Dear Papa Jesus,
Namasyal po kaming lahat sa Luneta Park kanina, sobrang saya po namin na halos hindi ko po naisip na may sakit ako. Kahit nakawheel chair po ako pakiramdam ko pa ring naglalakad ako, Papa Jesus napakaganda po talaga ng mundong ginawa Mo.
Ang sarap po sa pakiramdam kapag kumpleto ang pamilya, makitang nakangiti sina mama, papa, lola at ate, ang saya-saya ko po ngayon, iyong salitang saya hindi po yata sapat para sa nararamdaman ko. Sulit po ang pagod ko ngayon at sulit po lahat-lahat ng paghihirap na tiniis ko kanina, salamat po Sa'yo dahil sa kahuli-hulihang araw ng buhay ko nakita kong masaya ang buong pamilya ko. Nawala 'man po ang lahat ng ala-ala ko may panibagong ala-ala po akong dadalhin sa langit.
Papa Jesus, sabi sa akin ni mama kanina magpahinga na raw po ako at matulog ng maaga, bago ko po gawin iyon gusto ko pong magsulat muna Sa'yo. Papa Jesus, nararamdaman ko na pong nanghihina ang mga kamay ko, hindi ko po alam kung tamang mga salita pa ba itong mga sinusulat ko...
Sa wakas Papa Jesus makikita na rin po kita, masisilayan ang langit, malalaman kung anong address, makikita si Zero at magiging isang anghel. Mahal na mahal ko po ang pamilya ko, Ikaw na po ang bahala sa kanila huwag Mo po silang pababayaan.
Hinang-hina na po ako, hindi ko na po kayang tapusin ang sulat na it