[ان كثيرًا من الناس وصلوا إلى أبعد مما ظنوا أنفسهم قادرين عليه لأن شخصًا آخر ظنّ أنھٓم قآدرۆن على ذلك]
بعد مرور شهر من سفر نوسه وامين عرفت من نوسه انو امين رجع لندن طبعا نوسه ماعارفه الحصل واكيد ما حتعرف ❌ و انا كان لازم القي طريقه اوصل بيها لي امين انو مافي داعي يرحل من لندن واني انا ح احول من المستشفي وخلاص كده الموضوع يعتبر انتهي ❌ حرام امين يخسر شغله 😔 التدريب علي يد د.ديفيد مختلف ومفيد جدا مش كفايه انو اتاذي عاطفيا بسببي يقوم كمان يخسر شغله بسببي 😔 والاهم اني اعرف موقفه اتجاه نوسه هل بعد الحصل حيخليها تعيش معه في نفس البيت ولا لا ؟. لو ما عايز تقعد معه حيقول ليها شنو 😮 ماعندي حل غير اني اقنع مهند يلاقي امين عشان يفهمه الحاصل ويفهم منو موقفه اتجاه نوسه ، وكمان اكيد نوسه لما ترجع حتعرف اني حولت من المستشفي وممكن تلاحظ انو انا وامين بقي مافي تواصل بينا عشان كده لازم ردنا ليها انا وامين يكون واحد اني اتحولت عشان اكون قريبه من اولادي وانو حسام فقري 😬 فارض علي انو علاقتي بكل زملائي يكون حدها المستشفي وبس اذا من الطبيعي بعدما انا اتحولت علاقتي بي امين تنتهي .. مشيت اتكلمت مع مهند وقعد ينقنق لي 😏
مهند : مريومتي كلامك منطقي جدا لكن الحاجه دي ممكن تعمل ليك مشكله مع حسام لو عرف 😬
انا : مافي ولا سبب واحد يخلي حسام يعمل مشكله😬 انت حتوصل لي امين كلام اتفقنا انا وحسام عليه واقول ليك حاجه كلم حسام انك حتلاقي امين .. مهند مشي كلم حسام وحسام جاني طائر 😅
حسام : انتي القلتي لي مهند امشي يقابل امين صح؟؟؟ 😒
انا : ايوه انا القلت يا حسام .. ممكن توريني امين كان حيعرف كيف انو انا وانت اتفقنا اني اتحول من المستشفي وخلاص كده الموضوع انتهي ؟ شوف يا حسام كلمه حق ح اقولها في حق امين انا الزول دا ما شوفت منو غير كل خير وكان بحترمني وبحترمك ولولا حركات نوسه امين عمره ما كان حيقول الكلام القاله يبقي ليه نحن نكون السبب في انو امين يتحول من شغله بسبب حاجه حصلت غصبا عنه.! وريني نحن حنستفيد شنو لما امين يتحول؟ ما خلاص انا البعدت منو تاني في شنو؟
حسام : تبريرك القلتي دا ما بهمني 😏 انا البهمني انك كنتي صريحه معاي وما كذبتي في انك انتي القلتي لمهند يمشي يقابل امين لاني فاهمك كويس ومتاكد انو دي فكرتك انتي .. اقسم بالله يا مريم لو كنتي نكرتي تاني عمري ما كان صدقتك في اي حاجه ولا كنت ح اثق فيك تاني وياداب الكان علاقتنا اتاثرت بسبب امين .. وعشان صراحتك معاي انا موافق وبكامل رضاي انو مهند يقابل امين وامين ما يخسر شغله 😘
انا : حسام الحسيني انا بخاف ربنا فيك ما بخاف منك عشان اكذب عليك فشنو تاني ما تسالني اسئله تختبرني بيها عشان ما انا الزوله البعملوا ليها كده 😡 ولا انا قعد اعمل ليك كده 😏 انا ما كان غالبني اكلمك بنفسي بس انت اول ماتسمع سيرة امين كنت حتقاطعني 😬
مهند قابل امين وفهمه الحاصل وجاء اداني تقرير المقابله 🎤
مهند : امين خجلان شديد من الحصل وبعتذر ليك من الموقف الختاك فيه غصبا عنه وقال لي ياداب ارتحت بعدما عرفت انو مريم وحسام اتجاوزوا الموضوع دا من غير ما علاقتهم تتاثر .. وبخصوص نوسه قال لي بعد وديتها لاهلها وشوفت وضعهم الصعب البقي اكعب من الاول ياداب اقتنعت بكلام مريم انو نوسه من مصلحتها انها تقرا وتشتغل في لندن عشان تساعد اهلها وما ح ابقي عليها انا والزمن عشان كده الوضع حيستمر كما هو تجي تعيش معاي واي زول يكون في حاله زي ما كنا وانا متكفل بكل مصاريفها .. ياخ انا اتكيفت منو 👍الزول دا عجيب 😍 قربت اقول ليه خليك من مريم ونوسه وكاتي وتعال اعرس ليك موده اختي 😂
انا : داير تناسب امين وتدخله العائله وتجلط حسام 😅 هوي ياهنودي الكلام دا كان قبل ما احمل و اولد لكن بعد كده ما عندك اي طريقه انا ما بقدر علي الاولاد ديل براي خلي الراجل دا يربي اولاده 😉
قبل ما اتم الاربعين بكم يوم سافرنا كلنا السودان😍 وبعدنا بكم يوم نوسه جات الخرطوم عشان تنزل كورس تحضيري لامتحان الايلتس ونزلت مع نسابتها ونحن كنا نازلين في بيت ناس حسام .. بعد كم يوم نوسه ضربت لي من الظهر قالت لي جاينك انا ونسابتي المساء نبارك ليكم طوالي جريت لنانا كلمتها 😂 انو جايننا ضيوف استايل و سمحييييين لمن غلط 😍 انا ونانا جرينا الكوافير جري 🙊 وجينا راجعين نانا مراه خطيره جدا في الشو وعندها عده استايل ما بتطلعها لي اي زول قامت طلعتها زي الما حصل شي 😂 وظبطت ليهم ضيافه كاربه وحسام بس بضحك فينا 😂 مع اني كنت متوقعه يعمل لي حركات عشان اهل امين ، لكن قال لي داك براه ودا براه في النهاية الناس ديل لاقوك في لندن وبعرفوك لكن ظرافتي دي لازم يكون عندها مقابل 😉 قمنا قشرنا كلنا حتي اولادي المساكين ديل ما رحمتهم كتمت نفسهم بالقشره اجي يا اخواني ديل توته ومينو انتو بتهظروا ولا شنو 😂 جات نوسه ومينو وتوته وام امين ياخ ماشاءالله عليهم الناس ديل سمحين عديل واستاااايل قاشرين قشره من امها 😍 والعجب نوسه لما ما اتعرفت عليها وعلي قول حسام عايشه دور انها استايل من صغيره 😂 جوا شايلين داك يا بوكي الورد الما خمج 🌷 وديك يا الشوكولاتة السويسرية 😋 و سلسلين دهب لمريم و فرح ودبوس مكتوب فيه ما شاء الله لمحمد 😍 نانا تعااااين ليهم سااااي بتموت في الناس السمحين 😅 ضيفتهم تمام غايتو ابدا ما قصرت ورفعت راسي وحسام اخر ظرافه 😲 بعدما مشوا نانا ابدت اعجابها بي نوسه وقالت لي وقعت واقفه عندها نسابه خطيرين ان شاءالله راجلها يكون سمح زيهم واخلاقه عاليه 😍 حساااام الحاقد قال ليها يعني ما بطال😱 ونوسه دي تعتبر بت مريم اتولدت واتربت علي يدها لانو مريم غيرتها توتلي و وراها صور نوسه قبل وبعد 😂 غايتو اتفشي غيظه من امين كله في نوسه وحكي لنانا بكل دراماتها 🙊 ونانا لقت ليها موضوع وانا طوالي جاتني فكره اني اخلي نانا تساعدني في موضوع نوسه
تاني يوم استفردت بي نانا وحكيت ليها القصه من طقطق لي السلام عليكم عشان تفهم الوضع كما هو وتقدر تساعدني .. نانا قالت اول حاجه لازم تشوف امين الجنن ولدها دا😅 انا طبعا بعد الحصل اي حاجه عندها علاقه بي امين مسحتها من تلفوني لكن استعنت بهنودي رسل لنانا الصور في الواتس وكتب ليها ندوش امين ما سماحه وبس راجل بمعني الكلمة و ذوق وراقي ودكتور و مرطب يعني استعجلتي لما عرستي لي حلا 😜
نانا : لا حوله ولا قوة الا بالله لو دا امين طيب سيدنا يوسف حيكون كيف 😮 النصيحه ولدي سمح لكن ما لدرجه امين استغفر الله من سماحته 😍 ومهند بشكر فيه يعني خلقه واخلاق 😍 وانتي يا العويره اول راجل تحبي تقومي تعرسي طوالي غايتو ضيعتي عليك جنس فرص بسبب استعجالك 😜 لكن حسام تعب معاي فرصه مكاواه ولقيتها فيه
انا : لو شوفتي منظر ولدك لما سمع كلام امين ولا لما كان بصرخ زي المجنون ابدا ما حتفكري تكاويه 😞 عارفه لو كاويتي حسام غير ما حتخلي يتجنن علي ويكرهني الاجازه ما حتعملي حاجه 😢 وانا حكيت ليك عشان عايزه زول غيري وغير الناس الاحتكت بيهم نوسه يصاحبها ويطلعها من دور مريم العايشه .. لانو لو نوسه ما اتخلصت من شخصيتي المتقمصها دي 😬 انا لا حاقدر اشجعها ولا اساعدها في تطوير نفسها و حتضيع امين من يدها 😬 وانا ما حالقي زول احسن منك يعمل الحاجه دي
نانا : اوكي خلاص خليت حسام 😬 و نوسه خليها علي انتي بس اخلقي لي جو مناسب الاقيها فيه وانا بعد داك بخلق تواصل بينا براي وهدية مني ليك ح اديها كم وصيه كده عن التعامل مع الرجال كلو ولا الولد الطياره دا يطير منها 😍
انا : نوسه ما حتقعد في الخرطوم كتير يعني ما عندك زمن وانا عايزاك تستفيدي من الزمن وتوريها مشكلتها بالواضح ، امين قبل كده علق ليها وهي قعد تبكي ولما انتي تقومي تعلقي ليها بانك معجبه بيها لكن الماعاجبك فيها انها بتقلدني هي كده الكلام حيقع ليها وحتفهم موضوع انها تقلد زول دا ما حاجه كويسه وانتي بعد داك باسلوبك الظريف وريها الفرق بين انها تقتدي بزول وبين تقلده تقليد اعمي
[والذي رتب تفاصيل حياتك قبل قدومك.. أيضيعك بعد مجيئك !!.. "ثق بالله" ]
في نفس الاسبوع عزمت نوسه غداء عشان يتلاقوا هي ونانا وخليتهم اغلب الوقت يتونسوا مع بعض ونانا برمجت ليها كم برنامج مع نوسه عشان يتلاقوا كتير وفعلا في الاسبوع بتلاقيها زي 3 مرات ما خلوا ليهم حوامه ما حاموها 😅 نانا كان مستهبله ودايره تتفسح ما عارفه لكن برمجت ببت الناس جنس برمجه 😂 وبعدما تجي راجعه بتستغلني مريم اعملي لي كده وكده انا مش تعبانه وحايمه بعالج ليك في صحبتك 😂 من شده ما بقت صايعه حسام قال لي بدل ما انا اطلقك بسبب امين امي الحتتطلق بسبب نوسه 🙊
غايتو ما شفت نتيجه الحوامه دي الا لما مهند جاني يتبسم وقال لي نوسه الليله حددتا مع امين 😂
انا : ههههه عملت ليه شنو ؟
مهند : امين ضرب لي قال انو هو اول ما جوا السودان فتح لي نوسه حساب باسمها وحول ليها فيه من حسابه قروش قدر مصاريفها الهنا واداها بطاقه الصراف الالي عشان ما تتحرج لماتطلع مع ناس بيتهم وتصرف براحتها ولما وداها لاهلها اداها مصاريفها بالزياده في ظرف زي ما انتي وصيته .. الليله قام حول ليها في حسابها مصاريف الشهر الجديد ورسل ليها مسج وراها بعد مسافه جاءت مسج من البنك بأنه في حساب حول ليه قروش في حسابه ولقاها دي نوسه رجعت ليه القروش الرسلها 😂 طبعا استغرب وضرب ليها سالها ليه عملت كده؟.. قالت ليه انت المره الفاتت اديتني القروش في ظرف وانا شوفتها بعد انت سافرت بمسافه ولقيتها كتيره شديد وما حبيت ارجعها ليك ونقعد نتعابط واعتبرتها دي مصاريفي حقت الكم شهر الحاقعدهم في السودان لكن تقوم الشهر البعدو ترسل لي زيها تاني كده اوووفر و ما في سبب يخليك تعمل كده وياريت تاني ما تكرر الحركه دي 😏
انا : ماااللك مع الحركه العجيبه 😍 ياها نصائح نانا بركه الحوامتهم البقت بفائدة 😂 لكن واضح انو امين ماعارف انو نوسه باعت دهبها وكان داير يساعدها في مصاريف اهلها
مهند : بالضبط كده هو اساسا السبب الخلاه يحكي لي قال لي انا داير اساعد اهل نوسه من غير ما هي واهلها واهلي يعرفوا وماعندي زول غيرك قريب لي نوسه ممكن يساعدني يا حليل مريم 😅 وانا قلت ليه خليني افكر وبرحع ليك
انا : يا حليلي ساي😔 الله يسامح حسام الحرمني من المشاركه والتخطيط وابراز المواهب 😭
مهند : مريم استغفري هو هسي في زول غيرك قعد يخطط ويشارك ما انتي الهسي مسلطه نانا علي نوسه ومسلطاني انا علي امين والله لو كان دا راجل غير حسام ما كان خلاك فشنو احمدي ربنا واسكتي 😬
انا : الحمدلله 😊 ما دام دا رائك فيني 😌 ابدا ما ح احرمكم من مشاركتي و ح اوريك فكره ظريفه .. ناس نوسه محتاجين لي الآلات زراعيه وهم فتشوا و لقوا الاسعار غالية وبالاقساط اغلي والقسط الشهري كتير شديد وما بقدروا عليه وانا قلت ليها اشتريهم ليهم كاش وهي تدفع وقت ما تقدر وبالاقساط التريحهم حلفت وابت ، لكن هسي انا جاتني فكره بما نوسه مصاحبه نانا ، نانا تقول ليها انها عندها قريبها عندو الالات زراعيه واسعاره كويسه وببيع كاش لكن هي ممكن تخلي يقسط ليها وبنفس سعر الكاش يقوم امين يدفع نص القروش والنص التاني يدفعوا ناس نوسه علي اقساط علي اساس دي كل القروش
مهند : كلام ظريف بس نوسه سالت قبل كده وعرفت الاسعار ما حتحس بالفرق في السعر
انا : يا زول نوسه ما بتعرف ماركات الالات قول ليها دي ماركة اقل من الشافتها لكن مشكره في السوق .. ولو داير زول يظبط ليك الموضوع دا ماعندك غير حسام ابو صحبه شغال في الحاجات دي وشركته ما ضمن الشركات المشت ليها نوسه وممكن يضبط ليكم الموضوع دا من غير ما نوسه تفهم انو نص القروش اتدفعت .. انت امشي احكي الكلام دا لحسام وشوف حيقول ليك شنو و رجاءا اول حاجه قول ليه دي فكره مريم عشان ما يجي يعمل لي تحقيق ومريم قالت ليك بتخسرك لو جيت ناقشتها 😅 ظروفها الاسريه ما بتسمح ليها بأي نقاش 😂 ولو وافق خلي يظبط الموضوع مع نانا .. وشكرا 😘
مهند : وعفوا يا المحرومه 😂 زول غيرك قدر علي حسام دا مافي 😅 انا ذاتي بقول ليه عندي ظروف اسريه زي اختي و اجب بنعم او لا من غير اي نقاش 😃
حسام وافق 😃 وهو ونانا ظبطوا لي نوسه الموضوع وامين حول لمهند القروش واشتروا الالات من غير ما نوسه تفهم الحاصل ودفعت القسط الاول واتفقت مع الراجل علي باقي الاقساط ورسلت الالات لابوها 😍 الموقف دا خلي امين يكبر في نظرنا 😍 وعلاقته بمهند بقت ممتازه وحسام ذاتو اتكيف من امين وقال لي لو ما كلامه القاله 😬 كان هسي بقينا اصحاب لكن بعد الحصل نو وووي 😜
في نفس الاسبوع الكنا مسافرين فيه نوسه امتحنت الايلتس ونجحت وجابت اسكور كويس شديد 😍 عن الرغبه في النجاح والاراده القوية والمثابرة احدثكم 👆فرحتي بيها كانت ما بتتوصف مر علي شريط نوسه مما عرفتها واتذكرت اول ايام لما كنا بنحوم في السوق عشان احفظها اسامي الحاجات ونوسه بقوه إرادتها وصلت مرحله انها تمتحن الايلتس وتجيب اسكور عالي حيخليها تواصل دراستها في لندن بكل سهوله وكمان تلقي فرصه شغل كويسه 💗 تاثير نانا علي نوسه و تخليصها من محاكتها لي كان واضح والحاجه دي ظهرت في تصرفات نوسه 😘 نحن رجعنا لندن ونوسه رجعت لاهلها عشان تظبط مع ابوها امور الشغل قبل ما ترجع لندن وتبدا دراستها في مجال الاقتصاد والجاي في لندن احلي 😍
تتبع ...