#قيود_ " خلف القضبان "✨
#الكاتـَبة:- ايـَات رسـُول 🧡
تصويت وتعليق بين الفقرات+قراءة ممتعة!
يكول :- حَبيبي وداعتك تتلاگه الوجوه
وعلىَ كلشي نتحاسَب وحده وحده
أجرحَك بالعتب ما أجرحَك بسِيف
لان جرح العتب مَحد يضمَده
وگتلك ترا الدنيا دولاب
واذا فَرت عكس حبلك تهده
باچر من تضوگ الدمعَه والآه
تجي تدور مُحب وتريد وده.
«ــــــــــــــــــ«•»ـــــــــــــــــ»
☆ هازال ☆
اشعر بتعب، خوف، برود، ألم، جميع أطرافي باردة، العرق لا يتوقف بمجرد ما اباوع على اسار كلامه يتردد بأذني هل الغلط مني اني غبيه اني خليته هيج يحبني لو مخليه حد اله جان ما حبني .
إنه فوق طاقتي، أشعر بتعب، بضياع، برعشة لا تفارق أضلعي، بتشنجات كلما تذكرت كلام اسار هل ألسبب مني ؟ هل السبب في تصرفاتي ويه اسار ؟ هل يجب
أن أبتعد عن العالم وكل ما فيه؟ هل يجب على الجميع الإبتعاد عني؟ أريد البكاء وبشدة،
أريد الصراخ بأعلى صوت، أريد أن أبكي وأصرخ حتى تتمزق أحبالي الصوتية، أريد الموت، أريد الخروج من هذه الدوامة التي لا تنتهي، حقا
تعبت.اني ما اكدر اشوف احد مكسور الخاطر والقلب بسببي ما اكدر اشوف احد متأذي بسببي مو النوب اسار تركته وكعدت بالكاع ابجي اريد اصرخ اريد اعيط بعلو صوتي اريد شي يريحني ماكو كعد
اسار بالكاع واردف :-
-لا تبجين هازال صوتج يعذبني
-ليش هيج صار اسار ليش حبيتني ؟؟
-من اول مره شفتج بيها حبيتج دخلتي بعقلي وصرتي مرض بالنسبه الي حاولت اطلعج من عقلي لكن فشلت هواي حاولت بس ما كدرت
-ما اكدر اشرف احد مكسور بسببي اسار انتَ شخص عزيز علي وما اكدر اخليك تتعذب هذه كلامك ما اعرف شكول يعني من صدك خليتني عاجزه عن الكلام
-عادي اذا ما تحبيني مو مشكله تتعودين عليه بمرور الايام
-اسار اني مو ما احبك بس اني فقط متعوده عليك وعلى كلامك وحنيتك وخوفك علي صح تشوفني اضحك واحجي وياك بس من لا جاره اسوي هيج مالي واهس بالدنيا من بعد اهلي .
-خبلتيني والرب ما اعرف شكول هازال انتِ انسانه مؤمنه وتعرفين اشياء هواي اكثر مني فكري بكلامي
-اسار انتَ انسان الكل يتمناك كل بنيه تتمناك
-بس اني اتمناج انتِ .
لزمت راسي بقوه اريد امنع نفسي من البجي ماكو انوب ما يقتنع بجيت هواي بجيت صح اسار شخص ما يتعوض وانسان محترم بس ما اكدر اوافق هوه مسيحي واني مسلمه واني ما اكدر اخون ثقت اهلي ابوي ما يقبل على هيج شي باوعت علي واردفت :-
-اسار ما اكدر والله انتَ صح انسان حباب ومحترم ولا يوم طلعت منك كلمه مو حلوه وانتَ انسان ما تتعوض بس اني ما اكدر اخون ثقت اهلي صح تعودت عليك يس ما اكدر يعني بابا اذا شافني وياك ينجلط حرفياً صعبه اسار هواي صعبه نصير اني وياك سويه
-اذا انتِ وافقتي كلشي اكدر اسوي علمودج حتى ابوج أقنعه بس المهم تصيرين الي .
-كافي كلاماني راح اعتبر كانو ما صار شي وانتِ هم كوم اكيد هسع انتَ متأذي توك طلعت من المستشفى ولازك ترتاح
-شلون تريدين انساه هازال ما اكدر افهميني انتِ محفوره بعقلي وبكلبي تدرين لو لااا حبج صار هوس بالنسبه الي .
-شسوييي كلييي اني ما اكدر احبككك افهمنيييي
-لان بعدج تحبين وليم موو؟؟
نفيت براسي وبسرعه حجيت :-
-لاا والله كلامك غلط لك اني ما حبيت وليم اني فقط انعجبت بي اصلا الناس طبعوو هذه الشي ابالي انو اني احب وليم والقران اني ما احبه اصلا من اول يوم شفته كرهته افهمنييي لاا وليم السبب ولا غير شخص اني لو اريد احبك محد يمنعني بس ما اكدر اسار هواي اشياء تمنعني عنك .
-مثل شنوو كوليي ؟؟
-اولاً ابوي ما يقبل على هيج شي ثانياً الوشوم الي بجسمك اني ما احب الشخص مسوي وشوم ثالثاً انتَ مسيحي واني مسلمه وهذه اكبر شي يمنعني عنك .
-عادي اغير ديانته علمودج كلشي اسوي علمودج امسح الوشوم واصوم واصلي واقره قران كلشي اسوي بس حتى توافقين
-اسارر افهمنييي ما اكدر والله والناس شنو يكولون
-اصلا الناس كلهم يعرفون بيه احبج ويعرفونه واحد يحب الثاني لان احنا نمثل بس هسه اني اريد احول هذه التمثيل الى حقيقه .
-لاااا اسارر والله ما اكدر اني ما اكدر اكسر كلمة ابوي او اخون ثقته اتمنى تتفهمني
-ما عليج ابوج يمي اني اقنعه بس اريد منج تفكرين بالموضوع راح اعوفج هل ايام ودراستج راح ترجعين الها من باجر اريدج تدرسين وبس وبراحتج شتريدين تسوين سويه بس المهم تفكرين بالي راح اكوله كلشي اسوي علمودج اوشوم امسحهن ديانتي اغيرها واصير مسلم علمودج اصلي عادي اقره قران عادي اتوب هم عادي كلشي اسوي لخاطرج ولخاطر تصيرين الي وحلالي لان اعرف بيج ما تريدين تسوين شي بالحرام واني هم اريد كلشي يصير بيناتنا بالحلال .
-احاول افكر بكلامك
-هازال اني استاهل حبج حبيني ولا تخافين اصيرلج كلشي وداعت عيونج الرماديه .
-اسار انتَ شخص بكل معنى الكلامه رجال ويخاف على بنات الناس ولا يوم سمعت منك كلام مو حلو دائما اجفص واحجي كلام عيب بس انتَ تتحملني وتكول عادي اتحملج علمودك ولام انتَ نقذتني وخليتني ارجع للحياة وما خليت جماعة المنواس يقتلوني راح افكر بكلامك .
-راح اخليج تفكرين على راحتج واني اختفي
-وين تروح ؟
-يهمج تعرفين؟؟
-طبعا يهمني توك طالع من المستشفى وتريد تروح شني مخبل لو مضروب على راسك .
-اخليج وحيدج تفكيرين
-هوه اني ما خلصت من المستشفى وانتضر بيك تطلع منها حتى نرجع اني وياك نضحك ونسولف انتَ تريد تروح شبيك اسار
-وشلون راح تفكيرين بكلامي واني كدامج .
-بالعكس اذا صرت كدامي واضل اشوفك راح تكبر بعيني ويجوز اوافق على كلامك
-تحجيين صدكك؟؟
-ايي شبيك
-شو احلفيي .
-ماكو داعي احلف اني يجوز اقبل عليك بس بابا ما يقبل شمدريك انتَ
-لاا تخافين ابوج اني اكدر اقنعه
-واثق من نفسك هواي
-كلش واثق لا تشغلين بالج المهم انتِ تقبلين .
-طبعا لحد الان مصدومه منك شلون جبت صوري وعلكتهن بالغرفه اصلا ليش هيج سويت مادري .
-لان احبج هازال هاي الكلمه ما راح توصف الي بداخلي تجاهج انتِ صرتي الكل بالكل اول مره احب هيج انسانه مختلفه ونادره عن الكل مبدأياً يعني شكد شفت بنات بس مثلج ما شفت هواي مختلفه .
-زين ليش علكت صوري على الحايط تدري كمت اخاف منك من شفت الصور ؟؟
-علكتهن من كد ما صوت مهووس بيج صرت كل ما انام واكعد افكر بيج اروح للشركه افكر بيج اباوع على الناس افكر بيج صرت حتى اشوفج بالناس عيونج اول شي يتراوالي مثل الطيف يمر علي شكلج كل تفاصيلج مهووس بيهن صرت اخاف احجيلج لان اذا ضليت احجي بحبي الج راح تخافين مني واني ما اريد هذه الشي اني جنت قبل اكول لا مستحيل احبها بس من سمعت بيج مخطوفه تخبلت وانجنيت خاطرت بروحي بدون تفكير واجيت حتى انقذج .
-اسار والله ما اعرف شحجي يعني هذه الحب كله اني ما استاهله يعني فوك ما احجي عليك وهاي انتَ تحبني يعني والله مادري شكول
-لا بالعكس انتِ تستاهلين كلشي حلو بهاي الدنيا انتِ جوهره عظيمه اني اريد اعوضج عن كل الي صار بحياتج واخليج تنسين شي اسمه الحزن وبس الفرح والسعاده تكون بحياتج .
-شوف اسار صح انتَ تحبني بس اني هم اعزك انتَالك معزه بكلبي مثل يامان وماهان والبقيه انتَ شخص ماكو منك والله بس اني انسانه متعوبه الدنيا تعبتني واخذت كل حيلي راح اتعبك وياي والله .
-يمحله التعب اذا جان منج .
_ما اعرف شكول كلامك يخليني اعجز حالياً اني مصدومه واحجي وياك
-انتِ تريدين لو لاا ؟؟
-ما اعرف شنو اريد اني مشاعري مخربطه
-جا عليش تخافين علي وتبجين ليش ضليتي البارحه وباقي الايام يمي بالمستشفى تنتضريني اكعد شنو معنى تصرفاتج ؟؟
-خفت عليك لان متعوده عليك دائماً يمي وما تعوفني وحيدي
-لاا هازال اكو غير شي بس انتِ ما تريدين تكولينه
-شي مثل شنو ؟؟
-انتِ تحبين كلامي وياج وحنيتي وخوفي عليج
-اني مشاعري مخربطه خليني افكر وعود اردلك الجواب
-اخليج على راحتج
وكف على حيله متوجع خله ايده على صدره وطلع من الغرفه انهاريت من طلع شبعت بجي اني عن حالي ما اعرف شريد مو جنت معجبه بـ وليم شصار هسه ليش افكر بأسار واحب حنيته وكلامه وياي
معقوله اني ما احب اسار لو شنو ؟؟ لاا مستحيل هذه الشي اني وعدت نفسي ما اغلط مره ثانيه واحب بس هل مره تختلف هل مره شخص يستاهل احبه وافكر بي اسار يختلف عن وليم بهواي اشياء
هوه حباب ومو جامد تغير علمودي وسووه هواي اشياء ولحد الان يريد يسوي يريد يغير ديانته علمودي من صدك ويريد يمسح الوشوم الي بجسمه علمودي وعلمود اقبل بي بس حتى
لو قبلت اني ابوي ما راح يقبل ابوي ما يحب هيج اشياء ولا اصلاً يحب المسيحيين بس اسار يختلف عنهم وكفت على حيلي ومسحت دموعي طلعت من الغرفه لان اختنكت واني اشوف صوري واتذكر كلام
اسار دخلت للغرفه وسديت الباب على نفسي شراح اسوي هسه يريدني افكر بكلامه وهوه ما يدري اني عقله مشوش رما اكدر افكر احتاج احد يكعد يمي وينصحني احتاج شخص احجيله الي بيه ويفهمني
وينصحني ينطيني جواب مقنع اريد احجيله كل الي بداخلي صح كلام اسار حالياً العالم كله تعرف بينا احنا نحب بعض بس همه ما يدرون احنا جاي نمثل بس نكدر نحول هذه الشي الى حقيقه مثل ما كال
اسار بس اني خايفه من بابا لان هوه ما يدري بهذه الشي والله اذا يدري يموتني خلاص كعدت على السرير افكر شراح اسوي لحد ما اندك باب الغرفه
صحت منو واجاني صوت الخدامه تريدني انزل جوه اوففف خرب حظي شكد فكر كفت على حيلي ورحت للحمام غسلت وجهي وطلعت لكيت اسار كاعد على لسفره ينتضرني ابتسم لا إرادي وكعدت .
بس هوه ما رفع عينه وحجه شي ياكل بسكوت كل حركاته بهدوئ اول مره اركز علي انتبهت على نفسي من رفع عينه ويباوع علي ابتسم بوجهي واردف :-
-شكو تباوعين علي ؟؟
-مادري هيج بدون سبب اباوع عليك
-عاجبج اني؟
-انتَ اصلا حلو شاب مرتب وحباب هم ماكو منك
-بعد شويه تسوييني مؤمن
-خرب انه ولا كانو قبل شويه جنه نتعارك
-عادي يابه اني وياج متفاهمين من هسه
-لاا ترا لحد الان مصدومه وما مصدكه يعني معقوله تطلع تحبني بس ساكت وما تحجي
-هوه ياهوو ما يحبج انتِ غير بس شوفتج تجيب راس اكبر واحد بينه عمي استري علي
-صدك والله لهل درجه اني حلوه
-اعتقد انتِ عمدج تناقض بالثقه
-يا ثقه؟؟
-ثقتج بنفسج لان يوم اشوفج تمدحين بنفسج اني حلوه وكذا ويوم تكولين لهل درجه اني حلوه .
-مو انتَ تخليني اشك بنفسي وبجمالي من كد ما تتغزل وتمدح بجمالي يعني مرات اصفن واكول لهل درجه اني حلوه والكل يتغزل بيه بس بعدين اكول ايي طبعا اني حلوه
-اخخخ منج يم عيون الرماديه سبيتيني وسبيتي حالي .
-صدك تذكرت انتَ كلت تكملين دراستج ما فهمت؟؟
-اييي لان راح تدرسين هنا بعد .
-معقوله صدك تحجيي؟؟
-وداعت هل عيون الحلوات
-زين شلونن ومنين اخذت الورقه مال النقل ؟؟
-ما اخذتها طلبت من شخص يجيبها الي وجابها
-ومنو هذه الشخص .
-بعدين تعرفينه
-لااا اساررر اكيد تشاقه وياي يعني راح اكمل دراستي هنا معقوله .
-ايي والرب شبيج ما مصدكه
-اخخخ من الفرح اريد اكوم احضنك بس عيب
-لاا والله تسوين فضل اذا حضنتيني
كمت بسرعه بدون ما احس على روحي وحضنته حيل ضحك هوه لا تصرفي واحضني هوه هم ابتعدت عنه وطكيت اصبعتين :-
-راح للبصره ونسانيي لككك هلاااا واخيراً راح ارجع اكمل دراستييي ما اعرف اعبر من فرحتي
ضحك اسار بصوت عالي واردف :-
-صوتج الحراس برا
-اوي رجل غيورر
-خرب روحج وروحي كافي
-شوكت ابلش اروح ؟
-باجر نروح انقدم اني وياج ومن بعدها تبلشين
-يمايييي فدوه الك اسورييي والقران فرحانه ما اعرف اعبر عن فرحتيييي شكراً هواي شكراً الك
-لا تشكريني انتِ تدللين كلشي لعيونج اسوي
من الفرحه حتى اكل ما اكلت ضليت افتر بالبيت واحجي واسولف لوحيدي من الفرح راح اسار لشركه وخلاني بالبيت كال اليوم الج لستراحه تفكرين بيها بس من كد الفرحه نسيت كلشي
لحد ما كعدت هينوب تعبت الخدامه تفتر منا ومنا لان اني بس اطشر بالكوشات والمخدات خبلتها فكرت بكلام اسار وبتصرفاته هم شخص يحبني ويريدني ليش ما اوافق علي اني ما عندي اعتراض لان لا احب احد ولا هاي بس المانعني ابوي ما اكدر اسوي شي بدونه صح
ما شايفته صارلي هواي بس ابوي موجود بكلبي دائما لازم كل قراره اتخذه استشير ابوي بي ما اكدر اخطي هيج خطوه صح اسار يحبني بس لازم يتحمل ويصبر اني ما عندي اعتراض والله لان هوه اثبت حبه الي بس
اني جنت عميه وما انتبهت هواي لمحلي حتى بكلامه وياي بس اني جنت ما افهم كلامه واتغابه اسوي نفسي ما سمعت شي بس هسه لاا صار وقت الجد والصدك والحقيقه اسار يستاهل واني هم استاهل بس لازم افكر
بعد هذه القرار مو سهل ويرادله تفكير هواي صار الليل بس اسار ماكو ما اجه اتعشيت وسعدت لغرفتي تعبت هواي طاقتي نفذت اريد انام مادري
شعجبج اليوم اريد انام من وقت بس خليت راسي بدون تفكيري بكل غفيت حتى اسار نسيته حسيت على صوت الباب من انفتح ابتسمت بهدوئ من شفت اسار عدلت نفسي واردفت :-
-وين جنت عيني؟
-بالشركه
-كل هذه الوقت بالشركه ؟
-اليوم هواي صار عدنا اجتماعات فـ ما كدرت اجي
-اجتماعات شنو؟؟
-تخص الشغل
-صدك والله ؟؟
-والرب شبيج شكو صاير شي؟؟
-لاا سلامتك اسوري ماكو شي
-بيج شي انتِ اشو من وقت نايمه
-مادري اشو نعست وانتَ تأخرت فـ كلت انام احسن
-تمام رجعي نامي وارتاحي عندي كلام وياج باجر
-يمممه كمت اخاف من هاي الكلمه .
-ليش تخافين ليش هوه شكوو؟؟
-من بعد الي صار البارحه وكرهت هاي الكلمه وصرت اخاف منها .
-لاا عادي ماكو داعي للخوف كلام مهم وانتَ لازم تسمعينه
-كلام مثل شنو ؟؟
-بعدين تعرفينه هسه رجعي نامي وارتاحي .
اتقرب مني باس راسي وراد يطلع لكن استوقفته بكلامي :-
-اذا وافقت عليك وبابا ما وافق شنو راح تسوي؟؟
صفن بوجهي واردف بتفكير:-
-احرك الدنيا على راس ابوج
-انجب اسار هذه ابوي والله اموتك بس تتقربله
-عندي خطه ثانيه
-شنو هيه؟؟
-اخطفج من اهلج واخذج يمي .
-جا راح اخذ احتياطاتي منك لا اخاف صدك تخطفني .
ضحك بهدوئ واردف :-
-نامي لا تضلين تفكيرين .
-تمام تصبح على خير
-وانتِ بالف خير يكلي خيري
طلع وسد الباب خلاني صافنه وبس اباوع على الباب صح اسار يحبني واني هم ماكو شي يمنعني احبه لان كل صفات الي احبها بالشخص موجوده
بي بس بابا اني ما اكدر اسوي شي اذا مو بابا يعرف بي رجعت خليت راسي على المخده ونمت . حسيت الصبح على صوت المنبه فركت عيوني وكمت جسمي كله متشنج ما بيه حيل حتى اتحرك كبل
دخلت الحمام اريد اسبح لان تعبانه سبحت وطلعت لبست ملابسي وكعدت على الكرسي اسوي بشعري كملت ونزلت اسار ماكو بالبيت يااا هذه شو
راح مو علساس نقدم اني وياه سويه دخلت المطبخ وكعدت اتريك لحد ما خلصت كمت وكعدت بالصاله اباوع على التلفون لحد ما اجه اسار باوعت علي بتك عين واردفت :-
-انتَ ويم وين تغط وتطلع ؟؟
-عندي شغل مهم ولا تسئليني شنو
-ويريدني اوافق علي هوه غير انتَ كل ساعه مادري وين تروح الله اعلم شدتسوي .
-لا تخافين ام الهوه ماكو احد يحله بعيني غيرج
-انشاءالله صدك
-لااا رب الصدك حبيبتي
-لاا تكول حبيبتي اييع
-اييع بعينج
-وبعينك هم وعينك الثانيه كون تنفكس
-بس عوفي عيني اخخخ راح تجلطيني
-شوكت نروح نقدم
-هسه نروح
-يعني اروح ابدل
-ايي اني راح انتضرج بالسياره
-تمام
صعدت بسرعه بدلت ملابسي خليت عطر ونزلت طلعت من البيت وصعدت السياره ورحنا للجامعه وكف اسار يم جامعه كلش جبيره حرفياً تجنن اول مره اشوف هيج جامعه نزلت من السياره ونزل اسار وراي ضحك بهدوئ واردف :-
-جنها عجبتج الجامعه
-لك تجننن اخخخ اني كلبي رجيج ما يتحمل هيج جمال
-جا شحال كلبي شلون متحمل جمالج مادري .
-لا عادي كليبك يتحمل اما اني رجيج فد نوب
ضحك علي واتقرب لزم ايدي ودخلنا للجامعه سويه دخل للمكتب مال مدير حجه هوه وياه علمود التقدم ضلو يحجون بس المدير ما شال عينه عني بس يباوع ويبتسم نفخر اسار بضجر عيونه بس تخنزر بيه زين اني شعلي يااا هذه شبي عفته وطلعت
برا المكتب خلي يحجي براحته احسن افتريت بالجامعة بس مو كلها بس بالممر الي موجودين بي احنا كلها شباب وبنات وكلشي معدوم عدهم وعادي
شيريدون يسوون محد يمنعهم رجعت للمكتب مال مدير طلع اسار بس وجهه ما يكصه السيف عرفت بي ضايج وبس احجي وياه يموتني طلعنا من
الجامعه واردف :-
-من باحر تبلشين تداومين .
-منو راح يصير يوصلني .
-حارس شخصي واذا تريدين اني اوصلج ما عندي مشكله
-تمام عادي ماكو مشكله .
-الي يعجبج كولي وخادم اني .
-لا عادي خلي حارس شخصي احسن
-تمام براحتج
-زين انتَ شبيك تخنزر بيه بالمكتب
-ما تشوفينه شلون يباوع عليج والرب لو ما انتِ لطلع عيونه من مكانهن
-اوييي فديت الي يغار علي
-وانتِ هم راح اطلع عيونج اسكتي
-ولييي ما اريدك انتَ تريد تكتلني
-تنكص ايدي ولا تنمد عليج .
-اني اكصها الك اذا تريد
-لاا ما يحتاج .
ضحكت علي وسكتت صعدنا بالسياره ورجعنا للبيت هوه راح للشركه واني ضليت كاعده بالبيت ساعه اروح اكعد بغرفتي ساعه اكعد بالصاله رجعت صعدت فوك لكن ما رحت لغرفتي رحت بتجاه غرفت
اسار اريد اشوفها فتحت الباب على كيفي ودخلت غرفتها ريحتها تخبل وتجننن نفس تصميم الغرفه الي موجوده بيت اهله ما بيها كنتور
بيها باب وكل ملابسه وغراضه موجوده بي طلعت من الغرفه وسديت الباب توني انداريت اريد امشي وكمزت من شفت اسار واكف وراي دفعته بقوه واردفت:-
-الله يهطرك كون وكفتتت كلبييي
-اسم الله على كلبج بس شتسوين بغرفتي ؟
-اسويلك سحر
-ماكو داعي للسحر عيونج موجوده .
-لااا اني اريد اخبلك واسحرك بعد اريدك تموت علي .
-ما يحتاج وداعتج انتِ مخبلتني وساحرتني بجمال عيونج وجمال شعرج .
-لاا اشاقه وياك بس حبيت اشوف غرفتك لان بس هيه بقت ما شفتها بس طلعت مثل تصميم هذيج غرفتك الي بيت اهلك .
-اني من اثبت على شي ما اغيره بكل مكان لازم يكون نفسه .
-الله يعني اذا انتَ ثبتت علي ما تغيرني ؟
-ما اغيرج لو تجي الف وحده هنه صح هواي بس انتِ تختلفين عنهن نادره وما تشبهين احد .
ابتسمت بوجهه واردفت :-
-والقران تجبر الواحد يحبك
-شنوو؟؟
انتبهت على نفسي واردفت :-
-هاا ؟؟
-عيدي شكلتي؟؟
-ليش هوه اني شنو كلت؟؟
-الي كلتي قبل شويه عيدي .
-ما كلت شي متوهم انتَ
-هازال جفصتي موو؟؟
-عادي اسوري غلس على جفصاتي ترا اني مادرب بنفسي من اكوم اجفص .
-مادري شحجي يعني اعجزز عن الكلام
-عزيزي لاا تحجي احسن الك .
عفته ومشيت دخلت الغرفتي بسرعه وسديت الباب
خليت ايدي على كلبي واردفت :-
-خرب روحج هازال شبيج بس تجفصين كدام الزلمه وهوه سايح لزمي لسانج شويه
ضربت حلكي اريد ما اجفص بعد كدامه خرب انه كعدت على السرير افكر لحد ما وصلتني رساله على التلفون فتحته لكيتها من سيلين جانت كاتبه :-
"ابوي اجه لـ امريكا شفتي لو لاا"
"لاا ما شفته شوكت اجه "
"البارحه اجه وحسب ما سمعت جاي يشوفج"
"الله شكد حلوه حتى من يشوفني اني واسار يسوينه فرجه الامة الأجانب "
"اني هم كلت لـ امي هسه بس يشوف هازال يسويها فرجه بس انتِ تعرفين شلون تسكتين "
" لعبتي هذه الشي "
" حبيبي والله اعرفج اني "
" شلونج انتِ وعبد "
" اخخخ لو تشوفين شسويتلج بي "
" شسويتي ولج احجيلي "
" اجه نيار للجامعه مالتنا وكعدنا اني وياه نحجي ونسولف ابوي كايللهم انو انتِ سافرتي لـ امريكا علمود تدرسين هناك فـ اجه عبد وضل صافن علينا شلم على نيار وكعد هوه وياه يحجون لحد ما اني عفتهم ومشيت رحت للمحاضره واجه عبد وراي يرزل ويحجي ومنفعل وعصبي عاد اني كتله لاا تخاف ما راح احب غيرك "
" اوووييي يعمرييي شنو هذه الحب "
" شعبالج اني صايره مثلج احجيها مثل ما هيه "
" اوكفييي يعني ابوي كايله لـ عمامي اني سافرت لـ امريكا علمود ادرس "
"اضطر ابوي هيج يكول لان عمي ابو نيار مادري شبي متخبل وبس يسئل عليج عاد ابوي انجبر هيج يكوله "
" يله بعد احسن "
" انتِ شلونج ويه اسار "
" كل ساعه اجفص واخلي ينجلط "
" خطيه والله شمسويه بي انتِ "
" خلي غصبا ما علي يتحمل "
" سمعت من امي مسوي عمليه الحمدالله على سلامته "
" يعمري انتِ تسلمين "
"حبيبتي انتِ "
ضليت احجي ويه سيلين لحد ما اندك الباب صحت منو وطلع اسار فتح الباب واردف :-
-تريدين تاكلين .
-ايي والله جوعانه هواي
-يله بدلي حتى نروح .
-وين نروح ؟؟
-للمطعم
-صدك والله ؟
-ومناك نروح للمول حتى نشتري ملابس الج
-اويييي شنو هذه الدلال
-شعندي غيرج خليني ادللج براحتي .
-احب هيج نوع من الدلال
-واني هم احبج
-تدري انو حب الناس نعمه فـ حبك نعمه بالنسبه ألي
صفن بوجهي واردف :-
-راح اطلع لان الظاهر انتِ راح تجفصين
ضحكت علي واردفت :-
-تمام شويه وانزل اني .
طلع وسد الباب وراه كمت بفرح شمرت التلفون ورحت للكنتور طلعت احلى لبس عندي ودخلن ابدل طلعت من الحمام وكفت كدام المرايه خليت حمره ومسكاره واخر شي رشيت عطر وطلعت نزلت جوه لكيت اسار ينتضرني ركضت علي وحضنته بدون تفكير هوه مصدوم يباوع علي ابتعدت عنه واردفت :-
-انتَ الطف شخص بحياتي .
-وانتِ احلى شي صار بدنيتي .
لزمت ايده وبسرعه اخذت صوره ضحك عليه واردف :-
-نشريها وسويلي تاك مو تنسين .
-تدلل من عيوني .
طلعنا اني وياه واحد يضحك بوجهه الثاني والقران الي يشوفنه يكول مخابيل صعدنا السياره وطلعنا للمطعم اخذتلي كم صوره بالسياره ودخلت للانستا اول شي نشرت صورتي اني واسار وكتبت عليها :-
( اني وحبيبي طالعين سويه )
رجعت نشرت صوري عام لان محد موجود بحسابي احد غريب سديت تلفوني واردفت :-
-اييي وهسه شنوو .
-شنوو؟؟
-الله تذكرت اغنيه مال هسه شنو والجو حلو
-اغنيه عراقيه .
-شي اكيد هنه هذني اغاني العراقيه
-اكثر مغني احبه هوه قيس هشام
-بالضبط اغنيه حلوه حيل
-انتِ الحلوه يروحي .
-تسلم هذه من ذوقك طبعا .
-عيونج حلوه تدرين لو لا .
-اعرف عزيزي عيوني مخبلتك وساحرتك لان حلوات
-انه ضايع بين عيونج وشعرج .
-اسكت كافي راح تخليني اخجل .
-عادي خجلي يلوكلج الخجل .
-لاا اني فتاه قويه ما يلوكلي الخجل.
-شورطني وحبيتج .
-يعني اني ما استاهل حبك ؟
-انتِ كلشي تستاهلين حلوه وجمالج يسطر .
-حبيتني لان حلوه ؟؟
-لااا لان مختلفه عن البنات تفكيرج وعقلج ناضج بس كلبج عاطفي .
-الله احب الناس الي تفهمني .
-واني احبج .
-يحبك الله .
ضحك علي وصاح على النادل يطلب اكل طلبنه واجه الاكل اكلنه بسرعه وطلعنه من المطعم رجعنا رحنا للمول بس كلشي بي حلو يجنن حرفياً حيل جبير واشكال والوان بي وكفت بنص المول من شفت فستان يخبل لزمت كلبي واردفت :-
-اخخخ يمه كلبي ما يتحمل هيج جمال راح اموت
انصدمت من شفت اسار دخل على المحل الي بي الفستان يااا هذه شيريد يسوي ركضت بسرعه ودخلت للمحل ضحكت بفرح من اندار علي واردف:-
-ما يغله عليج شي وانتِ حبيبتي .
-زين شمدريك اني اريد هذه الفستان .
-من باوعت على عيونج عرفت بيج شتريدين .
حضنته بقوه واردفت :-
-شكراااً اسوريييي شكراااً
-لاا تشكريني كلشي لعيونج يصير .
-ماعرف شكول والله انتَ من صدك عوض ربي .
غمضت عيوني من بعدني عنه وباسني من كصتي ما عرفت شنو اسوي بلحظتها كلشي ضاع مني اخذنا الفستان وطلعنا من المحل ضلينه نفترح لحد ما شفت محل كلش حلو دخلنا عليه
اني واسار وعجبني لبس كلش حلو ستره وبنطرون لبس رسمي يخبل اشترالي اسار البس لان عرفني اريده ضلينه نفتر لحد ما طلعنا من المحل
واحنا مشترين هواي غراض عجبني اشتري لـ اسار ساعه حلوه على ذوقي بس الفلوس منه طبعاً دخلت على محل وهوه وياي اختريتله ساعه واردفت :-
-اسار هاي الساعه كلش حلوه عليك
ابتسم بوجهي ولبسها رفع ايده واردف :-
-اعتبرها هديه منج .
-ولو هيه هديه صغيره بس شسويه .
-انتِ هديتي ماكو داعي تشتريلي هديه يروحي .
ابتسمت بوجهه واردفت :-
-عادي اقبلها مني هل مره .
-اقبلها ليش لا كلشي منج اقبله .
طلعنه من المحل بعد ما اشتره اسار الساعه الي اختريتها اله طلعنا من المول سويه كعدنا بالحديقه نسولف ونضحك لحد ما اردف اسار :-
-ابوي راح يجي باجر حتى يشوفج .
-انتَ شمعرفك بـ ابوي .
-اعرفه من زمان اني .
-معقوله تحجي ويه ابوي من وره ظهري .
-لااا بس ابوج امنج يمي امانه واني خليت هاي لامانه بعيوني لان احبها .
-شدتحجيي انتَ ترا دختت؟؟
-باجر من يجي ابوي تفهمين كلشي .
-وهذه كلامك قبل شويه وانتِ امانه مادري شنوو؟؟
-هازال بعدين عود مو وقتها .
-لا وقتها ما دام انتَ حجيت لازم تفهمين .
-ابوج واني اتفقنا من زمان حتى ننتقم من الزعيم لان انتقامنا واحد .
-معقوله ابوي مخلي ايده بأيدك زين عليش يريد ينتقم .
-شنو معنى كلامج ترا عادي واذا خله ايده بأيده
-اني اعرف ابوي ما يحب المسيحيين .
-بس اني يحبني .
-الله مستحيل اصدك
-من يجي باجر تفهمين كلشي هسه ما راح تكدرين تفهمين شي .
-بس ما فهمت ابوي عليش يريد ينتقم من الزعيم ؟
-هازال كتلج باجر تعرفين
-اويي شبيك شكد نفسيه
-مو هواي سئلتي وكتلج نفس الجواب
-اويي لازم احنا نشتري منك الكلام بفلوس .
-لاا وداعتج بس اني صايره طاقتي تنفذ بسرعه .
-مو كدامي اسار والله اذبحك هسه .
-هاهيه تدللين بعد ما احجي هيج وياي
-زين بابا يعرف بينا دنمثل .
-ايي واصلا عجبته هاي الفكره حتى نكدر نلهي الزعيم وننتقم براحتنه .
-والله دختتت ما جاي افهم
-باجر تفهمين كلشي
-الله كريم
رجعنا للبيت اني واسار هوه راح الغرفته واني صعدت الغرفتي وافكر بكلام اسار شنو غايته ابوي من ينتقم من الزعيم هوه اصلا ما عنده شي ويه الزعيم والله دختتت هاي شنوو شديصير لااا وانوب ابوي مخليني امانه يم اسار هاي شديصير ياربي .
دخلت للحمام غسلت وجهي وطلعت اريد افكر بشي معين عقلي شكل كل ساعه يفكر بشي صعدت على السرير وخليت ظهري على الحايط تذكرت كلام اسار وياي وشلون يحجي ويعترفلي بحبه
هوه شخص ما يتعوض والله بس لازم اكول لـ بابا حتى يكون كلشي بعلمه اسار يستاهل الواحد يحبه هوه شحص ماكو منه يستاهلني واستاهله بس المشكله هوه دينه يختلف عن ديني صعبه هواي وهذه القرار لازم
افكر بي هواي لكن هناك الكثير من امور الحياة معقدة ولكن يوجد أيضا البسيطة هناك امور دينيه تلزمك على شيء ولكنها لاتحرمك " لأن الدين دين يُسر لا تعقيد وإكراه " ان أردت ان تُحب ف لا مانع لذالك ولكن ضع في عقلك دينك ،
والديك الذين تعبوا من اجلك ومن اجل منحك حياة جميله ، أحبابك الذين إذا عرفوا انك إنجرفت إلى الخطأ ووقعت فيه وانت تعلم أشد العلم انه حرام ف لن يسامحوك ابدا .
ان أردت ان تكون شخص لا مثيل لهُ ومميز في كل شيء كُن ولكن بالشيء الجميل الذي يرضي الله ثم يرضي نفسك ؛ لا تصدق الذين تراهم مميزين والجميع يحبهم ف أولئك الناس المعجبون ما هم الا معجبون ب شكلهم الخارجي فقط
وهم يدركون انهم من الداخل شيء أخر " ف أنت كن شخص الجميع يحبه من الداخل ومن الخارج مثل صراحتي بلضبط وهذا يكون بقربك من الله عز وجل كل ما تقربت من الله عز وجل زادت عدد الناس المُحبه له "
كن مع الله يكون معك انت مُخير بين الحلال والحرام ، بين الصح والغلط ، بين العقل والقلب .. انت مُخَّير وليس مُسَّير .. لا تجعل قلبك يُهلكك لأن القلب هو اللي يُذهبك إلى الحرام والغلط .. فكِّر ب عقلك وستنجح
في هذي الحياة .مو غلط اذا شخص حب احد يجوز اني ما اعرف شنو مشاعري بس الناس تفهمها من تشوف تصرفاتي وطريقة كلامي رجع انعاد بيه الزمن وراح يصير بيه مثل ما حبيت وليم وبالاخير تعذبت بس
لااا غلط اسار يختلف عن وليم اسار شخص ماكو منه مستحيل الكه شخص مثله ضحه بحياته علمودي ويخاف علي وحنون ويحبني هواي لتزم افكر بالموضوع
يستاهل اسار افكر بي خليت راسي على المخده وغفيت بدون ما احس على نفسي كعدت الصبح على صوت المنبه توني اريد اكوم واجتني رساله على تلفوني فتحته جانت من اسار كاتب:-
"ابوج راح يجي على البيت استقبلي وبعدين راح اجي اني اخذج للجامعه "
"تمام شكراً الك "
شافها بس ما رد غلقت تلفوني وكمت غسلت وجهي وطلعت بدلت ملابسي لبست شي حلو حتى اطلع كدام ابوي عيب يشوفوني بملابس مو حلو لبست ونزلت بسرعه اكلت ريوكي وكعدت بالصاله انتضره يجي
متحمسه حيل حتى اشوفه صارلي هواي ما شايفته وحاضنته اريد بس اشوفه وخلص وكفت على حيلي وصعدت فوك اريد اجيب تلفوني من الغرفه لان من الحماس نسيته لكن وكفت بنص الدرج من سمعت
صوت اقدام شخص تتحرك وراي انداريت اشوف منو وانصدمت صدمة عمري من شفت ابوي وراي متغير هواي ملامحه تعبانه وجهه صاير اسمر وذبلانه مو هذاك ابوي الي اعرفه اني لحيته عاليه حيل ابتسم بوجهي
وفتح ايدينه الي ركضت بدون تفكير علي اريد بس احضنه لكن وكفت من حسيت بحراره مو طبيعيه صارت بظهري صوت الطلقه يتردد بأذني وكعت بحضن ابوي وكلي دم مادري منين اجتني الطلقه
اريد اباوع وأشوف منو ضربني لكن اختل توازني حتى عيوني غوشت اريد احجي ويه ابوي انربط الساني كلشي ما اكدر اسوي رفعت تيدي اريد اتلمس وجهي ابوي لكن غمضت عيوني وبعدها ما حسيت
بأي شي اصارع وحيدي هذه الحياة وفي هذه المعركة لا يراها أحد، لطالما سرتُ على هامش الحياة، كطائرٍ يرفرفُ بعيداً عن السرب، أفكاري تدورُ في عالمٍ خاصٍ بي، عالمٌ لا يفهمهُ أحدٌ، ولا يشاركني فيه سوى صمتي.
أحملُ في داخلي حرباً لا يراها أحدٌ، حرباً مع نفسي، مع أفكاري، مع مخاوفي. حربٌ لا تنتهي، ولا تهدأ. أشعرُ بالغربةِ في كل مكانٍ أتواجدُ فيه، كأنّني لا أنتمي إلى أيّ مكانٍ، ولا إلى أيّ زمنٍ. يظنّون أنّني.
غريبُ الأطوار،او كتومه ولا اتحدث لكن أحياناً أتمنى لو أنّ بإمكاني أن أُشاركَ أحدهم ما يدورُ في خلدي، لكنّني أعلمُ أنّ ذلك لن يُجدِي نفعاً. سأظلُ وحيداً في معركتي،
حاملاً همّي في داخلي، حتى يأتي اليومُ الذي أفهمُ فيهُ نفسي بنفسي، أو أجدُ من يفهمُني دون كلماتٍ حسيت على نفسي واني بالمستشفى فتحت عيوني بهدوئ واول شخص صار كدامي هوه ابوي لازم ايدي بقوه من شافني فتحت عيوني اردف :-
-رجعت عصفورة ابوها رجعت حبيبتي .
ترك ايدي وطلع يركض يصيح بالدكتور دخل الدكتور يشوف حالتي طمن ابوي انو حالتي تمام وماكو داعي يخاف وطلع اجه بابا بخطوات هادئه لزم ايدي واردف :-
-حبيبتي هازال يعيوني انتِ يروح ابوج
-بابا هذه انتَ اكيد .
-ايي اني ابوج عمران يروحي انتِ شصار بيج يعمري ليش هيج وجهج ذبلان
-انتَ شصاير بيك ملامحك ذبلانه وعيونك صار جواهن سواد ليش هيج هامل نفسك بابا
-يروح ابوج انتِ بس شوفتج تخليني اصير بخير .
-ليش هيج صار بيه اني ما استاهل والله
-راح اخليهم يتندمون وعيونج يروحي انتِ ما دام اسار موجود يسطرهم ويخليهم ما يندلون طريقهم وين.
-من شوكت وانتَ تعرف اسار ؟
-من زمان بنيتي صار هواي .
-الله صارلي شكد ما سامعتها منك .
-شنو حبيبتي ؟
-كلمة بنيتي .
-انتِ بنيتي وحبيبه روحي وحبيبة ابوج
-كلمة بنيتي هواي حنينه منك
-يروحي انتِ لا تعبين نفسج ارتاحي وبعدين نحجي
-ما راح تعاتبين على الي ديصير ؟
-بعدين هازال اني اعرفج انتِ ما تسوين شي غلط
عافني وطلع غمضت عيوني ابجي من كد القهر صدري يوجعني ما اكدر اتحرك زين اريد احد يفهمني الي صار وياي شنو منو الي ضربني طلقه بصدري وشلون صار هيج توني اريد اعدل نفسي ودخل اسار بجيت بالزايد من شفته احه بخطوات سريعه علي لزم ايدي بسها بقوه واردف :-
-يعيون اسار انتِ واخيراً كعدتي .
-اسار عليك الله فهمني شصار وياي ما جاي افهم .
-ماكو داعي تفهمين لاا تعبين نفسج وتفكرين اني يمج
-بابا وين راح .
-ما يكدر يشوفج بهاي حالتج طلع يحجي ويه الدكتور .
-حباب اسار احجيلي والله كلبي راح يطك .
-الخدامه طلعت جاسوسه ويه جماعة المنواس
شهكت بصدمه واردفت :-
-والله عرفت من هذيج المره باوعت علي وابتسم عرفتها مو راحه واكو شي وراها بس سكتت امداني لان ما حجيت شلون ما كدوت اكشفها .
-لاا تهمين روحج يروحي انتِ كافي لا تضلين تفكرين اني سويت الي لازم اسوي من زمان وخلص
-كتلتها ؟؟
-لااا شي اكيد اني ما احب اوصخ نفسي بهيج شي سلمتها الجماعة المنواس وهددتهم اذا صار مره ثانيه هيج شي راح يشوفون شي مني ما راح يعجبهم
لزمت ايد اسار بقوه واردفت :-
-ضلي يمي اسار وجودك يحسسني بالامان
-يمج اني يروحي انتِ ما اعوفج نامي وانتِ مرتاحه .
خليت راسي على ايده ونمت حسيت مره ثانيه على نفسي من سمعت صوت ابوي فتحت عيوني وباوعت علي واكف هوه واسار ويباوعون علي ضحكت بوجهم واردفت :-
-شكوو شبيكم تباوعون علي هيج صار شي مضيعين شي بوجهي ؟
ضحك بابا بقوه واردف :-
-لا يروح ابوج بس جنت اباوع عليج شلون نايمه.
-شلرن نايمه بالله؟؟
-مثل الطفله الصغيره وجهج بريئ
-بس من تكعد تصير شيطان وتكوم تسوي اشكال والوان
ضحك ابوي على كلام اسار وضربه على راسه عيبت علي واردفت :-
-والله يالله شلون ناس من جوه هالله هالله ومن بره يعلم الله
-شقصدج ولج؟؟
-كلش زين تعرف شنو قصدي
-من صدك انتم ضراري شنوو هاي
-لااا يابه هازال حبابه اشاقه وياج عيني
-وانتَ هم حباب وخوش ولد
-والله احسج بعد شويه تضربيني بالجهاز
-لاا تحس اتأكد عزيزي
-الله الي يستر منج خلي اطلع اني
-لاا اوكف وين رايح
-شويه وراجعلج خلي ابوج يحجي وياج
-مو بعيج اني روح اسار ما عليك كمل الي كتلك علي
-يااااا هاي شدتسوون انتم والله خبلتونيي .
-ما عليج بنيتي انتِ الج الصافي
-الله الي يستر بس ينخاف منكم
ضحك اسار وراح وكف يم الباب غمزلي وطلع ضحكت علي وباوعت على بابا سحب كرسي وكعد علي لزم ايدي واردف :-
-اني صح خليتج امانه يم اسار بس مو بيدي انجبرت اسوي هيج حتى انتقم من الزعيم
-زين تنتقم من الزعيم عليش هوه ما مسويلك شي ولا مأذيك اصلا انتَ ما تحب تتواجد اذا الزعيم جان موجود ما فهمت ؟
-هوه صح ما سوالي شي بس اخذ شي مني كلش عزيز
صفنت بوجهه واردفت :-
-شنو اخذ منك ما فهمت .؟؟
-اخذي ابني مني وهوه بعده ما شايف نور الدنيا .
صفنت على كلامه واردفت بعدم استيعاب :-
-اخذ ابنك ما فهمت بابا فهمني الله يخليك؟
هز راسه بمعنى " ايي " واردف :-
-ايي هازال الزعيم اخذ مني ابني اخذ قطعه من روحي اخذ اخوج وهوه بعده ما شايف نور الدنيا .
شهكت بصدمه ما مصدكه كلام ابوي هزيت راسي بمعنى لاا واردفت :-
-لاااا بابااات مستحيلل الزعيم هيج يسوي لااا مستحيل يقتل اخوي
-من عرف بأمج حامل بـولد حاول يقتله بكل الطريق وبالاخير نجح وقتله .
-يعني اني جان صار عندي اخ لو ما الزعيم يكتله؟
-حان صار عندج سند غيري تحتمين بي بس الزعيم ما راد هذه الشي وكتله اريدج تنتقمين من الزعيم بدالي اريدج تخلين ايدج بأيد اسار وتنتقون سويه
هزيت راسي بـ لااا وبجيت شبعت بجي مستحيل هيج يصير هذه الزعيم شنو من قلب عنده معقوله كتل اخوي بس ليش هوه بطن اني وكتله ليش هيج سووه شنو غايته ماكو نار بدون حطب لازم اكو
سبب ضميت وجهي بأيديني الاثنين وبجيت من القهر اني شراح يصير بيه بسبب الزعيم راح ينشل حالي ما كمت اعرف شسوي صرخت بعلو صوتي ابوي يحاول يسكتني لكن اني خلص نفذت
طاقتي اني ما اتحمل بعد اني الك يالزعيم اذا ما كسرت خشمك انتَ وابنك ما يطلع اسمي هازال تحرموني من اخوي اذا ما خليتكم تتندمون مو بنت ابوي
لزمني ابوي من ايدي واردف :-
-صارلنا هواي نحاول نخفي هذه الشي عنج بس هسه عرفتي اريدج تصيرين قويه وتشدين حيلج اسار موجود يمج واني هم صح راح ارجع للعراق بس راح توصلني كل اخبارج اريدج تنتقمين وتاخذين ثار اخوج من الزعيم .
-بابا بعد ما اتحمل كافييي اسكتت خليني استوعب الي ديصير ليش هيج سووه ليش كتل اخوي .
-لان ابو امج كال اي وحده من بنات تجيب اخر طفل يكون الوثر اله فـ امج من حبلت وطلع بيها ولد الزعيم ما وافق على هذه الشي وكتل اخوج بدم بارد بدون ما يرفله جفن خلاني اتلوع بناري وابني راح مني ما كدرت اسوي شي ضليت ساكت بس هسه خلص مفذ صبري اريدج انتِ بدالي تنتقمين .
-والله يا زعيم اذا ما كسرت خشمك وخليتك تتندم ما يطلع اسمي هازال ولا بنت ابوي اني الك
حضني ابوي يسكت بيه بس اني بعد ما اكدر اسكت خلص لازم يبلش انتقامي من الزعيم راح اخلي يتندم دخل اسار للغرفه من شاف حالتي اجه بسرعه علي
تركني ابوي واجه اسار حضني كدامي ابوي بدون ما يخاف منه عافنه ابوي وطلع من الغرفه باسني اسار من راسي واردف وهوه يسمح بدموعي :-
-كافي يروحي انتِ كافي تبجين
-اسار هذه الزعيم من شنو مخلوق ليش هيج ديسوي اصلا ليش كتل اخوي هوه شنو ذنبه بعده حتى نور الحياة ما شايفه
-محد يعرف شنو السبب غيره بس كافي ما اتحمل اشوف دموعج ينزلن وهنه غاليات علي
مسح دموعي مره الثانيه وكعد يمي خليت راسي على ايده وبس اشهك ما ابجي خله ايده على وجهي وبعد شعري عنه باسني من خذي واردف :-
-ودّي اگلج انه احبج ودّي اذوب لحد ضياعي بس اخاف عليج مني ودّي اضمّج وين ما بيه دفو لكن المانعني عنج انتِ اترف من فراشة وگلبي نار خاف افكلج باب گلبي وتحتركين خاف عليج وداعتج .
-كلامك يخليني ارتبك .
-جا وجمالج حتى الكلام الي اريد اكوله الج اخربط بي من اباوع عليج وعلى عيونج بالذات .
-بس انتَ الي تخليني افرح .
-انتِ واهس ضحكتي بهل دنيا حبيني روحي تستاهلج وتستاهل حبج .
-منو كالك اني ما احبك ؟
-شنوو؟؟
-لا هيج ما اقصد احجي بدون تفكير لاا تهتم .
-اذا ضليتي هيج تحجين ما اضمنلج اعيش لباجر .
-اسم الله عليك اسار لا تحجين
-اسم الله عليج مني يروحي انتِ
-اسكت اسار هسه يجي ابوي .
-ودي اكلج اكل ابلعج هينوب من كد ما ترفه وتخبلين .
-يااا ياااا وشوف شلون ولك شنو تريد تاكلني.
-جنج كيمر لا والله جنج العافيه .
-اخخخ راح تخليني اموع واتسرسح عليك كافي
-اخخ يم عيون الرماديه خبلتيني .
-خليني اخبلك وراح اسطرك هم .
-عمي انتِ بس عيونج ساطرتني وشايلتني من الكاع .
سكتت خجلانه من كلامه غفيت بدون ما احس الحبّ لا يُقاس بِخلوّه من الخلافات والمشاكل، بل بِقدرة الطرفين على تجاوزها والحفاظ على مشاعر الحبّ والاحترام
المتبادل. فبالتّسامح والصبر والحوار، يُمكننا تحويل هذه الهزائم إلى دروسٍ نتعلم منها ونُصبح أقوى وأكثر قدرةً على مواجهة تحدّيات اقوى و أعتى انما الحب شيء
جميل لكن السيء فيه هم الجميلون الذي اخترناهم ..
أقصد السيؤون او المجهولون الذي نكتب لهم و كالعادة لا يقرأون أفهمك فقد استعملت كلمتي الدائمة ذالك
الشخص الذي أتعب قلوبنا بعشقه لكن حين يُصبحُ السّكونُ منتهى الرغباتِ، والسكينةُ غايةُ المُبتغى، لا يطمحُ المرءُ لجذبِ الأنظارِ، ولا يُشغلُ بالهُ بِما يُثيرُ الضّجيجَ والضّغائنِ. فما الذي يستحقُّ كلّ هذا العناءِ؟
ما الذي يستحقُّ أنْ نُرهقَ أنفسنا بِهِ، ونُعكّرَ صفوَ حياتنا بِهِ؟اليسَ السّلامُ هوَ خيرُ ما نَنشُدُهُ؟ أليسَ هوَ غايةُ السّعادةِ؟فلنُحاولْ أنْ نُعيشَ بِبساطةٍ، دونَ تعقيدٍ، دونَ مُبالغةٍ. فلنُحافظَ على سَكينةِ أنفسنا، وعلى سلامِ قلوبنا. فذلكَ هوَ خيرُ ما نَستطيعُ أنْ نُقدّمَهُ لأنفسنا،
ولِمنْ حولنا. مرت ايام هواي طلعت من المستشفى وبلشنا نتفق على الخطه الي راح تخلي الزعيم ما يطلع منها لو يموت رجع ابوي للعراق شكد حاولت وياه حتى ما يروح كال امج محد يمها واختي هم .
ما قبل كالي انتِ بأمانة اسار وراح ضليت اني واسار نخطط لحد ما صار الوقت الي راح نفذ بي الخطه طلعنا اني واسار من البيت متوجهين للمكان الي راح يصير بس الخطه راح نفر عقل اسار فر اني الك اذا ما ندمتك واخذت ثار اخوي منك ما اطلع بنت ابوي .
يتبع.....
«ــــــــــــــــــ«•»ـــــــــــــــــ»
-الحمدلله.
-سُبحان الله.
-لا إله الا الله.
-الله أكّبر.
-لا حول ولا قوة الا بالله.
-سُبحان الله وبحمده سُبحان الله العظيم.
-ربي اغفر ليّ ولوالدي.
-حسبِي الله لا إله الا هو عليه توكلت وهو ربّ العرش العظيم.
-سبحان الله وبحّمده عدد خلقهِ ورضا نفسه وزنة عرشه ومداد كلماتهِ.
-لا إله الا الله وحده لا شَريك له،له الملك وله الحمدّ وهو على كل شيء قدير.
«ــــــــــــــــــ«•»ـــــــــــــــــ»