@Paris France
Jungkook បោះជំហានមករកឡានវិញឯអង្គរក្សក៏ដើរតាមពីក្រោយជាប់ជានិច្ច។ នាយដើរចូលទៅអង្គុយក្នុងឡានទី ២ ដែលបានបើកទ្វារចំហររង់ចាំនាយរួចជាស្រេច បន្ទាប់មកអង្គរក្សក៏បានទាញទ្វារបិទពេល Jungkook ចូលដល់ក្នុងឡានទើបឡានចេញដំណើរទៅកាន់ច្រកយន្តហោះ VIP តែម្ដង។
ឡានធ្វើដំណើរមកដល់ចំណតយន្តហោះត្រឹមប៉ុន្មាននាទី ឯអ្នកដែលនៅរង់ចាំទទួលនៅទីនេះក៏ដើរមកបើកទ្វារឡានឲ្យលោកម្ចាស់តូចរបស់ពួកគេដើម្បីធ្វើដំណើរចូលទៅកាន់ខាងក្នុងយន្តហោះ។ Jungkook ទាញវែនតាខ្មៅមកពាក់ដើម្បីបិទបាំងទឹកមុខតានតឹងរបស់នាយ និងដកដង្ហើមធំព្រូសចោលមួយខ្យល់ទើបធ្វើដំណើរដើរទៅរកមាត់ច្រកឡើងទៅកាន់ផ្ទៃខាងក្នុង។
« រួចរាល់អស់ហើយលោកម្ចាស់តូច ដូច្នេះយន្តហោះនឹងចេញដំណើរនាពេលឥឡូវនេះ » អ្នកបើកបរយន្តហោះផ្ទាល់ខ្លួនរបស់គ្រួសារ Jeon ក៏បានផ្ដល់ដំណឹងឲ្យ Jungkook បានដឹងជាមុន មុននឹងយន្តហោះក៏ចាប់ផ្ដើមដំណើរការម៉ាស៊ីនដើម្បីត្រៀមត្រឡប់ទៅកាន់ទីក្រុង សេអ៊ូល ប្រទេសកូរ៉េខាងត្បូង វិញ។
@Seoul South Korea
ព្រឹកព្រលឹមស្រាងៗនាម៉ោង ៥:០០ នាទី ផ្ទៃមេឃចាប់ផ្ដើមជះពន្លឺម្ដងបន្តិចៗឯបរិយាកាសក៏ត្រជាក់រហឹមធ្វើឲ្យការគេងកាន់តែស្កប់ស្កល់ជាងពេលណាៗទាំងអស់។ Taehyung កម្រើកត្របកភ្នែកស្ដើងមុននឹងបើកវាឡើងម្ដងបន្តិចៗដើម្បីទទួលយកពន្លឺថ្ងៃថ្មី។ ថ្ងៃនេះគេក្រោកលឿនខុសពីធម្មតាព្រោះមានអារម្មណ៍ថាគេងបានស្កប់ជាងមុនទើបធ្វើឲ្យគេរហ័សភ្ញាក់ទាំងប្រលឹមទាំងដែលមនុស្សមួយចំនួនកំពុងនៅសម្រាកនៅឡើយ។ រាងតូចសម្លឹងចេញទៅកាន់មាត់បង្អួចបន្តិចរួចក៏ប្រាស់ខ្លួនយឺតៗដើម្បីក្រោកអង្គុយនិងបានយកដៃមកទ្រពោះរបស់ខ្លួនឯងផងដែរ។
« Appa ចង់ឃើញមុខរបស់កូនខ្លាំងណាស់ » Taehyung ប៉ះពោះខ្លួនឯងនិយាយតិចៗទាំងញញឹម
« បងក៏ចង់ឃើញមុខរបស់កូនដូចគ្នា » ខណៈនោះសម្លេងមួយក៏បានបន្លឺឡើងនៅចំពោះមុខហើយវាគឺជាសម្លេងដែល Taehyung នឹកអើយសែននឹក គ្រាន់តែបានឮភ្លាមក៏ដឹងច្បាស់ថានរណាជាម្ចាស់សម្លេងនោះដែរទើបគេក៏រហ័សងើយមុខឡើងទៅសម្លឹងរាងខ្ពស់សង្ហាដែលកំពុងឈរនៅចំពោះមុខរបស់គេ។
« ខ្ញុំយល់សប្តិមែនទេ? » Taehyung សួរខ្លួនឯងតិចៗទាំងរលីងរលោងចង់យំបន្ទាប់ពីបានឃើញវត្តមានរបស់ Jungkook នៅនឹងមុខរបស់គេ ប៉ុន្តែគេមានអារម្មណ៍ថាដូចជាកំពុងតែយល់សុបិ្តអញ្ចឹងដូចមិនមែនជាការពិតនោះទេ។
« មិនមែនយល់សប្តិទេ baby! បងត្រឡប់មកវិញហើយ » Jungkook បន្ទន់ជង្គង់អង្គុយចុះទល់មុខ Taehyung និងទាញដៃគេទាំងសងខាងយកមកកាន់
« បងត្រឡប់មកវិញពិតមែន » Taehyung ស្ទាបអង្អែលដៃរាងក្រាសដើម្បីបញ្ជាក់ឲ្យបានដឹងថាគេមិនបានយល់សប្តិអ្វីនោះប៉ុន្តែវាគឺជាការពិត គេកំពុងស្ទាបដៃរបស់មនុស្សមិនមែននៅក្នុងយល់សប្តិឡើយ។
Taehyung ក៏ស្ទុះលើកដៃទៅឱបក្រសោប.ក Jungkook ឯទឹកភ្នែកក៏ចាប់ផ្ដើមហូរតក់ៗឥតដាច់ ដឹងទេថាគេនឹកនាយកម្រិតណា ទើបតែបាត់មុខគ្នាមិនដល់ ៣ ថ្ងៃស្រួលបួលផង Taehyung នឹកគេសឹងស្លាប់ទៅហើយចុះទម្រាំតែបាត់មុខគ្នារហូតវិញនោះ? តើ Taehyung នឹងទៅជាយ៉ាងណា?
« បងនឹកអូនណាស់ kitten! » Jungkook លើកដៃបំបោលអង្អែលខ្នងរាងតូចទៅមកលួងលោមឲ្យគេស្ងប់ក្នុងចិត្តដើម្បីកុំឲ្យគេយំ ប៉ុន្តែមនុស្សពពោះបែបនេះឆាប់យំខ្លាំងណាស់ហើយយំច្រើនទៀតផង។
« អូនក៏នឹកបងដូចគ្នា! នេះបងមកដល់តាំងពីពេលណាម៉េចក៏អូនមិនដឹង? ហេតុអីបងមិនផ្ដល់ដំណឹងប្រាប់អូនមុនផង? » Taehyung លែងរាងក្រាសចេញពីការឱបដើម្បីសួរនាំនាយឲ្យបានដឹងថានាយមកដល់កូរ៉េតាំងពីពេលណាមក? ហើយចូលមកក្នុងបន្ទប់តាំងពីពេលណាហេតុអីក៏គេមិនដឹងអញ្ចឹង?
« បងមកដល់មុនអូនភ្ញាក់បន្តិចព្រោះជើងហោះហើរ VIP ទើបមកដល់លឿនបែបនេះ! ចូលមកក៏ឃើញថាអូននៅគេងនៅឡើយទើបមិនចង់រំខានដំណេករបស់អូននិងកូនហ្នឹងណា » Jungkook លើកដៃទាំងសងខាងទៅក្រសោបថ្ពាល់របស់រាងតូចនិងញញឹមដាក់គេធ្វើឲ្យនាយល្អិតសម្លឹងមុខរបស់នាយភ្លឹសៗ។ ដោយក្នក់ក្នាញ់នឹងទឹកមុខរបស់គេខ្លាំងពេក Jungkook ក៏ឆ្មក់ទៅថើបបបូរមាត់របស់រាងតូចមួយខ្សឺតធ្វើឲ្យ Taehyung អៀនក្វាច់ថ្ពាល់ក៏ចាប់ផ្ដើមឡើងក្រហមព្រឿងៗធ្វើឲ្យរាងក្រាសកត់សម្គាល់ដឹងភ្លាមតែម្ដង។
« mommy អៀនបងមែនទេហ្នឹង? » Jungkook ញញឹមខ្ជឹបព្រោះបានញ៉ោះរាងតូចឲ្យអៀននឹងនាយទាំងព្រលឹម។
« គ្មានទេ » Taehyung គេចមុខចេញពីរាងក្រាសញញឹមអឹមអៀនពេលដែលទទួលបានស្នាមថើបពីមនុស្សជាទីស្រលាញ់របស់គេម្ដងទៀតបន្ទាប់ពីបាត់មុខរបស់នាយទៅអស់រយៈពេលជិត ៣ ថ្ងៃមកនេះ។
« អូនចង់ងូតទឹកទេបងរៀបចំឲ្យ »
« មិនអីទេណា បងសម្រាកទៅអូនអាចធ្វើខ្លួនឯងបាន ព្រោះបងទើបតែមកពីឆ្ងាយហត់ផងអញ្ចឹងសម្រាកបន្តិចសិនទៅ » Taehyung ប្រកែកភ្លាមៗព្រោះមិនចង់ឲ្យរាងក្រាសមកលំបាកដោយសារតែគេ នាយទើបតែមកដល់ហើយមិនទាន់បានសម្រាកនោះទេនៅមានមុខចង់មកជួយរៀបចំទឹកឲ្យគេងូតថែមទៀត។
« បងគេងលើយន្តហោះរួចហើយអញ្ចឹងចាំបងរៀបចំបើកទឹកដាក់អាងត្រៀមឲ្យអូន okay ណា mommy? » Jungkook លើកដៃធ្វើសញ្ញា ok និងព្រិចភ្នែកម្ខាងដាក់រាងតូចមុននឹងក្រោកចេញទៅរៀបចំទឹកសម្រាប់ឲ្យ Taehyung ងូតឯរាងតូចឃើញបែបនេះក៏លួចអស់សំណើចនឹងរាងក្រាសហើយក៏មានអារម្មណ៍ថាចម្លែកក្នុងចិត្តបន្តិចបន្តួចផងដែរ ដែលសុខៗ Jungkook ក៏ចេះលេងសើចច្រើនជាងមុនហើយថែមទាំងពូកែនិយាយស្ដីឲ្យគេញញឹមនិងថែមទាំងចេះលេងពាក្យខ្ជីខ្ជូតទៀតផង។
បន្តិចក្រោយមក Jungkook ក៏ត្រឡប់មករករាងតូចវិញដើម្បីនាំគេទៅកាន់បន្ទប់ទឹកតែមុននឹងទៅគឺត្រូវផ្លាស់ប្ដូរឈុតនិងត្រៀមឈុតថ្មីទុកជាមុនសិន។
« បងចង់ធ្វើអី? » Taehyung ធ្វើទឹកមុខឆ្ងល់ពេលរាងក្រាសទាញបូមកពាក់ឲ្យគេដើម្បីលើកសក់ឡើងឲ្យផុតពីផ្ទៃមុខដើម្បីកុំឲ្យទើសទាល់ បន្ទាប់មកក៏ចាប់ផ្ដើមចាត់ការទៅលើសម្លៀកបំពាក់របស់គេម្ដង។
« មិនបាច់អៀនទេ ព្រោះបងដឹងថារាល់ដងវាគឺជាតួនាទីរបស់អ្នកម៉ាក់របស់អូន ប៉ុន្តែថ្ងៃនេះបងចង់ជំនួសការងាររបស់គាត់មួយថ្ងៃមកធ្វើជាស្វាមីល្អនោះអី » Jungkook ប្រឡេះលេវអាវធំរលុងៗដែលវែងគ្របដណ្ដប់ដល់ក្បាលជង្គង់របស់គេចេញដើម្បីនាំគេទៅងូតទឹកសម្អាតខ្លួន។ Taehyung ក៏លើកដៃម្ខាងមកបិទបាំងដើមទ្រូងដែលឡើងធំដោយសារការមាន baby របស់គេលើកដំបូងទើបធ្វើឲ្យគេអៀននិងមិនទម្លាប់ឲ្យរាងក្រាសមកធ្វើបែបនេះជាមួយ ព្រោះរាល់ដងអ្នកមីង Yun និងអ្នកម៉ាក់របស់គេជាអ្នករៀបចំឲ្យគេហើយគាត់ជាមនុស្សស្រីជាម្ដាយឆ្លងកាត់មុនគេផងទើបគេមិនសូវអៀន ប៉ុន្តែលើកនេះស្វាមីរបស់គេជាអ្នកសុំអនុញ្ញាតជំនួសការងារមួយនេះធ្វើឲ្យគេមិនទម្លាប់និងអៀនខ្មាស់រាងក្រាសតិចៗផងដែរ។
« រួចរាល់ហើយ » បន្ទាប់ពីជួយរាងតូចប្ដូរឈុតចាស់ចេញហើយ Jungkook ក៏ទាញអាវឃ្លុំដែលមានទំហំធំជាងគេយកមកពាក់ឲ្យរាងតូចបិទបាំងជាមុនសិនទើបនាយនាំដំណើរគេមួយៗទៅកាន់បន្ទប់ទឹក។
Jungkook ចាប់ផ្ដើមទាញអាវឃ្លុំរាងតូចទម្លាក់ចុះរួចលើកបីគេដាក់ចូលក្នុងអាងតែម្ដងដោយដាក់គេចុះយឺតៗនិងថ្នមៗជាទីបំផុត។ រាល់ដងបានមីង Yun និងអ្នកម៉ាក់របស់គេកាន់ដៃគេទាំងសងខាងឲ្យគេបោះជំហានជើងចូលក្នុងអាងទឹកដោយខ្លួនឯង ប៉ុន្តែលើកនេះរាងក្រាសក៏បានលើកបីគេដាក់ចូលក្នុងអាងយកតែម្ដងដោយមិនខ្វល់ថាគេធ្ងន់កម្រិតណាក៏ដោយក៏នាយនៅតែអាចលើកបីគេបានដែរ។
« ត្រូវការអីខ្លះទៅ? » Jungkook ងាកឆ្វេងងាកស្ដាំរកមើលរបស់ដែលត្រូវយកមកប្រើប្រាសសម្រាប់រាងតូចធ្វើឲ្យនាយល្អិតលួចអស់សំណើចនឹងនាយ។ ខ្លួនមិនចេះមិនដឹងទេតែខំណាស់ចចេសចង់ងូតទឹកឲ្យគេទាំងមិនដឹងថាគួរយកអ្វីខ្លះមកក្នុងខណៈពេលនេះ។
« អូនប្រាប់ហើយមិនជឿទេថាឲ្យបងសម្រាកទៅអូនអាចធ្វើខ្លួនឯងបាន » Taehyung និយាយទាំងអស់សំណើចតិចៗឯរាងក្រាសក៏ធ្វើមុខមើលមិនយល់ដាក់នាយល្អិតដែលកំពុងអង្គុយរង់ចាំក្នុងអាងទឹក។
« បងចង់ធ្វើវាអូនចង់យ៉ាងម៉េច? » Jungkook តបទាំងទឹកមុខក្រម៉ូវតែបែបលេងសើចកាន់តែធ្វើឲ្យ Taehyung អស់សំណើចថែមមួយកម្រិតទៀតហើយ។
« អូខេអូខេធ្វើទៅអូនឈប់ឃាត់ហើយ » Taehyung ក៏អង្គុយស្ងៀមហួសចិត្តនឹងរាងក្រាសដែលរឹងរូសចង់ងូតទឹកឲ្យគេ។
Jungkook ចាប់ផ្ដើមស្រោចទឹកទៅលលស្បែកម៉ដ្ឋរលោងរបស់រាងតូចមុននឹងចាក់សាប៊ូសម្រាប់អ្នកមាន baby ដុះខាត់ទៅលើស្បែកទន់រលោងរបស់គេយ៉ាងស្រាលៗព្រោះខ្លាចកកិតខូចស្បែករបស់គេ។ នាយលើកបាតដៃដុះនៅលើខ្នងរាងតូចទៅមកមួយសន្ទុះ ទើបចាក់ទឹកលាងសម្អាតសាប៊ូចេញ។
« Tae! »
« ហឹម? »
« បងចង់នាំអូនទៅជួបម្ចាស់តា » គ្រាន់តែឮបែបនេះ Taehyung ក៏ប្រាស់ខ្លួនបន្តិចរួចបែរទៅសម្លឹងមុខរាងក្រាសភ្លឹសៗទាំងឆ្ងល់និងចង់ដឹង។
« បងថាម៉េច? »
« ម្ចាស់តាចង់ជួបមុខអូន »
To be continued.......
*****
Comment please:(