ألرقطاء وكراتها الثلاث🐍
اللـدغة الثامنة والثلاثين🐍
بقلم كهرمانة🐍
__________________
مسك:-تقربت بخطواتي ضحكت على منظر خوله صفقت بأيدي وأني أتكلم
-لك شنوو هاي الأناقه فديت هالشعر الأصفر يابه گالو ضيوف عدنا بس ماتوقعت ط*** البلبل شعرچ ههههههاااااي ،شبيچ صفنتي خاله ، حچت وهيه تشدد بكلامها وتحچي بعصبية
خوله:- إنتِ خيزران مو؟؟
مسك:-لا حجيه ألضاهر عمرچ ضرب على عقلچ أني بنتها مسك
-تقدمت بخطواتي عليه صرت قريبه من عدها ضيقت عيوني وهمستلها بفحيح
-ليش أجيتي بعد ما تدمرت عائلتين بسببچ ، وبسببچ هَـم بابا تزوج أمي ماگدرتي تگرصين دودتج لو تعودتي كل ثلاث أو أربع سنين رجال جديد وبيئة جديده دمارنا كله من وراچ
خوله:-احترمي نفسج ، صدگ الخلف مامات نفس أمج ماكو اي تغير حتى نفس الصوت
مسك:-لاحبيبتي إللي گدامج شويه أخطر، افعى اللي يغثها بكلمة سمها يمشي بشرايينه رقطاء أخطر وأخبث أنواع الأفاعي أخذي حذرچ من عندي ،بلعت ريگها بإرتباك وتكلمت بلعثمه
خوله:-أصلًا اجيت أدور على بنتي أللي أمنتها يم عمامچ الحثالة كـ*** مودينها لدار الأيتام وما أعرف وين صفى بيها الزمان
مسك:-وأنتِ من تدرين ذوله كـ*** ليش أمنتي بنتچ يمهم لو زوجچ الجديد ما يتحملها ، بعدين ليش موديتيها ال ابوه عمامي شعليهم قابل عمامها
هرم "بكذب":-مسك بس خليني أگُـلچ فـدد شـيي
خوله:-اختج اتصير حبيبتي عبالي عدهم غيرة على عرضهم مثل الصدگ بَــس طلعوا بوخه
مسك:-رفعت حاجبي وتصنعت الصدمة بشكلي وگلتلها
-أخت شِــنو شدتحچي هــاي خالة إنتِ خرفتي نعرف بيچ چنتي عشيقة بابا الخمطت أملاكه وشردت
خوله:-مااا أسمحلچ تنعتيني بـ ألعشيقة أني زوجته لأبوچ چنت وخلفت من عنده بنيه
مسك:-أيــع
هرم:-خوله لو بيدها تخنگ مسك بَــس خايفه منها وديالا كاتمة ضحكتها ع ساعة تنفجر بالضحك وأم موسى المره مستغربه هسه تگول بينها وبين روحها شجابني شورطني على هيچ عائلة مسك تكتفت گدام خوله وگالتلها
-اي وهسه شِــنو ؟
خوله :-أريد بـِـنتي
-رنده إبتعدت كم خطوه ليوره أنظارها متوجهه لأمها ودموعها تنزل عافتنا وراحت تمشي مهروله لغرفتها دخلت ورگعت الباب
رفيف:-يَـعنـي مع إحترامي إلچ خالة إنتِ صدُگ متستحين هــا مو هَـم بنتچ حسسيها بالأمومة ع الأقل كلمه حِـلوه لو أني من رنده چان تبريت منچ
-مسك هزت راسها بنفاذ صبر ماعجبها كلام رفيف عافتنا وراحت للغرفه اللي گاعده بيها رنده وديالا وراها رفيف گعدت على صفحه وتخزر بـ خوله ومعاجبها وجودها بيناتنا تباوعلها بقرف
أني عفتهم ودخلت للغرفة مالتي طلعت تليفوني وسويت روحي أبچي شفت دموعي نزلوا فتحت تليفوني وأتصلت بـ بـَحـر اول مافتح خط عطت وحچيت بنبرة مهزوزه تدل عالبچي
- بـَحـر تعــال انـي بـعـد ما أتـحـمـل
-أردف بخوف وصوت الموضفين يمه أعلى من صوته
-شبيچ حبيبتي حوريتي إهرامي ليش تبچين ياروحي ياگلبي
لا تبچين تحرگني دموعچ يبوو
هرم:-زدت بالبچي من سمعته شلون يحچي بحنية أشتغلت عندي المشاعر
-شوف أمك تعيط عليه أخـخ گلبي
-سكت بـس صوت رياجيل يمه رجعت گلتله
-هااا متصدگني مو خوش أني رايحه أعوفك ويه أم شعر الأصفررر ، سديته قبل لا يحچي أنفتح باب الغرفة مسحت دموعي الچذبيه وأبتسمت بخبث باوعت لمسك وهيَ تسد الباب وراها والقلق مبين عليها
-شبيچ شو تبچين بَــس لاا خوله سمعتچ كلمه زايده أروح ادوس ببطنها
هرم:-مسحت خشمي وكتله ضحكت وسط دموعي
-يمعوده هاي دموع چذبيه خابرته گلتله أمك تعيط عليه شو سكت
مسك:-اي ؟
هرم:-سديته بوجهه
مسك:-غبيه إنتِ بهاي تصرفاتچ تخسرين بـَحـر ترى ، هسه أكسبي لصالحچ يفيدنا عود كم يوم ونگله بيباي ألله وياك بحوري
هرم:-باعي هوَ أللي يخسر تأكدي اني ما اخسر ،حچت وهيَ ترص على أسنانها
مسك:-الصبر ياربِ الصبرك ولچ أنتِ ثوله رسمي ندري بيچ عمله نادرة وماكو منچ بس مو هسه المطلوب منچ تكسبيه ورقه رابحه لجانبچ بعدين تعوفينه بحال سبيله ، المهم هسه أختنا المجهوله وين تلگاها خوله
هرم:-حسب ماگال بحر شمرتها بدار ألايتام وهسه جاي تتهم عمامي لأن من تعبر سن الـبلوغ يطلعونها تشتغل لو تبقى تخدم بالدار ، وعمامي مساعدينها علمود تدخلها دار أيتام ولچ مسك هذا بـَحـر سولفلي شغلات عقلي مايستوعبها
مسك:-اي شِــنو سولفلچ بـَحـر ، بدأت هرم تحچيلي عن الماضي إنصدمت شـلون عمي اللي راح بلغ على بابا وانقتل بسببه شِــنو هااحقد
هرم:-شوفي راح أگلچ بعد شـيي
مسك:-دخيلچ بقيتي شـيي ماحچيتي غردي بله
هرم:-عمي مجيد وأم شعر كركمي وعزرائيل امنا ماكـو بگلبهم ذرة رحم عكسنا احنا عدنا رحمايه شويه
مسك:-ضحكت وأني أضربها على كتفها
-والله عليچ سوالف أني راح أگوم عمي كنان خابرني ومبين من نبرته ماله خلگ وضايج ماعرف شِــنو السبب راح يجي ياخذنا أني وديالا للبيت عود أحاول أفهم شصايـر
وأنتِ صيري عاقله وبحر لاتقصرين وياه وكلشي يطلبه من عندچ سوي أفهمي تَـمام وإذا على موضوع أمه أكيد ماراح يخليها تبقى هنا مايحتاج أوصي هالله هالله ببحر يحبچ وهواي أله مواقف رخي الحبل عليه حاولي تنسين الماضي واللي سواه
هرم:-أي عود ميخالف ، حچيتها وتذكرت الماضي كل ما أتذكر اللي سواه أحقد عليه بس وگفاته ويايه أني وخواتي ومساعدته إلي وكلامه اللي مثل الضماد لجروحي يخليني أنسى ،مروا كم ساعة وسمعت صوت بـَحـر يصيحلي طلعت من الغرفة وأني أتمايل بمشيتي دخلت للصالة شفت أمه گاعده وأيدها على خدها
وهو من شافني باوعلي بحذر عباله راح اعوفه واروح ، أمه بچت وضلت تشكي وتسوي روحها فقيره مسح وجهه بنفاذ صبر
وأني من شفتها تبچي هَـم عصرت روحي ونزلت دموع التماسيح مدافعه عن نفسي
-بحرر تدري بيه أني هــاي الفتره تعبانه ومالي خلگ أتناگر ويه شخص روحي مطايقتها مو فوگاها ماعندي شغلة وعمله أتمشكل ويه خوله هـيَ اللي تتعرضلي وأني هْوايَــه كتمت وغلست لخاطرك
خوله:-له له له شهالچذب ياهرم
هرم:-اي طلعيني چذابه
بـَحـر:-هرم حبيبي لتبچين مصدگچ
هرم:-أمه نفخت بغضب وطلعت من الصالة مسحت دموعي بـَحـر راح للغرفة يحضرله ملابس ويبدل
أندگ الباب مال البيت باوعت للكاميرات شفته كنان واگف بالباب وأم موسى طلعتله فتحتله الباب دخل للبيت مبين من شكله مزعوج من شـيي وضايج
سلمت عليه ورحت أصيحله مسك يجوز جاي علمودها لگيتها مجهزه حالها
-هــا شِــنو ترحين ويه كنان ترى اجه موجود جوه
مسك:-اي ، أگلچ شفتيه ضايج ؟
هرم:-اي واضح عليه ضايج وماله خلك مدري مريض
مسك:-الله يستر يمكن بيه شـيي صوته مو طبيعي
هرم:-امشي گاعد بالصالة ينتضرچ
مسك:-طلعت من الغرفة ورحت للصالة أشوف شــكوو سلمت على عمو مسح جبهته بتعب حچه وهو يباوعلي
-مسك بـِـنتي روحي صيحي ديالا وياسين حتى اخذكم للبيت وهم أبقى كم يوم يمكم
مسك:-اي تَـمام عمو دقايق اصيحلهم على ماتشغل سيارتك
كنان:-يـله لعد أنـي طالع قبلكم لاتتأخرون عليه ضهري كُـلش يأذيني
مسك:-سلامتك عمو ماتأخر ، صعدت لديالا خليتها تنزل واني نزلت وراها اخذت اغراضي انطيتهن للعاملة تخليهن بالسيارة لزمتني رفيف وگالت
-وأني وين أبقى
هرم:-تبقين يمي شِــنو معاجبچ ست رفيف ؟
رفيف:-لاا بَــس
هرم:-اي اي عبالچ ماريدچ تبقين هنا لاا حـبـيبتـي أبقي يم رنده هـيَ هَـم تعودت عليچ
رفيف:-أني هَـم تعودت عليها
مسك:-أنـي أسلم عليكم لعد بيباي
هرم:-الله وياچ راسليني أول بأول مسك
مسك:-اي اي لعد شـلون لازم مستجدات انقلّچ ، رجعنا للبيت
أنـي دخلت للغرفة مالتي بدلت وطلعت شفت أبو معاذ بالمطبخ يشرب مي سألته
-عمو مبين عليك تعبان صايــر شـيي ؟
كنان:-تعاركت أني وعابد أخوي وصارت هوسه وماجاي اتقبل اشوف وجهه اذا ما أگب عليه
مسك:-شِــنو سبب الخلاف
كنان:-يفتح دفاتر عتيگه وميحترمني ولا يحترم أمـي المريضه وأحسه صايــر عدو مو أخ أعوذ بالله لاتشغلين بالچ بَــس مسك اذا وجودي هنا مايطمنكم أني اشوفلي غير مكان حتى تاخذون راحتكم لأن انطيتچ كلمه ما أجي
مسك:-لاا عمو البيت بيتك ابقى هنا وهم واضح إنتَ مريض
كنان:-بَــس الله يعلم بحالي
مسك:-عفته ورجعت لغرفتي وجهه أصفر ونحلان بشكل ولاچنه كنان قبل سنه ونص هــيچ بسرعة انتكست حالته وهمل نفسه ، صارت الدنيا ليل طلعت من الغرفه اتعشينا ورجعت نمت عندي هْوايَــه مخططات لازم أسويها .
.
.
هرم:-مروا كم رفيف ورنده كُـلش صديقات صارن يطلعن ويفترن سويه وأني مگابله أم شعر الأصفر وگاعده مناگر طول اليوم ، كعدت الصبح على بوسات بخدي فتحت عيوني إبتسمت ورجعت غمضت وراها إستوعبت فزيت لفيت روحي باللحاف وهوَ ضحك وحك گصته يباوع عليه
-سخيف مو محترم وخر يـله خل أكوم
بحر:-غير مرتي وأذا سخيف بس يمج وعلي
هرم:-رفعت شعري وباوعتله بطرف عيني
-شعجب اليوم هنااا مارايح للشغل
بـَحـر :-ما عندي شي وگلت للولد أني مالي واهس أطلع اليوم صيروا بمكاني عندي مره وبيت وأريد طفل راح أدخل بالعمرين شــوَكت يجي ولي العهد
هرم "ضحكت وأني خجلانه أريد اغير الموضوع"
-يمكن من تمشي على عكازة
بـَحـر:-لاا ما أحب انتظرهالگد أنـي
هرم:-گمت من مكاني طلعتلي ملابس ورحت للحمام أسبح فتحت المي ونفس المعاناة بكُـل مرة كملت سبح بدلت وطلعت لگيت بـَحـر بالغرفة ويحچي بالتليفون وگفت أنشف بشعري وهو سد الأتصال وگال
-جهزي روحچ أنـي راح أروحح أسبح حتى نطلع ناكل بره
هرم:-صفگت بحماس ووافقت هــوَ راح يسبح واني مشطت شعري ولبست تراك رياضي يناسب طلعه صباحيه طلع بـَحـر من الحمام وگف گبالي لزم خدودي يگرص بيهن ويبوسهن حضنّي سمعت صوت صرخات فزينا ثنيناتنا
-سمعت ؟؟
بـَحـر:-هاي خوله
هرم:- طفر وأني وراه رحت شفتها واگعه من الدرج وتبچي وشعرها الأصفر منكوش وتبچي لابسه كيمونه وبجامه
ضميت ضحكتي على شكلها ضلت تبچي وتتحسب على أم موسى شالها بـَحـر بعد ما صاح لرنده تجيب عبايه وهيَ تعيقلت ماقبلت تلبس عبايه بس من شافته عصب لبستها ومسدت السحاب طلع بيها للمستشفى واني سديت باب البيت ورحت بست ام موسى وحضنتها
-اخخ أم موسى إنتِ عالجرررحح والله لچ أحبچ اروحلچ فدوه
أم موسى:-يــاا يمه شبيچ ماسويت شـيي شجاچ
هرم:-انتِ اليوم سويتي شي يفرحني كلش أويلي يمه شحبچ ، بقيت أتغزل بيها وهيَ تبتسم رنده ضاجت عافتنا وراحت لغرفتها ورفيف گعدت تسوي ريوك ويه أم موسى ، كملن الأكل وگعدنا ناكل
ورى ساعه بالضبط اجو بـَحـر وأمه رجلها مجبرينها وهو شايلها وأمه كل شويه تعيط بدلع علمود يهتم بيها وتكس تعاطفه وياها ابتسمت بشماته وگلتلها
-الحمدلله عالسلامه خوله ، دارت وجهها والغضب يتطافر منها بحر طلع بره يخابر شويه واجه قاطفلي وردة من الحديقه وقدمها ألي گدامها
-هاي ألج حبيبي
هرم:-أخذتها من عنده وضحكت
-فديتك والله ، مرت الساعات وأحنا گاعدين يم خوله صــار وقت الغدا گمت ويه أم موسى صبينا أكل
وگعدنا ناكل بـَحـر گعدني بصفه وضل يوكل بيه
وأمه من شافته يوكل بيه عاطت ولزمت رجلها وهو متجاهلها وضلت كل شويه تعيط أخر شـيي رفع راسه يباوعلها
-ها توجعچ
خوله:-دا أموت والله تعال شوفها ألي شبيها
هرم:-عادي اني مره انكسرت أيدي وهم توجعني أول يومين بعدين متحسن بيها ، باوعت على بحر ضاج على وضعها عباله تمثل
-روحي ارتاحي بغرفتج خاله وتمددي أحسن ، بـَحـر همسلي بصوت ناصي
بـَحـر:-كافي هرم عوفيها
هرم:-تمام حياتي أرجع أكل جوعانه اليوم نفسيتي مفتوحه عالأكل ، إندمجت اكل واضحك واتشاقه واسولف ويه رفيف وأم موسى ورنده ضايجه تباوع على امها شلون تتألم واخوها كاعد گامت هـيَ تشوف شبيها وخوله صفنت على رند وحاچتها بكل برود
-بس توجعني
رند أبتسمت واشرتلها أساعدچ ومدتلها أيديها بس خوله تجاهلتها وضلت تتصفح بالتليفون ورنده واگفه متفشله من تصرف أمها
أني من عندي أنقهرت رنده الحساسه شـلون طلعت من الصالة تمشي بسرعه وحسيتها بچت بـَحـر هز راسه بنفاذ صبر وراح وراها يجبر خاطرها
.
.
ديالا:-رجعت من الجم أتمشى المشي اللي بالجم عالجهاز عوضته بالشارع لأن قريب شفت كميل واگف بباب بيت وجد سويت روحي ماشايفته فتت من عنده وردت ادخل للبيت لزم أيدي وسحبني شويه بعيد من البيت علمود مانبين بالكاميرات ضربت رجله برجلي وگلتله بحده
-وخر ايدك راح أكسرها والله وخر
-تعبت منچ شوكت تحسين بيه
ديالا:-مو گلتلك اي نرتبط بعد شكووو ، بعدين أني حزينه على اختي الي قتلتها مرت عمك الشفيه شتريد حب وغزل شتشوفني بيا حال ياسين كاسر ضهري بروحة أمه يحتاجلها وأحسه يشتاقلها مالي حيل لكلشي الدنيا كلها بهتت بعيني
-رخت ملامحه وهدأ من ناحية العصبيه تقرب عليه ورجع لزم أيدي
-أگُلچ
ديالا:-رفعت راسي مطايقه وجوده
-خــيــر ، رجع صــار عصبي وحاچاني بنبرة جافه
-من تشوفين شخص يعاملچ زين لا تخسري بتصرفاتچ الـ*** خوش
-خووش عود من تعدل تعاملك ويايه وتبطل سوالف الحراميه ماا تجرجر بيه وتلزم أيدي أعاملك زين وهسه وخر من عندي
-دفعته ورحت للبيت كل ما أطلع الگاه بوجهي، اي ياكميل اوگع بحفرة ألارانب بعد اريدك
شفت مسك كاعده تصلي صح بالگوه بس أحسن من قبل أبتسمت وضليت اباوع عليها خلصت صلاة طفرت عليها حضنتها وبست خدها
-أحبچ
مسك:-أني هَـم أحبچ أنتِ وهرم وياسين شعندي غيركم بهاي الدنيا
ديالا:-شلونه ياسينو
مسك:-بالگوه نومته ما أعرف أتعامل وياه كُـلش حسيته ينزعج مني
ديالا:-أروحح اشوفه حبيبي
مسك:-راحت ديالا تشوف ياسين واني سمعت باب البيت يندگ طلعت فتحت الباب دخل كنان يمشي ويلزم الحايط واضح عليه التعب
-السلام عليكم
مسك:-وعليكم السلام عمو تريد اصبلك شـيي تاكله
كنان:-ها لا يابه رايح أنام بس وين ياسين
مسك:-جوه نايم يم ديالا
كنان:-أريد اشوفه وانام مشتاقله
مسك:-راح يتمشى بصعوبه لغرفة ديالا حتى يشوف ياسين معقوله عنده مرض وماجاي يگول واضح عليه مريض مرض خطير هَـم وميگول لو مارايحله دكتور مشخص حالته گعدت بالصالة وأني أسمع صوته شـلون يلعب بأبنه ويسولف ويه ديالا
.
.
ديالا:-دخلت للغرفه شفته گاعد مانايم شلته وبسته وأخذت الجنطة مالتي طلعت من عدها دب صغير ما اعرف الجهال شنو يحبون من ألعاب بالضبط لأن اني بعمري مالزمتلي لعبة خاصة بيه
-أتمنى تعجبك ياروحي ، رجعته للفراش مالته اندگ باب الغرفة ودخل كنان سلم عليه وراح لياسين شاله وحچه بصوت مبحوح
-مايشبهني يشبه أمه نفس العيون بَــس الفرق عيونه بُنية ووجد عيونها ملونه
ديالا:-أبتسمت وگعدت على طرف الچربايه
-وخاصةً الحاجب ودورة الوجه فدوه أروحلهم ، إنفتح الباب وأنصدمت بدخول كميل أندار عليه كنان وحاچاه بتعب
كنان:-ها أبويه اليوم هنا
ديالا:-باوعلي وخزرني وهو يسد أيده بقوه رجع باوع على كنان وهز راسه يحاول يصطنع اللامبالاة ويسوي الموضوع طبيعي حچه وهو مركز عيونه بعيوني
-اي أجيت اشوفك
ديالا:-يـله عيني اخذوا راحتكم ، حچيتها ودا أطلع لزم ايدي بقوه
-ديالا هــاي شبيها عيونچ؟
كنان:-شو بنتي باوعيلي خليني اشوفها
ديالا:-دگ تليفون كنان رجع أبنه لمكانه وفتح خط وطلع يجچي بالتليفون واضح ناس مهمين عنده ، جرني كميل من أيدي وحچه بنبرة تهديد
-عيونچ مو شعندچ هنا وحدچ وياه
-شبيك وخر ما يخصك أنتَ مامرتبط بيه علمود هــيچ تتحكم
بحياتي ،دفعته وطلعت من الغرفة شفت سلمى موجوده تبچي وتحچي ويه يعقوب تعبر عن شوقها اله لأن سلمى قلبها طيب ومتتحمل خصام
سلمت عليها وكعدت يمهم شويه ورحت جبت ياسين كعد ، كميل مادامه گاعد ويانه عينه عليه ماشالها مني وضلينا نضحك على ياسين لأن من شاف مسك يريد يروحلها علمود يضربها لو يجرها من شعرها
-ولك بابا سينو عوف چنتي
مسك:-شعندي غيره هذه ابن الغاليه ، حچيتها وياسين يجر بشعري ويضحك
مابقوا شويه وراحوا كنان بقى گاعد بالصالة يباوع اخبار ديالا بغرفتها هـيَ وياسين وأني صعدت شفت زيدون متصل أكثر من عشر مكالمات وبعدها دازلي رسالة كاتب بيها
-راح أبدي بتنفيذ العملية حـبـيبتـي
مسك:-من گلي هيچ فرحت ورحت نمت گعدت الصبح الساعة بالتسعه ما أنسى هذا الوقت ، طلعت مستعجله كنان بعده نايم وديالا مگعده ياسين بصفها وبيدها تليفونها تتصفج بيه شافتني مبدله ومجهزه روحي صاحتلي
-وين رايحه؟؟
مسك:-أدمر معاذ أنهي للهر الأسود
طلعت أجرت تكسي عالسريع ودليته عالمكان وصلت شفت سيارة زيدون موجوده نزلت وأني انزل اشوفه مطلع رجليه من الشباك من شافني نزل رجله وعدل گعدته نزل بسرعه فتحلي الباب الثاني وضحك بمكر
-هلا گلب كلبي
مسك:-صعدت ماجاوبته أكتفيت من خزرته وزاد ضحك صعد وگال
-هسه راح يجون الشرطه ياخذونه مايخلون حتى أثر اله ميبقى
مسك:-بعده يسولف طبگن سيارات مال شرطة ثنين ودخلوا للمكان مال شغل معاذ
شويه وطلعوا الشرطة وهمَ لازمين معاذ والموضفين كلهم طلعوا يشوفون شــكوو من غير الناس اللي بالشارع ضحكت بخبث ونزلت من السيارة وزيدون يمشي ورايه
شفت معاذ شعره مخربط وعيونه حمر واضح عليه مانايم يمشي وعيونه تدور أعرف يدورني لأن يدري أني سبب اللي صــار وياه
تقربت أكثر لحد ماشافني مابدرت من عندي أي ردة فعل لحد ماشاف زيدون واگف بصفي وهو تخبل يصيح ويدفع بالشرطي يريد يوصل ألي ولزيدون
وهمَ عبالهم يريد يشرد منهن
ألشرطة سحلوه للسيارة وهوَ يصيح ودمه يغلي من العصبية
-لك عار عوفني
-ضرب ألشرطي اللي بصفه براسه ضلوا يدفعون بيه دخلوه للسيارة وأخذوه وراحوا
گلبي وجعني بس بلحضتها تذكرت من دخلني مستشفى مجانين وشلون سحبوني گدامه وهوَ بكل برود يباوع ، نفس ماسوه هوَ أني سويت نظرتله نفس النظرة وأبتسمت نفس الأبتسامة
بس أكو شعور بداخلي يگلي كملي يستاهل لا تسامحي أنداريت شفت زيدون يطلع من جيبه حب ويكرز ضحك وگال
زيدون :-يـله أمشي نرجع
مسك:-لا عندي شغل أني روح انتَ لشغلك ، عفته ومشيت وبس صوت الحب هوه يطكه بأسنانه المقرف ورحت لعبد الرحمٰن كالعادة لازم طفل ويكتل بي ويدرب شافني وضحك
عبدالرحمٰن:-هلا حي الله من سيرعلينا تفضلي مسك
مسك:-الله يحييك ، من حچيتها صفن بوجهي
-لا لا ما أطول كلمتين أگولهن واروح
.
.
هرم:-مشغلة فلم رعب ورنده بصفي ورفيف گاعده مقرفصه وأني معانده اله أباوع ، بـَحـر طالع وامه بالغرفة صارت لقطة مخيفه گمنا نصرخ بلا وعي
رفيف:-ولچ يمه يمه إنتبهي يــاا ثوله وراچ وراچ بسم الله الرحمٰن الرحيم
هرم:-ههههههههه الله يرحمها ماتت چانت خوش مره لچ رفيف لتخافين هــوَ مجرد تمثيل ، مخليه جبس وحلويات وعلبة أيسكريم اللي مليانه ككاو بحضني
طلعت خولة من الغرفة بمساعدة العاملة باوعتلي بأنزعاج وگالت
-ايع شنو هالقرف هذا شمسوية بالبيت وينك يمه بَـحر تعال شوف هاي الأوڤر وكت خلاك بهذا الوضع الرديئ
هرم:-شتردين ، حـبـيبتـي ألبيت بيتي وبكيفي أوصخ أصخم ألطم معليچ
خوله:-يمه تگلي ألبيت بيتي يعني تطرديني من بيت أبني أني الچ خلي يجي اليوم اعرف شـلون أتصرف
-نقرت على خشمي ثلاث نقرات وباوعتلها بمكر
-شوفي تره أني مخبلة روحي من يمي لأن ماعندي قاعدة احترام الكبير ومن هالجعمصه فـ أتوكلي بالله وروحي لغرفتچ وكفي الشر ، همست بصوت مسموع
-ألنوب عليه أم شعر كركمي
أنفعلت من كلامي وضلت تصيح ورنده راحتلها تهديها دفعت رنده بقوه وصاحت
خوله:-شو دولي انتِ الخرسة لابارك الله بيچ گطيعه تگطعچ
حچتها ورنده أنهضمت وعيونها گامت تلمع بحزن حاسه بشعورها حرفيًا خوله نسخة من خيزران، رحت يمها لزمت أيدها ولويتها إلها وصرخت بوجهها بأنفعال
-ولچ الخرسه هاي اللي تحچين عليها تسواچ وتسوه عشرة من أمثالچ أنتِ بس فهميني هم حاسبه روحچ بشرر
على شنو شايفه روحچ اصلًا شلون عايشه هَـم تنامين وتكملين حباتچ مرتاحه عادي وأكو شهص ديبچي ويتأذى بسببچ ، ليش بعدچن عايشات ومرتاحات حتى اللي يقهر حلوات شتردن من الله بعد
أنتِ وعزرائيل شنو من أمهات انتن بسببچن دمرتن طفوله ومستقبل وحياة كامله وحدة تذبهم وتروح ويـه عشيقها والثانية اووف
أخذت نفس واني بعد ماگدرت اسيطر على روحي بدون ما احس تخيلتها أمي عضيت ايده قوي وگلتلها الله يطلع حوبتنا بيچن بس انتِ اذا بقيتي هنا اكثر يجوز اني اطلع روحچ
دفعتها عالخفيف وگعت روحها عالتخم رنده راحت عليها تساعدها وبچت وهيَ دفعت رنده صحتلها
-إنتِ ابقي هيج عبالچ هاي ام ولچ ذني عگارب سود كابوس اسود سديت الباب مال غرفتي واسمعها تغلط وتفشر بصوت عالي وحتى كفر كفرت
تعجبت شنو هالبشر ما متندمه على اللي سَـويته ابد ولاشويه
أجه بـَحـر وهم ضلت تتمسكن وتسوي روحها فقيرة وگبت العيطه بَــس هالمرة أخذها وياه وراح يمكن يأجرلها فندق
.
.
يتبع (موعد البارت القادم يوم الأثنين)