جزيرة إيبيزا / إسبانيا / كالا دي سان فيسينتي / ڤيلا كونتيسا / الساعة العاشرة صباحا
فجزيرة إيبيزا وبالضبط ف كالا دي سان فيسينتي هاديك الجزيرة لكبيرة لمعروفا بشواطئها وموانئها المرصوصا بيخوت المشاهير والأغنياء ،... في كل عام كايتهاتفو عليها الشباب والسياح باش يتمتعو بصخبها وبسهراتها وبنواديها الراقية وبفنادقها السياحية الفاخرة ، ولكن كاتبقى مكان بحال كاع الأماكن فهاد العالم .
فكل صباح كاتلقى الشوارع عامرا بالناس لي كايمارسو عاداتهوم ونشاطاتهوم الصباحية ..بحال مثلا الخدمة ولا المدرسة ولا الجامعات ، وهادشي غاتشوفو فكل صبح إلا كنتي كاتعيش فهاد الجزيرة الزوينة لي أصبحت موطن المشاهير لي كايجيو ليها خصيصا باش يقضيو عطلاتهم الصيفية الممتعة .
وبعيد على هاد الصخب كولو ، فـ ڤيلا ضخمة من الطراز الفيكتوري العتيق والجميل ،... ڤيلا لا بل قصر مبهر ومرصع بالزخارف الأثرية لي تنقشات عبر تاريخ وأجيال كل عائلة عاشت تحت سقفها وبين جدران ڤيلا كونتيسا.
ضايرا بحديقة على إمتداد البصر تقدر تقول جنة ماعندهاش نهاية .... بساط أخضر كايمر من وسطو منبع مائي وسط الحديقة وكأنها غابة فيها نهر عدب وصافي ، وفديك الحديقة كل أنواع الزهور وبكل ألوانها المختلفة .
أما داخل ديك الفيلة الضخمة كل الديكورات والإكسيسوارات كادل على الدوق الرفيع والمبهر . كل قطعة كاتلمع وكادل على ثمنها الباهظ وكادل على غنى مالكها .
المنحوتات الأثرية فكل زاوية والصور الشهيرة لي كاتباع غير فالمزادات العالمية مرصوصا على طول جدرانها .
أما فالدور الثاني وفوحدا من الغرف الفارهة وفوسط داك سرير الكبير والحريري كان مستلقي بصدرو العاري الملئ بالوشوم الغامضة وغاط فسابع نومة .
فجأة رن جرس المنبه لي كان فجنبو على الكوافوز لي قريب من السرير .... عقد حواجبو دلالة على الإنزعاج ومد يديه بكسل باش يوصل ليه ويسكتو وغير قاصو بيديه عم الهدووووء فالغرفة وكأنه ناعس وسط شي بير غارق .
تأفف بضجر وناض چلس على سرير وهو كايبعثر فشعرو البني المائل للسواد والكثيف .... كان كايشعر بالكسل وماكرهش يزيد ينعس ولو غير ساعة وحدا بما أنه نعس حتى السبعة ديال صبح .
كان جسدو المثير النصف عاري والموشوم ملفث ومغري وقوامو كايلفت إنتباه كاع لبنات الزوينات لرجل شاب فعمر 33 سنة
ناض وخدا حمام سريع ونشف شعرو وهو كايدندن بمقطوعة موسيقية كايعشقها لبيتهوڤن ،... خرج للغرفة و رمى الفوطا على السرير ولقى أمامو صينية فطور مشكلة بداكشي لي كايبغيه .... كرواصون فرنسي وشوكولاطة سويسرية وقهوة إيكسبريسو أمريكية فاخرة .
چلس وأكل داكشي لي قد عليه وناض توجه لغرفة الملابس لي وجدوهالو الخدم ورصصو على طول رفوفها من الملابس الفاخرة ... وقف امام رف كبير ....فتحو وخرج بدلة رسمية لونها أسود لأنه كايعشق اللون الأسود بكل درجاته ..... لبسها وهو واقف قدام لمراية الطويلة وإبتسم بكل رضى وهو كايعدل لكرافاطا الأنيقة لي فاللون الأسود الحريري حتى هي .
لبس حداء جلدي من النوع الممتاز بعدما لبس ساعة فاخرة حول معصمه و وركب الإكسيسوارات لي كاتوضع فبلاصت أزرار السوميج عند المعصم .
سرح شعرو وبعثره بشكل جميل وأنيق ورش شوية من العطر لي كايعجبو والمفضل عندو . خليط من زهرة شجرة البرتقال والأخشاب العطرية ولدغة من التوابل السوداء الحارة من " إيفوريا إينتينس _ كالڤن كلاي " ... إبتسم لنفسو فالمراية وغمز غمزة لنفسو بعيونو الزمردية لو شافتها شي بنت غير بالصدفة غادي طيح سخفانة مافيهاش الشك .
خرج من الغرفة وتمشى فالممر وهو داير يد وحدا فجيب سروالو الضيق وهو كايصفر بشفايفو بدلالة أن مزاجو كان فأفضل حالاتو هاد الصبح على غير العادة لكنه توقف بعد بضعة خطوات ورجع للخلف ووقف أمام باب خشبي بني اللون ...، حط يديه على مقبض الباب وبغا يفتحو لكن سبقاتو يد من الداخل وحلات الباب وخرج فوجهو رجل خمسيني شايب الشعر وعامل نظارات طبية على منتصف أنفو المستقيم وغير شافو إبتسم ليه وقال باللغة الإسبانية.
- صباح الخير سي جبل ...
ابتسم جبل رد عليه بلباقة :
-صباح الخير دكتور ، ...
مد بصرو خلف كتف الدكتور بفضول على الله يلمح ولو غير جزء منها لكن الدكتور قاطع فضولو وقال:
- مدام روعة بيخير ، زودت جسمها بالدم لي فقداتو وركبت ليها محلول ملحي باش يزودها بالمعادن الأساسية لي هي فالحاجة ليهوم فهاد الفترة ...
همهم جبل بتفهم وقال بتردد:
-همم ... واش نقدر نشوفها ؟؟
-امم من الأحسن بلاش هي أصلا ناعسا وماغاتفيقش دابا لأن جسمها تعبان وفقدات لكثير من الدم ومحتاجة للراحة باش تسترجع قوتها .
أومأ جبل براسو بتفهم وقال بهدوء :
-شكرا ليك دكتور ، خليني نوصلك للباب ..
-مكاين لاش أنا عارف طريق أسي جبل ، غادي نمر عليها فلعشية علاما تكون فاقت ....عن إذنك .
رد عليه جبل بلباقة :
-اذنك معك دكتور
ايتسم الدكتور وجا غادي ولكن وقف وضار عند جبل وقال :
-من الأحسن ماتزعجوش المريضة ، هي محتاجة للراحة كثر من أي وقت .
ابتسم جبل بتصنع وقال :
-اكيد ...اكيد أدكتور مكاينش لي غادي يفيقها ... شكرا.
إستدار الدكتور ونزل مع الدروج وهو حامل حقيبة معداتو فيدو ،.... شاف جبل فالباب المسدود وتنهد لكن الصوت لي جاه من الخلف خلاه يقلب عينيه بضجر فاش قال:
-ولد ختتتتتي لعززززيييييزززز وأخيرا فقتي ... عرفتي شحال من مرا هديت باش نفيقك وكانرجع من الباب .
-احسن حيت كون فيقتيني كونتي غاتسمع مني غير لمنقي خيارو .
قالها جبل وإستدار شاف فالدون ماركيز لي كان يالاه وصل من الرياضة الصباحية وهو هاز حقيبة على كتفو وفيدو مضرب ديال التنس وقال بسخرية :
-كيف جيتك ؟؟؟، المنظر ديال شي ميلياردير !
قلب جبل عينيه وداز من قدامو بتجاهل وهو كايقول بملل:
-لي يسمعك يقول راك فقير ونتا من نهار تزاديتي وفمك فيه معلقة ديال الذهب .
عقد دون ماركيز حواجبو بإستهجان وتبعو وهو كايقول :
-الواليد لي تزاد بمعلقة ديال الذهب ففمو وغير ولدني خشالي معلقة ديال القزدير فقرجوطتي والأمارة حرمني من الميراث وعطاه لدوك لبايرات سحارات ديال خواتاتي ، هدا علاش غانولي ميلياردير غير فعينين لعديان .... يعني بغيت نولي بحالك.
إبتسم جبل بسخرية وهو نازل من دروج وقال :
-علاه أنا ميلياردير
قلب داوود شفايفو بعدم اهتمام وقال :
-يعني ماشي مئة فالمئة ولكنك ميليونير
وقف جبل وضار عندو وقال بسخرية :
- ماتخليش لفلوس فقلبك اسي داوود ... الفلوس كايخليو الناس عبيد عند مولاهوم ونتا بما أنني كانحسبك بحال نفسي مستحيل نخليك تكون عبد عند شي حد فهمتي .
ضيق الدون ماركيز عينيه فجبل ورد عليه بسخرية :.
-ياااك ... واقنعني قنعني راك غير كاضيع وقتك ... بغيتيني نبقا على الضس ..اسيدي غير خليني نكون عبد ..غير نبكي على زهري فسيارة فيراري احسن من هيركاطخ
ضحك جبل بتسلية وقال بلعاني باش يعاندو :
- هدا علاش ماديرش لفلوس فقلك غادي يستعبدوك بسيارة فيراري اصاحبي ..لفلوس ماتعطيهاش قيمة كبيرا ... خليها قريبا لجيبك كثر من قلبك ..
إستدار جبل وكمل طريقو هابط مع دروج ...فتح باب ديال المصعد ودخل لكن فاش جا يضغط على زر الإغلاق باش يهبط للقبو سبقو دون ماركيز وضغط عليه وهو كايقول
-شحال فيك ديال تفلسيف أولد ختي .
شاف فيه جبل بيأس وقال :
-تفلسيف !!!....
وكمل وهو كايتنهد بملل:
-بلاتي نعطيك مثال ، لحم الجيفة ماعزيزش عليك وأكيد ماتقدرش تاكلو ومامفضلش عندك ولكن ضروري منو ...
شاف فيه دون ماركيز وعلامات الإستفهام فوق راسو فتنهد جبل بيأس و كمل بتوضيح أكثر:
-خودلك هادي ... إلا رميتي داك لحم الجيفة للكلاب أكيد غادي ياكلوه وإلى ولفتي لكلاب على داك لحم الخانز غايوليو صحابك وحبابك ومدام نتا عندك داك اللحم الخانز ، لكلاب غايبقاو أوفياء ليك ديما .... هدا لاش لحم الجيفة ولفلوس بحال بحال بجوج بيهوم كايجدبو ليك الأصدقاء ... كانقصد الكلاب ...
تحل باب المصعد وخرج منو جبل وخلفو دون ماركيز وهو كايحلل كلام جبل وكايحاول يستوعبو .... كان القبو كبير ومقسم لنصفين النصف الأول عامر بالسيارات والدراجات النارية بكل الأشكال والأنواع والألوان والنصف الثاني مقسم لغرف كبيرة كل وحدا وعلاياش كاتحتاوي ، لكنو فتح باب من دوك ابواب الغرف ودخل .
كان مكتب كبير متوسط الغرفة وعلى كامل جدران الغرفة كان مدرجات للكتب العالمية العربية والأجنبية من الأرض حتى للسقف بالإضافة لمخطوطات قديمة ونادرة شراها الواليد ديالو فاش كان مازال عايش بأحد المزادات الراقية لأنه كان معجب بالثقافة الأوروبية القديمة .
تقدم جبل وجلس بكل شموخ على المكتب وتكئ بظهرو على الكرسي ودار رجل على رجل بعنفوان وهو كايتفحص ديك الغرفة لي فتاقدها لمدة سنة كاملة .
-إيوا غير ديك الچلسة على داك الكرسي خصها لفلوس والسلطة اولد ختي.
قالها دون ماركيز وهو كايجلس على الكرسي المقابل للمكتب ورد عليه جبل :
-ماتكونش محساد اصاحبي ، فلوسي هوما فلوسك ... و قلتليك نتا راك نفسي مالك مكلخ ...
قرب جبل ووضع يديه على المكتب وقال بصوتو الرجولي لمبحوح:
-لفلوس فعالمنا دارو باش يشريو لعبيد ، والمصالح اسي دون ماركيز... دارو باش تشري بيهوم الحلفاء والأصدقاء
شاف فيه داوود بسخرية وقال:
-و لي ماعندو فلوس مكايسوا وااا...لو ، حتى لكلمة ديال واحد فقير حقير مكاتسوى عند صحاب شي وصحاب السلطة ، هوما كايعتابرو الفقراء حشرات وأنا ماتزاديتش حشرة أنا بنادم وغاندير لفلوس كتر منهوم باش نعفط عليهوم بالخر ديال صباطي حيت هوما فنظري مجرد صراصير . ودابا إلى قلتيلي غانطلع لمريخ باش نجيب لفلوس غانقولك ديرلي بلاصا فصاروخك اولد ختي . وإلا قلتلي غانهبط لقاع لبحر نطلعهوم غاتلقاني سبقتك للغواصة وشديت لبلاصة.
إبتسم جبل بخبث وتكا على ظهر الكرسي بشموخ وهو كايقول بإسياء:
-أي ياااياااي ...
لكن دون ماركيز رد عليه بعيون كايلمعو من شدة الفضول
-دابا بما أننا بقينا بوحديتنا ، واش ماعوالش تقولي على الخطة لي غاتوصلنا للمليارات
حدر جبل عينيه وقال بهدوء :
-الفلزات النفيسة
شاف فيه دون ماركيز بعلمات الإستفهام فوق راسو ورد عليه:
-بلاتي أولد ختي .... ماشي كولنا مهندسين بحالك.
إعتدل جبل فچلستو وشبك أصابعو فوق المكتب وقال وهو كايشوف فدون ماركيز بهدوء:
-هادشي ماعندو علاقة بالهندسة ..
-اوكي دبا تفاهمنا ، جيني غير دقا دقا باش نفهم ولد ختي شكايقول
أومأ جبل بهدوء وقال :
-الفلزات النفيسة ، المعادن الثمينة والأحجار الكريمة
ابتسم دون ماركيز وعدل چلستو وقال بحماس :
-دابا بديت نتحمس ، كمل ...
إبتسم جبل بخبث وقال:
- يا خال طحت على واحد الغار عامر بالكنز ، الذهب ، الفضة ، التايتانيوم ، اليرتيوم ، الألماس ، البيرل الأحمر ، الزمرد ، البلاتينيوم ، الروديوم ،الياقوت وزيد وزيد ،....
بقا الدون ماركيز مصدوم لدرجة ماقدرش يجمع كاع دوك الأسماء لي سمع ، الفيزيبلات ديال دماغو تسوطاو ملي قرر يحسب شحال دلفلوس غايربحو ،....... على راسو وشاف فجبل بصدمة وقال:
-بلاتي ، دقا دقا أصاحبي شنو قلتليك ، واش بغيتي تسببلي فجلطة دماغية .
إبتسم جبل بسخرية ودار يدو تحت دقنو بملل وبدا يشوف فيه ،.... جبد الدون ماركيز تلفونو ودخل على تطبيق البورصة العالمية .... خدا واحد الخمسة دقايق فتصفح التطبيق ثم وضع التلفون على الطاولة لي حداه بهدوء وشاف فجبل بالعرض البطيئ لأن فعلا كان مصدوم لدرجة ولا بحال شي لقطة من شي فيلم درامي فاش كايكتاشف البطل خيانة حبيبتو . إبتلع ريقو ببطئ وقال :
-واش.... عرفتي ثمن الألماس ...، معدن الملوك فالبورصة العالمية شحال داير !!! ، 36.6 ألاف دولار للغرام... التيرتيوم 3000الاف دولار للغرام ، البيرل 2000 دولار للغرام ، البلاتينيوم 1200دولار للغرام ....
سكت شوية فاش شاف إبتسامة جبل الغامضة وكمل وهو كايقول:
- حلف أنك مكاتكدبش ....يالاه حلف بالله وقول أقسم برب الكعبة أنك مكاتكدبش
تنهد جبل بملل ثم دفع الكرسي وناض وكان دون ماركيز متبعو بعينيه وهو كايقول بغيظ:
-فين غادي؟؟ أجي حلفلي بعدا
ماردش عليه جبل وإحتفظ بهدوؤ ورزانتو ، وقف أمام جدار المكتبة وجبد جوج كتوبا ديال اللغة العربية وظهر أمامو مربع فيه أزرار الأرقام ... دخل الرقم السري حتى تشعل الضوء الأخضر ولتافت لعند دون ماركيز وقال:
-أجي نحلفليك دابا!
وقف دون ماركيز بحماس وقرب من جبل لي دفع جدار المكتبة وتشعل ضوء الغرفة لي كانت خلفها ودخلو بجوج ...
كانت الغرفة فاللون الأبيض جدرانها وسقفها وأرضها وحتى الإضاءة فاللون الأبيض .وفالقنت كانت البضاعة ديال لحشيش والحبوب المهلوسة مركنة . شاف فيه دون ماركيز وقال بإستفهام :...
-أشنو علاقة البضاعة بموضوعنا ؟
شاف فيه جبل بنظرة كاتعني "سد فمك وغادي تفهم " وداكشي لي دار دون ماركيز لتازم الصمت علاما قرب جبل من الجدار وحيد خاتم الياقوت الأخضر لي كان فإصبع الخنصر الصغير ، شاف فيه للحظات لأن الخاتم ديال الوليد ديالو وتفكر نهار لي عطاهلو اوصاه عليه وكأنه كان حاس بإقتراب موتو ....
تنهد جبل بهدوء وطرد دوك الذكريات الحزينة ثم حيد غطاء المصباح لي كان فالجدار على طولتو وظهر خلف غطاء المصباح دائرة صغيرة بحجم الخاتم ..
وضع ياقوتة الخاتم على الدائرة حتى تشعل الضوء الأخضر ، ومن بعد دفع الجدار وظهر من خلفو غرفة جديدة لكن منظرها كان مختلف على الغرفة البيضاء تماما . هادي كانت غرفة سوداء اللون كلها بجدرانها بسقفها وبأرضها وعلى الجدار المقابل صف من الأدراج (مجورا ) من الأرض حتى للسقف .
بقا دون ماركيز غير حال فمو فديك الغرفة مكانش كايظن أبدا أن خلف غرفة البضائع كاينا غرفة وحداخرا
-اوه ...ماي ...گود ، شحال وأنا عايش فهاد الفيلة وماعمري كتاشفت هاد الغرفة العجيبة ، omg ماقادرش نصدق!
إبتسم جبل بسخرية وقال:
-هذا كان ماي سيكريت ... المرحوم الواليد الله يغفر ليه ، وصاني باش مايعرف حتى واحد مكانها ولكن هانا كانخالف الوصية ديالو بسببك اسي دون ماركيز باش تيقني .
تقدم لأحد الأدراج لي كان تحت رقم 190 وفتحو بالبصمة ديالو الخاصة دخل يدو وخرج سبيكة ذهب من حجم كيلو فاشهق دون ماركيز وغوت :
-ياااااااربي نكون غير كانحلم.
شاف فيه جبل وقال بهدوء:
-مازال ماساليت
دخل يديه وجبد سبيكة ذهب وحداخرا ومعاها كيس صغير ، طار عليه الدون ماركيز وخدا السبائك ديال الذهب وبدا يشوف فيهوم ويضحك بحال شي مجنون .
-يااااه شحال كايلمعو هاهاهاهاهاهاااااهاها
إبتسم جبل بهدوء ثم فقال :
-هادشي غير لي شونتيون ونزيدك 500 غرام ديال الألماس من النوع الممتار وهاد الذهب لي بين يديك من قيراط 24
ضحك دون ماركيز بجنون وقال:
-أنا ... أنا....أنا قادر نشوف مستقبلي من دابا ، غادي نشري شي ڤيلا بحال هادي ... لا لا أنا غادي نشري قصر كبير وغادي نخدم فيه غير ملكات الجمال وعارضات الأزياء .
قلب جبل عينيه بتملل وقال :
-صاحبي تهدن شويا لايطيرلك شي ڤيزيبل فراسك ونوحل فيك .
خطف دون ماركيز كيس الألماس من يد جبل وبقا معنق سبائك الذهب فحضنو وقال وهو كايتفحص حبات الألماس بلهفة .
-صافي أنا غادي نتهدن ...ولكن بلاتي كيفاش حتى حصلتي عليهوم ؟؟
إبتسم جبل بإبتسامة رجولية كلها ثقة وقال وهو كايرجع الألماس وسبائك ديال الذهب لبلايصهوم .
-ببساطة رحلة خفيفة لجنوب أفريقية ، تعرفت تما على أباطرة المناجم وعرابين الفلزات النفيسة ، وهوما على كامل الإستعداد باش يتعاملو معانا وهادشي لي جبت غير عينة بسيطة ...
وكمل وهو كايرجع الجدار لبلاصتو فاش خرجو من الغرفة
-ايوا مازال باغي تعامل مع العراب شاهين وجماعتو المسخة .
ضحك دون ماركيز بجنون وقال:
-هاهاها .... ماتقارنش الشكلاط بلخرا أولد ختي هاهاها فين يجي لحشيش لي مكايسوا حتى خرية ، قدام الألماس لي ساوي 36 ألف دولار للغراااااااام فالبورصة
تنهد جبل بهدوء وقال :
-نسا عليك البورصا البضاعة ديالنا غاتباع فالسوق السوداء ، لأنها غير قانونية وماعليهاش ختم الدولة ولفلوس لي غانحطهوم للدولة فالضريبة نخلصو بيهوم لي غايهربو لينا البضاعة من بلاد لبلاد فأمان ، .... أش بانليك ؟؟
توسعو عيون داوود بحماس وقال :
- اش بانلي!!! ....داهية .. نتااااا دااااهية بمعنى الكلمة .
إبتسم جبل بإبتسامة جانبية وقال بصوت مهياب :
-النجاح فمجتمع فاسد هو أنك تولي فاسد من الدرجة الأولى اسي دون ماركيز.
ضحك داوود بخبث وقال :
-متافق معاك ....ولكن انا بغيت غير نفهم فقتاش قدرتي تفكر فهادشي كولو؟؟ ...
-ماشي مهم فقتاش ولا كيفاش المهم هو التطبيق .
قالها جبل وشاف فالبضاعة لي كانت مكومة فزاوية الغرفة البيضاء وقال :
-ماعمري كنت نتاجر فالمخدرات كون ماورطنيش فيها الواليد الله يسمحليه ....كانكره المخدرات وكانكره كل حاجة كاتعلق بيها ،...
تنهد وهو كايشوف فالبضاعة وكمل وهو كايقول:
-هاد البضاعة ماغاديش تحرك من هنا حتى نرجع من جنوب أفريقيا :
شاف فساعة يديه وكمل :
-باقي خمسة ساعات على طيارتي واش وجدتيلي الهوية المزورة لي غانسافر بيها .
رد عليه داوود بسرعة :
-اه راها واجدا ... ولكن أولد ختي ، هوما راه باغين بضاعتهم فأقرب وقت .
شاف فيه جبل بنظرة قاتلة وقال:
-أنا شنو قلتليك ، أنا ماكانخافش ... لا من شاهين ولا لكلاب درجاولو .....وهاد البضاعة غاتوصل ليهوم فالوقت لي غاترشقلي عليه وأنا لي غادي نسلمهالو بيدي ، مفهوم ؟؟!!
تنهد داوود بقلة حيلة وقال :
-مفهوم ، ولكن أنا خايف غير لايشدو معانا الضد ونوليو فمشاكل حنا ماشي قدها:
-نتا غير خرج داك السوق ... واضح؟
تنهد دون ماركيز وقال بتردد:
-واضح !!
خرجو من الغرفة البيضاء ورجع جدار المكتبة لمكانو وكلس جبل على الكرسي خلف مكتبو وتكى بجسمو الرياضي على ظهر الكرسي الدوار ودار رجل على رجل بخيلاء ثم قال:
-فين وصلتي فالبحث على دوك الثلاثة ، مراد وياسين وأسية ؟
-اه فكرتيني
هز دون ماركيز التلفون ديالو من على الطاولة ودوز رقم وتسنى علاما تفتح الخط وجاوب :
-عصام ، فين وصلتي فالبحث لي كلفتك بيه .... راك هنا !!.... ايوا هبط للمكتب البارون كايتسنا لخبار ..... يالاه سربي طلق راسك.
ماكاملاش دقيقة وتسمع الدقان فالباب ودخل عصام بعدما أذن له جبل بالدخول ...
كان رجل صاحب طول المترين حتى أنه أطول من جبل ودون ماركيز لي بدورهم مكانوش قصار ... كتافو عراض وكأنه مصارع من مصارعين WE ، كان لابس بدلة رسمية سوداء اللون وتحتها سوميج فاللون الأبيض وحداء جلدي لامع وتسريحة شعر مهذبة بالإضافة لدقن ملتحي عاطيه هيبة وقوة فوق قوته ، والسن ديالو 29 سنة لكن منظرو وشكلو يوحى بسن أكثر وكأنه رجل فبداية الأربعينات..
إبتسم جبل وقال غير شافو باللهجة السورية:
-أهلين شريك ، شو ماشتقتلنا ؟
رد عليه عصام بإبتسامة عريضة وهو كايتقدم عند جبل لي وقف وعنقو بحرارة :
-ولو معليييييم ابيزا ما بيسوى من دونك
-أبضاي يا عصام دايما أبضاي (شجاع) وهذا الشي يلي أنا بحبو فيك .
تنهد دون ماركيز بملل وقال :
-اووخ ... اللعنة المقدسة .. هضرو بالدارجة مالكوم ، كانحس براسي بحالي كانتفرج فشي مسلسل تركي مدبلج ...، عصام هادي اربعة سنين وأنا نعلم فيك تهضر بالدارجة فين مشا تعبي؟
حمحم عصام وقال بإحترام :
-كانعتاذر اسي دون ماركيز
إبتسم جبل بهدوء وقال وهو كايطبطب على كتفو بقوة
- يالا يا الوحش ، عطينا الأخبار شنو لقيتي ؟
فتح عصام الملف لي كان بين يديه لكن رجع سدو وقال :
-قبل مانبدا نعطيكم التقرير لي وجدت ، بغيت غير نقول ان الأنسة تاليا اختك خرجات هي والصديقة ديالها أسية هادي واحد الخمسة ديال دقايق.
ضرب جبل بيديه على المكتب بغضب وبغا يهضر لكن عصام صبقو وقال :
-ماتخافش معليم سيفطت خلفها الحراسة واخا هي كانت رافضاهم تماما !
تنهد جبل فمحاولة تهدأت أعصابو وقال:
-هاد البنت غادي تسبب فموتي شي نهار مافيهاش الشك!
رد عليه الدون ماركيز بسخرية:
-قلب القدرة على جنبها تطلع البنت تشبه لخوها
شاف فيه جبل بغيظ وكمل دون ماركيز بسخرية:
-اووه ماجاتش موزونة... عادتا البنت كاتشبه لمها ماشي لخوها ولكن هادشي لي طلع بيدينا ختي ولدات جوج ديال .....
قاطعاو جبل بنظرة قاتلة ولي مافيهاش حس التسلية ففضل دون ماركيز يبدل الموضوع وعلاش لا يقلبها غناء فابدا كايدندن بصوتو النشاز بكلمات لأغنية ...
-اااااصلا واااالو لا قلييييب ولا كبييييدة غادي نعطيهوم لفويچوووو وغادي نعيش فدالبيضا...
ضحك عليه عصام بسخرية وقال:
- مكايقولش تيو تيو فالأغنية أصلا والو كايقول hasta luego لاقليب ولا كبيدة .
شاف فيه دون ماركيز مامصدقش وقال وهو كايضحك
-دخلت عليك بسيدي ربي وانا لي ضيعت عمري كامل كان يحسابلي كايقول اص...
قاطع ضحكهم جبل فاش ضرب بيدو على المكتب بقوة حتى تهز من بلاصتو وغوت:
-دابا واش كاضحكو عليا بجوج بيكوم؟
شافو فبعضياتهوم وهوما كايحاولو يكتمو ضحكاتهوم بدون جدوى لكن فلخر نفاجرو بالضحك فخلاهوم جبل على خاطرهم حتى شبعو ضحك وقال:
-صافي باراكا ...ماقالتلكش ديك راس المشاكيل فين مشات؟
إعتدل عصام فوقفتو ورد عليه برزانة :
-مكانتش باغيا تقولي.... أصلا هي مكاتحملنيش!
إبتسم جبل بسخرية وقال:
-أحسن
تكرهو حسن ماتبغيه بالنسبة لجبل ختو مايمكنش تبغي شي حد وهي مازالة صغيرة ابدا ...مستحيل ، غيرة الأخ على أخته.
-لكن هاديك صديقتها أسية قالت لي أنهم مشاو للمول باش يشريو ملابس للأنسة روعة .
اعتدل جبل فجلستو غير سمع إسمها وقال:
-روعة .... واش فاقت؟
شاف عصام فجبل بنظرة كاتعني "وباش غانعرف أنا " ورد عليه بهدوء:
-ماعرفتش اسي جبل !!، اصلا أنا ماشفتش هاد البنت لي سميتها روعة ولكن دابا أنا كلي فضول باش نتعرف عليها
شاف فيه جبل بنظرة ساخرة وقال وهو كايقلب عينيه بغيظ:
-ديها فشغلك ....
وكمل بنبرة أكثر جدية:
- عطيني المهم دابا .... شنو درتي لقيتي شي حاجة
أومأ عصام براسو وقال :
-عطاني السي دون ماركيز ربعة ديال سميات . ياسين مراد أسية وروعة .
شاف جبل فدون ماركيز بنظرة كاتعني "واش أنا ذكرتليك سمية روعة أبنادم مالك شغالك ديما مخريق " لكنه ماهضرش ... تنهد بغيظ وشاف فعصام لي قال:
-الإسم الأول ...ياسين العومري ، دكتور مختص في جراحة الدماغ ... عمرو 30 سنة ، و سجلو العدلي موسخ معليييييم
أومأ جبل بفضول قلتل وقال:
-كمل ...
تنهد عصام وحنا راسو للملف وقال :
-الدكتور ياسين العُمري ...متهم بجريمة القتل الغير العمد .
شهق دون ماركيز بدهشة وقال:
- اomg القتل كاع
أومأ عصام برأسو بينما جبل بقا ساكت وغير مصدوم لكنه كان كلو فضول باغي يسمع بقية التقرير فكمل عصام وهو كايقول :
-الإسم الثاني ، أسية بن شمسي 22 سنة.. سيجلها العدلي حتى هي موووووسخ معلييييم ....متهمة بسرقة مبلغ كبير من عند مشغلها فالجزائر العاصمة ، وإسمها مطلوب للعدالة .
ضحك جبل بقلة حيلة ثم قال بسخرية :
-اتحفني يا عصام زيد سمعني
ضحك عصام وقال :
-واخا معلييم
وكمل:
-الإسم الثالث ...روعة الخطيب ..
إعتدل جبل فچلستو و رفع حواجبو بفضول فكمل عصام وهو كايقول برزانة :
-روعة الخطيب ...السن 23 سنة ، سجلها العدلي ، المووووووسخ معليييم
عقد جبل حواجبو بإستفهام وقال:
-شنو هيا التهمة ديالها ؟؟؟
قلب عصام الورقة وقال:
-مذكور فالتقرير ان هادي غير يوماين تقدمت شكاية ضدها ، متاهمينها بالضرب والقدف والجرح والضحية دابا فحالة غيبوبة وإلا مات غاتكون التهمة ديالها جريمة قتل عن سبق الإصرار والترصد حسب القانون الجينائي فالمغرب .
ضحك دون ماركيز بسخرية بأعلى صوتو وهو كايقول:
-هاهاها ...ماقصرش داك شلاهبي ديال مرزوق جمعلك گاع المجرمين ديال المغرب والجزائر وصدرهوملك مع البضاعة هاهاها
ماجاوبوش جبل بل تنهد بحيرة وهو كايفكر فديك البنت البرئة المسكينة لي طلع منها هادشي كولو ... تنهد بإستياء ثم قال بفضول قاتل وهو كايشوف فعصام :
- وهداك مراد شنو التهمة ديالو حتى هو ؟
-اووووه مراد ..
قلب عصام الورقة وقال:
-مراد خليتو هو التالي حيت لاهو ضحية ولا مجرم ...
عقد جبل حواجبو بفضول وقال :
-كيفاش يعني ؟!
ورد عليه عصام برزانة :
- ماسميتوش مراد هادي هي أول حاجة ...تاني حاجة ماشي مغرييي ولا عربي من الأصل .
-موزانبيقي مثلا؟!
قالها دون ماركيز بسخرية فشاف فيه جبل وقال بجدية:
-ماشي وقت الضحك أداوود سد فمك ..... كمل أعصام .
-مراد الإسم ديالو الحقيقي هو "رافايل ديمورو" و الأصل ديالو من كاتالونيا ،... الأب والأم مجهولين ....تربا فالخيرية حتى وصل لسن عشرة سنوات وتبناتو عائلة مغربية فإسبانيا تشرب من عندهوم الثقافة المغربية وحتى اللغة العربية ... عاش وكبر معاهوم حتى توفات العائلة لي تبناتو ومن بعد بقا عايش غير هو وختو لكبيرة فالتبني ، ومن تما فسن 23 إنضم لفريق محققين الإنتربول الدولي وإستحقها عن جدارة معليييييييم .