[لا شيء ألذ من أن تكوني بطلة نفسك، أن تهزمي انكسار روحك ، أن تمضي في هذه الحياة إمرأة شجاعة تعرف ماذا تريد، و تعرف تماماً كيف تحصل عليه]
الاسبوع الاخير القبل سفر نوسه كانت قاعده معنا عشان تجهز للسفر و ماعندها اي تواصل مع امين لاشاف تجهيزات السفر ولا شاف النيولوك 💇 كل العمله رسل ليها مسج 📩
امين ⬅ ما تشتري هدايا لاهلي🎁
ورتني المسج وهي مغيوظه منه طوالي شلت منها التلفون ورديت ليه
نوسه ⬅ انا خلاص اشتريت كل الهدايا لاهلي واهلك 🎁
امين ⬅ خلي الهدايا الاشتريتيهم لاهلك وانا حاشتري عطور لجدي وابوي واخواني وامي وحبوبتي وبس لاعمتي لابناتها ولا نساوين اخواني ما حاشتغل بيهم ❌
نوسه ⬅ ما انت البتحدد لي اشتري لمنو واخلي منو والهدايا الاشتريتها لاهلك ح اديها ليهم ولو انت عايز تشتري ليهم هدايا تاني ابقي شوف ليك حاجه غير العطور لاني اشتريت ليهم عطور من باكو رابان و لانكوم و ديور و شانيل وجيفنشي 😏
طوالي سكت ود الذين شكله كان خايف من ذوقها 😅 شايف حالتي وقايلها بتجهز براها وماعارف نحن عصابه ولما نستلم الموضوع الا نحدده 😅 نوسه معها خبير العطور الما سائل في امين افو كمان بنلعب نحن 💪 امانه لما نستلم الزول ما صعبين 😌
انا وديتها الكوافير عملت حمام مغربي و فيشيل وبدكير وغيرنا لون الشعر 😍 وقبل السفر بيوم كلمت جارتي سودانيه لمياء (لي لي) لو متذكرنها 😅 جات ودتها تتحنن ما بفكها براها بعد شوفت حنه عرسها 😤 اوووه لالالا نوسه بقت عجيبه مره 😍 الحنه رهيبه 😍 ولون الشعر(أومبر بروند بالاييج) طلع معها خرافي ونااااايره تسوي كدي 👋 عشان كده بنقول الاهتمام عنده اثر مهما كنتي جميله لازم تهتمي بنفسك والشينه تزود جرعه الاهتمام 😉 وانا بقول دايما مافي بت شينه بس في بت وسخانه ومبشتنه ومامهتمه بنفسها وكتير في بنات ما جميلات لكن جذابات بنظافتهم واناقتهم .. نوسه من يومها جاتني سمحه بس مبشتنه وماراقيه وحاليا بقت حاجه تانيه 😍 لما خلت حلا تلاوذ منها 😂
حلا : البت دي بعد دا بقت خطر علينا ما تقوم تجاذف واحد من رجالنا 😂 اصلو مافي حاجه بتسقط حجرنا غير شلاقتك دي 😬
انا : ههههه انتي خافي ساي هنودي سوداني اصيل👍 وقال حيدبل بسودانيه 😅 لكن انا مطمئنة حسام قال ما حيغلط نفس الغلطه ويعرس سودانيه تاني 😌 حيدبل بخواجيه اصليه 😅 وياعواليق انتي شلاقتي الماعجباك دي هي العرست ليك بيها اخوي وجابتك تقري الماستر في لندن 😏 ما تخليني اقوم عليك زي ماقمت علي حسام ومهند 👌
( سكتت طوالي 😆 مش قلت ليكم الناس ديل بضيعوا من غيري وشلاقتي دي الظبطت ليهم امورهم وكل ما يقلوا ادبهم علي بديهم علي راسهم و بثبتهم في حدهم 💪) 😌
انتهينا من مرحله التجهيزات و جينا لمرحله التوجيهات .. جبت نوسه قعدتها عشان اديها التوجيهات لانها شتره 😬 ممكن تعمل ليها حركه تضيع بيها تعبنا دا كلو 😏 نوسه حبيبتي اسمعيني كويس ولا اقول ليك عشان ما تجي تساليني تاني قلتي شنو قلتي شنو سجلي كلامي دا في تلفونك 😬 انا براي مراه حامل ونفسي قايم ماتتعبيني وتقومي لي نفسي زياده 😓
نوسه : نفسك قايم من اللبس اللابسه دا لزومو شنو البنطلون كاتمه بيه نفس الجنيات ديل 😏 ما تلبسي جلابيه وتخلي الهمبريب يضربك انتي وجنياتك
انا : مافي زول مقوم لي نفسي غيرك وغير كلامك دا😡 جنيات في عينك ما بتعرفي تقولي بيبي او طفل
نوسه : انا المقومه ليك نفسك 😲 شايله ليك 3 جنيات المابقوم نفسك شنو غايتو يا مريم بفلهمتك دي لكن عشان قلبك ابيض ربنا عوض صبرك علي عدم الحمل ب 3 مره واحده وحسام دا امسكي فيه قوي شكله بحبك بالجد سنتين ما حملتي ومافكر يعرس فوقك 😉
انا : وااااي منك قلت ليك كنت محافظه 😂 شنو كل مره شابكاني صبرتي علي عدم الحمل محسساني لي سنين طويله ماحملت وعندي مشكله هي كلها سنتين الماحملت فيهم وبكامل ارادتي 😏
نوسه : هوي ها قال بكامل ارادتي قال😏 ياكافي البلا ولا يوم واحد من ما عرفتك وبقيت اجي ابيت معاك جيتي رقدتي معاي في الغرفه بس لاصقه فوق راجلك دا نان بتسوا في شنو الليل كلو 😉 قال محافظه قال😏 غايتو كنت شايله همك العرسوا معاك في بلدنا كلهم شايلين جنياتهم وبكونوا قربوا يجبوا التاني لكن اهو دا ربنا عوضك
انا : طيب الحمدلله 😊 ربنا عوضني وريحك من شيل همي 😂وما ح ارد عليك فترت من اني افهمك الموضوع دا وهسي دا ما موضوعنا ركزي معاي وافهميني كويس ونفذي البقولوا ليك واهم شي سجلي ما بقدر علي الاعاده 😩
عايزاك تخلي عندك ثقه في نفسك وانك ما اقل من زول في حاجه واتذكري المجهود البذلنا خلال السنه دي و النتائج الاتوصلنا ليها انا حاليا شايفه قدامي بت جميله مثقفه وراقيه 😍 والاهم من دا بت آدمية وقلبها ابيض😘 ومفروض تكون فخوره بنفسها لانها نجحت في خطو اول خطوه من خطوات تطوير ذاتها في بلد غريبه عنها بكل سهوله و دا بدل علي انها زوله طموحه وقوية💪 انا فخوره بيك يا نوسه وعايزاك تواصلي بنفس العزيمة وماعايزه سفريتك دي تاثر عليك اي تاثير سلبي اي زول تحسي بيه بحبطتك ولا بقلل منك ابعدي منو واتجاهلي تماما❌ خلي زادك في السفرية دي ثقتك في ربنا وفي نفسك والحاجات العلمناها ليك ✔ عايزاك تطبقي كل الاتعلمتي في سفريتك دي خصوصا مع اهل امين 😘 وعايزاك تصرفي كالاتي :-
🔴 اولا : السيد امين عايزاك تطنشي زي ماهو مطنشك وترفعي سعرك فوووق ومن ما يجي يسوقك المطار تركبي ليه وش الافتراء وتسلمي عليه بطرف يدك زي ما علمتك 😎 في الطياره عايزاك تتصرفي كانو الزول الجنبك دا ما بتعرفيه 😎واوعك تتعابطي وتعملي نفسك خايفه لو خوفتي اسمعي ولا اقري قران لكن اوعك تتعابطي في امين ❌ حتشغلي نفسك بنفسك حتشيلي رواية تقريها زهجتي احضري فيلم ارجعي اقري قران تاني لكن امين تتجاهلي اتكلم معاك تردي ليه رد مختصر باسلوب راقي ، اتعلمتي الاتكيت في الاكل وحتبدي تطبقيه من الطياره وعند اهل امين كمان .. اوعك امين يعلق ليك علي النيولوك وانتي تتخففي ليه ❌ للمره الالف خليك بت تقيله😡 شنو خليك تقيله يابت انتي وطنشي امين 😘
نوسه : مش امين دا صحبك وبتريدي وبتقولي عليه راقي وذوق مالك بتحرشيني عليه كده 😯
انا : ايوا امين صحبي وبريده وبقول عليه راقي و ذوق لانو بتعامل معاي كده لكن انتي شوفتي من امين شنو غير سماحته؟. من ما جيتي مش مطنشك ورافع سعره عليك؟ يبقي حتتعاملي معه زي ما بعاملك 😎 ولمعلوميتك امين لو اتظارف معاك هسي تبقي يا ظرافه مصلحه عشان رضيتي تسافري معه وهو كده حيمحي شكوك جده او ظرافه عشان شكلك لانك بقيتي مزه جامده واستايل وفي الحالتين ظرافته ما لازمانا لما يبقي بتظارف معاك عشان معجب بشخصيتك الهو لسه ما اكتشفها يبقي لنا حديث اخر 😏 وقع ليك 😘
🔴 ثانيا : لما تصلوا حتنزلوا في بيت مينو ومينو حيركز معاكم جدا👀 دايراك قدام الناس تتعاملي مع امين كانه راجلك بالجد💑 اتونسي واضحكي معه ولو مينو سالك من علاقتكم كيف انتي وامين؟.. حتقولي ليه في الاول الموضوع كان صعب شويه لحدي ما عرفنا طبع بعض واتعودنا علي بعض حتي امورنا ظبطت و الحمدلله هسي مبسوطين وبتحصل بينا نقاشات لا تذكر زي اي اتنين متزوجين 😍 الكلام دا ما لي مينو بس لي اي زول بسالك حتي اهلك 👍 وعند اهل امين عليك الله انسي اسلوب كلامك البتتكلمي بيه معاي واتكلمي عادي زي ما اتعودي تتكلمي مع حسام ومهند(في الفتره الاخيره قسمت نفسنا علي 3 قروبات وعملت تطبيق عملي لنوسه😅 القروب الاول قروب حسام ومهند ديل بمثلوا اهل امين الظريفين😍 و وريت نوسه اسلوب الكلام المفروض تتكلم بيه وطريقه التعامل معاهم .. والقروب التاني قروب حلا البتمثل اهل امين السقيلين والمفترين 😤 وديل عندهم اسلوب وطريقه تعامل مختلفه .. اما القروب الثالث قروبي انا البمثل اهل نوسه الناس الطيبين البسيطين😌 و ديل الناس الحتتعامل معاهم نوسه ببساطتها زي ما جات في الاول ) .. نوسه حبيبتي رجاءا زي ما قلنا حتستخدمي كل الاساليب الاتعلمتيها وحتعكسي شخصيتك الجديده من خلال اسلوبك في الكلام وطريقة تعاملك وما تخلي زول يحقر بيك 👌 مينو وتوته وام وابو امين ديل تختيهم فوق راسك تحترميهم وتقدريهم وما تغلطي فيهم حتي لو غلطوا عليك والحمدلله انهم بتعاملوا معاك كويس وبحبوك 😍 اما عمة امين وبناتها والعواليق نسوان اخوان امين 😤 شوفتي ديل بالذات عايزاك تتبعي الأسلوب الاتبعنا في قروب حلا ، حتطنشيهم قدر ما بتقدري ولما يتكلموا معاك حتتكلمي معاهم بنفس طريقتهم وانتي رافعه نخرتك فوق 👃وتخلفي رجل علي رجل وتجدعي ليهم، واغلب ردودك تكون بالانجليزي ووريهم انهم ولا حاجه وانتي احسن منهم بمليون مره ود كلو من غير ما تقولي ولا كلمه كعبه استايلك الجديد ولباقتك في الكلام والرقي الفي تصرفاتك دا كافي جدا و حيفرسهم 😘
نوسه : واي يا مريم شوفتي عديلاتي ديل بالذات ما قادره انسي حقارتهم وتريقتهم علي ولازم اسمعهم اكعب و اوسخ كلام عشان اتفشي وارتاح 😬
انا : اسمعي يا نوسه اسلوبك في الكلام وتصرفاتك بعكسوا تربيتك ومدي فهمك اوعم تنزلي من مستواك وتسمعي زول كلام وسخ ولا كعب سمعي كلام حار لكن اياك ثم اياك تتلفظي باي لفظ 😡 وخليك عارفه الناس الحاقدين زي عديلاتك ديل عمرهم ما بتقدموا مش انتي بتعرفيهم ليك سنه شوفتي حتمشي تلقيهم زي ما خليتهم وما انجزوا اي حاجه في السنه دي وعايني لنفسك وشوفي انتي انجزتي شنو الحاجه دي اكتر حاجه مفروض تفشك وتخليك راضيه عن نفسك تماما 😘
🔴 ثالثا : زي ما عارفه حتقعدوا انتي وامين في غرفه واحده لو امين حبه يواصل في دور الظرافه العايشنه قدام الناس حتركبي ليه وش 👹 وتقولي ليه انسي نوسه القدام الناس انا جوه الغرفه دي نوسه المتزوجاك علي ورق وحنتعامل زي ما كنا بنتعامل في لندن😡 واوووعك تخلي يرقد جنبك لاي سبب من الاسباب لو مافي كنبه ينوم في الارض ماعندك اي شغله بيه واياك تغري بلبسك تلبسي البجامات المحترمه الاشترينها ارجوووك ما تبقي خفيفه وماتخلي سماحة امين تاثر عليك 👌
نوسه : انا وامين في اوضه واحده اكيد الشيطان حيكون ثالثنا😌 ربنا يقويني بس والشيطان ما يوسوس لي خليك عارفه يامريم امين دا لو باسني ساي انا بسيح وبخلي يعمل الدايرو 😌
انا : يبوسك الكلب انتي يا الخفيفه 😡 بتخلي يقرب منك ليه اصلا 😬 عشان خفتك دي بالليل البسي كل البجامات الاشترينها فوق بعض 😅 عشان لو اغراك يا الخفيفه مسافه ما يصل للبجامه الاخيره يكون زهج او انتي تكوني فوقتي من التاثير وتصديه 😂
نوسه : هههه قال يزهج قال البخلي يتعب ويقلع لي منو 😀مريم هوووي ها وحياة ربنا يقرب مني بقلع براي 🙈 البوره كعبه خلينا نضوق الشي دا للدنيا والزمان قبل ما اموت يابت هوي بعدين مافي رجال حور عين مالك حارماني من حور الدنيا 😉
انا : هههههههه واي انا من خفتك الحتسقط حجرك 😂 شوفي اولادي قعد يفرفروا من خفتك دي 😅 لو استسلمتي ليه تاني تشمي قدحه انا نصحتك وانتي حره 😅 وخليني اتم ليك باقي الكلام 😬
🔴 رابعا : حتصحي تقشري من الصباح الله يرضي عليك ما تجوطي لبسك نظرياتك الفي اللبس اعفينا منها والبسي الهدوم بنفس التنسيق النسقنا مع بعض 😘 وخليك بت نشيطه وحركية وما تقعدي ساي البيت فيه الشغالين البنظفوا وطباخه لكن دا ما بعني انك تقعدي تتفرجي ادخلي اعملي حاجات خفيفه واقشري بالحاجات البتعرفي تظبطيها وانتي بقيتي خطيره اتجدعي ليهم بالحلويات لو جوا ضيوف ما تخلي الشغاله تقدم الضيافه قدميها انتي بعد الضيوف يمشوا رتبي المكان حاجات ما متعبه قدر ما انها ذوقيه وقع ليك 😘 ذوقك دا حيحبب نسابتك فيك وحتغيظي عديلاتك برضو 😉
نوسه : يا سلام يا مريم اهم شي غيظ العديلات ياخ الحركه عجبتني والعجب كان رصيت ليهم السفره زي ما علمتيني ما بموتوا 😂
انا : ههههه بس نحن بنحب النوع دا من الغيظ ورصة السفره دي انا مجهزه ليك ليها اكسسري للسفره انسي بس😍 ما عديلاتك البراهم حيتخلعوا كلهم حيتخلعوا حتي امين 😂 لانو السفره حترصيها متين؟؟؟ يابت المحظوظه انتي امين عيد ميلاده بعد تسافروا ب 3 ايام واهل امين فايقين ورايقين وبحبوا الاحتفالات ولحدي هسي مينو بحتفل بعيد ميلاده خلي امين 😅 وكون انك تكوني ناسية عيد ميلاد امين دا ما منطقي بالنسبه ليهم وحيجوا يسالوك انتي مخططه لشنو ، فانتي حتقولي ليهم انك مخططه انكم تحتفلوا بيه عائليا في البيت وانك مجهزه اي حاجه
نوسه : سجمي يا مريم مجهزه شنو 😲 وهو انا ياداب عرفت منك وانا ما بعرف في الخرطوم التكتحني 😔
انا : ههههه ياخ انا المجهزه ليك ودي اخر ظرافه مني ليك ح افلس بسببك مفروض تديني صرفه الصندوق حقتك 😂 ثم ثانيا اياك تقولي قدام حسام انا العملت عيد الميلاد هو عارف اني عايزاك تحتفلي بعيد ميلاد امين وهو الاختار ليك الهدية لكن غير كده تاني ماعارف لو عرف بضبحني 🔪 انا الحاجه دي عاملاها عشان ارفع راسك قدام نسابتك وما تتحرجي وبس لكن نهائي ما عشان امين وقع ليك 👍
نوسه : ههههه اليشوف فلاحتك دي ما يشوف هرشتك من راجلك 😂 كان ما شوفت بعيني ما كان صدقت انو حسام بحسمك وبقطعوا معاك بعد حركاتك البتعمليها ليه دي 😉
انا : بركه الشوفتي وصدقتي 😭 فقر ونقر ومعقد ومتسلط ما تشوفي ظرافته مع الناس معاي صعب جدا ( اوووب علي 🙆 نوسه لقيتها مركزه مع حسام دي ما اول مره تعلق عنه كم مره علقت لما الحاجه دي لفتت انتباه حلا وقالت لي البت دي مركزه مع حسام جدا غايتو اخر شلاقتي دي اني حتشلب😅 فشنو كان لازم اطمم ليها بطنها منه نوسه جنها ناس سمحين كان ما امين اسمح من حسام علي ما اظن كان بكون اتشلبت 😂 رب ضاره نافعه 😉 ) .. اها ركزي معاي وخليك من حسام 😏 انتي ما ليك الا تجهزي السفره في الحديقة والطقم بتاع الاكسسري بعد داك تخلي لتوته ما تشيلي لاهلك وانا حاجزه ليك بوفيه صغيروني كده فيه كل الحاجات من اكل لشراب سجلي الرقم دا ، عمو عمر دا يعتبر والدي انتي بس اضربي ليه قبل عيد الميلاد بيوم قولي ليه انا نوسه صحبة مريم و وري انتو كم شخص و ادي العنوان تاني ماليك دعوة باي حاجه انا الحانسق معه وانتي خليك في تجهيز نفسك اكوي شعرك واقشري بالفستان الكحلي مع الاكسسوار بتاعه و ميك اب بسيط زي ما اتعلمتي والكيس دا فيه قميص لي امين اشتراء ليك مهند عشان يطقم معاك اما الصندوق دا فية هدايا لي امين واشتراهم ليك حسام فيه تذكرتين لواحده من مباريات ريال مدريد في دوري أبطال اروبا دا فريق امين المفضل وفية 2 تي شيرت و 2 كاب الهدية دي قيمه جدا ماعشان هي غالية وبس عشان امين بعشق ريال مدريد وحيتبسط جدا ومينو حيصدق انو فعلا علاقتكم ممتازه لما يشوف انك مهتمية بالحاجات البحبها امين .. اول ما تدخلوا غرفتكم طوالي قولي لي امين عيد الميلاد دا اتعمل فقط عشان منظرنا قدام اهلك والا ما كان تحلم اني اعبرك والتذكره التانية برضو عشان منظرنا قدام اهلك لكن اكيد انا ما ماشه معاك فاعزم الزول الدايرو بمزاج 😉
نوسه : اكيد حيسوق الخواجية بتاعته 😏 وبمناسبه الهدايا انا ح ادي الناس ديل هداياهم متين
انا : علي حسب كلام امين انو اي مناسبه عندهم بجهزوا ليها في بيت مينو يعني اليوم كلو حيكونوا معاكم وحيمشوا بيوتهم ناس نوم بس ، ومش انتي حتصلي الخميس اكيد حيتلموا في فطور الجمعه انتي استقلي اللمه دي ونزلي ليهم الهدايا وهم ملمومين عشان امين الغياظ يشوف انك جبتي هدايا لكل اهله وقدرتي حتي الناس الما بستاهلوا الهو ما كان حيجيب ليهم وكمان عمة امين وبناتها وعديلاتك حيندهشوا انك عبرتيهم بعد سخافتهم معاك 😅 وبكده حتوريهم انو كلامهم داك ولا هز فيك شعره وكمان انك زوله ذوق ومابتشتري هدايا اي كلام 😉 وتوته حتتبسط منك لانها عارفه حركاتهم ..وفي حاجه تانية ما تباريهم في اي شي بخصوص العرس ولا توريهم حاجاتك ويقعدوا ينظروا ليك .. البسي الحاجات زي ما اتفقنا وكل حاجه بالاكسسري بتاعتها وحتتمكيجي براك بنفس الخطوات العلمتها ليك وتمشي الحفلات مع امين يا مع توته ما ليك دعوه باي واحده فيهم
نوسه : اوكي ياداب فهمت ليه خليتيني اشتري ليهم هدايا مع اني لسه مغيوظه منهم .. وحاضر ح استغل الفرصه وامشي مع امين قال توته قال و ح الصق فيه 😜 ابقي عويره لو ما انتهزت الفرصه دي 😉
انا : ههههه غايتو خفيفه ريشه بس 😂 اها نجي لاخر حاجه واهم حاجه 👇
🔴 خامسا : لما تسافري البلد تنسي نوسه بتاعت لندن خالص وتنسي طريقة تعاملك مع اهل امين وترجعي لاصلك وتتعاملي مع اهلك وناس بلدك زي ما كنتي في الاول لاتفتري ولا ترفعي سعرك علي زول تتعاملي ببساطتك وطيبتك ولو في يدك تساعدي زول اوعك تترددي وما تخلي الدنيا تغرك واعملي لاخرتك برضو .. وختي في بالك انو الاساليب الاتعلمتيها اتعلمتيها عشان تقدري تتعاملي مع كافة المستويات لكن ما عشان تصنفي الناس وتقللي من شأن زول 👌 و نجي لاهم حاجه عايزاك تفكري في فتره اجازتك في خطوتك الجايا هل عايزه تطوري نفسك في نفس مجالك ولا عندك رغبه تغيري مجالك وتبدي تقري حاجه تانية واول ما ترجعي تبدي طوالي وتكسبي زمنك ، نوسه انا ما دايمه ليك عشان كده لازم تتعلمي تاخدي قراراتك بنفسك وحددي هدفك وخليك طموحه وارادتك قوية وحتحققي هدفك
نوسه : كيف يعني ما دايمه لي عايزه تقطعي معاي ولا شنو 😭
انا : اقطع راسك دا هو انتي بتخليني بلاوقتك دي 😂 لكن في حاجه اسمها ظروف بتفرق الناس وانا ما ضامنه لا ظروفي ولا ظروفك وكمان في حاجه اسمها الموت الذي لايرحم لاصغير ولا كبير عشان كده لازم تتعلمي تعتمدي علي نفسك 😘
نوسه 😭😭😭 ما تقولي كده ياخ ان شاءالله ما حنفترق وانتي ربنا ان شاءالله حيحلك بالسلامه اي نعم ما ح احضر ولادتك لكن لما ارجع ح استلم الشفع ديل جنس استلام ويا خربتهم يا خربتهم 😂
اتونسنا انا و نوسه كتير وفضل لي اخر حاجه اوصي امين ، وقلت استفرد بيه لما يجي يسوق نوسه للمطار .. يوم السفر قبل ما امين يجي واثناء ما قاعدين انا وحسام ومهند وحلا ونوسه كانت بتلبس قلت اخيراستاذن من حسام اني عايزه انفرد بي امين عشان ما يقعد يتجنن علي 😅
انا : حسام😍 بعد اذنك يا قلبي عايزه انفرد بي امين عايزه اوصي علي نوسه 😘
حسام : وتنفردي بيه ليه ما توصي قدامنا عايزه تقولي ليه شنو يعني ما ممكن تقولي قدامنا 😡
انا : يعني ح اكون عايزه اقول ليه شنو بس ما صح اوصي قدام نوسه وما صح اقول لي نوسه اطلعي وانتو كلكم قاعدين 😏
حسام : خلاص طيب البسي توب ما تقعدي معه بمنظرك دا براكم 😏
انا : منظري 😲 عاينت لنفسي عشان اتاكد مالي 😲 لابسه فستان حمل ومحترم كمان😯 حسام دا جنا 🙆 حسام مالو منظري ؟؟؟ 😡
مهند : حسام انت جنيت مالو منظر مريم دا هسي 😡 انت ما محترمني انا كراجل ولا شنو مريم عمرها ما لبست قدامي لبس ما محترم واللبس البتلبسه قدامي معناه بتقدر تقعد بيه قدام اي راجل
حسام : ما تصروا لي انت واختك 😡 مريم كرشتها دي ملفته للانتباه
حلا : اجي اجي يا حسام ما اي مراه حامل كرشتها كبيره الملفت شنو كمان في الكرشه 😂
مهند : ياربي الكرشه بقت تبع الاغراء ونحن ماعارفين غايتو ما حصل سمعت لي براجل اغرته كرشه 😅 حسام الله يهديك بطل جنك دا 😬
حسام : لما اقول نظرات امين لمريم ما بتعجبني بتهيجوا فيني وتقولوا دي غيره مني واني عبيط وفرحان بمرتي وهسي عشان ما نتناقش ساي يامريم لو عايزه تريحيني البسي توب
انا : حسام انا ما بقدر اطلع وانزل تاني امشي جيب لي التوب انت وانا ح البسوا مادام انت كده حترتاح 😏 طوالي قام مشي يجيبه 😏
حلا : مريم انتي ما شايفه انو حسام مزودها في موضوع امين دا خصوصا بعدما علاقتهم اتصلحت مع بعض
انا : اتناقشت معه وفترت وانا روحي محرقاني الايامات دي وما حمل اي نقاشات فشنو خلي يعمل البريحه خصوصا انو الموضوع فارغ وما فارق معاي
امين جاء ومن ما دخل وشاف نوسه الدهشه بانت في عيونه 😲 ومابقدر يعلق طبعا 😂 اتونس حبه وهم طالعين خلاص استفردت بيه
امين : مريم البت ما اتبدلت وبقت مزه عديل 😍
انا : هوي يا شنكوتي انت البت دي ما ليك اي دعوه بيها وخليك في كاتي بتاعتك واياك ثم اياك تعمل ليها اي حركات 👌 شوفت لو عملت ليها اي حركه انا وصيتها تفضحك مع مينو 😡 وخلينا في المهم براك عارف عمتك وبناتها ونسوان اخوانك رجاءا قدامهم خليك ظريف جدا مع نوسه و اظهر ليهم انها عاجباك واهتم بيها وفي العرس خليها جنبك وعرفها علي اصحابك وباقي اهلك .. و نجي للاهم اهل نوسه الناس ديل يا امين ظروفهم صعبه ونوسه رفضت اني اساعدها وكانت بتلم معظم مصروفها و بتساعدهم بيه وانت اوعي تعمل فيها ظريف وتمشي تديهم قروش نظام يشتروا حاجاتهم المحتاجين ليها بطريقتهم لانهم ما حيرضوا .. انت ومودي نوسه ليهم خم ليهم كل الحاجات التموينية بالتقيل نظام دا كرم منك وكمان خت ليك مبلغ محترم في ظرف و ادي لنوسه وانت طالع منهم عشان ما تلقي فرصه تعترض وقول ليها دي مصاريفك
امين : اوووكي .. خايف من حاجه يا مريم وان شاءالله ما تكوني عملتيها مع نوسه والا حتكوني جنيتي علي وعليها
انا : قاصد شنو يا امين 😱 مالك عايز تلاوذ بي 😬
امين : لما شوفت نوسه ياداب جات في بالي الحاجه القاصده وخليني ما اسبق الاحداث .. ربنا يحلك بالسلامه وح اتابع اخبارك من مهند وبعدما تولدي بضرب ابارك لحسام واخلي يديني ليك ابارك ليك 😅 يلا مع السلامه و لا اله الا الله ☝
انا : محمد رسول الله وتصلوا بالسلامه ان شاءالله
ودعناهم وبعدما ما مشوا كلام امين كان لسه في بالي ولاوذ بي مافهمت هو خايف من شنو ، وكمان ماعندي اي طريقه اتواصل معه لانو حسام الكنت متخيله بعدما علاقته بي امين اتصلحت بسبب نوسه حيشيل امين من راسه بالعكس جنه زاد زياده وبقي ينقنق في علاقتي بي امين وقال لي امين حدك معه تواصلكم اثناء الشغل لكن بعدما تطلعي من باب المستشفي ماداير تاني اي تواصل بينكم 😏 ولو في اي موضوع بعد الدوام بستدعي انك لازم تتواصلي مع امين حيكون عن طريقي يعني بعد الدوام حتعتبري امين صحبي انا ما صحبك انتي وقع ليك 😡 دي كانت اول مره حسام ينق في علاقتي بزول ويتمسك برايه كده وانا سمعت كلامه واحترمت وجهة نظره لانو ماقال لي اقطعي علاقتك بي امين نهائي لانو عارف انو شغلي بحتم علي اني اتعامل مع امين لكن قال لي حدك مع امين وقت الدوام وانا في الوضع دا كزوجه مفروض احترم راي زوجي واسمع الكلام وخصوصا اني عارفه حسام ما كده وبحترم علاقتي بي زملائي لدرجه انو مصاحب اولاد شلتي وبسفرني مخصوص عشان نلاقيهم وجنو مع امين بس 😏 فطوالي وريت امين انو حسام ما برضي زملائي يضربوا لي بعد الدوام لاي سبب وهو احترم الحاجه دي
🔴 وانتي ذاتك مفروض موضوع علاقتك بي زملاءك يكون برضا زوجك هو مجبر يستحمل علاقتك بيهم اثناء الشغل مادام هو من البداية عارفك شغاله وعندك زملاء لكن ما مجبر يستحمل علاقتك بيهم بعد الشغل ومن حقه يرفض ..الحاجه دي بتعتمد علي شخصية زوجك تماما و انتي شئتي اما ابيتي مفروض تسمعي كلام زوجك في الحاجه دي . اي زول يستحمل نتيجه اختياره لشريك حياته ومن غير نقة 😂
يتبع.....