للكاتبه فردوس عبد اللطيف
بسم الله الرحمن الرحيم
اليوم قصتنا حقيقيه سمعتها من احد اصحاب القصه حدثت سنه 2007 ارجو من اصحاب القلوب الضعيفه عدم قراءتها لان بيها جريمه وتدمير عائله بسبب حسد العيشه لذلك انا بلغتكم للعلم
انا رواء كان عمرى 7 سنوات فى سنه 2007
تتكون عاءلتى من الاب طه والام رجاء
البنات 4 والاولاد 3
البنات الاولى سهى 15 سنه
الثانيه رند 13 سنه
الثالثه رغد 11 سنه
الرابعه انا رواء 7 سنه
امجد 18 سنه
مهند 6 سنه
ياسر 4 سنه
نحن عائله ميسورة ابى مقاول وحالتنا الماديه جيدة واخى امجد يعمل مع ابي بمشاريعه...كنا نبنى دار سكن بالحارثيه فخمه وفارهه لم اشعر فى يوم باننا انحرمنا من شيء كل حاجه متوفرة
انا البنت المدلله دلوعه ابي وامى كملنه بناء البيت وابوى وضع كل فلوسه بالبناء تحولنا وعزمنا الاقارب والاصدقاء كان الكل متفاجىء من جماليه بيتنا وفخامته
ابوى كان شاطر بعمله وعندة علاقات وحصل مقاوله بالمنطقه الخضراء مع الامريكان ووقع العقد
اجه فرحان رجاء باركيلي
مبروك شنو
وقعت عقد مقاوله ويه الامريكان بناء مجمع سكنى وترفيهى وان شاء الله نحصل منه هواى فلوس
بس مو خطر الشغل ويه الامريكان
خليهه على الله هى هاى الى راح تطفرنا للفوك
الله يبارك حتى نضمن مستقبل اولادنه
ان شاء الله
بدا ابوى الشغل وانفتحت بيدة وصار مايلحك بالفوس اشترى بيوت ومحلات ..
كان اقاربه من نفس عشيرته حالتهم الماديه ضعيفه
اجو للبيت عينى ابو امجد بلكى تشغل مقداد وياك
تدلل ابو مقداد خلى يجى باجر للموقع حتى لو ما محتاج اشغله..
اشكرك وربي يوفقك
داوم مقداد ويه ابوى
كلفه ببعض المشتريات
هذا بدا يشوف الخير والشغل بدا الحسد والحقد
بدا يخربط بالحسابات مد ايدة للسرقه
كشفه ابوى طردة وكله مو وجه نعمه انى اكدر ابلغ عليك عندك اختلاس ومبلغ مو قليل بس لخاطر ابوك راح اكتفى بطردك
مرت ايام ونسينا مقداد وابوى مستمر بشغله وعايشين حياتنه بسعادة اقترب رمضان كالت امى خلى نروح نشترى هدوم العيد لان برمضان راح ننشغل رحنا كلنه اشترينه لكل وحدة كوستم وفستان وملابس للبيت واحذيه احتارت شتشترى وابوى ميكول لا بس يمد ايدة بجيبه ويدفع واحنا نضحك ونكله عفيه بابا حلو صاير اليوم
هو يضحك عا اعرف سوالفكم دا تقشمرونى
انى اريد اخلص حتى بعد لا دكولون ودينه
كملنه ورجعنا للبيت
ورة يومين طلعت امى لكراج البيت واجتى تصيح طه طه الحكنة
خير ياستار شكو منو مات
لا لكيت هذا الظرف بالكراج مشمور بي طلقتين
يعنى لازم لازم نطلع
اجينه كلنه التمينه على امى وابوى
ابوى صار وجهه كركم ويرجف كال يالى كل واحد ياخذ اشياءة على السريع بعد ماكو رجعه للبيت التفت على امى شكو ذهب فلوس لميهن اوراق جناسي
ترى خلال 24 ساعه لازم نطلع والا يكتلونه
بقينا مثل المخابيل نركض ما نعرف شناهذ وشنخلى
لمينا الى نكدر ناخذة ماخف وزنه وما غلا ثمنه
ودعنا بيتنا ورحنه لبيت خالتى مثل اللاجءين مبهذلين وجوهنه صفر خايفين مرعوبين
ابوى صاح على امى كلهه رجاء تعالى
نعم
ترى الامريكان اذا يعرفون اجانى تهديد يلغون عقد العمل لازم الموضوع يبقى سر لانهم يخافون على نفسهم بلغونه كل واحد يتهدد لازم يبلغهم
بس انى راح اسكت
خوش
زين ترحون لعمان سوريا
لا عينى شودينى بالغربه شو كلهم متبهذلين
لعد راح ادور على بيت نكعد بي
بكيفك
اشترى بيت بالجهاد صحيح مو مثل ذاك بيتنا ولا منطقتنه بس المهم يحافظ علينه....
البيت الى كعدنه بي مو مثل هذاك البيت كل واحد عنده غرفته الخاصه وحمامه هنا لا حمام فوك وحمام جوة ابوى غير سيارته وسيارة اخوى حتى لا يعرفوهم منعنه من الطلعه والطبه ممنوع واحد من الولد يطلع لان بذاك الوكت هواى خطف
وينج رجاء
نعم عينى طه
حظرى نفسج فد شويه راح تجى همر نروح بيهه لبيتنا ناخذ اغراض الى نحتاجهه خلى البنات والولد يكتبولج شيحتاجون من هناك
بابا اهم شي لعابتى الجديدة
انت رواء نعرف لعابتج بدى اجيبهه تدللين بابا
واخوانى هم البلى وسيدياتهم والبنات كل وحدة سوت قاءمه
راحو ويه الهمر واخذو سيارة بيكب وجابو اغراضنه الى نحتاجهه بس امى جتى تبجى انقهرت على بيتنا ووظعنا بس نتحمل الوضع بلكى تفرج
والدى كان مستلم مقاوله تبليط احد الشوارع بالمنطقه الخضراء .. الظاهر نفس الى هددونه مخليله عبوة بالشارع الى جارى العمل بي الامريكان قبضو عليه هو واخوى اجانه صديقه وحجالهه لامى ظلت تبجى وماتعرف شتسوى خابرنه على كل الناس الى نعرفهم كالو تحقيق علمود العبوة الى مخلينهه بالشارع الى هو جاى يبلطه ذبوهه براسه واخوى المسكين
بقينا وحدنه خايفين ومانعرف نتصرف
بس لازم نعيش وننتظر رجعه ابونه.. اجه رمضان وابوى واخوى بالسجن حتى ماكو واهس بس امى كالتلى انت هالسنه لازم تصومين بعد صرتى 7سنوات واندعى لابوج واخوج بلكى يطلعون
تغيرت حياتنه برمضان صرنه نايمين بالنهار وسهرانين بالليل كمت انام يم ماما انى واخوى الصغير ياسر مرت كم يوم من رمضان وامى من نجى نتفطر تبجى اكلهه اشبيج دكول مكان ابوج واخوج خالى مدرى هسه شياكلون شيشربون الله يحميهم
يوم الثلاثاء كان صاحتنى ماما ...روحى للدكان جيبيلنه معجون طماطه او ماما خلى احد من خوانى يروح
مونايمين وعلما اكعدهم يصير الفطور
رحت كوة امشي على كيفى على اساس صايمه وتعبانه ولابسه حجاب فرحانه بي
يم ابو الاسواق فتح محل سيديات جديد جان واكفين ولد شباب وبحجون وياشرون على بيتنا كانهم يراقبونه بوكتهه من طلعت من البيت مشافونى بس ما ااعرف ليش خفت منهم حسيت بيهم يراقبون البيت رحت لابو الاسواق جبت المعجون ومريت على جوارينه اسولف ويه صديقتى بتهم من دارو وجهم ركض دخلت للبيت
كتلهه لامى كالت ما اعتقد هما هدفهم ابوج لان يشتغل ويه الامريكان احنا شمسوين يراقبونه وشعدنه هاى انت خايفه
بس انى اكثر من مرة اشوفهم مركزين على بيتنه
يوم الخميس قبل الفطور اندك الباب دكه قويه
امى كالت لا احد يطلع انى افتح كنا محظرين الفطور على الماءدة وكان قبل الاذان بنص ساعه
فتحت ماما الباب سمعت صوت طلق كاتم صوت وامى صرخت صوت واحد وسكتت.. باوعت شفتهم 3 اشخاص ملثمين قتلوهه لماما ودخلو عالبيت ركضت ختلت تحت السرير وارجف وما مصدكه الى صار اختى الكبيرة سهى ركضت استلموهه بطلقتين وكعت بالكاع رند نفس الشي طلقتين تكومت على الارض رغد حبيبتى ركضت تريد تنهزم كانت شعرها طويل جرها من شعرها وعاط بيهه وطلقتين وتكومت حجو بيناتهم كله اصعد دور اخوانى صافنين مهند 6 سنوات وياسر 4 سنه ميعرفون غير يبجون ويصرخون ليش ليش كفخوهم كل واحد راشدى وجتفوهم دورو بالبيت وصوتهم اسمعه لحد الان باذنى ما انسى طول حياتى
بذيج اللحظه حتى النفس توقف عندى العفو ما حسيت على نفسي مابين نمت او اريد انخيل ان هذة لعبه لو حلم عقلى بذيج اللحظه توقف عن التفكير كل همى لا يحسون بي بس تدرون لو باقيه وكاتلينى وياهم جان احسن الى وارحم من العذاب الى جاى اتعذبه كل يوم بس قدرى ان اشهد هكذا حدث ولاحب الناس لقلبي وانا مختفيه تحت السرير حتى لا يشوفونى صاح عليه يالى بعد ماكو احد خلى نروح..
طلعو من بيتنا سمعت صوت سيارتهم شخطت ومشت
اطلع لو ابقى شنو راح اشوف ..اخوانى اخذوهم وياهم كفخوهم راشديات وجرجروهم بقيت وحدى لازم اطلع اشوف امى خواتى...
طلعت رجلى ترجف ما اكدر امشي زحفت زحف رغد تون بيهه نفس بس نزيف رند وسهى مابيهم نفس ماما سمعتهه تون يعنى بعدهه عايشه.. شسوى وحدى ياربي انت ساعدنى
كمت ركضت بالشارع بلكى عافو اخوانى بلكى يرجعون الشارع فارغ محد بي والدنيا ظلمه والناس ببيوتهه من الساعه 2 الظهر كلهه خايفه باوعت على بيت جيرانه ماكو غيرهم ..دكيت الباب حيل صاح عمو منو
لسانى ثكل ما ينطق اريد احجى اكله انى مايطلع صوتى دكيت حيل هم منو الناس بذاك الوكت جانت تخاف تفتح الباب
شويه طلع صوتى انى انى
اجه عمو فتح الباب شافنى هدومى كلهه دم وشعرى مكفش وايدى بيهم دم
اخترع عمو اشبيج ...اهلج اشبيهم
لزمت ايده واخذته لبيتنه
عمو امى واختى بعدهن عايشات مو
اجت زوجته وشافو المجزرة غطو اخواتى سهى ورند
بس امى ورغد كانو بعدهم بيهم نفس ويونون
احتار الرجال مدرى خاف ما اعرف كلى عمو هسه مانكدر نطلع ونبلغ عمو بعدهم الله يخليك
عمو بس اطلع اخاف هم انكتل.. الله يخليك عمو
خطيه راح على الشرطه عود يبلغهم ورجع بسرعه
كال ما يقبلون يجون يخافون لا يكون كمين يكولون الصبح
يالى عمو تعالى ويانه للبيت نامى والصبح الله يحلهه
لا عمو لا ابقى بالبيت
بقو هو وزوجته يمى يكلولى نامى شنام اطول ليله بعمرى ماغمضت جفن ذيج الليله امى وخواتى ممددات وينزفون وما اكدر اسوى شي ابوى واخوى بالسجن واخوانى اخذوهم القتله خطفوهم اى مصيبه هذة هو واحد من البيت يتمرض لو يموت ينسبون الا انى اواجه هكذا قدر ولا معين وعمرى 7 سنه شسوى اروح يم ماما وما اكدر اسوى اروح يم رغد اسمعهه تون لحد الان صوتهه باذنى
طر نور الصبح وجيرانه جانو نايمين على القنفات صحه وكال راح اروح عليهم مرة ثانيه..طلع ورة ساعه اجوى الشرطه فحصوهم الظاهر امى ورغد من النزف هم ماتو اتصلو وشالوهم ودوهم للطب العدلى..من حققو الشرطه عرفو ابوى مسجون واخوى هماتين..كالو لجيرانه اتصلو باقاربهه
اجوى عماتى حظنونى وصرخو بجو لطمو وانا ساكته كتلهم امى ورغد بيهم نفس بعدهم عايشين
راحو دفنوهم وجابولى ملابس امى وخواتى بيهم الدم احتفظت بيهم لحد الان من اشتاقلهم اطلع الملابس واشمهم
بقيت بيت عمتى طلع ابوى واخوى ما ثبت عليهم شي
تفاجاء عاءلته زوجته و3 بنات ينكتلون بدم بارد وبدون ذنب كل ذنبهم انو هو اشتغل مع الامريكان
تعبت اعصابه تمرض بها الاثناء.. اتصلو بي المجرمين
الحمد لله على سلامتك زين طلعوك الامريكان
تفضل اخى شرايد
على كيفك يابه ما تريد ولدك
ترى يمنه مستضيفيهم عدنه
ومنو انتو
مو شغلك اذا تريدهم عايشين حضر لكل واحد 10فاتر
وفد اسبوع ونخابرك ماكو داعى احذرك
راح ابوى باع البيت وشكو عندة جمع مبلغ
رجعو خابرو
انطو التلفون لاخوى ياسر ابوى سمع صوته ظل يبجى وبعدين سمع صوت مهند بابا انطيهم شيريدون
ظل يبجى ويون
ها شفت ولدك يمنه ومحافظين عليهم انت هم حظر فلوسك
حاول يتفاوض وياهم واتفقو على 8 دفاتر كل ولد 2 دفتر..ورة يومين هم اتصلو
ها ابو امجد حظرت الفلوس
اى حاظرة
مثل ما تفقنه
نعم تدللون..
زين انتظر تلفون من شخص تروح تسلمه المبلغ
حاظر والولد يمته
من نستلم سلم وتستلم
ابوى حاطط الفلوس جوة ايدة حتى بس يخابرون يركض نفسيته كلش تعبت
خابرة واحد كله هسه تطلع من البيت وتتوجه للماءمون
تروح يم الزوراء وتدخل بالحديقه واحنا نعرفك
نجيك
صار
راح للزوراء واجاله شخص كله مهند وياسر بامان وين امانتنه
انطا الفلوس
كله يمته استلم
هذا شغلنه معليك احنا نتصل
ورة يوم اتصلو كلوله تروح بالدورة اكو بنايه مهجورة استلم ولدك
راح ابوى علما لكى البنايه جاى يركن سيارته
صار انفجار بنفس البنايه كانو محظرين كمين يكتلون ابوى واخوانى
ركض عالبنايه كلهم ولدى
اجوى الشرطه ماخلو يدخل الا اخوانى ماتو بالتفجير كان مقصود بس ابوى اله عيشه
التمت العالم على التفجير ولزمو ابوى يريد يدخل محد يخلى الشرطه والحرس يدفعون بي وهو يصرخ ولكم ولدى هنا ضل يصرخ لزمو ظربو وكع عالارض
ما مصدكين ولدة شجابهم
وهو مغمى عليه اخذو وياهم يردون يفتهمون من عندة شي حالته جانت تعبانه نقلو للمشفى لان نفسه ضاق واختنق الشرطه لكو جثث اخوانى مهند وياسر ماتو بتفجير البنايه
بقى امجد وين ينطى وجهه يروح لابوى لو يستلم جثث اخوانى ولو يجى على
ولد بعمر الشباب كان عندة هوايات وتطلعات وامال بانيهه لمستقبله تدمرت حياته وتحمل مسؤوليه عاءله تشتت والى انكتل واندفن بعد شيبقى بي راح على الشرطه وحجالهم القصه عافو الحراسه على ابوى بالمشفى وكلوله من يطلع خلى يمر علينه نكمل التحقيق
شويه بدة ابوى تتحسن وظعه طلعه الطبيب ورجع للبيت..
انى بوكتهه ما افتهم شنو معنى الموت ووين يروح الى يموت..هما من اسالهم يكلولى يم الله بس ما استوعب ان المات ما يرجع
كلما اشوف ابوى اساله يمته يجون ماما ورغد هو يظل يبجى بس انى ما ابجى اكله هما عايشين وشوف راح يرجعون واطلع دشاديشهم الى بيهه الدم واكله ريحتهم بهالهدوم انت ما تعرف ولا شفتهم انى شفتهم بيهم نفس جانو يتنفسون ويونون
بعد ما استلمو جثث اخوانى دفنوهم وكلولى لازم تجين تزورين امج واخواتج بالمكبرة
ما قبلت ما اروح امى ما ماتت بعدهه عايشه
ابوى بدت صحته تسوء كان يمى بيت عمتى بدا يهلوس صحيح هادىء بس يحجى هواى ويفرغ الى بكلبه الصدمه خلته كاعد بالبيت وتصرفاته موطبيعيه
بس امجد يشتغل ويه صديق ابوى ويتنقل بين بيوت عماتى واصدقاءة ويصرف علينا انى وابوى
رادونى ارجع للمدرسه
شارجع يامدرسه ما اكدر رفضت شسوى بالدراسه مو خواتى واخوانى جانو يقرون وشطار وينهم اريدهم
بدينا نصرف من شبقى فلوس ولو هما ما بقولنه شي كله صرف على صحه ابوى لان وضعه يخوف من يجى احد لبيت عمتى انهزم واروح للغرفه ما اتكلم ويه اى احد اخاف احجى كلمه بس اكعد بزاويه الغرفه واتذكر اشلون كنا عاءله سعيدة نلعب نضحك نسولف ويه خواتى مرات كنت اعاندهم من يطلبون منى فد خدمه .. هسه رجعو واخدمكم بعيونى بس رجعو مرات اغار من ياسر الصغير واخذ لعباته وينك ياسر تعال اخذ كلشي شتريد بس ارجع شيرجع الزمن ونرجع مثل اول
ابوى اكلته الملامه بقى يلوم بنفسه يكول جان المفروض من اجانى تهديد اخذهم واطلع يوميه يحجة هاى الحجايه لحد ما الكل حفظهه ...
ما اعرف اشلون احجيلكم على وضع ابو امجد ورواء..لو شكد ما احجى ماتستوعبون الالم الى بداخلهم مصايب اجتمعت بوكت واحد وكل هذا هما ما ماذين احد كل الى سوا اشتغل مع الامريكان
طفله بعمر 7 سنوات تشهد فاجعه مقتل ام 3 خوات امام عينيها وما تكدر حتى تصرخ اخوانهه ينخطفون وتندفع فديه وينقتلون شبقى بهذة الطفله لونها شاحب ماتحب تتكلم مع احد كلامهه قليل اكثر الاحداث اخذناها من ملف القضيه بس رواء كان كلامهه
كان الوضع بذيج السنه مابي استقرار هوايه سمعنه جراءم وحوادث خطف وضاعت ماينعرف حتى يحسبون الف حساب ماعرفو منو الى دمر هذه العاءله بس رب العالمين يمهل ولايهمل
بعد مرور سنه تقريبا سيطرت الحكومه على الوضع وبدا الاستقرار ببغداد اكثر وبدى القبض على المجرمين ..
تم القاء القبض على واحد من القتله الى نفذو جريمه قتل عاءله ابو امجد كان مرتكب جريمه اخرى وتم القبض عليه واثناء التحقيق اعترف بهذة الجريمه البشعه
وانفتح ملف القضيه
بدا التحقيق وياه كان هذا الشخص يقرب لمقداد الى اشتغل ويه ابو امجد وسرقه وبطله على اثر السرقه واثنينهم من نفس عشيرة ابو امجد من الاقارب بس الحسد والحقد مالى كلوبهم ونفذو جريمتهم بسبب حسد عيشه لا اكثر
اتصلو الشرطه بابو امجد للحضور للمركز
اسمك السيد طه
نعم عاءلتك وينهم
دمعت عيون ابو امجد شيحجى شيكول
منين يبدى ... بدا يحجيله
كله يعنى انت ما جنت موجود وقت الجريمه
نعم كنت معتقل بس بنتى شهدت الحادثه
طيب اكو شخص اسمه مراد تعرفه
نعم من عشيرتى وقرايب من بعيد
طيب هو اعترف بانه كان احد المشاركين بالجريمه
صفن ابو امجد
ماكدر يحجى
اى ابو امجد هو اعترف بس لازم تجيبلنه بنتك الصغيرة حتى تتعرف علي
بس هما كانو ملثمين زين والباقين الى وياه
اعترف عليهم بس مهزومين ماكدرنه نقبض عليهم وانت تعرفهم ومن عشيرتك
زين استاذ مادام اعترف ليش اجيب رواء وهى اعصابهه تعبانه وما تتكلم الا قليل
لازم هذا اجراء قانونى من تتعرف عليه تثبت الجريمه اكثر
رجع طه دايخ اشلون يفاتح رواء ويكلهه هى ماتقبل تطلع من باب البيت اشلون خل لمركز الشرطه وتتعرف على الى حرمهه من امهه وخواتهه واخوانهه
اول شي دخل للبيت مهموم جروحه انفتحت والم طعن القريب وبقى يفكر ليش هيجى سوى
اجتى اخته ها خوى اشبيك شرادو منك الشرطه
حجالهه وكلهه اشلون رواء يردوهه تشهد على المجرم
اخاف تنهار
خلى نحجى وياها ونشوف شدكول
حبيبتى رورو
نعم بابا
الشرطه دزو على وقابضين على واحد من المجرمين الى
كتلو امج وخوانج
وظل يبجى لحد ما سكت
رواء ساكته لاتحجى ولاتبجى
يردونج الشرطه تكدرين ترحين انت تعرفين شكلهم
بابا اروح واكدر اميزهم من بين 100
طيب بابا باجر نروح
كعدت رواء وابوهه يم الضابط
دخلو 20 شخص كلولهه يالى عمو تعرفين منو من ذولى ارتكب الجريمه
عمو كانو ملثمين بس صوته اعرفه
زين راح تخليهم ذولى يحجون جمله وحدة وانت ميزى الصوت وبعدهه نلبسه قناع وشوفى عيونه
حاضر عمو
جمله وحدة سمعتهه رواء اثناء تنفيذ الجريمه
جيبو الولد بسرعه
الثانى كال بعد ماكو احد دورتو فوك
هاى الجملتين كل الاشخاص الى عرضوهم عليهه نطقوهه وصلو رقم مسجون 15 كال الجمله طبعا رواء مغمضه عيونهه ومركزة ويه الصوت من نطق مراد كالت هو هو هو عمو والله هو نفس الصوت
ظلت ترجف اصفرت جابولهه ماى
بذيج اللحظه تذكرت رواء الحادثه بدقه اكثر ورجع عليه المنظر كانه فلم سينماءى
عمو ارتاحى شويه وفد دقيقه راح نخلى يلبس قناع حتى تعرفينه....
لبسو 5 اشخاص اقنعه وعرضوهم على رواء
من وصلت يمه رقم 3 وكفت خلت عينهه بعينه رجعت للوراء كعدت على الكرسي ساكته
ها عمو اشرت براسهه اى هذا
هنا طه كله بس اريد احجى ويا
ميخالف تفضل شعنك
مراد ليش سويتو بي هيج ليش عاءلتى مو انى كدامكم ليش ماقتلتونى ليش هذا انتقامكم منى وانى ما ماذيكم
بجى مراد وكله عمى احنا حالتنه ظعيفه ونشوفك تلعب بالفلوس لعب وانتمينه لمجموعه مجرمين نفذنه جريمتنه الاولى بيك كله حسد عيشه
بجى طه وكال ياريتنى كنت فقير ومحافظ على عاءلتى ياريتنى وياريتنى
بس الراح مايرجع
كله الضابط تكدر تداعيهم عشاءريا
لا لا اخاف على الباقين امجد ورواء لا اريد فصل عشاءرى ولا شي خلى القانون ياخذ مجراه وبعدين اكو 2 هاربين اخاف ينتقمون منى هو انى ما اذيتهم شسوو بي بعد افصلهم سلمتهم بيد الله
حكمت المحكمه باعدام مراد وتم تنفيذ الحكم
وبقى طه يتنقل بين بيوت خواته لان ما بقاله بيت ولا يكدر يشتغل بس عقله شويه تعب من المصايب المرت عليه بس هو انسان هادىء ما ياذى بس يتكلم كثير
امجد هم يتنقل مابين عماته واصدقاءة ويشتغل ويصرف على ابو واخته
رواء صار عمرهه 14 سنه بس لامدرسه ولا طلعه ولاتكلم احد منعزله بزاويه الغرفه وماتقبل تزور المقبرة ولحد الان ما زارت قبور احبابهه لانهه تنتظر رجعتهم حسب تفكيرهه لانهه ما مستوعبه الموت
النهايه