#قيود_ " خلف القضبان "✨
#الكاتـَبة:- ايـَات رسـُول 🧡
تصويت وتعليق بين الفقرات+قراءة ممتعة!
يكول :- أنتِ هبَه الله التِـي لا تفيها ڪُل الصَلوات
«ــــــــــــــــــ«•»ـــــــــــــــــ»
وصلنا للمكان المطلوب لزم الاسلكي اسار واردف ويه الحراس :-
-بلشو شغل اريدكم تتوزعون على كل مكان موجود بهاي البنايه .
خله الاسلكي بجيبه ولبس لثام باوع علي واردف :-
-شتسوين لازمه الثام بيدج البسي بسرعه
-زين الثام عليش همه اخيرهم راح يعرفونه
-لاا محد راح يعرفنه البسي الثام بسرعه
-ما اعرف البسه
نفخر اسار بضجر واتقرب علي اخذ الثام من ايدي وخلاه على وجهي لبسني الثام وابتعد ركز عليه واردف بضايع :-
-عيونج راح تسطرني لاا وانوب لبست لثام وصارن بس عيونج يبينن .
-ركززز اسارر لااا تباوع على عيوني .
لزم راسه بقوه يريد يرجع الوعيه شويه واتحرك اسار ختل وره الباب من طلع شخص من البنايه اشرلي انزل راسي بسرعه نزلت راسي ولزمت سلاحي بقوه طبعا بالكوه شايلته ايدي ترجف بس اشيله ما احب
الاسلحه ابد بس احب صوتهن دخل الشخص وبسرعه وكف اسار ومشه بخطوات هادئه اباوع على مشيته وخطواته دارس كلشي بهدوئ ودقه صار قريب من باب الدخول توني اريد ارفع راسي وطلع شخص ثاني بسرعه نزلت راسي وضليت كاعده لاا اكدر
اروح ولا اكدر اطلع من مكاني باوعت على اسار من صار وره الشخص شهكت بصدمه من اسار خله ابره بنص جتفه وكع الشخص بالكاع مغمى عليه هاي الابره تستخدم لحتى تخلي الشخص يغمى عليها لفترات وساعات طويله عند اسار هواي
منها واني هم عندي للاحتياط اشرلي اسار اجي وكفت ومشيت بسرعه بس اريد اوصل يم اسار لكن من شفت خيال شخص راح يطلع رجعت ختلت ورجع اسار ختل وره الباب رفعت راسي اباوع على اسار موجود بس الشخص الي طلع ماكو يااا هذه
وين راح رفعت راسي هينوب ضحكت بقوه من شفت الشخص مرمي بالكاع رحت اركض لـ اسار صرت بصفه باوع على البنايه ماكو احد اني حسب ما سمعت همه مخلين برا حراس بس ثلاثه واحنا
كتلنه ثلاثه لزم ايدي اسار ودخلنه سويه وكف اسار من انتبه على خيال احد ختل وره شي كلش جبير ما اعرف شنو هوه حتى اني خلاني وياه هوه واكف كدامي واني بس اباوع عليه بدون ما يباوع علي اردف :-
-كافيي لااا تباوعين عليه هيج .
-شلون انتبهت وانتَ حتى ما باوعت علي
-دارس نظراتج اني تعلميني بيج .
-اخخخ منك
-والرب احبج
-مو وكتها اسار خرب حظيي .
ضحك علي ورجع يباوع على المكان صار فارغ ماكو احد سحبني من ايدي وطلعنه من هذه المكان وكفت اني من شفت الزعيم وشخص ثاني يتناقشون ويحجون باوع اسار علي واردف :-
-شبيج عليش وكفتي؟؟
-اسار باوع .
اشرتله على المكان من اندار يباوع بسرعه سحبني من ايدي مشينه بخطوات سريعه انريد نصير قريبين من المكان الي يحجون بي حتى نسمع كلامهم ونرجع للبيت وكف اسار بصف غراض وكراتين هواي مادري مال شنو باوع عليهم اسار يريد يستمع الكلامهم :
-البضاعه راح توصل لـ بغداد بأقرب وقت
-اني ما اريد اسمع هذه الكلام اريد البضاعة بعد أسبوع موجوده بغداد
-ليش هل كد مستعجل اكو هواي ناس راح تحصلهم اذا صبرت
-الناس ينتضرون البضاعه ولازم اوصلها الهم ما اكدر اتأخر حتى لو مو كلها المهم توصل واسكتهم .
-اذا كدرت اخلي البضاعه توصل لـ بغداد باجر بليل
-حلو هذه الوقت عاشت ايدك
-راح ارتب وضعي وعود اكلك
-منو راح يوصل البضاعه
-اني راح اوصلهن بس اذا صار شي انتَ هل مره توصل البضاعه لان جماعة المنواس مراقبينا من كل الجهات ما راح اضمنلك ما راح يشتكون علينا
-لا تخافين روح بأمانتي الباقي كله علي ما راح اخليهم يسوون هذه الشي المهم عليك تواصل البضاعه لـ بغداد وللمكان الي دزيته الك
-هاهيه تدلل انتَ اعتبر البضاعه وصلت
ضحك الزعيم وحضن الشخص بقوه بودي اروح اموته بأيدي كل ما اتذكر كلام ابوي بس بعدين اتراجع طلعو من الباب الثاني هم زين ما طلعو
من هذه الباب جان شافو الشباب مكتلين بالباب سحبني اسار وبسرعه طلع من المكان لكن وكف كلبي بخوف من صار صوت شخص ورانه انداريت اباوع وانصدمت من شفت الشخص حلط السلاح على ركبت اسار ويريد يكتله رفع عينه علي واردف :-
-نزل سلاحك
ما كدرت احجي شي لان بس احجي ينعرف صوتي باوعت على اسار غمزلي وباوع على الجيب مالتي الي بي الابر خرب عرضك اسار شلون تفكر نزلت الاسلاح على كيفي بالكاع سحبه اسار
وياه يريد ينزل ياخذ السلاح بسرعه طلعت الابره من جيبي وخليتها بنص ظهره بدون تفكير وكع الشخص بالكاع مغمى علي ركضت على اسار خايفه علي حضنته حيل واردفت :-
-انتَ زين .
-من حضنتيني صرت زين
انتبهت على نفسي وبسرعه ابتعدت عزاا هاي شبيه اني صدك مستهيلكه رجع لزم ايدي وطلعنه من المكان كله صعدنا بالسياره ورجعنا للبيت نزعت الثام لان اختنكت اريد اتنفس رجعت وخرت الوصله الي مخليتها على راسي انفل شعري كله صار على ظهري صوفر اسار بصوت عالي واردف :-
-وفي جمال شعرج اني انغرمت .
ضحكت على وسكتت ما اعرف شنو اجاوب وصلنا للبيت نزلت قبل اسار دخلت للبيت بسرعه اخذتلي كلاص مي وصعدت لغرفتي اريد اسبح حضرتلي
ملابس ودخلت سبحت بسرعه وطلعت بدلت ملابسي ولفلفت نفسي باللحاف من كد ما بادره شويه وانفتح الباب دخل اسار وسده وراه كعد على التخم الي موجود بالغرفه وضحك على منظري باوعت علي واردفت :-
-لاا تضحك اسار بس والله بارده .
-اضمج بضلوعي اذا جاسج البرد .
-ما يصير تضمني حرام .
-جا بس انتِ تحضنين بيه عادي .
-لا ارادي مني احضنك والله .
-عادي اني هم لا ارادي اريد احضنج .
-لااا اسكت ما يصير .
-والله خفت منج بالاول بس بعدين من شفتج خليتي الابره بنص ظهره عرفت بيج ذيبه وما تخافين
-ترباية ابوي بعد .
-والنعم منج ومن ترباية ابوج ما قصر .
-هسه شراح نسوي .
-راح ننتضر لحد ما يجي دور الزعيم حتى من يروح يودي البضاعه نشتكي علي ومناك ابوج يقبض علي
-بس هسه مو الزعيم راح يروح هذه الشخص .
-ايي اعرف احنا لازم ننتضر اني راح اخبر على هذه الشخص اول شي اعرف معلوماته وكلشي يخصه وبعدين اخبر علي واخلي ينسجن
-وراها الزعيم يروح ومن يوصل هناك يصير بين ايد ابوي .
-بعدها يخلص الانتقام واذا راد ابوج شي ثاني بعد ما ندري .
-الله كريم منا للايام الجايه .
-باحر عندج دوام يله نامي حتى تكعدين من وقت
-ايي والله تعبت صارلي هواي ما نايمه وانوب جتفي يوجعني .
-اجي افركلج جتفج اذا تريدين .
نفيت براسي واردفت بسرعه :-
-لااا يمعود على بختك روح نام انتَ
-تدرين الناس مالهم بعيوني مكان ، بس إنتَ عيُوني كلهن .
-ادري لان هذه الشي واضح على نظراتك الي مبين هواي تحبني .
-احبج شنو هاي الكلمه هواي قليله لج اني مهووس ومريض بشي اسمه هازال .
-مو لهل درجه راح اتعبك والله .
-عادي اتحمل كلشي منج حتى التعب اتحمله شعندي غيرج حتى اعوفج .
-كلامك يخجلني اسكت كافي .
-تستاهلين كلشي حلو ينكالج .
-اسار خليها بالك ما راح يُمرك مِثلي لو تصبر دَهر .
-ولا اريد يمر علي احد بس انتِ مريلي وخليني احبج بعد بالزايد خليني مهووس بيج اكثر .
-ما استاهل حبك هذه والله .
-وداعت عيونج الرماديه تستاهلين انتِ كلشي حلو بهاي الحياة تستاهلينه واني هم استاهلج حبيني وفكري بكلامي .
-لا تشغل بالك ديفكر بكلامك وادرسه دراسه حتى يكون الجواب يريحك ويريحني .
-اتمنى تقبلين حتى اخليج اسعد انسانه بالعالم .
-انشاءالله من افكر ارجعلك خبر واردلك الجواب .
-يله رايح اني نايمه وارتاحي لان باجر دوامج .
-تمام تدلل انتَ
ابتسم بوجهي وطلع ابتسمت لا ارادي مني من شفت ابتسم بوجهي والله راح يخبلني اسار لا هوه الي اني منطيته جواب ولا اني الي مخليته
محتار عبالك مسيطر على الوضع وكانو راح اوافق علي ما فكرت ولا هتميت رجعت لفيت روحي مره ثانيه ونمت كعدت الصبح علمود الدوام بدلت بسرعه ونزلت لكيت اسار كاعد بالمطبخ وينتضرني كعدت على الميز واردفت :-
-راح توديني انتِ .
-بكيفج اذا يعجبج اوديج اني .
-تمام بس باقي الايام الحارس يوديني .
-اذا تريدين عادي اني هم اوديج كل اوقاتي الج .
-لااا شسالفه انتَ عندك شغل واني ما اريد اعطلك .
-تمام هسه اكلي حتى نروح .
اكلت شويه وكمت طلع هوه يشغل بالسياره وانصدمت من شفت خدامه جديده غير هذيج ابتسمت بوجهي واردفت :-
-اهلاً مدام هازال
-اهلا بيج اعتقد انتِ جديده هنا موو؟
-نعم السيد اسار حاكاني بدو خدامه واني كنت اشتغل عندو من زمان فـ حالياً رجعت اشتغل .
-انتِ سوريه ؟
-ايي سوريه .
-شنو اسمج ؟
-اسمي راما .
-مره ثانيه اهلاً بيج .
عفتها وطلعت خرب حظي الله ما يدزلي بس السوريات وين ما اروح تذكرت فيروز من جنت مخطوفه ماعرف شنو صار بيها طلعت من يمهم لو لا صعدت السياره وانطلق بينه للجامعه وصلنا للجامعه
نزل واني نزلت وراها ضل واكف اله دخلت الجامعه يله راح دخلت ادور على قسمي اريد اشوفه وين وما احس اله الكتاب اجه براسي لزمت راسي متوجعه اجتي البنيه تركض عليه ما انتبهت عليها لزمت راسي واردفت :-
هازال - I am very sorry
صوتها مو غريب علي هذه الصوت سامعته قبل رفعت راسي وانصدمت اكثر من شفت ريفا كدامي؟
عزاااا شجابها هنا اصلا شتسوي بـ امريكا ؟
هيه فتحت عيونها مصدومه مثل توني اريد احجي وحضنتني بقوه ضحكت وبادلتها الحضن اجني صديقاتها مصدومات يباوعن عليها وعلي هم ابتعدت عني واردفت:
-هازال شجابج هنا
-انتِ الي شجابج اني اجيت ادرس هنا
-واني كذالك عزااا ما توقعت اشوفج لان بأخر فتره اختفيتي وسمعت بيج مخطوفه بعدها انتقلت لـ امريكا حتى اكمل دراستي .
-ما جاي استوعببب عزااا واخيراً شفت احد من صديقاتي هنا .
-زين تعالي سولفيلي شنو صار وياج ليش اختفيتي .
توني اريد احجي واردفت وحده من البنات ويه ريفا :-
ا-Riva, we will be late for the lecture. Come on.
ريفا -You go, I will stay with my friend
عافنها وراحن سحبتني للكوفي موجود بالجامعه كعدنه بي واردفت :-
-ايي احجيلي والله هواي مشتاقتلج حرفياً من اجيت لهنا لحد الان اتذكرج كل ما اشوف وحده شكره
-يبووو ولج شحجيلج اشكال والوان صارت وياي .
-احجيلي خلي نشوف شصاير وياج .
-اول شي اني ما ختفيت جان عدنا عرس ابن خالي رحت علي ومن طلعت من القاعه انخطفت من قبل اعداء خالي الي موجودين بـامريكا ضليت هناك يمهم محد كدر ينقذني لان اذا يطلعون يقتلونهم اجه اسار نقذني وحالياً اني يمه والكل يعرف بيه سافرت لـ امريكا علمود ادرس وحالياً رجعت ادرس .
-اسار منوو؟؟
-جان زوج بنت خالي السابق وحالياً هوه يحبني .
صفنت بوجهي واردفت :-
-يحبج؟
-ايي عادي ترا عاف بنت خالي من زمان .
-اشوو انتِ مبين عليج مكيفه عايفها بس لاا انتِ هك تحبي .
-والله اسار شخص ما يتعوض يخاف علي ويحبني وحنون علي وكل بنيه تتمنى هيج شخص .
-وانتِ تتمنينه ؟؟
-هاي شبيج ريفا .
-ترااا مبين عليج عينج لمعت من كلتي حنون ويخاف علي ويحبني .
-مادري ريفا كافيي كوميي خلي اروح ادور قسمي
-امشي اني ادليج لان اعرف كل الاقسام .
-ليش انتِ مو نفس القسم مالتي .
-حولت اريد دكتوره نفسيه اصير .
-الله شكد حلو حتى من تصيرين دكتوره اجي عليج تشوفين حالتي النفسيه .
-كبر طمج دكومي كومي خلي نروح .
ضحكت عليها وكمت رجعنا دخلنا الجامعه دلتني على القسم مالتي وراحت دخلت للقاعه بعده الدكتور ما جاي اخذتلي مكان وخليت غراضي بي طفيت تلفوني من دخل الدكتور باوعت تك عين من
شفت ولد اجه كعد بصفي شعره عالي وعيونه ملونه وجسمه ضخم ومعضل هم زحت عيني عنه وانتبهت على الدكتور بلش يشرح بس كله بالانكليزي اصلا هوه قسمي كل شرحه بالانكليزي
خلصت المحاضره والكل طلع طلعت من المحاضره وصارت بوجهي ريفا اجتي سحبتني وطلعنه سويه هواي فرحت من شفتها واخيراً شخص احبه
صار يمي اكدر احجيله الي ديصير بيه ضلينه كاعدين لحد ما اجه وقت المحاضره رحت لمحاضرتي لكيت الدكتور توه يريد يدخل بسرعه دخلت وكعدت بمكاني خلصت المحاضرات كلهن طلعت من الجامعه ولكيت ريفا واكفه بالباب رحت عليها واردفت :-
-شكو شبيج واكفه يم باب
-الحراس عايفني وماشي خرب حظي الفكر
-لا تهتمين اني اوصلج للبيت
-صدك والله اخاف اتعبج .
-يمعوده تعب شنو هسه أتصل على اسار يجي ياخذنه .
-اويلييي من اسار صارت بحصرتي اشوفه .
-تعالي يوم علي واشوفج شلون يتعامل وياي .
-انشاءالله اجي عليج .
توني اريد اطلع تلفوني وصار شخص جبير كدامي باوعت علي واردفت :-
-مضيع شي خويه .
-انتِ الست هازال
-ايي اني انتَ منو ؟
-اني الحارس الشخصي الي خلاه سيد اسار
-وشمعرفني اني انتَ تحجي صدك وما تجذب .
-تحبين اتصل على سيد اسار
-انتضر اني أتصل
ضحكت ريفا بصوت هادئ ضربتها على جتفها وطلعت تلفوني اتصلت على اسار بسرعه جاوب :-
-الو هازال .
-خرب روحك جفلتنيي
-شكو شبيج وصلج الحارس لو لاا .
-ماعرف هذه واخد واكفلي باب الجامعه ويكول اني الحارس الي دزه السيد اسار
-انطينياه خليني احجي وياه .
-تمام
انطيته تلفون راح بعيد يحجي بالتلفون شويه واجي انطاني التلفون خليته على اذني واردفت :-
-ها اسار .
-وجعا بسرعه رجعي للبيت .
-انجب لاا تحجي هيج وياي والله بس اجي اموتك .
-رجعي ديراقبون بتحركاتج .
-طبهم عرج على مرض
-هازال رجعي لاا تخليني اجيج اني اخذج .
-تمام خلص راح اجي .
سديت الخط واردفت :-
-تمام وين السياره
اشرلي على سياره حيل عاليه بس حلوه من النوع الحديث ضحكت ريفا وهمست :-
-والله هذه لـ اسار ذوق من صدك
-ايي مو تشوفينه اختارني .
-اذا عندج مثل اسار انطيني .
-لاا ماكو والله كلهم ما يشبهون اسار
-عنده اخو؟؟
-عنده واحد متزوج واحد لاا اعزب انتِ اخذي هذاك
-كليلي شكد عمره
ضحكت عليها وصعدت السياره صعدت بصفي سديت الباب وانطلق بينه للبيت باوعت عليها واردفت :-
-والله مادري شكد عمره بس هوه جبير
-انطمي هازال اني اريد اعرف عمره
-عزااا بعينج الي يشوف حجابج وتحشمج يكول اسكت وخليها مستوره
-ترا اني بنيه مؤدبه
-كلش وحجابج وين موقعه .
-موقعه بالراس حبيبتي
-انجعمي ريفا
-اكلج هاي شبيه اني عود ما احب هاي السوالف صاير مسربته
-والله اول ما شفتج كلت هاي فقيره من تحارش بيج بنيامين بس هسه طلعت حقيقتج
-اخخخ لاا تذكريني بهذه بنيامين اموت منه كبر
هم زين خلصت منه وعفت الجامعه
-بس هوه هنا ترا موجود بـ امريكا
-ليش هوه مو يدرس بـ بالعراق
-لاا عزيزتي جاي يدرس الماجستير بالعراق
-كبر لفه اعوف امريكا وادري بالعراق كون الغسل
-هسه عوفج من بنيامين وين بيتكم .
-اني راح احجي ويه الحارس وادلي .
حجت للحارس على بيتهم حتى يوديها وصلنا لبيت ريفا كلش حلو هم عالي عجبني تمثال الصقر الي مخلينه بالستاره مال سطح حيل حلو وجبير هم نزلت ريفا ودعتني ودخلت للبيت رجع الحارس
فر السياره ورجعنا للبيت وصلنا وبسرعه نزلت لان ميته تعب دخلت للبيت بعده اسار ما جاي صعدت الغرفتي خليت الكتب والتلفون مالتي على الميز وبدلت كعدت على السرير وفرشت الكتب على
السرير اريد اقره راح انجلط اذا ضليت كاعده وافكر فتحت اول كتاب وكعدت اقره لليل اني اقره عيوني تعبت متت من كد ما مركزه بالكتاب رفعت راسي من الكتاب من انفتح الباب ودخل اسار فاجئني من شفته لابس نظارات طبيه مال عيون باوع علي واردف :-
-تريدين اصعدج الاكل لغرفتج لو تنزلين انتِ
-تسوي فضل والله واذا تحب انتَ هم تعال اكل وياي لان ما احب اكل وحدي .
-تمام تدللين انتِ
ابتسمت بوجهه ورجعت اقره سد الباب ونزل يحجي ويه الخدامه شويه وصعد شايل الاكل بأيده خلاه على الميز وكعد تركت الكتاب وكمت كعدت يمه بلشت اكل هوه اكل اول لكمه واردف :-
-شلونها الجامعه الحارس كالي وصلت بنيه جانت وياج منو هاي ؟؟
-نسيتتت اكلك يااا هم زين ذكرتني .
-شكو شصاير ؟؟
-التقيت بصديقتي ريفا الي تعارك وياها بنيامين .
-بس هيه من زمان هنا .
-وانتَ شمدريك بيها .
-ابوها يشتغل ويانه بالشركه ومن جنتي بالمستشفى انتِ هيه اجتي وياه وشفتها صدفه .
-الله شلون صدفه حلوه زين ليش ما كلتلي .
-نسيت اكلج والرب
-الرب يسطرك كون
-اييي احجيلي صار بعدين .
-شفتها وكعدنه سويه وحجينه وبعدها من خلصت المحاضرات طلعت من الجامعه ولكيتها واكفه بالباب طلع الحارس مالتها عايفها وماشي اخذتها وياي وصلتها البيتها .
-تمام كملي اكلج .
حجاها وكام يريد يطلع لزمت ايده واردفت :-
-ليش ما تريد تاكل .
-ما اشتهي عندي شغل
-تمام براحتك
طلع من الغرفه وسد الباب وراه حسيته ضايج من شي بس ما اعرف شنو هوه كملت اكلي وكمت غسلت ايدي ورجعت اقره دخلت الخدامه اخذت الاكل وطلعت ضليت كاعده اقره لحد ما دكت الـ ١٢ بليل فزيت من انفتح الباب ودخل اسار باوع علي واردف :-
-ليش كاعده لي هسه نامي وبعدين عود اقري
اكيد تعبتي
-راح اموت من التعب والله شنو هاي الدراسه صعبه والله .
-بس ماكو شي صعب هل هازال
-نعم ماكو شي ما دام انتَ يمي .
-يمج دائماً
دخل للغرفه وكعد على التخم ضل كاعد لحد ما خلصت قرايه بس كل الوقت مركز عليه ما شال عينه وكفت على حيلي خليت الكتب على الميز واردفت :-
-شنو ما ناوي تشيل عينك عن عيوني؟
-عيُونچ زهرتيِن وانتِ مشِتل ورَد .
-تحب عيوني؟
-احبهن هواي عيونج رماديه سحلن كلبي سحل
-انتَ تحبني ؟
-مهووس ومريض بشي اسمه هازال .
-تخوفني من تحجين هيج كول بس احبج وخلص .
-احبج بس اريدج انتِ تحِبيني ، أنه استاهل محَبتج.
-بعدني افكر اسار لاا تضغط عليه خليني براحتي.
-انتِ راحتي وسند روحي .
-كافيي لاا تحجي هيج .
-ما يعجبج كلامي.
-لاا بالعكس كلامك حلو بس اني اريد افكر انتَ مبين على عيونك شكد تحبني بعد ماكو داعي تكولين احبج .
-عادي اني مستعد اكلج بكل ثانيه احبج .
-براحتك والله .
-احبج .
-يحبك العباس ابو فاضل .
-منو هذه ؟؟
-ما تعرف منو العباس ابو فاضل
-لااا ما سامع بهذه منو هوه ؟؟
-الامام العباس سلام الله عليه
-اعرف هواي عدكم أمم بس هذه ما اعرفه .
-ابحث بالكوكل منو العباس ابو فاضل وهسه يطلعلك بالتفصيل لان ما بيه حيل احجيلك تعبانه اريد انام باجر وراي دوام .
-تمام يروحي ارتاحي انتِ ولا تفكرين اني ابحث
-تمام طفي الكلوب وراك .
-تدلل ام عيون الرماديه لخاطر عيونج كلشي اسوي .
ابتسمت بوجهه وصعدت على السرير طلع وسد الضوه وياه خليت راسي على المخده وافكر شيصير لو اوافق على اسار هوه يحبني واكيد اذا ضل هيج يحجي وياي راح احبه او يجوز اني احبه
وما ادري بنفسي تهتت ما اعرف شنو اختار او بشنو افكر عقلي وكف عن التفكير سلمتها بيد الله ونمت كعدت الصبح ورحت للجامعه وهكذا مشت ايام اروح وارجع مرت ٤ اشهر سويه اني واسار
ضحك وسوالف وشقه ما صاير يسمعني دائما كلام حلو مرات اسكت وهوه يضل يحجي حتى مرات من اروح للجامعه ويوصلني ريفا توكفلي بالباب ما يخليني افوت دون ما يبوس ايدي وراسي تعودت
علي وعلى حركاته وكلامه وتصرفاته واسلوبه على كلشي تعودت حتى كلامه صرت احبه بهاي الايام الي مرت قبضو على الزعيم بتهمه يتاجر بالمخد** واخيراً كدرنا نخلص منه صار موجود بالعراق
وما يكدر يطلع لان ابوي موجود هناك وما راح يخلي يطلع لو يموت هواي فرخت من سمعت حتى بوكتها احتفلت اني واسار سويه بيوم من
الايام عزمت ريفا على بيتنه هوه ما كال شي جان تعبان وتوه راجع من الشركه صعد لغرفته يبدل شويه واجتي ريفا دخلنه اني وياها للبيت كعدتها بالصاله ورحت للمطبخ من شافتني راما اردفت :-
-لا تخافي يا مدام انه راح ارتب كل شي فيكي تروحي على ارفيقتك .
-ابوسج اني بعد روحي بسرعه لان اخاف تروح .
-تدللي مدام راح احضر الاكل ودقائق بيكون عندك.
ابتسمت اله وطلعت كعدت يم ريفا واردفت :-
-شلونج على امتحان البارحه .
-شكلي حلكي والقران تعالي اكتبي ليش الانسان يبجي من احد يعوفه اني شمدريني ليش بله .
-خرب روحج اني اجاني سؤال ليش الانسان تلتهب لثته هوه اني شمدريني شايفه حلكه حتى اجاوب والله حلو هاي بحياتي ما التهبت لثتي .
-عمي هنا الدراسه مو مالنه اني وياج احنا دراستنا بالعراق .
-عزيزتي احنا دراستنا كبرت وترعرعت بالعراق اصلا احنا زمالي لان اجينه لـ امريكا ودرسنا بيها .
-الغسل الج والي كون وكبر وخفه لهل وجهه .
-وكبر كون يطمنه .
-الحب وين اليوم ؟
-نايم قبل شويه اجه .
-اوي شكد حلو انتضريتي يرجع .
-اني دائماً هيج ما اكدر انام صرت اذا ما اشوف اسار بالبيت هوه يحميني ويخاف علي من كلشي تدري صاير يخاف علي حتى من نفسه .
-شهل حب يالله ربي كون ترزقني بـ حب مثل حب اسار لـ هازال .
-اهمداج يولي .
-بعدج ما رجعتيله جواب موو .
-ايي والله بعدني خايفه ريفا اول مره احب احد
-يعني انتِ تحبين اسار .
-احب تعامله وياي احب اسلوبه كلامه تصرفاته حركاته وحتى ضحكته كلشي احب بي .
-خيتي انتِ مغرمه بـ اسار
-صدك والله؟؟
-اذا انتِ تحبين كلشي بي اكيد تحبينه
-ماعرف والله مشاعري ما ثابته كل ساعه تتغير
-بس اسار يستحق تحبينه صح اني ما اعرفه بس من شفته شلون يتعامل وياج من يوصلج للجامعه اكزكز عليكم والله حيل حلوين سويه .
-وابوي .
-ما دام ابوج مأمن عليج يم اسار ما راح يعترض بطريقكم انتِ كلتي ما يرفضلي طلب
-ابدا والله بابا كلشي يجيبلي وما يخلي بنفسي شي
-واسار هم .
-اسار بدون ما اكله والقران هذيج المره رحنا للمول بس باوعت فستان حيل عجبني اشو هذه دخل للمحل واشتره الفستان والقران فد فرحت .
-دشوفي شكد مركز بيج هاي لو اني اوافق من زمان وانعل ابو الي ما يحبه .
-زين وديانته .
-حسب كلامج كال اغيرها علمودج بعد مادري .
-يعني انتِ شتكولين يسويها .
-يسويها حبيبتي ما دام يحبج وما يريد يخسرج يسويها .
-يعني هسه اوافق على اسار .
-انتِ اكيد ما حبيتي غير اسار
-لاا ما حبيت وحجيتلج على وليم اني ما حبيته بس انعجبت بي والناس طبعو هذه الشي ابالي انو اني احبه حتى خلوني اصدك وانهار وابجي بدون سبب تندمت لان سمعت كلامهم همه كالولي انتِ تحبين وليم بس اني والله ما حبيته واصلا رحت صارحته كتله اني معجبه بيك بس ما احبك هوه جانت ردة فعله عادي ما كال شي لان هوه بطبعه بارد بس هسه حالياً اسار داخل بنص عقلي مرات اني واقره افكر بي لان صارلي بالأسبوع ما كاعده وياه وحاجيه بس البارحه كعدت حجيت وياه كتله راح تجي صديقتي وصعدت لغرفتي اقره .
-خلص هاهيه ما دام انتِ تكولين هيج وافقي على اسار والله كريم انتِ تحتاجين واحد ينصحج وخلص اجيت اني ونصحتج بس والله ما نصحتج بس لان اسار يحبج وهاي لاا والله علمودج لام ديشوفج هوه تعذبتي وتعبتي ولازم تفرحين بالاخير واني ديشوف كل ملامح فرحتج من اسار كل ما ينذكر اسار كدامج تضحكين .
-يعمري انتِ فدوه الكلبج والله جنت محتاجه احد ينصحني واجيتي انتِ واخيراً .
-بس باعي لاا تكوليله هسه اول شي خلي يحول ديانته وبعدين الله كريم .
-تمام هاهيه الحمدالله اخذت قراري وكدرت افكر لان عقلي جان مشوش وما اكدر افكر شكراً الج ريفا .
ضربتني على جتفي واردفت :-
-لااا تشكريني يولي انتِ بنص كلبي عايشه مثل اختي .
-مو مثل اختج اني اختج بالاساس
-اختي الشكره .
ضحكت بوجها ورجعنا نحجي لحد ما اجتي راما خلت الاكل رادت تروح بس صحتلها :-
-تعالي وين رايحه .
انداريت علي اردفت وأبتسامه على وجها :-
-نعم مدام أمريني .
-اذا تحبين تعالي اكعدي ويانه ماكو مشكله .
-لاا مدام ما بدي اخرب عليكن أعدتكون .
ضحكت ريفا واردفت :-
-لا عادي بالعكس راح نتونس اذا كعدتي ويانه .
ابتسمت واجتي كعدت ويانه ضلينه تلاثتنه نسولف لحد ما نزل اسار من الغرفه مالتي بدون ما يصدر صوت محد انتبه علي بس اني انداريت وشفته نزل حتى هوه ما انتبه علي من شافنه كاعدين
دخل المطبخ بس ما طلع بعدها ضل بالمطبخ ترخصت من البنات وكمت جذبت عليهم كلتلهم راح اجيب مي واجي رادت تكوم راما منعتها كلتلها اني اجيب وكفت على حيلي ورحت للمطبخ جان واكف يشرب عصير ويباوع على التلفون اندار يريد يطلع من شافني اردف :-
-شبيج ليش واكفه تباوعين علي .
-انتَ بيك شي .
-لا ما بيه شي بنص الخير عايش
-مافهمت شنو قصدك؟
اتقرب علي وهمس :-
-احسج يبوس گلبي من تحاچيني .
دفعته بقوه واردفت :-
-والله لو ما البنات اضربك حقير
-اوي شبيج لهل درجه عنيفه كسرتي جتفي خرب يومج .
-واكسر راسك هم
-عادي هم اضل احبج .
-راح افلش وجهك .
-عادي اضل احبج
-صوتك لاا تسمع ريفاا .
-عادي اني اريد افتخر بحبج اذا تحبين اصيح بكل علو صوتي احبج .
-انشهرنه اتخزينه اطشر العرض استر علينه اسار .
-عادي يعيون اسار انتِ اني احبج واريد الناس كلها تدري .
-كافيي اسارر امشي روح الغرفتك هسه تشوفك ريفا
-تغارين علي .
-اغار شنو وعلى منو اصلا بس لاا عليك لاا هاهيه اكيد نهاية العالم .
-تغارين اني اعرفج من عيونج .
-راح اطفي عينك من صدك هل مره امشي اطلع
-وين اطلع يروحي .
-روح الغرفتك .
تدلل هازالي اروح ليش ما اروح
توه يريد يطلع من الباب واردفت :-
-راحت روحك ورمت جروحك انشاءالله .
ضحك علي وطلع باوعت علي من باب المطبخ صعد فوك بخطوات هادئه محد انتبه علي وصل لـ باب غرفته مد راسه من الدرج غمزلي وطب للغرفه
ضحكت علي وانداريت اخذت كلاص مي وطلعت من المطبخ رجعت كعدت يمهن نضحك ونسولف لحد ما اجه اخو ريفا اخذها وراح رجعت دخلت جوه رتبنا الغراض اني راما لكن فاجئتني من اردفت :-
-مدام هازل از بدك نصيحتي اختاري دائما الشخص الي يحبك ولا تختاري شخص الي انتِ بتحبي لان بالاخير انتِ راح وتتعزبي .
صفنت بكلامها واردفت :-
-شمدريج بيه احب ؟
-عينكِ بتلمع كل ما بتشوف السيد اسار
ضحكت عليها وسكتت حتى هيه عرفت بيه احب اسار بعد بس اني اله اتأكد من نفسي هيه صح كلامها احنا لازم دائما نختار الشخص الي يحبنه لان يطلع يعرف كلشي عنه ورح يسوي كلشي لخاطرنه هيه راحت
الغرفتها واني هم صعدت الغرفتي فتحت تلفوني ودخلت على الانستا لكيت سيلين داكه علي استغربت شعدها داكه علي بهيج وقت رجعت دكيت عليها اني ما جاوبت عفت تلفوني ودخلت على
الحمام سبحت وطلعت لفيت المنشفه على راسي وكعدت كدام المرايه اخلي ماسكات قبل فتره جبتهن يخبلن توني اريد احط ماسك ودك تلفوني عفته وكمت فتحت الخط من شفت سيلين تتصل توني اريد احجي واردفت قبلي :-
-خرب وجهج ويومج وعشرتج كلها يا حقيره ويا حيوانه .
-الله بعد بعد اريد حيل هاي الرزايل ما تشفي كلبي
-لاا عيب الباقيات ما اكدر اكولهن .
-لا كوليهن عليش يضلن حسره بكلبج .
-لاا عيب خليني ضامتهن بكلبي .
-امداج وامده كلبج .
-يعني ما تتصلين ولا تسئلين اله اني موو .
-يابه هوه اني شايفه دربي حتى اشوف التلفون الدراسه هنا شكت حلكي شك
-ليش صدك انتِ جاي تدرسين؟؟
-اييي والله صارلي ٤ اشهر اداوم .
-زين شلون اخذتي اوراق نقلج .
-اسار جابهن الي
-اني اعرف ما يقبلون اله الاب يجي ياخذهن
-مادري والله ما سئلته اني .
-زين شلونها الدراسه بـ امريكا مرتاحه هناك ؟
-اكللها شاگه حلكي الدراسه تكلي مرتاحه .
-يعني ياهو اصعب هنا لو هناك .
-والله حسب وجهة نظري بالعراق احسن .
-اجيت ابشرج .
-يا ساتر استر علينا شصاير هل مره عبد راح يتزوج عليج لو راح يتزوجج؟؟
-عبد شدخله بالموضوع لج الموضوع يخص يامان .
-يممه شبي يموني احجيلي بس لا مريض؟؟
-لا ولج شفايتلج مريض .
-جا شبي احجي راح تخبليني .
-طلع يحب وراح يروح يخطب .
وكفت على حيلي واردفت بصوت عالي :-
-شنهووووو؟؟
-اذانييي بنت الاوادم شبيج .
-شنو راح يتزوج اشك حلكه والقران .
-بس خليني اكمل اتمنى يوم احجي شي وما تقاطعني وتخليني اكمل ؟
-اعذرينا يابه ست سيلو احنا جذاً اسفين .
-كولي بالانكليزي خليني اسمعج .
-شلون تخليني افوتلها من التلفون وانعل ما اخليها بيها نعالي جديد تحبين اجربه عليج واطكعه على ظهرج لو لااا اختاري .
-انجعمي خليني احجي .
-مضرطي .
-علساس تروح خالتي تخطبله بس هوه ما قبل يكول اله هازال تحي لخطوبتي .
-والله عرفت ما يسوي شي دون ما اني موجوده
-غير بعد يامان اخوج في الاسلام .
-زين اوكفي منو هيه الي راح يخطبها ؟؟
-اعتقد اسمها رجحان تصير بنت عم ورد مرت ماهان .
طكيت اصبعتين واردفت من الفرح :-
-وجان رايدها وخذاهااا ولك والله كفوو واخيراً اخذها .
-شنوو ولج اوكفيي فهميني؟؟
-لج هاي حبيبت يامان الي يحبها من زمان خرب عرضك يامان اذا اشوفك امرعدك تمرعد .
-صدك والله ؟
-وحك وربج الي خلقج .
-عزاا اشو اني ما ادري .
-انجبي انتِ حيري بـ عبد
-وانتِ هم اسار يمج لا تنسين .
-انجبي لج هذه حبيب كلبي بنصه عايش وداعتج .
-اويلي عليك اسار شلون متحمل هازال .
-متحملني ويموت علي .
-نيالج والله .
-زين هسه شوكت الخطوبه حتى اجي .
-وين تجين اوكفييي .
-اجي للعراق شبيج .
-انتِ ويامن .
-اني وحبيب كلبي .
-والزعيم .
-نشرد اني وياه للعراق ونخلي الزعيم يدك على راسه .
-تسوينها والله .
توني اريد احجي وانفتح الباب انصدمت من شفت اسار واكف ويباوع علي الشرار يريد بس يطلع من عيونه من كد ما صايرات حمر اجه على بخطوات هادئه يمشي وكف كدامي واردف :-
-منو هذه الي تريدين تشردين وياه للعراق .
خرطت العافيه من سمعت هيج يحجي انوب سيلين على الخط ما اكدر احجي شي لازم امثل تنهدت بضيق واردفت :-
-اني وياك نشرد ونعوف الزعيم يعني ويامن اشرد
-لاا صدك؟؟
-اي وداعتك .
-وعليش نشرد خوب نضل كدام وجهه .
-لاا اسار اني اريد اشرد وياك .
-تدللين يابه نشرد اني وياج ليش لا .
-عفيه عليك اسمع الكلام .
-بس وين نشرد ما فهمت .
-نشرد للعراق .
-عفتي دول العالم كلهم تريدين تشردين للعراق .
-ديرتي هاي يول شلون ما تريدين اروح الها .
-تروحين الها وانتِ شارده خوب نروح عليها بزياره .
-يعني تاخذني اذا كتلك ؟؟
-طبعا اخذج تدللين انتِ خادم الج اني .
-اسوري الورد فدوه الك .
ما كدرت اتحمل وخرت التلفون عن وجهي سويته صامت واردفت :-
-شبيك ليش هيج دخلت وكفت كلبي .
-اسم الله على كلبج .
-عفيه اسار لاا تسويها بعد .
-على فكره اني جنت نايم بس على صوتج كعدت .
-اسفين عيني اخاف ازعجتك .
-احلى ازعاج وداعتج شمهما تسوين ابقى احبج .
-يله المهم راح تبقى تحبني .
-ويه منو تحجين ؟
-ويه اختي تكول يامان راح يخطب ويريدج تجين .
-ايي عادي نروح ليش لاا .
-وانتَ .
-ما عندي مشكله المهم انتِ تروحين .
-والله عاجبني كلش اروح اريد اشوف اهلي صارلي هواي ما شايفتها تقريباً سنه صارلي .
-تدللين شوفي شوكت خطوبة يامان وبأي يوم تريدين اوديج كليلي حتى افرغ نفسي الج .
-تمام خلي اشوف سيلين وعود اردلك خبر .
-تمام رايح انام اني لا تضلين سهرانه مو زين على عيونج .
-تمام بس اكمل ويه سيلين انام
انتبه على شعري امبلل وينكط مي ضحك واردف:-
-شعرج حلو وهوه مبلل .
-لاا بالعكس ترا من نشفان احلى.
-بكل حالاته حلو .
-شي اكيد
-مجربه تضفرين شعرج .
-لا لان ما اعرف امي جانت قبل تضفرلي بس من كبرت بطلت صارت تحبه هوه ومفلول .
-تحبين اضفره الج .
-تعرف تضفر؟؟
-ايي جنت قبل اضفر لاختي شجون .
-تمام جا اكعد على ما اخلص كلام ويه سيلين جتى اخليك تضفرلي .
-لا انتِ كملي حجيج ويه اختج اني راح اروح لغرفتي شويه واجيج .
-تمام بكيفك .
اندار يريد يطلع من الباب رجعت فتحت المايك توني اريد احجي ويه سيلين وانصدمت من اردف اسار :-
-احبج هازالي .
عافني بصدمتي وطلع سمعت سيلين تكمز وتعيط صار صوتها قريب صرخت بحماس واردفت :-
-اكليله واني هم احبك امداج .
-لاا خوب تعالي بدالي وانتِ كليله .
-لج هاي شنو والقران كلبي وكع من سمعت صوته مبين يخوف .
-كلش الوشوم الي بجسمه تخليج ترعشين .
-مسوي وشوم بجسمه .
-ايي حبيبتي بس راح يوخرهن .
-عليش راح يوخرهن .
-اني كتله ما احب اشوف الوشوم بجسمك وهوه كال راح اوخرهن
-اوي هذه يسوي كلشي علمودج مبين يموت عليج .
-مهووس بيه شحجيلج وشكلج قليل والله .
-سكتي راح تخليني ابجي .
-هسه كليلي شوكت الخطوبه .
-انتِ شوكت تجين همه يسوون الخطوبه .
-يعني راح خطبها وكذا
-لج لاا بس مشيت زلم لان خالتي شايفتها كالت ماكو داعي اروح اشوفها هيه بنيه ماكو منها
-ايي كمليي؟؟
-فـ صارت بس مشيت زلم اسار كال نسوي كبل عقد قران وخطوبه سويه يبقى بس الحنه والعرس وره شهر .
-ايي زين يسوي والله احسن اله اخاف احد يخرب العرس
-ماكو غير الزعيم يخرب هذه الشي
-ماكو الزعيم ما راح يكدر يجي .
-ليش شكو؟؟
-عنده شغل ما يكدر يجي اصلا يجوز ما يدري .
-ايي ولج محد يدري بس احنا .
-تمام جا اذا هاي نتفق اني واسار ونجي باجر بليل يعني نوصلكم عكب باجر .
-معقوله راح اشوفج .
-اني هم مشتاقتلج هواي اريد احضنج صارلي سنه كامله ما حاجيه وياج فيس تو فيس .
-خرب انه اريد اضمج بضلوعي بس اشوفج
-امي وينها .
-كل يوميه تسئل عليج بابا يكللها جاي تدرس اني ما اعرف بابا منيله هاي الاخبار .
-مادري والله المهم هسه لا تكولين الاحد اني راح اجي اريد اسويها مفاجأه .
-تمام تدللين .
-تمام حبيبتي سلميلي على امي .
-يوصل يروحي انتِ دير بالج على نفسج .
-وانتِ هم يعمري .
سديت الخط من سيلين خليت التلفون على الميز ورجعت اخلي ماسكات وخرته بسرعه من دك الباب اسار ودخل الغرفه كعد على التخم واردف :-
-يله تعالي .
-اذا تعبان روح نام عادي اني امشطه بدالك .
--تعبج راحه يراحتي انتِ تعالي ما اريد انام اصلا .
جبت المشط وكعدت بالكاع هوه صار بظهري انطيته المشط وكعدت عدل بلش يمشطلي بشعري بهدوئ انوب المشكله حيل طويل لازم ابتعد حتى يمشط الباقي لزم الاطراف اسار ومشطهن حتى ما يتعقج ويصير مو حلو اتقرب حيل مني شم عطر شعري واردف :-
-شعرج سطر عيوني من الجمال .
-كول ماشاءالله .
-مو شغلت احسده بس حلو عليج اول مره اشوف هيج طول شعر بحياتي
-وين تلكه مثلي .
-حتى اربعينج يختلفون عنج .
ابتسمت اله وسكتت ضل يمشط بشعري لحد ما صار هينوب سرح عاف المشط وبلش يضفر بشعري فراشات صارت بطني من بلش يظفر هواي
فرحانه تذكرت كلام ريفا من كالت اقبلي بي احسن الج اصلا هوه اسار شخص ما يتعوض كلتها وراح ارجع اكولها كمل الضفيره وكف على حيله راح جاب قراصه صغيره خلاها بنهاية شعري واردف :-
-واخيراً خلصت شعر ربانزل .
وكفت على حيلي وابتسمت بفرح من شفت الضفيره تجنن تتحرك وين ما اروح حيل طويله توصل لحد الكعب مالت رجلي باوعت علي واردفت :-
-تخبل الضفيره عاشت ايدك اسار .
-تدلل هازالي كلشي لخاطرج اسوي .
-اسوري الورد ماكو منك والله .
كعد على التخم يباوع علي سلون افتر متت بجمال الضفيره والقران كل ساعه اباوع عليها كعدت بصف اسار واردفت :-
-اسار .
-يعيونه انتِ .
-تحبني ؟
-من كد حبي الج صوت احسج روحي .
-يعني اذا وافقت عليك ما راح تحب غيري ؟
-گلّبي لـ غيرج ما يرهَم .
-بس اني راح اتعبك
-يمحلى التعب اذا منج .
-اني الدنيا تعبتني وخلتني ابجي وعيوني ذبلت .
-أشيل تعبج بگلبي وما اخلى عيونـچ لاتذبَل .
ابتسمت بوجهه وخليت راسي على جتفه هوه ما بدر منه اي ردة فعل صل ساكت لزمت ايده بهدوئ واردفت:-
-اريد اضل يمك لان قربك يحسسني بالامان .
-ياريت تضلين يمي العمر كله .
-عادي ترا اذا ردت شي محد يكدر يمنعني عنه .
-يعني تريديني؟
-ما اقصد هيج اني .
-اخخ يواهس دنيتي ويراحتي .
-شكد تحبني ؟
-شايفه نجوم الي تصير بالسماء
-ايي ؟
-احبج اكثر منهن .
-ليش حبيتني من دون هاي الناس ؟
-كلهن ماخذَن گلبي مثل عينج .
-شكد احب كلامك وغزلك بيه تحسسني شي نادر
-وبالفعل انتِ شي نادر ومختلف .
-اعرف عزيزي بدون ما تحجي .
-انتِ تحبيني؟
ابتسمت بهدوئ واردفت :-
-مادري والله .
-هازال اريد جواب منج انتِ تحبيني ؟
-احب كلامك وغزلك وخوفك علي وحنيتك وكلشي بيك احبه .
-بس ما تحبيني؟
-منو كال اني ما احبك .
-يعني شنو فهميني معنى كلامج .
ابتعدت عنه واردفت بجديه :-
-اسار صار الوقت الي لازم اكلك على الجواب الي راح يحدد مصيرك ومصيري .
باوع على ايدي شلون لازمه ايده ومخليتها بحضني اني خلص لازم اكوله على جوابي ما يصير اخلي الولد بين حيره جنت محتاجه شخص ينصحني واجتي ريفا ونصحتني وراما هم باوع على واردف :-
-جوابج راح يكون مفرح لو مأذي .
-لا هذه ولا هذاك .
-جا شنو؟؟
-راح يخليك اطير بين السمه والكاع .
-الله اليستر منج هبطتي كلبي .
-لاا ماكو داعي تخاف .
اخذ نفس عميق واردف :-
-تمام احجي اسمعج .
-جاهز حتى تسمع جوابي .
-جاهز بكل قوتي احجي .
-اولاً اني راح احجي وافهمك
-قبل لا تحجين القرار الي اتخذتي فكرتي بي انتِ لو اكو احد غيرج .
-لاا فكرتي بي اني بس احتاجيت نصيحه من صديقتي وفقط نصحتني .
-تمام احجي اسمعج .
-اولاً اني ليش قبلت افكر بكلامك لان هواي مريت اشياء بحياتي عشت اشياء وشفت اشياء لازم ما اشوفها شفت الناس تنكتل كدام عيني شفت المجرمين شفت الضرب شفت الاهانه شفت كلشي تعبت وتعبت نفسي صارت ما عندي طاقه حتى اهلي كرهتهم بس بعدين شفت نور الحياة من انتَ نقذتني وخلصتني من هذوله الناس انتَ خليتني ارجع اوكف على رجليني سبب رجعتي للحياه واستمراري هوه انتَ خفت علي وحميتني وما خليت احد يقرب علي خاطرت بنفسك حتى ما اتأذه اغتالوك بسببي ومع كل هذه انتَ نفسك ما تغيرت حبيتني وصرت حنون وتخاف علي وتحبني وتسمعني كلام جلو تتغزل بيه خليتني احس نفسي شي نادر كانو اني اميره وانتَ الامير انتَ انسان ماكو منك رجال بمعنى الكلمه اني موافقه عليك لان احب كلشي بيك اكثر شي احبه بيك هيه حنيتك علي وكلامك الي تحسسيني بغير عالم بس اني وياك ماكو احد اني قبل من جنت يم اهلي وجنت كاعده يمروز واحجي وياها بنفس هذه الوقت الي كاعدين اني وياك نحجي بي هيه عبالها اني ابجي لان وليم تزوج بس لااا ابجي على نفسي وعلى الي سويته بيها كلتلها ربنا ما يعوف احد وراح يدزلي شخص يعوضني على الكل واخيراً حلصت علي اجه العوض وعوضني عن كلشي بحياتي مستعده ابقى وياك عمري كله بس ما اريدك تعوفني ولا تترك ايدي لان اموتك والله .
صفن اسار يباوع علي ما يعرف شنو يحجي من صدمته سحبني من ايدي وحضني حيل باسني من راسي واردف :-
-ما اعوفج للموت انتِ حبي الوحيد والابدي انتِ مسك الختام بالنسبه الي ماكو غيرج ولا بعدج تبقين بس انتِ الاولى والاخيره .
حضنته حيل وبجيت على كلامه اتمنى اسار ما يخذلني لان هواي تعبت بحياتي ابتعد عني يمسح دموعه باوعت علي مصدومه اسار يبجي ؟؟
رفعت راسه اريد اشوفه ما يقبل لزمت ايده واردفت :-
-لا تبجي اسار كافييي انتَ مو تريدني هياتني صرت الك .
-لاا بعد اريدج تصيرين حلالي .
-هذه الشي بعد بقه يم بابا .
-ابوج صعب يقتنع .
-اسار اذا انتَ صدك كد كلامك امسح الاوشوم وحول ديانتك اني ردت اكلك جوابي وره ما تحول ديانتك بس ما تحملت كلامك جبرني اكول .
-كلشي اسوي علمود احصلج وتصيرين حلالي لخاطرج ولخاطر عيونج امسح الاوشوم واحول ديانتي .
-معقّوله لهُل درجه تحبنَي .
-بين حُب وحب أُحبج أنتِ .
-اوييي كلامك احبه .
-واني ما تحبيني .
-وانتَ هم احبك .
صفن بوجهي من الصدمه ما يعرف شيحجي ضحكت علي واردفت :-
-اني بطبعي صريحه اكولها الك طك بطك .
-فديت صراحتج يبعد رموش عيني .
-عوفك من هذه الكلام باجر نروح للعراق .
-شوكت بأي وقت نروح .
-بليل نروح .
-تمام جا راح اخلي الحارس يوديج للجامعه وبعدين يرجعج من وقت للبيت حتى تلمين غراضج بسرعه .
-لاا ليش راح اكول لـ راما من اطلع تلم الغراض .
-براحتج حبي شتريدين تسوين سوي .
-ما مصدكه واخيراً كتلك .
-واخيراً طلعتي تحبيني .
-انتَ تجبر الواحد يحبك والله .
-احبج والرب .
-اخخ منك يالمسيحي .
-ترا انتَ هم مو هينه بنت الاوادم .
-اني شنو بالنسبه الك ؟
-كلشي بهاي الحياة سند روحي وحبيبة گلبي انتِ صرتي عايشه بنص كلبي .
-لاا انتَ بعدك بكلبي بعد كم يوم يالله تعيش بي .
-اخخ منج .
-حتى النومه طارت مني عيني .
-رجعي نامي على جتفي وخلي ننسه كلشي صار ولا كانو صار شي .
-عادي انام يعني .
-الجتف وصاحبه يروحولج فدوه .
ابتسمت بفرح وخليت راسي على جتفه لزم ايدي يلعب بيها من الفرح والقران حتى النوم طار من عيوني غمضت عيني اريد انام شويه شويه بلشت اغفه قبل لا انام حسيت بأسار صار قريب علي باس عيوني ثنينهن واردف بصوت هادئ :-
-شما تكثر عليه عيون .. فدوة تروح لـ عيونج .
ابتسمت ونمت بعدها ما حسيت بأي شي حسيت الصبح على نفسي كمت لكيت نفسي بالفراش اكيد اسار شالني ضحكت وكمت من السرير دخلت الحمام احضر نفسي والله اليوم تكتلني ريفا بس تعرف بدلت ونزلت ركض كعدت على الدرج البس حذائي
حسيت بشخص وراي انداريت اشوف منو ابتسمت بفرح من شفت اسار وراي نزل بايتين وكعد على البايه الي البس بيها حذائي نزل لمستواه سحب رجلي يشدلي القياطين لان من كد ما متوتره ما كدرت اشد قيطاني شده الي واردف :-
-الصباح الخير يروحي
-صباح النور عيني .
-شكو على شنو متوتره؟
-ديفكر بصديقتي وما كدرت اشد القيطان .
-تمام لا تفكيرين بشي هسه تعالي نكعد سويه نأكل .
سحبني من ايدي ودخلني المطبخ كعدني وكعد بصفي خله الاكل كدامي واردف :-
-اكلي بسرعه راح يحي الحارس ياخذج .
-وانتَ .
-راح اكل وياج على الواهس لان ما اشتهي .
اكل شويه وكام اني هم اكلت شويه وكمت غسلت ايدي ورحت اشرب مي خليت الكلاص على الكاونتر وصعدت اجيب تلفوني خليت عطر ونزلت ما لكيت اسار اكيد راح للشركه دورته بالصاله ماكو صار هورن السياره توني اريد اطلع وحسيت بي من حضني انداريت بادلته الحضن اردفت :-
-ليش هيج تسوي بيه عبالي مشيت .
-جا بس انتِ تشلعين كلبي .
-عادي احبك وانتَ شالع كلبي .
-واني هم احبج من تجلطيني .
-يله راح اروح .
-ديري بالج على نفسج .
دخلت راما للمطبخ دخلت كلتلها على الملابس مالتي تلهمن وطلعت صعدت السياره وانطلق بينه للجامعه نزلت من وصلنا كبل دخلت القاعه لان اتأخر اذا اضل احجي ويه ريفا ثاني محاضره
صار عملي وهم ما كدرت اشوف ريفا لحد ما خلصت المحاضره توني اريد اطلع من المختبر وصارت بوجهي ريفا رحت ركض حضنتها هيه حضنتني ومشيه سويه للكافتريه كعدنه على الكرسي طلبت عصير واردفت :-
-احجيلي اليوم شصار .
-البارحه كلت لـ اسار على جوابي .
-صدك والله ؟؟
-ايي لان ما اتحمل بعد تعبت .
-براحتج والله بس كلتيله توخر الاوشوم وتحول ديانتك .
-موجودات براس القائمه حتى لو مو اني كتله ابوي يكله .
-ابوج عليش .
-يعني اقصد اذا راح يخطبني من ابوي .
-الله شكد حلووو حببيت .
-باجر راح اروح للعراق .
-تروحين بعد ما ترجعين .
-لااا ولج بس خطوبة ابن خالتي ولازم اكون موجوده
-شوكت ترجعين .
-بس تخلص الخطوبه ارجع لان عندي امتحانات .
-راح اشتاقلج يولي .
-حتى اني اسكتي ريفا .
-زين اسار راح يروح وياج .
-ايي شي اكيد وياي .
-بس هوه ما يحجي ويه اهلج .
-مادري والله كال اخليج يمهم واروح .
-شكد حلو خوالج واهلج يكرهونه وهوه يحبج ما يهتم راح يروح يوديج ويجي وما يخاف .
-اسار رجال بمعنى الكلمه .
-اسار ماكو منه يابه نسخه اصليه هاي .
-اتفق وياج .
ضليت كاعده احجي وياها لحد ما بلشت محاضرتي هيه هم راحت للمحاضره مالتها دخلت للقاعه واني مطمأنه عبالي راح تزعل اذا كتلها بس الحمدالله ما كالت شي كعدت بمكاني لحد ما اجه الدكتور بلش يشرح والكل منتبه لحد ما خلصت المحاضره
ضلينه كاعدين بالقاعه لحد ما بلشت المحاضره الباقيه لحد ما خلصنه دوام طلعت برا الجامعه لكيت الحارس ينتضرني صعدت السياره ورجعت
للبيت لكيت راما لامه الغراض الي بس احتاجهن تشكرت منها وضليت كاعده بالصاله انتضر اسار يجي لحد ما صارت الساعه ٧ بليل يالله اجه رحت ركض علي حضنته بادلني الحضن واردف :-
-افيشش ريحتج تسطر كياني وكيان عشيرتي .
-صدك والله .
ابتعد عني واردف :-
-اويليي انوب لزكت بملابسي
-خليها تلزك احسن .
-كملتي لم غراضج ؟
-كلشي كملت .
-تمام جا بس خلي ابدل وانزل .
-وانتَ ما تلم غراضك .
-ما حاجه المهن عادي مو اله اخذ وياي ملابس .
-براحتك عيوني .
-انتِ عيوني وروحي هم
باسني من كصتي وصعد فوك ضليت كاعده انتضره لحد ما نزل كاشخ وطالع يموت صفكت بأيدي واردفت :-
-يـ معذب كلبي هدي علينه شويه .
-يـ لساحلتني بجمالهن بهداوه علي وعلى كلبي .
ضحكت علي واردفت :-
-غصبا ما عليك تتحمل جمالي .
-شعندي غيرج وغير جمالج .
-كافي تحجي راح نتأخر .
اتقرب علي يباوع على عيوني خله ايده على وجهي واردف :-
-يابه انه مِثل عيونچ ﭑلحِلوات ما شايف .
-ولا اني مثلك ما شايفه .
لزمني حيل وحضني باسني من راسي واردف :-
-اتحملي بس هل كم يوم ابوسج وحضنج بالحرام بعدها راح تكون كل لمساتي الج بالحلال .
-احنا عدنا يعتبر ذنب .
-اذا منج الذنب يا طيب الذنوب .
ضحكت علي وسحبت جنطتي سحبها عني وطلع من البيت ودعت راما ورجعت طلعت وراها صعدت السياره بس هوه لحد ما نكل الغراض يله صعد لزم ايدي وشغل السياره طلعها من البيت فرها بالفرع وانطلق بينا للمطار ضل طول الطريق لازم ايدي ويبوس بيها واني بس صافنه بي الحمدالله عرفت اختار هل مره عوضني بشخص ما يبدلني بالدنيا كلها ويحبني ويفضلني على الكل خله ايدي على وجهه واردف :-
-شحجيتي وحبتج روحي؟
-والله مادري اصلا اني ما اعرف انتَ شوكن حبيتني .
-حبيتج من زمان جان هواي الزعيم يحجي بيج راقبتج ومن كثر مراقبتي الج حبيتج بعدها التقيت بيج زاد حبي الج صرت اجيج للجامعه جتى اشوفج اصلا صارت جياتي للعراق كلها علمودج .
-اوي ياعيوني شنو هذه الحب
-تستاهلينه انتِ وتستاهلين بعد اكثر
-استاهلك بس انتَ
-كلني الج
-ما اريدك تعوفني ابد .
-انه عفت الدنيا كُلها وما ردتها بس ردتج انتِ .
ابتسمت على كلامه ورجعت اباوع على الطريق وافكر شنو راح تكون ردة فعل روز من تشوفني ويه اسار سويه ما اعتقد راح تكول شي لان همه صارلهم هواي
منفصلين ما حبيت احجي بخصوص هذه الموضوع ويه اسار لان ما احب اذكر الماضي كل شخص وعنده ماضي بس صار شي قديم وحالياً اكو مستقبل وحاضر كلشي كدامنا وصلنا للمطار بدون ما ننتضر صعدنا طياره .
خاصه نمت ما حسيت على نفسي من كد ما ضليت كاعده بالطريق حسيت على نفسي من وصلنا للعراق نزلنه اني واسار وطلعنه من المطار الفرح مبين على ملامخي ودي اعيط من مد ما فرحانه
واخيراً رجعت للعراق واخيراً كدريت ارجع على بلدي وصلت سيارة اسار وصعدنا بيها متوجهين لـ بيت اهلي ما حجيت ويه سيلين اريد هم اسويها مفاچئه الهم قشعر بدني من دخلنه فرع خوالي
وبيتنا سياره ابوي ماكو اكيد بالدوام سياره يامان وماهان مركونه يم بيت جدي وبعد اكو سياره ثانيه مادري مال منو ما هتميت المهم اروح البيت اهلي واشوف امي واختي وكف اسار يم بيت اهلي لزم ايدي باسها واردف :-
-راح اروح اني اذا احتاجيتي شي اتصلي علي .
-تمام دير بالك على روحك .
-توصيني على روحي وهيه يمج .
-اسار لاا تخليني اخجل .
-احبج والرب .
-وانه هم .
-وانتِ هم شنوو؟؟
-ما اويد اكول كافي امشي .
-اليوم ما امشي دون ما تكولين احبك .
-ياااا هيه كوه ما اريد اكول.
-لاا اله تكولينها اليوم .
-اسارر امشي هسه يطلعون الولد ويشوفونك .
-ما خايف منهم خلي يطلعون .
-ياربييي لك اسار لاا تجلطني .
-هسه انتِ شخسرانه كوليها وخلص .
-راح تعصبني منك اسار .
-عادي عصبي بس المهم تكولين احبك
-ياربييي لك لاا تشلع كلبي راح يخبلنيي .
-الحالج ما امشي دون ما اسمعها منج .
-شلعت كلبي ومتعصبة منك، اخخ يلمسيحي خبلتني ليش ساكت ؟
= أني احبچ
- وأني هم بلعباس.
-يـ سند روحي انتِ
اتقرب بسرعه باسني من خدي واردف :-
-خدچ لو يصَح فنچانُ عشِر سنين ماهزه .
ضربته على ايده وابتعدت نزل هوه نزلي الغراض وصعد سيارته ودعني وراح فتحت الباب ودخلت خليت غراضي بالطرمه واخذت مساري بخطوات هادئه اباوع
على الحديقه هواي ذكريات بيها باوع على البيت ما جنت اتخيل ارجع لبيتي واشوف امي ابد ما توقعت بسبب اسار اني هنا اليوم فتحت باب المطبخ واردفت :-
-يأهل البيت بنتكم ردت الكم بنتكم الشگره رجعت .
ماكو احد بالمطبخ معقوله يم بيت خوالي توني اريد اطلع من المطبخ وصارت امي كدامي نزلت دموعها بسرعه من شافتني رجفت ايدي وكل حيلي رجف من
شفتها ركضت عليها اريد أحضنها حيل واشبع من حضنها فتحت ايدينها الي ركضت بسرعه صرت بوسط حضنها شهكت بصوت عالي واردفت :-
-رجعت بنتكم يمه رجعت الكم اني رجعت هازال الشكره .
-يمه بنيتي شصار بيج يايمه شو عاينيلي خلي اشبع من وجهج الحلو
ما اكدر ابتعد عنها اريد اضل بحضنها بالكوه وخرت باستني من عيني وكصتي وخدي وراسي ورجعت حضنتني تبجي اني هم ابجي وياها لحد ما انتبهت على سيلين من فاتت من باب المطبخ هيه شافتني بحضن
امي تخبلت اجتي ركض حضنتني تبجي حتى جنطتها ما نزعتها بادلتها الحضن واشهك واخيراً رجعت الاهلي وكدرت اشوفهم بجت سيلين بقوه واردفت :-
-اكيد هاي انتِ هازال لو غيرج .
-لاا اني هازال اختج يعمري انتِ
-لج ليش هيج تسوين بينه اخخ منج
-سيلين والله كل الي صار مو بيدي شسوي يعني .
-يروحي انتِ شصاير بيج ذبلانه من هازال الي اعرفها .
-شسوي التفكير والدراسه خلني هيج
اتقربت مني وهمست وهيه تبجي :-
-اخاف اسار هيج مسوي بيج .
ضربتها على جتفها واردفت :-
-ايااا حقيره وخريي عنيي اشوف امي اريد اشبع منها .
ابتعدت عنها مسحت دموعي وكعدت بحضن امي مثل الطفله هيه تبجي وتمسح على راسي الحمدالله والشكرً واخيراً كدرت اشوف اهلي بفضل رب العالمين وبفضل اسار طبعاً كدرت ارجع لـ حضن امي واشم ريحتها
الطيبه كدرت اشوف وجها الي انحرمت منه سنه كامله كدرت أشوف اختي هم الي هيه قطعه من روحي ضلينه هيج نبجي لحد ما كعدت امي وكامت تحجي عدلت كعدت وحجيتلهم كلشي صار وياي من البدايه للنهايه امي رجعت شبعت بجي من سمعت المنواس .
ضربني بس بعديه فرحت من سمعت اسار كتله ضلينه كاعدين نحجي لحد ما صار العصر ساعه اكعد ابجي اني وامي ساعه اضحك ويه سيلين واني تبجي .
وضلينه هيج لحد مااخذتني سيلين كالت نروح لـ خوالي ما خفت اصلا عدلت ملابسي وطلعت اني وياها من البيت بس من وصلنه لبيت خوالي هنا جانت الصدمه تفاجئت من شفت ..
يتبع......
«ــــــــــــــــــ«•»ـــــــــــــــــ»
-الحمدلله.
-سُبحان الله.
-لا إله الا الله.
-الله أكّبر.
-لا حول ولا قوة الا بالله.
-سُبحان الله وبحمده سُبحان الله العظيم.
-ربي اغفر ليّ ولوالدي.
-حسبِي الله لا إله الا هو عليه توكلت وهو ربّ العرش العظيم.
-سبحان الله وبحّمده عدد خلقهِ ورضا نفسه وزنة عرشه ومداد كلماتهِ.
-لا إله الا الله وحده لا شَريك له،له الملك وله الحمدّ وهو على كل شيء قدير.
«ــــــــــــــــــ«•»ـــــــــــــــــ»