلها دابا وحطهالو فالوسط ...
كمل الدون ماركيز وهو كايدير رجل فوق رجل بخيلاء :
- ونتي أاسية متهمة بالسرقة ... ونتي اروعة
فاش سمعت روعة سميتها توترات وشعرات بالقلب ديالها كايدق بسرعة من شدة الخوف ..
-نتي متهمة بالضرب والجرح والقدف بالإضافة الضحية ديالك مازالة فغيبوبة وإلا ماتت الضحية غادي تكوني متهمة بجريمة قتل عن سابق إصرار وترصد. وعقابك هو الإعدام.
طاحت عليها هضرت دون ماركيز بحال الساعقة وهذا إلا كان كايعني شي حاجة ، فهو كايعني أن عائلتها ساقو لخبار لموضوع حملها ،...أكيد هوما غادي يكونو كايلعنو فيها واكيد هوما دابا غادي يكونو نكروها وكرهوها بسبب شي لي دارت ، ماكفاهاش المصيبة لي دارت جايبالهوم كرش من لحرام وزادتهوم حتى شكاية ضدها وإحتمال تولي قاتلة إلا ماتت الضحية .
شهقة بالخلعة و بدات كاترجف من شدة التوتر وقالت وهي كاتحاول تسيطر على نفسها:
-أنا والله ماكنت قاصدة نأدي فيهوم شي واحد ، كانقسم ليك اسي دون ماركيز
جاوبها دون ماركيز برزانة وهو كايقول :
-نتي مامضطراش تشرحي لينا حتى شي حاجة ...وحتى نتوما ..
شاف فيهوم كاملين فكان كل واحد فيهوم حاني راسو بإحراج مخلط بالخوف والترقب ..، تنهد دون ماركيز وقال:
-نتوما مامضطرينش توضحو كيفاش وعلاش حيت هادشي كايرجع ليكوم ولخصوصياتكوم ،....حنا كلنا رتاكبنا أخطاء فيوم من الأيام ومانستتنيش نفسي فأنا أول الخطائين ... هذا علاش ماغانحاسبكمش وماغانبلغش عليكوم للشرطة .
شافو فيه كاملين بإمتنان وقالو فدقا وحدا:
-شكرا ليك بزاف
ابتسم داوود بمكر وقال:
-و لكن بشرط
فشافو فيه بثلاثة مستنين يسمعو هاد الشرط بفضول فكمل وهو كايقول بصوت جامد فيه كل معاني الجدية .
- غادي تكونو عملائنا
شافو فيه كاملين بإستفهام وقالت أسية بإستنكار لكلامو :
-كيفاش يعني عملائكم !!!.... و شكون نتوما؟
إبتسم دون ماركيز بمكر وقال:
-حنا!!!! .... حنا هوما حنا
حنا هوما حنا ... هو نفس الجواب لي قالو جبل فاش سولاتو نفس السؤال لي طرحاتو أسية على الدون ماركيز وبدا كايدخلها الشك فهاد الناس فقاطعاتو روعة وهي كاتقول بسخط.
-الكلام الفاحش ، إلا كنتي باغي تستغل موقفنا الضعيف لصالحك ، خليني نقولك خرجني من حسابك باش نكون ضريفا مع خويا .
✅93✅
توسعو عينين داوود بدهشة من طريقة كلامها ثم ضحك بسخرية ورد عليها:
-هاهاها ... نتي بالضبط لي محتاجينك
ضيقت روعة عينيها فيه ردت عليه بغيظ :
- الكلام الفاحش إلا صورتي مني شي خصيتين اسي دون ماركيز .
إنفجر داوود بالضحك هو وعصام بسبب لي قالتو ورد عليها وهو كايحاول مايضحكش :
- اااخ يا جبل وما يهزك ريييييح ... كيف دار حتى تفاهم معاك غير فهميني .
تجاهلاتو روعة بسخط ولتافتت عند اسية وياسين وقالت:
- سمعوني مزيان ، أنا لبارح لقيت فاليخت ديال مرزوق عرام دلخشيش مسطوكي فالحيط ديال الغرفة تحتانية لي فاليخت ...، ودابا كانضن راه واضح المعنى ديال العملاء عندهم شكاتعني!
سكت الدون ماركيز وعصام من الضحك وتصدمو بينما توسعو عيون ياسين وأسية بغير تصديق :
-واش هادشي بصح أسي دون ماركيز ؟
قالها ياسين فتنحنح دون ماركيز ومد يديه عدل الكرافاطة ديال عنقو ثم قال :
- أه بصح
ضحكت أسية بإستهزاء وقالت :
- ونتا باغينا نبيعوه ليك ...، هادشي لي باغي ياك على خر يامي نولي نبيع لحشيش.
شاف فيها الدون ماركيز بحدة وقال :
-كايبانلي تبيعي لحشيش بعرق بكتافك حسن ماتسرقي رزق عباد الله .
✅94✅
شعرت أسية بالإحراج وقلبت عينيها بغيظ ثم كمل داوود كلامو بهدوء
- نتوما ماعندكم علاقة بهاد الشي كامل .
شاف فروعة وكمل:
- الأنسة روعة غير كاتسبق الأحدات وكاتخرج العيب الله يسمح ليها.
قلبت روعة عينيها بغيظ وكمل دون ماركيز وهو كايقول:
-بالنسبة للدكتور ياسين .... حنا محتاجين نستافدو من خبرتك الطبية فالأوقات المستعجلة لأننا فالحاجة لطبيب يكون ثقة
شاف فيه ياسين ببرود وقال:
-كاتقصد طبيب شادين عليه زلة باش يعطيكم الثقة بزز منو
بادلو الدون ماركيز نظرة مماثلة وقال:
-تماما . وفالمقابل غادي تحصل على هوية جديدة بإسم جديد وجنسية جديدة ورخصة باش تقدر تخدم فالمستشفيات العامة بحالك بحال أي طبيب وإنسان عادي مامتبوعش من طرف الشرطة .
تنحنح ياسين بتوتر ،... وفكر أنه إلا رفض عرض بحال هذا فهو غادي يكون أكبر غبي ولداتو البشرية لحد الأن . فتنحنح وشاف فلبنات بتأسف وقال :
-احم .... فالصراحة عرض بحال هذا صعيب الإنسان يرفضو ....
شافو فيه لبنات بصدمة مامصدقينش وإبتسم دون ماركيز وقال:
-جوابك ؟؟
إبتلع ياسين ريقه بتردد وجاوب :
-أنا موافق
توسعت إبتسامة دون ماركيز وعصام بينما شافو لبنات فبعضياتهوم بحيرة ،.. ياسين من حقو يقرر لي بغا فحياتو وحتى واحد ماعندو الحق يتدخل ولو بنصف كلمة ، إكتفو لبنات بنظرات صامتة معبرة عن إستيائهم وماهضروش.
✅95✅
إبتسم داوود بهدوء ثم شاف فأسية و قال :
- سمعت أنه عندك إجازة فالإقتصاد أنسة أسية
صدمات شافت فيه بدهشة وقالت:
-كيفاش عرفتي هادشي واش قلبتو فحوايجي؟
وضع دون ماركيز رجل على رجل بخيلاء ورد عليها:
-مانحتاجش نقلب فحوايجك باش نعرف معلومة بسيطة بحال هادي
شافت أسية فروعة بتوتر وكمل دون ماركيز وهو كايقول
-حنا في صدد تكوين شركة لتصنيع العطور ومحتاجين اشخاص خبرة وثقة فتسير أمور الشركات .
إبتسمت أسية بمكر وقالت :
- إلا جات على الخبرة فأنا زيرو خبرة حيت ماعمري خدمت فشركات على أرض الواقع ، أنا فقط قريت على الإقتصاد راجع معلوماتك اسي دون ماركيز .
همهم داوود وخدا وقت فالتفكير قبل ما يوقف ويقرب منها :
-اجي معايا...
قالها و سحب أسية من دراعها موراه ثم حل باب البالكون الزجاجي ودخلها وسد الباب وسط تعجبها وإستغرابها من تصرفو الغريب ،... شاف فيها وقال بهدوء :
- مكاتهمنيش الخبرة ديالك ، لأن الشركة هي فقط الإسم لي غادي يغطي على إنتجاتنا الحقيقية .
ضيقت عينيها بتشكيك وقالت:
- ولي هي ؟
-مكاين لاش تعرفي التفاصيل بما انك مازال مابينتيلي على الرغبة ديالك فالإنضمام:
تنهدت أسية بضجر وقالت:
-فالضروف لي أنا فيها مستاعدة ندير لمستحيل باش نوقف على رجلي ... ، لكن إلى كانت الشركة لي غانسيرها أنا ونحسن سمعتها فالسوق المحلي والعالمي وتجيو نتوما فلخر ضربولي كولشي فالزيرو وبدل ماتشارجيو العطور لي غاتنتج الشركة تشارجيو لحشيش و المخدرات فأنا مامستاعداش نتورط معاكوم فحاجة بحال هادي انا باغيا نخدم فلحلال .
ضحك دون ماركيز بسخرية وقال:
-عافاك ماضحكينيش ،... مادغدغيش مشاعري فالهضرة على الحلال ولحرام ، حيت نتي اخر وحدا تفكر فلحلال ونتي سارقا عرام دلفلوس لماليهوم داكساع ماكنتيش كاتفكري فلحلال ولحرام ياك؟!
شاف فيه أسية بغضب وقالت:
-نتا ماشي سوقك سمعتي ،... خير الخطائين الثوابين ، انا بواسطة ديك لفلوس وصلت لهنا وإنشاء الله غير غادي نجمع شويا منهوم غادي نردهوم لماليهوم وفوق منهم بسخاوة .
✅96✅
تنهد دون ماركيز وقال بهدوء:
- متافق معاك مئة في المئة ، خير الخطائن الثوابون ، لكن كوني متأكدة أن تخمينك بشأن لحشيش خاطئ تماما ،... حنا مكانتعاملوش بداك لوسخ وداكشي لي شافت روعة ، كان مجرد توصيلة لأحد أصدقائنا لا غير .
شافت فيه أسية وقالت بعناد:
-إلا ماقلتيليش شنو هي هاد البضائع لي غاتهرب مع العطور ماغاديش نقبل هاد العرض ديالك المغري .
سكت دون ماركيز شوية وتفكر ، شحال وصى فيه جبل باش مايفرش مسئلة المعادن والأحجار الكريمة لحتى واحد لكن مع ذالك قال بتردد :
-غادي نقولك هاد السر لكن غادي نكون مضطر نقتلك من بعد
علات أسية حواجبها بتحدي وقالت:
-مكايهمنيش.
تنهد دون ماركيز وقال بعد تفكير:
- الأحجار الكريمة والمعادن ، كانضن أن هادشي ماشي حرام ومكايضرش بصحة ديال الشباب كايضر غير جيوب الأغنياء .
إبتلعت اسية ريقها بحيرة وقالت :
- كاتقصد الذهب والؤلؤ والألماس وماشابه .
- تماما
-وعلاش باغين تهربوهوم؟؟
-حيت ماعندناش إستعداد نخلصو الضرائب الباهضة ديالهوم للدولـة .
عقدت اسية يديها لصدرها بحيرة ثم قالت:
-واش تقدر تعطيني شويا ديال الوقت باش نفكر ؟
شاف فيها وهمهم وهو كايتمنى مايضطرش فعلا يقتلها إلا رفضات العرض بعدما حكالها على مشروعهوم جديد
-أنا غادي ندخل لداخل ونتي فكري بشوية عليك لكن فاش تخرجي نبغيك تكوني متاخدة قرارك ....ونزيدك حاجة أخرى موضوع البضاعة تبقا سر بيناتنا وإلا راكي عارفا.
أومأت أسية براسها بالموافقة ثم خرج دون ماركيز وخلاها بوحدها تفكر ، كانت روعة چالسا على أعصابها وكاتحس بالتوتر الشديد وفاش خرج دون ماركيز وقفت روعة وقالت:
-شنو قلتيلها؟ شنو هو هاد الموضوع لي مايمكنش لينا نسمعوه كاملين ؟؟
إبتسم داوود بمكر و بغا يجاوبها لكن قاطعهم صوت أسية فالخلف وهي كاتقول :
-أنا موافقة
ضارو لعندها بجوج شاف فيها دون ماركيز بإبتسامة وشافت فيها روعة بدهشة مامصدقاش لي سمعاتو ،... حست بالخيانة لكنها رجعت فكرت انها اصلا ماعندهاش لحق تغضب ولا تنفعال على أسية حيت هوما كايبقاو ناس غرابين عليها كايتحملو مسؤلية نفسهم هي نصحتهوم وهوما أحرار يصدقوها ولا لا ... وإلا قبلو هوما يخدمو مع أشخاص سيئين بحال هادو فهي مستحيل تقبل .
✅97✅
- بقيتيلي غير نتي أمدموزيل روعة .
قالها الدون ماركيز بإبتسامة فشافت فيه روعة وقالت بسخرية:
- لسوء حظك اسي داوود انني مانفع لوالو بالنسبة لخدمتكم الموقرة فالعطور والحشيش .. ماعنديش اجازة فالاقتصاد بحال لالة أسية ....
بركت على اسم اسية وكملت :
- كل لي عندي هي شهادة عليا متخصصة في مجال الفنون التشكيلية البصرية و التطبيقية , عندي مع لجرافيك والرسم والنحت والتصوير يعني عندي من كل فن طرب ... بالاضافة للموهبة لي عطاهالي سيدي ربي وهي صوتي .... انا مغنية محترفة وبشهادة عائلتي واصدقائي وكانعرف نعزف على البيانو باحترافية ... يعني مع الأسف مانقدر نفعك فوالو .
شاف فيها دون ماركيز بابتسامة مندهشة وقال بدون شعور :
-واااو عندك هادشي كامل وكاتقولي مانافعا فوالو , نتي هي العميل التسويقي والفني للشركات بامتياز امدمزيل روعة .
قلبت روعة عينيها بغيظ وقالت :
-شهادة اعتز بيها منك سيد داوود لكن هانتا قلتيها مع الشركات ماشي مع لحشيش ...
شافت فيه بسخرية وقالت بإستهزاء :
- ولكن واخا هكاك انا عندي فضول نعرف هاد الطلب التعجيزي ديالك لي باغي تلوي بيه دراعي .
چلس دون ماركيز على الكنبة ثم قال وهو كايشوف فيها بهدوء:
-عيب تقولي بحال هاد الهضرة .
قلّبت روعة عينيها وقالت بغيظ:
-أنا لهضرة ديالي ماشي معاك ، مع سي جبل ... ياترى واش هو عارف أن خالو لعزيز تاجر مخدرات؟
✅98✅
هاد المرة جاوبها عصام لي كان كالس بهدوء وقال:
-هادشي كاااااامل لي كاتشوفيه أمدموزيل روعة ديال سي جبل وحتى حنا ديالو .
تصدمات فاش سمعات شنو قال ،... يعني داك لي كانت كاظن انه الملاك الحارس والرجل النبيل ...، سيد كامل الأوصاف ، طلع تاجر مخدرات ... لا لا ماقادراش تصدق ، رجعات الذاكرة للخلف وفكرات ان دون ماركيز جا حتى للخر يعني لي كان قبل هو جبل والمعنى هو ان البضاعة ديالو.... ولكن فاش سولاتو نكر ولسق التهمة فخالو ... كيفاش تغابات على أمر بحال هذا!!!!... علاش فينما كاتيق فشي حد كاتجيها موصيبا من بعد علاش !؟....، قاطع تفكيرها دون ماركيز وهو كايقول:
- سي جبل عندو طلبو الخاص منك لكن مابغاش يقولولي ، حتى يطلاقا بيك شخصيا .
چلست روعة بتعب على الأريكة وقالت بإحباط :
- فين هو دابا ؟ بغيت نشوفو .
رد عليها داوود ببساطة :
- جبل سافر فلعشية لجنوب أفريقيا ومامعروفش فقتاش غادي يرجع ممكن شهر ممكن شهراين ممكن عام ويمكن عماين .
تنهدت بإستياء وكرهت راسها حيت قدر شخص أخر يخدعها بمنظرو الملائكي ولسانو المنافق .... علات راسها شافت فداوود بسخرية وقالت :
-ياكما باغيني نهرب ليه لحشيش من إسبانيا لدول القوقاز والبلطيق ؟
رد عليها بنفس نظرتها الساخرة :
- كلشي ممكن !، ولد ختي إلا حط شي حاجة فراسو يديرها .
هقهقت روعة وقالت بسخرية لادغة وهي كاتوقف من چلستها :
-هاهاها... الكلام الفاحش ليك ولهداك جبل ديال ولد ختك وإلا صورتو مني شي حاجة أجيو بزقولي على كمارتي .
✅99✅
حركت رجليها وجات خارجا لكن عصام سبقها ووقف ليها فالطريق وهو كايقول بصوت ماكر :
-فين غاديا ألغزالة؟
علات راسها شافت فيه بغضب ثم شداتو من الچرافاطة وجراتو باش ينزل عندها لطولها ودقات على جبهتو بيديها بحالي كادق فشي باب وهي كاتقول :
- صباح الخير اجاري ، نتا فدارك وانا فداري ... وديها فسوق راسك وبلا ماتخلينيش نخسر ليك الهضرة .
طلقت من لكرافاطا وكملت هو حاطا يديها على جنبها بحالي باغيا دابز :
-حيد من قدامي ألباشار
إنفجر دوز ماركيز بالضحك على منظر عصام لي كان مصدوم من جرأتها رغم فرق الطول بيناتهوم وفرق الصحة والفورمة هي ماخافتش منو .
-هاهاها ... خصك تشوف راسك فلمرايا ... واااامي كرشييي هاهاهاهااا ...
بقا دون ماركيز كايموت بالضحك حتى تخنق وبدا يكح :
-عتقوني بكاس دلما عتقوننننني.
ناضت اسية بسرعة عطاتو كأس ديال الماء ورجعت جلست فبلاصتها بينما إبتسم ياسين بسخرية اما عصام كان غادي يطرطق بالإحراج ومارضاااش .
بعدات روعة عليه ودازت من الجنب ديالو لكن عصام أصر يمنعها ،... هي راها مرمدات بكرامتو الأرض ويلا خلاها تمشي غادي يولي المنظر ديالو بحال أدومة.
تبعها بسخط وشدها من دراعها باش يمنعها لكن المصيبة هي فاش شداتليه روعة فيديه وتقلبات عندو ، حطات رجليها على فخدو وتعلات بطريقة سريعة بحال البرق ، شداتليه فعنقو وقلباتو للأرض وبقات هي واقفا وغوتات بغضب.
-انا أخر واحد حط عليا يديه راه دابا كومة فسبيطار .
✅100✅
كولشي بقا حال فمو فيها من دون ماركيز حتى لياسين وأسية ، بقاو غير كايرمشو بعينيهوم مافاهمين والو ومصدومين... ، كيفاش 1.57 بوزن 50 كيلو قلبات واحد بطول 2.06 اوزن 150 كيلو نصفهوم عضلات .
هادي مايتقبلهاش لعقل. ولكن ماشي إلا كان عندها الميدالية الذهبية و الحزام الأسود فالكاراتيه ... ملي حلات روعة عينيها لقات راسها وسط عائلة رياضية بحيث الوالد ديالها كان عندو نادي للألعاب القوى كايخدم فيه مع خوتها لكبار فتدريب الناس لكبار بينما هي كانت كاتكلف بتدريب الصغار فعطلة الصيف ،.... شاركة فعدة مسابقات فأرض الوطن وفازت بيهوم ملي كان فعمرها بحرى 10 سنوات ، فإذن باين منين جابت كاع هاد المهارة .
لحظات صمت وصوت تأوهات عصام ومن بعد تصفيقات حارة من طرف دون ماركيز لي قرب منها بحذر خايف لاتجي فيه شي ضربة حتى هو وقال بهتاف:
-واااو وااو واااو .... إيه دا يا عصااااام ...
ناض عصام بسرعة ومن شدة الحرج تحصرليه الدم فعروقو ولا لوجه ديالو حمر كيف ماطيشة ...شاف فروعة بغضب و بدورها بادلاتو نفس النظرة فقال دون ماركيز وهو كايشوف فعصام بسخرية :
-عصام فكرني فالتهمة ديالها! ..... اااه الضرب والجرح ، دابا عاد فهمت كيفاش شقلباتك اعصام ....هاهاهاهاهااااااا
نفث عصام الهواء من أنفو بغضب و بغا يهجم عليها ...فغوتت أسية بخوف لكن ياسين وقفليه بسرعة فوجهو وقال بسخط:
- جرب تحط يديك عليها
قاطعاتو روعة وهي كاتقول بغضب:
-غير خليه يجرب أياسين وتشوف شغاندير فيه!
تبادلو نظرات الغيض والغضب لكن قاطعهم صوت رافاييل (مراد) وهو داخل داير يديه فجيبو بحال شي رجل عصبات و كايقول بسخرية وبتثاقل:
-من قبيلة وأنا كانحاول نقنع نفسي أن المشهد لي شفتو لقطة من شي فيلم ديال أنجلينا جولي لكن ، هادي غير نتي ياروعة .
لتافتو كاملين على إثر صوتو وغير شافو عصام تفكر الغرزة لي عندو فالراس سبابها هو رافاييل لي ضربو على غفلة برجل الكورسي ... ماشعرش رافاييل براسو حتى لقا نفسو مجبد على الأرض ،... عطاه عصام ضربة خرج فيها كاع الغضب لي تسببات فيه روعة ونتاقم لنفسو على الضربة لي عطاه فصباح ...وقال بإستهزاء:
-شوفو شكون لي جاء ..."رافاييل ديمورو" محقق الإنتربول السافل
وقف رافاييل ولمس الفك ديالو لي حس بيه تهز من بلاصتو بينما بقاو روعة وياسين وأسية غير مصدومين من الإسم ديالو ومن المهنة .... قهقه رافاييل بسخرية وقال:
-يبدو أن هاد الوجه عندي هاد نهار غير ديال الضرب ...
✅101✅
شاف فعصام وكمل:
- كانضن دابا تعادلنا ياك اسي عصام
شعر عصام بالغضب وجا هاجم عليه للمرة الثانية لكن دون ماركيز تدخل ووقف فوجهو وقال :
-عصام تهدن أصاحبي ، رافاييل راه ولا صاحبنا دابا .... كاينا ولا لا اسي رافايل .
القالها وشاف فيه فابتسم رافاييل وقال :
- اكيد ...، أچدع صحاب ...صحاب ونص
شاف عصام فدون ماركيز بنظرة إستنكارية فأومأ دون ماركيز بمعنى "اه داكشي لي كاتفكر فيه هو لي كاين" فتنهد عصام بغضب وخرج وهو كايتمتم ويسب فيهوم كاملين ماخلا طاسيلة من الفاصيلة .
ضار رافاييل وشاف فياسين وروعة وأسية وقال وهو كايضحك :
- ياب ، ياب ... توحشتوني؟
ردت عليه أسية بسخط :
-أنا ماقادراش نصدق أنك بوليسي !!
جاوبها رافاييل بهدوء وهو كايقرب منهوم :
- نعرفكوم على نفسي ... انا الرقيب رافاييل ديمورو من الشرطة الدولية الإنتررول .
كان كايتسناهوم مثلا يحيوه ، ولا يضحكو مثلا ويقربو منو يسلمو عليه من جديد و يتعرفو عليه اكثر.... لكنهم ماتحركوش من بلايصهوم وتعابيرهم ماتبدلاتش ،... علاش ؟؟ حيت كل واحد داير زبلا قد راسو ...ها لي قاتل ...هالي ضارب... وهالي سارق ....، وهو جاي لعندهم وكايقول بكل بساطة أنا رقيب فالشرطة الدولية .
قلبت أسية عينيها بغيظ وقالت :
-عرفتي شنو !!.... نتا تستاهل ديك الضربة لي عطاهالك عصام .
عقد رافاييل حواجبو بسخرية وقال:
-حرام عليك هادي هي العشرة ديال المغامرة لي عشناها!؟
ردت عليه بغضب :
-مكاين لا عشرة ولا عشرين ، نتا كدبتي علينا فالهوية ديالك، ماتحاولش تنكر .
چلس رافاييل على الأريكة وتمرح مع راسو وقال بسخرية:
-باش كانت غاتفيدك الهوية ديالي أمادموزيل أسية ؟
ردت عليه روعة بسخرية قاصحة:
-واااااالو ، غير كنا غانعرفو أن المافيات والشرطة وجهان لعملة واحدة .
شاف فيها رافاييل وفهم المعنى المبطن لي بغات توصليه وإبتسم ببرود وقال :
- ايوا شفتي ، عيش نهار تسمع خبار ولي تعجب يتبلى امدموزيل روعة الخطيب
ردت عليه روعة بسخط :
- الله ينجيني منكوم .... ما أنا منكم ما نتوما مني
✅102✅
سكتت شوية و كملت :
-أنا مافهمش علاش مضيعا وقتي هنا ...، الله يعاونكم غادي نقلب على شي حاجة نلبسها من غير هاد لبيجامة دلويل وماتشوفوني مانشوفكوم من هاد نهار ..
قلبت الضورا وبغات تمشي لكن دون ماركيز إستوقفها فاش قال :
-واش ماباغياش تسمعي العرض ديالي ليك ؟
وقفات وضارت لعندو وقالت بغيظ:
- لا مابغيتش.
وبغات تمشي لكنو ستوقفها مرا خرا وهو كايقول :
- بغيتك تكوني المرافقة ديال تاليا !!
عقدت حواجبها بدهشة و توقفت فنصف طريق ثم ضارت لعندو و شافت فيه بإستهجان فكمل دون ماركيز وهو كايقول برزانة :
- من بعد ماشفت السلخة لي عطيتي لعصام ، انا تأكدت مئة فالمئة انه مكاينش شي حد لي غادي يناسب بنت ختي من غيرك ، يعني تكوني صديقتها ومرافقتها .
فكرات روعة شوية وحللات الموضوع فراسها ثم قالت:
-يعني بغيتيني نكون الحارسة الشخصية ديالها !!
أومأ دون ماركيز براسو وقال :
-تماما ، وهادي مهمة ماعندها علاقة بالمخدرات ولحشيش ،... تاليا كاتكره الحراسة الشخصية ومكاتحسش بالراحة معاهوم لكن نتي غادي تكوني الصديقة ديالها والمرافقة ديالها هاكا أنا غادي نبقا مرتاح عليها كتر معاك والمقابل غاتشدي مرتب محترم بالإضافة لتطوير مهاراتك فالقتال وغادي تحصلي على هوية جديدة وإسم جديد وجنسية جديدة في حال مات لي على بالي بالك .... اش قلتي؟
إبتلعت ريقها بحيرة وتوتر ثم خدات وقتها فالتفكير ، يعني هي ، إلا رفضات حاجة بحال هادي غادي تكون حمقا ومسطيا ...، تاليا بنت حبابة وضريفة يعني أش غاتخسر إلا تبعتها فينما مشات و فالمقابل غاتشد راتب محترم ، وبعيد كل البعد على عالم المخدرات والجرائم ...وفالوضع لي هي فيه ماتقدرش ترفض عرض خدمة بحال هادي ... واخا ديرها غير إحتياط علاما توقف على رجليها وتقلب على خدمة أخرى وتحط إستقالتها .. وأكيد وغادي تبقا بعيدة على كل المشاكل ديال عائلة جبل ورجالو ...
تنحنت روعة بتوتر ثم قالت بتردد:
- ولكن بشرط!
شاف فيها دون ماركيز بإبتسامة إنتصار وقال :
-ولي هو ؟
-بغيت نعرف شنو هو هادشي لي باغيه مني سيك جبل ؟!
كرر موراها بسخرية :
- سييييييكككك جبل ... تغير رأيك فيه بين ليلة ونهار!
قلبت روعة عينيها بغيظ وقالت:
- اه تغير رائي فيه فاش عرفت أن هاد لقصر و داك سخط لي لقيتو فاليخت ديالو .., ولا بالنسبة ليا سيييكك جبل غير نتا ،... ماشي عليا ،... ودابا قولي شنو باغي مني داك ... سيييك جبل...سيد كامل الأوصاف ؟.
قهقه دون ماركيز بسخرية وقال:
-هاهاها... فالحقيقية انا براسي ماعارفش ! مابغاش يقولي داك كامل الأوصاف ديال سييييك جبل ، هو طلب مني غير نعاونك ونعطيك لفلوس باش تعيشي.
ضحكت روعة بإستهزاء وقالت:
-هه ...انا مامديتش يدي ليه ... والصدقة لي غايعطيني يزيدها فراسو ... انا مكانشدش فلوس إلا مادمرتش عليهوم ...، نفسي حارة وحتى واحد مكايمشيني على هواه .
- اوكي حتى أنا ماقلت والو قبلي تخدمي مرافقة لتاليا وخودي لفلوس على عرق كتيفاتك .
تنهدت روعة بقلت حيلة ثم قالت بعد صمت :
-أوكي موافقة
-وأخيييرا ،... ريقي نشفتيه ... بلاتي نشرب شويا ديال الماء.
مشا هز الكاس من فوق الطاولة وشرب وكمل :
-مكانش يحسابلي إقناعكم غادي يطلب مني هاد الوقت كامل!
وكمل وهو كاينادي بصوت مرتفع :
-دانياااال ، دخل الناس
ورجع شاف فيهوم وقال :
- هاد الناس هوما لي غادي يغيرو ليكوم المظهر ديالكوم وغادي يلتاقطو ليكم صور و باش نقدرو نطلعو ليكم هوية جديدة
همهمو كاملين بتفهم وكمل دون ماركيز بتوضيح أكثر فاش دخلو الناس لي طلبهوم :
-هادو اخصائين فالتجميل لي غادي يتكلفو بتغير مظهركم .... وهادا المصور ....
وكمل وهو كايصفق بيديه :
- مرحبا بيكوم يالاه بداو ....let's go .... بغيتهوم يرجعو كاملين ناس جداد ... بأسماء جداد و بشخصيات جديدة . ومرحبا بيكوم فڤيلة كونتيسا ... وفجزيرة إبيزا . وكانتمنا حياتكوم معانا تكون مليئة بالأفراح فالمستقبل القريب والبعيد .
_____________
نهاية الفصل :