كاعده بالمطبخ واسمع صوت هلهوله فزيت طلعت لكيته ملكه كتلها
تـرف: ها خاله ابنج راح يعرس
ملكه: لاصيرين غشيمه ممبروك
ضليت صافنه مثل ثوله كتلها
تـرف: عليمن مبروك
دارت وجها على سواد دگله
ملكه: هاي مرت فاهيه من هسه الله يساعدك
تفشلت وصعدت فوك
ازل: شكو شنو هذا الصوت
ضليت ساكته
ازل: احجي ترف
تـرف: سواد مو تقدم الي
ازل: اي
تـرف: وافقت بس كتله بشرط اشوف اخواني
شفتها لونها اتغير كالت
ازل: نصيحتي لاتوافقين
تـرف: وافقت ورحت
ازل: كليلهم لا
تـرف: ترا مو لعبه
ازل: ترا راح تتمدرين
غلست منها المهم اشوف اخوانيي لان كلش مشتاقتلهم... نزلت سويت غدا ورحت صليت واجو الولد وصبيت غدا وكعدو ياكلون
سواد: تعالي اكلي
تـرف: لا شبعانه
سواد: شكلتي
تـرف: اكلت بالمطبخ
جذب مااكلت رحت للمطبخ صبيت غدا ازل وردت اصعد كال سواد
سواد: عوفي الاكل وصيحي ازل تنزل ناكل سوا
فرحت ورحت صحت لـ ازل نزلت وعيونها بالگاع كالت
ازل: السلام عليكم
الكل: وعليكم السلام
رفعت راسي واشوف زعيم يباوع عليها استغربت
سواد: خويه تعالي يمي
كعدت يمه واني صعدت فوك نمت....
ازل:: نزلت واني كلش مستحيه وعيوني بالگاع سلمت وكعدت يم سواد اكلت واحس الانظار كلها عليه
ملكه: يمه ازل بيج شي
رفعت راسي
ازل: لا خاله مابيه شي
ملكه: رفعي راسج شبيج مدنگه
سواد: خليها هيج اني اريدها
ملكه: شنو اشك بيها
رفع راسه يباوعلي يباوع للكل گال
سواد: لاا مااشك بيها بس من خوفي الها
لهفه: هوه هذا الاخو الحقيقي
زعيم: انچبي واكلي
سواد: شبيك وياهاا زعيم ترا مابيها شي وماحجت شي
زعيم: ماتعرفها شنو تقصد
شفتها كامت من الاكل
سواد: هيج احسن من گومتها ترا اختك
غلس منه واني مدنگه اكل خلصت
سواد: شنو خويه خلصتي
هزيت راسي بـ اي
سواد: روحي شوفي ترف شبيها وتعالي کليلي
ابتسمت
ازل: صار من عيوني
كمت غسلت وصعدت فوك شفتها نايمه خطيه تعبانه عيونها ذبلانات نزلت... ماشفت سواد
ازل: وين سواد
زعيم: بالغرفه
رحت للغرفه لگيته متمدد بالگاع وبيده صورة لؤلؤ
كتله
ازل: خويه
رفع وجه عليه وعاف الصوره ع صفحه وكال
سواد: كولي عمري
ازل: سمعت راح تتزوج ترف
سواد: اي
ازل: خويه انت تعرف شنو چذبه چذبتها لـ ترف يعني من راح تزواجها راح تتعذب بالزايد
سواد: ازلتي اني هاي لبنيه اني ظلمتها ومن ازوجها اجوز ارتاح وهيه هم ترتاح
ازل: انت غلطان بالعكس وهسه صعدت الها عيوني ذبلانات كلش يعني البنيه تعبانه
سواد: شنو انتِ ضايجه منها
ازل: خويه شنو هل حجي بالعكس حبيتها بس اني خاف عليها وعليك اذا انت راح تتزوجها وتگلها اخونج ماتو شنو راح يصير ردت فعلك
سواد: مااگلها
ازل: ترا هسه قبلت بيك بسبب اخوانها تريد اشوفهم لان انت كتلها عندي اخوانج
سواد: ندمان لان جذبت عليها
ازل: روح گلها هسه
سواد: مستحيل اخسرها وتروح لعمامها يعذبونها
ازل: شوف انت گلها واذا راحت لعمامها وسمعت بيها عذبوها اني اروح برجلي واجيبها الك
سواد: اخاف اخسرها
ازل: تحبها
ضحك ضحكه چذبيه
سواد: شبسرعه حبيتها
ازل: كلشي ويصير
سواد: ججج
ازل: شبيك سألتك جاوبني
سواد: جج
ازل: بكيفك بس راح ادمر حياة ابنيه
غلس وطلع لطميه
بنيتـه ، خطـار اجاني ياهـلا بجيته
محـلا الابـو لو مر على بنيتـه
شلون اسئله ويسئل شلوني بنيتـه
بس ما تطيح عيـونه بعيـوني ، بنيتـه
ازل: ليش هيج متعلق بهاي لطميه
سواد: احبها لان اذكرني بـ لؤلؤ
ازل: ها خويه رجعنه
سواد: كل مااذكر لعبها واسولفها اموت واذكر ضحكتها اموت الف موتها كله من سببي
ازل: ماكو شي من سببك انت مالك ذنب
سواد: اشلون مالي ذنب
سكتت
سواد: كتلها راجع للبيت واني اشتريلج واني راجع شفتها دعمتها سياره شفتها من طاحت وصاحت"بابا سواد" وجان هذا اخر كلمه الهاي
ازل: جانت اسميك بابا
سواد: تعبت
ازل: اششش كافي
اخذت منه الصوره وطلعت وسديت الباب وصار اگبالي زعيم
ازل: اسفه
زعيم: على شنو
ازل: قاطعت طريقك
زعيم بضحكه: لا عادي مصار شي
ازل: عليمن تضحك
زعيم: هوبب اسف
رحت عنه ضجت منه وصعدت فوك... شفت تـرف بعدها نايمه
ازل: ترف ترففف كاعدي يلا
ماكو أي صوت اجيت يمها كتلها
ازل: ترف كافي كومي مرت اخويه كومييي
خفت... لزمت ايدها يابسه مثل الخشبه خفت الازيد
ازل: تتتتتررررررفففف اكعدييي ترف لج ترف
الزم جسمها عباره عن خشمها ماكو نفس
جبت ماي صبيت عليها ماتنطي ردت فعل ابد
تفرفحت وكفت يم الدرج بصوت عالي
ازل: سواددددددد الحك الحك ترف ماادري شبيها الحك
صعد اشلون متخبل
سواد: شبيها
ازل: شوفها شوفها روح
اباوعله تفرفحه شالها ونزل
لبست حجاب وعبايه ونزلت
زعيم: وترحين
ازل: اروح وي ترف
زعيم: خويه ضلي هنا واحنه وياهاا
غلست منه ورحت ورا اخويه اركض
صعدت بالسياره زعيم بالصدر وسواد يسوق واني وترف ورا... ترف ماتنطي ردت فعل ابد عباره عن خشبه... وصلنه للمستشفى...
دكتور: عيني هاي جايتها صدمه ونوبه بنفس الوقت الازم تاكل ديري بالكم عليها ملازم تصدموها بشي وراح انطيكم علاج خليها تستمر علي
سواد: صارت مثل الخشبه يابسه
دكتور: هذا اسمه"الاصرع"
سواد: دكتور راح تتعالج
دكتور: اذا تستمر على العلاج تتعالج ونوبات راح تجيها دائمأ ولاتخلونها وحدها
رحنه للغرفه الي بيها تـرف
تـرف بضحكه: واخيرأ طلعتي
ازل: حتى وانتِ مريضه مااجوزين من سوالفج
تـرف بغمزه: اعجبج
زعيم: الحمدلله على السلامه مرت صاحبي
سواد تقرب يمها وگعد گبالها وگال
سواد: الحمدلله على السلامه ماتشوفين شر
تـرف بتوتر: الله يسلمك
سواد: سؤال؟
تـرف: جواب
سواد: صار وياج من نمتي اول قبل لاتنامين او كعدتي وانصدمتي من شي
تـرف: مااعرف نايمه بس...
سواد: بس شنو احجي
تـرف بخوف: تحلمت بأخواني يتعذبون وكعدت مرعوبه ماادري صار
سواد سكت محتار وتندم كلش
گال....
________________________________
الڪاتبة ريـام علي 🤎.
مشاهده ممتعه فراشاتي 🦋 🤎🥺...