#دلة_وشاجور
بقلم الكاتبه دنيا غانم
واحسبهن سواد الليل
ويجي الصبح ويجليهن
وانسة الصبح هم يجلى
ويرد الليل لوجاعي ويصحيهن
وصفيت انا غريب الروح
وبس گلبي العرف بيهن
جول وسوده وظلمة
مثل گلبك الحاويهن
: يلا ولجج العجين اخترب
:انطريني خايبة شجاج حتى نسيتيني وين حاطه اللثام
:انا ماشية اخبز وانتِ امشي للحلال عبري الشط و اعلفي واوردي وانا سويعه وجايتج بالاجل
:خوش دمشي وفكينه هسا بس اشوف اللثامي واوزر روحي اجيج
وانا ادردم عليها وادور على اللثامي رفعت اللوله
(المخده)
ولگيته حدره ( جواته)
جريته ولبسته و لبست الجفوف و جريت العلگ ووزرت بي عباتي ولبست الجزمة ومشيت الجو بارد و بعده الليل مجلجل
وبس صوت الواويه يدوي
لجن مو بس انا واخيتي طالعين لا هالتشوف كدامي بنات عشيرة سلهم طالعات يوردن الحلال
و يخبزن و يغسل الماعين بالحوض
صبحجن الله بالخير
ردت بس الصغيره و الباقيات دارن الوجه الغسل كون
لا صبحجن الله خذيت الجاموس و نزلت بي للشط جريت مجذافي و صعدت البلم و مشيت وهنه وراي
وانا اغنيلهن عشگ الصغيره
مثل الرمد بالعين احا عشگ الصغيره
هو وينه هذا اليتقنه بيه و يگلي هاي الجلمات
التورد گلبي الضامي
جريت مجذافي من النهر وانا اعد حلالانه
عبن مريت بحلال عشيرة سلهم لا يختلط وياهم وياخذولي جاموسة انا مالي خلگهم ولالي خلگ طلايبهم
وحده من بناتهم حين الشافتني گالت
وانا اگول ريحة الشط ازفره
جاوبتها بعين جويه جيف غسلتي جهرتج بي
يعينك الله يا شط كل خيسه يمك تركد
مديت مجذافي وصحت حيواني
مسميتهن بنات سلهم حين الاجيت اعبرها هيست واحد صاحلها
وهيه ردت سم
خايبه اركضي لا تظلين هنا
هيج گاللها التفتت ما لگيتها
مدري شصار الهم هلبت الله ووج بيتهم
ونفتك منهم
وصلت الحد الطرف الثاني علفت حيواني وواردتهن وانا جريت بطلي مالت الماي وشربت وگعدت غادي منهن (غادي =بعيد شوي)
اناظرهن وانا بسد الحايط جويعده وساعه اصد ليهن وساعه للشطيط انتظر اخيتي تجيني تجيبلي لگمة وبالعاصه انحش الحييوان لا يگربن يمي مالي خلگهن سمعت تفجة ثارت
(تفجة =سلاح) ما هميت عبن هذا الصوت ربيب عربنه مرت الساعة ومامش احد
خايبه يا بت ابوي وين صرتي موش مصارين بطني ثارن
وعلي ساعة بعد اذا ما اجت لجرلي جاموسه من هالجاموس و املص ارگبتها وانعل ابو خيرها
واتغده بيها وانا اهذري وي روحي
صار جدامي واحد من عشيرة سلهم
ورافع بوجهي رشاش ميري
ها شنهي بويه انا وحيدتي عايلين گايلين وانت جاينة حامي،،،
خايب هيوو تعرف انت هاي رفعتك عليها فصل
نب عليه يگلي لوبيج خيري اعبري بالاول وبعدين احجي بالفصول
انا ما جايبه ويا التفجة وهذا يهوبز فوگ راسي
من بعيد اشوف العجاجة و التراب أيتطاير
تگرب لينه واشوف الفرس من بعيد صاح بي
التفت اله
گله شيل سلاحك
:شنهي جا يعيلون بينه واحنه نسگت
: ما نهد علي نسوان وهيه ما تعرف شصاير اخذ الفرس وامش
وانا جاي وراك
عدلت اللثامي وباوعتله هو هم ملثم بس عيونه باينه شنهي الراي
اتعدون علينه تاليها وعلي انا ماشيه لهيلتي ولخلي اليوم عاليها على واطيها
گلي وهو يتمزهد بيه
:بس لا تعبرين من الشط لو كضنج بنتات عشيرتنه يسونج وصل طري الهيمه وردي لهلج والحلال لا تفكرين بي يعرگلج (يعرقلج)
شنهي الشط شط ابوكم وانا ما اعرف
التفتت الحيواني و صحت بنات.... صديت ليه
اخافن اگول بنات سلهم وهسا يجتلني هنا
وگف گدامي وگلي گتلج طري الهيمة وعبري الجسر الشط ماهو امن
:وعلاش ماهو امن شنو جلاب سلهم حاميته وما نَعَرِف
عتني من اللثامي للگاع وگلي طري الهيمة لا اطرج اربع وصل ما باقي عليه بس الضايع اصلها من فصلها يلاااااا وعلي لو جلمة طلعت منج
لأخلي الدم لرجاب وانتِ السبب بت الكواويد
:حلالي ما اتركة اليترك حلاله اغممم وكلامك مردود عليك
لزمني من ثوبي ورفعني ليه ووجد عيونه بعيوني
وگالي: هلج وهلي بره صايرين لحممم امشي عبري الهلج من الدرابين وحلالج يمي انا ارده
احنه خيرنه سلهم خيرنه جثير موش عايزين الجاموسكم
:يمه هلي يا صيوان گلبي
تركت كلشي وركضت ليهم والتفج فوگ راسي يثور طريت الجسر ناحية عشيرتنه
ووصلت البيتنه بالگوه
السما صارت حمره والشوارع فارغة
شنهي الراي خايبين شنهو الصار
اجتلي امي واشگفتني وحضنتني
الحمد لله گلت راحت بنيتي شلون خلوج تعبيرن عشيرة سلهم
:عبرررت عبرت هسا بس گليلي شصاير
: اخوج تعارك وي عشيرة سلهم