#حكاية_سمر..
،،،،،،،،،،بقلم الكاتبه زينب ماجد،،،،،،،،،،،
البارت_9
عادل واكف ويكولي ردي وافتحي سبيكر.. واركان يتصل.. جمدت من الخوف.. بس جان لازم اتقوه واعرف ادير الموقف..
استجمعت قواي بلحظه.. وفتحت خط وسمعت اركان وحجيت ويه عادل.. اي عادل جان رديت وشفت اركان شيريد..
لهيش هلكد عصبي.. وكلت الوو.. عرفت اركان استلم.. غيرت صوته.. وكال هلا سمر شلونج..
كتله هلا اركان خيي شلونك.. كال بخير مبروك وشايفه الف خير انشالله.. شنو السالفه هيج بساع بساع اتزوجتي..
علاقل خبرينه.. نوكفلج بعرسج.. كتله متقصر.. بس عادل رادها بساع مستعجل هههه.. سكت اركان وكال هااا..
كتله شلونه بيبي زكيه.. كال بخير.. تسلم عليج.. يله اني اترخص خاف مشغوله بس اجيت اباركلج..
كتله تسلملي اخويه.. سلملي علاهل.. اخذ نفس وكال انشالله بااي.. قفلت الخط..
واباوع العادل.. سكت.. انوب دار وجها.. كال ما اريده يخابر عليج مفهوم.. وتكسرين سيمكارتج فورا..
كتله ليش.. كال بكيفي.. اخذ الموبايل من ايدي ومشا.. كتله اوك اوك اكسر السيمكارت بس انطيني الموبايل..
اخذه ومشا.. سمعت اجو خطار.. غيرت ملابسي.. وخليت مكياج وطلعت.. سلمت.. سلمن عليه.. وحده منهن..
كالت يمه خيه هذا شبيه حلكج.. قبل ما احجي سبقتني عمتي.. وكالت عرسان وملاعيب عرس تصير هيج حالات..
كالت ياااا هنيالج يعمي هيج ماكلج بحبه.. انهجم بيت عادل مخبل هلولد.. ضحكت امه.. واني كلبي يريد يصرخ بهمي..
محد فاهمني.. اختنك بدموعي بس ما اكدر انزلها كبالهم.. طلعت.. دخلت غرفتي لكيت عادل متمدد..
هوه بس شافني.. عافني وطلع..
مهتميتله ورحت للمرايا.. اباوع وجهي مو وجهي هذا.. شكد ما احاول اخفي الضرب والزراك بخافي عيوب..
مجاي ترهم.. الزراك بوجهي وبركبتي مو حب.. قهر قهررر.. دنكت.. ابجي واني احاجي نفسي بالمرايا..
شلون راح تصفى.. وشلون حتنقضي حياتي.. والله ما عاد اتحمل.. ياروحي حاجيني شسوي ملييت اريد اعيش..
سمعت عمتي تصيح.. مسحت دموعي.. ورتبت مكياجي وطلعت.. كتلها هااا عمه.. خزرتني انوب ابتسمت..
وكالت يمه ايدج بالغدا ويه رنا.. خطيه تعبت بس تطبخ وتنضف من الصبح لهسه..
وهيه جذب.. اني حمست الدجاج وخليته علنار.. سويته تشريب علي نار هادئه.. رحت لرنا.. لكيتها تحجي ويه خطيبها..
خليت الجدر علنار وسويت تمن برياني وتاجين.. ظلعت الدجاج كليته ورنا بس تحجي ويه خطيبه وتتمشه يمي..
وحبيبي وحياتي.. عود تسمعني.. سويت نفسي ممهتمه.. دخل بكر وهيه ممنتبها.. وتحجي ويه خطيبها..
صاح رناااا.. كمزت ودارتله.. كالها.. متشوفيها مبتليه بالجدوره.. مدي ايدج وساعدي سمر..
وراح يم امه.. كالها هاي بتج مابيها خير بس مخابرات وضحك.. ومخليه العروس مبتليه بالجدوره..
عمتي كالت يااا يمه من الصبح تشتغل رنيوه خطيه ماتت من التعب.. يمكن خابرها خطيبها هسه.. وكامت اجت يمي..
لزمتني كرص من زندي كالت اني شكلللللت.. بكر صاح وراها.. شكلتي يمه.. وخرت بساع من عندي..
اني بقيت بس احك بمكان الكرصه.. واكلب بالدجاج.. مد ايده على ايدي اشووو.. رفع ردني.. وباوع لايدي..
مكان الكرص مالتها ازرك بأسود.. دار وجها على امه.. وكاللها.. بسيطه. يطلعون الخطار وحسابكم بعدين..
وجر ايدي من الطبخ.. كتله يحترك .. كال عساه هوه واهله.. مشيت وهوه يمشي.. ردت اروح للخطار..
كال تعاي غرفتي اريد احجي وياج.. دخلت يمه.. كال شبيج فهميني.. كاله شبيه.. كال عيونج تحجي الم مكاعد افسره..
كتله شلون يعني.. كال ةن شنو موجوعه فهميني بعلتج خل اداويج.. اذا اكو مكان يوجعج.. كوليلي خل اخذج دكتور تتعالجين..
نزلت دموعي بدون اردتي.. واشرت على كلبي كتله هذا يوجعني.. وما اعتقد اكو دكتور راح يفهم البيه.. ويشفي علته..
كعد علسرير.. وبقى يفرك بوجها وبعيونه.. انوب رجع باوعلي.. كال لا تسمحين لاحد يأذيج.. ذوله كل البلبيت.. يخافون انطق كلمه..
اي اخد منهم يأذيج خبريني.. كتله وليش اخبرك.. اذا زوجي ومحاس بيه.. انته تحس بيه على اي اساس..
بكر اذا الله كاتبلي اتعذب اتركني بنارهم.. وابتعد لاتسوي مشاكل ما اريد ادافعلي واسمع تهديداتهم بسبب حمايتك الي..
اتقرب مني وكال.. سمر اتقوي.. انتي هسه غزال بنص ذياب.. حاولي تتقوين.. وخليني احميج والله ما اخلي احد يفك حلكه وياج.. حتى رجلج..
كتله بكر ليش هلكد هامك امري.. دار وجها مني.. وكال بنت خالي وما اريد احد ينظلم زور..
كتله بسسس.. دار وجها.. بنضره جامده هز راسه اي.. ما فهمت عيونه شتقصد.. دا لشوف بعيونه الف كلمه بس ما دا افسرها..
كتله بكر.. اشكرك.. بس الله موجود.. ولو جان الف ذيب يتحايل فوكاي.. لا تنسى اكو رب.. ما ينسى روح خلقها..
ردت اطلع.. جر ايدي.. وكال.. الله يبعث اروح لحتي تحمي اروح ثانيه.. خليني احميج.. كتله متكدر..
عفته ومشيت.. طلعت لغرفتي.. بقييييت احاجي نفسي بالمرايا موتي عاد خلصيني.. تعبت واني اتحمل والله وابجي..
ابجي واحجي ويه نفسي.. انوب درت وجهي.. شفت الشباك مفتوح قليييل..
وصاير بوجهي.. ومن خلال هلفتحه.. بكر مركز من بعيد ويباوع عليه.. ابتسمت بوجها ومسحت دموعي.. دنك راسه..
سديت الشباك.. وبقيت ابجي.. دخل عادل.. باوعلي.. كاعده وابجي.. ما اهتم.. اتمدد علسرير.. وكال فركيلي رجليه.. توجعني..
مسحت دموعي فرح.. اول طلب طلبه مني اسويه اله.. اتقربت افركله رجله.. انوب كال كافي..
سدي الضوه وطلعي بره.. كتله ٱפگـيہ.. عفته سديت الضوه ونزلت البردات وطلعت..
لكيتهم ديصبون.. باوعتلي وحده من الخطار كالت وين جنتي سألت عليج حجت عمتي يااااا خيه هاي 24 ساعه ويه عادل بالغرفه ولا يشبعون..
كالتلها بالعافيه عليهم شتردين منهم غير عرسان.. ابتسمت ابتسامه كذابيه بوجهم.. وطلعت.. صار بكر كبالي..
مشيت منه.. صاحت عليه عمتي كالت تعاي اخذي السفره فرشيها.. كتلها وينها.. كالت دوريها بالمجرات مال الكاونتر..
رحت دورتها.. واخذتها.. لكيت عادل كاعد بالصاله وعمو خليل وبكر وناس خطار ما اعرفهم كولش بس كرايبنه..
سلمت عليهم وبديت امد السفره.. كام بكر من وراي لزم ايدي.. وهمس الف مره كلت لا ادنكين وناس وراج امشي اني امدها السفره روحي..
عفته ومشيت.. اجه وراي.. وكالها يمه اعزليلنه احنه الرياجيل وحد.. وانتو اكلو وحد.. كالتله يمه هوه منو موجود..
غير عمامك.. كاللها ولوو اعزلي احسن.. كالتله ماشي روحي.. كامو ينقلون الاكل للصاله..
واني رحت مديت السفره بالهول.. ونقلنه الاكل.. كعدنه ناكل.. كملت شلت السفره ويه رنا..
وسويت جاي.. اجت بكر.. ال جاي.. كتله خليته علنار.. كال لعد رنا وينها.. كتله دتخابر خطيبها..
مد ايده لركبتي.. وكال بعدها توجعج.. هزيت راسي اي.. كال متسمعين كلام شسويلج.. احذرج منه وترجعيله..
سكتت ودرت وجهي للجاي.. احظر الاستكاين.. كملت صبيت.. درت وجهي ما لكيت بكر..
اخذت الصينيه ووديتها اخذها عادل مني.. باوعتله ما رفع عينه بعيني.. انوب رحت سويت صينيه. ثانيه واخذتها للنسوان..
انطيتهن ورحت للغرفه.. جسمي يصل عليه بالوجع.. نمت.. لشوي انفتحت الباب كمزت.. اجت امه.. كالت لج كلبه بنت الخايسه..
نايمه وعايفه المواعين منو يغسلهن اني.. كتلها عفت رنا بالمطبخ.. اني سويت جاي.. دخل عادل..
كال رنا ممنوع تشتغل.. انتي هنا خدامتها.. كتله خدامة منو.. كال خدامة اصغر واحد بالبيت فهمتي..
باوعتله بعتب وكتله افتهمت.. ضربتني امه على جتفي وكالت نص ساعه اذا شفت المواعين اخرب وجهج والله..
كمت نضفت المواعين ومسحت البيت.. ردت اطب اسبح.. اتذكرت رنا شكالت علحمام.. ردت اغير راأيي وما اسبح..
بس صيف واشتغلت ..ما اتحمل.. دخل بكر كدامي.. كتله بكر ممكن طلب كال اي امري.. كتله ميأمرك ضالم..
بس اريد اسبح بحمامك.. اخاف اسبح بهذا الحمام.. كال ليش يحتاجلها اذن.. غرفتي كلها كدامج.. اي شي تحتاجيه.. اخذي بدون تردد راخصج..
ابتسمتله شكرا.. رحت لغرفتي جبت ملابسي. دخلت لغرفته لكيته موجود.. كال تعاي تعاي طالع اني.. اخذي راحتج..
طلع.. ودخلت لحمامه.. اوووف يفتح النفس هلحمام الايطالي.. فتحت ادوش واتحممت كملت.. غسلت حمامه..
وطلعت.. رحت لغرفتي.. لكيت عادل.. ما حجيت مشطت انوب باوعتله ..عادل وين موبايلي..
هوه متمدد ومخلي رجل على رجل.. وكال ماكو موبايل.. كتله ليش شسوبت.. موبايلي هذا مو انته جبته..
بابا جابلياه هديه.. كال اي عود روحي لشكي للبابا وكوليله عادل ما عنده مصرف وباع موبايلي..
كتله عادل تبيع موبايلي علمود تاخذ فلوسه والله حرام.. كال ما عاجبج ذاك ببت الخلفج ارجعي بلكت يذبحج واخلص منج..
كتله مستضعفني لان ما اكدر احجي ويه اهلي.. اريد موبايلي والله حرام عليك.. كام ويحركلي بحواجبه باستهزاء..
ويطلع فلوسه من جيبه.. كال هذا موبايلج.. بعته وخليته مصرف بالجيب.. وغمز وطلع.. بقيت ابجي.. اخذو مني كثلشي ولا موبايلي والله انقهر..
كتلت روحي لحد ما بابا جابلي موبايل.. اندكت الباب.. فتحتها والدموع بعيني.. صار بكر كبالي..
جان جايبلي فلوس جنت ناسيتها بحمامه.. مد ايده وهوه يباوعلي شبيج.. كتله ما بيه.. ومسحت دموعي واخذت الفلوس..
كال سمر احجي.. لا تضوجيني شبيج.. كتله عادل باع موبايلي.. وبجيت.. كال بس هاي ..هزيت راسي اي..
كال ميستاهل الموبايل تبجين عليه.. كتله احب الموبايلات اقضي بيها وقت.. كوه اشترالياه بابا والله..
كال سهله ددخلي ارتاحي واني احلها.. بس لتبجين.. مو على كولشي مرخصه ادموعج.. قوي نفسج شويه..
هزيت راسي.. دار ضهره ومشا.. سديت الباب.. ورحت للفراش.. موبايليييييي وابجي.. لحد ما نمت..
فزيت على صوت الباب انطبك بدخول عادل.. ككزت من مكاني.. نام هوه علتخم واتمدد وما حجه ويايه..
شغل تلفزيون وطلع مسلسل وكعد يباوع.. اني هم متمدده واباوع وياه.. اندكت الباب.. كمت فتحتها بكر..
كال يصير ادخل لو ممنوع.. بابتسامه خفيفه.. ككتله طبعا تفضل.. عادل شافه دار وجها..
كال اكو عصفوره اليوم.. لكيتها تبجي.. يابه شبيج.. كالت اخذو موبايلي.. واحنه حتى منزعل العصفوره جبنالها جهاز جديد..
شفت جهاز جديد بيده.. كلبي كمز كبل جسمي.. ردت اكوم.. شفت عادل كالب خلقته خفت اخذه كدامه..
كال شبيج.. اخذيه الج جبته.. صاح عادل اخذيه مو بقيتي تعوين على موبايل وهلي جابلج بكر.. بعد طالبتني بطلابه..
شفت عادل ممهتم.. كمت اخذته من بكر بكل فرح.. انوب فتحته ولكيته N95 يبو يبو طار كلبي..
جان هذا احدث جهاز بالساحه.. باوعت لبكر بفرح وهوه يباوع لعيوني.. انوب اندار على عادل.. كاله جهازها ممنوع ينسحب منها..
معلوووووم.. لو اعيد.. عادل هز راسه اي.. انوب كاله والموضوع الكتلك عليه شو غلست.. بكر كابه مناسيه ..
واتقرب من عادل يحجي وياه بصوت ناصي.. بصراحه مهتميت بيهم شيحجون.. كل همي جان الموبايل.
فتحته لكيته مملي العاب وبرامج اوف هلبكر طلع دره ههههه.. خليته علشحن وكعدت اكلب بيه..
حتى سيمكارت مخلي بيه.. درت وجهي عليهم.. بكر كاعد ويه عادل ويحجي وياه بصوت ناصي ولازمه من ركبته بعطف..
انوب كام.. وكال يله اخذو راحتكم.. اترخص ومثل ما وصيتك عادل.. ويأشر عليه.. عادل كاله لا هاهيه معليه بيها..
مفتهمت شنو الموضوع.. طلع بكر. كتله عادل شنو الموضوع.. كل وانتي شكو.. كتله مو بكر اشر عليه.. كال ماكو شي..
وكام لبس.. انوب مد ايده اخذ الموبايل.. وكال شتردين بعد حتى احسن من جهازي.. سكتت وبكلبي كلت حاسدني ابن ساميه..
عافه وطلع.. بقيت اكلبي بيه.. اول شي سويته.. اتصلت باركان.. وقفلت الباب.. دك رفع اركان الخط..
كال الووو.. كتله هلا اركان اني سمر.. حسيته ختنك وهوه يكول هاا لي. لحظه.. حسيته كام من مكانه وطلع بره..
كال اسمعج.. كتله اركان سامحني والله ما جان قصدي اخونك لو اعوفك.. بس جان لازم اتركك لما شفتك ما تكدر تتحمل حملي..
كال وشنو هوه حملج البعتيني علموده.. كتله تاذكره من سألتك على العاده وشلون علمتني عليها.. وشلون اتجنبها..
وكتلك اركان لو جنت اني مسويه هشكل وبليلة العرس طلعت مو باكر شتسوي.. انته ما جاوبت..
صاح هوه شنو ما جاوبت.. كتيلي اكو وحده كتلوها اهلها.. كتلج اكيد لاعبه.. كتيلي ومنو كال.. ورحتي جبتي نفسج وخليتيها بمكانها..
واني اعتبرج مرتي واما اقبل هلكلمه او هلموقف اتخيله وياج. لذلك ما رديت.. لهسبب اتعوفيني..
كتله اركان.. اني مو باكر.. خسرت عذريتي لما جنت طفله بجهل مني.. وخفت اكول..
كال سمر شجاي تحجين.. يعني لو حاجيتلي علموضوع تتخيلين ما اتفهمج.. لج اني اموت بربج تعتقدين افرط بيج بهشكل..
كتله بس انته كلت اني ما اتحمل هلمرقف.. كال سمر لا تخبليني.. ما جنت قاصدج.. لج اني اعرفج واعرف تربيتج..
حبيتج وانتي بالثانريه.. وربيتج على حبي كل شبر بنذر واعرفج واعرف اطباعج.. تتوقعين لو كتيلي هيج شي.. ما اصدكج لو اتفهمج..
واوكف وياج.. كتله يعني لو كايلتلك اني هيج سويت.. شجان موقفك.. كال طبعا اكولج حبيبي لتهتمين..
وغلطة مراهقه وصارت.. والبكاره والغشاء مو مقياس شرف.. واني اعرفج شنو.. ومنو..
حجه هيج.. واني صرخت بالبجي بحركه.. ضيعت كل حياتي بغباء.. كال لتبجين.. وكوليلي ليش هيج سويتي بيه..
ولج انه حرمت عيني النوم ..والساني الزاد ما ضاكه. ولج الهوه كوه اشمه بلياج شسويتي بيه سمر
كتله اركان اني خسرت كولشي.. كال من ايدج.. من غبائج.. سديت الموبايل وبقيت ابجي بحركه..
شبيه وافقت بعادل.. ليش هيج ضيعت حياتي.. ليش ما فهمت اركان على موضوعي ليييش.. ليش ليش ليش.. وبقيت ادك على راسي.. بندممم.
دا ابجي.. اتصل رقم.. شايفته هلرقم بس المن.. رديت الوو.. كال الوو.. كتله بكر.. كال اي..
شبيج صوتج مو على بعضه بعدج تبجين.. كتله اني غبيه.. كال عادي كلنه نمر بوقف.. نستغبي بيه ومنعرف نتصرف.. لان بشر ممعصومين من الغلط
كتله اني معرفت اختار.. اخذ نفس طويل و كال تتمنين اركان.. كتله شعرفك بيه احب اركان..
كال واضح الحب البينكم ..كتله ما وضح عد غيرك.. شلون عرفت.. كال ما اعرف يمكن اعرف البشر من نظره..
كتله بكر شسوي.. تعبت.. خسرت اركان.. وخسرت عادل.. اللي جان اخويه.. مبقالي شي.. شسوي وحتى اهلي تبرو مني.. وين اصفى بشارع..
كال باوعي زين وفكري بعقل.. وانسي الوراج وباوعي شنو الكدامج.. وراح تنتبهين على حياتج.. وتعرفين منو المقيمج..
كتله منووو.. كال هذا راجع لتفكيرج.. كتله اوووه عاد شلون فكر ضل عندي.. اني من الهم حتى كلبي خلص..
كال لتهتمين.. واي واحد يضايقج احجي.. ابتسمت.. كتله وانته شتكدر تسوي..
كال باعي.. ذوله الحبربشيه البلبيت كلها تموت علفلوس.. والفلوس يمي.. رجلج المصون بنفسه.. ياخذ مصرفه مني..
متشوفيه ميكدر يرفع عينه.. لذلك اي واحد ممكن يخالف رأي.. ما اسويله شي.. بس اكف ايدي عنه وهذا هوو..
وكتله وينقطع المصرف عنهم.. ضحك وكال بالضبط.. ضحكت هههه.. كال اي هيج اضحكي وسمعيني ضحكتج الفاكسه ام صوت العالي..
ضحكت.. كتله اووو تتذكر بس اضحك تطلع بوجهي وتخزرني.. ضحك كال اي مو حقي.. جنج ضحكت فيفي عبده.. مو ضحكه مالة الله..
ضحكت.. كتله عابت والله تطلع عفويه بس انته عقده.. كال هاي منو العقده اني.. كتل اووو يابه شكد جنت اتعقد منك.. واكرهك..
كال وهسه.. كتله هااا.. ضحك.. كال شنو حبيتيني هسه.. كتله اي تغيرت نضرتي اتجاهك طبعا..
كال صدوك سمر اريد اسئلج.. كتلخ قبل لتسئل.. انته تحجي بالموبايل احسن من الواقع..
كال يعني شلون.. كتله واقاك واحد جامد ما تطلع من الضحكه والصوت.. بس بالموبايل غيرر منطلق..
كال والله بس وياج.. كتله ليش.. كال عوفينه من اليش وجاوبيني.. كتله اوك كال مستعده.. كتله نعم انطلق..
كال شتشوفيني.. كتله اسود مصخم.. ضحك كال عابتلج هيج تشوفيني.. كتله لا والله اصلا احلى شي بيك سمارك..
ورزانتك واناقتك.. منطيتك رونق الجمال.. فميحتاجلك بياض هيج احلى..
كال تشوفيني حلو.. كتله اي بلي.. اشوفك شاب جذاب.. كال ممكن وحده تحبني.. كتله تحبك طبعا لا..
كال لييش.. كتله لان كتلك واقعك مو مثل ما عسه دتحجي ويايه.. انسان جامد وتحسه خالي من المشاعر..
ضحك.. كال هذا الانسان الجامد.. ميت بمشاعره ومو كادر يخفيها.. كتله انته تحب وحده.. كال اوووو من زمااااااان..
كتله من شوكت.. كال من جنه اطفال.. كتله ومصارحتها.. كال لــNOـا ..كتله ليش.. كال ما اعرف كبرياء.. خوف .. مو داري
كتله وهسه اعترفتلها.. كال لــNOـا.. كتله حتخسرها. وانته ضل بكبريائك.. كال خسرتها وخلاص.. وباقيلي خيط امل..
يادوبني متمسك بيه.. كتله ليش خسرتها.. كال صارت لغيري وما تحبني ولا شايفتني بعينها..
كتله ليش هلكد انته مجاذب نضرها.. شكلك حلو وانيق.. كال ما اعرف عمري ما شفت بعيونها نضرة حب اليه..
بس اني ميت بيها.. كتله تزوجت.. كال اي.. كتله من منو.. متعرفه.. ضحك واخذ نفس و كال من اقرب الناس الي..
كتله منو.. ضحك وكال ههه اخوي .. يتبع
🌺🌺🌺🌺🌺
اخيرا كالها ..كال احبك كالهااااااا وانه كلبي كلبي توّكف بعدها… ههههههه يله شوفوني توقعاتكم على اعتراف بكر..
وشتتوقعون.. سمر راح تتقبل حبه.. لو ترجع وتكسر كلبه مثل كل مره..
#زينب_ماجد..