" ثمن حـاكم الريف "
Vote+ Comment فضلاً ولـيس أمراً
الكاتبة : زهــــور
حساب الرواية : @merhamet_friends
بارت أطول من عمري، عليها تعطلت باش نحطو، ياريلكم مانلقاش تعليقااااات
كولشي هنا استغفرو الله أولا 🌸
___________________
بـقات رحمة شحـال كـتشوف فيه ونطقات بابتسامة خفيفة : واش عرفاتك ! صحات !
تنهد : أودي
طلع عينو شاف فيها : غير كنت مع طبيب ديالها وعندها موشكيل فذاكرة دالعقل ديالها يعني مع الدواء وشوية ديال الصبر تولي مزيان
جبدات يدو لعندها كتمسح عليه : يكون خير أحبيبي ماتخافش إنشاء الله غاتولي مزيان حنا معاها حتى ترجع توقف على رجليها
دور راسو كيشوف بعيد نطق بهدوء : إنشـاء الله
رجع شاف فيها عويناتها حومر وتحتهوم ذابل وداخل من كمية التعب، هز يدو بشوية لجيهت حناكها بصباعو الكبار كيدوزهوم على أسفل عينيها لي بداو كيتقشرو من كترت الدموع صغر عينو كيتمعن فكل إنش من الوجه ديالها الناعم والبريء، غمضان عويناتها معوجة عنقها متكية حنيكاتها على يديه الكبار الخشنة، باغا توصل لمراد من خلالو، قلبها كيضرب بجهد لما لا وهي توحشات أسير قلبها، باغا توصل من طه ليه حب حياتها لي بغاتو كثر من اي واحد.
لحظة صمت طالت ثم طالت، ماقدرش يحيد يدو من حناكها الرطيطبين، عارفها باش كتحس عارفها أنها كتحس بيه مراد فجنبها، عارف مزيان شحال كتبغي باه، حرقة فقلبو كتاكلو منين كيحس بلي هو السبب تاوقف بيناتهوم هاكاك، ولكن متيقن بلي خاس شوية ديال الصبر باش اتصلح كولشي، كيحاول يبقا صامد قدام هاد الظروف لي قاست عائلتهم، كيحاول يبقا واقف لأنه الوحيد لي غايرد كل حاجة بلاصتها، المسؤولية ماكاتحيدش من حياتو أبدا، هاكا تربا، هاكا كبر، تربا باش يضحي على كولشي كثر من راسو، تربا باش مايطيحش مهما كانت الظروف وكيفما بغات تكون، إلى طاح غاطيح عائلتو وماشي غير العائلة بل الريف كامل، هو الكبير، هو والي آل ورياغل.
حذف يدو بشوية وديمارا طوموبيل متوجه بيها للدّار حتى وقف الطموبيل مدليها السوارت شاف فيها : طلعي الواليدة ورتاحي
شدات من عندو سوارت قبل ماتجبدهوم زير على يديها الشيء لي خلاها طلع عينها فيه نطق بهدوء : الله نهى على الحزن للمرة الواليدة، كولشي بيد الله رخفي على راسك
خفق قلبها وتجمعو حجبانها بآلم كمل هو بنفس الجدية والهدوء : واخا ؟
كتافات تحرك راسها بآه ونزلات من الطموبيل تبعها بعينيه حتى تأكد من الدخول ديالها للدار عاد تحرك خدا طريق البحر واحد شوية جنب الطموبيل ووقفها موكي راسو على الكرسي ساد عينو
***
ضحك بثقالة كيتكلم : ايييه الدنيا أولدي ماغاتسناكش
رمش فيه طه : ولكن ابا جدي هو لي سبقني وخداهوم وانا طحت
تحطات اليد بجهد على كتفو : الوقت بحال هاكا، كيسبقك ونتا كتجري، لاماعرفتيش تمشي معاه كولشي غايهرب بين يديك، ماخاسش تقول عييت، ماخاسش تقول براكة، واخا طيح ويتهرسو جناحك، عاود ربي الريش ووقف بحال النسر لا تخلي شاي حد يتشفا فيك، نتا من آل ورياغل وغايجي نهار تولي العصمة كلها بين يديك دور شوف قدامك
دار بعينيه باش اشوف غير الجبال العاليين، الضباب كثيف والشجر بالكثرة، الطيور كبار كتحلق فداك الغيوم الكثيرة، من كثر ما هو كيبان كبـير وواسع ومتجذر بأصل صحيح، من كثر ما هو كـيبان مخيف، نعم لقد كـان الريف المغربي.
هز يدو كينعتليه ونطق باللغة الامازيغية الريفية : شفتي هاد الريف شحـال كـبير، حـنا أصل ليه، بلاد تخلقات بالعز، نفسنا فوق كولشي، وترابنا مايحلا لغيرنا، مانبغيو حد يشركنا فيه ولا نبغيو يطيح بينا، هاد البلاد حلم كل واحد منها انها تزيان، عششوها صحاب الحـال همشونا وبغاونا نوليو عبيد تحت من رجليهوم، ولكن درنا علاش نرجعو وخلقنا مال كيمشي بيه الكبير والصغير، وواحد من ثروة كبيرة كتخرج من يدينا ومن عندنا، ماتنساش هادشي فخر براسك حيت ريفي، وعز بدمك وبقا ديما رافع نيفك للسما.
شاف فيه وكل حرف تقال دخلو هضرة الريفية ولات كيالما بين فمو علموهاليه منين يالاه تزاد وماكاينش شي حد ولد دالبلاد مايعرفش اهضر بيها، هاكا روافا دمهم حار على بلادهوم ولغتهم.
دور عينيه كيشوف جدو داير يديه مور ضهرو وبدون شعور تاهو رد يديه مور ضهرو بنفس الوقفة وبنفس الشموخ طالق عينو بنضرة النسر بين الجبال، كمل بلحاج هضرتو : هاد الريف غاتكون حاكمو واحد النهـار، الصغيرة والكبيرة غاتخرج ودخل على يديك، حنا قبيلة آل ورياغل من بني توزين، شانا عالي فهاد البلاد من جدود لجدود تقاتلنا باش حفرنا وجهنا فهاد الجبال، تاولا الصغير والكبير يحنيلينا الراس.
هز يدو مدهاليه بسرعة دار باسها ودارها عند راسو : الله ارضي عليك، غايجي نهار لي حتى نتا كولشي يبغي يبوس يديك.
مـشات الليام وجـات الليام، وبلاصة نسر الريف فعلاً تحفرات بالدم على كل حجرة من جبال الريف، وهاهو فجنازة جدو نيت فجنازة ديال واحد من أسياد قبيلة بني ورياغل
وقفات جـــيب فالـكحل، خلات الكــالس ينوض ولي شافوه برا الخزانة تغاوتو على لي لداخل بسمية لــي جــا تفتح الباب وتحطات رجليه بخطوة نفضات الغبرة من الارض، نزل معاها، مونطو فالكحل طويل فوق من تريكو بالكول واصل تالعنق، جبد فيدو لي كيبان منها خاتم مرشوم فيه طابع #الـــنسر، هز تيليفون وخشاه فجيبو ديريكت، عاد زدح الباب موراه، ناضو رجال كاملين واقفين كولشي باغي يتسابق باش يسلم عليه، سبقهم واحد الراجل بزربة لعندو شدليه يديه بغا يبوسها وهو يخطفها : سير الله يمهد خطاويك و ينصرك، البركة فراسك ..
***
نزل من طموبيلتو متاجه بخطاويه ثقال لاتجاه البحر، شعل الكـارو ببريكة دارو عند فمو خدا رشفة وحدا ونفخ منها دخان ضبابي ندالع فالجو بسرعة، وموراه رماه عافط عليه من طبعو ماكيكميش إلا لكـان مزاجو مرايقش بالمرة، رجع وزع نضرة عيونو بين مواج البحر والجو مليئ بسحاب كثيف مغطي على الشمس ومخلي الدنيا ظلام.
هو طه ولد مراد ولد بلحاج الورياغلي، عظمة الاسماء كتمتد من جيل لجيل دون توقف، تمنى واحد النهار لو كـان شخـص عادي ولكن الحمل الثقيل لي هاز فسميتو ماخلاهش، رفعات من الجبروت، وكيف قال بلحاج، تزاد بجناح النسر وخاسو يحمل ثقلو فكاع لي بقا من عمرو.
صغارو عينيه وحمارو داير يديه فجيب الجاكيت، كتخليك تعرف أن لي جـاي ماكيبشرش بالخير، وغايقلب تراب هاد الجبال ويخلي بنادم لي كان ماقادرش يشوف فعينيه يولي يخاف حتى ينطق سميتو فغيابو.
صوناليه تيليفون دارو عند وذنو بلاما يهضر : سي الرايس لقينا البياع شنو نديرو معاه ؟
نطق بهدوء : هاد الليلة ديوه لديبو دالحصاد.
قطع مباشرة باش يتطبق كلامو بالحرف.
" لـقد كـان يبدو حـاكما قاسيًا، لا يخـشى شـيئًا، كـان بأجنحته يحـتل كل عدو وغريب دخل أرضَه دون علمه، كـان الجميع يضـنه جـبلاً شامخـاً، لكن لم يعلم أحدًا أنه يدفع ثمنًا قاسيًا لذلك، أجنحته الصلبة مليئة بالخدوش التي تألمه دون إصدار أنينٍ منه لقد كان لحُكمِ الرّيـف ثمنًا قاسياً غيرُ عـادل "
رجع حتى للعشية للكلينيك، لقاها يالاه كيف وكلوها ورجعات نعسات هاد المدة كيعطيوها ادوية ديال النعاس بزاف كاتبقا غير مرخية، دخل للشومبر ديالها الهدوء والسكـات غير السيروم لي كيقطر مرة مرة، قرب ومسح على شعرها بشوية كيشوف فيها حتى دخلات الفرملية من موراه : موسيو الورياغلي عافاك عندنا شي وراق خاس تسنيهـ..
وقفها بصبعو خلاها تقرم فبلاصتها مافهمات والو خلعها تبعاتو بعينيها نزل بشوية لراس حمامتو وطبع قبلة هادئة سد عينو فيها ورجع بعد دار لعندها هضر بملامح جدية عكس لي كانت منين كان كيشوف فسميرة ونطق بصوت خشن وهادئ : خرجي أنا جاي
مازادتش معاه الهضرة خرجات مخليات رد شوية دالغطا عليها وقادلقها يديداتها وشعرها وخرج ساد موراه الباب مقدم مخليها تبعو تاوصلو لريسيبشن، قدماتليه الوراق : هادو المواقفة على انها غاتبقا هنا تحت الاشراف ديالنا حتى تبرى و..
قاطعها للمرة ثانية : غدا غاتحول لوبيطال فرباط بلاما تصدعو راسكم طلعيليا الحساب ديال اليوم وهاد الليلة باش ندوزهومليك بكونت بونكير، هاد الليلة ماتخلي حد يبات معاها أنا غانرجع لعندها.
خلاها كترمش واقفة ومشا جراتها لي خدامة فريسيبسيون لي حداها : هه حسيت براسي تقمعت بلاصتك
الفرملية : هادي الثانية فير سكتي، بقا فيا راسي فهاد الساعة
فنصاص الليل رجع لعندها للمصحة كانت دميا خاوية غير لي كاينين فالبيرمانونص، دخل لعندها وطلع للحجرة ديالها لقاها كيعادتها ناعسة كيالاميرة، تقدم وهز يديها باسهوم ورجع جر كرسي وگلس حداها مربع يديه وكيشـوف فيها، كيشوف فهاد الانثى لي فجأة ولات جزء لا يتجزء من حياتو، الليل كان طويل ولكن بالنسبة ليه العكس الوقت فجنبها حتى وهي نايمة كيدوز قصير وبزاف.
حتى لوقت جد متأخر قرر ياخد شوية وقت لراسو باش ينعس بحكم غدا تابعو الطريق وشحال من حاجة باغي يكون فيها صاحي وموگض.
* طنجة
وصلو للاباغطومون المهدي سبقهوم يحل الباب بينما شيماء بقات معاونة غيثة تاوصلو للدار مع دخلات كتلمح كيفاش الكراطن وكولشي مجموع الدار مرونة على عكس العادة، تجمعو حجبانها باستفهام يالاه غاتنطق سبقاتها شيماء: هه شفتي الروينة، لقيتي غانتحولو هاد السيمانة للڤيلا الجديدة عليها كولشي مرون.
تبسمات : مبروك عليكم اخالتي والله مافخباريش كون عيطتيلي نجي نعاونك
تمشات بيها دخلاتها لبيت أمال لي كانت تاهي مرونة البيانو تفصل باش اتهز وكاينين شي حوايج لي بقاو فبلايصهوم : ماعندك لاش تعذبي راسك جايبين الخدامة لي يتكلفو بكولشي اصلا ماغانقلش شي حوايج شريت أثاث جديد تما غير كاينين شي حاجات هنا ماقادراش نخليهوم ولفتهم.
عاوناتها كلسات فالناموسية : بصح مبروك عليهوم اخالتي الله يدخل عليكم الدار جديدة بالصحة والسلامة
تنهدات شيماء ناطقة : آمين من شحال كنت كنقول براكة عليا غير آباغطمون ولكن المهدي بغا يستقر فدار بوحدو ماقدرتش نرفض عاد كتاب نبنيو هاد الڤيلا غدا انشاء الله تصبح بنتي مزيان وغانديها تشوفها حتى انني قررت نوجدليك واحد البيت ليك
قلبها ضرب بجهد خصوصا باش قاتليها بنتي وعينيها بلاما يحسو تجمعو فيهوم الدموع بواحد السرعة بلكـاد قدرات تحبسهوم، حركات راسها بلا : أويلي لا شمن بيتي و..
جاتليها بزربة حطات يديها على فمها : ششششش كيفاش واش بغيتي تسكني فدار واليديك بلا بيتك ؟
كلسات حداها ومسحات على شعرها : أصلا بحال والو تكوني عروسة ولدي وتشكري نيت نتي وياه البيت وهانتي ولاو عندك جوج بيوت
ضحكات بابتسامة خفيفة بينما غيثة حشمات حشمات بزاف لدرجة نزلات وجهها حانياه مابقاتش قادا ترفعو وخدودها تنفخو بسخونية بابتسامة خجولة.
مدات شيماء يديها لتحت ديال كدم فمها : ياختي على لي يحشم انايا مشاء الله غزالة الله احرق عضم لي يهرس فيك شعرة احبيبة ديالي، تشوف فيا كلنا كنعانيو فهاد الدُّنيا، تانا منين كنت قدك دزت من بزاف دالحوايج تاوصلت لأنا فين كاينة دابا الطريق ماساهلاشي بالمرة، عمل لي عليك وربي يجازيك.
شداتليها يديها بحنية وعويناتها لامعين : شكرا أخالتي والله نتوما نعمة من الله ليا.
رجعات عنقاتها وبقات شيماء كتسرح على ضهرها تاحسات بيها ترخات بعداتها بشوية لقاتها نعسات وهي توكيها فالناموسية حيدات ليها الصباط من رجليها وجابت الغطا غطاتها كلسات حداها كتسرح فشعرها وتشوف فملامحها ذابلة والعيانة، عمرها حسات بتقرب من شي حد من غير ولادها حتى لغيثة، هاد البنت لي شافتها تحرمات من كولشي حطاتها فعينيها مقاس أمال كتخايل لو كانت فوضعيتها ممكن تحماق، ضرها خاطرها لدرجة تمنات لو ولداتها هي وماتشوفهاش فهاد الحالة، تنهدات بآلم وقربات باستها على راسها من معزتها عند ولادها لا رضى ولا أمال دابا كتحس بيها حتي هي بنتها جيت لمسات طيبة قلبها فهاز زمن ديال الذئاب لي لا رحمة لا شفقة.
خرجات لبرى لقات النهدي يالاه جا يطل عليها نطق بالحس : نعسات ؟
حركاتليه شيماء راسها وقربات منو كتهضر بشوية : ماهضرتيش مع رضى شنو قاليك ؟
المهدي : قالي ماغايجيش هاد الليلة لدار ماكيحسش براسو مزيان بغا يرتاح بوحدو
تنهدات بشوية : واقيلة مريض ولا منهرف شنو وقعليك تاقبيلة ماكانش مزيان
المهدي: ماكيسمعش عندو قوت البلانات الخاوية وكيعمر راسو بشي حاجة لي فوق طاقتو، ماتعرفو لشنو كيخطط
شيماء : رخي راسك أحبي ماتعصبشي معاه أصلا هاد الليان يالاه نتكافاو مع الرحيل ومن البعد نشوفو شنو كاين
* الرباط
بعد يوم كـانت فالبيرو ديالها كـالسة كاتسنا الاتصال من طه علي ود حالة سميرة وجدوليها الشومبر وكاع لي غاتحتاج وطبيب نفسي أخصائي معروف لي غايشرف على حالتها بالتدقيق، حتى صوناليها تيليفون عند بالها هو صدق خوها : الزين ديالي
ريتال : شي بروسي جديد ؟
أنس : هبطي براكة من الهضرة زايدة
ريتال : فين غانهبط ؟
أنس : أنا لتحت فالباركينك ديال لوبيطال
قطعات عليه وناضت من البيرو ديالها ماكانتش لابسة الطابلية بحكم يالاه جات باقا بطقم الكلاص سروال واسع فالارق غامق مع شوميز فالازرق الفاتح لون السماء مفتوحة سديفات من الفوق وسنسلة رقيقة مذهبة كتبري فعنقها، جامعة شعرها ديل وساعة فيديها كالڤين كلاين، وجها الصافي لي مافيهش نقطة دماكياج من غير عكر حمر ماط زاد كمل فخامتها، خرجات من البيرو ديالها موجهة لتحت وطالون ديالها الابيض مسموع فالارجاء لي كبين على قوة الحضور ديالها بمشية أنيقة، ماكاينش أنثى كتحط عليها العين وماتمناش تكون بحالها ولما لا وهي وريثة أغنى ليزوبيطال فالرباط العاصمة وبروفيسورة بنت بروفيسور وكتنتامي لعائلة برجوازية لا من الام ولا الاب الاموال تترعرع.
خرجات من الباب متوجهة للباركينك تاوقفات فبلاصتها مصدومة وكضحك : لااا
ناض من فوق الـ BMW السبور آخر موديل فالاسود ورفع يدو : وشنو حسابليك بوحدك لي تبدلي وتاخدي الرانج
قربات كضحك وتشوف فالطموبيل كتبري خارجة جديدة من لاميزو: كيفاش قنعتي بابا ياخدها ؟ كان ضد هاد الفكرة
آنس : حيت دفع هو فيها غير الربع، لي بقا من عندي
شافت فيه محركة فمها بمعنى اييه : واخا هاكاك باقا مامتافقاش معاه حتى تقبل بلابةرس ديال أوكسفورد
آنس : ريتال داك الموضوع بلامادوي فيه تانتي، ماقادرش نفارق المغرب وصحابي.
قربات مربعة يديها مصغرة عينيها كتشوف فيه : امم صحابك ولا شي وحدة واخدة عقل خويا ؟
ضحك بثقالة وقرب ضرب بصبعو بشوية على جبهتها : الخصوصية كاتبقا خصوصية
غمزها وبعد غادي لجهت الشيفور : تركبي ؟
تنهدات نافخة بشوية طالقة يديها : كنت غانركب ولكن ولد خالك جاي دابا واوبليجي خاس نطلاقاه عندي خدمة
جمع حجبانو : طه ؟
ريتال : وي، مرتو مريضة غايجيبها للهنا
حوكليها راسو باه عارفها علامن كتهضر ولكن ماباغيش اعيق باش ماتعيقش بشنو بينو وبين آمينة كيبغي يخلي كولشي مخفي تايخرجو النهار لي باغي هو رجع شاف فيها : غاتحضري غدا لجتماع ؟
ريتال : منين جاك خبار الاجتماع نتا !
آنس : الواليد علمني قالي خاس تكون حاضر
رفعات حجبانها بشوية وقلبها خفق زيرات على سنانها وقبضة يديها، علا يدو فوجها : هيلو فين مشيتي !!
بسرعة ناضت من سهوتها شافت فيه : والو والو، فين غاتمشي نتا دابا
ركب فالطوموبيل مهبط الزاج ضرب على الڤولون : غاندير دورة بصاحبتي جديدة، وفالعشية غانمشي نطلاقا بنت العميم فالمطار.
جمعات حجبانها : نواي واش أمال !!!
حركليها راسو : صافي منين تكون غادي صونيليا نمشيو كاملين هاد الليلة بغيت نفوج شوية
رماليها بوسة فالهوة : مشات ازين تهلاي
كعط بجهد تاتسمعات كغيييييييك خلات الغبابر طالعين ضحكات : باسل
بسرعة تحولو ملامحها للغضب لا يطاق، بسرعة تحولات لطموبيلتها الرانج فالبيض باقا جديدة كعطات بيها تاوصلات للڤيلا ديالهوم حطات الطموبيل ونزلات متاجهة نيشان للباب غير شافها العساس فتحليها الباب ودخلات لداخل كتغوت بجهد : باباااااااا
مشات طالعة مع الدروج خرجات كلثوم من الالون كانت كتهضر مع الخدامة تاسمعاتها شافتها هاكاك تخلعات قربات ليها : ريتال شنو واقع ؟
ريتال : فين بابا ؟
كلثوم : فالبيرو ديالو الفوق علاش !!
بلاماتزيد معاها مشات طالعة للفوق فين كاين البيرو ديالو كاين فالطبقة الاخيرة من الڤيلا منعازل وفيه مكتابة كبيرة، دخلات عليه كيف الساعقة كان داير النضاضر كيقرا فكتاب، سدات الباب باش مايسمع حد وطرقاتو بساروت خلات مها كتغوت من برى قربات وضربات فالبيرو : علاش غادخل معانا آنس شرحلييي علاش
نطق بهدوء : خوك غاياخد حقو من تم
ضربات فالطبلة وقفات عاطياه بالضهر لحمها كينغل حطات يديها كيترعدو على جبهتها ورجعات دارت شافت فيه كتشوفو باقي كيقرا بهدوء : واش حماقيتي ابابا واش صافي تسطيتي، شنو علاقة آنس بالطب آش دخلو فالكلينيييييك واش عارف نهار توقف فيه غايمشي فيها معانا تاهو !!!!
سد الكتاب بشوية وطلع عينو فيها : دخلت آنس حيت مابقاتش عندي ثقة فيك
وقفات بشوية كـتشوف فيه جمعات حواجبها بآلم كتحاول تستوعب هضرتو تاعمرات دمعة فعينيها بزربة نزلات تاطاحت فالارض مصدومة، حالة فمها بشوية كتشوف فيه، علا حجبانو فيها : تقصحتي ؟
تنهد بشوية : تانا تقصحت بحالك منين خالفتي كلامي وكديري ضدي
قربات فمها كيرجف ويرجف تاوصلات للحافة دالبيرو الوسط، هزات يديها تاهزات وخبطات بجهد مرة وجوج وثلاثة وهي كتغوت : شنوووووو بغييييتييييي منييييي شنووووو بغيييتيييييييي
ضربات : شنوووووووو
عاودت ضرباات : بغيييتييييي
هزات يديها كيرجفو حطاتهوم على راسها جبدات شعرها حتا تفك من الربطة ودموعها تخلطو مع رجفة صوتها : شش ش شنوووو قووولياااا شنوو بغيتي ندرليييك
غوت بجهد : ريتااااااال
غوتات تاهي بجهد : شنووووووووووو
رجفات يديها كيترعدو دموعها نزلو وصوتها تبح كتميل راسها وعينيها كيترعدو فيه داتها كترجف : رديتيني مونيكة بين يديك شنو باغي كثر، شنو مازال بغيتيني نكون باش ترضى عليااااااااا
ضربات على راسها بجهد : شنو شنو شنو شنو قوليااا قوليا ماتسكتش لا ماتسكتش قولياااا
شافت فيه : حركتيني من كلية الفنون ونقلتيني بيدك للطب، رديتيني طبيبة على هواك ودخلتيني نخدم فالكلينيك ديالك، بزيتي عليا نداوي صاحبتي وقتلتها بيدي، حرمتيني من ولديني باش تبقا صورتك نقية.
رخفات صوتها بهدوء وملامحها رجفو : علاش درتي فيا هاكا، مايمكنش نعيش الحياة لي تمنيتيها ابابا مايمكنش، شوفني شوف فيا
زادت قربات حنات راسها كترجف : شوف شوف فيا أنا وليت لعبة بين يديك
فرمشة غوتات ضربات فالبيرو : شووووف فيااا
ناض واقف داز داير لعدنها وهي متبعاه ماحيداتش عينيها : خرجي اريتال منهنا خرجي
وقفات مقاد وتقادو ملامحها للجدية دموعها لي بقاو هابطين : ماغانخرجش، غاندير لي فجهدي سمعتي لي فجهدي باش آنس مايدخلش لتما وغاندعمو فاي حاجة باش يكون ضدك
جا جرها بعصبية من يديها ودفعها لناحية الباب : خرجي اريتال منهنا قبل ماغانسا بلي نتي بنتي
ريتال : شنو يا ترى غايقوع لاعرف كولشي حقيقتك ؟ مم !! بغيتي نخلي يونس يتوسخ تاهو فهاد اليدين المسخين ديالك الى كنتي نتا مافيك نفس لي...
هز يدو حتى هزها وضربها بجهد تاتسمعات الشخطة قوية فالبيرو كامل لدرجة كلثوم قفزات مور الباب بصدمة وضربات بجهد الباب : يوووننسسسس ريتاااااال فتتتتتتح
وجها دار وشعرها تطلق بقوة الضربة جنب فمها تجرح ودم سال، يونس قلبو تزدح ويديه تعصرو لدرجة الدموع عمرو فعينيه مامصدقش ضرب بنتو الوحيدة.
بقات كتشوف فنفس الجيهة فبلاصة وحدة دون ماترمش وطاحت دمعة بملامح جامدة باردة ومصدومة، طلعات يديها كترجف حطاتهوم جنب فمها وبعدات باش تشوف قطيرات صغار ددم ممحية فطراف صبعانها، جا يقرب يشوف الجرح بعدات جوج خطوات اللور ضحكات بهستيرية وبرود وعينيها مدمعين، طلعات عينيها بشوية فعينو حركات راسها تحولو ملامحها لبرود : عقل عليها، مزــيان، غاتندم عليا أدكتور يونس الخداوي.
تخطاتو فاتحة الباب بسوارت وجراتو بجهد تاتفتح على كلثوم لي كانت كتغوت ودق شافتها كيفاش العكر ممحي ليها شوية والجرح جنب فمها وشعرها نازل عينيها حومر مدمعين، نطقات مخلوعة : بنتي ريتال !!
بعدات بلاماتنطق غادا وشعرها مطلوق، يديها كيمسحو الدم من فمها، خارجة من الڤيلا مباشرة لطموبيلتها مع ركبات هبطات المرايا لي فوقها، جبدات باندة جديدة وطلعات شعرها حدا المرايا كتجمعو كيف كـان حتـى يديها رجفو ونزلو بزربة دموعها نزلو كتشهق ورجع شعرها طاح على وجها تانزلات متكية جبهتها على الڤولون كتبكي وتشهق، النفس كيطلع بزز وكتحس براسها غاتخنق، تاطلعات راسها بزربة معلية عينيها باش اوقفو الدموع، بزربة مسحات دموعها مزيان ومسحات العكر، جبدات شعرها حامعاه ديل كيف كـان، جرات ساكها جبدات الغوجاليف، عكرات مزيان ورجعاتو كيف كان لاحتو جنبها وكسيرات زايدة مع الطريق ببرود عيط صلاح قطعات عليه مافيها لي يسمع لتاحد دابا.
زادت كسيرات كثر وزيرات بيديها على الڤولون حتى تطراسا طابع النسر فالمعصم، داير ابتسامة جانبية.
* فرنسا
فمتحف اللوڤر، ختمات آخر معزوفة ليها فالبيانو وناضت تحت تسفيقات الناس لي كانو كيستامعو ليها، اليوم بحكم كاينة افتتاحية موسم جديد كيجيبو عازفين البيانو نسبة لكلية الفنون، وطبعاً كانت هي المختارة، ناضت بكل جنتلمانية بطقمها الرسمي الانيق شوميز فالابيض من لتحت مشبكة بعنيق طالع وڤيست فالبيج مع سروالها واسع، جامعة نصف شعرها خدات من عندهوم الورد وهزات ساكها خارجة حيت تابعاها الطائرة.
توجهات بطموبيلتها للاباغطومون هزات الڤاليز لي كانت ديجا جامعاها بدلات حوايجها بشورط جينز مع ليبا موس داللحم وسبادري ومن الفوق تيشرت خفيف فوق منو ڤيست فالخوز طلعات شعرها بوكلي وجمعات حوايجها وباسبورها موجهة للمطار قررات أنها تهبط للمغرب مفاجأة لواليدها باش تشوف صاحبتها وتحتافل بعيد ميلاد خوها دايراه ليه مفاجأة فدارهوم جديدة وموجدة لكولشي من بعيد.
* طنجة
نهار جديد ناضت فيه كتحس براسها فاشلة بزاف دخلات لطواليط كتلقا راسها بحالا فيها ليغيكل الدـم غير كتنزل منها جات غاتخرج من الطواليط وهي تسمع صوتو كيهضر مع شيماء قلبها ضرب وقربات بزربة السمع ديالها للباب، لدابا كتفكر اخر فعل دارو معاها ولي كان نسبة معاها ضرها وماعجبهاش الحال ولكن حاولات تفهم انه يمكن فضغط ومابغاتش تزيد عليه بقات كتحاول تقرب تاسمعاتو كيسول عليها، تبسمات بلاما تحس وفراشات تخلقو فقلبها عاودات وقفات حدا المرايا شافت فراسها رغم فاشلة وشحبات بزاف ولكن أكيد هو ماشي كيف كولشي وغايشوفها ديما زوينة فعينو رجعات فتحات الباب خرجات تاكاتلقا غا شيماء مع الخدامة والدنيا مرونة كيهزو الرحيل قربات ليه كترمش : فيناهو رضى ؟
شيماء : زين ديالي صباح الخير عاد كان هنا شوفي لبسي من عند امال غانمشيو نفطرو فالدار جديدة
باقا مصدومة : واش رضى جا ومشى بلاما يشوفني
تنهدات شيمااء: والله ماعرفت ابنتي اصلا تشغل مع هادشي هو سبقنا للدار يمكن عند بالو ناعسة لبسي عليك ويالاه نمشيو.
غيثة : واخا اصلا مزالة غانرجع للاباغطومون ناخد حوايجي.
لبسات حوايجها غير من عند امال دجين بسيط وهي متنوية صافي حسات براسها ماهياش، مشاو للدار لقاوها باقي شي بلايص كيصلحو فيهوم ولكن الكمالة مسالية، ڤيلا كبيرة بزاف بجردة واسعة من الصدام وبيسين من اللور ومفتوحة بالزاج موديل جديد وعصري بزاف، بقات غير مصدومة مامصدقاش واش بصح نيت غاتسكن، اصلا هي مزال مامتأكداش من قرارها خصوصا باش قاليها المهدي خودي وقتك فقرارك، يعني الي بصح واقفات غايكون عندها بلاصة فهاد الدار الكبيرة هي لي ماكانتش عندها حتا ماريو بوحدها باش تحط حوايجها.
كان كولشي مفرش وكولشي مقاد هوما من شحال كانو كيوجدو مع بقات غادا مع شيماء كتوريها الفصالة دالڤيلا كيفاش مفتوحين الصالونات على بعضياتهوم وكلها مصبوغة فالبيض واحد التصميم كيفتح النفس، شوية كيشمعو الغوات الفوق الشي لي خلاهوم يتصدمو : شنو وااااقع !!
قالتها شيماء وهي كتقدم طالعة تبعاتها غيثة بلاماتحس واخا كتحس براسها فشلات ثاني وكل دقيقة خاس تبدل بالدمايات لي كينزلو منها وصلو للفوق كيسمعو رضي كيتغاوت مع المهدي ولأول مرة لدرجة شيماء تصدمات قربات لعندهوم : واش حماقيتو اويلي مالكم
رضى : نتي كنتي حاضرة على هادشي كيفاااااش غاتبنااااااو بنت انا باغي نتزوج بيها واش تسالاو ليكم الولاد مامكفينكمش انا وأمال هاديك البنت غاتكون مرتي كيفاش غاترضوها ختي
المهدي : كدوي بحالي نتا ديال راسك، رضى نتا مزوج وعندك ولد وهي مزوجة منين تفكو بجوج ويكون خير
دار معصب لاقصى درجة غوت : واااااش بغيتو تحمقوووني وعلاااش غادي ندخلوها لعائتلنا كبنتكم واش تسطيييتوو، واش كبرتو عاد باغين تبناو غادي تبناو بنت فعمرها 21 !!!، من فوقاش كاينة فثقافة عائلتنا اننا نتبناو بنات ولا دراري.
كانت مورى الحيط سرطات ريقها، ودموعها عمرو فعينيها، رجعات نزلات ماقادراش تسمع كثر واصلا كتحس براسها غاطيح
غوتات شيماء : رضـى شنو موشكيلتك لاخدينا البنت بنتنا واش تسطيتي
خرج نفس بشوية كيحس بدوخة بزاف كيجاول يشد راسو ويديه بداو يترعدو هبط صوتو : الواليدة انا ماقلتش العكس ماقلتش ماتسكنش هنا وماقلتش ماديروهاش بنتكم ولكن غاتبناو وحدة يعني غاتوليو واليديها يعني غاتولي ختي، هاديك البنت كنبغيها بغيتها تولي مرتي مانقبلش يدويو عليها كثر من الحالة لي هي فيها كانت ختو ورجعات مرتو الله اهديكم، وموشكيلة مراتي غادي نحلها والواليد ماتبقاش تقول مزوجة حيت هاد البلان كيعصبني وانا دايرليها بلانها باش نطلقه...
سمعو صوت الخدام كيغوت ليهوم بجهد خلاهوم بثلاثة بزربة يتاجهو ناحية الدروج كيشوفو غيثة طايحة سخافة كل دقيقة كيطيح ليها الضغط حتى مابقاتش مستحملة وطاحت على وقتها أول واحد نقز لعندها بخوف كان هو وتبعاتو شيماء والمهدي.
حنا لعندها كيضرب فحنكها : غيثة غيييثة حبيبتي.
شيماء : غييييييثةةةةة جيب الما ولا شي حاااجة غييييثة
كيشوف فوجها كيفاش شاحبة وشفايفها بويض وكتقطر بالعرق، تخلع والقلب ديالو قرب يخرج، حط يدو تحت من فخاضها وجرها لعندو هازها بسرعة قلبو كينزف معاها، مع دار غايخطي خطوة حس بحيد داخل فيه خلاه يفشل بشكل لا اراضي شي لي خلا واليديه مايفهمو والو كيشوفو فيه، هضرات شيماء بزربة : رضى مااالك رررضى
شد المهدي على كتفو وهو كيحس بالخنقة فعنقو ويديه كيفشلو عليه بسرعة شيماء نطقات : النهديييي شد البنت من عندووو شدهاااااا
جا المهدي جبدها من عندو هازها وكمل بيها كيشوفها غادا بين يدين المهدي والضلام كيدوزو بين عينيه : غيييثة
كيحس بلسانو فاشل وماقادرش يولي ينطق سميتها، كتحركو مو وهو ماكاينش شد على راسو لي كيدور بيه رجع باللور تاتزدح بالحيط، كيسمع صوت مو بعيد وحاول يتوكض معاها : رضى شنو واقع معاك ماتخافش غاتولي مزيان ثيق فيا شوف فيااا ماتعصبش، غيثة اتولي مزيان
خرجها المهدي فاشلة وشعرها كيمشي ويجي للمرة الثانية على التوالي كطيح بنزيف فتح الباب ردها اللور باش امشي بها لوبيطال.
بعصبية نطق : صااافي صاافي غاماتجبديش سميتها
شيماء : كيفاش شكاتقول
شد على راسو : فيناهي غيثة !!
شيماء مصدومة مافهمات والو : رضى واش بغيتي تحمقيني شكاتخربق توكض معايا
عند باب لاباغطامون ديال رضى زاج كيتكب مهروس على الارض فوق الطابي، تأكد مزيان من ان الميكا خوات شاف يمين وشمال وتقدم منزل الكاسكيط باش مايشوفو تاواحد نازل مع الدروج.
" مخلي موراه موت أكيد "
يتبع
___________________
مــزال مـاشفتو والـــو هادي فقط البـداية
رأيكم فالبـارت