مـساء الخيـر ♡
.....................
ألـ غضب 🦅
.....................
البـارت التاسع والثلاثين
.....................
بـقـلـمي انا كــوثــر الـ جـاســم
.....................
لتنسـون الايـك
متـابعـه الحسـاب
التعليـق بيـن الفقـرات
.....................
من جفنوها وسدو البوب
بريوكنه متربع غروب
من شفنه ركن البيت خالي
بعنه الهلا وشلنه الزوالي
ماتت وعازب جان حالي
ما لحكت توكل جهالي
.....................
( القمرين )
وديان :( ما مصدكه الصار جان خايف عليه لا اموت بالولادة وهوا مات جان خايف اعوفه وهوا عافني شلون انطا گلبه ما ادري شلون عافني انا وابنه ما ادري تحز بداخلي ما ودعته بس بالحلم محد منهم ذكرني ما خلوني أودعه هوا وأخوي وابن عمي زعلانه منهم ومعتزله بغرفتي منهم كلهم فزيت من صفنتي على تنوص حمودي كمت اصيحله حمودي لأن ابو ناداء بهذا الاسم شلته الحضني ابوس بخدوده الترفات رجعته للجربايه وكمت شغلت شمعه بمكان محمد المفضل وعليت صوت القران ورجعت الحمودي نزعته ملابسه علمود اسبحه سبحه السبعه حضنته وانا ابجي عمت عيني عليك يمه ما لحكت تشوف ابوك تيتمت بالكماط سبحته كوه لأن ما اعرف وسبحت ويا بالماي طلعت ارجف من البرد ولافته حيل خاف يبرد كعدنا يم الهيتر أبدله وهوا ينوص جوعان سوده عليه بدلتله صار يجنن عريس وليدي بجه حيل حاولت ارضعه ما يقبل بهذلني اندك الباب صحت )
... منو ؟
ام احمد : انا يمه
وديان : تفضلي حبيبتي
ام احمد :( فتحت الباب ودخلت تحاول ترضعه وما يقبل يصرخ صوته راح اخذته منها وهيا تبجي ويا كتلها )
... شبي ؟
وديان : ما يقبل يرضع
ام احمد : ليش ؟
وديان : ما ادري
ام احمد : خاف حليبج جف
وديان : لا ما جف بس هوا مدري شبي
ام احمد : خاف حليبج شاط وبلعومه ياذي
وديان : ما ادري سوده عليه جوعان شوفي شلون يدور
ام احمد : جربي تنطينه ممه
وديان : لا ما ارضعه ممه هوا هل واحد من ريحه محمد شلون ما ارضعه
ام احمد : يمه حليبج شاط من الحركه وحتى قل وهوا طفل خطيه
وديان : هسه شلون يسكت
ام احمد : ادز احمد يجيبله حليب
وديان : لا عمه حبابه ما اريد
ام احمد : براحتج هاج أخذي اسويله ورد واجي
وديان :( اخذته منها افتر بي بالغرفه وهوا يدور ويبجي وانا ابجي ويا تأخرت عمه حيل اندك الباب صحت )
... منو ؟؟؟
... انا احمد
وديان : بس لحضه
( بهذلني بصريخه لبست عباء الصلاه فوك ملابسي لأن لازكات على جسمي بسبب الماي وركضت فتحت الباب )
... تفضل ؟
احمد : ليش هيج يبجي ؟
وديان : جوعان
احمد : ها اروح ترضعينه ؟
وديان : لا
احمد : ليش ؟
وديان : ما يقبل يرضع بس جوعان موتني ما اعرف شسوي عمه راح تسويله ورد
احمد : جا ليش ما يرضع أخذه للدكتور ؟
وديان : ما ادري
احمد : جربتي ممه ؟
وديان : لا ما ارضعه ممه انا ارضعه
احمد : خاف ما يشبع منج
وديان : جا شسوي
احمد : اهدئي أنتِ ليش تبجين
وديان : فرفح بالبجي
احمد : شو جيبي أشوفه
( اخذته منها خلا رأسه بصدري وسكت بسته وكتله )
... وين اكو واحد عمه يحبه ويبجي ها بويه شو تدلل هواي
( باوعت الوديان صافنه عليه ابتسمت وكتلها )
... وديان شتحتاجين انا بالخدمه لا تطلبين من أحد غيري
وديان : ليش ؟
احمد : انا متكفل بي اليوم الدين انا ومحمد واحد وابنه ابني
وديان : أن شاء الله
احمد : زعلانه مني ؟
وديان : منكم كلكم ما خليتوني اودعهم
احمد : وضعج تعبان بسبب الولاده مو مال نجف والوضع بالبيت ما يسمح
وديان : خوش
احمد : شو باعيلي
وديان : احمد ما اريد
احمد : ليش ؟
وديان : تشبه محمد ما اكدر اباوعلك
احمد :( بلعت ريكي وباوعت للطفل كلش ناعم وجها احمر بسبب البجي بست رأسه وكتلها )
... شتسمينه ؟
وديان : محمد
احمد : ليش ؟
وديان : ما اريد اسم محمد ينكطع من البيت
احمد : وما راح ينكطع
وديان : راح يفرح من يعرف سميت ابنه نفس اسمه
احمد : الله يحفظه الج
وديان : نام بحضنك
احمد : يحبني
وديان : جا ليش يبجي بحضني ما يحبني ؟
احمد : لا بويه شلون ما يحبج غير أمه بس يجوز دفه بحضني
وديان : اول مره رجال يشيله يجوز حس بإحساس الابوه ونام بحضنك مو يكولون الطفل يحس
احمد : وراح يحس بهذا الإحساس طول عمره لا تفكرين محمد تيتم انا ابو وأخو وصاحبه وعمه وجده وخاله وشيريد اصيرله مثل حبي الابو احبه أضعاف هذا من ريحه الغالي
وديان : الله ما ينسى عبده صح ما راح يعوض مكان محمد بس على الاقل يصبرنه
احمد : العوض ينسينى حجم المصيبه الاحنا بيها
وديان :( دنكت راسي دموعي نزلن بهدوء وكتله )
... شلون دفنته وهوا يكره لتراب ؟
شلون گلبك انطاك ؟
ام احمد : ها أجيت وينه
احمد : هلا يمه
ام احمد : هلا يبعد امك شو يمه فدوه يوم الاشوفك شايل وليدك
احمد : محمد وليدي
ام احمد : يا محمد ؟
( اشرلي على الطفل كتله )
... سميته محمد ؟
احمد : أمه رادته
ام احمد : الحسين يحفظه بجاه النبي جيبه يمه اشربه ورد
احمد : نام
ام احمد : عمت عيني نام جوعان
احمد : ليش ما يرضع يمه ؟ خاف بي شي أخذه للدكتور ؟ اجيبله علاج ؟
ام احمد : خل يكعد واشربه الورد إذا ما رضع ناخذه
احمد : خوش انا جوه انتبهله يمه لا تعوفينه وديان شتحتاجين انا اخوج بعد اخوج انتبهي النفسج وهدي الولد هذا امانه لا تحركين دمج ويخف حليبج وإذا تردين حليب هسه اجيبله
وديان : ما تقصر سيد
احمد : راح اروح اسويله بيان شيصير اتصلي بيه جهازي مفتوح
ام احمد : اي يمه محمد
احمد :( دنكت راسي من غلطت باسمي وكتلها )
... اخذن راحتجن اترخص
ام احمد : الله وياك يمه بحفظ الرحمان حمودي
( سديت الباب وكعدت على الجربايه باوعت الوديان الدموع متجمعه بعينها كتلها )
... روحي يمه روحي سبحي الجو بارد محمد يمي
وديان :( تقربت كعدت بالكاع ولزمت اديها بستهن وكتلها )
... هذا احمد ليش كتيله محمد ؟
ام احمد : اعرف هذا احمد
وديان : جا ليش صحتي محمد
ام احمد : يشبه اخو
وديان : ما اكدر اباوع بوجها يحرك گلبي شلون عمه
ام احمد : عمت عيني عليج يمه ترملتي بعز شبابج
وديان : بعد لا تصيحينه محمد حبابه
ام احمد : اشتاقيت لوليدي يا يمه اشتاقيت اصيحن اسمه مو بيدي يا يمه ادري ضوجتكم بس اشتاقيت اصيحن اسمه بالبيت تمنيت هاي الوكفه وأكفها هوا ويسولف وياي على اسم ابنه تمنيت هذا الخوف هوا خايفه على ابنه تمنيت هوا الشايل ابنه تمنيت واكفين هاي الوكفه ويا بفرح وشقا ويانه وأحمد يصيح عليه مو بيدي بيد گلبي لزمت نفسي علمود ما اضوج أحمد ادري بي مكسور ما ارد ازيدنها بس ما كدرت مشتاقتله يا يمه گلبي نار
وديان : عمه شسوي كليلي شلون اتحمل تدرين هوا جان خايف عليه اموت بالولاده واعوفه وهوا عافني ما فكر بيه عمه شلون ابقه بالغرفه وهوا مو بيها حبابه عمه خل اروح لاهلي والله بعد ما اتحمل بكل ركن بالغرفه أشوفه روحي راحت عمه راح اتخبل واخاف على ابني ياهو اله
ام احمد : يا يمه هوا أنا شبقالي من محمد غيركم شلون تعوفيني
وديان : ما نعوفج هنا احنا بس خل اطلع من البيت
ام احمد : أخذي غير غرفه بس لا تكليلي اطلع
وديان : ما اكدر عمه بكل ركن بالبيت اسمع ضحكته
ام احمد : واهلج هم نفس الشي
وديان : اعرف نفس الشي بس شسوي عمه راح اموت طلعوني منا كل ركن بالبيوت يخنكني كوه متحمله والله الخاطر محمد الصغير متحمله
ام احمد :( فز يبجي على بجينه مسحت دموعها وكتلها )
... كومي يمه كومي سبحي لا تتمرضين
وديان : مو كعد حمودي
ام احمد : انا يمه
( دخلت سبحت وانا رضعته الورد ما قبل يرضع نومته على بطنه ادلك ضهره وهوا يبجي طلعت من الغرفه ادور ملاك الما شايفتها ابد فتحت باب غرفتها ضلمه ومكلوبه كلب وهيا كاعده بزاويه الغرفه لازمه صوره محمد وتبجي بشهكه سحبتها منها وكعدت كبالها باوعتلي وجها مليان دموع )
... أن الله اذا حب عبده ابتلاء
ملاك : يبتليني بموت اخوووووي ؟؟؟؟ عشت كل عمري يتيمه وأحمد ومحمد عوضوني صارو الاب الما حسيت بحنانه وبكل بساطه يموت محمد منو بقالي احمدددد الشغله اصعب من الصعب وعلى يا ساعه يدخلونه بتابوووت ؟؟؟؟
ام احمد : اشششش ولج ملاك شلون ينطيج گلبج تحجين هيج امي
ملاك : وشلون انطاكم گلبكم تدفنون محمد ؟؟؟؟؟
ام احمد : ماما حبيبتي هذا يومه الجاي تسوينه بنفسج حرام والله حرام والميت واجب دفنه
ملاك : ماكو حرام غير الجاي تسونه انتِ وأحمد ضامين حركه گلبكم بگلبكم تردون تموتون من القهرر وتعوفوني وحدي كلكم تيتموني يمه هاي ثاني مره أتيتم
ام احمد : احسن ما نعترض على حكمه ربج
ملاك : ما اعترض انا بس حقي شسوي حقي المات اخوي المات قطعه من روحي المات شاب ما شايف ابنه راح ويتمه سوده عليه
ام احمد : هوا أنتِ شفتي ابنه ؟
ملاك : لا وما أريد أشوفه وخري مني يوم
ام احمد : ملاك ليش هيج والله راح اشكيج الاحمد
ملاك : هوا أنتِ شعدج غير تشكيني الاحمد
ام احمد : اوف منج اوف
ملاك : يمه تردين أشوفه ومحمد مات بحسرته
ام احمد : هذا من ريحه اخوج هذا العزيز
ملاك : محمد ما شافه
ام احمد : تردين تضوجين اخوج وما تشوفين ابنه هوا هذا حبج
ملاك : ليش يبجي حيل
ام احمد : أمه من القهر شاط حليبها وما يرضع يجوز تمرض
ملاك : عمت عيني عليه
ام احمد : تشيلينه ؟
ملاك : لا لا اخاف ما اعرف
أم أحمد : جربي حبيبتي
ملاك :( اخذته من أيدها سبحان الخالق نسخه محمد انا أشوفه هيج لأن گلبي محترك على اخوي وياهو أشوفه أحسه هوا مدري هوا يشبها بسته وهوا مفرفح بالبجي باوعت الامي وكتلها )
... شسمه ؟
ام احمد : راح احمد يسوي البيان أمه تريد اسم محمد
ملاك : تريد تحرك گلبنا ؟
ام احمد : لا يمه لا تحجين هيج البنيه محروك گلبها وما تريد ذكر محمد ينسي من البيت
ملاك : وما راح ينسي ليش قبلتو ؟؟؟؟ محمد واحد ما يتكرر ولا يتعوض مكانه
ام احمد : وهذا وليده من ريحته
ملاك : بس محمد واحدددد ماكو غيره لا تفكرون راح يتعوض مكانه محمد ضلع وانكسر
ام احمد : اوووف منج جيبي الولد
ملاك :( سحبته من ايدي وانا مفرفحه وهوا يبجي اجت وديان تركض وشعرها يقطر ماي سحبته من امي تفتر بي واحنا نمشي وراها وهوا فرفح اتصلت امي باحمد يجي يأخذه للدكتور كعدت وديان كبال صوره محمد تبجي كعدت بصفها وكتلها )
... أخذه منج
وديان : لا عوفي محمدددد هيج تعوفنيييي ؟؟؟ هذا حبك الي ؟ تنهي حبنا بموت ؟؟؟؟ شوف ابنك مفرفح بسببك انا صوجي بقيت ارضعه وتمرض ابني روحه راحت عمت عيني عليه محمد شلون تعوفنه شلون نعيش بدونك شلون اتحمل وحدي شلون اربي وحدي ؟ مو متفقين ننهي حبنا بجهالنا شلون نهيته بموتك ؟؟؟؟
ام احمد : يمه حبيبتي هوا نام البارحه
وديان : كل شويه يفز وما يرضع اهزه وينام
ام احمد : سوده عليه يا يمه جيبي يمه جيبي
( اخذته منها افتر بي بالبيت سكت ونام من التعب سوده عليه بجه بجي بقيت افتر بي منتضره احمد يجي )
چا هية هيچ تروح وانه بعازتِك ؟؟
.....................
احمد :( كملت البيان باسم محمد وطلعت من المستشفى ارد ارجع للبيت خايف على محمد الصغير إذا ما يرضع مو زين عليه يتمرض دك موبايلي شلته ملهوف عبالي امي شفت المتصل فتحت خط وصحت )
... الو
بناز : كيفك احمد
احمد : على الله
بناز : كيف أوضاعك أن شاء الله بخير
احمد : على الله
بناز : اهلك كيفهم امك وأخواتك
احمد : على الله
بناز : شو اليوم مافي غير هل كلمه ؟
احمد : محتاجه شي ؟
بناز : بدي اجيكم انا وانس
احمد : هلا بيكم
بناز : أنتَ موجود ؟
احمد : راجع للبيت
بناز : وين كنت ؟
احمد : مو شغلج
بناز : صح اسفه
احمد : محتاجه شي ؟
بناز : لا بس رح نجي وقلت اخبرك بالاول
احمد : خوش
( سديته منها مالي خلك أحد ولا الي خلك اخذ وانطي ويا أحد اهلي كوه احجي وياهم واصبرهم اتصلت امي رديت عليها سمعت بجي محمد فرفحت روحي عليه حتى ما سمعت امي شكالت وصلت للبيت الجادر بعده منصوب لأن الخطار ما يخلصون ليل ونهار يمنه ما يخلونه ننفرد بنفسنه ونعيش حزنه محتارين بيهم أكثر من مصابنه وحتى لو نزلنا الجوادر راح يبقن بنص گلوبنا فواتح منصوبات نزلت للبيت اركض وصارو كبالي انس وبناز تعديتهم ودخلت للبيت سحبته من امي وصحت )
... شبي ليش هيج يبجي ؟؟؟؟
ام احمد : يمه لا يرضع ولا نايم اكيد جوعان ويبجي
احمد : وليش ما يرضع ؟؟؟؟؟ شبي الولد يمه ؟؟؟
وديان :( كعدت بالكاع الطم على وجهي )
... يمه ابنييييي يمه ابنييييي عمه سوي شي ابوس ايدك احمد سوي شي ابني ابنييييي عمه مالي حيل فراك محمد هد حيلي هد
ملاك : يجوز لأن سميتو محمد ؟
وديان : لااااا لااااا هوا ابو راده هيج هواااا راد اسم محمد مو بكيفي والله مو بكيفي
ملاك : مو قصدي والله خايفه عليه بس ليش هيج صار ما اعرف انا ما اعرف سوو شي ليش فرفح
وديان : احمد سوي شيييي بداعه محمد
احمد : لبسن نأخذه للمستشفى
وديان : بس ديربالك عليه هسه نجي بساع
احمد : يله لا تتاخرن
( صعدن يركضن وملاك كبالي تبجي بهدوء سمعت صوت انس اشرتلها تلبس شال ودخل هوا واخته يسألون على محمد سولفتلهم بقو صافنين تقربت بناز وكالت )
بناز : انا ما بعرف بالأطفال بس بيجوز عندو مغص او شي
احمد : ما ادري
بناز : بقدر شوفو ؟
احمد : راح نروح للمستشفى
بناز : بنروح معكم
احمد : ما يحتاج
بناز : بس
انس : كافي بناز تعاي نطلع
بناز :( سحبني من ايدي بره نترته وصحت )
... شوبك ؟
انس : شني شوبيه شبيج بناز سحلتي نفسج وهوا ينتر نتر
بناز : حقو اخو متوفي وابنو وضعو مو تمام انا رفيقتو بالعمل ولازم اقف معو
انس : بس هوا ما يريد وما جاي يحترمج وانا ما اقبل هيج
بناز : شو فيك انس احمد مو هيك وانتَ بتعرفو بس الصار معو مش قليل واكيد تعب كثير
انس : ما ادري
بناز : راح ادخل شوفو
انس : جاي وراج
( دخلت جوه وانا مشيت شويه شفتها كاعده جوه شجره وشعرها يطاير تقربت منها وهمست )
... الله يساعدج
عشق : منو ؟
انس : انا انس صديق الولد ونفس شغلهم
عشق : وشعليه ؟
انس : أجيت اعتذر لأن بيوم الدفن صحت بوجهج
عشق : عادي
انس : الموت حق علينا كلنا وهذا يومهم لا تعبين نفسج
عشق : شعليك ؟
انس : اعرف معليه بس موتي نفسج وهذا حرام جاي تاذينهم شوفي شفايفج يابسات نقطه ماي ما شاربه
عشق : معليك
انس : صكر شهيد وراح يشرب ماي بالجنه
( عافتني وكامت تمشي كوه وتعثر صحت )
... الله يصبرج ويقويج
( راحت بدون لا تباوعلي رحت البيت احمد شفته يركض والطفل بيده وبناز وأمه وبعد وحده وراه ركضت عليهم وسمعت صوت رج البيت رج وكلها اجت تركض خلا الطفل بيد أمه ودخل يركض وانا وراه شفت مره حاضنه صوره ونايمه وحده فوك رأسها تلطم وفهد دخل قبلنا يركض هزها هز وما كعدت )
فهد : يمممممممممه كعدي حبيبتي كعدييييي
( نامت امي النومه نومه ردت اشيلها ما كدرت انا فهد القوي ما اكدر أشيل امي وسفه كعدت بالكاع ادك على راسي شالها احمد وكومني انس وراه طلعنا للمستشفى واكدو وفاتها والسبب غير معلوم طلعو شهاده الوفاه واكيد السبب الكتمان كتمت حزنها بگلبها الحد ما ماتت وعافتني ماتت امي وصكر وطفت شمعه بيتنه الثانيه ورجعت امي للبيت بتابوت وكسرت گلب اخواتي للمره الثانيه وراحت العافيه )
ريتاج :( كعدت بالكاع منتضره فهد يدخل وتدخل ويا امي تمشي على طولها اباوع الوديان مخبوصه بابنها تروح وتجي وعمه وملاك وراها وساره كاعده تخرط بخدودها صحت )
... كافييييي ساره
ساره : ماتت امي ماتت اميييييي
ريتاج : كلشيييي ما بيها هسه تجي ويا فهد اي هسه تجي
ساره : طلعها ميته ميته ما كعددددت
ريتاج : أنتِ غبيه كتلج هسه ترجع
ساره : أنتِ الغبيه ريتاج أنتِ لأن ما جاي تستوعبين الصار امييييي خلص ماتت
ريتاج : تسكتين لا اموووووتج
بناز : شبكم بنات هدو
ريتاج : لحدددددددد يدخل
( كمت منهم كوه امشي ثكيله حيل غير بجون ويخلصوني يا الله انفتح الباب ودخل فهد شايل تابوت امي ركضت دفعته وصحت )
... شنيييييييي هذا فهددددددد
فهد : ماتت امي
ريتاج : ليششششش فهد ليش تحرك گلبي ذاك اليوم دخلت تابوت صكر وهسه امي ليشششش
فهد : سبحان الله هوا رايد هيج
ريتاج : وخرررر مني ما احبك اكرهك اكرهك
( نزل التابوت للكاع رفعته وشمرت نفسي عليها ريحتها ترد الروح عمت عين المكبره التاخذ هيج حنان )
... ولج يمه ياهو ضل النا ولج يمه حبيبتي ام ملكا الطيب يمه الحنينه بعد ياهو النا يمه يتمتينه ورحتي يم صكر هيج تحبينه عمت عيني عليج ريت انا ولا انتِ يمه كمت اغار من صكر حتى بموته اخذج ويا ما عافج النا وأنتِ تفرقين ليش تحبينه أكثر ها يمه ليش اخذج من يمنه صكر مشتاقتله عمت عيني عليكم ريت انا ولا انتم يا عزاز گلبي يمه بعدما صغار والله صغار ااااخ ااااخ
ساره :( بسته اديها الترفه حيل وهمست )
... امي حبيبتي شلون تعوفيني منو الي بعدج يروحي شلون اتحمل فراكج شلون اطب للبيت وأنتِ ماكو بعد ياهو يتلكاني بالهلا والمرحبه يا بعد روحي
( تقرب فهد بمكان ريتاج حضنها وصاح )
فهد : جا ياهو اليتلكاني من ارجع يممممه بعد ياهو الي يا يممممه
ريتاج : فهدددددد اميييييي شلون تعوفنه فهد بعد ياهو الناااااا احجي وياي
احمد :( سحبها الحضنه يبجون شلنا التابوت بكسره هذا رابع تابوت يطلع من هل بيت وخامس ميت كمزن البنات وملخن نفسهن وكوه لازمينهم الماتت مو بس ام فهد امنا كلنا الماتت ما تتعوض ولا يجي احد بمكانها عاشت حنينه وماتت حنينه علينا كلنا من حنيتها ماتت وره ابنها شيعوها وخلو على التابوت عباتها أجيت اروح وتذكرت محمد رجعت الوديان لكيتها محتاره بي كتلها )
... وديان
وديان : ها
احمد : بعده يبجي ؟
وديان : اي بس لا يضل بالك روح انا أسكته الحد ما ترجع نأخذه
احمد : لا ما اروح واعوفه امشي نأخذه
وديان : لا والله ما بي شي روح احمد لا تعوفون فهد وحده
احمد : يضل بالي عليه
وديان : فهد تعبان لا تعوفه
احمد :( بقيت اباوع منا ومنا شفت كرار صحت )
... كرار
كرار : ها اخوي
احمد : عفت البنات وحدهن بالمستشفى
كرار : هسه رايح
احمد : جا اخذ وديان وياك
كرار : ليش شبيها
احمد : محمد الصغير ما يرضع ولا ينام بس يبجي من البارحه
كرار : اسم الله عليه تروح أنتَ ؟
احمد : اي ما اكدر اعوف فهد
كرار : خوش امشي خويه
احمد :( راحت ويا وانا رحت وياهم للنجف فهد ما رفع رأسه مدنك حيل وجسمه يهتز وساره تملخ بنفسها وريتاج منتهيه تخلي راسها على الجامه تبجي وترفعه تلطم وترجع تقربت من ساره لان كوه حبلت وحبالتها صعبه كلش )
... اهدي ساره أنتِ حامل
ساره : احمد راح اموت اختنكت افتح الجام راح اموت
احمد :( فتحت الجامه وقربتها منها الدنيا ترعد مطر وقطرات المطر ترست وجها ويا دموعها )
ريتاج :( وصلنا للمغيسل ودخلنا امي على دجه المغيسل تغسلها المغسله الكاع بارده والماي ثلج والجو بارد لطمت الحد ما انهد حيلي وكمت اباوع لامي قطعه بيضه ثلج وجها انكلب نور تطلع منه بستها برأسها وباوعت الوجها ارتخى وملامحها ابتسمت استغربت وصحت )
... ابتسمت امي ابتسمت اميييي عايشه عايششششه
... الله يرحمها يمه لا تسوين بنفسج هيج امج مؤمنه لهل سبب صار هيج تعالن غسلنها ودعنها
ريتاج :( تقربت ساره نغسل بيها جوهره الماس بين ادينه بستها بكل جسمها وغسلتها وصيتها تدعيلنه كلنا واجت المغسله بعدتنه علمود تجفنها جفنتها وطلعنا للمكبره مخلينها بصف صكر وكفو الولد يلطمون من شافو كبور الولد لطمو لطم نسوان وشككو ملابسهم والدنيا تمطر وطين ترس ملابسنه سبحنا بي )
ايليا :( كعدت يم كبر محمد وغميت كصتي عمت عيني عليك خويه نايم بالتراب وتمطر الدنيا عليك بردتو يا بعد اخوكم دفنو عمتي وكوه لازمين فهد والبنات كملو دفنتها والتمو على القبور ونعادت دفنت الولد كوه سحلونه من قبورهم هاي النجف اخذت كل عزازنا صحت بوجع )
... انا الفاكد اخوي منين اجيب الحيل
كنان : يله يأبه حبيبي
ايليا : وخر مني
( صعدت بالسياره روحي طافيه وصلنا للبصره والكل ساكت بس دموعنه ونعاوي حبوبه وصريخ البنات ينسمع وصلنا للبيت ونزلت وامير منتجي عليه كوه يمشي همست )
... اركان البيت تخنكني
هنا ضحكنا
هنا بجينا
هنا توجعنه وضحكنه
امير : هنيالك شبعت منهم دوم يمهم
ايليا : أنتَ هنيالك تعرفهم قبلي
امير : وجع گلبي شيهدي ايليا روحي جاي تطلع
ايليا : تذكر من كعدنه هنا وبجينه من الضحك
امير : وهسه كعدنه نبجي من القهر
ايليا : وسفه الزلم تستشهد
امير : وسفه ؟ الف وسفه عليهم ولد الفيحاء
ايليا : ااااخ اااخ گلبي موجر نار امير النجف بارده
امير : والتراب ثلج
ايليا : عمت عيني
امير : وعيني
ايليا : غويث وحسن وين ؟
امير : حسن بغرفته وغيث تخربط بالسياره ما شفته
ايليا : ما منتبه
امير : ها كوم نشوفه
ايليا : مابيه حيل فراكهم هد حيلي
امير : لعد اني رايح
ايليا :( هزيت راسي وبقيت كاعد بمكاني اتذكر ضحكنه وين جنه وين صرنا )
يا شقانه وكل الضحك ذاك
هسه الكعده صارت فاهيه بلياك
تدري البارحه شكد افتقدناك
من كلنا اجتمعنا وما لكيناك
.....................
... طبيت للبيت وصحت وين امي
مشاركتني بضيم گلبي وهمي
يا ناس الحبايب والله حلوات
ولج شالن وعن عيني بعيدات
ولج يمه بعيد يا درب النودهن
يا يمه وعمت عيني
يمه بعيد يا درب النودهن
يمه الروح ولمخلوك عدهن
وني ويانه يل مالج ام وني ويانه
ريتاج : ولججججججج يمه عمت عيني يمه طبيت وصحت يمه وما رديتي عليه يا يمه
الشيخه : كعدي يا ام هلا جيناج خطار
اجيناج وكعدنه بعتبت الدار
كعدي يا ام هلا جيناج خطأر
اجيناج وكعدنه بعتبت الدار
طبينه الحجرتج ما لكيناج
ساره : اي والله يا يمه غرفتج فارغه يااااا يمه يا عزيزتي
الشيخه : وحنينه الكعدتج والحجي وياج
رقيه : احااااااا عمه عمت عيني عليج يمه
الشيخه : وبلياها ما اريد البيت
ريتاج : يااااا يمه
ساره : امُي زمزميه وينحلف بيها
لو كعدن ثلاث وسولفن بيها
أم عباس : وسفه الموت ماخذجن يشفجات
والله الموت موش الجن يا زينات
وين يردن حملن لمعدلات
ساره : ولججججججج يمه
( كلها تلطم وتصرخ خالاتي ونسوان خوالي وبناتهم كلهن جايات اكو حتى ما اعرفهن كلها جايه البيت مليان نسوان كل شويه وحده تسلم عليه سحبتنه عمه انا وريتاج يمها لأن انتهينه تقربت بنيه بوستنه وكالت )
... البقيه بحياتجن
ريتاج : يااااا حياه هاااا يا حياه بدون امي واخوييي
شني هاي الحياه البقت الناااااا لحد يكلي البقيه بحياتج انا متت الله ياخذني
ام عباس : على كيفج يمه استهدي بالرحمان نعتذر يمه بس تعبانه
... مو مشكله خاله
ريتاج : تكلي حياتج الباقيه يا حياه هاي ؟؟؟؟؟
ساره : كافي ريتاج
ام عباس : شبيج يمه حبيبتي شو وجهج انكلب اخضر
ريتاج : على اساس احنا وجوهنا حمر دم
ام عباس : ولج سكتي اختج مدري شبيها
ريتاج :( باوعتلها وجها منكلب اخضر ولامه جسمها حاضنه بطنها صحت )
... شبيج ؟؟؟؟ احجي
ساره : بطني جاي تتكطع راح اموت
ام عباس : كومي يمه كومي شبيج تعاي عمه ايلين ساعديني
ساره :( كومني وحسيت شي نزل عليه وكعت بالكاع وصحت )
... ما اكدر ما اكدر
ام عباس : شبيج يمه اسم الله ركضن صيحن واحد من الولد
( دخل حسين يركض شالها وطلع والدم ترسها صعدت وياها انا وايلين وصاح )
حسين : شبيها عمه ؟؟؟؟؟
ام عباس : عمت عيني عليكم يمه راح وليدك يا يمه يا عباس
( وصلنا للمستشفى دخلوها للغرفه وكالو عدها إسقاط سولها كرداش وحولوها الغرفه خاصه كعدت يم رأسها بستها وهيا نايمه ما تدري شصار بيها )
حسين : تعبانه ؟ وجهج اصفر
ايلين : حيلي مهدود
حسين : اجيبلج اكل واجي تأكلين ؟
ايلين : لا تعال زهراء مو هنا خل نروح نشوفها
حسين : اي امشي
ايلين :( تونه نريد نطلع وفزت ساره تصرخ كوه لزمها حسين وركضت صحت الدكتوره ضربتها ابره هدت شويه بجت وصاحت )
ساره : مات ابني ؟؟؟؟؟
ام عباس : الله يعوضج يمه
ساره : شيعوضني عمه هذا ثاني طفل اخسره قبل لا اشوفه
ام عباس : الحمدلله على كل حال يمه مو هاي أنا خسرت شاب بعمر الورد
ساره : وانا خسرت امي وأخوي وابن عمي وابن عمتي وحماي عمه شلون اتحمل وعباس ما معروف يرجع لو لا كلها التمت علينه واذا رجع شلون نخبره بكل هل مصايب
ام عباس : اااخ يمه عباس اخ
ساره : طلعوني ما ارد ابقه
حسين : ساعتين ونطلع ارتاحي شويه
ساره : يا راحه هاي هه
( لزمت بطني وبجيت عمت عيني عليك يمه متت وما شفتك جا شوكت الله يقر عيني بطفل يصبرني على المصايب )
.....................
كرار : سميتي محمد ؟
وديان : اي
كرار : ربي يحفظه ويتربه بدلالكم أنتِ وعمه
وديان : اي
كرار : شبيج
وديان : ردت اروح وياهم للنجف
كرار : وضعج تعبان وابنج صغير
وديان : مو كلهن راحن
كرار : هنا حوامل يختلفن أنتِ توج ولدتي
وديان : ما شفتهم ولا ودعتهم ولا شفت قبورهم ولا دفنتهم
كرار : احسن لان ما راح تنسين شكلهم
وديان : ليش شبيهم ؟
كرار : ما بيهم شي
وديان : اديان وين ؟
كرار : يم زهراء
وديان : راح نروح يمهن صح ؟
كرار : بالاول نشوف محمد الصغير شبي بعدين نروحلهن
وديان : شوكت نوصل
كرار : هاي وصلنا
وديان :( صف السياره ونزلنا القسم الاطفال أخذه من ايدي يفتر بي وأنا بس امشي وراه كلشي ما مفتهمه افتر راسي لزمت الحايط وتقرب كرار كال )
كرار : كعدي هنا
وديان : لا وياكم
كرار : تعاي نشوف الدكتور هنا اخر شي
وديان :( اخذوله تحاليل قراهن الدكتور وكال ما بي شي فحصه بس بلعومه ملتهب وبطنه كذالك وعده حراره شويه انطانه علاج وكتبله حليب لأن حليبي اذاه بسبب الحركه وطلب انومه بالمستشفى يوم واحد يتأكدون من حالته وكرار حجزله غرفه خاصه خاف عليه بقه بيده ورحنا نشوف البنات اول ما دخلت شمرت نفسي بحضن اديان وانفجرت بالبجي الحد ما اغمى عليه بدون وعي وفزيت على قطرات ماي بارد كمت روحي رايحه ادور على حمودي اديان شايلته اخذته منها ابوس بي وهوا نايم مثل الملاك )
زهراء : وديان
وديان :( رفعت راسي اباوعلها عيونها مليانه دموع همست )
... ها
زهراء : أنتِ زينه ؟
وديان : لا حمودي مريض ولازم نبات هنا الليله
زهراء : يا حمودي ؟
وديان : ابني
زهراء : سميتي
وديان : اي محمد
زهراء : فدوه شو أشوفه
وديان :( انطيته الها شمته شم وبجت كتلها )
... أنتِ شلونج ؟ ابنج ؟ وينه ؟
زهراء : اجه قبل وقته وبالخدج ما شايفته ولا شايلته
وديان : سوده عليه
زهراء : سميته علي بلكت يصبرنه على فراك وحيدنه
وديان :( بجينه ومسحت دموعي واخذت حمودي وطلعت الغرفتنه نبات هنا اليوم زهراء ما تعرف بعمه ماتت إذا تعرف تموت نفسها عمه امنه كلنا وكلنا نحبها ثاني يوم رحت يم زهراء واديان واجت امي تشوفنه وسولفتلنه على ساره لطمت لطم وطلعت ارد اشوفها صار الخدج كبالي دخلت شفت علي يجنن وكلش صغير طلعت من الخدج انا واديان نشوف ساره بس شافتنه شهكت وضمت وجها بديها تبجي حضنتها أهديها انا واديان وكعدنا نسولف وياها سألت على محمد راح كرار جابه واجه حضنته تبوس بي كتلها )
... هسه يكبر حمودي ويصيحلجن كلجن مامي
ساره : فدوه يجنن
وديان : شوكت تطلعن ؟
ام عباس : هسه راح حسين يكمل اوراق الخروج
وديان : نطلع وياكم
ام عباس : اديان تبقين يم زهراء لو تعبتي
اديان : لا ما عدي شي
ام عباس : خوش
( رجعنا حسين للبيت نومت ساره بغرفتها ورحت الفاطمه وريتاج ما يحجن وياي دزيت على فضل ربع ساعه وأجاني ملابسه كلهن تراب وشعره مهوس حضنته وبست صدره وكتله يدنك رتبت شعره وكتله )
... شلونك يبعد امك
فضل : مالي لون
ام عباس : يمه حبيبي مرت اخوك سقطت
فضل : ياهيا ؟
ام عباس : ساره هاي المره الثانيه تسقط حملها وهيا كوه حملت عمت عيني اخوك لو يدري شيصير بحاله
فضل : سهله يمه راحولنه زلم ننقهر على جاهل ؟
ام عباس : يمه هاي روح كلت بلكت يجي ويصبر اخوك بس الله ما قاسمه
فضل : الحمدلله على كل حال
ام عباس : يمه فضل مرتك ومرت اخوك لا اكل ولا شرب بس بجي ولطم ومن احجي وياهن ما يحجن ومرتك بس تصيح حبيبي احنا فقدنا زين وابن عباس مالنا حيل فراك بعد يا بعد امك حاجيهن بلكت يسمعن منك
فضل : هنا وينهن
ام عباس : جوه
فضل : سويلي مجال بس اشوف شهم واجي
ام عباس : عمت عيني عليه شكد مشتاقتله
فضل : انا هم هامله وهوا ما متعود على الإهمال خايف يتمرض
ام عباس : اسم الله عليه من المرض يمه
فضل :( رحت البيتنا ميرا كاعده تلعب بيهم هوا وأمجد وهما يسألونها اسأله اجوبتها صعبه وتتلاشي اسألتهم كوه كعدت بالكاع وفتحت اديه وهمست )
... ياهو يسبق الحضني
شهم : بابااااا
فضل : روح ابوك شلونك شهمي ؟
شهم : زعلان محد اكو كلكم اختفيتو وماما ماكو انا مشتاقلكم
فضل : واحنا مشتاقيلك يا روح ابوك
( باوعت الامجد مدنك وكاعد بالركن صحت )
... مجد حبيبي مجد تعال
امجد : ها
فضل : منو وياك
امجد : محد
فضل : احجي لا تجذب
ميرا : صار ساعتين كاعد وحده وميقبل يكول شبي
فضل : سولفلي ياهو اذاك
امجد : بس لتكول
فضل : ما أكول
امجد : مشتاق البابا حيل ومساعه شفته ركضت احضنه ودفعني وصاح بيه كدام الكل زعلني حيل
فضل : حقك حبيبي بس بابا تعبان بسبب الصار
امجد : بس مو بسببي اني معليه بس حضنته
فضل : ميخالف حبيبي اكيد مو قصده
امجد : اول مره يصيح عليه
فضل : اعتذر بمكانه
امجد : مو ذنبك هوا الغلط
فضل : صح بس انا ويا واحد
امجد : هى
شهم : بابا انا هم زعلان كلي اسف
فضل : اسف اعرف مقصر وياك تحملني حبيبي
شهم : خوش بس شويه مو هواي اتحملك واليوم نومني
فضل : من عيوني بس اشوف ماما واجي
شهم : ماما ما تحبني
فضل : لا شلون ما تحبك شلون تحجي هيج يا حبيبي
شهم : هيا مثل عمو امير بس اروح يمها تبجي وتصيح ما تقبل ابوثها
فضل : ميخالف ابويه امك تعبانه
شهم : بسبب داده ؟
فضل : تقريباً
شهم : هففففف ما احبهم
فضل : لا شهمي ما يصير تحجي هيج ذول اخوتك عزوتك سندك بهل دنيه من توكع محد يوكفلك غيرهم حبيبي
شهم : يعني احبهم ؟
فضل : اي حبهم مثل ما انا احب عمامك ويله بوسني بوستين وحده الي وحده آلامك
شهم : عادي ؟
فضل : اي عادي
( تقرب باسني حيل بسته وكتله )
... ابويه لا تعب عمتك اروح ومن افرغ اجيك متفقين
شهم : اي بابا
فضل : عيوني
شهم : شوكت يجون من السمه صار هواي هما هناك
امجد : صح صار هواي وليش ما اخذو بابا وانتَ وعمو ايليا ؟ مو اصدقاء واخوان
شهم : هسه عمو زي يجيبلي غيمه لأن احبها صح بابا
فضل :( غمضت عيوني بقهر من اسألتهم وكتلهم )
...ما راح يرجعون
امجد : ليش ؟؟
فضل : اليروح للسمه ما يرجع
شهم : وإذا نشتاقلهم ؟
فضل : نصبر روحنه بالصور
شهم : هفففف
فضل :( بسته براسه وباوعت الميرا وصيتها عليهم وطلعت اشوف البنات سوتلي امي مجال دخلت الفاطمه كاعده مكسوره خاطر ودموعها على خدها ابتسمت بوجها وكعدت كبالها )
... شلونج ؟
( حركت عيونها ممتنه كتلها )
... الحمدلله الطفل شلونه ؟
( لزمت بطنها وهزت رأسها زين دنكت وكتلها )
... يتحرك ؟
( هزت راسها ب اي )
... الحمدلله انتبهيله ولا تعبين نفسج الخاطره فاطمه اخذج الدكتور ليش ما تحجين صوتج وين ؟
( حركت جتافها ب ما اعرف ابتسمت بحزن وكتلها )
... اخذج هسه للدكتور
( هزت راسها ب لا هزيت راسي متفهم وكتلها )
... براحتج يمه
ام عباس : ها حبيبي
فضل : جيبيلها شي تأكله
ام عباس : ما تقبل شلعت گلبي
فضل : الخاطر البطنها راح تاكل اذا تحب زين راح تاكل
ام عباس : تأكلين يمه ؟
فضل :( هزت راسها ب اي وهيا تبجي طلعت منها اروح الريتا لكيتها بغرفه صكر حاضنه صورته وتبجي كعدت بصفها وخليت ايدي على بطنها )
... يتحركون ؟
... مو احجي وياج ريتا ليش من خليت ايدي ما اتحركو
... ليش ما تجاوبين
ريتاج : ما ادري
فضل : شني ما تدرين
ريتاج : يعني ما ادري
فضل : ريتا لا تخبليني بس فهميني تحسين بيهم
ريتاج : ما احس بشي
فضل : بس كليلي يتحركون
ريتاج : ما ادري فضل ما ادري ما اتذكر
فضل : يعني ناسيتهم يعني ما يتحركون
ريتاج : اي ما احس بحركتهم بس ثكال
فضل : شلون ما تحسين بحركتهم ريتاج كومي
ريتاج : كلشي ما احس ما اتذكر شي غير عيون اخوي
فضل : كوميييي ريتا
ريتاج : ما اطلع منا وخررررر مني
فضل :( شلتها وهيا تصرخ خليتها بالسياره وطلعت للمستشفى اول ما وصلنا دخلوها عمليات لأن وضعهم مو زين ومخلص الماي مدري شني بقيت اروح واجي كبال باب العمليه حسيت احد لزم جتفي باوعتله وصحت )
... وضعهم مو زين من اسبوع هما ما يتحركون خايف كرار ولدي يموتون شيضل عدي
كرار : خل املك بالله جبير
فضل : والنعم بالله
اديان :( عفت زهراء ورحت يمهم انتضر ريتاج تطلع من العمليات تاخرت حيل زهراء بقت هنا لان وضع البيت ما يسمح بوضعها هذا والحد الان ما تدري بعمه ماتت طلعت الدكتوره مبتسمه وبشرتنه انولدو قمرين العائلتنه ما اهتم فضل بقه يسأل على ريتاج وطمنتنه عليها طلعوها للغرفه وهيا تبجي وبعدها بالبنج كلامها أكثره ما مفهوم شويه وجابو التوم خلو واحد بحضني والثاني بحضن كرار بقيت اباوعلهم سبحان الخالقهم يخبلون تمنيت كلكم تجون بضروف احسن من هل ضروف يا حبيبيني صحت ريتاج من البنج وما نطقت كلمه تقربت منها وهمست )
... يخبلون شني راح تسمينهم
ريتاج : شعليه
اديان : غير امهم
ريتاج : بكيفكم معليه ذاك ابوهم يسميهم
اديان : براحتج فضل حبيبي شتسميهم ؟
فضل : مو مهم اي شي
اديان : شني مو مهم فضل ذول ولدك
فضل : اي شي سموهم اي اسم عدكم مو مهم
اديان : اوف منكم
كرار : لازم تختارون بعدين تتندمون
ريتاج : ما راح نتندم على شي واخذوهم الكم ما اريدهم شتسمونهم سموهم حتى لو موت عذاب قهر اي شي بي وجع واذيه
اديان : استغفر الله شني رائيكم نسمي مثل ما رادو زين وصكر
ريتاج : ليش شرادو ؟؟؟؟؟
اديان : مو قبل كالو نسميهم سهم ورمح ؟ نسميهم ؟
ريتاج : اي اي سموهم مثل ما رادو
اديان : مو جان ما عاجب فضل
فضل : لا شني ما عاجبني غصباً عليه عاجبني هاهيا سهم ورمح مثل ما رادو
ريتاج : اي عفيه هيج سموهم لا تخلون شي بنفسهم
كرار : تدللون
اديان :( عفنا الاطفال يمهم وطلعنا سوينه البيان الاول باسم سهم والثاني رمح وصارو عدنا التوم الحلو الجبير سهم والصغير رمح سبحان الخالقهم نفس الشكل يخبلوم ورويتا مجهزتهم نفس اللبس ما فرقنا بينهم اله سجلنا الاسماء على اديهم بس سوده عليه محد طايقهم لا امهم ولا ابوهم ومحد شالهم منهم توسلت بريتا ترضعهم ما قبلت وكرار اشترالهم حليب وبقيت اركض بينهم وبين زهراء تبهذلت محد الهم غيري هنا كلها مكسوره عمت عيني عليهم انا كرار وياي واكف وكفه ما عافني لحضه حتى ما خلاني انفرد بنفسي وابجي إذا احتاج ابجي ابجي بحضنه وارتاح )
.....................
... منو المااااات احجي وياكم منوووووو المات جاوبوني ولكم ياهو المات ؟؟؟؟؟
.....................
يتبــع ... 🦅
للتـواصل انستا
كــوثـر الـ جـاســم 🖋🖤