#شاءت_الاقدار١
#زينب_الموسوي#
احلام وذكريات
هي كل مانجنيه من سنين عمر تحملنا حيث لاندري
نودع حلم بعد اخر
قد يكون وداعنا مؤلم وقد يكون لا
في احد احياء بغداد الحبيبه دار هذا الحوار
شيماء من حقي اعيش واتزوج بعدني زغيره
ابو قيس والمرحوم نسيتيه بهالسرعه
شيماء هو اني اشفت من المرحوم اشو من اخذته وهو مريض
ابو قيس بنات المرحوم متاخذيهم يبقون عندي ماخليهم يعيشنون عند رجال غريب
شيماء يبقن عندك المهم ماتحرمني شوفتهن
ابو قيس تگدرين تجيين اي وقت تشوفيهم هنا
شيماء امي وابو قيس عمي محمود
نبدي القصه من سنة ٢٠٠٠
اني ميلاد واختي مي عايشين بيت عمي محمود بعد وفاة والدي المريض وزواج امي
اصل جدي فلسطيني وصل للعراق بعد احداث فلسطين المعروفه معه والدي الله يرحمه وعمي محمود وعمتي سبيل تجنسنا عراقيين واني واختي واولاد عمي كلنا انولدنا بالعراق نحجي عراقي ونحب العراق عشنا كل ظروفه حالنا حال كل العراقيين وتربينا فوق ارضه وجوا سمائه وشربنه من مايه
امي زوجت كان عمري ٦سنين واختي ٤ زارتنا كم مره وبعدين تركتنا ربتنا زوجة عمي ازهار وعمي محمود وعمه سبيل
كبرنا بيتهم مع ابنائهم قيس سامي يوسف
واخواتهم دعاء سجود
سجود بعمري وعايشه باربيل تزوجت هناك ودعاء اكبر مني متزوجه صار سنتين
القصه تبدا ٢٠٠١ من عمري ٢٠سنه اشتغل. في مستشفى اكتب الباصات وانظف حمامات الدكتورات ميعجبهن تنظيف الفراشات اني انظف وقت الراتب ينطني كلهن وعلمني اضرب ابر ضروفنا صعبه مثل بقية الشعب عمي كبر وميشوف زين
قيس مستلم المسؤوليه يشتغل يصلح سيارات ترك الدراسه ثاني سنه بالكليه بسبب الظروف العاىله كلها عليه واني اشتغلت حتى اعيل نفسي واختي اريدها تدرس تكمل كليه مو مثلي
سامي مريض ونايم بالفراش والادويه مامتوفره كان يلعب طوبه وگع ورجليه بعد ماوگف عليها والاطباء يعتقدون السبب بالفقرات علاجه نجيبه من الاردن
عمتي سبيل قبل سنتين تعاركت ويه مرة عمي وصفتها بالبايره وكبرت المشكله عمتي كانت محتفظه بذهب امها باعته وبنت بالحديقه غرفه وحمام واخذتنا وياها
الدنيا ليل الوقت متاخر وقيس مارجع منتظرته بكراج بيتنا
ام قيس ها ميلاد مارجع قيس
ميلاد لا والله مارجع گلبي صار نار عليه
انفتحت الباب
ميلاد وين چنت ليش تاخرت
قيس گولي الله يساعدك شلونك
ميلاد اول مره گول وين جنت ويامن
قيس سياره صاحبها مستعجل عليها عنده زفه بيها وخلصناها يله سدينا المحل
ميلاد يا هذي العروس حظها مثل حظنا
قيس يمعوده احسن من حظنا على الاقل راح يزفوها احنا ننتظر وماكو نهايه
ميلاد الله كريم دفوت غسل بين مااصبلك العشى
دخلنا للبيت كلنا
قيس شاب اعتبر نفسي عراقي انولدت وتربيت هنا مااعرف وطن غيره واسمع احنا فلسطينين عمري ٢٦سنه الدنيا ملطشه ويايه
وبهذي القصه راح تعرفون ظروفي
اتمنى اتزوج بنت عمي ميلاد حب حياتي ودنيتي
تشتغل حتى تساعدني نبني غرفه ونتزوج لان الغرف فوگ بالحصار فلشناها وبعنا الحديد لعلاج سامي معظم الشعب يعتقد ان الدوله كانت تصرف علينا صدكوني هذا كذب الدوله انطتنا بيوت صحيح
ام قيس ها يمه جبت قطره لعيون ابوك
قيس بلي يمه جبت القطره
ام قيس وابر سامي حصلتها
قيس وصيت ولد ودفعت فلوس باجر يدبرهن يوسف رجع لو بعده برى
ام قيس رجع ودرس ونام
قيس اكيد درس لو شمر الكتب بمكانهم ونام يمه السنه بكلوريا اريده يدخل كليه مو كلنا فشلنا بالدراسه
ام قيس الله كريم انشاالله تتحسن الظروف والله يعوضكم عن الشهاده
ميلاد يله قيس تعشى
ام قيس ميلاد شوفي سامي وانطيه ابره اذا عندج
ميلاد صار عمه هسه
قيس ميلاد اذا خلصتي انتظريني نسهر سوا
ميلاد بس اخلص شغلي اول
قيس هو شعندج شغل هي ابره اضربيها لسامي
ام قيس هذي فوگ ركضها وضيمها وگعدتها تنتظرك ماراضي
قيس هههه ميلاد اول وحده تلم مهرها بنفسها
ام قيس غير تريدك شتسووي
قيس خطيه انتي ميلاد شجابرج تنتظرين يمعوده شوفي واحد غني على الاقل يهنيج مو مشلوع گلبج بالمستشفيات والخياطه
لاتزعلين ترى اتشاقى
ميلاد هسه مو زين تعلمت اضرب ابر احسن متروحون للمضمد
قيس هو انتي تعلمتي برووسنا
قيس اني وميلاد . مخطوبين بدون حلقات والكل يعرف نحب بعض
ميلاد
دخلت لغرفة عمي محمود
سامي نايم بيها حتى اضربه ابره
هي غرفه وحده وصاله ومطبخ بالبيت الباقي مفلشيه
سامي هلا بميلاد يارب ابقى مريض على طول حتى تجيين عندي
ميلاد عفيه خوش دعاء انت مريض وتتدلل واني وقيس مكسور ظهرنا بالمصاريف
سامي والله قيس ميفتهم اني منه ماانتظر يوم بدونج اتزوجج حتى لو ابني غرفه كارتون
ميلاد داگوله هذا الحجي يگلي مااريد اطفال يعيشون نفس الفگر
سامي اني اريد
ميلاد اخ منك انت مريض وخابص روحك لو صاحي شلون
سامي ميلاد ترى داشاقى وياج انتي خيتي
ميلاد ليش ماادري بيك يله اندار اضربك ابره
سامي لا توجعيني
ابن عمي سامي كان طالب من تمرض وديناه اطباء عرفنا عنده كسر بين الفقرات وسوى بعمليه من يومها صحتها بتردي مستمر مرات ميگدر يگوم من الفراش وبعد زواج دعاء وسجود صرنا نداريه اني ومي اختي عمره ٢١سنه لو ما مرضه كان عان قيس بالعيشه وتزوجنا اني وقيس من زمان
قيس عندي احلام مثل اي شاب مااريد اخلف جيل جديد لنفس الظروف والفقر والجهل والعازه اريد اتزوج ميلاد واريحها من هذي الحياه من اشوفها تلبس نفس الملابس يوميه اتمنى املك عصى سحريه واخذها لغير عالم مو هي وبس كل اهلي كل الناس الي البسيطه الي اشوفها تعاني الحياه المره
اني وياها نگعد كل خميس برى بيتنا وبين الغرفه بالحديقه بين شجرتين الوحيدات الي بقوا من الحديقه
ميلاد مشتاقتلك ابو فقار (هذا اسم اخترناه لابنه المستقبلي واهله واصدقاىه كلهم يسموه بيه )
قيس اني شگول اليوم وگفت باب المحل شفت كم زفه فاتت ورحت بخيالي بعيد واتمنيت زفتنا الليله
ميلاد ياريت قيس الانتظار صار صعب وانت كل امنياتي
قيس يمتى يرفع الحصار ونبني غرفه واصبغها وردي واخلي البردات الشبابيك دانتيل ابيض
وغرفه اخشاب بيها سرير واسع وفرشه ستن ابيض احلام بسيطه ليش صعب تصير
ميلاد اگولك قيس اشو غرفه وبردات وفرشه واني وين بالموضوع
قيس اهو نسيتج ورا الباب ددخلي ياعيني منين مستحيه هههه
ميلاد اووووف قيس ليش تقهرني
قيس اكولج من يجي هذا اليوم مو تسويها صدوك وتخجلين وتستحين ترى اموتج والله
ميلاد منين استحي هو اني اصدگ
قيس ميلاد افكر اطلع للاردن لان تعبت مصاريف اهلي وعلاج والدي وسامي اجمع مبلغ افتح محل تصليح سيارات وتبديل دهن وارجع نتزوج
ميلاد لا عفيه خلينا سوا انوب افراگ
قيس هاي المصيبه مااگدر افاركج گوليلي شنو الحل
ميلاد قيس الليله خميس لاتگلبها كابه الي داحصله اني من الشغل والي دتنطينياه داجمعه عند عمتي سبيل وشويه شويه نبني
قيس ميلاد صبري خلص اريدج ويايه ليليه بحضني زوجتي
ميلاد قيس شغلة السفر شيلها من بالك لاتضوجني وغير الموضوع احجي حجي حلو اني مناقصه
قيس اعصابج حبيبتي لاتضوجين الله يحلها
ميلاد ضوجني وهسه يگلي الله يحلها
قيس مو گلنا لاتضوجين
ميلاد گولي كلمه حلوه واني مااضوج
قيس ماكو احلى من كلمة احبج وماكو احلى منج
شايفه مياده حناوي
ميلاد اذا گلت اشبها انتحر
قيس لا يابه اريد اگولج شايفه مياده حناوي شگد حلوه تخبل اشتعلوا اهلها
ميلاد روح قيس بعد ماحجاجيك عابتلك گاعده وياه يگلي مياده
قيس داضحكج شبيج تعالي اشاورج ليسمعونا الجهال ويگعدون
ميلاد ههههه والله انت ماوراك جهال هسه حتى لو خيمه اني قابله
قيس هي تاليتنا خيمه
ميلاد شاورني يله
قيس
همست باذنها تحبيني بگد مااحبج
جاوبت مااحب نفسي بگد مااحبك ضوى عيوني انت
رديت عليها
الدنيا كلها ماريد منها غيرج انتي امنيه وحلم وحسره بگلبي انتي
مافي دعاء ولاصلاه يخلص اذا مااختمه باسمج
ادينا بادين بعض واصابعنا متشابكه
نبقى ساعات نسولف وتنتهي ليلتنا
براسها يميل على چتفي وتگلي نعست
قيس نامي على جتفي حبيبتي
تصبح على خير ابو فقار
بوستها بخدودها
بوسه لاتسمن ولاتغني عن جوع
تصبحين على خير
وين رايحه نسيتي فقار اخذيه وياج
ميلاد خليه اليوم يبات يمك اني تعبانه
ميلاد
دخلت لغرفتنا مي گاعده اشرتلي اش لان عمتي نايمه
مي ها خلصت السهره
ميلاد خلصت راح اموت عليه وهو يفكر بالبردات والفرشه
مي حقه مل من البهذله يريد مكان نظيف حلو يعيش بيه ويه حبيبته من يرجع من الشغل تعبان
ميلاد سوده عليه والله ودي اشوفه احسن الناس ومرتاح وبنفس الوقت مليت انتظر تفتهمين شداگول
مي لا ماافتهم تريدين تعوفيه يعني
ميلاد اعوف قيس ليش اگدر ولج اقصد اريده تخيلي من اوگف گبال المرايه واشوف شعري ملامحي جسمي اتمنى كل هذا يكون ملكه
من اشوف حبايه بوجهي لو خط اخاف اگول يمكن مايعجبه ياربي الطف بحالنا ويسر امرنا يارب
مي نامي قبل لا تگعد عمتي
ميلاد نمنا نمنا
اختي مي طالبه اعداديه
احنا نتناگر على طول لكن احبها وماابخل عليها باي شي كل الي احصله اقسمه وياها
مااريدها تحس بالحرمان مثلي
هي تحبب الدلال والترافه وحلوه اذا حصلت شهاده راح تعيش مرتاحه
مرت ايام والوضع نفسه
الجمعه الصبح اروح يمهم البيت انظفه واداري سامي قيس دائما يكون نايم على القنفه ماعدهم مكان ثاني ينام بيه
دخلت غطيته فتح عينه شافني
قيس احلى صبح واحلى وجه
عندي خبر حلو الج
ميلاد شنو احجي
قيس اصدقائي مسووين سلفه ودخلت وياهم ويعرفون بظروفي وراح يسلموني اول واحد حتى ابني غرفه
ميلاد الحمد لله يارب احلى خبر
قيس استاهل عليه بوسه
ميلاد تبقى تطلبني على الزواج قيس حبيبي اي بناء بسيط بلوك والباقي عليه البردات وكلشي وحتى غرفه مااريد
قيس ميصير بدون غرفه بهذله هسه خلي نبني والباقي بسيط
ميلاد وحلقه شوكت نلبس فدوه اريد البسها
قيس انشاالله هالاسبوع عمري
ميلاد انشاالله قيس راح تصير صدوك ونتزوج
قيس راح تصير صدوك اخيرا