ام زهراء
13
راح من يمي..... طاهر.. واني بقيت مكاني..
ماكدر ادخل للمحاضره
وخاصه هواي جمعتنه محاضرات اني وعلياء
مااكدر ابقه هناك
او استمر بالتركيز
وجودي وعدمه ....نفس الشئ
مرت ساعه....او اكثر
وهم ضليت افتر نفس المكان
اريد اشوف حيدر
بس عمري مارحت للقاعه مالته... صار 4 اشهر بالجامعه
بس ماصادف يوم صعدت هناك
ولا اندلها ابد
رحت امشي
واكوو طلاب هوواي تتمشئ
ماعدهم محاضرات....يمكن
واتذكر لمن كنت اتمشئ وي علياء ونشاقئ ونقلد علئ هوايه شباب وبنات
وصلت درج
صعدت بيه
بس مااعرف وين راح امشي بس كنت اشوف حيدر دائما منا ينزل
اكو قاعات هوايه
بيها محاضرات... واكو قاعات بس بيها شباب وبنات دسولف
امد راسي بالباب واطلع
واشوف
ماكو حيدر
علي اندل قاعته كانت جوه
بس اني جايه اشوف حيدر
شلون هسه
اكيد علي عنده محاضره لذالك ما اجه اليه
رحت امشي بين ممرات هواي
وقاعات كلش هوايه
وكل الاقسام
اكو قاعه بعيده حيل
شفت بيها شاب لابس قميص اسود وبنطرون اسود
كاعد علئ اول استيج
يمكن ذاك حيدر
رحت امشي
وصلت اللقاعه
اي حيدر
دخلت للقاعه
حيدر
رفع راسه.....ها حنونه شجابج لهنا
ردت اشوفك ..واطمئن عليك
شلونك
زين...
شدسوي...هنا خنكه.... خل نطلع لبره
لا ماكدر اطلع
كانت القاعه
بيها هواي طلاب عكس قاعتنه. وباقي الاقسام... بيها قليل
يله خل نطلع حيدر
اذا تبقه هنا ... تتعب اكثر
حنين شبيج لتلحين
لزمت ايده وسحبتها.... يلا بداعتي گوم حدوري
درت وجهي
طاهر
اي طاهر كان كاعد بأخر استيج... هذا شجابه هنا
كل مكان وراي
وديباوعلي
شبيه هذا.... درت وجهي عالسريع...لحيدر
يله گوم
مااريد حنين..... روحي لقاعتج لخاطر الله
دخل علي
ها انتي هنا
دورت عليج بكل مكان...شسويتي بيه خوفتيني شالقصه غير تنطين خبر
لا بس اجيت الحيدر .... ليش
لا ...خفت تسوين شئ
او صاير بيج شئ
لا مابيه..... بس عبالي انت عندك محاضره وماتكدر تطلع
لذلك اجيت
اي هستوني خلصت ... ورحت لقاعتج ومالكيتج
يله خل نطلع.... لبره شويه
علي.... حنين ...مااريد اطلع لا تضايقوني فدووه
يعني.. هنا شنو تستفاد
اني ارتاح هنا ..... روحو انتم
خلص علي لاتضغط عليه... خل نطلع
طاهر ...يتباوع اليه
ومن اباوع اله...يسوي نفسه مدنك او يلعب بشعره
طلعنه من القاعه
وافكر
يعني طاهر نفس قسم حيدر
ماصادف مره ذكر اسمه حيدر حته من يشوفه بالقاعه مالتي
مايحجي وياه
طلعنه..... علي كالي
يله روحي لقاعتج .. لا تطلعين لبره حاره عليج
ضليت امشي... وعلي اختفه
وين راح هذا
واني من كد الممرات والقاعات
حته ضيعت الدرج
اباوع منا واطلع منا
ماكو .... عزه والله فشله
مااندل الدرج وصارلي 4 أشهر هنا.... ادخل ممر كله قاعات
وادخل ممر نهايته مسدوده
هسه اسال منو
مضيعه الدرج
التفتت
طاهر
لا ....
..الدرج من هنا.... ويأشري علئ المكان
سكتت
ورحت ...نفس ماوصفلي
نزلت الدرج
ورحت للقاعه.... كعدت
اجتني بنيه ويانه بالقاعه... نور
ها حنين.... محتاجه شئ
لا تسلمين.. بس رحت لحيدر.... اسال عنه جانت تباوع النه خوله
وتقراأ بملزمه
دخل طاهر للقاعه..
نفس كل يوم
محتاجه شئ.... والجواب لا
ونفس رفعه الخشم .......ونفس كفيان الشر
ونفس نضرة طاهر اليه
الي وراها الف حكايه
شبيه هذا الخبل
سويت نفسي مامنتبه عليه .... فتحت الملزمه وبديت اقرأ بيها
واني مرتبكه مااعرف شبيه
واگلب بالاوراق بسرعه
وحته حرف بالملزمه ماشفت
بس ادير بالاوراق واباوع واگلب علئ الصفحه الثانيه
وارجع للقديمه
شجاني....ليش هالارتباك....
يلا نطلع
باوعت لطاهر.... يحجي وي خوله
وبنبره غريبه... صوت لا هو صراخ ولا صوت بحنان... ولا صوت كفيان شئ نفس كل مره
لملمت اغراضها خوله
وطلع هو
وهي تمشي وراه
وطلعو من القاعه.... وين اخذها للمسكينه
وره دقائق
دخل الاستاذ
وسلم علينه.... وبدأ مقدمه... هذا الاستاذ الي من يدخل
علياء كانت تضحك من كل كلبها عليه وعلئ صلعتها الي بيها بس شعرين طوال بالمقدمه ومخليهن صفح
باوعت اله
ابتسمت من شفت شعراته
وتحسرت ....لان مرت نص ساعه واني ناسيه بيهن علياء...
حبيبة عمري
وين خوله
ليش ماإجت
شنو وين اخذها هذا المعقد.... الاستاذ يشرح واني اتباوع علئ الباب شوكت تجي خوله
مرت ساعتين
بالمحاضره
وخوله ماكوو ....
طلع الاستاذ..... واجه استاذ ثاني وخلص الدوام
وخوله هم مااجت
يمكن عدهم ضرف....وطلعوو للبيت
طلعنه من الجامعه.... واجه بابا مر علينه وطلعنه للبيت....
وصلت للبيت.. تغدينه.... ورحت نضفت المطبخ والبيت
ورحت لغرفتي .... بديت اقرأ
وافكر.... ليش مارجعوو
هسه اني شعليه...... بس بيوم تشييع علياء شفت طاهر هنا
شجابه للفاتحه
كان وياه رجال جبير.... يمكن ابوه
بس شتقرب الهم..... علياء
ماصادف مره...... سلمو عليها او سال عنها حته من بعيد
لا لازم اسال باجر .... اسال خوله
بس شتگول عني .... ليش اسال
مر الوقت
واني انتظر شوكت يجي باجر.... اروح ... وأسال
الصبح ب6 كعدت
ماااعرف شبيه... مو نفس كل مره
كل يوم اكعد حزينه ومكتئبه.. بس هاليوم متحمسه لدوام كلش
غسلت ورحت اجهز الريوك علئ وكت
وبدلت
ورحت كعدت اهلي لريوك
امي
يمه.... شنو هاي
شكوو
انتي كاعده تسوين الريوك.... خاف مصخنه يمه
لا يمه....بس مجاني النوم بعد ال6 وگلت خل اسوي الريوك
كعدت علي... وراح يجهز نفسه
حيدر يلا اكعد حتصير ب7
يلا كووم
مااروح اليوم روحو انتم
علي.... اني هم مااروح
ليش شبيكم ..... لعد انت علي شكو جاي تبدل وتجهز
عندي شغل اليوم .... صديقي كال مر عليه الصبح
وراح اروح عليه
حيدر گوم شلون تعوفوني وحدي
اني شلون ابقه هناك
ولا واحد بيكم واحد
يلا كوم حيدر.... واسحب الشرشف منه
حنين
اطلعي وسدي الباب
جاي يصير الضوه بعيني....
طلعت من الغرفه وسديت الباب
طلعت بره
كعدت علئ ميز زغير وناصي عدنه مخلينه بالطارمه..... وغلدبت وجهي
اجه بابا
شكوو اليوم شنهوو هاي
وين راح حماس الصبح والريوك الحلوو
بابا محد يقبل يداوم ويايه
وشكو بيها اعتمدي علئ نفسج حيدر بس هاي السنه وياج ويروح
وعلي هم يروح
لازم تتعودين
يوم شعل يوم ضرف... ومحد يجي وياج
يلا راح انتظر علياء تجي
شنوو
اني
ماانتبهت علئ نفسي شحجي
علياء
بابا ....
اوف يابابا .. افهم قصدج ..وافهم ضرفج والله يعينج
بس اصبري ... وهاي الحياة
اي جاي اصبر
بس ماجاي اتحمل... كلشي يذكرني بيها
كل مكان
بالشارع
بالبيت هنا...بالجامعه
حته بالسياره بابا
حته بسيارتك جاي احس بالالم..... واحس بغيابها
بابا كنت فرحانه واحسب يوم يوم
شوكت يجي اليوم الي تتزوج بيه حيدر وتعيش وياي
بابا كنت اغار واموت قهر من ياخذها مني حيدر هناك بالجامعه ويتمشون واني وابقه وحدي
اموت غيره
اريدها بس اليه
ماتحملت فكرة حبها لحيدر
هسه
هسه شنوو
ياريت باقيه علئ حب حيدر
هسه اخذها الي اصعب من حيدر
بابا اخذها واحد مايرحم
ويفرق
اخذها واحد مافكر بينه وبمشاعرنه
بابا الموت
الموت ضالم وقاسي
لابعد حدود
الموت ماعنده گلب....
استغفري ربج يابووويه
هاي سنة الحياة وكلنه علئ هذا الطريق مانموت هسه نموت باجر
واذا مو باجر بعد عكبه
گومني بابا
ولبست جنطتي.... وملازمي
وطلعنه وكعدت يمه بالمقدمه
وطلعنه للجامعه
وصلت للكليه
امس بدون علياء واليوم بدونهم كلهم.... وحيده
ومحد وياي
امشي والتفت علئ سيارة بابا
وهو يأشرلي بيده مع السلامه
اشرت اله... مع السلامه
دخلت للجامعه
وغصه جبيره بكلبي.... اول مره ادخل هجي وين شقانه وضحكنه
قبل
وين كلشي حلوو
راح
وصلت للقاعه هووسه
وكلها دتسولف
وتضحك
... كعدت بالاستيج وينج علياء كنت اسولف وياج وحيدر لازك هنا كان
وعلي يروح ويرجع
تحسرت
باوعت للاستيج مالت خوله ماكو
هاي شكوو ليش ماكوو
كل مره تجي من وكت
اجت عليه رضاب.... حنين
هلا
اكعد يمج عادي
ها... اي طبعا حبيبتي اكعدي ....
هذا كرسي لمرحومه
اضوج من اشوفه فارغ
اي اني كاعده يم ذيج المعقده....بالكوه تسلم وتجاوب اما اي
اما لا
قصدج خووله
اي خووله
فقررت اجي اكعد يمج اذا ماعندي مانع
لا حبيبتي شالقصه
قابل جايبته من اهلي
كعدي كرسي الحكومه هذا
ايي... انتي هم ماتحجين
بس وي جماعتج كاعده واصدقائج
انتم مجموعه حلووه ... بس
بس شنوو
يعني حيدر كان حبيب علياء
دنكت
واخذت حسره
ايي
ها
وانتي
اني شبيه .....حبيبج علي
شنوو
اقصد علي الي دائما يجي هنا حبيبج
علي ... الي يجيني ونحجي هنا
ايي
ليش هالسؤال
اني اسفه هذا الشئ خاص بس ردت اسال لا غير لان مبين عليج ماتحبين علي
تحبين حيدر
ومتعلقه بيه اكثر
بس هو يحب المرحومه ... ونفس الوقت هم يشاقيج ويحضنج كدام الكل
عليمن تقصدين
الولد الي يجيج حيدر
اكلج اني ماجاي استوعب شئ ....
انتي قصدج اني احب حيدر وعلي نفس الوقت
دنكت ..
اي طبعا احبهم واموت عليهم ذول روحي من الدنيا
بس حيدر اقوئ من الكل
شلون تصير هاي
اي تصير شنو ...قابل المحبه بس لشخص واحد
لعد شنو
لا مامكتوب علئ القلب فقط واحد للحب
باوعتلي باستغراب
وسكتت
بس حيدر يحب علياء شلون تحبينه انتي
ليش مااحبه ....واذا يحب علياء بالعكس كنت فرحانه لان راح تجي لبيتنه
وانجمع وياها ابيت واحد
تجي وياكم شلون
للبيت شبيج
ليش
شنو ليش ...غير كانو متفقين زواج
وتجي يمنه من يتزوجها اخووي
اخوج
اي اخووي ... وتصير زوجة اخوي ونعيش ابيت واحد
رضاب انتي اليوم شبيج
شكوو ....خاف منعسه بعدج
اخوج شنو دخله بالقصه
باوعت الها... واشرت علئ دماغها ....هذا واكف شنو
اي انتي وگفتيه هسه
ليش
تگولين تحب حيدر وعدهم علاقه... وراح تزوج اخوج
وانتي تحبين علي وحيدر
نفس الوقت
شلون هاي
شنو من حب هذا ...وشنو من مجموعه انتم اعوذ بالله
شنوو قصدج
شبينه احنه من مجموعه... لا تجاوزين ....
واحترمي نفسج
علئ اذنج حبيبتي ارجع لمكاني افضل
وگامت
كمت وراها
وسحبتها من ايدها
ليش رحتي
شنو شفتي مني.. وشبينه احنه..... وشنو قصدج
لا ماكو شئ
كل واحد حر بنفسه
طبعا
اخذي راحتج ....اعتذر ازعجتج
وكعدت بنفس مكانها. القديم وفتحت ملزمتها
رحت يمها... رضاب
نعم
باعيلي
رفعت راسها
شكوو
انتي هسه ماتحبين اخوتج نفس الشئ
اكيد
وماتفرقين بينهم ابد
اكيد
ولازم اكو احد مميز واقوئ محبته بينهم
هم اكيد
لعد ليش استغربتي من كتلج احب حيدر وعلي اثنينهم
اي بس انتي كلتي اخوتي
ماكلتي الفريند مالاتي
فريند شنوو
غير نفس المثال
وحيدر وعلي اخوتي... وهم احبهم نفس ماكلتي بس حيدر اقوئ من علي
لان ماضاربني ابد
وهو يقريني وحته من كنت صغيره يمشط شعري
وياخدني وياه لاي مكان يروح عليه
وياخذني للملعب دائما
احبه من كنت بالگماط وماكنت انام الا بحضنه
هنا صفنت
شنو ....مفتهمت
حيدر وعلي،شيقربون منج
شبيج غير اخووتي
اخوانج بالمجموعه قصدج
يووو شبيج اخواني .... اخوتي من امي وابوي
شتحجين حيدر وعلي اخوانج
اي شبيج
غير اخواني ....لعد شنو كنتي تتوقعين
كنت اتوقع حبيبج
نفس مايعرف الكل
شنوو
ايي ....نفس مايعرف الكل الي بالقاعه ذولي اصحابج
للحكايه بقيه