انتقام عاشق

البارت الثالث

السلام عليكم حبايبي ... يا رب تكونو بخير ....
البارت الثالث ....من قصة
#انتقام_عاشق
......
زينة ...
دخلت للبيت شفت امي كعادة بالكاع وتبجي ...وتدك على رأسها والدم طالع من خدودهه من كد ما ملخة وجهه ...

يمه شبيج ؟...شصار؟ ....ليش هيج تسوين؟ ...احجي فدوة شكو ؟؟

شحجي ...شكول ليش اكو شي ينكال بعد هالمصيبة ..

وكامت تلطم وتبجي ..

شصاير يمه ... أحمد صرله شي؟ (اجه أحمد ببالي لأن جان مسافر وخفت صارله شي وإني ما ادري )...

أحمد ...سودة علية  شيصير أكثر من الي صار ...الله يعلم شنو حالته هسه.. ما اكدر احط عيني بعينه ولا احجي وياه ...

ليش يمه ...هو مو مسافر ... رجع ...!

أي ..ويا ريت ما رجع ...رجع حتى يشوف اخوج الناقص ديخونه ويه مرتة الساقطة ...

شنوووو؟؟

أي يمه ...أخوه ...ولج ابن  بطني خان أخوه ويه مرته ... وكانت امي تضرب على بطنه حيل وشكت دشداشتهه من اللطم والدك ...

اني ظليت مصدومة ...شنو هالحجي ....كعدت يم امي بالكاع و حجتلي شصار وإني ابجي مصدومة من الي سمعته. ...

وهسه وين احمد؟
فوك ...روحي شوفيه ...ما اكدر اروح واخلي عيني بعينه ...رجليه متشيلني حتى اصعد واشوفه ...روحي شوفيه خاف سوى بروحه شي ....
اني صعدت ركض لغرفتة ...جانت الباب مفتوحة بس هو ماكو ...سمعت صوت مي بالحمام ...دكيت الباب ...بس مجاوب ...فتحت الباب على كيف وإني خايفه لا اشوفه منتحر ...ظليت ابجي واندعي يكون الكاه بخير ...لكيته كاعد بالكاع والدوش مفتوح ...ادنيت عليه سديت المي ..وكعدت يمه بالكاع ...
أحمد ...حبيبي حمودي ...باوعلي ...احجي وياي فدوه اخويه الغالي ...
ما كدرت أكمل حجي ....كمت اشهك وابجي ...شريد اكول ...شلون اخفف عليه ...كل مره من يغلط أمجد اكله ميخالف سامحه لخاطري ...
بس هالمرة ما اكدر اكله هيج ..خواطر الدنيا كلها متشفع للي سواه أمجد ....خليت راسي على صدره وشبكته وكمت ابجي ...

...
أحمد ...
حسيت من زينه سدت المي ...بحركة وحرارة على وجناتي ....عرفت انو اني جنت ابجي بس دموعي جانت مختلطه ويه المي وما حسيت بيهن ...ردت اوكف دموعي بس مكدرت ...فشلت ...استسلمت... وظليت ابجي بس بدون صوت...مجنت اسمع شتكول زينه ...عبالك اني بغير عالم  ...حسيت بزينه خلت راسهه على صدري ..وكامت تبجي ....انقهرت عليهه ...خليت أيدي على راسهه ردت اطمنهه انو اني بخير وبعدني عايش ...
...
زينة شالت راسهه ولزمت ايد أحمد وباستهه

فدوه خويه ...كوم ويايه ...الله يخليك ...لتظل هنا ...تعال ويايه...انطيني ايدك خلي اساعدك حتى تكوم ...

انطيتهه أيدي وكمت وياهه بصعوبة سندتني زينة لحد ما طلعت من الحمام ...

أريد انام ...

أي بعيوني ...تعال ..
.
لا لا ...مو  هنا ...مو بهاي الغرفة ...ولا على هذا الفراش النكس ...

صار ...تعال للغرفة الثانية ...

اخذتني للغرقة الثانية نمت عالفراش بهدومي المبلله ...جنت مثل المشلول ...زينه جابت منشفة ونشفت راسي ...
.
أريد انام ...عوفيني ..

لا ماعوفك وانت بهالحال ...

ليش ...زغير أني ...

لا بس أخاف تسوي شي بروحك ...

لتخافين ...فكرت بهالشي بس مكدرت ...لأن عندي هدف لازم احققه. .. لازم انتقم ...

تنتقم ؟؟

أي ...انتقم لنفسي ..من الي خانوني ...انتقم من الدنيا ومن زمن وحتى أمجد ...ماعوف حقي ...

أحمد ...بس زمن ماتت ..

زمن وحده ماتت ..اكو 100 زمن ممكن انتقم منهه ...وإذا أمجد ملكيته هم راح انتقم من كل واحد جنت اعتبره أخ وصديق ..كلهم خونه....خلص ....اني راح اعيش بس حتى انتقم واحول حياة الآخرين إلى جحيم ....

خفت من كلام أحمد ...جان يحجي بحركة وصوته مجروح  ....عذرته لأن الي صار مو قليل ...هم خسر زوجته وأخوه وشرفه وسمعته كله بيوم واحد ....

روحي نزلي شوفي امج خاف صارلهه شي ...ادري بيهه هسه منهاره ...اني صرت زين ...

بس انت تعبان ....

كتلج عوفيني ونزلي ...أريد ارتاح ...أريد هدوء حتى اكدر انام .....
كامت زينة ...وطلعت وسدت الباب ....غمضت عيني ...ردت انام ....الله ....شكد حلو انام وانسى كل الي صار واكعد الكاه حلم مزعج وانتهى .....هنياله الي يكدر ينام هسه ...مستعد انطي ثروتي وكل ما أملك حتى انام وارتاح وانسى الي اني بيه
....بس رأسا فتحت عيوني وحسيت بحرارة تطلع من راسي لما تذكرت صورتهم وهم بفراشي .....شلون بعد اكدر اغمض ....شلون اكدر انام وصورتهم متفاركني   ..شيعدي عليه هالمصيبة ....مستحيل اكدر أتحمل. .. لازم اكو شي ينسيني ...أي ...ماكو غيره ....ولو اني تركته من زمان ...بس هو الي راح ينسيني ويخليني أركز على انتقامي ....
كمت بسرعة ...رحت للغرفة بدلت ملابسي ...وطلعت ....
سمعت زينه وامي يصيحون ورايه بس ما اهتميت ...ركبت سيارتي وطلعت ...
♡♡♡