So Jao Humary Dil Ky Os Kony Main Faraz
Jahan Hum Apni Sanson Ko Bi Jany Ki Ijazat Nhi Daity .. ....
*AHMED FARAZ*
**************************
Five years ago
Dubai se lautay Aayat ko ek haftay se zyada se zyada ho gaya tha. Lekin jub se wo wapas aayi thi. Uskay Abu ne ek baar bhi apni beti ke honto'n pe wo muskuraahat nahien dekhi thi, jisay dekh dekh unki zindagi bahaar mehsoos honay lagti. Aur Aayat main ye tabdeeli sub ne mehsoos ki thi. Par shuroo main sub log isay safar ki thakaawat samajh kar nazar andaaz kar rahay thay.
Unki ghalat fehmi tab khatam huwi jub ek baar Aayat raat ke teen bajay neend main cheekhtay huway be tahaasha ronay lagi. Aur uskay cheekhnay aur ronay ki awaazain is qadar taiz thien ke Riaz sahab aur baaqi sub Aayat ke kamray main dortay chalay aaye thay.
Saamnay Aayat ko khud se kisi saaye ko door kartay dekh Riaz sahab aur Rehana beghum wahien darwaazay par shock se saakin ho gaye thay. Jubkay Aashir aur Zarish lamhay bhar main Aayat ke paas thay.
Aashir ne Aayat ko shanon se pakrtay huway usay neend se jagaanay ki koshish ki, par wo musalsal isi tarhaan cheekhti kuchh bol rahi thi jo us waqt uskay ronay ki wajah se kuchh samajh nahien aa raha tha.
Aayat jub Aashir ke bulaanay par bhi apnay darawnay khuaab se naa jaagi to Riaz sahab dheemay qadmon ke saath Aayat ke bed ke paas aaye aur uskay ab Aashir ki giraft se khud ko chhuraanay ki koshish kartay wajood ke paas beth gaye. Aur apni rundhi huwi Awaaz main Aayat ka naam le kar usay pukaara.
Unki awaaz pe Aayat jesay ek dum se apnay us khaufnaak manzar se baahar nikli thi. Uskay haath, uska poora wajood ek dum se jesay be jaan ho gaya tha.
" meri bachi apnay abu ke paas aao.." apni hansti khelti Aayat ko is haalat main dekh Riaz sahab ka kaleja cheer gaya tha , unhon ne Aayat ki peshaani se baalon tak apna kaanpta haath phaira tha.
Apnay Abu ke lams par Aayat ne apni bheegi aankhain kholien thien
" Abu..?.," apnay abu ki taraf khauf se bhari nazron se dekhtay huway us nay unhain pukaara tha. Jesay pakka kar lena chaahti ho ke ye waqayi uskay Abu hi hain.
" haan meri bachi.. apnay abu ke seenay nahien lagay gi meri jaan..?" Kamray main mojood har shakhs ki aankh ashkbaar ho gayi thi. Wo sub Riaz sahab ki Aayat ke liye is be los mohabbat se waaqif thay.
" Abu.." Aayat ek dum se uthti apnay Abu ke seenay se lag gayi thi.
Riaz sahab uskay sar par haath phairtay halki awaaz main dilaasay taslliyaan detay rahay. Haalaankay wo sachaayi se bilkul be khabar thay.phir bhi Wo Aayat ko apnay seenay se lagaaye us se baar baar ye keh rahay thay ke sub kuchh theek ho jaaye ga.
Lekin Aayat jaanti thi ke kuchh theek nahien hoga, uskay liye sub kuchh khatam ho chuka hai.
Us raat Aayat ke so janay ke baad bhi Riaz sahab usay akela chhor kar jaanay ke liye tayaar nahien thay. Wo kayi ghantay Aayat ke sirhaanay bethay uskay sar par haath phairtay rahay. Rehana beghum bhi wahien unkay saath thien.
Phir kitni dair ke baad Aashir ke kasfi israar par hi wo apnay Room main aa gaye. Par apnay Room main aa kar bhi unhon ne ek baar bhi aankh nahien jhapki thi. Neend unsay koso'n door ho gayi thi.
Jub say Aayat paida huwi thi, wo Riaz sahab ki aankh ka taara bun gayi thi. Aur jub bhi usay koyi chot lagti to dard wo apnay dil main mehsoos kartay thay. Aur aaj to unhon ne Aayat ko jis haalat main dekha tha, uskay baad unka sukh chain o qaraar sub khatam ho gaya tha. Wo pehli baar khud ko itna laa chaar mehsoos kar rahay thay.
Uhain aaj bhi yaad hai jub Zarish ki paidaaish huwi thi aur Unka saara dhiyaan apni no molood Zarish ki taraf khinch gaya tha. Tab Chaar saal ki Aayat ne ro ro kar poora ghar sar pe utha liya tha ke uskay Abu ab us se pyar nahien kartay, uskay naazuk gulaabi gaal uskay ronay ki wajah se tamaatar jesay laal ho gaye thay. Wo Apni Ammi se Zarish ko ghar se bahar phainknay tak ki zid karnay lagi thi. Kyunkay usay lag raha tha ke usnay uskay Abu ko us se chheen liya hai.
Us din Riaz saahab ne kitna usay manaaya tha. Uskay Aansoo roknay ke liye unhon ne kaan tak pakar liye thay aur waada kiya tha ke wo ab apni pyari beti ko bilkul nazar andaaz nahien karain ge. Ek minute ke liye bhi nahien. Wo unkay seenay se lag gayi thi. Aur apni maasoom awaaz main unsay kaha tha ke Zarish bhalay Ammi lelay par Abu sirf uskay hain.
Riaz sahab ke aansoo beh kar takiye main jazb hotay gaye. Unhain samajh nahien aa raha tha ke aisi kya baat hai jo Aayat sub se chhupa rahi hai. Apnay Abu ko bhi nahi bataa rahi.
Aur aaj wo kis tarhaan apni Aayat ke Aansuon ko rokain..?
Us raat unhon ne Rehana beghum se kaha ke kayi baar betian maan se baat karnay main zyada easy feel karti hain ba nisbat kisi aur rishtay ke. Wo chaahtay thay ke wo is baar Aayat se zor de kay poochhay ke aisi kon si baat hai jo usay andar se khaaye jaa rahi hai.
Aur doosray din jub Aashir apnay Room main tha aur Zarish school gayi huwi thi. Rehana beghum Aayat ke room main us se baat karnay aayien. Aayat hunooz apnay Bed par ek taraf letay kisi gair muerpeni nuqtay ko dekhtay apni sochon ke junglaat main ghuum nazar aayi thi. Darwaazay ki awaaz par wo unki taraf muri aur apni Ammi ko dekh kar wo apni aankhon ke poro'n ko apne haath se ponchtay huway uth bethi. Aur unhain salaam kiya.
Rehana beghum uskay salaam ka jawaab detay huway uskay paas beth gayien.
" Aayat kesi ho meri bachi.." Rehana beghum ne Uskay sar par haath phairtay huway mumta bhari awaaz main kaha. Usay is tarhaan dekh unka dil khoon ke aansoo ro raha tha.
" Ammi main theek hoon..." Aayat ne halki muskurahat ke saath kaha. Par wo muskurahat do pal bhi uskay honton pe reh na saki thi.
"Aayat kya baat hai....? kyun itni ghuum suum rehnay lagi ho..? Agar koyi baat hai to apni maa ko to batao.. is tarhaan khaamosh aansoo mat bahaao meri bachi.. tum jaanti nahien tumhaari khaamoshi tumharay Abu aur mujhay kitni takleef de rahi hai. hum tumhain is tarhaan nahien dekh saktay.dil tarapta hai humara." kehty huway unki awaaz bharaa gayi thi aur wo aabdeeda ho gayien thien.
" Ammi nahien... please aap royen mat.." Apni Ammi ke haath thaam kar wo be basi se boli, such bataa kar wo unhain takleef nahien dena chaahti thi , Par uski khaamoshi unhain aur takleef main mubtlaa kar rahi thi. Usay samajh nahien aa raha tha ke wo kya karay..?
" mujhay bataao kya huwa hai Aayat..! apni ammi se mat chhupaao.. jo koyi bhi baat hai bataa do , main waada karti hoon koyi tumhain kuchh nahien kahay ga.." Rehana beghum ko lag raha tha ke shayad Aayat ke dil main koyi hai jis ke baaray main wo kisi se baat na kar paa rahi ho, is liye unhon ne ye kaha tha.
Aayat mussalsal nafi main sar hilaati rotay jaa rahi thi. Wo kis tarhaan apni maa se ye keh de ke wo apni izzat kho chuki hai..
kesay..
" Aayat... tumhain tumharay Abu ki qasam hai..! khudaara hum se kuchh mat chhupaao , kuchh kehti kyun nahien ho..!!!!" Rehana beghum uskay haathon ko apni aankhon se lagaaye ab be tahaasha roye jaa rahien thien. Aur Aayat ka dil toot ke reza reza ho raha tha. Wo ab khaamosh nahien reh sakti thi. Uskay Abu ki qasam de kar unhon ne usay sachaayi bataanay par majboor kar diya tha.
" Ammi.. Dubai main... mere saath.. Ammi mere saath kisi ne....". Aayat ke alfaz jese uskay liye galay ka phanda bun gaye thay jo ek ke baad ek uski saasain ukhaar raha tha.
" mere saath kisi ne zabardast ki.!!." Aayat ne bil aakhir unse wo raaz keh diya tha jo wo apni zaat se bhi chhupa lena chaahti thi. Aur aaj apni zaban se apni rodad sun uska sabar ek dum se toota tha. aur wo Rehana beghum se lipat kar zaaro qataar ronay lagi thi.
usay apna aap marta mehsoos huwa tha. Jesay uskay undar kuchh mar gaya tha.
Rehana beghum ke pairon talay se zameen nikal gayi thi. Unki saans wahien ruk gayi thi.wo be yaqeeni se khud se lipti Aayat ko phailti aankhon se dekh rahien thien.
Wo abhi kuchh keh bhi nahi paayien thien ke baahar se kuchh girnay ki awaaz sunaayi di . Aur tab unhain hosh aaya tha ke Riaz Sahab Aayat ke liye is qadar pareshaan thay ke wo adh khulay darwaazay ke bahar hi kharay thay.
Aur yaqeenan unhon ne in dono ki guftagu sun li thi.
" Riaz..!!.." Wo ek dum se uthien aur Bahar ki taraf bhaagien. Aayat bhi unkay peechhay thi. Baahar jo manzar unhon ne dekha wo dono taa qayaamat na bhool paayain gi.
Riaz sahab Zameen par giray , seenay pe haath rakahy tarap rahay thay.
" Abu..!!,,"
" Riaz..!!!... Ya Allah reham kar..!!" Wo dono cheekhtay huway unkay paas zameen par thien. Par Riaz sahab ki num Aankhain dard se bhari sirf Aayat ke chehray par markooz thien.
Wo tarap rahay thay par us waqt bhi unhain Aayat ke Aansoo seenay main uthay is dard se zyada takleef de rahay thay.
" Aashir!!... Aashir.!!.. Jaldi aao.!! Ya Allah ye kya ho gaya ! Riaz aap hosla rakhain hum aapko kuchh nahien honay dengay..." Rehana beghum cheektay huway madad ke liye Aashir ko pukaar rahien thien. Jo kuchh lumhon main hi unkay paas tha.
Aashir ne Ambulance ko call kar di thi. Aur jald hi Ambulance ke Zariye unhain hospital le jaaya gaya.
Aayat wahien zameen par pathar ki but bani bethi rahi. Agar kisi cheez se uskay zinda honay ka gumaan ho raha tha to wo thay uskay na ruktay aansoo.
Uski nigaahon ke saamnay baar baar apnay Abu ka wo chehraa ghoom raha tha. Unki aankhon main bharay us dard ko wo martay dum tak bhool nahien paaye gi. Kis qadar kamzor lag rahay thay wo., jesay apni aankhon se wo Aayat se muaafi maang rahay hon, keh rahay hon ke " mujhay muaaf kar do Meri gurya.. main teri hifaazat nahien kar paaya. Mujhay muaaf kardo....
" Abu..!!! .." Ek zor daar cheekh uskay galay se nikli thi aur wo zameen pe girti Zaaro qataar ronay lagi. Wo jaanti thi ke uskay Abu ki is haalat ki zimmay daar sirf wo hai..!
sirf wo..!
**************
"Aayat! Wald , Riaz khan , aapko , Mateen Haider , wald Wahab haider, haq mehar paanchh laakh nikaah main qabool hai..?"wahan Mojood sub khawaateen ki nigaahain ghoonghat main chhupi Aayat par markooz thien. Lekin Aayat kisi zinda laash ki tarhaan wahan is qadar chuup thi, jesay uskay ek lafz se bhi sub kuchh khatam ho jaaye ga.
" Aayat meri khaatir is shaadi ke liye haan kar do.. Apni Maa ko sirf ye khushi naseeb kardo.. apnay abu ki rooh ko khushi dedo..."
" Nahien Aayat..!! Ammi ki baat par dhiyaan mat do..! tum jo chaaho gi wahi hoga.. koyi tumhain is nikaah ke liye majboor nahien karay ga.!."
" kya aapko ye nikaah qabool hai...?" Aayat ki musalsal khaamoshi par nikaah khuaan ne ek baar phir poochha . sub ki nigaahain uskay ghoonghat main chhupay sar par thien . lekin wo kisi aur hi dunya main thi .
" Aashir ye tum kya keh..."
" Aap jis se kahain gi main shaadi ke liye tayaar hoon Ammi.."
" Aayat..." Rehana beghum ne uskay sar par haath rakha aur uski taraf zara sa jhuktay huway halki awaaz main uska naam letay usay apnay khayaalon se baahar keencha tha.
" Qabool hai..." Molvi sahab ne do baar aur poochha tha aur is baar Aayat ne jazbaat se aari hokay ek robot ki tarhaan jawaab diya. Uskay baad us se nikaah ke papers par sign liye gaye.
Par uskay be wafaa aansuo'n ne uski ek na suni aur jahan usnay dastakhhat kiye , wahien uska ashk baarish ki boond ki tarhaan us dastakhat par gira.
Par us ek Aansso ke baad us nay bari be rehmi se apnay rukhsaaron se phisaltay un motio'n ko apnay haath se ponchh daala.
Aaj us ne apnay apnon ko khud se nijaat de di thi. Ab wo uski wajah se kabhi nahien tarpain ge. Is nikaah se sirf yehi wo waahid khushi thi jo usay naseeb huwi thi.
********************************
salaam ; is late update ke liye mujhay muaaf kar dain, par mera ipod ab kisi kaam ka nahien raha is wajah se main chap likh nahien paayi, ye maine jaldi se apnay pc main likha, aur bohat si mistakes hongi is liye pehlay se hi sorry hoon :( aur main sub ke msg ka jawaab bhi nahien de paayi mujhay bohat dukh ho raha hai:( par ab bus jaldi se naya ipod le loon, tab tak ke liye Allah hafiz.