Ang aga-aga, inutusan ako ni Mama na pumunta sa mall para kunin 'yong damit na gagamitin niya sa kasal na pupuntahan niya.
Okay lang namang utusan niya ako pero pinasuot pa kasi niya sa 'kin 'yong dress na binigay ni Yaya Linda. Kahit anong pag-ayaw ko, hindi ko natanggihan si Mama.
Pagdating ko sa TriNoma, naisip ko na lang mag-Starbucks. Malapit na ako sa SB sa taas ng TriNoma nang bigla naman akong natapilok. Feeling ko, lahat ng tao roon, pinagtawanan ako. Nakakahiya naman, naka-dress pa naman ako. Lupa, kainin mo na ako, now na!
Habang nasa sahig pa rin ako, may kamay akong nakita. Pagkakita ko sa mukha ng tumulong sa akin...
"IKAW?!" sigaw naming pareho.
"Anong ginagawa mo rito?" pagtataray ko.
"Hoy, Betty, sa 'yo ba 'tong mall?" Panira talaga ng araw ang Jeydon na 'yon.
"Betty mo ang mukha mo! E, bakit mo ba ako tinulungan, ha?"
"Akala ko ibang tao, 'yon pala, pangit na nerd lang ang makikita ko!"
Gano'n? So kapag alam pala niyang ako 'yon, hindi niya ako tutulungan? Tapos kapag ibang tao, tutulungan niya? Ang sama talaga ng ugali.
"Whatever. Umalis ka na lang! Panira ng araw."
Dumiretso na lang ako ng SB. Um-order lang ako ng Strawberry Frappe. Humanap ako ng upuan sa labas. Sana lang, huwag na akong guluhin ng unggoy na Jeydon na 'yon.
"Hi, Betty!" Kakasabi ko pa lang, ayun na naman po siya, ready na namang manggulo. Malas ko talaga.
"Pati ba naman 'pag weekends sisirain mo ang araw ko? Magpahinga ka naman!"
"Ang yabang mo na, ah! Dati nga, nagpapapansin ka pa sa 'kin. Bakit, si Troy na ba ang tagapagtanggol mo ngayon?" Tapos tawa siya nang tawa. Aba! Naka-flip-top pa si mokong. "Tsaka porket ba gumanda nang one percent 'yang damit mo, feeling maganda ka na?"
"Papansin ako sa 'yo? In your dreams! Bakit ba ganyan ang getup mo? Saang magasin mo ba 'yan napulot? Tsong, hindi ka pwedeng maging dream guy kung ngayon pa lang, mukha ka nang bangungot."
O, ha! Napanood ko 'yon kay Abra.
"Aba, lumalaban ka na, ha?"
"O, bakit, tingin mo, papatalo ako sa isang unggoy na katulad mong feeling gwapo! Tse!" Tumayo na ako. Tinawag niya ako pero hindi naman ako lumingon. Please lang, lubayan mo ako.
Nakapasok na ako sa loob ng main mall at malayo na ako sa Starbucks. Nilingon ko 'yong likod ko, wala na 'yong Jeydon na 'yon. Kahit isang araw naman, huwag niya akong inisin. Nag-Timezone muna ako tapos nakita ko roon si Marky. Nagtago agad ako para hindi niya ako makita.
Kasama niya 'yong babaeng hinalikan niya dati sa school. Siya 'yong kaibigan ni Stacey. Chicks na chicks 'yong dating niya, walang-wala ako.
Nandoon sila sa shooting arcade, 'yong babae 'yong nasa harap tapos nasa likod si Marky. Ang sweet nila. Kahit dati sinabi sa 'kin ni Tiffany na wala namang sineseryoso si Marky, hindi ko pa rin mapigilang masaktan. Kasi kung titingnan silang dalawa... mukhang seryoso sa kanya si Marky, at kung fling o wala lang 'yon sa kanya, wow naman, ang sweet niya masyado.
Nang matapos na sila, dinala ni Marky 'yong bag ng babae. Bakit kasi napaka-gentleman niya? Nainggit talaga ako. Alam kong parang tanga 'yong ginawa ko pero sinundan ko sila, tapos nakita kong pumila sila sa sinehan. Ano kayang papanoorin nila?
Nakapila sila sa may Breaking Dawn. Ano ba 'yan? Ang lungkot, naiinggit na talaga ako, super. Pang-lovers talaga 'yon, e. Tapos dagdagan mo pa ng akbay ni Marky, nakakainis naman. Sana ako na lang 'yong babae.
Nang makaalis sila, bumili rin ako ng ticket. Bakit? Matagal pa naman akong maghihintay, e. Mas mabuti nang manood na lang ako ng movie, 'di ba? At least, hindi ako maiinip. Tama! Saan kaya sila nagpa-reserve? Dapat sa likod ako.
"Ah, miss, pwede bang malaman kung saang upuan nakaupo 'yong dalawang nauna kanina?"
"Dito po." Tinuro niya sa 'kin 'yong bandang likod na.
"Ah, doon po ako sa pangalawa sa likod nila."
"Okay, ma'am."
"Thank you." Ang saya ko! Yes. Buti na lang, may upuan pa roon.
Bumuli agad ako ng popcorn tsaka soda, magsisimula na kasi 'yong movie, e. Buti, wala na masyadong tao sa bilihan kaya nakaabot ako.
Wala pang tao sa loob noong nasa pinto na ako ng sinehan pero nagmadali na akong pumasok para hindi nila ako makita mamaya. Hinanap ko agad 'yong upuan ako. Hindi naman masamang manood ng movie, 'di ba? Nagkataon lang na nandoon din sila, hehe.
Padami na nang padami 'yong mga tao. Maya-maya, nakita ko na rin 'yong babae tsaka si Marky.
Nakangiti pa si Marky. Hays, mukhang masaya siya roon sa babae. Sino ba namang hindi? Sa ganda at sexy ba naman ng kasama niya.
Nagsimula na 'yong movie. Nakaakbay si Marky roon sa girl, ouch naman. Ang lungkot, napahawak tuloy ako sa dibdib ko. Ewan, parang nasaktan akong makita sila. Ang tanga ko kasi, e.
Nagpunta pa ko roon. Naalala ko tuloy 'yong sinabi ni Kuya, walang magkakagusto sa 'kin na gwapong lalaki, kaya dapat hindi na ako umasa. Dapat, mag-move on na ako. As if naman magiging kami ni Marky? Natawa tuloy ako.
"Hi, Betty!"
Huwag mo sabihing... please huwag. "Anong ginagawa mo rito?!" Napalakas yata 'yong boses ko kaya lahat ng nasa paligid, napatingin sa 'kin. Buti na lang, sina Marky, hindi napatingin.
"Sige, ipahiya mo ang sarili mo."
"Sinusundan mo ba ko, ha, unggoy?" pabulong na angil ko.
"Bakit masama bang manood ng movie?"
"Oo, masama! Alam mo kung bakit? Kasi katabi kita. Hindi naman siguro ito coincidence, 'di ba? Tsk."
Kumain lang siya ng popcorn, patay-malisya pa. Nakakainis talaga ang lalaking 'yon, halatang gusto talaga akong inisin, e. Kahit saan ako magpunta, nandoon lagi.
Hindi na tuloy ako makapag-concentrate sa panonood. Paano ba naman kasi, si Marky tsaka 'yong chick niya, ang sweet sa harap ko. Lakas maka-PDA sa sinehan.
Tapos may epal pa sa tabi ko.
Maya-maya biglang bed scene na 'yong nakita ko sa screen. Ay, ano ba 'yan? Hindi ako sanay sa ganyan. Nakita ko si Marky tsaka 'yong babae, naghahalikan. Ouch na naman. Huhu, hindi ko na yata kaya 'to, wrong move talaga 'to! Tinakpan ko na lang 'yong mga mata ko, hindi ko sila kayang makita, e.
Tumawa si Jeydon.
"Arte, ah! Patakip-takip ka pa ng mata. Bakit, sobrang inosente mo ba?"
Tinanggal ko 'yong kamay ko sa mata ko at nilingon siya na halatang nagpipigil ng tawa. Buwiset talaga 'tong unggoy na 'to!
Ah, alam ko na! Tumayo ako sa harap niya tapos...
"Ouch!"
"Buti nga sa 'yo! Haha!" Sinipa ko nga 'yong ano niya... 'yong paa niya.
Umalis agad ako. Pababa na ako at noong nadaanan ko sina Marky, naghahalikan pa rin sila. Napatingin ako kay Marky. Biglang bumilis 'yong tibok ng puso ko noong nakita niya ako. Muntik pa nga akong mahulog sa hagdan, buti na lang ay napakapit ako sa upuan. Siguro mga two seconds din kaming nagkatinginan habang naghahalikan sila ng babaeng 'yon.
Pumunta na ako sa shop ng tita ko at kinuha na 'yong damit ni Mama.
Tama... Dapat tigilan ko na 'yong matagal na pagpapantasya ko kay Marky, sarili ko lang ang pinapahirapan ko, e. Umaasa lang ako sa wala.
Paglabas ko ng shop, may humila sa 'kin. Hindi ko makita kung sino. Saan ba ako dadalhin nito?
"Ouch! Saan mo ako dadalhin? Bitawan mo ako!"
Dinala niya ako sa may parking lot. Walang tao roon.
Noong nakita ko na 'yong mukha niya, bumilis nang sobra 'yong tibok ng puso ko. Tinulak niya ako sa may pader. Ang lapit-lapit na ng mukha niya sa 'kin.
Anong gagawin niya? Pati 'yong paghinga niya, ramdam ko na sa sobrang lapit niya sa mukha ko.
Napapapikit na ako. Ano ba kasing gagawin niya? Nakatingin lang siya sa 'kin. 'Yong sexy niyang mga mata na parang kinakausap ka. Hinawakan ko 'yong dibdib ko, sobrang lakas kasi ng tibok ng puso ko na baka marinig na niya.
Gusto kong magsalita. Gusto kong sabihing bitawan niya ako pero hindi ko nagawa. Nakatingin lang ako sa mga mata niya. Alam mo 'yong pakiramdam na parang matutunaw ka na sa tingin niya. Iyon 'yon, e. 'Yong pakiramdam ko, masaya na kinakabahan na natatakot.
"Candice..."
Ang sexy ng boses niya. Husky.
Totoo ba 'to o panaginip? Nilagay ko sa likod ko 'yong kamay ko tapos kinurot ko iyon. Ouch, ha? Ang sakit. Nahalata kaya niya? Naguluhan na ako. Hindi pa rin tumigil 'yong malakas na pagtibok ng puso ko.
Nilapit na niya talaga 'yong mukha niya. Hahalikan ba niya ako?
Pinikit ko na lang 'yong mga mata ko.
"Marky!"
'Yong boses na 'yon...
Binuksan ko 'yong mga mata ko. Nakita ko si Marky, nakatingin sa sahig, nakangiti tapos tumingin sa 'kin tapos kay–
"Jeydon?"
Bakit ngayon pa?
➖➖➖